Archives May 2020

لاہور (وقت ٹی وی آن لائن ) ملک میں کورونا سے مزید 40 افراد انتقال کرگئے جس کے بعد اموات کی مجموعی تعداد 1483 ہوگئی جب کہ نئے کیسز سامنے آنے کے بعد مریضوں کی تعداد 69496 تک پہنچ گئی ہے۔

اب تک پنجاب میں کورونا سے 475 افراد انتقال کرچکے ہیں جب کہ سندھ میں 465 اور خیبر پختونخوا میں 453 افراد جاں بحق ہو چکے ہیں۔

اس کے علاوہ بلوچستان میں 46، اسلام آباد 27، گلگت بلتستان میں 11 اور آزاد کشمیر میں مہلک وائرس سے 6 افراد جاں بحق ہو چکے ہیں۔

کُل ٹیسٹ: 547030
صحتیاب مریض: 25271 (کمانڈ اینڈ کنٹرول سینٹر کے مطابق)

آج کے کیسز کی صورت حال
آج اب تک ملک بھر سے کورونا کے مزید 1195 کیسز اور 40 ہلاکتیں سامنے آچکی ہیں جن میں پنجاب سے 952 کیسز 36 اموات جب کہ اسلام آباد سے 226 کیس اور 4 ہلاکتیں سامنے آئی ہیں۔ اس کے علاوہ 17 کیسز آزاد کشمیر سے رپورٹ ہوئے ہیں۔

پنجاب
آج پنجاب سے کورونا کے مزید 952 کیسز اور 36 ہلاکتیں سامنے آئی ہیں جو سرکاری پورٹل پر رپورٹ ہوئے ہیں۔

سرکاری پورٹل کے مطابق صوبے میں کورونا کے مریضوں کی مجموعی تعداد 25056 اور ہلاکتیں 475 ہوگئی ہیں۔

صوبے میں اب تک کورونا سے صحتیاب ہونے والوں کی تعداد 6507 ہے۔

اسلام آباد
وفاقی دارالحکومت سے آج کورونا وائرس کے مزید 226 کیسز اور 4 ہلاکتیں سامنے آئی ہیں جس کی تصدیق سرکاری پورٹل پر کی گئی ہے۔

پورٹل کے مطابق اسلام آباد میں کیسز کی مجموعی تعداد 2418 ہوگئی ہے جب کہ اموات 27 ہو چکی ہیں۔

اسلام آباد میں اب تک کورونا وائرس سے 161 افراد صحتیاب ہوچکے ہیں۔

بلوچستان
بلوچستان میں ہفتے کو کورونا کے مزید 265 کیسز رپورٹ ہوئے ہیں جس کی تصدیق محکمہ صحت کی جانب سے کی گئی ہے۔

محکمہ صحت بلوچستان کے مطابق صوبے میں کل کیسز کی تعداد 4193 ہوگئی ہے جب کہ اب تک 46 اموات ہوچکی ہیں۔

اس کے علاوہ صوبے میں کورونا سے صحت یاب ہونے والے مریضوں کی تعداد 1471 ہے۔

آزاد کشمیر
آزاد کشمیر میں بھی آج کورونا کے مزید 17 کیسز سامنے آئے ہیں جس کی تصدیق سرکاری پورٹل پر کی گئی ہے۔

حکومتی اعدادو شمار کے مطابق علاقے میں کورونا کے مریضوں کی تعداد 251 ہوگئی ہے جب کہ علاقے میں اب تک وائرس سے 6 افراد جاں بحق ہو چکے ہیں۔

سرکاری پورٹل کے مطابق آزاد کشمیر میں کورونا سے اب تک 105 افراد صحت یاب ہوچکے ہیں۔

سندھ
سندھ سے ہفتے کو کورونا کے مزید 1247 کیسز اور 38 ہلاکتیں رپورٹ ہوئیں جن کی تصدیق محکمہ صحت سندھ کی جانب سے کی گئی۔

سندھ میں کورونا کے مریضوں کی کل تعداد 27360 اور اموات 465 ہو گئی ہیں، اب تک 13272 کورونا کے مریض صحت یاب ہوچکے ہیں۔

خیبرپختونخوا
خیبر پختونخوا میں ہفتے کو مزید 8 افراد جان کی بازی ہار گئے جس کے بعد صوبے میں ہلاکتوں کی مجموعی تعداد 453 تک جا پہنچی ہے۔

صوبائی محکمہ صحت کے مطابق کے پی میں مزید 473 مریض سامنے آئے جس کے بعد متاثرہ مریضوں کی تعداد 9540 ہوگئی جب کہ اب تک 2809 افراد کورونا وائرس سے صحت یاب بھی ہو چکے ہیں۔

گلگت بلتستان
گلگت بلتستان سے بھی گزشتہ روز کورونا کے مزید 18 کیسز اور 2 ہلاکتیں بھی سامنے آئیں جس کے بعد گلگت بلتستان میں کورونا کے مریضوں کی تعداد 678 اور ہلاکتیں 11 ہو گئی ہیں۔

ریاض (وقت ٹی وی آن لائن ) خادم الحرمین الشریفین شاہ سلمان بن عبدالعزیز کی اجازت سے آج سے مسجد نبوی ﷺ عام نمازیوں کیلئے کھول دی گئی ہے۔

کورونا وبا کے باعث بند کیے جانے کے تقریباً ڈھائی ماہ بعد مسجد نبوی ﷺ نمازیوں کے لیے کھول دی گئی ہے۔

مسجد نبوی سے آنے والی آج فجر کی اذان معمول سے ہٹ کر تھی، اذان سے پہلے ہی نمازی جوق در جوق مسجد پہنچے جہاں طبی عملے نے مسجد میں داخلے سے پہلے نمازیوں کا درجہ حرارت چیک کیا۔

حفاظتی انتظامات کے تحت مسجد کی مجموعی گنجائش کے مطابق 40 فی صد نمازیوں کو داخلے کی اجازت ہے۔

مسجد نبوی ﷺ کی انتظامیہ کی جانب سے نمازیوں کو ایک دوسرے سے فاصلہ رکھنے، جائےنماز ساتھ لانے اور وضو گھر سے کرکے آنے کی ہدایت کی گئی ہے۔

مسجد نبوی ﷺ کے ساتھ آج سے سعودی عرب کے دوسرے شہروں کی مساجد میں بھی نماز کی باجماعت ادائیگی شروع ہو گئی ہے لیکن مسجد الحرام کو اب تک عام نمازیوں کے لیے نہیں کھولا گیا ہے۔
واضح رہے کہ کورونا وائرس کے پھیلاؤ کے خدشے کے پیش نظر سعودی حکومت نے پورے ملک میں لاک ڈاؤن کرتے ہوئے خانہ کعبہ اور مسجد نبوی ﷺ سمیت تمام مساجد میں باجماعت نمازوں کی ادائیگی اور نمازیوں کے داخلے پر پابندی عائد دی تھی۔

اب سعودی حکومت نے 31 مئی سے لاک ڈاؤن میں نرمی کا اعلان کرتے ہوئے احتیاطی تدابیر کے ساتھ دفاتر کھولنے کی اجازت دی ہے جب کہ سعودی حکومت نے ملک بھر کی 90 ہزار مساجد میں جراثیم کش اسپرے بھی کروائے ہیں۔

ادھر دو ماہ کی بندش کے بعد مقبو ضہ بیت المقدس میں مسجد اقصی نمازیوں کے لیے کھول دی گئی، جہاں کورونا وبا سے بچاؤ کے لیے نمازیوں کو ماسک پہننا بھی لازمی قرار دیا گیا ہے۔ کورونا وبا کے باعث مارچ میں مسجد اقصی ٰ نمازیوں کے لیے بند کی گئی تھی۔

کوئٹہ (وقت ٹی وی آن لائن ) بلوچستان سے این ایف سی ایوارڈ کے غیر سرکاری رکن جاوید جبار رضاکارانہ طور پر مستعفی ہوگئے۔

جاوید جبار کو وزیر اعلیٰ بلوچستان نے دسویں این ایف سی کیلئے بلوچستان سے غیر سرکاری ممبر نامزد کیا تھا لیکن ان کی نامزدگی کو بلوچستان ہائی کورٹ میں چیلنج کیا گیا تھا۔

وزیر اعلی بلوچستان نے اپنے ٹوئٹ میں بتایا کہ بلوچستان سے 10 ویں این ایف سی ایوارڈ کے غیر سرکاری رکن نے اپنے عہدے سے استعفی دے دیا ہے۔

جاوید جبار کی نامزدگی کو بلوچستان کے سیاسی حلقوں کی جانب سے شدید تنقید کانشانہ بنایا گیا تھا جب کہ ان کی تقرری کے خلاف رکن قومی اسمبلی محمد اسلم بھوتانی اور بلوچستان کے وکلاء نمائندوں کی جانب سے بلوچستان ہائی کورٹ میں الگ الگ آئینی درخواستیں دائر بھی دائر کی گئی تھیں۔

اس حوالے سے رکن قومی اسمبلی محمد اسلم بھوتانی کا کہنا تھا کہ عوامی دباؤ کے نتیجے میں جاوید جبار نے رضاکارانہ طور پر این ایف سی سے بلوچستان کی نمائندگی سے دستبردار ہوکر اچھا فیصلہ کیا، دوسری جانب یہ بھی ثابت ہوا کہ وزیر اعلیٰ کا فیصلہ غلط تھا۔

واشنگٹن (وقت ٹی وی آن لائن ) امریکی ریاست منی سوٹا میں پولیس کے ہاتھوں سیاہ فام شخص کی ہلاکت کے خلاف آج بھی احتجاج جاری ہے جس کے باعث 6 ریاستوں میں سخت کرفیو نافذ کر دیا گیا ہے۔

ریاست مِنی سوٹا کے شہر مینی پولِس میں پولیس کے ہاتھوں سیاہ فام شہری کی ہلاکت کے بعد امریکا میں ہنگامے پھوٹ پڑے تھے اور مشتعل مظاہرین کی جانب سے جلاؤ گھیراؤ بھی کیا جا رہا ہے جس کا سلسلہ پانچویں روز بھی جاری ہے۔

امریکی پولیس کے ہاتھوں سیاہ فام شخص کی موت کے خلاف آج بھی واشنگٹن اور نیو یارک سمیت کئی شہروں میں احتجاج ہوا، مظاہرین نے پولیس کی گاڑیوں پر حملہ کر کے اسے آگ لگا دی۔

شدید ہنگاموں کے باعث منی سوٹا، اوہائیو سمیت 6 ریاستوں میں نیشنل گارڈز تعینات کر دیےگئے ہیں جب کہ لاس اینجلس، فلاڈلفیا، کنیکٹی کٹ، لوئی ول اور اٹلانٹا میں کرفیو نافذ کر دیا گیا ہے۔

ادھر امریکی صدر ڈونلڈ ٹرمپ نے جارج فلوئیڈ کی موت کو برا سانحہ قرار دیتے ہوئے مظاہرین کو خبردار کیا ہے کہ اگر انھوں نے وائٹ ہاؤس میں داخل ہونے کی کوشش کی تو انہیں خونخوار کتوں اور جدید ہتھیاروں سے لیس اہلکاروں کا سامنا کرنا ہو گا۔

دوسری جانب واشنگٹن ڈی سی کی میئر پر جمعہ کو وائٹ ہاؤس کے باہر احتجاج روکنے کے لیے پولیس نہ بھیجنے کا الزام بھی لگایا گیا ہے۔

میئر کا کہنا ہے کہ وہ شہریوں کو تحمل کا مظاہرہ کرنے کی ترغیب دے رہی ہیں، مگر ٹرمپ انھیں تقسیم کر رہے ہیں۔

نیویارک کے میئربل ڈی بلیسیو نے کہا کہ سیاہ فام امریکی کے قتل کی آزادانہ تحقیقات اور ملوث افراد سے جوابدہی کی جانی چاہیے۔

سیاہ فام امریکی کے سفید فام پولیس اہلکار کے ہاتھوں قتل کے خلاف احتجاج برطانیہ تک پہنچ گیا ہے جہاں دارالحکومت لندن میں احتجاج کیا گیا، اس موقع پر جارج فلوئیڈ کی یاد میں خاموشی بھی اختیار کی گئی۔

لاہور ( وقت ٹی وی آن لائن ) لاہور کے علاقے مانگامنڈی کے کماس گاؤں میں 20 سالہ نوجوان نے 6 سالہ بچی کو مبینہ طور پر زیادتی کا نشانہ بنا ڈالا۔

پولیس کے مطابق 20 سالہ اوباش نوجوان اسامہ نے مبینہ طور پر 6 سالہ بچی سے زیادتی کی اور بچی کے شور مچانے پر اہل علاقہ جمع ہوئے تو ملزم فرار ہو گیا۔

تاہم پولیس نے بروقت کارروائی کرکے ملزم کو گرفتار کر لیا جب کہ بچی کو زخمی حالت میں اسپتال منتقل کر دیا گیا ہے۔

پشاور (وقت ٹی وی آن لائن ) ڈیرہ اسماعیل خان میں کوہ سلیمان کے پہاڑی سلسلوں پر نایاب جنگلی جانور لکڑ بگھا کی موجودگی کا انکشاف ہوا ہے۔

کوہ سلیمان کے پہاڑی سلسلوں پر نایاب جنگلی جانور لکڑ بگھا کو مقامی قبائل شکاریوں نے شکار کیا۔

شکار کیے جانے والے نایاب جنگلی زخمی جانور لکڑ بگھا کو محکمہ جنگلی حیات نے تحویل میں لیکر پشاور منتقل کر دیا۔

محکمہ جنگلی حیات نے لکڑ بگھا کو علاج کے لیے پشاور منتقل کر دیا ہے جس کے بعد اسے چڑیا گھر بھیج دیا جائےگا۔

قبائلی شکاریوں نے کتوں کی مد د سے نایاب نسل کے خطرناک لکڑبگھا کو کوہ سلیمان کے دامن میں علاقہ کھوئی پیور میں شکار کیا۔

اسلام آباد (وقت ٹی وی آن لائن ) وزیراعظم عمران خان کی زیرصدارت آج ہونے والا قومی رابطہ کمیٹی کا اجلاس ملتوی ہو گیا جو اب کل بروز پیر ہو گا۔

ذرائع کے مطابق قومی رابطہ کمیٹی کے شیڈول میں تبدیلی کی گئی ہے جس کے تحت آج ہونے والا اجلاس اب کل سہہ پہر ساڑھے چار بجے ہوگا۔

قومی رابطہ کمیٹی کے اجلاس میں چاروں وزرائے اعلیٰ، وفاقی وزرا، نیشنل ڈیزاسٹر مینجمنٹ اتھارٹی (این ڈی ایم اے)، صوبائی اور وزارت صحت کے حکام شریک ہوں گے۔

اجلاس میں لاک ڈاؤن میں مزید سختی یا نرمی سے متعلق فیصلے کیے جائیں گے اور کورونا وائرس کی وبائی صورتحال، مرض سے بچاؤ کی حکمت عملی پر بات ہوگی۔

اس موقع پر کورونا کے مریضوں کے علاج اور طبی سازو سامان کی رپورٹ بھی پیش کی جائے گی۔

اس سے قبل 7مئی کو ہونے والے قومی رابطہ کمیٹی کے اجلاس میں 9 مئی سے لاک ڈاؤن میں مزید نرمی کا اعلان کیا گیا تھا اور وزیراعظم عمران خان کا کہنا تھا کہ ہم نے 9 مئی سے مرحلہ وار لاک ڈاؤن کو کھولنے کا فیصلہ کیا ہے، ہم نے جو فیصلہ کیا وہ تمام صوبوں کے ساتھ مل کر کیا ہے۔

وزیراعظم کا کہنا تھا کہ عوام کو ذمہ داری لینا پڑے گی، اگر اس مشکل مرحلے سے نکلنا ہے تو حکومت ڈنڈے کے زور سے نہیں بولے گی، حکومت اور پولیس کیا کیا کام کرسکتی ہے؟ کیا ہم پکڑ کر لوگوں کو جیلوں میں ڈالیں اور وہاں ٹیسٹ کریں، یہ کوئی بھی حکومت نہیں کرسکتی۔

اس کے بعد عید کے موقع پر سپریم کورٹ نے بھی تمام کاروبار اور شاپنگ مالز پورے ہفتے کھولنے کا حکم جاری کردیا تھا جس کے بعد تمام کاروبار اور شاپنگ مالز شام 5 بجے تک کھولنے کا اعلان کردیا گیا تھا۔

چنانچے ملک بھر میں مشروط لاک ڈاؤن کا آج آخری دن ہے اور اب کل وزیراعظم کی زیر صدارت قومی رابطہ کمیٹی کے اجلاس میں اس حوالے سے مزید فیصلے کیے جائیں گے۔

لاہور(وقت ٹی وی آن لائن ) پنجاب میں لاک ڈاؤن کے بعد پہلی بار ایم بی بی ایس اور بی ڈی ایس کے ضمنی امتحانات لینے کا اعلان کیا گیا ہے۔

ملک بھر میں کورونا وبا پھیلنے کے پیش نظر مارچ سے تعلیمی سرگرمیاں معطل کردی گئی تھیں اور لاک ڈاؤن نافذ کر دیا گیا تھا تاہم اب صوبے پنجاب میں لاک ڈاؤن کے بعد پہلی بار میڈیکل کے ضمنی امتحانات لینے کا اعلان کر دیا گیا ہے۔

وائس چانسلر یونیورسٹی آف ہیلتھ سائنسز پروفیسر جاوید اکرم کے مطابق پنجاب میں ایم بی بی ایس اور بی ڈی ایس کے ضمنی امتحانات کی تیاریاں مکمل کر لی گئی جو یکم جون سے 20 جون تک جاری رہیں گے۔

پروفیسر جاوید اکرم نے بتایا کہ ضمنی امتحانات کے لیے 16 مرکز قائم کیے گئے ہیں جہاں ڈیوٹی دینے والے 81 نگرانوں کے کورونا ٹیسٹ کیے گئے ہیں۔

انہوں نے کہا کہ امتحانی مراکز میں کورونا سے بچاؤ کی تدابیر کا مکمل خیال رکھا گیا ہے۔ پروفیسر جاوید اکرم کا کہنا تھا کہ ضمنی امتخانات میں کل ایک ہزار 48 امیدوار شریک ہو رہے ہیں۔

انہوں نے بتایا کہ امتحانی مراکز کو ڈس انفیکٹ کرنے کا سلسلہ جاری ہے، داخلی اور خارجی راستوں پر ہینڈ سینیٹائزر رکھے جائیں گے اور امیدواروں کے درمیان کم از کم 2 میٹر فاصلہ کو یقینی بنایا جائے گا۔

پروفیسر جاوید اکرم کا کہنا تھا کہ ماسک کے بغیر امیدواروں کو امتحان میں بیٹھنے کی اجازت نہیں ہو گی اور ضمنی امتخانات کے لیے جاری ایس او پیز پر سختی سے عمل درآمد کرانے کا حکم دیا گیا ہے۔

اسلام آباد (وقت ٹی وی آن لائن ) نیشنل ڈیزاسٹر مینجمنٹ اتھارٹی (این ڈی ایم اے) کی جانب سے ملک کے چاروں صوبوں میں کورونا مریضوں کے لیے وینٹی لیٹرز تقسیم کیے جا رہے ہیں۔

ترجمان این ڈی ایم اے کے مطابق بڑھتی ضرورت کے پیش نظر صوبوں میں 100 وینٹی لیٹرز تقیسم کیے جا رہے ہیں، صوبوں کو 10, 10 آئی سی یو وینٹی لیٹرز کی وصولی کے لیے خط ارسال کر دیا گیا ہے۔

ترجمان کا کہنا ہے کہ چاروں صوبوں کے علاوہ آزاد کشمیر اور گلگت بلتستان کو بھی 10، 10 بائی پیپ پورٹ ایبل وینٹی لیٹرز دیے جا رہے ہیں۔

این ڈی ایم اے کے ترجمان کا کہنا تھا کہ تقسیم کے ساتھ وینٹی لیٹرز کے استمعال کے لیے طبی عملے کی تربیت کا بھی بندوبست کر دیا گیا ہے۔

ترجمان این ڈی ایم اے نے کہا کہ تمام انتظامات کی تفصیل سے صوبوں کو آگاہ بھی کر دیا گیا ہے اور ہدایت کی گئی ہے کہ وینٹی لیٹرز کی اسپتالوں میں تقسیم کی تفصیل سے این ڈی ایم اے کو آگاہ بھی کیا جائے۔

انھوں نے بتایا کہ اسلام آباد کے پمز اسپتال کو پہلے ہی مطلوبہ تعداد کے مطابق وینٹی لیٹرز دیے جا چکے ہیں۔

این ڈی ایم اے کے مطابق وینٹی لیٹرز کی تنصیب اور بعد از فروخت سروس کی سہولت بھی مہیا کی جا رہی ہیں۔

واضح رہے کہ ملک میں کورونا کیسز کی تعداد میں تیزی سے اضافہ ہورہا ہے جس کے باعث اسپتالوں میں اضافی وینٹی لیٹرز کی ضرورت پیش آرہی ہے۔

لاہور (وقت ٹی وی آن لائن ) وفاقی وزیر برائے سائنس اینڈ ٹیکنالوجی فواد چوہدری کا شہرہ آفاق ترکش ڈرامہ ‘ارطغرل غازی’ کے خلاف بیان سامنے آیا ہے جس کے بعد سوشل میڈیا پر ایک نئی بحث شروع ہوگئی ہے۔

حال ہی میں وفاقی وزیر فواد چوہدری کی جانب سے مائیکرو بلاگنگ سائٹ ٹوئٹر پر ایک ٹوئٹ کیا گیا جس میں انہوں نے ‘ارطغرل غازی’ نشر کرنے کی مخالفت کی۔

فواد چوہدری نے اپنے ٹوئٹ میں کہا کہ ‘حیران ہوں کہ پی ٹی وی دوسرے ممالک کی پروڈکشن پر فخر محسوس کر رہا ہے، آپ لوگوں کو پاکستان کی پروڈکشن پر توجہ دینی ہوگی، اگر ایسا نہیں کیا گیا تو دیگر غیر ملکی ڈرامے پاکستان کی پروڈکشن کو برباد کر دیں گے’۔

انہوں نے مزید کہا کہ غیر ملکی ڈراموں کو درآمد کرنا ہمیشہ ہی سستا ہے لیکن یہ طویل عرصے تک ہماری پروگرامنگ پر تک تباہ کن اثر ڈالتا ہے۔