All posts by emra

مانانوالہ:وفاقی وزیر میاں جاوید لطیف نے کہا ہے کہ شیخوپورہ میں ورکرز کنونشن کی کامیابی پر نواز شریف نے تمام کارکنوں کو مبارک باد کا پیغام بھیجا ہے وہ وقت دور نہیں جب میرے قائد اپنے شیر کارکنوں کے ساتھ ہوں گے وفاقی وزیر جاوید لطیف نے میڈیا کے نمائندوں سے گفتگو کرتے ہوئے کہا کہ ورکرز کنونشن کی کامیابی پر میری بہن مریم نواز شریف نے مسرت کا اظہار کیا ہے ان شاء اللہ اس ملک سے فتنہ خان کی سیاست ہمیشہ ہمیشہ کے لیے ختم ہوجائے گی قبل ازیں ورکرز کنونشن سے خطاب کرتے ہوئے کہا کہ میں آج اپنی بہن مریم نواز شریف کی جرات اور سلام پیش کرتا ہوں جو بہادری کے ساتھ میدان عمل میں ہے اور انہوں نے گیڈروں کو چھپنے پر مجبور کر دیا ہے انہوں نے کہا کہ انصاف وہ ہوگا جس میں ترازو کے دونوں پلڑے برابر ہوں میرے قائد نواز شریف کے ساتھ بے انصافی کرنے والے آج منہ چھپا کر پھر رہے ہیں اب صادق و امین کا اصل معیار قائم ہوگا اور جعلی صادق و امین کو بے نقاب کرنا پڑے گا میاں جاوید لطیف نے کہا کہ شیخوپورہ کے ہزاروں کارکنوں نے آج کنونشن میں جوق در جوق شریک ہو کر ثابت کر دیا ہے کہ کوئی مائی کا لعل شیخوپورہ میں نواز لیگ کو نقصان نہ پہنچا سکا ہے اور ان شاء اللہ یہ ہمیشہ نواز لیگ کا مضبوط قلعہ رہے گا۔

لاہور: پاکستان تحریک انصاف نے جہلم سے مسلم لیگ (ن) کی بڑی وکٹ گرا دی، پی ٹی آئی کے چیئرمین عمران خان سے مسلم لیگ(ن) کے سابق رکن پنجاب اسمبلی چودھری محمد ثقلین نے ساتھیوں سمیت ملاقات کر کے شمولیت کا اعلان کیا۔اس موقع پر مرکزی سینئر نائب صدر فواد چودھری، مرکزی نائب صدر اعجاز چودھری اور چودھری شہباز بھی موجود تھے۔ملاقات میں چودھری محمد ثقلین کی جانب سے چیئرمین تحریک انصاف عمران خان کی قیادت پر مکمل اعتماد کا اظہار کیا گیا، عمران خان کی جانب سے تحریک انصاف میں شمولیت پر چودھری محمد ثقلین کا خیر مقدم کیا گیا۔

اسلام آباد:وفاقی وزیر شازیہ مری نے کہا ہے کہ حق کے حصول کی جنگ لڑنے والی خواتین کو خراجِ تحسین پیش کرتی ہوں۔وفاقی وزیر تخفیف غربت و سماجی تحفظ اور چیئرپرسن بینظیر اِنکم سپورٹ پروگرام شازیہ مری نے خواتین کے عالمی دن پر پیغام جاری کیا ہے۔شازیہ مری نے کہا ہے کہ اس دن کے منانے کا مقصد خواتین کے سماجی، سیاسی اور اقتصادی مسائل اجاگر کرنا ہے۔انہوں نے کہا کہ خواتین کی شمولیت کے بغیر کوئی بھی معاشرہ ترقی کی راہ پر گامزن نہیں ہوسکتا، پاکستان میں خواتین ہر شعبے میں مردوں کے شانہ بشانہ کھڑی ہیں۔شازیہ مری نے کہا کہ پاکستانی عورت بے شمار مسائل سے دوچار ہے، خواتین کو باوقار مقام اور روزگار کے مواقع فراہم کرنا ہماری اولین ترجیح ہے۔وفاقی وزیر نے کہا کہ ہم نے خواتین کے خلاف صنفی امتیاز اور تشدد کے واقعات کی روک تھام کے لیے اقدامات اٹھائے ہیں۔انہوں نے کہا کہ شہید محترمہ بینظیر بھٹو نے ملک میں جمہوریت اور آئین کی بالادستی کے لیے عظیم قربانیاں دیں۔شازیہ مری نے کہا کہ بینظیر کفالت کے تحت مستحق خواتین کو معاشی طور پر بااختیار بنا رہے ہیں۔وفاقی وزیر نے یہ بھی کہا کہ بینظیر تعلیمی وظائف سے مستحق خواتین کے بچے اور بچیاں تعلیم حاصل کر رہے ہیں۔

اسلام آباد:سپریم کورٹ آف پاکستان نے نیب کی رضا کارانہ اسکیم واپسی ازخود نوٹس نمٹا دیا۔چیف جسٹس پاکستان عمر عطا بندیال کی سربراہی میں 3 رکنی بینچ نے سماعت کی۔سماعت کے دوران دلائل دیتے ہوئے ایڈیشنل اٹارنی جنرل نے کہا کہ 2022 میں نیب ترامیم کے بعد سیکشن 25 اے بھی جرم تصور ہو گا، جو سزا پلی بارگین میں تھی وہی اب رضاکارانہ واپسی میں بھی ہے۔انہوں نے کہا کہ رقم کی رضاکارانہ واپسی کے بعد سرکاری عہدہ پر 10 سال کے لیے پابندی ہو گی۔پراسیکیوٹر نیب نے کہا کہ موجودہ کیس کو نیب ترامیم کے بعد سنا جائے۔ایڈیشنل اٹارنی جنرل نے کہا کہ ازخود نوٹس کا مقصد پورا ہو چکا ہے۔چیف جسٹس پاکستان عمر عطا بندیال نے ریمارکس دیتے ہوئے کہا کہ نیب کی ساری ترامیم کو سپریم کورٹ میں چیلنج نہیں کیا گیا، سرکاری ملازم پیسے دے کر کلین چٹ لیتا تھا پھر وہی کرتا تھا۔سپریم کورٹ کے چیف جسٹس عمر عطا بندیال نے کہا کہ قانون میں جو سقم تھا وہ دور کر دیا گیا، یہ والی نیب ترمیم تو اچھی ترمیم ہے، کیس کے ساتھ منسلک کی گئی دیگر درخواستوں کو علیحدہ سنا جائے گا۔سپریم کورٹ نے 9 ستمبر 2016 کو نیب کیسز میں رضاکارانہ رقم واپسی کے قانون پر ازخود نوٹس لیا تھا۔رقم کی رضاکارانہ واپسی کے بعد عہدیداران کی دوبارہ بحالی پر ازخود نوٹس لیا گیا تھا۔

اسلام آباد:صدر مملکت عارف علوی نے کہا ہے کہ خواتین کو سماجی اور اقتصادی طور پر بااختیار بنانے کی ضرورت ہے۔سماجی رابطے کی ویب سائٹ ٹوئٹر پر خواتین کے عالمی دن کے موقع پر جاری کردہ اپنے بیان میں عارف علوی کا کہنا تھا کہ خواتین کو ترقی اور آگے بڑھنے کے مساوی مواقع دینے کے عزم کا اعادہ کرتے ہیں، خواتین ٹیک ایجوکیشن، کیریئر اور گورننس میں کم نمائندگی رکھتی ہیں۔انہوں نے کہا کہ ڈیجیٹل ٹیکنالوجیز تک خواتین کی رسائی بہتر بنانے کے لیے کوششیں تیز کرنے کی ضرورت ہے، ہمیں ڈیجیٹل تقسیم کو ختم کرنے کے لیے اقدامات کرنا ہوں گے۔صدر مملکت کا مزید کہنا تھا کہ ہمیں انٹرنیٹ سروسز، لیپ ٹاپ اور دیگر ڈیجیٹل ٹیکنالوجیز تک خواتین کو رسائی دینا ہے۔

پولیس کی جانب سے زمان پارک کینال روڈ سے پی ٹی آئی کارکنوں کو حراست میں لیا جارہا ہے۔

پولیس کی جانب سے زمان پارک کے قریب واٹرکینن اور بھاری نفری پہنچادی گئی ہے۔

پی ٹی آئی کے ڈنڈا بردار کارکن بھی زمان پارک میں موجود ہیں، عمران خان کی رہائش گاہ  کے سامنے پولیس اور کارکن آمنے سامنے آگئے، پی ٹی آئی کارکنوں نے پولیس پر پتھراؤ کیا اور کئی گاڑیوں کے شیشے توڑ دیے۔

خیال رہے کہ  تحریک انصاف نے آج لاہور میں ریلی کا اعلان کر رکھا ہے، ریلی کے حوالے سے فواد  چوہدری کا کہنا تھا کہ ریلی آئین اور عدلیہ سے اظہار یکجہتی کے لیے نکالی جائےگی۔

دوسری جانب محکمہ داخلہ پنجاب نے لاہور میں دفعہ 144 نافذ کردی ہے۔

صوبائی محکمہ داخلہ کی جانب سے جاری نوٹیفکیشن کے مطابق لاہور میں احتجاج، دھرنے اور مظاہروں پر بھی پابندی عائد کردی گئی ہے جس کا نفاذ آج سے ہوگا اور7 روز تک جاری رہےگا۔

نوٹیفکیشن کے مطابق پابندی لاہور میں ٹریفک اور سکیورٹی کی خراب صورتحال کے پیش نظر لگائی گئی ہے۔

حیدر آباد پولیس کے مطابق معروف ڈاکٹر دھرم دیوارٹھی کو ان کے ڈرائیور نے چھریوں کے وار سے قتل کیا ہے جس کی شناخت الطاف کے نام سے ہوئی ہے۔

پولیس نے بتایا کہ ڈرائیور ڈاکٹر کی گاڑی لے کر فرار ہونے میں کامیاب ہو گیا ہے جس کی تلاش جاری ہے۔

پولیس نے مزید بتایا کہ مقتول کی لاش کو تحویل میں لے کر پوسٹ مارٹم کے لئے ہسپتال منتقل کر دیا گیا ہے جبکہ واقعہ کی تحقیقات شروع کردی ہیں۔

کرک: تخت نصرتی میں 18 سالہ نوجوان کو نامعلوم افراد نے تشدد کرنے کے بعد گلے میں پھندہ ڈال کر قتل کر ڈالا، ورثاء نے واقعے کے خلاف احتجاج کا اعلان کر دیا۔

پولیس کے مطابق نوجوان کو راہزنوں نے مزاحمت پر قتل کیا، مقتول کی لاش کو پوسٹ مارٹم کیلئے تخت نصرتی ہسپتال منتقل کردیا گیا ہے۔

مقتول محمد باسط شام کو دکان بند کرنے کے بعد گھر جا رہا تھا، شام سے لاپتہ ہونے والے باسط کی لاش لواغر الگڈا سے برآمد ہوئی، پولیس نے ملزمان کی گرفتاری کیلئے سرچ آپریشن کا آغاز کر دیا ہے۔

وزیراعظم شہباز شریف خواتین کے عالمی دن پر خصوصی پیغام جاری کیا ہے۔

وزیر اعظم شہباز شریف کا کہنا ہے کہ خواتین کا عالمی دن بین الاقوامی سطح پر خواتین کے معاشرے میں کلیدی کردار کو پہچاننے اور انسانی تہذیب کے ارتقاء میں ان کی خدمات کے اعتراف کا دن ہے۔

انہوں نے کہا کہ تاریخ گواہ ہے کہ انسانی معاشرے کی ترقی خواتین کے تعمیری کردار کے بغیر ممکن نہ تھی۔تحریکِ پاکستان میں فاطمہ جناح ہوں یا بیگم رعنا لیاقت علی خان، محترمہ بینظیر بھٹو شہید ہوں یا ملالہ یوسف زئی، خواتین کا پاکستان کی ترقی اور ارتقاء میں مرکزی کردار کسی قیمت جھٹلایا نہیں جا سکتا۔

وزیرِ اعظم شہباز شریف نےکہا کہ ہمارے دین اسلام نے خواتین کو آج سے 14 سو سال پہلے برابری کے حقوق دیے۔ ماں کے قدموں تلے جنت اور بیٹی کو گھر کی رحمت قرار دیا، اسلام  خواتین کے وقار کو ماند کیے بغیر انہیں زندگی کے ہر شعبے میں مثبت کردار ادا کرنے کی حوصلہ افزائی کرتا ہے۔

ان کا کہنا تھا کہ موجودہ انسانی معاشرہ خواتین کی ہر شعبے میں خدمات کی مثالوں سے بھرا پڑا ہے، اکیسویں صدی کی دنیا میں خواتین مردوں کے شانہ بشانہ انسانی تہذیب کی ترقی میں مصروفِ عمل ہیں، آج کسی بھی شعبے کو اٹھا کر دیکھ لیں آپ کو خواتین اپنی گھریلو ذمہ داریوں کی احسن طریقے سے انجام دہی کے ساتھ ساتھ ہر شعبے میں قائدانہ کردار میں نظر آئیں گی جو خوش آئند امر ہے۔

وزیر اعظم نے کہا کہ حکومتِ پاکستان خواتین کو ان کے منصفانہ حقوق کی فراہمی کیلئے ہر وقت کوشاں ہے. پاکستان کی تقریباً نصف آبادی خواتین پر مبنی ہے۔ آج قوم کی با صلاحیت بیٹیاں، مائیں اور بہنیں باوقار طریقے سے ملک و قوم کی خدمت میں مصروفِ عمل ہیں۔

انہوں نے کہا کہ خواتین کو مزید با اختیار، ان کے تحفظ اور منصفانہ حقوق کو یقینی بنانے کیلئے پورے معاشرے کو مل کر کام کرنا ہوگا، اس میں سول سوسائٹی، میڈیا اور حکومت سب کو تعاون سے نہ صرف خواتین کے حقوق اور ان کے تحفظ کا عہد کرنا ہوگا بلکہ اس حوالے سے آگاہی میں بڑھ چڑھ کر حصہ لینا ہوگا۔

شہباز شریف کا کہنا تھا کہ میرا اپنے ملک کی باصلاحیت خواتین سے آج کے دن کی نسبت سے یہ وعدہ ہے کہ ہماری حکومت خواتین کے منصفانہ حقوق، ان کے تحفظ اور ان کو یکساں تعلیم و ترقی کے مواقع فراہم کرنے کیلئے اقدامات اٹھاتی رہے گی، آپ ملک و قوم کا فخر ہیں اور پاکستان کو ترقی کی منازل طے کرنے کیلئے آپ کی صلاحیتوں اور خدمات کی ضرورت ہے۔

واضح رہے کہ دنیا بھر میں آج خواتین کا دن منایا جا رہا ہے۔

بنگلادیش کے دارالحکومت ڈھاکہ کے مصروف کاروباری مرکز کی دفتری عمارت میں دھماکے کے نتیجے میں 17 افراد ہلاک جبکہ 100 سے زائد زخمی ہوگئے۔

غیر ملکی میڈیا کے مطابق ڈھاکہ کی مصروف ہول سیل مارکیٹ کی 7 منزلہ عمارت میں ہونے والے دھماکے کے اسباب تاحال معلوم نہیں ہو سکے ہیں، تاہم سیفٹی قوانین کے نفاذ میں غفلت کے باعث عمارتوں میں آگ اور دھماکوں کو واقعات معمول بنے ہوئے ہیں۔

میڈیا رپورٹس کے مطابق دھماکے کے نتیجے میں عمارت کی دیواریں اور کچھ منزلیں مکمل طور پر تباہ ہو گئی ہیں، جبکہ عمارت کا ملبہ باہر سڑکوں پر موجود لوگوں پرگرنے سے بھی کئی افراد زخمی ہوئے۔

پولیس حکام کے مطابق دھماکے کے نتیجے میں دو خواتین سمیت 17 افراد ہلاک ہوگئے جبکہ 112 سے زائد  زخمی ہوئے  جنہیں طبی امداد کیلئے ڈھاکہ میڈیکل کالج اسپتال منتقل کر دیا گیا ہے۔

ریسکیو حکام کے مطابق دھماکے کے فوری بعد ریسکیو اہلکار جائے واقعہ پر پہنچ گئے، عمارت میں پھنسے لوگوں کو نکالنے کیلئے امدادی کارروائیاں جاری ہیں،  خدشہ ہے کہ اب بھی کچھ لوگ عمارت میں پھنسے ہو سکتے ہیں، اس وقت عمارت میں داخل ہونا بہت ہی خطرناک ہے  تاہم عمارت کے پلرز کو سہارا دینے کے بعد ہی گراؤنڈ فلور اور انڈرگراؤنڈ پھنسے لوگوں کو ریسکیو کرنے کا کام کو شروع کیا جاسکے گا۔

پولیس کمشنر ڈھاکہ  کا کہنا تھا کہ معاملے کی تحقیقات شروع کر دیں ہیں جلد معلوم ہو جائے گا کہ واقعہ دہشتگردی کی کارروائی تھا یا ایک اتفاقی حادثہ،جائے واقعہ پر فوج اور بم ڈسپوزل اسکواڈ کے اہلکار بھی پہنچ چکے ہیں۔