Archives June 2020

لاہور (وقت ٹی وی آن لائن ) پاک فوج کی میجر جنرل نگار جوہر ہلال امتیاز ملٹری کو لیفٹیننٹ جنرل کے عہدے پر ترقی دے دی گئی۔

ڈائریکٹر جنرل انٹرسروسز پبلک ریلیشنز ( آئی ایس پی آر) کے مطابق نگار جوہر پاک فوج کی پہلی خاتون افسر ہیں جنھیں لیفٹیننٹ جنرل کے عہدے پر ترقی دی گئی ہے۔

ڈی جی آئی ایس پی آر کے مطابق لیفٹیننٹ جنرل نگار جوہر کو پاک فوج کی پہلی خاتون سرجن جنرل مقرر کیا گیا ہے ۔

ترجمان پاک فوج کے مطابق لیفٹیننٹ جنرل نگار جوہر کا تعلق خیبر پختونخوا کے ضلع صوابی کے علاقے پنج پیر سے ہے اور وہ اس وقت راولپنڈی میں ملٹری اسپتال کے کمانڈنٹ کے طور پر کام کر رہی ہیں۔

اسلام آباد (وقت ٹی وی آن لائن ) وزیراعظم عمران خان کا کہنا ہے کہ پاکستان اسٹاک ایکس چینج حملے میں بھارت ملوث ہے، کوئی شک نہیں کہ اسٹاک ایکسچینج پر حملے کا منصوبہ بھارت میں بنایا گیا۔

قومی اسمبلی سے خطاب میں وزیراعظم نے کہا کہ دہشتگردوں کا منصوبہ پاکستان اسٹاک ایکسچینج کے ملازمین کو یرغمال بنانا تھا۔

انہوں نے کہا کہ میں اپنے ہیروز سب انسپکٹر افتخار، خدا یار، حسن علی کو خراج تحسین پیش کرتا ہوں، ہمیں کوئی شک شبہ نہیں کہ یہ بھارت کی طرف سے ہوا ہے، ہم دہشت گردی کے 4 منصوبے ناکام بنا چکے ہیں، 2 اسلام آباد کے قریب دہشتگردی کے منصوبے تھے، انٹیلی جنس اداروں کو بھی خراج تحسین پیش کرتا ہوں۔

واضح رہے کہ گزشتہ روز کراچی میں پاکستان اسٹاک ایکسچینج پر چار دہشت گردوں نے حملہ کیا جس کے نتیجے میں ایک پولیس اہلکار اور اسٹاک ایکسچینج کے 3 سیکیورٹی گارڈ شہید ہوگئے جب کہ فورسز کی جوابی کارروائی میں چاروں دہشتگرد مارے گئے۔

مجھ سے پوچھا جاتا تو کبھی سخت لاک ڈاؤن نہیں کرتا، وزیراعظم
وزیراعظم عمران خان کا مزید کہنا تھا کہ مجھ پر لاک ڈاؤن کے حوالے سے تنقید کی گئی، ہم نے کورونا ایس اوپیز کے تحت معیشت کھولی، لاک ڈاؤن میں دیہاڑی دار طبقہ متاثر ہوتا ہے، ہم نے اسمارٹ لاک ڈاؤن کو اپنایا تاکہ معیشت چل سکے۔

انہوں نے کہا کہ اگر مجھ سے پوچھا جاتا تو میں کبھی سخت لاک ڈاؤن نہیں کرنے دیتا، آج دنیا اسمارٹ لاک ڈاؤن کی طرف گئی ہے، ہمیں ابھی بھی معاشی طورپر چیلنج کا سامنا ہے۔

عمران خان نے کہا کہ پاور سیکٹر کا ساراقرضہ ماضی کی حکومتوں کا ہے، پی آئی اے دنیا کی بہترین ایئر لائن تھی، پی آئی اے میں اب مافیا بیٹھا ہوا ہے، 11 برسوں میں 10 بار پی آئی اے کے سربراہ تبدیل ہوئے۔

انہوں نے کہا کہ ہمیں اداروں میں اصلاحات لانے کی ضرورت ہے، اسٹیل ملز پر آج 250 ارب روپے کا قرضہ چڑھ چکا ہے۔

وزیراعظم نے بتایا کہ ان کی حکومت نے پہلے سال 4 ہزار ارب روپے جمع کیےجن میں سے 2 ہزار ارب قرضوں پر سود کی مد میں ادا کیا، اب اداروں کی اصلاحات کے بغیر نہیں چل سکتے، اداروں میں بڑے بڑے مافیاز بیٹھے ہوئے ہیں۔

نواز شریف کی بدقسمتی ہے کہ معاملہ سپریم کورٹ چلاگیا، عمران خان
سابق وزیراعظم نواز شریف کے حوالے سے گفتگو کرتے ہوئے عمران خان نے کہا کہ نواز شریف نے یہاں کھڑے ہوکر کہا کہ یہ ہے وہ دستاویزات جس سے لندن فلیٹس لیے، نواز شریف کی بدقسمتی ہے کہ معاملہ سپریم کورٹ چلا گیا، ملک کا سربرا ہ پیسہ چوری کرکے باہر لے کر جارہا تھا ایک صاحب کہتے میاں صاحب فکر نہ کرو۔

انہوں نے کہا کہ نواز شریف نے قومی اسمبلی میں دستاویزات لہرائیں کہ یہ لندن فلیٹس کے ثبوت ہیں، لیکن وہ جعلی دستاویز تھیں اور سپریم کورٹ میں پکڑی گئیں، نوازشریف میری اس چیئر پر کھڑے ہوکر کہہ رہا تھا یہ ہیں وہ ذرائع، یہ صاحب یہاں کہہ رہے تھے کہ میاں صاحب فکر نہ کریں لوگ جلدی بھول جائیں گے۔

وزیراعظم عمران خان نے کہا کہ یہ جمہوریت پسند نہیں انہوں نے جمہوریت کو بدنام کیا، ان کو کیا پتہ تھا کہ میں سپریم کورٹ جاؤں گا، سپریم کورٹ نے انہیں کرپٹ قرار دے دیا، یہ کیسا وزیر خارجہ ہے کہ دبئی کی کمپنی سے15، 20 لاکھ تنخواہ لے رہا ہو ،وہ تنخواہ نہیں کچھ اور لے رہے تھے ۔

انہوں نے کہا کہ ملک کا وزیراعظم دبئی کی کمپنی میں نوکری کررہا تھا، 10 سالوں میں ملک کا قرضہ 6 ہزار ارب سے 30 ہزار ارب روپے تک گیا، یہ لوگ چاہتے ہیں کہ حکومت جلد چلی جائے تاکہ ان کی چوری بچ جائے۔

عمران خان نے کہا کہ ان کی پوری کوشش ہےکہ مائنس ون ہوجائے، اگر ایسا ہوبھی جائے تو جو یہاں سے آئے گاوہ بھی ان کو نہیں چھوڑے گا۔

کبھی نہیں کہا میری کرسی مضبوط ہے، عمران خان
وزیراعظم نے کہا کہ ‘میں نے کبھی یہ نہیں کہا میری کرسی مضبوط ہے، آج نہیں تو کل مجھے بھی جانا ہے’۔

انہوں نے کہا کہ میں نے نہیں کہا کہ میری حکومت نہیں جانے والی ،میں نے کبھی نہیں کہا کہ میری کرسی بڑی مضبوط ہے ، کرسی صرف اللہ دیتا ہے ، کبھی آپ کو کرسی چھوڑتے ہوئے گھبرانا نہیں چاہیے ، کرسی آنے جانے والی چیز ہے، اپنے نظریے پر کوئی سمجھوتہ نہیں کرنا۔

انہوں نے کہا کہ مجھے کہا گیا چینی مافیا کومشرف کنٹرول نہیں کرسکا، نوجوان پارلیمینٹیرین کو کہتا ہوں کبھی بھی کرسی چھوڑنے سے گھبرانا نہیں، جدوجہد کے بعد پارٹی چیئرمین نہ بنے تویہ ہوتا ہے، بارش زیادہ آتا ہے توپانی زیادہ آتا ہے۔

پرویز مشرف کی حکومت بُری نہیں تھی، وزیراعظم
وزیراعظم عمران خان نے کہا کہ جنرل مشرف کی حکومت بُری نہیں تھی لیکن این آراو دیا وہ ٹھیک نہیں تھا۔

انہوں نے کہا کہ ہمیں کچھ پلان بنانا پڑے گا، حکومت کے وہ ادارے جو مسلسل نقصان کررہے ہیں انہیں ٹھیک کرناہوگا، ان اداروں میں بجلی کے بقایاجات سب سے بڑا عذاب بنا ہوا ہے، ہم اداروں میں بڑی بڑی تبدیلیاں کرنے کو تیار ہیں، جب بھی تبدیلیاں لائیں گے مزاحمت آئے گی، ان بہت سے اداروں میں مافیاز بیٹھے ہیں۔

انہوں نے کہا کہ جب تک اصلاحات نہیں کریں گے ملک نہیں چلے گا، اس سے نہیں ڈرنا ہوگا کہ ہڑتال ہوجائے گی۔

عمران خان نے کہا کہ اسٹیل ملز میں 34 ارب روپیہ بند مل کے ملازمین کو تنخواہوں کا دے دیا گیا، جس پیپلزپارٹی نے اسٹیل ملز تباہ کی وہ اس کی بحالی کی باتیں کرتی ہے۔

اب فیصلہ نہ لیا تو پھر وقت نہیں رہے گا، وزیراعظم
وزیراعظم عمران خان نے کہا کہ اگر اب فیصلے نہ لیے تو پھر وقت نہیں رہے گا، بڑی بڑی اجارہ داریاں بنی ہوئی ہیں، جگہ جگہ شوگر کارٹل کی طرح کی کارٹل بنی ہوئی ہیں، جو پیسہ بنارہا ہے وہ ٹیکس تو دے۔

وزیراعظم نے کہا کہ ریاست مدینہ میں امراء سے زکوٰۃ لے کر غرباء کو دی جاتی تھی، یہاں 29 ارب کی سبسٹسدی لیکر 9 ارب ٹیکس دیتے ہیں اور چینی بھی عوام کو مہنگی دیتے ہیں۔

عمران خان نے کہا کہ ہمارا مشن ہے کہ لوگ پیسہ بنائیں مگر ٹیکس دیں، تمام مافیاز اور اجارہ داروں کو قانون کے تابع کریں گے، یہ مافیاز نہیں چل سکتے تھے جب تک حکومتیں سرپرستی نہ کریں۔

انہوں نے کہا کہ آصف زرداری اور نوازشریف کی شوگر ملز کالے دھن کو سفید کرنے کے لیے بنائی گئیں۔

سارَے خرچے خود برداشت کرتا ہوں، سوائے سیکیورٹی اور ٹریولنگ کے، عمران خان
وزیراعظم نے کہا کہ خواجہ آصف باہر جا کر انٹرویو دیتے ہیں کہ ہم لبرل ہیں اور پی ٹی آئی دینی جماعتوں کے ساتھ ہے، یہ لبرلی کرپٹ ہیں یہ لوگ سارے باہر جا کر لبرل بن جاتے ہیں، میں نے ہر جگہ کہا کہ پاکستان کو مدینہ کی ریاست بنانا میرا وژن ہے۔

وزیراعظم عمران خان نے کہا کہ جو قوم مدینہ کی ریاست کے اصولوں پر چلے گی وہ اٹھ جائے گی۔

وزیراعظم نے کہا کہ کوئی مضبوط نہیں ہوتا، آپ آج ہیں کل نہیں ہیں، میں اپنے گھر میں رہتا ہوں، سارَے خرچے خود برداشت کرتا ہوں، سوائے سیکیورٹی اور ٹریولنگ کے۔

وزیراعظم کے خطاب کے دوران اپوزیشن جماعتوں نے بائیکاٹ بھی کیا۔

اسلام آباد(وقت ٹی وی آن لائن ) قومی اسمبلی کے اجلاس میں وفاقی وزیرعلی زیدی اور پیپلزپارٹی کے رہنما نوید قمر آمنے سامنے آگئے۔

وفاقی وزیر علی زیدی نے اپنی تقریر میں کہا کہ عزیر بلوچ نے 58 لوگوں کو قتل کرنے کا اعتراف کیا اور اس نے جن کے کہنے پر لوگوں کو قتل کیا وہ یہاں آکر بجٹ پر تقاریر کرتے ہیں۔

علی زیدی کے بیان پر ایوان میں شورشرابا شروع ہو گیا جس پر نوید قمر نے ماحول ٹھنڈا کرانے کی کوشش کی لیکن وہ خود جذباتی ہوگئی اور کوٹ اتارتے ہوئے حکومتی ارکان سے بولے، آجاؤ پھر لڑ لیتے ہیں۔

کراچی(وقت ٹی وی آن لائن ) ایڈیشنل آئی جی کراچی غلام نبی میمن کا کہنا ہے کہ اسٹاک ایکسچینج پر حملہ کرنے والوں کو کراچی سے سپورٹ حاصل تھی اور یہ حملہ کسی ایک تنظیم کی جانب سے نہیں کیا گیا۔

جیونیوز کے پروگرام ’ جیو پاکستان‘ میں گفتگو کرتے ہوئے ایڈیشنل آئی جی غلام نبی میمن نے کہاکہ پاکستان اسٹاک ایکسچینج پر حملے کی پہلے سے تھریٹ تھی جس کی وجہ سے سیکیورٹی بڑھائی گئی تھی۔

انہوں نے کہا کہ حملہ آوروں کو کراچی سے سپورٹ حاصل تھی اور یہ حملہ کسی ایک تنظیم کی جانب سے نہیں کیا گیا۔

کراچی پولیس چیف کا کہنا تھا کہ چینی قونصلیٹ اورپی ایس ایکس پر حملےکا ماسٹر مائنڈ ایک ہی لگتا ہے، دونوں حملوں کی کافی چیزیں مماثلت رکھتی ہیں۔

ایڈیشنل آئی جی نے مزید کہا کہ مختلف سلیپر سیل سرگرم دکھائی دے رہے ہیں، حملے کے وقت دہشتگردوں کے ساتھ بیک اپ پر کوئی موجود نہیں تھا جب کہ حملہ آوروں سے ملنے والے اسلحے اور ایمونیشن سے متعلق تحقیقات جاری ہیں۔

واضح رہے کہ گزشتہ روز کراچی میں پاکستان اسٹاک ایکسچینج پر چار دہشت گردوں نے حملہ کیا جس کے نتیجے میں ایک پولیس اہلکار اور اسٹاک ایکسچینج کے 3 سیکیورٹی گارڈ شہید ہوگئے جب کہ فورسز کی جوابی کارروائی میں چاروں دہشتگرد مارے گئے۔

رشید یوسفزئی
آوارہ خیالات

کامریڈ سید منور حسن : رستخیز بود کہ رفت و مغموم ساخت جہان را

کمیونسٹ پارٹی کی ذیلی تنظیم ڈیموکریٹک سٹوڈنٹس فیڈریشن DSF کی نیم مردہ راکھ سے نیشنل سٹوڈنٹس فیڈریشن NSF اٹھی تو اس کے روح رواں دہلی سے آئے مہاجر فیملی کے ٹیلنٹڈ نوجوان سید منور حسن تھے.

عنفوانِ شباب میں ڈی ایس ایف کے سٹیجز سے فصیح و بلیغ اردو میں مارکس و لینن کے حوالوں سے بھرپور پرجوش تقاریر کرتے تھے … لسانی طاقت، فصاحت و بلاغت کے انہی کمالات کی بناء پر 1959 میں نوزائیدہ این ایس ایف کے صدر منتخب ہوئے… لیفٹسٹوں کے رنگ میں مکمل رنگے تھے…..”سرخ ھوگا، ایشیا سرخ ھوگا” کے نعرے ڈھول کی تھاپ کیساتھ لگاتے… خود موسیقی کے زبردست ماہر تھے. سٹیج سے موسیقی کے آلات بجاتے اور سامنے سینکڑوں طلبا رقص کرتے…

ڈی ایس ایف معدوم ہوگئی. کاظمی و معراج محمد خان اور معراج خالد کچھ نیشنل عوامی پارٹی NAP میں چلے گئے کچھ بھٹو کی پیپلزپارٹی PPP میں شامل ہوئے….. کامریڈ سید منور حسن نے تمام ساتھی کامریڈز کے برعکس دائیں طرف کی راہ لی….. بائیں بازو کے ادب و معاشیات کیساتھ ساتھ مولانا مودودی کے لٹریچر پڑھتے تھے.اور اس سے متاثر ہوکر راستہ بدل لیا اور بائیں بازو کے ادب و سیاست کو خیرباد کہا…. جماعت اسلامی کی ذیلی تنظیم اسلامی جمعیت طلبہ میں دل و جان سے شامل ہوئے. اور تادم مرگ جماعت کے ساتھ رہے.

سید صاحب 5 اگست 1941 کو دہلی میں پیدا ہوئے. قیام پاکستان پر کراچی منتقل ہوئے. کراچی یونیورسٹی سے ایم اے سوشیالوجی اور بعد میں ایم اے اسلامیات کی ڈگری حاصل کی … بلا کے ذہین و حاضر جواب تھے. سامعین کے نبض پر ہاتھ رکھنے کافن خوب جانتے تھے جب بولتے تو ہزاروں کے مجمع کو اپنا اسیر بنا لیتے ، کراچی سے کئی اخبارات و جرائد کے مدیر رہے…. جو خطابت تقریر میں تھی وہی معیار نثر نگاری میں بھی قائم رکھا. جماعت اسلامی کے سٹیج پر تنہا خطیب تھے… بھٹو کے خلاف پاکستان نیشنل الائنس PNA بن گئی. نوجوان خطیب و مقرر سید منور حسن جس جلسے میں جاتے سامعین و شرکاء جلسہ کو اپنے فدائی و شیدائی بنا کے آتے. الائنس کے بڑے بڑے لیڈر سید صاحب کیلئے سٹیج چھوڑتے…. عطاء اللہ شاہ بخاری کے بعد مذہبی خطابت کی دنیا منور حسن سے منور تھی.خطابت میں اپنا ثانی نہیں رکھتے تھے … ستتر کے انتخابات ھوئے….. چھتیس سالہ سید منور حسن نے تمام پاکستان میں سب سے زیادہ ووٹ لئے…. ووٹ لینے کی تعداد میں وزیراعظم بھٹو سے بھی اگے نکل گئے!
سید صاحب بے لاگ و ببیاک بولتے لیکن سنجیدگی و متانت ہمیشہ براقرار رکھتے. ہر پہلو سے نظریاتی طور پر جماعتی رہے. عالمی امور پر جماعت کا چشمہ لگا کر ہی بات کرتے…. لیکن ایمانداری، دیانتداری اور اخلاص پر کبھی سرمو برابر معاملہ نہیں کرتے. منافقت، ڈبل سٹینڈرڈز اور ریاکاری سے ایسا مبرا و پاک شخص وہ بھی سیاست میں دنیا نے نہیں دیکھا ہوگا. دو جوڑے کپڑے، ایک قراقل کیپ کیساتھ دنیائے سیاست میں ائے تھے. انہیں اثاثہ جات کیساتھ آج دنیا چھوڑ گئے. رہائش کیلئے سابق ناظم اعلی کراچی نعمت اللہ صاحب نے گھر کے دو کمرے دیئے تھے…. خرچ کیلئے جماعت اسلامی کی مقرر کردہ وظیفہ پر گزارہ کرتے….. دل کے قلندر تھے… دنیا کے بھی قلندر رہے.

جماعت اسلامی پاکستان کی واحد جمہوری جماعت ہے. یہاں امیر کا بیٹا، بیٹی، پوتا، نواسا کبھی جانشین نہیں بن سکتا. حسب روایات قاضی حسین احمد کے وفات پر مرد قلندر ارکان جماعت کے ووٹ سے امیر جماعت منتخب ہوئے. کافی شکوک و شبہات ہیں کہ ارکان نے کیوں دوبارہ منتخب نہیں کیا….جماعت کے واحد سیٹنگ امیر تھے جو ایسے انداز میں ہٹائے گئے…. شاید سید صاحب کی غیر لچکدار رویہ یا سراج الحق صاحب کی لابنگ سبب بنی. بہر حال جماعت کی اپنی ایک فری میسنری ہے اور باہر کے لوگوں کو کم ہی پتہ چلتا ہے کہ درون منصورہ کیا ہوتا ہے. میرا تعارف انہیں ایام امارت میں، حاضر جوابی و دیانت میں ان کے ہم مثل، ہم نسب و ہم فکر سابق ایم این اے اور جماعت کے موجودہ روابط عمومی کے مسئول سید بختیار مانی Bakhtiar Maani کی توسط سے ہوئی. میں کبھی بھی سید صاحب کے خیالات و نظریات اور سیاسی طرز عمل سے متفق نہیں رہا. لیکن انہوں نے میرے مخالفت و تنقید کو نہ صرف برداشت کیا بلکہ ہمیشہ ایسے جواب دیتے کہ میرا دل جیت لیتے. جب بھی کال کی میرے ملحدانہ سوالات کے جوابات شفقت سے دیتے… اخر میں “راہ راست پر آنے اور دین اسلام کی خدمت” کیلئے طویل و پر خلوص دعا دیتے… کاش مذہبی دنیا کو ایسے لیڈرز اور مل جائے !
سید صاحب کی بہترین صلاحیت ان کی ایماندارانہ حاضر جوابی تھی. جو بھی دل میں حقیقت سمجھتے دنیا و جہان کی پروا کئے بغیر زبان پر لاتے . ساری دنیا بشمول جماعت اسلامی طالبان کی مخالف ہوگئی. سید صاحب نے دفاع کیا… ایک بار دوران گفتگو سوال کیا، سید صاحب یہ آپ نے اچھا کیا کہ روس کو شکست دے کر امریکہ کو دنیا پر مسلط کیا؟ فرمایا ” نزدیکی روس کو شکست دی کہ جگہ خالی ہو. امریکہ یہاں آئے اور اسی پتھر سے اسکا بھی سر کچل دیں. جنرل پاشا کی سربراہی میں پاکستانی اسٹیبلشمنٹ نے حسین حقانی کی میڈیا و عدالتی ٹرائل شروع کی…. کسی نے سید سے طنزیہ سوال کیا کہ “جناب، حسین حقانی صاحب جماعت کے پلیٹ فارم سے آئے ہیں..ان کے بارے میں کیا خیال ہے؟”. جواب دیا “میں اب بھی مطمئن ہوں حسین حقانی، جنرل پاشا سے زیادہ ایماندار پاکستانی ہے.”

ایک پاکستانی ٹی وی چینل پر ایک مصاحبہ کیلئے مدعو تھے. میزبان نے سوال کیا: منور حسن صاحب، آپ کہتے ہیں جہاد کے کئی قسمیں ہیں. غربت کی خلاف جہاد، جہالت کی خلاف جہاد… مگر جہاں تک ہم دیکھتے ہیں آپ کا جہاد صرف امریکہ کی خلاف ہی ہے. یہ دوسرے جہاد کب شروع ہوں گے؟. ….. سید منور حسن نے بے ساختہ جواب دیا:”جب امریکہ یہاں سے چلا جائے تب! “.

کورونا وائرس سے متعلق مصر میں ایک انوکھا ہی واقعہ دیکھنے میں آیا جہاں کورونا وائرس کا ٹیسٹ مثبت آنے پر شوہر نے بیوی کو اپارٹمنٹ کی پانچویں منزل سے نیچے پھینک دیا۔

غیر ملکی خبررساں ادارے کے مطابق مصر میں 25 سالہ خاتون کا کورونا وائرس کا ٹیسٹ مثبت آنے پر ان کے شوہر نے انہیں پانچویں منزل سے نیچے پھینک دیا۔

25 سالہ خاتون 5 منزلہ عمارت سے گرنے کے بعد بھی معجزاتی طور پر زندہ تھیں جنہیں فوراً اسپتال منتقل کیا گیا جہاں ان کی ریڑھ کی ہڈی کی سرجری کی گئی۔

پولیس نے خاتون کے شوہر کو گرفتار کرلیا جس نے اپنے بیان میں کہا کہ ان کے اپنے بیوی کے ساتھ پہلے ہی اختلافات تھے اور دونوں نے علیحدگی کا فیصلہ کیا تھا، ہمارے درمیان اس وقت اختلافات مزید بڑھ گئے جب ان کی بیوی کا کورونا وائرس کا ٹیسٹ مثبت آیا۔

شوہر نے بتایا کہ وہ ڈر رہے تھے کہ کہیں ان کو بھی وائرس نہ ہوجائے ، انہوں نے اپنی بیوی کے 3 ٹیسٹ کروائے اور تینوں ہی مثبت آئے جس کے بعد انہوں نے اسے گھر چھوڑنے کو کہا اور جب اس نے منع کیا تو انہوں نے اسے دھکا دیا۔

پیرس (وقت ٹی وی آن لائن ) پیرس کا مقبول ترین سیاحتی مقام دوسری جنگ عظیم کے بعد سے کورونا وائرس کی وجہ سے طویل ترین بندش کے بعد دوبارہ سیاحوں کے لیے کھول دیا گیا۔

غیر ملکی خبر رساں ادارے کے مطابق ایفل ٹاور عالمگیر وبا کورونا وائرس کی وجہ سے تین ماہ سے بند تھا جو کہ دوسری جنگ عظیم کے بعد بندش کا طویل ترین عرصہ سمجھا جا رہا ہے۔

ایفل ٹاور پر آنے والے لوگوں کو احتیاطی تدابیر کے ساتھ آنا ہوگا اور وہ صرف پہلے درجے تک ہی جا سکتے ہیں جب 11 سال سے کم عمر کے بچے بنا ماسک کے داخل ہو سکیں گے۔

ایفل ٹاور کے دوبارہ کھلنے پر فرانس کے معروف فنکاروں کی جانب سے سیاحوں کو راغب کرنے کے لیے پیغامات بھی دیے گئے۔

خیال رہے کہ عالمگیر وبا کورونا وائرس کے پھیلاؤ کو روکنے کے لیے دنیا بھر میں سیاحتی مقامات پر جانے پر پابندی عائد کر دی گئی تھی۔

بیجینگ (وقت ٹی وی آن لائن ) چین کی مقبول ترین لپ سنکنگ ایپ ٹک ٹاک نے حال ہی میں کاروباری لوگوں کے لیے نیا پلیٹ فارم لانچ کر دیا۔

غیر ملکی خبر رساں ادارے کے مطابق ٹک ٹاک نے اعلان کیا ہے کہ وہ مختلف برانڈز کی تشہیر کے لیے ‘ٹک ٹاک فار بزنس’ پلیٹ فارم لانچ کرے گی۔

ٹک ٹاک فار بزنس کے اس پلیٹ فارم پر برانڈز اور مشتہرین کو ٹک ٹاک کمیونٹی سے جُڑنے کا موقع ملے گا اور یہ برانڈز کو اشتہاری مہموں کے لیے مناسب شراکت دار کی تلاش کرنے میں سہولت بھی فراہم کرے گا۔

اس پلیٹ فارم کے ذریعے برانڈز کے اشتہار ٹک ٹاک ایپ کی مین اسکرین پر آئیں گے جب کہ ٹک ٹاک کی نیوز فیڈ پر موجود ویڈیوز پر برانڈز سے متعلق ہیش ٹیگز اور چیلنجز بھی آئیں گے۔

علاوہ ازیں ٹک ٹاک جلد ایک نیا لرننگ سینٹر بھی لانچ کرنے کا منصوبہ بنا رہی ہے جہاں مارکیٹرز ٹِک ٹاک کی اشتہاری پیشکشوں کے بارے میں مزید معلومات حاصل کرسکیں گے۔

لاہور (وقت ٹی وی آن لائن ) حکومت اور اپوزیشن کے درمیان نیب کے قانون میں تبدیلیوں کے حوالے سے عدم اتفاق کی وجہ سے بیوروکریسی اور کاروباری افراد پریشان ہیں اور اس سے طرز حکمرانی اور معیشت کو نقصان ہو رہا ہے۔

پی ٹی آئی کے ذرائع کا کہنا ہے کہ حکومت کو لگتا ہے کہ نیب قانون میں کچھ تبدیلیوں کے بغیر بیوروکریسی اور کاروباری کمیونٹی کے خدشات دور نہیں کیے جا سکتے۔

ذرائع کا کہنا ہے کہ حال ہی میں یہ معاملہ بنی گالہ میں ہونے والے اجلاس میں اٹھایا گیا تھا۔ قانون میں اصلاحات کے معاملے پر وزیراعظم کے مشیر برائے پارلیمانی امور بابر اعوان تھے جنہوں نے وزیراعظم کے ساتھ بیوروکریسی اور کاروباری افراد کے نیب قانون میں ترمیم کے حوالے سے خدشات پر بات کی۔

ذرائع کا کہنا ہے کہ وزیراعظم کو بھی احساس ہے کہ نیب کی ہراسگی سے بچائو کے بغیر بیوروکریسی کام کر پائے گی اور نہ ہی کاروباری افراد سرمایہ لگا پائیں گے۔ لیکن وزیراعظم اور ان کی پارٹی نون لیگ اور پیپلز پارٹی کی خواہش کے مطابق نیب کو بے اختیار ادارہ نہیں بنانا چاہتی۔

پی ٹی آئی کی حکومت نے کچھ ماہ قبل فیصلہ کیا تھا کہ نیب قانون میں ترمیم کیلئے تمام اسٹیک ہولڈرز بشمول اپوزیشن جماعتوں سے مذاکرات کیے جائیں اور ترمیم آرڈیننس کے ذریعے یا پھر ممکن ہو تو پارلیمنٹ کا سیشن بلا کر کی جائے۔

وزیراعظم عمران خان کی ہدایت پر وزارت قانون نے آرڈیننس کے نئے مسودے پر کام کیا تاکہ قانون میں کم از کم وہ تبدیلیاں (ترمیم کے ساتھ )لائی جائیں جو کچھ ماہ قبل یعنی گزشتہ سال کے ماہِ دسمبر میں آرڈیننس کی مدت مکمل ہونے پر ختم ہو گئی تھیں۔

حکومت کی ایک اعلیٰ سطح کی کمیٹی قائم کی گئی تھی جس میں اسد عمر، فروغ نسیم، بابر اعوان، پرویز خٹک اور شہزاد اکبر شامل تھے جبکہ قومی اسمبلی سے اسد قیصر کو بھی قانون میں 15؍ روز میں ترمیم کیلئے اس معاملے میں شامل کیا گیا۔

کمیٹی کو نہ صرف حکومتی اتحادیوں سے بلکہ اپوزیشن جماعتوں سے بھی رابطے کا کام سونپا گیا تا کہ ترامیم کی نوعیت کے لحاظ سے اتفاق رائے حاصل کیا جا سکے۔ تاہم، وزارت قانون کی جانب سے مسودہ کو حتمی شکل دیے جانے سے قبل ہی سوشل میڈیا پر نیب قانون میں ترامیم کے حوالے سے ایک دستاویز لیک ہوگئی جسے ’’حتمی مسودہ‘‘ بتایا جا رہا تھا۔

عمومی طور پر اسے سرکاری مسودہ بتایا گیا۔ تاہم، حکومت نے خبر کو جعلی قرار دیا جس میں یہ حتمی مسودہ شامل تھا۔ ایک طرف مسودے کی وجہ سے حکومت پر پارٹی کے اندر سے ہی دبائو آنے لگا کیونکہ اتنی بڑی تبدیلیوں کے نتیجے میں نیب بے اختیار ادارہ بن جاتا، جو کئی لوگوں کی نظر میں پی ٹی آئی کے احتساب کے دعووں کے برعکس اقدام ہوتا، تو دوسری طرف جعلی مسودے کی وجہ سے اپوزیشن والوں کیلئے بڑی امیدیں پیدا ہوگئیں کیونکہ وہ اتنا کچھ مانگ رہے ہیں جتنا حکومت شاید ہی دے سکے۔

حکومت چاہتی تھی کہ قومی احتساب (دوسری ترمیم) آرڈیننس 2019ء کی معیاد مکمل ہونے کے چند ہفتوں بعد ہی اس قانون میں صدارتی آرڈیننس کے ذریعے یا پھر اپوزیشن جماعتوں کو ساتھ ملا پارلیمنٹ کا سیشن بلا کر ترمیم کی جائے۔

یہ آرڈیننس دسمبر کے آخر میں نافذ کیا گیا تھا اور اس کی آئینی عمر 120؍ دن تھی۔ ختم ہونے والے آرڈیننس میں قابل تعریف تبدیلیاں موجود تھیں جو پی ٹی آئی حکومت نے متعارف کرائی تھیں تاکہ سرکاری عہدیداروں بالخصوص سویلین بیوروکریسی اور کاروباری کمیونٹی کو بیورو کی ہراسگی سے بچایا جا سکے۔

نیب کے دوسرے ترمیمی آرڈیننس کا بنیادی مقصد بیوروکریٹس کا اعتماد بحال کرنا اور فائلوں پر بیٹھے رہنے کی بجائے فیصلے کرنے کیلئے ان کی حوصلہ افزائی کرنا تھا۔

سرکاری ملازمین اور سرکاری عہدیداروں (سیاست دانوں) کو نیک نیتی کے ساتھ قانونی تحفظ فراہم کیا گیا تا کہ اگر انہوں نے اپنے کسی فیصلے سے کوئی مالی فائدہ نہیں اٹھایا اور اپنے اثاثوں میں معلوم ذرائع سے ہٹ کر نامناسب انداز سے اضافہ نہیں کیا تو وہ اپنے فرائض انجام دے سکیں اور کارکردگی دکھا سکیں۔

یہ ترامیم صدارتی آرڈیننس کے ذریعے متعارف کرائی گئی تھیں کیونکہ حکومت کو اندازہ ہو چکا تھا کہ کاروباری طبقہ کام کرے گا اور نہ ہی بیوروکریسی خدمات انجام دے سکے گی تاوقتیکہ نیب کی جانب سے اختیارات کے غلط استعمال کو اس کی طاقت کم کرکے روکا نہ جائے۔

اب یہ آرڈیننس ختم ہو چکا ہے، حکومت اس معاملے کو پارلیمنٹ میں لانا چاہتی تھی لیکن کورونا وائرس کی وبا کے باعث پارلیمنٹ کا اجلاس طلب نہ کیا جا سکا۔

دسمبر 2019ء میں جاری کر دہ آرڈیننس کی معیاد مکمل ہونے کے بعد ایک مرتبہ پھر کاروباری افراد اور بیوروکریسی کو خطرات کا سامنا ہے کیونکہ نیب کو ایک مرتبہ پھر وہی اختیارات حاصل ہو گئے ہیں جن کا غلط استعمال کیا جاتا رہا ہے اور جن کی وجہ سے ایسی صورتحال پیدا ہوگئی تھی۔

جس کی وجہ سے سرکاری ملازمین اور ساتھ ساتھ کاروباری افراد نے حکومت نے واضع طور پر بتا دیا تھا کہ وہ ایسے ماحول میں کام نہیں کر سکتے جہاں انہیں ہراسگی اور بلیک میلنگ کا سامنا ہو۔

نہ صرف کاروباری افراد بلکہ بیوروکریٹس نے بھی وزیراعظم کو نیب کی جانب سے اختیارات کے غلط استعمال کی شکایت کی تھی اور ساتھ ہی آرمی چیف سے مل کر بھی ان کی مدد طلب کی تھی تاکہ ہراسگی کا سلسلہ بند ہو سکے۔