Archives July 2021

بلوچستان کے ضلع دکی میں 70 لیویز اہلکاروں کو کورونا وائرس کے خلاف ویکسین نہ لگوانے پر معطل کردیا گیا۔

اسسٹنٹ کمشنر دکی حبیب بنگلزئی کی طرف سے جاری کردہ ایک اعلامیہ کے مطابق بار بار ہدایات کے باوجود 70 لیویز اہلکار مہلک وائرس سے بچاؤ کی ویکسین نہیں لگوارہے تھے۔

انتظامیہ نے معطل اہلکاروں کی تنخواہوں کو بھی روک دیا۔

معطل اہلکاروں میں 2 نائب تحصیلدار، 3 حوالدار، ایک ایک موہرر اور وائرلیس آپریٹر اور دیگر شامل ہیں۔

واضح رہے کہ ڈپٹی کمشنر دکی نے لیویز اہلکاروں کو وائرس سے بچاؤ کی ویکسینیشن کو یقینی بنانے کی ہدایت کی تھی۔

نیشنل کمانڈ اینڈ آپریشن سینٹر (این سی او سی) نے 9 جون کو سرکاری اور نجی شعبے کے تمام ملازمین کے لیے کورونا وائرس کی ویکسین لازمی کردی تھی۔

اس کے تحت سرکاری ملازمین کو 30 جون تک مکمل طور پر لگوانے کی ہدایت کی گئی تھی۔

رواں ماہ کے آغاز میں وزارت صحت نے ان افواہوں کی تردید کی تھی کہ حکومت ‘جبری’ طور پر ویکسین لگائے گی اور ویکسین لگانے سے انکار کی حوصلہ شکنی کے لیے کوئی منصوبہ زیر غور ہے۔

دوسری جانب الیکٹرانک اور سوشل میڈیا پر دعویٰ کیا جارہا تھا کہ حکومت، ویکسی نیشن کا عمل تیز کرنے کے طریقوں پر غور کر رہی ہے لیکن وزارت صحت نے وضاحت کردی کہ جبری ویکسی نیشن پر غور نہیں کیا جارہا۔

افواہیں تھیں کہ حکومت ان لوگوں کے خلاف سخت کارروائی کرنے کا سوچ رہی ہے جنہوں نے ویکسین نہیں لگوائی، ان کی سمز بلاک کردی جائے گی اور انہیں ریسٹورنٹس اور سرکاری دفاتر میں داخل ہونے کی اجازت نہیں دی جائے گی۔

تاہم وفاقی اور صوبائی حکومتوں کے کچھ اقدامات نے ان افواہوں کو مزید تقویت اس وقت دی جب حکومت سندھ نے اعلان کیا کہ جو ملازمین ویکسین نہیں لگوائیں گے انہیں جولائی کی تنخواہ نہیں دی جائے گی۔

اسی طرح پاکستان انسٹی ٹیوٹ آف میڈیکل سائنسز (پمز) کے جاری کردہ ایک سرکلر میں کہا گیا کہ کووِڈ رسک الاؤنس ان ملازمین کو نہیں دیا جائے گا جن کے پاس ویکسی نیشن کارڈ نہیں ہوگا۔

خیال رہے کہ گزشتہ روز بلوچستان میں کورونا وائرس کے مزید 33 کیسز سامنے آئے جبکہ ایک شخص وائرس سے لڑتے ہوئے زندگی کی بازی ہار گیا۔

بلوچستان میں اب تک وائرس کے 27 ہزار 178 کیسز سامنے آچکے ہیں اور 309 افراد جاں بحق ہوچکے ہیں۔

لاہور: وحدت کالونی میں برطانیہ سے آنے والی لڑکی سے مبینہ زیادتی کی گئی۔

پولیس کے مطابق لڑکی والد کی وفات پر پاکستان آئی جسے سوتیلی والدہ نے گھر سے نکال دیا تھا، متاثرہ لڑکی والد کے دوست کے گھر رہائش پذیر تھی جہاں والد کے دوست کے بیٹے نے لڑکی سے مبینہ زیادتی کی۔

پولیس کا کہنا ہے کہ ملزم کو گرفتار کرلیا گیا ہے جب کہ زیادتی کی تصدیق کے لیے متاثرہ لڑکی کا بھی میڈیکل کرایا جارہا ہے۔

بہاولپور میں طلاق دینے کے رنج میں بیوی نے اپنے سابق شوہر اور نند کو تیز دھار آلے سے قتل کردیا جب کہ پولیس نے ملزمہ کو گرفتار کرلیا۔

پولیس کے مطابق بستی گاڈراں میں کلثوم نامی خاتون کو اس کے شوہر مصطفیٰ قدیر نے ایک روز قبل طلاق دی تھی، طلاق دینے کے رنج میں ملزمہ نے اپنے سابق شوہر اور اپنی نند ساجدہ کو سوتے ہوئے تیز دھار آلے سے قتل کردیا۔

پولیس کا کہنا ہےکہ واقعے کی اطلاع ملنے پر پولیس نے فوری طور پر کارروائی کرتے ہوئے ملزمہ کو گرفتار کرکے آلہ قتل بھی برآمد کرلیا۔

لاہور: ریلوے حکام نے 63 من پسند افسران کو کیش ایوارڈ کی مد میں لاکھوں روپے دیدیے۔

ان افسران میں چھٹی پر گیا ایک آفیسر اور پانچ روز قبل پرسانل برانچ میں تعینات آفیسر بھی شامل ہے۔ ہیڈ کوارٹر میں اعلی افسران کے ماتحت عملہ کو بھی اس بہتی گنگا میں نہلایا گیا۔

دوسری طرف ٹرین آپریشن سے منسلک گینگ مینوں، سگنل اسٹاف، الیکٹریکل اور پولیس اہلکاروں کو کئی ماہ سے ٹی اے ہی نہیں مل سکا ہے۔ من پسند افسران کو کیش ایوارڈ دینے سے دیگر افسران و ملازمین میں بد دلی پیدا ہوگئی۔

ایک طرف محکمہ کو اربوں روپے کا خسارہ ہے اور پنشنرز و ملازمین کو تنخواہوں کے حصول کےلئے سخت مشکلات کا سامنا کرنا پڑتا ہے۔

ریلوے کی مالی حالت بھی ٹھیک نہیں ہے ۔ وہیں ریلوے بیوروکریسی نے اپنے من پسند افسران کو لاکھوں روپے کیش ایوارڈ کی صورت میں دیدیے ہیں۔ اس حوالے سے ریلوے حکام کا کہنا ہے کہ جن افسران و دیگر کو کیش ایوارڈ دیا گیا ہے وہ ان کے کام کے مطابق دیا گیا ہے ۔ البتہ ملازمین کے ٹی اے کی رقم بھی انہیں جلد جاری کردی جائے گی۔

اسلام آباد: ترجمان دفترخارجہ کا کہنا ہے کہ مشترکہ بحری مشقوں سی بریز میں شرکت کے فیصلے کا ہرگز مطلب نہیں کہ اسرائیل کو تسلیم کر رہے ہیں۔

ترجمان دفترخارجہ زاہد حفیظ نے ہفتہ واربریفنگ میں کہا کہ افغانستان میں قیام امن ہی سے افغان مہاجرین کی واپسی ممکن ہے، پاکستان عالمی برادری کواس بارے کئی بارآگاہ کرچکا ہے، پاکستان ان کی باعزت واپسی چاہتا ہے۔

ترجمان دفترخارجہ نے کہا کہ پاکستان کئی دہائیوں سے افغان مہاجرین کی میزبانی کررہا ہے، پاکستان نے امریکا کے ساتھ مل کرافغان امن عمل کے لئے کام کیا، ڈپلومیٹک مشنزکی حفاظت میزبان ملک کی ہوتی ہے اورافغان قیادت کی امریکی صدرسے ملاقات انکا اندرونی معاملہ ہے۔
ترجمان دفترخارجہ زاہد حفیظ نے کہا کہ ہم فوجی ٹیک اوورکے حامی نہیں، ہماری خواہش ہے کہ بین الافغان مذاکرات کامیاب ہوں، افغان مسئلے کا حل طاقت کے استعمال میں نہیں۔ ترجمان دفترخارجہ نے کہا کہ ایران خطے کا اہم ملک اورافغانستان کا ہمسایہ ہے،افغان امن عمل پر ماضی میں بھی ایران کے ساتھ مل کر کام کیا، افغانستان کے تمام ہمسائیوں کو افغان امن عمل کے لیے کام کرنا چاہیے۔

ترجمان دفترخارجہ نے کہا کہ مقبوضہ جموں اورکشمیرپربھارت کویاد دلاتے ہیں کہ یہ ایک متنازع علاقہ ہے، مقبوضہ جموں وکشمیر کا مسئلہ اقوام متحدہ کے حل طلب ایجنڈا میں شامل ہے، مسئلے کا حل صرف کشمیریوں کی خواہشات کے مطابق استصواب رائے میں ہے، بھارتی بیانات سے اس کی متنازع حیثیت پر کوئی فرق نہیں پڑے گا۔

زاہد حفیظ نے کہا کہ پاکستان اور اسرائیل کا مشترکہ بحری مشقوں سی بریز میں شرکت کے فیصلے کا ہرگز مطلب نہیں کہ اسرائیل کو تسلیم کر رہے ہیں پاکستان کی اسرائیل بارے پالیسی میں کوئی تبدیلی نہیں آئی.

اسلام آباد: ملک میں کورونا وائرس سے مزید 40 افراد جاں بحق ہوگئے۔

نیشنل کمانڈ اینڈ آپریشن سینٹر کی جانب سے جاری بیان کے مطابق گزشتہ 24 گھنٹوں کے دوران ملک میں کورونا کی تشخیص کے لیے 46 ہزار 145 ٹیسٹ کیے گئے جن میں سے 1037 افراد میں کورونا وائرس کی تصدیق ہوئی۔

ملک میں اب تک کورونا کے مصدقہ مثبت کیسز کی تعداد 958,408 ہوگئی ہے جن میں سے 904,320 مریض شفایاب ہو چکے ہیں۔ گزشتہ روز اس وبا نے مزید 40 افراد کی زندگیوں کو نگل لیا۔ اس طرح ملک میں اب تک اس وبا سے جاں بحق افراد کی مجموعی تعداد 22 ہزار321 ہوگئی ہے۔ جب کہ مثبت کیسز کی شرح 2.2 فیصد ہے۔
ملک بھر میں کورونا وائرس کے فعال کیسز کی تعداد میں کمی آئی ہے اور فعال کیسز کی تعداد 31 ہزار 767 ہوگئی ہے۔

پشاور: سول ایوی ایشن اتھارٹی میں نائب قاصد جعفر کی ریٹائرمنٹ پر اسے ایک دن کے لیے اعزازی ایئر پورٹ مینیجر بنایا گیا۔

سول ایوی ایشن اتھارٹی پشاور میں تعینات جعفر سروس مکمل کرنے کے بعد گزشتہ روز ریٹائر ہو گیا تھا، تاہم اس کی بہترین خدمات اور پوری سروس میں کوئی بھی غلط رپورٹ نہ ہونے پر اعزازی طور پر ایک دن کے لئے ایئر پورٹ منیجر بھی تعینات کیا گیا۔

باچا خان انٹرنیشنل ایئر پورٹ کے چیف آپریٹنگ آفیسر عبید الرحمان عباسی کے مطابق جعفر نے اپنی پوری سروس میں کبھی کوتاہی نہیں کی اور اسے نہ کبھی شوکاز ملا نہ ہی اسکے خلاف کوئی رپورٹ فائل ہوئی۔ انکا کہنا تھا کہ رٹائرمنٹ کے دن سول ایوی ایشن اتھارٹی کی جانب سے انکی خدمات کو سراہا گیا اور جعفر کے لئے دعوت رکھی گئی۔

جعفر کو ایک دن کے لیے اعزازی ایئر پورٹ مینیجر بھی تعینات کیا گیا اور ایک دن کا اعزازیہ دینے کے بعد پروٹوکول اور سرکاری گاڑی میں نائب قاصد جعفر کو گھر رخصت کیا گیا۔

لاہور: پولیس نے نواب ٹاؤن میں واقع ایک گھر سے میاں بیوی کی لاشیں برآمد کی ہیں۔

تفصیلات کے مطابق لاہور میں پولیس نے نواب ٹاؤن کے علاقے پی سی ایس آئی آر فیز 2 میں واقع ایک گھر میاں بیوی لاشيں برآمد کی ہیں۔ہلاک ہونے والے میاں بیوی کی شناخت 26 حسن اور 24 سالہ کاٸنات کے ناموں سے ہوئی ہے۔ لاشوں کو ضابطے کی کارروائی کے لیے قریبی اسپتال منتقل کردیا گیا ہے۔

پولیس کا کہنا ہے کہ حسن سول انجینئر تھا جو والد کی کمپنی میں کام کرتا تھا، حسن کی چھ ماہ قبل اپنے ماموں کی بیٹی کائنات سے شادی ہوئی تھی، کائنات سیالکوٹ کی رہائشی تھی، دونوں کی لاشیں الگ الگ کمروں سے برآمد ہوئی ہیں، حسن کی لاش پنکھے سے لٹک رہی تھی اور بیوی دوسرے کمرے میں بیڈ پر مردہ حالت میں پائی گئی، کائنات کی لاش بیڈ پر پڑی تھی جس کی زہریلی شے کھانے سے موت ہوئی، تفتیشی ٹیموں نے جائے وقوعہ سے شواہد اکٹھے کرلیے ہیں۔ تفتیش کار اسے قتل اور خودکشی سمیت دیگر پہلوئوں سے تفتیش کر رہے ہیں۔