Archives July 2021

اسلام آباد: وفاقی وزیر منصوبہ بندی اسد عمر نے بلاول بھٹو کو مخاطب کرتے ہوئے کہا ہے کہ لاک ڈاؤن، لاک ڈاؤن، لاک ڈاؤن، زرداری صاحب آپ چاہتے کیا ہیں؟ لاک ڈاؤن نے بھارت میں کروڑوں لوگوں کو غربت کی دلدل میں دھکیل دیا اور انڈیا کی معیشت 7 فیصد سکڑ گئی۔

یہ بات وفاقی وزیر نے اپنے ٹویٹ میں بلاول بھٹو زرداری کے بیان پر ردعمل میں کہی۔ اسد عمر نے کہا کہ بلاول آپ کہتے ہیں کہ اگر کراچی میں کورونا وائرس پھیلا تو ذمہ دار عمران خان ہوں گے، لاک ڈاؤن، لاک ڈاؤن، لاک ڈاؤن، زرداری صاحب آپ چاہتے کیا ہیں؟

اسد عمر ںے کہا کہ اس وقت کورونا سے ہندوستان میں ہونے والی اموات پاکستان سے 3 گنا زیادہ ہیں، انڈیا میں کروڑوں لوگوں کو غربت میں دھکیل دیا گیا جو آج تک غربت سے نکالے نہیں جاسکے، انڈیا کی معیشت 7 فیصد سکڑ گئی، ہندوستانی معیشت کے لیے یہ آزادی کے بعد سے بدترین سال تھا۔

اسد عمر نے کہا کہ یہ واضح طور پر ایک ایسا موضوع ہے جسے آپ اچھی طرح نہیں سمجھتے، برائے مہر بانی کورونا ریسپانس کو سیاست کی نذر نہ کیا جائے، زندگی اور معاش دونوں کی حفاظت کے وزیر اعظم عمران خان کے ویژن پر مبنی حکمت عملی نے بہترین نتائج پیدا کیے۔

انہوں نے مزید کہا کہ امید ہے کہ کل کے این سی او سی کے اجلاس میں سندھ حکومت ان تمام معاملات پر مزید تفصیل کے ساتھ مشاورت کرے گی، اور مشاورت سے ایک ایسی حکمت عملی وضع ہو گی جس میں ریاست کے سب ستون مل کر سندھ کے عوام کی صحت اور روزگار دونوں کا دفاع کریں۔

وفاقی وزیر نے کہا کہ سندھ میں جو فیصلے کل کیے گئے، خاص طور پر صنعت اور ٹرانسپورٹ کی بندش کے بارے میں ان پر نظر ثانی کی ضرورت ہے، ہم نے کل بھی اور اج بھی اپنے نکتہ نظر سے آگاہ کیا تھا، جس کی بنیاد پر جزوی تبدیلی کی گئی جو کہ خوش آئند ہے لیکن ابھی بھی مزید ترمیم کی ضرورت ہے۔

انہوں نے کہا کہ ان فیصلوں پر عمل درآمد کے لیے این سی او سی کی ٹیم صوبوں کے ساتھ مل کر تفصیلی حکمت عملی بناتی ہے، اس قومی ہم آہنگی سے مرتب حکمت عملی نے اللہ کے فضل سے کورونا کی تین لہر کو شکست دی، اگر ہر صوبہ اپنی مرضی کے فیصلے کرتا اور صرف اپنے وسائل پر انحصار کرتا تو کبھی بھی یہ کامیابی نہ حاصل ہوتی۔

اسد عمر نے مزید کہا کہ پاکستان کی کورونا کی حکمت عملی، جس سے عوام کی صحت اور روزگار دونوں کا دفاع کیا گیا، اسے دنیا میں پذیرائی حاصل ہوئی، زمینی حقائق کا باریک بینی سے جائزہ لینے کے بعد فیصلے کیے گئے، یہ تمام فیصلے ایسے پلیٹ فارم سے لیے گئے جہاں تمام وفاقی سول، ملٹری ادارے اور صوبے موجود ہوتے ہیں۔

ڈپٹی کمشنر مدثر ریاض کی تجویز پر سیکرٹری ہیلتھ سارہ اسلم نے اقبال ٹاؤن، عزیز بھٹی ٹاؤن، کینٹ زون، سمن آباد، گلبرگ، شالیمار کے مختلف علاقوں میں سمارٹ لاک ڈاؤن نافذ کردیا۔

تفصیلات کے مطابق کورونا کی چوتھی لہرکے پیش نظرعلامہ اقبال زون کی گلی نمبر162 ای تا 165 ای ایم ای سوسائٹی میں سمارٹ لاک ڈاؤن لگایا گیا ہے۔ عزیز بھٹی زون کے ہاؤس نمبر 418 تا 425 بلاک ایل جوہر ٹاؤن میں سمارٹ لاک ڈاؤن لگادیا گیا۔ کینٹ زون کی گلی نمبر 361 تا 417 سی بلاک، ہاؤس نمبر 6 تا 9 بی شالیمارروڈ کینٹ، ہاؤس نمبر40 تا 95 پی این ڈی کالونی، ہاؤس نمبر 300 تا 405 عمر بلاک میں سمارٹ لاک ڈاؤن لگایا گیا۔

سمن آباد زون میں ہاؤس نمبر 60 تا 65 بلاک ون وحدت کالونی، ہاؤس نمبر200 تا 250 اے بلاک گلشن راوی، ہاؤس نمبر100 تا 145 اے بلاک گلشن راوی اور شیخ زید رہائشی کالونی میں سمارٹ لاک ڈاؤن لگایا گیا ہے،گلبرگ زون میں ہاؤس نمبر140 تا 180 ایچ بلاک ماڈل ٹاؤن، شالیمار زون میں گلی نمبر 174 محلہ امن پارک کالج روڈ میں سمارٹ لاک ڈاؤن لگایا گیا۔

لاہور میں ڈینگی کے خطرے کی گھنٹی،لاہور کے 788 مقامات سے ڈینگی لاروا ملا ہے،بارش کے باعث پانی جمع ہونے سے ڈینگی کا مرض پھیلنے کا خدشہ ہے۔

تفصیلات کے مطابق لاہور میں ڈینگی کے خطرے کی گھنٹی بجادی،کورونا وائرس، بارشوں کی وجہ سے نظام زندگی متاثر ہوکررہ گیا، نشیبی علاقوں میں حالیہ بارشوں کے پانی کے کھڑا ہونے سے ڈینگی وائرس پھر جاگ گیا،گزشتہ چوبیس گھنٹوں کے دوران لاہور کے 788 مقامات سے ڈینگی لاروا برآمد ہوا،ڈینگی لاروا کی افزائش بڑھنے سے مرض پھیلنے کا خدشہ ہے،بارشوں سے شہر کے بیشتر علاقوں میں ڈینگی مچھروں کی افزائش کے ہاٹ سپاٹ بن گئے۔

دوسری جانب شہر میں کالے بادلوں نے موسم کا رنگ بدل دیا خوب ابر کرم برسا، جیل روڈ، شادمان جوہر ٹاؤن، مال روڈ، سمن آباد، گلشن روای،گلبرگ سمیت لاہور کے مختلف علاقوں میں ایک گھنٹہ تیز بارش ریکارڈ کی گئی، محکمہ موسمیات کے مطابق مون سون کا دوسرا سپیل اگست میں پنجاب کا رخ کرے گا جبکہ دوسرے سپیل میں اچھی بارشیں ہوں گی۔

نافرمان بیٹے کے تشدد سے تنگ آکر معمرشہری عدالت پہنچ گیا، بیٹا اپنی بیوی سے مل کرتشدد کرتا ہے، اب گھر سےنکال دیا۔ رائیونڈ کے لال دین کی عدالت میں دہائی۔

تفصیلات کے مطابق رائیونڈ سٹی کامعمر رہائشی 80 سالہ لال دین اپنے وکیل راشد نواز عباسی کے ہمراہ شیشن عدالت میں پیش ہوا۔ لال دین نے موقف اختیار کیا کہ اس نے محنت مزدوری کرکے بیٹے وسیم کو پالا، کہ وہ اس کے بڑھاپے کا سہارا بنے گا، لیکن بیٹا نافرمان نکلا۔ خود بھی مارتا ہے اور بیوی سے بھی تشدد کرواتاہے۔

لال دین نے مطالبہ کیا کہ قانون کے مطابق اس کے بیٹے کو سزادی جائے۔ سیشن عدالت نے کیس کی سماعت کا اختیار نہ ہونے پر معاملہ ڈپٹی کمشنر لاہور کو بھجوا د یا۔ ڈی سی نے ایس پی رائیونڈ کو نوٹس جاری کرتے ہوئےرپورٹ طلب کرلی۔

غازی آباد پولیس نےسوشل میڈیا پر اسلحہ کی نمائش کرنے والے2ملزموں کو دھر لیا جبکہ اسلحہ اور گولیا قبضے میں لے لیا گیا۔

تفصیلات کےمطابق پولیس کو درخواست موصول ہوئی کہ غازی آبادکےعلاقے میں ملزم اسلحہ کی نمائش کرتےہیں جس سےخوف و ہراس پھیل گیا ، ملزموں کی جانب سے اسلحہ کے ساتھ ویڈیوز بنا کرسوشل میڈیاپر ڈالی جاتی ہے جس پر پولیس نے چھا پہ مار کر ملزم عمران اور نعمان کو گرفتار کر لیا ۔ تھانہ غازی آباز پولیس نے ملزموں سے اسلحہ اور گولیاں قبضے میں لے لیں ۔پولیس کاکہنا تھاکہ دونوں ملز موں کے خلاف مقدمہ درج کرکے کارروائی شروع کردی گئی ہے ۔

محکمہ خزانہ نے میٹرو بس اتھارٹی کو چار ارب روپے جاری کر دئیے۔ یہ گرانٹ مالی سال کے پہلے تین ماہ کیلئے جاری کی گئی ہے۔

تفصیلات کے مطابق محکمہ خزانہ پنجاب نےلاہور کی میٹرو بس اتھارٹی کو چار ارب روپے جاری کر دئیے ہیں۔ محکمہ خزانہ نے یہ گرانٹ میٹرو بس سروس اور اورنج ٹرین کیلئے جاری کی ہے۔ یہ گرانٹ میٹرو بس اور اورنج ٹرین میں سبسڈی، ملازمین کو تنخواہوں کی ادائیگی سمیت دیگر انتظامی امورپر خرچ کی جائے گی۔

گرانٹ مالی سال کے پہلے تین ماہ کیلئے جاری کی گئی ہے۔ذرائع کا کہنا ہے کہ مذکورہ گرانٹ نہ ملنے کی صورت میں میٹروبس اور میٹرواورنج ٹرین بند ہونے کا خدشہ پیدا ہوگیا۔

دوسری جانب وزیر اعلی پنجاب نے میٹروبس کی تعمیر و مرمت کے لیے تیس کروڑ روپے کے فنڈ کے اجرا کی منظوری دے دی ہے۔ اس فنڈ سے میٹروبس کے جنگلے کی پینٹنگ، سٹیشن کا تعمیراتی کام، برقی سیڑھیوں کی مرمت اور سٹیشن کی چھتوں کا کام بھی کیا جائے گا۔

پنجاب ماس ٹرانزٹ اتھارٹی کی جانب سے ایوان وزیر اعلیٰ سے رجوع کیا گیا۔ ایوان وزیر اعلی نے ماس ٹرانزٹ اتھارٹی کی استدعا پر فنڈ کی منظوری دے دی، نو سال پہلے بنے والی میٹرو بس سروس کی حالت اب ٹھیک کی جائے گی۔

وفاقی وزارت خزانہ نے پیٹرولیم مصنوعات کی نئی قیمتوں کا نوٹیفکیشن جاری کر دیا۔

وزارت خزانہ کی جانب سے جاری نوٹیفکیشن کے مطابق پیٹرول ایک روپے 71 پیسے فی لیٹر مہنگا کر دیا گیا جس کے بعد پیٹرول کی نئی قیمت 119 روپے 80 پیسے فی لیٹر ہوگی۔

نوٹیفکیشن میں کہا گیا ہے کہ مٹی کے تیل کی قیمت میں 35 پیسے فی لیٹر اضافے کے بعد نئی قیمت 87 روپے 49 پیسے مقرر کردی گئی ہے۔

لائٹ اور ہائی اسپیڈ ڈیزل کی قیمتوں میں کوئی رد و بدل نہیں کیا گیا جس کے باعث ہائی اسپیڈ ڈیزل کی قیمت 116 روپے 53 پیسے فی لیٹر جبکہ لائٹ ڈیزل کی قیمت 84 روپے 67 پیسے فی لیٹر پر برقرار ہے۔

نوٹیفکیشن کے مطابق پیٹرولیم مصنوعات کی نئی قیمتوں کا اطلاق آج رات 12 بجے سے ہو گا۔

خیال رہے کہ گزشتہ روز ہی وزیراعظم عمران خان کے معاون خصوصی برائے سیاسی روابط شہباز گِل نے پیٹرولیم مصنوعات کی قیمتوں میں ردوبدل کا بتادیا تھا۔

اسلام آباد: ملک میں نئے مالی سال 2021-22 کے پہلے ماہ کے چاروں ہفتوں کے دوران مسلسل مہنگائی کی شرح میں اضافہ جاری ہے۔

یکم جولائی کو ختم ہونے والے ہفتے مہنگائی میں0.53فیصد اضافہ ہوا تھا ۔29 جولائی کو ختم ہونے والے ہفتے میں بھی مہنگائی0.03 فیصد بڑھی۔ سالانہ بنیادوں پر مہنگائی 12.20فیصد ہوگئی ہے۔

وفاقی ادارہ شماریات مہنگائی بارے ہفتہ وار رپورٹ جاری کردی ہے جس میں بتایا گیا ہے کہ اس ایک ہفتے کے دوران چینی، ٹماٹر، پیاز، انڈے ، پیاز، چاول، لہسن، مٹن، بیف، ویجی ٹیبل گھی، ایل پی جی، گڑ، سرسوںکا تیل، دال مسور، پٹرولیم مصنوعات ، کھلے دودھ سمیت 23اشیائے ضروریہ کی قیمتوں میں اضافہ ہوا۔ دال مونگ ،دال ماش،چکن ،دال چنااور آلو سمیت 6اشیاء سستی ہوئیں۔22 کی قیمتیں مستحکم رہیں۔

گزشتہ ہفتے ٹماٹر6.64 فیصد، پیاز2.3، ککنگ آئل 1.2، چینی1.49 ، انڈے 3.5، ویجی ٹیبل گھی1.8، پٹرول4.7ہائی اسپیڈ ڈیزل2.3 اور ایل پی جی9.5 فیصد مہنگی ہوئی۔ چکن18.3 ، دال چنا0.06 ، دال مونگ 1.32،دال ماش 0.58 اورآلو1.23فیصد سستی ہوئی ہیں۔

ملک میں سونے کی فی تولہ قیمت میں کمی ہوگئی۔

سندھ صرافہ بازار جیولرز ایسوسی ایشن کے مطابق سونے کی فی تولہ قیمت 500 روپے کم ہوکر ایک لاکھ 10 ہزار روپے ہوگئی۔

10 گرام سونے کی قیمت 429 روپے کم ہوکر 94307 روپے ہوگئی جبکہ عالمی صرافہ میں سونے کی قدر 8 ڈالر کم ہوکر 1814 ڈالر فی اونس ہے۔

کراچی: پاکستان پر واجب الادا بیرونی قرضوں کی ادائیگیوں کی غرض سے طویل مدت کے لیے ڈالر کی طلب برقرار رہنے کے خدشات کے باعث زرمبادلہ کی دونوں مارکیٹوں میں گزشتہ ہفتے ڈالر، پاونڈ اور یورو کی قدر میں اضافے کا رحجان غالب رہا۔

ہفتہ وار کاروبار میں ڈالر نیچے آنے کے بعد دوبارہ 162روپے سے تجاوز کرگیا۔ کورونا کی چوتھی لہر سے بچاؤ کے لیے کاروباری شعبوں میں دوبارہ لاک ڈاؤن شروع ہونے سے ڈالر کی ڈیمانڈ بڑھی اور روپیہ کمزور ہوا۔ ہفتے کے آغاز پر شرح مبادلہ کی درستگی کےلیے اگرچہ ریگولیٹر کی مداخلت سے ڈالر کی قدر 162روپے سے نیچے آگئی تھی۔

یوروبانڈز کی مد میں دوارب ڈالرموصول ہونے سے زرمبادلہ کے ذخائر میں بہتری سے بھی روپیہ تگڑا ہوا لیکن لاک ڈاؤن کے سبب درآمدی شعبوں کی ڈیمانڈ روپے کی تنزلی کا باعث بنی۔
انٹربینک مارکیٹ میں ڈالر کی قدراتارچڑھاو کے بعد 11پیسے بڑھکر 162.43 روپے پر بند ہوئی جبکہ اوپن کرنسی مارکیٹ میں ڈالر کی قدر1.20 بڑھ کر 162.70 روپے ہوگئی۔

اسی طرح برطانوی پاؤنڈ کے انٹربینک ریٹ 4.11 روپے بڑھ کر 227.01روپے ہوگئے جبکہ اوپن مارکیٹ میں برطانوی پاونڈ کی قدر 4روپے بڑھ کر 224روپے ہوگئی۔ انٹربینک میں یورو کرنسی کی قدر 2.08روپے بڑھ کر 193.29 روپے ہوگئی جبکہ اوپن مارکیٹ میں یورو کی قدر 2.80روپے کی کمی سے 190.50روپے ہوگئی۔