Archives February 2019

لاہور(وقت نیوز آن لائن)
یہ جاننا خوشی ہے کہ سپریم کورٹ آف پاکستان نے ڈاکٹر سعید اختر کو تمام الزامات سے پاک کردیا ہے. اس کی صلاحیت اور عاجز فطرت کے لئے اس کی تعریف جتنی بھی کی جائے کم ہے. پنجاب میں پاکستان گردوں اور جگر انسٹی ٹیوٹ اور پنجاب میں ہیپاٹائٹس کی روک تھام کے لیے کلینک کے نیٹ ورک قائم کرنے میں کوئی بھی ڈاکٹر سعید اختر بڑی خدمات سے انکار نہیں کر سکتا!

Pleased to know that SC has cleared Dr. Saeed Akhtar from all charges. Admire him for his competence & humble nature. No one can deny his great services in setting up state of the art Pakistan Kidney & Liver Institute in Lahore & network of hepatitis prevention clinics in Punjab!

— Shehbaz Sharif (@CMShehbaz) February 28, 2019

لاہور(ایمرا نیوزآن لائن)
لاہور ہائیکورٹ زرعی اجناس کہ خرید وفروخت پر مارکیٹ فیس دگنی کرنے اور مارکیٹ کمیٹیاں تشکیل نہ دینے کے خلاف سماعت ہوئی جس میں‌عدالت عالیہ نے پنجاب حکومت سے مارکیٹ کمیٹیاں تشکیل دینے کے لیے پلان طلب کرلیا. درخواست گزار کے وکیل نے مؤقف اپنایا کہ مارکیٹ کمیٹی نے بغیر وجہ بتائے فی ٹن فیس دگنا کر دی ہے. وکیل انوار حسین قانونی طور پر عارضی ایڈمنسٹریٹر فیس وصول کرنے کے مجاز نہیں ہیں.

انوار حسین نے مزید دلائل دیتے ہوئے کہا کہ مارکیٹس میں 2011 سے منجمنٹ کمیٹی موجود نہ ہونے کے باعث اکٹھا ہونے والا فنڈ ایڈمنسٹریٹر استعمال کر رہے ہیں. جس پر سرکاری وکیل کا کہنا تھا کہ کمیٹیاں 2018 میں ختم کی گئیں. موکل گورنمنٹ اور ایگری کلچر پروڈیوس ایکٹ میں تبدیلی کی ضرورت ہے. جس پر انوار حسین نے کہا کہ قانون سازی کے لیے چھ ماہ کا وقت دیا جائے.

ایڈمنسٹریٹر کی جانب فنڈ وصولی اور اس کا استعمال غیرقانونی ہے. اس سے قبل حکومتی جواب میں کہا گیا تھا کہ کمیٹیاں 2011 سے ختم کر دی گئی تھیں.عدالت نے کیس کی سماعت آٹھ مارچ تک ملتوی کردی

(میڈیا 92نیوز آن لائن)
سپریم کورٹ نے 19 سال بعد سزائے موت کے ملزم کی سزا عمر قید میں تبدیل کر دی. عدالت کا کہنا ہے کہ ملزم عمر قید سے زائد عرصہ کی سزا کاٹ چکا ہے لہذاء رہا کیا جائے. جسٹس منظور احمد ملک کی سربراہی میں تین رکنی بنچ نے سزائے موت کے ملزم غلام علی کی اپیل۔پر سماعت کی. اپیل کنندہ کی جانب سے ایڈووکیٹ عارف گوندل پیش ہوئے اور اپنے دلائل پیش کیے.

2004 میں ضلع چنیوٹ کی سیشن عدالت نے سالی روبینہ کے قتل کے الزام میں غلام علی کو سزا موت کا حکم دیا. 2010 میں لاہور ہائیکورٹ نے سیشن عدالت کا حکم برقرار رکھتے ہوئے سزائے موت کا حکم دیا. روبینہ کو ایک فائر لگا جس سے ملزم کی قتل کرنے کی نیت صاف واضیح نہیں ہوتی.

وکیل کا کہنا تھا کہ مقتول روبینہ کی میڈیکل رپورٹ ایف آئی آر شہادتوں میں تضاد پایا جاتا ہے. قتل کے الزام میں دیگر ملزمان کو شک کا فائدہ دیتے ہوئے بری کیا گیا. استدعا کی گئی کہ عدالت ملزم کو سزائے موت دینے کے احکامات کالعدم قرار دیتے ہوئے بری کرنے کا حکم۔دے.

(میڈیا 92 نیوز آن لائن)
وزیراعظم عمران خان نے پارلیمنٹ کے مشترکہ اجلاس سے خطاب میں کہا کہ ہم کل بھارتی پائلٹ کو رہا کر رہے ہیں۔ وزیراعظم عمران خان نے کہا ہے کہ ہمیں ایک موقع ملا کہ ہم کرتارپور کھولیں، پاکستان نے سوچا کہ بھارت میں انتخابات کا انتظار کیا جائے، ہمیں خوف تھا کہ انتخابات سے پہلے کوئی نہ کوئی واقعہ ہوگا اور پلواما واقعہ ہوگیا۔ حلف اٹھانے سے پہلے بھارت کو پیش کش کی تھی کہ وہ ایک قدم بڑھائے پاکستان دو قدم آگے بڑھائے گا، برصغیر کا آگے بڑھنے کے لیے ضروری ہے کہ خطے میں امن ہو،مسائل کے حل کے لیے مذاکرات ہونے چاہئے۔

انہوں نے کہا کہ بھارتی وزیراعظم کو خط لکھا کہ وزرائے خارجہ کی ملاقات ہونی چاہیے لیکن بھارت سے جواب اچھا نہیں آیا،بھارت سے کہا کہ ثبوت دیے جائیں، پاکستان کارروائی کرے گا مگر بجائے ثبوت دینے کے بھارت میں جنگ کا ماحول بڑھتا گیا۔ وزیراعظم عمران خان نے پاکستانی میڈیا کو خراج تحسین بھی پیش کیا اور کہا کہ ایک ایسا وقت جب پاکستان کو خطرہ ہے تب پوری قوم متحد ہے۔

انہوں نے کہا کہ بھارت میں جس طرح جنگی ماحول تھا ہمیں شک ہوا کہ اب کچھ نہ کچھ پاکستان میں ہوگا، بھارت کو یہ بھی پیغام دیا کہ اگر بھارت نے پاکستان کیخلاف کچھ کیا تو پاکستان جواب دے گا۔ انہوں نے مزیدکہا کہ بھارت کا ڈوزیئر آج پاکستان پہنچا ہے، اسے دینے سے پہلے بھارت نے جارحیت کی، عالمی قوانین کی خلاف ورزی کی،ہمیں لگا کہ بھارت کی مجبوری ہے کہ انتخابات سے پہلے ایسا ماحول پیدا کیا جائے۔

لاہور (میڈیا 92 نیوز آن لائن)
ڈائریکٹر جنرل پنجاب فوڈ اتھارٹی کیپٹن (ر) محمد عثمان کی سربراہی میں ادارے کے مالیاتی تخمینہ (بجٹ) برائے سال 2019۔20 کی تیاری کے سلسلے میں اجلاس منعقد ہوا۔تمام ونگز کے سربراہوں نے شرکت کی اور تخمینوں کے معقول ہونے پر غورکیا گیا۔ تفصیلات کے مطابق پنجاب فوڈ اتھارٹی مالیاتی تخمینہ (بجٹ) برائے سال 2019۔20 کی تیاری کے حوالے سے ڈی جی فوڈ اتھارٹی کیپٹن (ر) محمد عثمان کی سربراہی میں ابتدائی تخمینہ پر اجلاس کا انعقاد کیا گیا۔اجلاس میں تمام ونگز کے سربراہان نے شرکت کی اور تخمینوں کے معقول ہونے پر غورکیا گیا۔

ڈی جی فوڈ اتھارٹی نے ڈائریکٹر ایڈمن کوآئندہ 2روز میں بجٹ مکمل کرنے کی ہدایت کرتے ہو ئے کہا کہ بجٹ 2019۔20 نئے منصوبوں کی لاگت کو سامنے رکھتے ہوئے بنایا جائے۔ بجٹ کی تیاری میں رواں سال خرچ کی گئی رقم کا تناسب بھی مدنظر رکھا گیا ہے۔ پنجاب فوڈ اتھارٹی کی صوبہ بھرمیں مکمل فعالیت اور درکار افرادی قوت کے حساب سے بجٹ بنایا گیا ہے۔ کیپٹن (ر) محمد عثمان کا مزید کہنا تھا کہ ملاوٹ مافیا کے خاتمے کے لیے فوڈ اتھارٹی کو وسائل سے مکمل لیس کریں گے۔ انہوں نے ہدایت کی کہ حکومت پنجاب کی پالیسی کے مطابق غیر ضروری اخراجات پر قابو پایا جائے اور بہتر منصوبہ بندی کو مدنظر رکھا جائے۔

بہاولپور(ایمرا نیوز آن لائن)
پنجاب ہائی وے پٹرول موبائل ایجوکیشن یونٹ نے ضلع بہاول نگر مختلف مقامات جس میں چشتیاں تا بہاول نگر روڈ، اڈا گجیانی، بس اسٹینڈ بہاول نگر، اڈا لطیف آباد پر ٹریفک آگاہی پروگرامز کا انعقاد کیا۔ انچارج موبائل ایجوکیشن یونٹ آفتاب حمید نے ٹریفک رولز، ٹریفک سائن بورڈ، موٹر سائیکل پر پیچھے دیکھنے والے شیشے لگانے، ہیلمٹ کے استعمال اور ہیلپ لائن 1124پر خصوصی لیکچرز دیئے۔ آہستہ چلنے والی گاڑیوں پر ریفلیکٹرز بھی لگائے۔ لیکچرز کے شرکاء اور ڈرائیورز کو ٹریفک آگاہی پمفلٹس بھی تقسیم کئے۔

بہاولپور (ایمرا نیوز آن لائن)
چیف جسٹس لاہور ہائی کورٹ لاہور مسٹر جسٹس سردار شمیم خان نے بہاول کلب بہاول پور میں منعقدہ ڈسٹرکٹ بار ایسوسی ایشن کی 68ویں تقریب حلف برداری میں نومنتخب اراکین صدر میاں محمد اظہر، جنرل سیکرٹری شیراز احمد بری، نائب صدر میاں محمد نجم، جوائنٹ سیکرٹری رضا حسین لودھی، فنانس سیکرٹری وسیم اختر، لائبریری سیکرٹری عابد مسعود خان، آڈیٹر رشید اختر سے حلف لیا۔ حلف اٹھانے والے اراکین مجلس عاملہ میں قاضی مختار احمد تنویر احمد بھٹہ، ملک خالد محمود، عبد الصمد، حافظ محمد اسلام، خالد محمود عباسی، غلام محمد لودھرا، راؤ ظفر نواز، ملک محمد شوکت اور سردار بابر خان شامل تھے۔ڈسٹرکٹ بار ایسوسی ایشن بہاول پور کی 68ویں تقریب حلف برداری میں چیف جسٹس لاہور ہائی کورٹ لاہور سردار شمیم خان کے ہمراہ سینئر جسٹس مسٹر جسٹس مسعود عابد نقوی، مسٹر جسٹس اسجد گھرال، مسٹر جسٹس انوار الحق پنوں، مسٹر جسٹس رسال حسن سید بھی موجود تھے۔

تقریب میں نومنتخب صدر ڈسٹرکٹ بار ایسوسی ایشن بہاول پور میاں محمد اطہر نے سپاسنامہ پیش کیا اور چیف جسٹس کو ڈسٹرکٹ بار اور وکلاء برادری کے درپیش مسائل سے آگاہ کیا۔ تقریب میں نقابت کے فرائض نومنتخب جنرل سیکرٹری شیراز احمد بری نے ادا کئے۔ چیف جسٹس لاہور ہائی کورٹ لاہور سردار شمیم خان نے جنرل سیکرٹری شیراز احمد بری کے مطالبہ اور نوجوان وکلاء کے پرزور اسرار پر سول جج کے امتحان کے لئے بہاول پور میں باقاعدہ ایک سنٹر قائم کرنے کا وعدہ کیا۔ تقریب میں بہاول پور ڈویژن کے اضلاع کی ڈسٹرکٹ و تحصیل بارز کے صدور وسیکرٹریز بار ایسوسی ایشن، ججز بنکنگ کورٹس،ججز کنزیومر کورٹ ، ججزانسداد دہشت گری، ممبرز ایگزیکٹیو سپریم کورٹ بار ایسوسی ایشن، ڈسٹرکٹ اینڈ سیشن جج بہاول پور، مظفر گڑھ، ایڈیشنل سیشن ججز، سول ججز، ڈسٹرکٹ پبلک پراسیکیوٹرز، خواتین وکلاء، ڈسٹرکٹ اٹارنی بہاول پور، لودھراں وضلعی انتظامیہ کے افسران شریک تھے۔

لاہور (ایمرا نیوز آن لائن)
لاہور پولو کلب کے زیراہتمام انٹرنیشنل سٹیل نیشنل اوپن پولو چیمپئن شپ 2019 ء برائے قائداعظم گولڈ کپ کے تیسرے روز دو میچز کھیلے گئے۔ پہلے میچ میں ماسٹر پینٹس نے ماسٹر پینٹس بلیک کو 10-2 سے جبکہ باڑیز نے بی بی جے پائپس کو 7-5 سے ہرا دیا۔تفصیلات کے مطابق لاہور پولو کلب میں انٹرنیشنل سٹیل کے تعاون سے ہونیوالے نیشنل اوپن میں دلچسپ مقابلے دیکھنے کیلئے تماشائیوں کی بڑی تعداد موجود تھی۔

اس موقع پر لاہور پولو کلب کے صدر ملک عاطف یار ٹوانہ، ایگزیکٹو کمیٹی ممبران احمد نواز ٹوانہ، جوادجمیل ملک، عمر سعید نیازی، عثمان حئی ،ثاقب خان خاکوانی اور سیکرٹری کرنل (ر) عثمان ناصر اور دیگر بھی موجود تھے۔ پہلے میچ میں ماسٹر پینٹس نے ماسٹر پینٹس بلیک کو 10-2 سے ہرایا۔ دونوں ٹیموں نے پہلے چکر میں ایک ایک گول سکور کیا۔ دوسرا چکرماسٹر پینٹس کے نام رہا جنہوں نے چار گول سکور کیے۔

تیسرے میں پھر دو گول سکور کیے جبکہ چوتھے چکر میں ماسٹر پینٹس نے تین جبکہ ماسٹر پینٹس بلیک نے ایک گول سکور کیا۔ جیتنے والی ماسٹر پینٹس کی ٹیم کی طرف سے خوان کروز لوساڈا نے چھ گول، حمزہ مواز خان نے تین جبکہ فاروق امین صوفی نے ایک گول سکور کیا۔ ماسٹر پینٹس بلیک کی طرف سے دونوں گول متیاس وائل پیراز نے سکو ر کیے۔ ادھر دوسرا میچ بہت زبردست رہا جس میں دونوں ٹیمیں چوتھے چکر تک برابر کھیلتی رہیں مگر پانچویں چکر میں باڑیز کی ٹیم نے شاندار کھیل پیش کرکے میچ جیت لیا۔

پہلے چکر میں باڑیز نے گول سکور کرکے برتری حاصل کی۔ دوسرے چکر میں دونوں ٹیموں نے ایک ایک گول سکور کیا۔ تیسرے چکر میں دونوں ٹیموں نے دو دو گول سکور کیے، چوتھے چکر میں بی بی جے پائپس کی ٹیم نے دو جبکہ باڑیز کی ٹیم نے ایک گول سکور کیا جبکہ پانچویں چکر میں باڑیز کی طرف سے دو گول سکور کیے گئے۔ باڑیز کی طرف سے باٹیسٹابازوگر نے چھ جبکہ راجہ سمیع اللہ نے ایک گول سکور کیا جبکہ بی بی جے پائپس کی طرف سے نکلوس کروٹی نے تین،بلال حئی اور ممتاز عباس نیازی نے ایک ایک گول سکور کیا۔ آج بروز جمعتہ المبارک واحد میچ ڈائمنڈ پینٹس /نیوایج اور ماسٹر پینٹس کے درمیان ہوگا۔

لاہور (وقت نیوز آن لائن)
وائی ڈی اے ، وائی این اے ، پنجاب پیرا میڈکس اسٹاف ایسوسی ایشن، آل پنجاب پیرامیڈکس ایسوسی ایشن ، الائیڈ ہیلتھ پروفیشنلز ایسوسی ایشن اور دیگر تمام ہسپتال ملازمین نے پاک فوج زندہ باد ریلی کا انعقاد کیا۔ جس میں ریلی کی قیادت جنرل سیکرٹری وائی ڈی اے پنجاب ڈاکٹر سلمان حسیب چوہدری نے کی۔ ریلی کے شرکاء نے پاک فوج کے حق میں فلک شگاف نعرے بلند کیے۔

تمام تنظیموں نے انڈین جیٹ طیارے مار گرانے پر افواج پاکستان اور جنرل باجوہ کو خراج عقیدت پیش کیا ۔ شرکاء نے جموں کشمیر، گجرات اور آسام میں مسلمانوں پر ہونے والے مظالم سے بچاو کے لیے پاک فوج سے ہندوستان پر حملہ کر کے ظالموں کو نیست و نابود کرنے کا مطالبہ کیا۔ ریلی میں شریک مرد و خواتین شرکا نے ملک و ملت کے لیے بڑھ چڑھ کر شہید ہونے کی خواہشات کا اظہار کیا۔

ڈاکٹرز ، نرسز ، پیرامیڈکس نے طبی امداد دینے کے ساتھ ساتھ زیرو لائن پر اپنے شیر دل سپاہیوں کے شانہ بشانہ لڑنے کا عزم ظاہر کیا۔ جیل روڈ پر یہ ریلی ایک گھنٹہ جاری رہی جس میں ٹریفک کو متبادل رستے سے جاری رکھا گیا۔ جیل روڈ شرکا کے “قدم بڑھاو جنرل باجوہ ہم تمہارے سا تھ ہیں” اور ” باجوہ تیرے جانثار بے شمار بے شمار” جیسے نعروں سے گونجھ اٹھا۔

لاہور(ایمرا نیوز آن لائن)
بھارت کشمیر میں ناکام ہوچکا ہے۔اپنی ہزیمت کو چھپانے کے لیے وہ اوچھے ہتھکنڈوں پر اتر آیا ہے۔ مودی نے گجرات میں دو ہزار مسلمانوں کو قتل کیا تھا۔ وہ انتخابات میں انتہا پسند ہندو ووٹرز کی ہمدردیاں سمیٹنا چاہتے ہیں۔ پاک فضائیہ نے ہندوستان کا سار ا غرور اور تکبر خاک میں ملا کر ثابت کردیا ہے کہ ہم ہر حوالے سے تیار کھڑے ہیں۔ اللہ تعالیٰ نے بھارت کو شکست سے دوچار کیا ہے۔ بھارت نے آئندہ بھی کوئی جارحیت کی تو اس کو پہلے سے زیادہ سخت جواب دیا جائے گا۔ ان خیالات کا اظہارامیر جماعت اسلامی پاکستان سینیٹر سراج الحق نے گزشتہ روزمنصورہ میں جماعت اسلامی صوبہ وسطی پنجاب کی لیڈر شپ تربیتی ورکشاپ سے خطاب کرتے ہوئے کیا۔ اس موقع پر سیکرٹری جنرل لیاقت بلوچ، امیر صوبہ وسطی پنجاب امیر العظیم، محمد جاوید قصوری،اخترعباس، بلال قدرت بٹ،سردار ظفر حسین و دیگر رہنما بھی موجود تھے۔

سینیٹر سراج الحق نے کہا کہ آج کی لیڈر شپ ورکشاپ بڑی اہمیت کی حامل ہے۔ لیڈر اس شخص کا نام ہے جو کارکنوں کی صلاحیتوں سے بھر پور انداز میں استفادہ کرنے کی صلاحیت رکھتا ہو۔ بزدل انسان کبھی لیڈر نہیں بن سکتا ۔ ہمیں اپنی ذات اور اخلاقیات کو خوبصورت بنانا ہوگا۔ امیر کی حیثیت سے کارکنان آپ کے پاس امانت ہیں۔ اس خزانے میں خیانت نہیں کی جانی چاہیے۔ آپ بطور لیڈر بھائی کی طرح اپنے کارکنوں کے ہمدرد بن جائیں۔ ہمیں خوف خدا رکھتے ہوئے اپنے تعلق کو مضبوط کرنا ہوگا۔ اگر آپ چاہتے ہیں کہ لوگ آپ کا احترام کریں تو آپ ان کو بھی احترام دیں۔ جماعت اسلامی کے لوگ بطور لیڈر جس علاقے میں رہتے ہیں ، اس معاشرے کے مسا ئل کو سمجھنے کی ضرورت ہے۔ اگر آ پ نے پنجاب کے عوام تک اپنے پیغام کو پہنچادیا ہے تو سارے ملک کے عوام تک یہ پیغام خود بخود پہنچ جائے گا۔ پنجاب تاریخی علاقہ ہے یہاں فتح حاصل کرنی ہوگی۔

انھوں نے کہا کہ شمالی پنجاب ملازمین کا علاقہ ہے ، جنوبی پنجاب جاگیرداروں اور وسطی پنجاب تاجروں کا علاقہ ہے یہ نسبتاً ماڈر ن علاقہ ہے جہاں کام کرنا نسبتاً آسان ہے۔ہمارے ملک میں معاشی استحصال ہے۔ لوگ معاشی لحاظ سے آزاد نہیں ہیں۔ ظالمانہ نظام کے خلاف جدوجہد کی ضرورت ہے۔ ظلم و جبر کے ان معیاروں کو گرانا ہوگا۔ مارچ میں انقلاب اور اسلامی نظام کا پیغام لے کر لوگوں میں جائیں۔ ملک میں ظالمانہ نظام کی بدولت انسانیت سسک رہی ہے۔لیاقت بلوچ نے شرکاء سے خطاب کرتے ہوئے کہا کہ آپ لوگ قوم کی امیدیں ہیں۔ لوگ آپ کو نجات دہندہ سمجھتے ہیں۔ چوروں اور لٹیروں کی حقیقت کھل کر قوم کے سامنے آچکی ہے۔ ملک میں مسائل کے انبار لگے ہیں، لوگوں کو کسی قسم کا ریلیف میسر نہیں۔ رابطہ عوام مہم کے ذریعے عوام تک اپنے آفاقی پیغام کو پہنچائیں گے۔ خدا تعالیٰ کے فضل و کرم سے ہمارے مخلص کارکن قیمتی اثاثہ ہیں۔

ان کی صلاحیتوں سے فائدہ اٹھانا لیڈر شپ کی ذمہ داری ہے۔ انھوں نے کہا کہ بھارت کے عزائم کھل کر سامنے آچکے ہیں۔ہندوستان کو اسی کی زبان میں جواب دینا چاہیے۔ ہندوستان نے ستر برسوں سے پاکستان کے وجود کو دل سے تسلیم نہیں کیا۔ یہی وجہ سے کہ بھارت مسلسل جارحیت کررہا ہے۔ مودی اپنی انتخابی مہم کو کامیاب بنانے کے لیے جنگی ماحول پید ا کررہا ہے۔ ثابت ہوگیا ہے کہ بھارت کو خطے کی سلامتی سے کوئی غرض نہیں۔ حکومت عالمی برادری پر سفارتی دباؤ استعمال کرے ۔ انھوں نے مزید کہا کہ جماعت اسلامی انقلابی جماعت ہے۔ جو عوامی مسائل کی بات کرتی ہے۔ الحمد للہ ہمارے پاس دیانتدار ، با صلاحیت اور با کردار قیادت موجود ہے ۔آئندہ ہم پنے انتخابی نشان اور جھنڈے کے ساتھ آگے بڑھیں گے۔ امیر جماعت اسلامی صوبہ وسطی پنجاب امیر العظیم نے اس موقع پر خطاب کرتے ہوئے کہا کہ بھارت کی ہٹ دھرمی اور جارحیت کا پاک فضائیہ کی جانب سے بروقت اور بھر پورجواب کو پوری قوم سراہتی ہے۔

بھارت کسی غلط فہمی میں نہ رہے ، اینٹ کا جواب پتھر سے ملے گا۔ ہندوستان اپنی تمام اخلاقی حدود پار کرچکا ہے۔ مسئلہ کشمیر کو حل کیے بغیر خطے میں امن کا خواب شرمندہ تعبیر نہیں ہوسکتا۔ بھارتی حکمرانوں نے جنگ کا طبل بجادیا ہے۔ وہ یہ مت بھولے کہ پاکستان ایٹمی ریاست ہے اور ہم ملک کے ایک ایک انچ کا دفاع کرنے کی صلاحیت رکھتے ہیں۔ جماعت اسلامی اس نازک صورتحال میں پاک فوج اور حکومت کے ساتھ کھڑی ہے۔ انھوں نے کہا کہ پلوامہ حملے کی آڑ میں پاکستان کو بدنام کرنے کی بھارتی ساز ش بری طرح ناکام ہوچکی ہے۔ عالمی برادری اور اقوام متحدہ اس حوالے سے اپنا مثبت کردار ادا کرے۔ مودی سرکار نے خطے کے امن کو تہہ و بالا کرنے کی سازش تیار کررکھی ہے۔ کشمیر میں تحریک آزادی نئی کروٹ لے چکی ہے ، اب وہ وقت دور نہیں جب کشمیری آزاد فضاؤں میں سانس لے سکیں گے۔