Archives March 2021

پاکستان کرکٹ بورڈ پی ایس ایل 6 کے ملتوی شدہ میچ 23 مئی سے 20 جون کے درمیان کروانے کی منصوبہ بندی کر رہا ہے۔

پی ایس ایل کے چھٹے ایڈیشن کے 20 میچ چند کھلاڑیوں میں کورونا وائرس کی تشخیص کے باعث ملتوی کر دیئے گئے تھے ۔

اب ذرائع کا کہنا ہے کہ ملتوی ہونے والے میچز 23 مئی سے 20 جون کے درمیان کروانے کے لیے تمام فرنچائز سے مشاورت مکمل ہوگئی ہے ۔

واضح رہےکہ ابتدائی طور پر پی ایس ایل کا دوسرا مرحلہ لاہور میں ہونا تھا لیکن کورونا کیسز کے بعد پی سی بی پہلے ہی بقیہ تمام میچز کراچی میں کروانے کا اعلان کر چکا ہے۔

کراچی: پاکستانی نوجوان راشد نسیم کا ریکارڈ گنیز ورلڈ ریکارڈ نے منظور کر لیا۔

مارشل آرٹس ماسٹر راشد نسیم نے نن چکو کیٹیگری میں چایئنیز کنگ فو ماسٹر کو شکست دے دی۔ راشد نسیم کے ریکارڈ کی تعداد 65 ہو گئی۔ گنیز ورلڈ ریکارڈ نے ای میل کے ذریعے تصدیق کرتے ہوئےتفصیلات ویب سائٹ پر جاری کردیں۔

راشد نسیم دنیا میں سب سے زیادہ ماشل آرٹس عالمی ریکارڈ بنانے والے بن گئے، انہوں نے نیا ریکارڈ معروف کوہ پیما محمد علی سدپارہ کوخراج عقیدت پیش کرنے کے لیےبنایا۔ سابقہ ریکارڈ چین کے کنگفو ماسٹر xie desheng کے پاس تھا،جس نےایک منٹ میں بوتل کے درمیان میں رکھے 14 تاش کے پتوں کو نن چکوکی مدد سے بوتل کو گرائے بغیر نکالا تھا۔
راشد نسیم نے 19 مرتبہ یہ کارنامہ انجام دے کر عالمی ریکارڈ بنا ڈالا،راشد نسیم نے نن چکو کیٹیگری میں 7واں عالمی ریکارڈ اپنے نام کیا۔

راشد نسیم کا کہنا ہے کہ میرا عزم پاکستان کے لیے 100 ریکارڈ مکمل کرنا ہے،حکومتی سرپرستی نہ ہونے کے باوجود پاکستان کا نام بلند کر رہا ہوں، عوامی ستائش پر شکر گزار ہوں۔

پی سی بی کے انتظامی مسائل نے احسانی مانی اور وسیم خان کی پوزیشن کمزور کردی۔

چیئرمین پی سی بی احسان مانی کے 3سالہ کنٹریکٹ کی مدت رواں سال ستمبر کے اوائل میں ختم ہوجائے گی،دوسری جانب چیف ایگزیکٹیو وسیم خان کا معاہدہ فروری 2022تک ہے مگر اس میں فریقین کی رضامندی سے ایک سالہ توسیع کا شق شامل ہے۔

اگرچہ بورڈ کے دونوں بڑے مزید کام جاری رکھنے کی خواہش کا اظہار کرچکے مگر یہ معاملہ پہلے کی طرح سادہ اور آسان نظر نہیں آرہا،سابق سربراہان نجم سیٹھی اور شہریار خان کی کاوشوں سے غیر ملکی ٹیموں کی آمد کا جو سلسلہ شروع ہوا تھا، اس کو آگے بڑھاتے ہوئے موجودہ مینجمنٹ نے جنوبی افریقی ٹیم کی میزبانی کامیابی سے کی۔
پاکستان نے سیریز بھی جیت لی،پوری پی ایس ایل پاکستان میں کرانے کا حوصلہ بھی پیدا ہوا، اس کو تھوڑا بہتر کریڈٹ لینے کا دعویٰ بھی کیا جا سکتا ہے مگر فاش انتظامی غلطیوں کی وجہ سے پی ایس ایل 6کا میلہ جس طرح اجڑا پی سی بی کے دونوں بڑے بھی اس پر سخت تنقید کی زد میں آئے،وزیر اعظم کی ہدایت پر بنایا جانے والا نیا ڈومیسٹک اسٹرکچر ابھی تک مکمل نہیں ہوسکا، قومی ٹیم کی بیرون ملک شکستوں کا سلسلہ بھی نہیں تھما۔

ذرائع کا کہنا ہے کہ پی ایس ایل کے التوا کا سبب بننے والی غلطیاں نظر انداز کرنا چیف پیٹرن اور وزیر اعظم عمران خان کیلیے بھی آسان نہیں ہوگا،اگر ستمبر میں احسان مانی کی رخصتی ہوگئی تو نئے چیئرمین کی تقرری کے بعد چیف ایگزیکٹیو وسیم خان بھی عہدے پر رہنے کا اخلاقی جواز کھوبیٹھیں گے۔

وفاقی وزیر برائے بین الصوبائی رابطہ ڈاکٹر فہمیدہ مرزا نے کہا ہے کہ فٹبال فیڈریشن کے واقعہ سے حکومت کا کوئی تعلق نہیں، ہم چاہتے ہیں فیفا نارملائیزیشن کمیٹی کو پورا وقت دیا جائے۔

اسلام آباد میں پریس کانفرنس کرتے ہوئے ان کا کہنا تھا کہ ذاتی مفادات کی وجہ سے اسپورٹس کو نقصان ہو رہا ہے، نارملائزیشن کمیٹی کا مینڈیٹ جون تک ہے، ہم نہیں چاہتے کہ فٹبال کا کھیل پاکستان میں متاثر ہو، نارملائزیشن کمیٹی فٹ بال فیڈریشن کے انتخابات کرائے۔

فہمیدہ مرزا نے کہا کہ نئے ڈی جی کو میرٹ پر لایا گیا ہے، میں کسی قسم کے پریشر میں نہیں آؤنگی، چاہتی ہوں جب میری وزارت ختم ہو تو ایک ٹرانسپریٹ نظام دے کر جاؤں، ماضی میں جانے کے بجائے آگے جانا چاہتی ہوں، عدالت اور میڈیا ہمارے ہاتھ مضبوط کرے۔

ان کا کہنا تھا کہ ہمیں کہا جاتا ہے کہ فیڈریشن کے معاملات میں دخل اندازی نہ کی جائے، ہم اپنے ذاتی مفادات میں آکر ملک کو نقصان پہنچاتے ہیں۔ ہم نہیں چاہتے کہ ہمارے بچوں پر کسی طرح کی پابندی آئے۔

انہوں نے بتایا کہ فیفا کو خط لکھا ہے کہ وہ شفاف طریقے سے اس پر کام کرے، فٹبال وہ کھیل ہے جس پر انفراسٹرکچر کی ضرورت نہیں ہوتی، جو بھی مینڈیٹ ملا ہے اس کو حکومت تسلیم کرتی ہے، فیفا کی انتظامیہ سے درخواست ہے کہ ہمیں وقت دیا جائے۔

خیال رہے کہ کھیلوں کے بین الاقوامی ادارے فیفا نے پاکستان فٹبال فیڈریشن کو الٹی میٹم دیا ہے کہ اگر لاہور آفس سے غیر قانونی قبضہ نہ کیا گیا تو اسے بین کر دیا جائے گا۔

فیفا کی جانب سے جاری اعلامیہ میں کہا گیا ہے کہ نارملائزیشن کمیٹی کیساتھ ہونے والے سلوک پر پرزور مذمت کرتے ہیں۔ معاملے کو بیورو آف کونسل میں اٹھایا جائے گا اور اس پر مستقبل میں فیصلہ کیا جائے گا۔

فٹبال کے عالمی ادارے نے کہا ہے کہ 27 مارچ کو اشفاق حسین گروپ نے فٹبال ہاؤس کو اپنے قبضے میں کرتے ہوئے نارملائزیشن کمیٹی کو کام کرنے سے روک دیا تھا۔

ذرائع کا کہنا ہے کہ اگر دفتر پر قبضہ ختم نہ کیا گیا تو پاکستان فٹبال فیڈریشن پر 5 سال تک پابندی لگ سکتی ہے۔

پاکستان کے ایور گرین اسٹار ہمایوں سعید کے چاہنے والے ناصرف پاکستان میں موجود ہیں بلکہ سرحد پار بھی ان کے مداحوں کی بڑی تعداد موجود ہے۔

جس کی ایک حالیہ مثال اداکار کو بھارت سے موصول ہونے والی شادی کی پیشکش ہے۔سماجی رابطے کی ویب سائٹ ٹوئٹر پر ایک صارف نے ہمایوں سعید کے نام مختصر پیغام شیئر کرتے ہوئے انہیں شادی کی پیشکش کی ہے۔

ٹوئٹر پر شیئر کیے گئے پیغام میں صارف نے لکھا کہ ڈیئر ہمایوں سعید کیا تم مجھ سے شادی کرو گے؟ جانتی ہوں تم شادی شدہ ہو لیکن کیا ہی کروں اس دل کا؟

خاتون صارف نے اپنے پیغام میں مزید لکھا کہ میں بھارت سے ہوں اور میں تمہیں شدت سے چاہتی ہوں، میں تم سے 24 سال چھوٹی ہوں لیکن تمہیں بہت سنجیدگی کے ساتھ چاہتی ہوں۔

صارف نے مزید لکھا کہ پلیز مجھے بتائیں کہ کیا آپ مجھ سے اگلے جنم میں شادی کریں گے؟ اس زندگی میں تو یہ ناممکن ہے۔

صارف کی جانب سے شادی کا پیغام شیئر کرتے ہی جہاں سوشل میڈیا صارفین کی جانب سے دلچسپ تبصروں کا آغاز ہوا، وہیں ہمایوں سعید بھی پیغام کا جواب دیے بغیر نہ رہ سکے۔

ہمایوں سعید نے صارف کی شادی کی پیشکش کا جواب دیتے ہوئے لکھا کہ مجھے پیار کرنے کا شکریہ، مگر شادی کے لیے ان شاء اللہ آپ کو مجھ سے بہتر لوگ مل جائیں گے۔

90 کی دہائی میں بالی وڈ اداکار سلمان خان کی گرل فرینڈ رہنے والی اداکارہ سومی علی نے انکشاف کی ہے کہ سلمان خان نے انہیں دھوکہ دیا جس کی وجہ سے دونوں کا ‘بریک اپ’ یعنی علیحدگی ہوئی۔

عموماً لوگ سمجھتے ہیں کہ سنگیتا بجلانی ، ایشوریا رائے اور کترینہ کیف سلمان خان کی گرل فرینڈز رہی ہیں لیکن بہت کم لوگ اب ایسے جو سومی علی کا نام سے واقف ہیں۔

بھارتی میڈیا کے مطابق حال ہی میں ، سومی علی نے ایک انٹرویو میں اپنی ذاتی زندگی اور فلمی کیریئر کے بارے میں کھل کر بات کی سلمان خان کے ساتھ اپنے تعلق اور پھر بریک اپ پر بھی کھل کر بات کی ۔

سومی نے کہا کہ ‘سلمان اور میرا 20 سال قبل بریک اپ ہوا تھا کیونکہ سلمان نے مجھے دھوکہ دیا۔ جب مجھے اس بارے میں پتہ چلا تو میں نے ان سے تعلق ختم کر دیا اور ہندوستان چھوڑ دیا۔ ‘

سومی نے بتایا کہ وہ بالی وڈ میں صرف سلمان خان کے لیے آئی تھیں اور جب دونوں الگ ہوگئے تو ان کے ہندوستان میں رہنے کی کوئی وجہ نہیں تھی۔

90 کی دہائی میں بالی وڈ اداکار سلمان خان کی گرل فرینڈ رہنے والی اداکارہ سومی علی نے حال ہی میں ایک انٹرویو دیا ہے۔
اس دورانجب ان سے بالی وڈ میں واپسی کے بارے میں پوچھا گیا تو انہوں نے کہا کہ وہ اس انڈسٹری میں فٹ نہیں ہیں لہٰذا ، واپس آنے کا کوئی ارادہ نہیں ہے۔

سومی علی 16 سال کی عمر میں سلمان خان سے شادی کی خواہش لیے بھارت پہنچیں تھیں جہاں انہوں نے کچھ ماڈلنگ پروجیکٹس اور فلموں کے بعد بالآخر سلمان خان سے ملاقات کی۔

یاد رہے کہ سومی پاکستانی نژاد امریکن ہیں اور ان کی پیدائش کراچی میں ہوئی تھی۔ انہوں نے 1991 سے 1998 کے درمیان کرشن اوتار، یادگار غدار، تیسرا کون؟، آؤ پیار کریں، مافیا، چپ سمیت 10 بھارتی فلموں میں کام کیا۔

محبوب کی خاطر چاند تارے توڑ کر لانے کا ذکر یوں تو شاعری میں ملتا ہے لیکن حال ہی میں بھارتی ڈرامے کی ایک وائرل ہونے والی ویڈیو میں ایسا منظر دیکھا گیا تو انٹرنیٹ صارفین حیران رہ گئے۔

بھارتی ٹی وی ڈرامے اپنی مختلف بیک گراؤنڈ میوزک اور میلو ڈرامے کی وجہ سے جانے جاتے ہیں اور حال ہی میں ایک بھارتی ڈرامے کی ویڈیو کے سوشل میڈیا پر بہت چرچے ہیں۔

سوشل میڈیا پر وائرل ہونے والی ویڈیو میں ڈرامے کے ہیرو کو دلہن سے شادی کے لیے چاند کا ٹکڑا زمین پر لاتے دکھایا گیا ہے۔

ڈرامے میں موجود امن نامی کردار کو پہلے رسی کی مدد سے چاند پر جانے کی کوشش کرتے دکھایا گیا ہے اور بعدازاں ناکامی پر اسے گاڑی کے ذریعے خلا میں جا کر کچھ جادوئی الفاظ کے ذریعے چاند کا ٹکڑا زمین پر لے جاتے دکھایا گیا۔

یہ ویڈیو سوشل میڈیا پر وائرل ہونے کے بعد سے انٹرنیٹ صارفین کی جانب سے مزاحیہ تبصرے کیے جارہے ہیں اور یہ پتا لگانے کی کوشش کی جارہی ہے کہ آخر یہ ویڈیو کلپ کس ڈرامے کا ہے۔

وائرل ہونے والی یہ ویڈیو بھارتی ڈرامے ‘یہ جادو ہے جن کا’ کے سیزن ٹو کی ہے جو اسٹار پلس سے نشر ہوتا تھا۔

اس ڈرامے میں روشنی احمد کا مرکزی کردار ادیتی شرما نے ادا کیا ہے جو اپنی شادی کے لیے منعقد کیے گئے سویمور میں کہتی ہیں کہ جو بھی چاند کا ٹکڑا سب سے پہلے لائے گا وہ اسی سے شادی کریں گی۔

وائرل ہونے والی ویڈیو میں چاند کا ٹکڑا توڑ کر لانے والے مرکزی کردار امن جنید خان ہیں اور یہ کردار وکرم سنگھ چوہان نے ادا کیا ہے۔

یہ ڈراما اکتوبر 2019 سے نومبر 2020 کے دوران اسٹار پلس پر نشر ہوا تھا تاہم یہ ویڈیو کلپ گزشتہ چند روز میں وائرل ہوا ہے جس پر ٹوئٹر صارفین کی جانب سے تبصرے کیے جارہے ہیں۔

شمروز نامی صارف نے لکھا کہ ‘کہاں سے آتے ہیں یہ لوگ؟’

دیو نامی صارف کے مطابق لاجک اور سائنس پوچھ رہی ہے کہ ‘کیا کروں میں مرجاؤں’۔

ایک اور صارف نے لکھا کہ ‘تم جو کہہ دو تو چاند تارے توڑ لاؤں گا میں’، یہ اس کا اصل منظر ہے۔

خوش پریت نامی صارف کے مطابق یہ ویڈیو دیکھنے کے بعد فزکس اور نیوٹن کی لاکھوں بار موت واقع ہوئی۔

ایک اور ٹوئٹر ہینڈل نے لکھا کہ مجھے تو وقت پر رپلائی بھی نہیں کیا جاتا۔

ایک اور صارف کے مطابق چاند پوچھ رہا ہے کہ ‘مجھے کیوں توڑا؟’

کیتھرین نامی صارف نے لکھا کہ اسی لیے ہم بھارت سے پیچھے رہ گئے۔

لاہور کی مقامی عدالت نے اداکارہ میرا کے وکلاء کو تکذیبِ نکاح کیس میں بحث کے لیے آخری مہلت دے دی۔

اداکارہ میرا نے تکذیبِ نکاح کیس میں فیملی کورٹ کے فیصلے کے خلاف سیشن کورٹ میں اپیل دائر کر رکھی ہے۔

اداکارہ کا مؤقف ہے کہ عتیق الرحمان ان کا شوہر نہیں ہے، فیملی کورٹ نے حقائق کے برعکس فیصلہ سنایا۔

اداکارہ نے درخواست میں مؤقف اپنایا ہے کہ عتیق الرحمان نے عدالت کو گمراہ کیا اس لیے عدالت فیملی کورٹ کا فیصلہ کالعدم قرار دے۔

اداکارہ میرا کی اپیل پر سماعت آج لاہور کی سیشن کورٹ میں ایڈیشنل سیشن جج رائے خان محمد نے کی۔

سماعت کے دوران اداکارہ میرا کے وکلاء نے بحث کیلئے ایک بار پھر مہلت مانگ لی ۔

عدالت نے میرا کے وکلاء پر بحث نہ کرنے پر ناراضی کا اظہار کیا اور انہیں بحث کرنے کی آخری مہلت دے دی اور سماعت 7 اپریل تک ملتوی کردی۔

ممبئی: بالی ووڈ کنگ شاہ رخ خان نے غیر اخلاقی سوال پوچھنے پر مداح کو شرمسار کردیا۔

شوبز انڈسٹری سے وابستہ معروف شخصیات ہمیشہ مداحوں سے رابطے میں رہتے ہیں اور اس کے لیے وہ نت نئے طریقے متعارف کرواتے رہتے ہیں لیکن سوشل میڈیا خاص طور پر ٹوئٹر اور انسٹاگرام نے فنکاروں کا یہ کام بہت آسان کردیا ہے۔ فنکار اکثر ’’مجھ سے سوال پوچھیں‘‘ کا ہیش ٹیگ استعمال کرتے ہوئے مداحوں کے سوالات کا جوابات دیتے ہیں۔

آج بالی ووڈ کنگ شاہ رخ خان کی جانب سے بھی ٹوئٹر پر askSRK# کا ٹرینڈ چلایا گیا جو بھارت میں ٹاپ ٹرینڈ رہا اور ساتھ ساتھ پاکستان میں بھی ٹرینڈ کرتا رہا۔ سوال جواب کے اس آن لائن سیشن میں بالی ووڈ اسٹار نے مداحوں کے مختلف سوالات کے جوابات دیے تاہم ایک مداح کے غیر اخلاقی سوال پوچھنے پر شاہ رخ خان نے انہیں شرمسار کردیا۔

کملیش آرٹ نامی ٹوئٹر اکاؤنٹ سے شاہ رخ خان سے سوال پوچھا گیا ’’سر آپ کس رنگ کا انڈرویئر پہنتے ہیں‘‘؟

بالی ووڈ کنگ نے انتہائی دلچسپ جواب دیتے ہوئے کہا ’’ میں مداحوں سے askSRK# کا سیشن صرف انہیں بہترین سوالات کے لیے رکھتا ہوں تاکہ لوگوں کی معلومات میں اضافہ ہو۔

شہری ہوجائیں ہوشیار خبردار، ماسک نہ پہننے پر بھی اب چالان ہوگا، گزشتہ 24 گھنٹوں کے دوران سٹی ٹریفک پولیس نے کورونا ایس او پیز کی خلاف ورزی پر 6326 گاڑیوں، موٹرسائیکلوں کو چالان ٹکٹس جاری کردیئے۔

صوبائی دارالحکومت لاہور میں کورونا وائرس تیزی سے پھیل رہا ہےجبکہ شہریوں کی طرف سے مسلسل غیر سنجیدگی اور لاپرواہی دیکھنے میں آرہی ہے۔کورونا وائرس کے پھیلاؤ کو روکنے کیلئے حکومتی مشینری متحرک ہوگئی، سٹی ٹریفک پولیس نے پبلک ٹرانسپورٹ میں کورونا ایس او پیز کی خلاف ورزی پر 9 مقدمات درج کیے جبکہ 50 فیصد سے زائد سواریاں بٹھانے اور کورونا ایس او پیز کی خلاف ورزی پر 46 گاڑیوں کو بند کر دیا۔

ٹریفک پولیس نے حفاظتی ماسک استعمال نہ کرنے پر 4 ہزار 601 موٹرسائیکلوں، 700 رکشوں، 379 کاروں کو چالان ٹکٹ جاری کردیئے، اس دوران 483 پبلک ٹرانسپورٹ، 122 منی مزدا اور 95 ٹرالر کو چالان ٹکٹ جاری کیے گئے۔

سی ٹی او سید حماد عابد کے مطابق شہریوں کے تحفظ کیلئے تمام وسائل بروئے کار لائیں گے، چالان کا مقصد شہریوں کی جانوں کے تحفظ کو یقینی بنانا ہے۔ کار میں بغیر ماسک ایک فرد کا چالان نہیں ہوگا، دو یا دو سے زائد افراد کیلئے ماسک ضروری ہے، موٹرسائیکل پر سنگل سوار ہونے کی صورت میں چالان نہیں ہوگا۔

واضح رہےکہ لاہور میں کورونا خطرناک حد کو چھونے لگا، کیسز کی شرح 27 فیصد ہوگئی، 24 گھنٹوں میں مزید 29 لاہورئیے موت کے منہ میں چلے گئے، 1 ہزار 627 وائرس کا شکار ہوگئے، سرکاری و پرائیویٹ ہسپتالوں میں 639 کورونا مریض داخل ہیں جن میں سے 176 کی حالت تشویشناک ہے۔