Archives January 2021

بالی ووڈ اداکارہ کترینہ کیف کا شمار بھارت کی کامیاب اداکاراؤں میں ہوتا ہے تاہم انہوں نے ابھی تک شادی نہیں کی جس کے باعث ان کے مداح یہ جاننے کے لیے بے چین رہتے ہیں کہ وہ کسے پسند کرتی ہیں اور کب شادی کریں گی؟
حال ہی میں اداکارہ نے انسٹاگرام سٹوری پر اپنی ایک تصویر پوسٹ کی ہے جس کو دیکھ کر لگتا ہے کہ انہوں نے کسی کے کندھے یا سینے پر سر رکھا ہوا ہے تاہم تصویر میں اس شخص کا چہرہ نظر نہیں آرہا۔
اس تصویر سے سوشل میڈیا پر افواہوں اور قیاس آرائیوں کا طوفان کھڑا ہوگیا ہے، مداحوں کا کہنا ہے کہ یہ دراصل کترینہ کے مبینہ بوائے فرینڈ اداکار وکی کوشال کی ہے۔
اس قیاس کو ثابت کرنے کے لیے مداحوں نے وکی کوشال کی تصویر بھی پوسٹ کی ہے جس میں وہ اسی رنگ کی ٹی شرٹ میں نظر آرہے ہیں۔
خیال رہے وکی کوشال اور کترینہ کیف کے درمیان تعلقات کے حوالے سے کچھ عرصے سے خبریں آرہی ہیں تاہم ابھی تک دونوں نے اس کی تصدیق یا تردید نہیں کی ہے۔

بالی ووڈ اداکار شکتی کپور نے بالآخر اپنی بیٹی اداکارہ شردھا کپور کی شادی کی خبروں پر خاموشی توڑدی۔اداکار ورون دھون کی شادی کے فوراً بعد افواہیں گردش کرنے لگی تھیں کہ ان کی دوست اداکارہ شردھا کپور بھی بہت جلد فوٹوگرافر روہن شریشٹھا کے ساتھ شادی کرنے والی ہیں۔ ان خبروں کو اس وقت مزید تقویت ملی جب شردھا کپور یا روہن کی جانب سے ان کی شادی کی خبروں کی تصدیق یا تردید نہیں کی گئی۔
بھارتی میڈیا کے مطابق جب شردھا کپور کے والد اداکار شکتی کپور سے ان کی بیٹی کی شادی سے متعلق پوچھا گیا تو انہوں نے کہا مجھے نہیں معلوم انٹرنیٹ پر شردھا کی شادی کے حوالے سے کیا خبریں اور افواہیں گردش کررہی ہیں۔ لیکن میں ایک بات جانتا ہوں کہ میں اپنی بیٹی کے ہر فیصلے میں اس کے ساتھ کھڑا ہوں۔ جس میں اس کی شادی کا فیصلہ بھی شامل ہے۔
شکتی کپور نے مزید کہا صرف روہن شریشٹھا کیوں؟ اگر میری بیٹی میرے سامنے آکر کسی کا بھی نام لے گی کہ میں نے اپنے لیے اس لڑکے کو منتخب کیا ہے اور میں اس کے ساتھ زندگی گزارنا چاہتی ہوں تو مجھے اس کے فیصلے پر کوئی اعتراض نہیں ہوگا۔
فوٹوگرافر روہن شریشٹھا کے بارے میں بات کرتے ہوئے شکتی کپور نے کہا روہن بہت اچھا لڑکا ہے ، وہ ہمارے گھر آتا تھا لیکن بچپن میں۔ شردھا نے مجھے کبھی نہیں کہا کہ وہ روہن سے شادی کرنا چاہتی ہے۔ مجھے نہیں معلوم کہ یہ دونوں ایک دوسرے کے لیے سنجیدہ ہیں یا نہیں کیونکہ میرے لیے تو یہ دونوں بچپن کے دوست ہیں۔
واضح رہے کہ گزشتہ برس شکتی کپور نے کہا تھا کہ شردھا کپور اپنے کام میں بہت مصروف ہے اور اگلے 2 سے 3 سال تک شادی نہیں کرے گی۔ جب شکتی کپور سے ان کے ماضی کے اس بیان سے متعلق پوچھا گیا تو انہوں نے کہا میں آج بھی اپنی بات پر قائم ہوں۔ لیکن وقت کے ساتھ بچے بڑے ہوتے ہیں اور اپنے فیصلے خود لیتے ہیں۔
شکتی کپور نے کہا میری بیٹی شردھا بہت اچھا کا کررہی ہے اور مجھے اس پر فخر ہے۔ اس وقت وہ رنبیر کپور کے ساتھ فلم ”لو رنجن“ میں کام کررہی ہے۔ شردھا اس وقت اپنے جیون ساتھی کا انتخاب خود کرلے گی جب وہ شادی کرنا چاہے گی۔

کے پی کے حکومت نے سرد علاقوں میں تعلیمی اداروں کی تعطیلات میں توسیع کر دی ہے ۔
تفصیلات کے مطابق خیبر پختون خوا کے علاقے مالاکنڈ ڈویژن اور بالائی علاقوں میں سردی کی شدت کے باعث تعلیمی اداروں میں تعطیلات میں توسیع کا فیصلہ کیا گیا ہے جس کے باعث سکول اور کالج یکم فروری کی بجائے اب 15 فروری سے کھولے جائیں گے ، سیکریٹری محکمہ ابتدائی اور ثانوی تعلیم نے اعلامیہ بھی جاری کر دیا ہے ۔

نانا کا خواب پورا کرنے کیلئے 14 سال انتظار کرنے والے 34 سالہ نعمان علی جنوبی افریقہ کے خلاف ریکارڈ کارکردگی دکھا کر پاکستانیوں کے ہیرو بن گئے ہیں۔
تفصیلات کے مطابق 34 کی عمر میں قومی ٹیم میں شامل ہونے والے نعمان علی نے جنوبی افریقہ کیخلاف نیشنل سٹیڈیم کراچی میں جاری ٹیسٹ میچ میں پانچ وکٹیں حاصل کر کے پاکستان کے بارہویں کھلاڑی اور چوتھے سپنر ہونے کا اعزاز اپنے نام کیا اور قومی ٹیم کی جیت کی بنیاد رکھنے میں بھی کلیدی کردار ادا کیا۔
نعمان علی نے پروٹیز کو اپنے سپن کے جال میں پھنساتے ہوئے ڈیبیو میچ میں ہی پانچ وکٹیں حاصل کیں اور پاکستان کے چوتھے سپنر بن گئے، ان سے قبل شاہد خان آفریدی، بلال آصف اور نذیر جونیئر بھی ٹیسٹ ڈیبیو پر پانچ، پانچ وکٹیں حاصل کر چکے ہیں۔
واضح رہے کہ نعمان علی نے جنوبی افریقہ کیخلاف پہلے ٹیسٹ میچ میں ڈیبیو کو اپنے مرحوم نانا کے نام کرتے ہوئے کہا تھا کہ میں نے ٹیسٹ کرکٹ میں پاکستان کی نمائندگی کرنے کیلئے ہی ساری زندگی کرکٹ کھیلی ہے اور آج میرا اور میرے اہل خانہ کا یہ خواب حقیقت کا بدل گیا ہے۔ میرے گھر والوں نے ہمیشہ میری بھرپور سپورٹ کی اور میری کامیابی کی وجہ بھی یہی ہے۔
ان کا کہنا تھا کہ ٹیسٹ کیپ حاصل کرتے وقت مجھے اپنے نانا بہت یاد آئے جو ہمیشہ سے ہی مجھے پاکستان کی جانب سے ٹیسٹ میچ کھیلتے دیکھنا چاہتے تھے۔ نعمان علی نے ڈومیسٹک کرکٹ کی اچھی کارکردگی کو جاری رکھنے کا عزم ظاہر کرتے ہوئے کہا کہ ڈومیسٹک کرکٹ کی کارکردگی کا صلہ ملنا اعزاز کی بات ہے اور میں اپنی کارکردگی جاری رکھنے کی کوشش کروں گا۔

اسلام آباد ہائیکورٹ میں وفاقی وزیر فواد چوہدری نا اہلی کیس پیر کو سماعت کیلئے مقرر کر دیا گیاہے ۔
تفصیلات کے مطابق ہائیکورٹ کے رجسٹرار آفس کی جانب سے آئندہ ہفتے کی کاز لسٹ جاری کر دی گئی ہے ،چیف جسٹس اطہر من اللہ پیر کو درخواست پر سماعت کریں گے ، درخواست میں فواد چوہدری پر اثاثے چھپانے کا الزام عائد کیا گیاہے ، فواد چوہدری نے جہلم کی زمین کو گوشواروں میں ظاہر نہیں کیا ۔

حکومت نے یکم فروری سے ایک مرتبہ پھر سے پٹرولیم مصنوعات مہنگی کرنے کی تیاری پکڑ لی ہے ، فروری کے آغاز سے پٹرولیم مصنوعات کی قیمتوں میں 12 روپے فی لیٹر تک اضافے کا امکان پیدا ہو گیاہے ۔
تفصیلات کے مطابق اوگرا نے پیٹرولیم مصنوعات کی قیمتوں میں اضافے کی سمری پیٹرولیم ڈویژن کو بھیج دی ہے ، سمری میں پیٹرول 12روپے فی لیٹر مہنگا کرنے کی تجویز دی گئی ہے جبکہ ڈیزل کی قیمت میں 10 روپے فی لیٹر، مٹی کا تیل 7، لائٹ ڈیزل ساڑھے 5 روپے مہنگا کرنے کی سفارش کی گئی ہے ۔
قیمتوں میں اضافے کی حتمی منظوری وزیراعظم عمر ان خان دیں گے ، اوگرا نے سمری 30روپے فی لیٹر لیوی کی بنیاد پر تیار کی، پیٹرول پر اس وقت 21روپے 56پیسے فی لیٹر لیوی عائد ہے جبکہ ڈیزل پر 23روپے 9پیسے فی لیٹر لیوی عائد ہے۔

بالی ووڈ کے معروف کامیڈین کپل شرما نے اپنا کامیڈی شو بند ہونے کی وجہ بتا دی۔بھارت بھر میں سب سے زیادہ دیکھنے جانے والے ’ کپل شرما ‘ کامیڈی شو سے متعلق کہا جا رہا تھا کہ شو بہت جلد بند ہونے جا رہا ہے۔ جس پر سونی ٹی وی نے وضاحت دیتے ہوئے کہا تھا کہ کورونا وائرس نے جہاں بہت سے لوگوں کو متاثر کیا وہیں اس شو کو بھی مالی مشکلات کا سامنا ہے۔
چینل انتظامیہ نے یہ بھی کہا تھا کہ کورونا وائرس کی وجہ سے فلمیں کم بن رہی ہیں اور وائرس پھیلنے کے خدشے کے باعث شو میں عوام کی شرکت پر بھی پابندی ہے جس کی وجہ سے فلموں کی تشہیر متاثر ہوئی ہے لہذا شو اگلے ماہ فروری تک بند کرنے کا فیصلہ کیا گیا ہے۔

وفاقی تحقیقاتی ادارے ( ایف آئی اے) نے جعلی لائسنس کے امتحانات کے باعث سول ایوی ایشن افسران کیخلاف 3 مقدمات درج کرتے ہوئے چھ افسروں کو گرفتار کر لیاہے ۔
تفصیلات کے مطابق ایف آئی اے کی جانب سے درج کیے گئے مقدمات میں لائسنس برانچ، پائلٹس اور دیگر کا ذکر کیا گیا ہے ، مقدمات کا اندراج ڈپٹی ڈائریکٹرسول ایوی ایشن کی درخواست پر کیا گیا، مقدمات میں 40 پائلٹس، 8 افسران اور دیگر کو نامزد کیا گیا ہے جبکہ چھ افسران کو گرفتار کر لیا گیاہے ۔
پائلٹس اور افسران کے خلاف مقدمات جعلی لائسنس کے امتحانات کے باعث درج ہوئے ،لائسنس کے امتحانات چھٹی کے روز ظاہر کیے جانے کا بھی انکشاف ہواہے جبکہ کچھ پائلٹس کا وقت تب کا ہے جب وہ فلائٹس پر تھے ، لائسنس برانچ اورپائلٹ کے ریکارڈ کو تحویل میں لیا گیا۔
ایف آئی اے نے مقدمات کے پیش نظر کارروائی کرتے ہوئے ایڈیشنل ڈائریکٹرمحمود حسین، سپرنٹنڈنٹ عبدالرئیس،پائلٹ عمرثقلین، ایڈیشنل ڈائریکٹرلائسنس برانچ سول ایوی ایشن خالدمحمود، سینئرجوائنٹ ڈائریکٹرسی اے اے فیصل منصور، جوائنٹ ڈائریکٹرآصف الحق کو گرفتار کر لیا گیاہے ۔

وفاقی وزیر تعلیم شفقت محمود دورے پر ٹھٹھہ پہنچ گئے ہیں جہاں انہوں نے گفتگو کرتے ہوئے کہا کہ کہ دورے کا مقصد ورثے کو دیکھنا ہے ۔
نجی ٹی وی ہم نیوز کے مطابق شفقت محمود کا کہناتھا کہ کورونا کے بعد جتنے بھی فیصلے ہوئے ہیں وہ سب متفقہ طور پر کیے گئے ، تمام صوبوں کے وزراءیکم فروری سے تعلیمی ادارے کھولنے پر متفق ہیں ، کورونا وائرس کے باعث تعلیم کا بہت نقصان ہواہے ۔شفقت محمود کاکہناتھا کہ کہیں دہائیوں سے بولی لگتی ہے اورسینیٹ نشستیں خریدی جاتی ہیں، اصولوں کوسمجھتے ہیں ،ہرکام اصولوں پرکرتے ہیں، ہماری خواہش ہے سینیٹ انتخابات میں شفافیت نظرآئے، ن لیگ کوجب آئینہ دکھایاجاتاہے توان کواپناچہرہ نظرآتاہے، وہ چاہتے ہیں اس پرپردہ ڈال دیں تاکہ من پسندفیصلہ لے سکیں،براڈشیٹ معاملے پرسپریم کورٹ کے ریٹائرڈجج کاکمیشن بنایا، کمیشن بنایاہے کہ وہ ان کودیکھے کس نے کیاکیا۔شفقت محمود کا کہناتھا کہ یہ معاملہ پرویزمشرف کے دورمیں شروع ہواتھا، ججزکودھمکیاں دینان لیگ کاپراناوتیرہ ہے، ماضی میں ن لیگ نے سپریم کورٹ پرحملہ کیا۔یاد رہے کہ گزشتہ روز یہ خبر سامنے آئی تھی کہ ایچ ای سی کی جانب سے آن لائن امتحانات کی اجازت دیدی گئی ہے اور نوٹیفکیشن جاری کر دیا گیاہے ، سوشل میڈیا پر گردش کرنے والے نوٹیفکیشن کی حقیقت اب سامنے آ گئی ہے جو کہ جعلی نکلا ہے ۔نجی ٹی وی 24 نیوز کے مطابق ایچ ای سی کی ترجمان عائشہ اکرام نے بیان جاری کرتے ہوئے کہا کہ ہائر ایجوکیشن کمیشن کی جانب سے آن لائن امتحانات کی اجازت سے متعلق کوئی نوٹیفکیشن جاری نہیں کیا گیاہے ، سوشل میڈیا پر گردش کرنے والا نوٹیفکیشن جعلی ہے اور یہ ممکنہ طور پر کسی کی شرارت ہے ۔ نوٹیفکیشن پر چیئرمین ایچ ای سی کے دستخط بھی جعلی کیے گئے ہیں ۔

انٹربینک مارکیٹ میں کاروبار کے آغاز پر ڈالر سستا ہو گیاہے ۔
تفصیلات کے مطابق انٹر بینک مارکیٹ میں کاروبار کے آغاز پر ڈالر کی قیمت میں 14 پیسے کمی ہوئی جس کے بعد ڈالر 160.54روپے سے کم ہو کر 160.40 روپے کا ہو گیاہے ۔
دوسری جانب سٹاک ایکسچینج میں بھی کاروبار کے آغاز پر بہتری دیکھنے میں آئی ہے ، کاروبار شروع ہو اتو 100 انڈیکس 46 ہزار 458 پوائنٹس پر تھا تاہم کچھ ہی دیر میں اس میں یک دم 101 پوائنٹس کا اضافہ ہوا اور انڈیکس 46 ہزار 559 پوائنٹس کی سطح پر پہنچ گیاہے ۔