Archives February 2023

انٹرنیشنل کرکٹ کونسل (آئی سی سی) کی جانب سے ورلڈکپ 2024 کے لیے براہ راست کوالیفائی کرنے والی ٹیموں کا اعلان کردیا گیا ہے جس کے تحت پاکستان ویمنز ٹیم ٹی ٹوئنٹی ورلڈ کپ کی 6 ٹاپ ٹیموں اور میزبان ملک کے بعد بہتر رینکنگ کی ٹیم قرار پائی۔

آئی سی سی کے مطابق ٹی ٹوئنٹی ورلڈکپ کے لیے8 ٹیموں نے براہ راست کوالیفائی کیا ہے جب کہ دو ٹیمیں گلوبل کوالیفائر سے آئیں گی، 8 ٹیموں نے جنوبی افریقا میں ہونے والے ٹی ٹوئنٹی ورلڈکپ کی بنیا د پر کوالیفائی کیا، ہر گروپ کی ٹاپ تین ٹیموں نے براہ راست کوالیفائی کیا ہے۔

گروپ ون سے آسٹریلیا، نیوزی لینڈ اور انگلینڈ نے براہ راست کوالیفائی کیا جب کہ گروپ ٹو سے انگلینڈ، بھارت اور ویسٹ انڈیز نے براہ راست کوالیفائی کیا۔

بنگلا دیش نے میزبان کی حیثیت سے ورلڈکپ کے لیے کوالیفائی کیا جب کہ پاکستان ان ٹیموں کے بعد بہتر رینکنگ پر موجود ٹیم ہے۔

رواں برس ورلڈکپ کھیلنے والی سری لنکا اور آئر لینڈ کی ٹیمیں براہ راست اگلے ٹی ٹوئنٹی ورلڈ کپ کے لیے کوالیفائی نہیں کر سکیں۔

اسلام آباد یونائیٹڈ کے کپتان شاداب خان کا کہنا ہے کہ شادی کے بعد بس روم میں رہنے لگا ہوں اور کھانا بیگم کے ساتھ کھاتا ہوں ۔

نجی میڈیا سے ویڈیو کال گفتگو کے دوران شاداب نے بتایا کہ میری شادی اتنی اچانک ہوئی  کہ مجھے بھی یقین نہیں آتا، میری کراچی میں شوٹ تھی اور اس کے بعد اسی رات بگ بیش لیگ کیلئے میری رات 2 بجے کی فلائٹ تھی، میری انگلی کا ایشو تھا جس کیلئے کروائے گئے ایکسرے کی رپورٹ بھی اسی  شام کو آنی تھی،  اس شام جب میری رپورٹ آئی تو ڈاکٹڑ نے مجھے جانے سےمنع کردیا، جس کے بعد میں اگلے روز 6 سے 7 بجے کے درمیان گھر پہنچ گیا وہاں پہنچا تو  8 بجے میری منگنی ہوگئی اور اس کے اگلے روز ہی نکاح ہوگیا

شادی کے بعد آنے والی تبدیلی پر بات کرتے ہوئے شاداب خان کا کہنا تھا کہ روٹی گینگ بنایا ہوا تھا لیکن اب بیگم آگئی ہے تو بیگم کے ساتھ کھانا کھاتا ہوں، کنوارے دوست  طعنے مارتے ہیں کہ بیگم کے ساتھ زیادہ رہتا ہوں کیوں کہ شادی شدہ دوست سمجھتے ہیں  ان پر گزر چکی ہے، شادی کو عرصہ ہی کم ہوا ہے فی الحال کوئی تبدیلی نہیں آئی بس اب کمرے میں زیادہ رہنے لگا ہوں۔

حارث رؤف  کی سلامی والے لفافے پر بات کرتے ہوئے کپتان شاداب خان کا کہنا تھا کہ حارث رؤف  نے میری شادی پر انویسٹمنٹ کی ہے لیکن اب اس کی شادی ہونی ہے اور وہ اپنی شادی پر اس انویسمنٹ کا دگنا وصول کرنا چاہتا ہے۔

واضح رہے کہ رواں ماہ شاداب خان سابق  کوچ ثقلین مشتاق کی صاحبزادی کے ساتھ رشتہ ازدواج میں منسلک ہوئے تھے۔

سابق کپتان شاہد آفریدی نے  پشاور زلمی کے کپتان  بابر اعظم سے متعلق گفتگو میں کہا کہ بابر ایک اچھا پلیئر ہے لیکن بطور میچ فنشر بابر نے اب تک خود کو ثابت نہیں کیا۔

نجی  ٹی وی کے شو میں بات کرتے ہوئے شاہد آفریدی نے  26 فروری کو پشاور اور لاہور کے درمیان ہونے والے میچ سے متعلق گفتگو کی۔

سابق کپتان نے بابر کی پرفارمنس پر بات کرتے ہوئے کہ  ’ اس میں یہ خاصیت ہے کہ  بابر وکٹ پر  کھڑے رہ کر دوسرے کھلاڑیوں کو کھلا سکتا ہے کیوں کہ بابر سیٹ ہونے میں  کچھ وقت لیتا ہے، اس میں کوئی شک نہیں کہ بابر ورلڈ کا نمبر ون پلیئر ہے، اس ملک کی پہچان ہے لیکن ایک چیز  بابر کےڈی  ویلیئر اور ویرات کوہلی کے لیول پر  آنے میں رکاوٹ بنتی  ہے وہ فنشنگ ہے، بطور میچ ونر بابر نے اب تک خود کو ثابت نہیں کیا،  میری خواہش ہے کہ بابر میچ فنشر بن کر  میچ کو ختم کرے‘۔

شاہد آفریدی کے بیان پر بابر کے دوست اور پاکستانی پلیئر  امام الحق نے بھی اپنا مؤقف بتایا کہ  بابر کا دوست ہوں  لہٰذا ہماری ڈسکشن میں بھی یہ چیز آتی ہے اور بابر بھی اس چیز کو تسلیم کرتا ہے کہ جس طرح وہ اتنی کرکٹ کھیل چکا ہے تو وہ میچ کو ختم بھی کرکے جائے۔

امام الحق نے کہا کہ بابراعظم بھی تسلیم کرتا ہے  مجھ میں یہ چیز آنی چاہیے کہ  میچ  کو درمیان میں چھوڑ کر جانے کے بجائے میچ فنش کروں جس کے لیے بابر کو اپنے اسٹرائیک ریٹ پر بھی کام کرنا چاہیے تاکہ وہ ففٹی ہوتے ہی اپنی مرضی سے ایسا کھیلے کہ بولر بھی اس کا سامنا کرنے سے  ڈرے۔

اسلام آباد: پاکستان اور آئی ایم ایف کے درمیان سٹاف لیول کا معاہدہ کل (جمعرات ) کو ہونے کا امکان ہے ، ذرائع کے مطابق پاکستان اور آئی ایم ایف کے درمیان اسٹاف لیول معاہدہ 9 فروری کو ہونا تھا جو اب 2مارچ میں ہونے کا امکان ہے ۔ ذرائع کے مطابق گزشتہ روزپاکستان اورآئی ایم ایف کے درمیان مذاکرات نہیں ہوئے جو بجلی بلوں کی رکی ہوئی وصولیاں شروع کرنے کے بعد ہوں گے۔ذرائع کا کہنا ہے کہ قرضہ پروگرام کی بحالی کے لیے آئی ایم ایف کی کئی شرائط پرعمل درآمدکرناہوگا جس کے تحت حکومت کو سیلز ٹیکس میں اضافے کا نوٹی فکیشن اور مانیٹری پالیسی میں اضافے کا بھی اعلان کرنا ہوگا۔ذرائع کے مطابق مانیٹری پالیسی کمیٹی کا اجلاس 16 کے بجائے 2 مارچ کو ہونے کا امکان ہے جس میں مانیٹری پالیسی کمیٹی شرح سود میں اضافے کا جائزہ لے گی اور کمیٹی کے فیصلے سے آئی ایم ایف کو آگاہ کیا جائے گا۔

لاہور: پاکستان تحریک انصاف کے رہنما شہباز گل نے کہا ہے کہ سپریم کورٹ میں کیس چل رہا ہے مگر مریم نواز نے پہلے فیصلہ سنا دیا۔لاہور ہائی کورٹ کے بار میڈیا سے گفتگو کرتے ہوئے شہباز گل نے کہا کہ مریم نواز کہتی ہیں پہلے انصاف ہو گا پھر الیکشن ہو گا۔شہباز گل کا کہنا ہے کہ وہ کہتی ہیں میرے والد کو چور کہا گیا اب دوسروں کو بھی چور کہا جائے۔انہوں نے کہا کہ مجھے مڈل کلاس سے ہونے کی سزا دی جا رہی ہے، میں ای سی ایل سے نام نکلوا کر باہر گیا پھر واپس بھی آیا، میرے اوپر جعلی مقدمے بنائے گئے۔دوسری جانب لاہور ہائی کورٹ میں شہباز گل کا نام ای سی ایل سے نکلوانے کی درخواست پر سماعت ہوئی۔جسٹس جواد حسن نے شہباز گل کی درخواست پر سماعت کی۔سنگل بینچ نے معاملے پر لارجر بینچ بنانے کی سفارش کر دی، کیس کی فائل چیف جسٹس لاہور ہائی کورٹ کو ارسال کر دی گئی۔شہباز گل نے نام ای سی ایل سے نکلوانے کی درخواست دائر کر رکھی ہے۔

اسلام آباد:الیکشن کمیشن نے آئندہ عام انتخابات میں آر ایم ایس کے استعمال کیلئے اہم اقدام اٹھا لیا ہے۔ الیکشن کمیشن کی جانب سے ملازمین کو آر ایم ایس کے استعمال کی ٹریننگ کا آغاز کرنے کا فیصلہ کیا گیا ہے۔ الیکشن کمیشن نے صوبائی الیکشن سے قبل پرانے آر ایم ایس پر ایک دن کی موک ایکسرسائز کافیصلہ بھی کیا ہے۔ صوبائی الیکشن کمیشن نے آرایم ایس مشین پرفرائض انجام دینے والے آپریٹرزکیلئے فہرست جاری کردی ہے۔ صوبائی الیکشن کمیشن آف خیبرپختونخواہ نے تمام ریجنل الیکشن کمشنرزکواس حوالے سے مراسلہ جاری کر دیا ہے۔ الیکشن کمیشن نے اس حوالے سے 23فروری کو بھی تمام ریجنل الیکشن کمشنرز کومراسلہ جاری کیاتھا۔ مراسلہ کے مطابق صبح 10بجے سے دوپہر2بجے تک قومی اسمبلی کی 51نشستوں میں رزلٹ منیجمنٹ سسٹم کے استعمال کی مشق کی جائے گی۔ آپریٹرزصوبے کی 145صوبائی نشستوں میں بھی آر ایم ایس مشین کے استعمال کی مشق کرینگے۔ مراسلہ میں ہدائت کی گئی ہے کہ الیکشن کمیشن آف پاکستان کی جانب سے دی گئی گائینڈ لائنزپرعمل یقینی بنائیں۔ الیکشن کمیشن نے تمام صوبائی الیکشن کمیشنرزاورڈسٹرکٹ الیکشن کمیشنرزکوپہلے ہی پروٹوکولزجاری کی ہیں۔ مشین میں ڈیٹاانٹڑی کرتے وقت اگرمسائل کاسامنا ہوتومتعلقہ الیکشن آفیسر کو رپورٹ کریں۔ مراسلے میں ہدائت کی ہے کہ اس اہم عارضی مشق کوترجیح دی جائے اورتجاویز بھی پیش کریں۔ تمام آپریٹرز کومشق کیلئے یوزرنام اورپاسورڈ بھیج دیاگیا ہے ۔ذرائع کا کہنا ہے کہ الیکشن کمیشن نے آر ایم ایس کو موڈیفائی کرنے کے لیے کروڑوں روپے کا ٹھیکہ بھی دے رکھا ہے۔الیکشن کمیشن دونوں صوبوں میں عام انتخابات، 2018 میں استعمال کردہ رزلٹ مینجمنٹ سسٹم ے ذریعے کروائے جانے کا فیصلہ کیا۔

لاہور:عدلیہ کیخلاف توہین آمیز تقریرکا معاملہ، لاہور ہائی کورٹ میں عدلیہ کیخلاف توہین آمیز تقریر پر مریم نواز کیخلاف توہین عدالت کی درخواست پر سماعت ہوئی۔ جسٹس شجاعت علی خان نے توہین عدالت کی درخواست پر سماعت کی۔عدالت نے سماعت بدھ(آج)تک ملتوی کرتے ہوئے درخواست گزار سے مزید دلائل طلب کرلئے۔دوران سماعت عدالت نے استفسار کیا کہ بتائیے آپ کی درخواست کیسے قابلِ سماعت ہے؟ بتائیے اس عدالت کے پاس سماعت کا اختیار کیسے ہے؟ یہ تو سپریم کورٹ کے ججز کے متعلق ہے تو آپ وہاں جائیں۔درخواست گزار نے موقف اختیار کیا کہ سپریم کورٹ کے ججز کیخلاف توہین آمیز جملے بھرے جلسے میں ادا کیے گئے۔ عدالت نے ریمارکس میں کہا کہ آپ قانون بتادیں کس قانون کے تحت حکم جاری کروں؟ درخواست گزار نے کہا کہ میں نے توہین عدالت کی درخواست دائر کی ہے۔ اسی قانون کے تحت کارروائی کی استدعا کی ہے۔ مریم نواز نے چھ توہین آمیز باتیں کی ہیں۔

ممبئی: بھارتی ملیالم فلم انڈسٹری کے ہدایتکار جوزف مانو جیمز اپنی پہلی فلم کی ریلیز ہونے سے چند دن قبل ہی انتقال کر گئے۔بھارتی میڈیا کے مطابق جوزف مبینہ طور پر ہیپاٹائٹس میں مبتلا تھے اور ان کا علاج جاری تھا لیکن بدقسمتی سے وہ اسپتال میں چل بسے، ان کی عمر 31 برس تھی۔جوزف کا انتقال ان کی ہدایتکاری میں بننے والی پہلی فلم ‘نانسی رانی’ کی ریلیز سے چند روز قبل ہوا۔جوزف مانو جیمز نے بھارتی فلم انڈسٹری میں بطور چائلڈ ایکٹر ڈیبیو کیا، انہوں نے 2004 میں سبو جیمز کی ہدایت کاری میں بننے والی فلم ‘ آئی ایم کیوریس میں بطور چائلڈ ایکٹر کام کیا تھا۔انہوں نے ملیالم اور ہندی فلم انڈسٹریز میں اسسٹنٹ ڈائریکٹر کے طور پر بھی کام کیا۔جوزف کے انتقال پر شوبز انڈسٹری سے تعلق رکھنے والی شخصیات نے افسوس کا اظہار کیا ہے۔

لاہور : گلوکار و اداکار علی ظفر نے پاکستان کی معیشت کے بہتر بنانے کے لیے حکومت کو ایک اہم مشورہ دے دیا۔علی ظفر سوشل میڈیا پر کافی متحرک نظر آتے ہیں اور وہ پاکستان سمیت عالمی مسائل پر بھی تبصرے کر کے ہر شعبے کی بہتری کی کوشش میں اپنا حصہ ڈالتے ہیں۔ ا پنے ایک ٹویٹ میں علی ظفر نے پاکستان کی معیشت کی بہتری کے حوالے سے بھی اپنی رائے کا اظہار کیا ہے۔ اْنہوں نے حکومت کی پاکستان کے سیاحتی شعبے پر توجہ دلاتے ہوئے اپنی ٹوئٹ میں لکھا کہ ’پاکستان کو سیاحت کی شعبے پر توجہ دینی چاہیے کیونکہ صرف اسی ایک شعبے سے ہی ملک کے لیے کافی آمدنی حاصل ہو سکتی ہے۔ ان کا کہنا تھا کہ ہمارے ملک کے شمالی علاقے بہت حیرت انگیز ہیں۔ اْنہوں نے حکومت سے مطالبہ کیا کہ شمالی علاقوں کے علاوہ گوادر پر بھی دبئی کی طرح بیلٹ تیار کریں ساتھ ہی انہوں نے حکومت سے سوال کیاکہ اگر متحدہ عرب امارات اور سعودی عرب یہ کام کر سکتے ہیں، تو پاکستان کیوں نہیں کر سکتا۔ ٹوئٹر صارفین نے علی ظفر کے اس مشورے کو خوب سراہتے ہوئے ان کی بات سے اتفاق کیا ۔ علی ظفر نے اپنی ٹوئٹ میں مزید لکھا کہ ’میں سمجھتا ہوں کہ جو ملک کے لیے اچھا ہے وہ کرنا چاہیے۔ ملک معاشی خوشحالی پر ہی کام کرتے ہیں۔

کراچی : معروف گلوکارہ حدیقہ کیانی اپنے قول کی پکی نکلیں ۔ اداکارہ نے سیلاب متاثرین کے لیے 100 گھروں کی تعمیر مکمل کر لی۔گزشتہ دنوں حدیقہ کیانی کی جانب سے ان کی سیلابی مہم وسیلہ راہ کے تحت بلوچستان کے سیلاب سے متاثرہ علاقوں میں 200 گھروں کی تعمیر کا اعلان کیا گیا تھا جس میں سے 100 گھرو ں کی تعمیر مکمل کر لی گئی ہے۔گلوکار و اداکارہ حدیقہ کیانی نے گھروں کی افتتاح کے موقع پر میڈیا سے گفتگو کرتے ہوئے ان کی مہم کا حصہ بننے والوں کا شکریہ ادا کیا۔گلوکارہ نے بتایا کہ ان کی مہم کے تحت 100 گھروں کی تعمیرات مکمل کر لی گئی ہے جس میں ایک اسکول ایک میٹرنٹی ہوم شامل ہے۔حدیقہ کیانی کا کہنا تھا کہ سیلاب متاثرین میں بڑی تعداد میں حاملہ خواتین شامل تھیں جو موت کا شکار ہو رہی تھیں اس لئیمیٹرنٹی ہوم کا قیام اہم تھا۔ان کا کہنا تھا کہ بہت مشکور ہوں کہ جن لوگوں نے وسیلہ راہ کی اس مہم پر بھروسہ کیا۔ ان کی مدد سے ہم تحصیل تمبو ضلع نصیر آباد بلوچستان میں 100 گھر تعمیر کرنے میں کامیاب ہوئے ہیں۔ساتھ ہی حدیقہ کیا نی نے ان کی مہم میں رہنمائی کرنے اور بھرپور حصہ ڈالنے پر پاک فوج کا بھی شکریہ ادا کیا گلوکارہ کا کہنا تھا کہ پاک فوج کے بغیر یہ کام ممکن نہیں تھا۔