Archives January 2020

کراچی(ایمرا نیوز آن لائن) دسمبر 2019 کے اختتام پر تارکین وطن کی ترسیلاتِ زر 2.09 ارب ڈالر رہیں۔ بیرون ملک مقیم پاکستانیوں کی جانب سے بھیجء گئی رقوم کا یہ حجم 7 ماہ میں سب سے زیادہ ہے۔اسٹیٹ بینک آف پاکستان کی جانب سے گذشتہ روز ( ہفتے کو) جاری کردہ رپورٹ کے مطابق دسمبر میں تارکین وطن کی جانب سے بھیجی گئی رقوم نومبر 2019 کے مقابلے میں 15 فیصد اور دسمبر 2018ء کے مقابلے میں 20 فیصد زیادہ رہیں۔ ایک بڑے بینک کے ترسیلات زر کے شعبے کے سربراہ کے مطابق بیرون ممالک میں مختلف کمپنیوں میں پاکستانیوں کو ملنے والی ملازمتوں نے ترسیلات میں اضافے میں اہم کردار ادا کیا ہے۔

بیورو آف امیگریشن اینڈ اوورسیز ایمپلائمنٹ کے مطابق 31 دسمبر 2019 کو ختم ہونے والے سال میں اوسطاً یومیہ 1700 پاکستانی بیرون ممالک میں ملازمتیں حاصل کرنے میں کام یاب رہے۔ 2018 میں یہ اوسط 1000 افراد یومیہ تھی۔

بیورو آف امیگریشن اینڈ اوورسیز ایمپلائمنٹ کی ویب سائٹ پر موجود اعدادوشمار کے مطابق گذشتہ برس 625203 پاکستانی محنت کش روزگار کے سلسلے میں بیرون ملک گئے۔ 2018 میں یہ تعداد 382439 تھی۔ 2019 میں بیرون ممالک میں روزگار کمانے والے پاکستانیوں کی تعداد بڑھ کر 11.11 ملین ہوگئی۔

دسمبر 2019 کے دوران سعودی عرب سے کارکنوں نے 472.94 ملین ڈالر، عرب امارات سے 427.56 ملین ڈالر، امریکا سے 357.45، برطانیہ سے324.57، گلف کے ممالک سے 205.73 ملین ڈالر اور یورپی ممالک سے 56.42 ملین ڈالر وطن بھیجے۔ملائیشیا، ناروے، سوئٹزرلینڈ، آسٹریلیان، کینیڈا، جاپان اور دیگر ممالک سے تارکین وطن نے 252.56 ملین ڈالر پاکستان بھیجے۔

رواں مالی سال کے ابتدائی 6 ماہ ( جولائی تا دسمبر) میں ترسیلاتِ زر کا مجموعی حجم 3 فیصد اضافے سے 11.39 ارب ڈالر رہا۔ گذشتہ مالی سال کے اسی عرصے میں باہر سے آنے والے رقوم کا حجم 11.03 ارب ڈالر رہا تھا۔

ٹورس سیکیورٹیز کے ڈپٹی ہیڈ آف ریسرچ مصطفیٰ مستنصر نے کہا کہ دسمبر میں ترسیلاتِ زر میں اضافے کا تعلق سردیوں کی تعطیلات سے ہے۔ ہر برس اس موسم میں تعطیلات کی وجہ سے کارکنان اپنے گھروں کو زیادہ رقم بھیجتے ہیں۔ بیشتر ممالک میں اس موسم میں، اور خاص طور پر کرسمس کی تعطیلات میں فروخت کا حجم بڑھ جاتا ہے۔ اسی وجہ سے آجر اپنے ملازمین کو بونس بھی دیتے ہیں۔ اور یوں وہ اپنے گھروں کو زیادہ رقم بھیجنے کے قابل ہوجاتے ہیں۔

لاہور(ایمرا نیوز آن لائن) قومی کرکٹر عماد بٹ کا کہنا ہے کہ قومی ٹیم میں عبدالرزاق کی کمی پوری کرنے کی کوشش کروں گا۔
قذافی اسٹیڈیم میں میڈیا سے بات کرتے ہوئے قومی کرکٹر عماد بٹ کا کہنا تھا کہ جنوبی افریقا کے جیک کیلس میرے فیورٹ کھلاڑی ہیں، پاکستان کے لیے کھیلنا کسی کے لیے بھی اعزاز کی بات ہوتی ہے، بنگال ٹائیگرز کے خلاف موقع ملا تو بہترین کارکردگی دکھانے کی کوشش کروں گا۔عماد بٹ کا کہنا تھا کہ عبدالرزاق کی کمی ضرور محسوس ہوتی ہے، گرین شرٹس میں یہ خلا پوری کرنے کی کوشش کروں گا، میں کسی ایک شعبے میں نہیں بلکہ بیٹنگ بولنگ اور فیلڈنگ تینوں میں نام کمانا چاہتا ہوں، خواہش ہے کہ بطور آل راؤنڈر پہچانا جاؤں۔ عماد بٹ نے کہا کہ پاکستان میں اپنے کراؤڈ کے سامنے کھیلنا اعزاز کی بات ہے، بنگلا دیش اچھی ٹیم ہے، عمدہ پرفارمنس دینے کی کوشش کریں گے۔ ایک سوال پر انہوں نے کہا کہ کوشش ہوتی ہے کہ اچھا پرفارم کر کے سیلکٹرز کے اعتماد پر پورا اتروں۔

لاہور (ایمرا نیوز آن لائن) چراغ تلے اندھیرا /پنجاب کا شیر شاہ سوری ثانی عثمان بزدار کی ناقص ترین کارکردگی پنجاب کی حالت سنوارنے کے دعویدار عثمان بزدار کا اپنا علاقہ ہی قبضہ مافیا کی زد میں آگیا

وزیر اعلیٰ پنجاب کے علاقے میں مستقبل کے معماروں کی درس گاہ پر قبضہ کر لیا گیا گورنمنٹ کمپری ہینسو ہائی سکول ڈی جی خان پر قبضہ مافیا کا راج عثمان بزدار کے علاقے کے سکول کے پرنسپل نے قبضہ واگزار کروانے کی استدعا کر دی

گورنمنٹ کمپری ہینسو ہائی سکول ڈی جی خان کی 6 کنال اراضی سے قبضہ واگزار کروانے کا مطالبہ سکول پرنسپل کی درخواست پر محکمہ سکول ایجوکیشن بھی خواب غفلت سے بیدار ہو گیا

کمشنر، ڈپٹی کمشنر اور چیف ایگزیکٹو آفیسر سے رپورٹ طلب محکمہ سکول ایجوکیشن کی جانب سے ڈیرہ غازی خان میں سکول پر قبضے سے متعلق رپورٹ طلب کر لی گئی

ریاض(وقت آن لائن)خادم حرمین شریفین شاہ سلمان بن عبدالعزیز نے ریاض میں پاکستان کے چیئرمین جوائنٹ چیفس آف اسٹاف کمیٹی جنرل ندیم رضا سے ملاقات کی، دونوں ممالک کے مابین قریبی تعلقات اوربالخصوص فوجی میدان میں تعاون بڑھانے کے طریقوں کا جائزہ لیا گیا۔

ملاقات میں شہزادہ عبد العزیز بن سعود بن نایف بن عبد العزیز، وزیر داخلہ، شہزادہ خالد بن سلمان بن عبد العزیز، نائب وزیر دفاع، شاہ سلمان کے معاون سکریٹری تمیم بن عبد العزیز السلیم اور سعودی ملٹری اٹیچی بریگیڈیئر اودھ بن عبد اللہ الزہرانی نے شرکت کی۔

پاکستان کی جانب سے ملاقات میں پاکستان کے سفیر راجہ علی اعجاز، لاجسٹک کے ڈائریکٹر جنرل اور جوائنٹ چیفس آف اسٹاف میجر جنرل سرفراز طاہر، اور مملکت میں پاکستان کے ملٹری اتاشی، بریگیڈیئر ہارون اسحاق راجہ نے شرکت کی.

لاہور (ایمرا نیوز آن لائن)پاکستان تحریک انصاف کے اتحادی اور سپیکر پنجاب اسمبلی پرویز الہیٰ نے مذاکرات کیلئے نئی حکومتی کمیٹی پر رد عمل دیتے ہوئے کہاہے کہ پہلی کمیٹی سے مذاکرات کے بعد معاملات میں بہتری آئی اور اب حکومت کی نئی کمیٹی سامنے آ گئی ہے ۔
، ایک کمیٹی بنتی ہے اور دوسری ڈالی جاتی ہے ۔

تفصیلات کے مطابق سپیکر پنجاب اسمبلی کا کہناتھا کہ ایک کمیٹی بنتی ہے اور دوسری ڈالی جاتی ہے ، ہم نے بھی کمیٹی ڈالی ہے جو ابھی نکلی نہیں ہے ، نئی حکومتی کمیٹی کی سمجھ نہیں آئی ۔انہوں نے کہا کہ ہم سے کیے گئے وعدے پورے ہونے چاہئیں ، چاہتے ہیں کہ حکومت چلے اور اپنی مدت پوری کرے ۔ ان کا کہناتھا کہ ہم جس کے ساتھ چلتے ہیں نیک نیتی سے چلتے ہیں ، حکومت کو نقصان پہنچا تو ہمیں بھی ہو گا، حکومت کے ساتھی ہیں اور اصلاح کر رہے ہیں ، اتحاد کو سوتن نہیں سمجھنا چاہیے ۔

کچھ دیر قبل ق لیگ کے ترجمان کامل علی نے نجی ٹی وی کو انٹریودیتے ہوئے کہا کہ تحریک انصاف سے اتحاد کرنے پر پچھتا رہے ہیں ، پی ٹی آئی کو مونس الہیٰ کو دھکے مار کر نکالنے کی بات نہیں کرنی چاہیے تھی ، اقتدار کے بھوکے ہوتے تو اب تک پرویز الہیٰ وزیراعلیٰ بن چکے ہوتے ۔

نجی ٹی وی کو دیئے گئے خصوصی انٹر ویو میں کامل علی آغاکا کہناتھا کہ ہم وزیراعلیٰ عثمان بزدار کو ہٹانا اور عدم اعتماد نہیں چاہتے ، یہ باتیں ختم ہونی چاہیے ، ہم معاہدہ توڑنے والے نہیں ہیں بلکہ دوستوں کے دوست ہیں ۔ انہوں نے کہا کہ انتخابی اتحاد اور محدود حلقوں پر الیکشن لڑنے پر بھی ہماری اکثریت ناخوش تھی ۔ ان کا کہناتھا کہ بیڈ گورننس اور عوامی مسائل پر ہی ہمارے تحفظات ہیں ، اب مشاورت شروع ہوئی ہے تو دودھ میں مکھی نہیں ڈالنا چاہتے ۔

کامل علی آغا کا کہناتھا کہ آئندہ الیکشن میں اپنے پلیٹ فارم سے لڑیں گے اور سیٹ ایڈجسٹمنٹ ہو گی ، ہم سازشی نہیں ، اس مدت کیلئے پی ٹی آئی سے اتحاد کیاہے تو نبھائیں گے ، سازش کرنی ہوتی تو ن لیگ کی وزیراعلیٰ بننے کی پہلی پیشکش ہی مان لیتے ، میں نے آٹھ ماہ پہلے آفر کا بتایا تھا ، اب رانا ثناءاللہ کہہ رہے ہیں لیکن ہمارا انکار ہے

لاہور(عامر بٹ سے)خادم اعلٰی کی ناقص منصوبہ بندی سے قومی خزانے کو نقصان پہنچانے کی ایک اور داستان سامنے آ گئی۔سرکاری ملازمین کیلئے شروع کی گئی پنک بس سروس سے قومی خزانے کو خطیر رقم کا نقصان پہنچایا گیا۔

ذرائع کے مطابق سرکاری دستاویزات میں پنک بس سروس سے متعلق اہم ترین انکشافات ہوئے ہیں۔دستاویزات کے مطابق سابق پنجاب حکومت کی پنک بسوں کیلئے روٹس کا غلط انتخاب، منصوبے کے فلاپ ہونے کی وجہ بنا، ۔لاہور ٹرانسپورٹ کمپنی انتظامیہ کی ناقص حکمت عملی، منصوبہ مقررہ اہداف حاصل نہ کر سکا، پنک بسوں پر خواتین مسافر کے سفر نہ کرنے پر منصوبہ خسارے کا شکار ہے۔

خواتین کی پنک بس سے مطلوبہ ٹارگٹ کیلئے آمدنی تاحال پوری نہ ہوئی، سبسڈی کی مد میں نقصان بھی الگ سے ہوا۔

ذرائع کے مطابق سابق وزیراعلی پنجاب شہباز شریف نے پنجاب سول سیکریٹریٹ سے آراے بازار ،باگڑیاں سے ریلوے سٹیشن تک پنک بسیں چلائیں۔منصوبے سے قبل سروے میں 211 مسافر خواتین کا بتایا گیا، ای ٹکٹنگ رپورٹ میں 55 جواتین مسافر ہی نکلیں۔اس منصوبہ کو ناقص منصوبہ بندی سے فی مسافر خاتون 500 سے زائد سبسڈی دی گئی تھی۔

لاہور(عامر بٹ سے)ضلعی ترقیاتی منصوبوں کی منظوری میں جہانگیر ترین نے سب کو مات دے دی.جبکہ صوبے بھر میں 250 سے زائد جبکہ لودھراں میں صرف ایک ترقیاتی منصوبہ تاحال منظوری کا منتظر ہے۔
وزیراعظم کے ضلع میانوالی کے 5، عثمان بزدار کے آبائی حلقے ڈی جی خان کے 20،حکومت کے اتحادی چوہدری برادران کے گجرات کے 3 ترقیاتی منصوبے بھی منظوری کے منتظر ہیں۔

39 ارب سے زائد مالیت کے 31 منصوبوں کیلئے 1 ارب 90 کروڑ روپے مختص کئے گئے ہیں۔

ذرائع کے مطابق میانوالی، ڈی جی خان، گجرات اور لودھراں کے غیر منظور شدہ منصوبوں میں عوامی فلاحی سکیمیں بھی شامل ہیں۔ وزیر اعظم، سپیکر صوبائی اسمبلی سمیت ضلع بھر میں ہائیر ایجوکیشن، پانی کی فراہمی، سوشل ویلفیئر، توانائی سمیت اہم منصوبے بھی التوا کا شکار ہیں۔

میانوالی، ڈی جی خان یونیورسٹیز، کیٹل مارکیٹس ،گجرات میں دارالامان کا منصوبہ بھی تاحال منظور نہ ہو سکا۔ڈیرہ غازی خان میں صحت کے بنیادی مراکز پر سولر پینلز کی تنصیب بھی منظوری کے منتظر ہیں۔

کراچی (وقت نیوز آن لائن )کاروبار کے آغاز میں انٹر بینک میں ڈالر کی قدر میں معمولی اضافہ ہو ا ہے جبکہ دوسری جانب سٹا ک مارکیٹ میں بھی مثبت رجحان پیدا ہو گیاہے ۔
تفصیلات کے مطابق انٹر بینک میں ڈالر کی قیمت میں تین پیسے اضافہ ہواہے جس کے بعد ڈالر 154 روپے 40 پیسے پر ٹریڈ کر رہاہے ، ڈالر انڈیکس پانچ پوائنٹس اضافے کے ساتھ 97.92 پر پہنچ گیاہے ۔
دوسری جانب سٹا ک مارکیٹ میں کاروبار کا آغاز ہوا تو انڈیکس 41 ہزار 903 پر تھا تاہم اس میں کچھ ہی دیر میں اضافہ ہونا شروع ہو گیا اور اب تک 100 انڈیکس 166 پوائنٹس کے اضاف کے ساتھ 42 ہزار 70 پوائنٹس کی سطح پر پہنچ گیاہے ۔یہاں پر یہ امر بھی قابل زکر ہے کہ عالمی منڈی میں تیل کی قدر میں 1.15 ڈالر اضافہ ہو گیاہے جس کے بعد فی بیرل تیل 53.29 ڈالر کا ہو گیاہے ۔ اس کے علاوہ سونے کی قیمت میں 12.50 ڈالر کمی دیکھنے میں آئی ہے اور اس وقت سونا فی اونس 1571 ڈالر ہو گیاہے ۔

اسلام آباد(وقت نیوز آن لائن)کرونا وائرس سے بچنے کیلئے حکومتی اقدامات کا سلسلہ جاری ہے۔چین سے آنے والی تمام پروازوں کے پاکستان آنے پر پابندی عائد کردی ہے جبکہ کروناوائرس سے مشتبہ شخص کے علاج کیلئے ڈاکٹرز کو مخصوص لباس پہننے کی ہدایت کردی گئی۔
نجی ٹی وی کی رپورٹ کے مطابق حکومت نے کرونا وائرس کے علاج کیلئے مخصوص لباس خریدنے کیلئے مختلف کمپنیوں سے رابطہ کرلیا ہے۔ ایک لباس کی قیمت تین ہزار ڈالرز بتائی جاتی ہے جبکہ مخصوص لباس کو صرف ایک بار پہنا جاسکے گا۔قومی ادارہ برائے صحت نے ہدایت کی ہے کہ کوئی بھی ڈاکٹر بغیر خصوصی لباس کے کسی مریض کے قریب نہ جائے ۔
دوسری جانب حکومت نے ایک اور بڑا قدم اٹھاتے ہوئے چین سے آنے والی تمام پروازوں کا سلسلہ روک دیا۔ آئندہ احکامات تک چین سے کوئی پرواز پاکستان نہیں آئے گی۔قبل ازیں ایئرپورٹس پر سکریننگ سسٹم نصب کئے گئے ہیں جبکہ گزشتہ روز پنجاب حکومت نے صوبائی وزیر صحت کی زیر صدارت ایک کمیٹی قائم کی گئی ہے جو ہسپتالوں کی مانیٹرنگ کرے گی اور حفاظتی انتظامات کا جائزہ لے گی۔ یہ کمیٹی وفاق، عالمی ادارہ صحت اور دیگر عالمی اداروں سے روابط کی بھی مجاز ہوگی۔

وہان (وقت نیوز آن لائن) تبدیلی سرکار ایک مرتبہ پھر ناکام دکھائی دے رہی ہے اور کرونا وائرس پھیلنے کے خدشے کے پیش نظر چین میں پھنسے پاکستانیوں کو بھی واپس لانے سے گریزاں ہیں جس کی وجہ سے وہاں محصور پاکستانی طلبا برس پڑے ہیں جن کی نئی ویڈیو سامنے آگئی ہے ۔یہاں یہ امر بھی قابل ذکر ہے کہ کرونا وائرس کے خطرے کے پیش نظر پاکستان نے چین کیلئے فضائی آپریشن معطل کردیا ہے جبکہ وزیراعظم کے معاون خصوصی برائے صحت ڈاکٹر ظفر مرزا کا کہنا ہے کہ کرونا وائرس پھیلاو کے خدشے کے پیش نظر لوگوں کو چین سے نہیں نکال رہے ہیں۔