Archives July 2021

اسلام آباد: حکومت نے اسپاٹ مارکیٹ سے مہنگی مائع قدرتی گیس (ایل این جی) کی خریداری کو ‘نسبتاً کم بُرا فیصلہ’ قرار دیتے ہوئے کہا ہے کہ کوئی بھی بین الاقوامی اشیا کی مارکیٹ کے بارے میں پیشگوئی کرکے اسے شکست نہیں دے سکتا۔

رپورٹ کے مطابق پیٹرولیم ڈویژن سے جاری اعلامیے میں کہا گیا کہ پاکستان ایل این جی لمیٹڈ (پی ایل ایل) بورڈ ستمبر 2021 کے لیے 4 ایل این جی ‘اسپاٹ’ ٹینڈر 15 ڈالر فی ایم ایم بی ٹی یو پر قبول کرنے پر مجبور ہوا، دوسری صورت میں متبادل ایندھن (یعنی فرنس آئل) جو کہ اس سے بھی زیادہ مہنگا ہے، اس سے ستمبر میں بجلی کی قیمتوں میں کم از کم 20 فیصد تک اضافہ ہوتا۔

ستمبر میں پی ایل ایل کی جانب سے قبول کردہ 4 اسپاٹ ایل این جی کی ترسیل کے لیے بولیاں 15.2 سے 15.5 ڈالر فی ایم ایم بی ٹی یو کے درمیان تھیں جو کہ 2015 میں ایل این جی کی درآمد کے آغاز کے بعد سے سب سے زیادہ ہے۔

دلچسپ بات یہ ہے کہ ستمبر اور اکتوبر کے لیے تقریباً 8 بولیاں منسوخ کر دی گئیں جن میں قطر سے 13.79 سے 13.99 ڈالر فی ایم ایم بی ٹی یو شامل تھیں جبکہ دیگر بولیاں 16 ڈالر تک پہنچ گئی تھیں۔

15.5 ڈالر فی ایم ایم بی ٹی یو کی بولی ایکس شپ کے لیے تھی، اختتامی ڈسٹری بیوشن نیٹ ورک پر فروخت کی قیمت 20 ڈالر فی ایم ایم بی ٹی یو سے زیادہ ہوگی۔

پیٹرولیم ڈویژن نے زائد قیمتوں کے حق میں جواز پیش کیا کہ حال ہی میں ’اسپاٹ‘ ایل این جی کی قیمت 15 ڈالر فی ایم ایم بی ٹی یو سے زیادہ ہو چکی ہے جس کی متعدد وجوہات ہیں، جن میں پاپوا نیو گنی میں ایکسون کی پیداوار میں تخفیف اور طلب سے متعلقہ عوامل مثلاً چین اور جاپان میں گرم موسم کی وجہ سے طلب میں اضافہ ہے۔

ڈویژن نے وضاحت دی کہ پاکستان کی ماہانہ ایل این جی کی تقریباً ایک تہائی خریداری ’اسپاٹ‘ کی بنیاد پر ہوتی ہے اور بقیہ دو تہائی طویل مدتی معاہدے کی بنیاد پر ہوتی ہے جو کہ بنیادی طور پر ایل این جی درآمد کرنے والے ممالک کی عالمی اوسط کے مطابق ہوتی ہے۔

وزارت نے دعویٰ کیا کہ آر ایل این جی کی قلت کی وجہ سے حکومت گرمیوں میں بجلی کی مانگ کو پورا کرنے کے لیے ڈیزل جلانے پر مجبور ہوئی اور اس کے نتیجے میں ستمبر میں بجلی کی لاگت تقربیاً 50 فیصد زیادہ رہی۔

پیٹرولیم ڈویژن نے کہا کہ ’یہ ان دو برائیوں میں سے کم ہے‘۔

انہوں نے مزید کہا کہ اگر سسٹم میں وافر مقدار میں آر ایل این جی نہ ہوتی تو صنعتی شعبے کے لیے جبری گیس لوڈشیڈنگ کی ’موزوں وقت پر قیمت‘ کا بھی حساب دینا پڑتا۔

وزارت پیٹرولیم کے مطابق خام تیل کی قیمتیں فی بیرل 75 ڈالر ہیں جبکہ درآمد شدہ کوئلے کی قیمت میں بھی رواں برس جنوری سے تقریباً 45 فیصد اضافہ ہوا ہے۔

انہوں نے کہا کہ اس سے ظاہر ہوا کہ بین الاقوامی سطح پر طلب اور محدود سپلائی عوامل کی وجہ سے زیادہ تر توانائی سے متعلقہ اشیا کی قیمتیں بڑھی ہیں کیونکہ معیشتیں کووڈ 19 کے بعد کھلتی ہیں۔

وزارت توانائی نے کہا کہ کوئی بھی بین الاقوامی اشیا کی مارکیٹ کے بارے میں پیشگوئی کرکے اسے شکست نہیں دے سکتا اور اسپاٹ خریداری کے وقت (یعنی پہلے یا بعد میں) اور اصل کے درمیان کوئی ثبوت پر مبنی ارتباط نہیں تھا۔

انہوں نے کہا کہ ایل این جی کی قیمت طلب و رسد کے عوامل کی وجہ سے وقتاً فوقتاً مختلف (اوپر اور نیچے) ہوتی ہے۔

وزارت نے کہا کہ پاکستان 100 فیصد طویل مدتی معاہدے کی خریداری کا انتخاب کر سکتا ہے۔

علاوہ ازیں آئل اینڈ گیس ریگولیٹری اتھارٹی (اوگرا) نے کہا کہ پائپ لائن کی تعمیر اور آپریشن کے لائسنس جاری کر کے ایک آخری سنگ میل حاصل کیا ہے۔

انہوں نے بتایا کہ اینرگاس ٹرمینل (پرائیویٹ) لمیٹڈ اور تعبیر انرجی (پرائیویٹ) کو ایل این جی سپلائی چین کے لیے لائسنس جاری کیے گئے۔

افغانستان میں خراب ہوتی صورتحال کا جائزہ لینے کے لیے ‘افغان امن کے لیے توسیعی ٹرائیکا’ آئندہ ماہ کے اوائل میں دوحہ میں ملاقات کرے گا۔

رپورٹ کے مطابق افغانستان کے لیے روسی صدر کے نمائندہ خصوصی ضمیر کابولوف نے ماسکو میں آن لائن بریفنگ کے دوران اعلان کیا کہ روس، چین، امریکا اور پاکستان پر مشتمل توسیعی ٹرائیکا کا اجلاس آئندہ ہفتے منعقد کیا جائے گا۔

روسی نیوز ایجنسی ‘طاس’ کے مطابق نمائندہ خصوصی نے کہا کہ ‘میں اپنے امریکی ہم منصب زلمے خلیل زاد سے فون پر مسلسل رابطے میں ہوں جو اس وقت واشنگٹن میں ہیں، اگلے ہفتے ہم ان سے اور چینی اور پاکستانی ہم منصبوں سے دوحہ میں ملاقات کا منصوبہ بنا رہے ہیں’۔

انہوں نے کہا کہ ‘بیجنگ نے حال ہی میں افغانستان کے لیے اپنا نمائندہ مقرر کیا ہے جنہیں میں نہیں جانتا اور ان سے 11 اگست کو دوحہ میں ملاقات کی امید ہے’۔

ان کا کہنا تھا کہ ‘ہم دوطرفہ اور توسیعی ٹرائیکا فارمیٹ دونوں میں بنیادی مشاورت جاری رکھیں گے اور معاملے میں دلچسپی رکھنے والے بین الاقوامی کرداروں سے وسیع تر بات چیت کے لیے تیار ہیں’۔

روس کی طرف سے منعقدہ فارمیٹ کی آخری ملاقات 30 اپریل کو دوحہ میں ہوئی تھی۔

اجلاس میں شرکت کرنے والے ممالک نے آخر میں اپنے بیان میں اس بات پر زور دیتے ہوئے کہا تھا کہ ‘انخلا کے عرصے کے دوران امن عمل میں تعطل نہیں آنا چاہیے، کوئی لڑائی یا ہنگامہ آرائی نہیں ہوگی اور بین الاقوامی افواج کی حفاظت کو یقینی بنایا جانا چاہیے’۔

توسیعی ٹرائیکا کا اگلا اجلاس ایسے موقع پر ہو رہا ہے جب افغانستان سے غیر ملکی افواج کا انخلا مکمل ہونے کے قریب ہے۔

یکم مئی سے غیر ملکی افواج کے انخلا کے آغاز کے بعد سے افغانستان میں تشدد میں اضافہ ہوا ہے۔

طالبان نے پڑوسی ممالک کے ساتھ اہم سرحدی کراسنگز سمیت جنگ زدہ ملک کے بڑے حصے پر قبضہ کر لیا ہے اور اس بات کا خدشہ ہے کہ طالبان ملک کا کنٹرول سنبھال لیں گے۔

تاہم ان کی جانب سے دوسری طرف بین الاقوامی طور پر قانونی حیثیت حاصل کرنے کی بھی کوششیں کی جارہی ہیں اور بدھ کو طالبان کے وفد نے چینی وزیر خارجہ وانگ ژی سے ملاقات کی تھی۔

دفتر خارجہ کے ترجمان زاہد حفیظ چوہدری نے بیان میں افغان امن عمل میں سہولت کے لیے ‘ٹرائیکا پلس’ فورم کی اہمیت کو اجاگر کرتے ہوئے کہا کہ پاکستان، دوحہ میں فارمیٹ کے اجلاس کے لیے پرامید ہے۔

انہوں نے زور دیتے ہوئے کہا کہ ‘پاکستان، افغانستان میں امن، استحکام اور خوشحالی کے حصول کے لیے کی جانے والی کوششوں کی حمایت جاری رکھے گا’۔

بغداد: عراق میں جنازے کے ایک اجتماع پر مسلح افراد نے اندھا دھند فائرنگ کردی جس کے نتیجے میں پولیس اہلکاروں سمیت 13 افراد جاں بحق اور 50 سے زائد زخمی ہوگئے۔

عالمی خبر رساں ادارے کے مطابق عراق کے شمالی شہر یثرب میں جنازے کے ایک اجتماع پر جدید اور خودکار اسلحے سے لیس جنگجوؤں نے دھاوا بول دیا۔ حملے میں 13 افراد ہلاک اور 50 سے زائد زخمی ہو گئے۔

عراق فوج کی جانب سے جاری بیان میں حملے کی ذمہ داری داعش پر عائد کی گئی ہے تاہم حملے میں ہلاک ہونے والوں کی تعداد اور جنازے کا اجتماع کس کا تھا کے حوالے سے معلومات فراہم نہیں کی گئی ہیں۔

ادھر امریکی اتحادی افواج اور عراقی فوج کے ساتھ برسوں کی جھڑپ کے بعد ملک کے کچھ ہی حصے میں سمٹ جانے والی شدت پسند تنظیم داعش کی جانب سے اس جنازے کے اجتماع پر حملے کی تردید یا تصدیق نہیں کی گئی ہے۔

واضح رہے کہ رواں ماہ ہی عید الاضحیٰ کی رات بغداد کی ایک پُررونق اور پُرہجوم مارکیٹ میں خودکش حملے میں 30 افراد اور 50 سے زائد زخمی ہوگئے تھے جس پر عراقی فوج کا کہنا تھا کہ داعش جنگجو خفیہ ٹھکانوں سے نکل کر عوامی مقامات پر حملے کر رہے ہیں۔

اسرائیل نے دو روز قبل آئل ٹینکر پر حملے اور اس میں ہلاک ہونے والے دو عملے کی ذمہ داری ایران پر عائد کی ہے۔

غیرملکی خبررساں ادارے ’اے ایف پی‘ کے مطابق بحیرہ عرب میں عمان کے ساحل سے دور آئل ٹینکر پر حملہ جمعرات کو ہوا جس میں برطانوی اور رومانیہ سے تعلق رکھنے والے افراد ہلاک ہوگیا تھا۔

آئل ٹینکر ’ایم وی مرسر اسٹریٹ‘ لندن میں قائم کمپنی زوڈیاک میری ٹائم کے زیر انتظام تھا جو اسرائیلی شپنگ عیال اوفر سے تعلق رکھتی ہے۔

کمپنی نے کہا تھا کہ وہ حملے کے اسباب کی کھوج لگارہے ہیں۔

بعدازاں اسرائیلی اسرائیلی وزیر خارجہ یایر لیپڈ نے ایران پر الزام عائد کرتے ہوئے کہا کہ ’ایرانی دہشت گردی اس حملے میں ملوث ہیں‘۔

انہوں نے کہا کہ ایران نہ صرف اسرائیل بلکہ پوری دنیا کا مسئلہ ہے جس پر عالمی برادری کو خاموش نہیں رہنا چاہیے کیونکہ اس سے جہاز رانی اور عالمی تجارت کی آزادی کو خطرہ ہے۔

اسرائیلی عہدیدار نے کہا کہ تہران تشدد اور تباہی کا بیج بو رہا ہے۔

دوسری جانب امریکی فوجی بیان میں کہا گیا کہ امریکی بحریہ کی افواج نے ہنگامی کال کے جواب میں عملے کی مدد کی اور حملے کے شواہد دیکھے۔

اس میں مزید کہا گیا کہ ابتدائی اشارے ڈرون طرز کے حملے کی طرف ہیں اور یہ کہ امریکی بحریہ کے جہاز اب مدد کے لیے سوار امریکی اہلکاروں کے ساتھ جہاز کو لے جا رہے ہیں۔

اسرائیلی عہدیدار نے خبردار کیا کہ تہران کے خلاف ہماری مہم جاری رہے گی۔

یہ جہاز شمالی بحر ہند میں تھا اور دارالسلام سے فجیرہ جا رہا تھا جب حملہ ہوا تو جہاز میں کوئی سامان نہیں تھا۔

عمان کی سرکاری خبر رساں ایجنسی نے بتایا کہ ملک کی بحریہ نے ایک جہاز روانہ کیا اور اس بات کی تصدیق کی کہ یہ حملہ ملک کے علاقائی پانیوں سے باہر ہوا۔

سرینگر: مقبوضہ وادی میں بھارتی فورسز نے مزید 2 کشمیری نوجوانوں کو شہید کردیا۔

کشمیر میڈیا سروس کے مطابق جنت نظیر وادی میں موجود قابض افواج نے ریاستی دہشت گردی کی تازہ کارروائیوں کے دوران مزید 2 کشمیری نوجوانوں کو شہید کردیا، بھارتی فوج نے ضلع پلواما میں نام نہاد سرچ آپریشن کے دوران فائرنگ کرکے نوجوانوں کو شہید کیا جب کہ علاقے کے داخلی اور خارجی راستوں کو سیل کرکے اب بھی آپریشن جاری ہے۔

پیرس کےجیولری اسٹور سے ڈاکو 20 لاکھ یورو یعنی 38 کروڑ 58 لاکھ روپے سے زائد مالیت کے زیورات لے اڑے۔

پولیس کے مطابق دو افراد گاہک بن کر جیولری اسٹور میں داخل ہوئے اور اسٹاف کو ٹیزرگن اور پیپر اسپرے سے ڈرایا دھمکایا اورکمرے میں بند کردیا۔

پولیس کا بتانا ہے کہ دکان سے 20 لاکھ یورو کےکنگن، ہار اور انگوٹھیاں لوٹ کر فرار ہوگئے۔

میڈیا رپورٹس کے مطابق منگل کے روز اسی علاقے میں ایک جیولری اسٹور سے زیورات لوٹ کر فرار ہونے والے شخص کو پولیس نے گرفتار کرلیا ہے۔

اسلام آباد: پاکستان پیپلز پارٹی کے چیئرمین بلاول بھٹو زرداری نے کہا ہے کہ اگر کراچی میں کورونا کے ڈیلٹا ویریئنٹ سے بھارت جیسی حالت ہوئی تو اس کے ذمہ دار عمران خان ہوں گے، وفاق کورونا کے خلاف نہ خود کچھ کرتا ہے اور نہ ہمیں کرنے دیتا ہے۔

ان خیالات کا اظہار انہوں نے اسلام آباد میں میڈیا سے گفت گو میں کیا۔ ان کا کہنا تھا کہ اگر کراچی میں کورونا وائرس کے ڈیلٹا ویریئنٹ سے بھارت جیسی حالت ہوئی تو اس کے ذمہ دار عمران خان ہوں گے، وفاقی حکومت سندھ کےعوام کا خیال رکھنے کی بجائے ہماری بےعزتی کروارہی ہے، سندھ میں اگر کورونا پھیلا تو اس کی ذمہ دار وفاقی حکومت ہوگی، وفاقی حکومت نہ تو کورونا پر خود کچھ کرتی ہے اور نہ ہی ہمیں کوئی کام کرنے دیتی ہے۔

ان کا کہنا تھا کہ اسلام آباد میں سیلاب سے اتنا بڑا نقصان ہوا لیکن کوئی حکومتی وزیر عوام کے پاس نہیں پہنچا، عمران خان نے عوام کو لاوارث چھوڑدیا۔
انہوں نے کہا کہ صاف و شفاف الیکشن نہ کرانا حکومت کی بہت بڑی ناکامی ہے، ناجائز طریقے سے کرسی پر بیٹھنے والا عمران خان اب بچگانہ حرکتیں بند کرے۔

بلاول بھٹو کا کہنا تھا کہ سابق طالبان عہدے دار کو کشمیر کا حکم ران بنایا جارہا ہے، آزاد کشمیر کا وزیر فائرنگ کرتا رہا، پیسے بانٹتا رہا لیکن الیکشن کمیشن نے نوٹس نہیں لیا، ہم ہرکٹھ پتلی کا سامنا کرنے کے لیے تیار ہیں، مل کر کام کریں تو پنجاب میں بزدار اور وفاق سےعمران کو بھگا سکتے ہیں، جمہوری نظام میں رہتے ہوئے اس حکومت سے نجات لےسکتےہیں۔

ان کا کہنا تھا کہ آزاد کشمیر کے انتخابات جیسی دھاندلی کبھی نہیں ہوئی، آزاد کشمیر الیکشن میں پیسہ چلایا گیا، تاریخی دھاندلی کے باوجود 11 سیٹیں حکومت کے منہ سے چھینیں، عمران خان عام آدمی کے لیے تکلیف دہ پالیسیاں بناتے ہیں، عام آدمی تبدیلی کا اصل چہرہ پہچان چکا ہے، ملک میں تاریخی غربت اور بے روزگاری ہے۔

کراچی: گورنر سندھ عمران اسماعیل نے کہا ہے کہ حکومت سندھ لاک ڈاؤن کے فیصلے پر نظرثانی کرے، کیونکہ اس سے دیہاڑی دار طبقہ متاثر ہوتا ہے۔

گورنر سندھ عمران اسماعیل نے کراچی میں نیوز کانفرنس کرتے ہوئے کہا کہ صوبہ سندھ میں ایس او پیز پرعمل درآمد کرانے کے بجائے کاروباربند کیا جا رہاہے، وزیراعلیٰ سندھ کو ٹیلی فون کیا کہ جس انڈسٹری کے کارکنوں نے ویکسی نیشن کرائی ہے اسے بند نہ کیا جائے، وزیراعظم عمران خان لاک ڈاؤن کے حق میں نہیں، مراد علی شاہ اپنے فیصلے پر نظر ثانی کریں، بہتر تھا سندھ حکومت لاک ڈاؤن کے بجائے ایس او پیز پر عملدرآمد کراتی۔

انہوں نے کہا کہ صوبے میں کرفیو جیسی صورتحال پیدا کردی گئی ہے، روزگار بند کرنا اور کرفیو جیسے لاک ڈاؤن لگانے کے خلاف ہیں، یہ سپریم کورٹ کے فیصلے کی خلاف ورزی ہے، کوئی صوبہ اکیلا فیصلہ نہیں کرسکتا بلکہ این سی او سی کی گائیڈ لائنز کے تحت اقدام کرے گا۔
گورنر سندھ نے مدد کی پیشکش کرتے ہوئے کہا کہ ایس او پیز پر عملدرآمد کا نہ ہونا وزیراعلیٰ سندھ اور ان کی پوری ٹیم کی ناکامی ہے، وزیراعلیٰ سندھ ایڈمنسٹریٹر ہیں، ایس او پیز پر پابندی میں وہ جیسی مدد چاہیں گے ہم حاضر ہیں، وزیراعلیٰ سندھ سے گزشتہ روز بھی کہا ہے فیکٹریاں بند نہ کریں، اس سلسلے میں وفاقی حکومت، وزیراعظم عمران خان اور صدرمملکت عارف علوی آپ کے ساتھ تعاون کیلئے تیار ہیں۔

وفاقی وزیر داخلہ شیخ رشید نے کہا ہے کہ میری جان کو خطرہ ضرور ہے لیکن ہم گھبرانے والے نہیں ہیں، میڈیا کا شکر گزار ہوں کہ انہوں نے میری درخواست پر لال حویلی پر ہونے والی فائرنگ کی زیادہ کوریج نہیں کی۔

راولپنڈی میں تقریب سے خطاب کرتے ہوئے انہوں نے کہا کہ راولپنڈی اور اسلام آباد حساس شہر ہیں۔

وزیر داخلہ نے کہا کہ لال حولی پر پہلے بھی حملے ہوئے ہیں اور گزشتہ روز ہونے والے حملے سے متعلق پولیس اپنی تحقیقات کر رہی ہے، سیکیورٹی صورتحال کی وجہ سے اب میں وہاں صرف ایک دن موجود ہوتا ہوں۔

علاوہ ازیں ایک سوال کے جواب میں انہوں نے کہا کہ راولپنڈی اور اسلام آباد میں مزید 500 کیمرے لگانے کی ضرورت ہے لیکن 190 لگا رہے ہیں، ایک شہر کے ساتھ فوج کا ہیڈکوارٹرز اور دوسرے کے ساتھ پورا ڈپلومیٹک سیکشن ہے۔

سابق سفارت کار کی بیٹی نور مقدم کے قتل سے متعلق سے ایک سوال کے جواب میں انہوں نے کہا کہ مقتولہ کے ملزم کو کسی صورت نہیں چھوڑیں گے اور اگر میرا بس چلے تو میں اس کو گولی مار دوں۔

شیخ رشید نے میڈیا کو مخاطب کرکے کہا کہ ’جو پاگل لوگ ایسے جرائم کرتے ہیں انہیں زیادہ کوریج نہ دیں کیونکہ ایسے بیمار ذہن کے لوگ زیادہ شہرت چاہتے ہیں‘۔

علاوہ ازیں افغان سفیر کی بیٹی کے مبینہ اغوا کے واقعے میں ٹیکسی ڈرائیوروں سے متعلق سوال کے جواب میں انہوں نے کہا کہ ’یہ حقیقت ہے کہ میں نے افغان سفیر کی بیٹی کے مبینہ اغوا کے معاملے میں گرفتار ٹیکسی ڈرائیور کی رہائی کےلیے آئی جی اسلام آباد کو کہا ہے کیونکہ وہ بے قصور ہیں۔

انہوں نے مزید بتایا کہ ان کے گھر میں روٹی نہیں ہے، صبح نکلتے ہیں اور شام کو کما کر گھر پہنچتے ہیں۔

شیخ رشید نے واضح کیا کہ جس دن افغان سفیر اسلام آباد آئیں گے انہیں تمام دستاویزات پیش کریں گے، سفیر کی بیٹی نے 6 ٹیکسی ڈرائیوروں کو ادائیگی کے ساتھ ٹپس بھی دیں۔

ان کا کہنا تھا کہ افغان وزارت خارجہ کو تمام ریکارڈنگ اور دستاویزات دے دیے ہیں، میں ذاتی طور پر انہیں کچھ نہیں دے سکتا، یہ وزارت خارجہ کا کام ہے۔

شیخ رشید نے کہا کہ افغانستان سے متعلق بیان وزارت خارجہ دے گا جبکہ سیلابی صورتحال سے نمنٹے کے لیے فوج سمیت سول ادارے بھی الرٹ ہیں۔

سندھ میں کیسز کے غیرمعمولی اضافے کے پیش نظر سخت لاک ڈاؤن سے متعلق سوال کے جواب میں انہوں نے کہا کہ سندھ میں مکمل لاک ڈاؤن کریں گے تو اپنا نقصان خود کریں گے، ساری دنیا نے وزیر اعظم عمران خان کے اسمارٹ لاک ڈاؤن کی تعریف کی، حکومت سندھ کو اسمارٹ لاک ڈاؤن کے طریقہ اپنانے میں کوئی حرج نہیں ہے۔

شیخ رشید نے تقریب میں موجود افراد کو ماسک پہننے کی تلقین کرتے ہوئے کہا کہ کورونا وائرس کی نئی قسم ڈیلٹا سے احتیاط برتیں اور اپنے آپ کو محفوظ رکھیں۔

شیخ رشید نے کہا کہ جب ہم بھی اپوزیشن میں تھے تو چیئرمین پاکستان پیپلز پارٹی (پی پی پی) بلاول بھٹو زرداری کی طرح کی باتیں کرتے تھے کہ آئندہ چند ماہ میں انتخابات ہونے جارہے ہیں، لیکن حقیقت یہ ہے کہ الیکشن اپنے وقت پر ہوں گے۔

انہوں نے مزید کہا کہ اپوزیشن کو سمجھ لینا چاہیے کہ تحریک انصاف مزید بہتر پوزیشن میں آرہی ہے اور آئندہ دو برس میں مزید بہتر ہوگی۔

وزیر داخلہ نے طالبان اور چین کے مابین مذاکرات سے متعلق سوال کے جواب میں کہا کہ چین اور پاکستان کے تعلقات ہمالیہ کے پہاڑوں سے بلند ہیں اور انہیں کوئی طاقت بھی خراب نہیں کر سکتی۔

انہوں نے کہا کہ پوری قوم چین پر اعتماد کرتی ہے اور بعض ممالک پاک ۔ چین تعلقات کو نقصان پہنچانے کے لیے سازش کر رہے ہیں، لیکن ہمارے تعلقات کبھی خراب نہیں ہوں گے۔

ان کا کہنا تھا کہ راولپنڈی کے تمام مسائل حل ہوگئے ہیں جبکہ لئی ایکسپریس میری زندگی اور سیاست کا مسئلہ ہے، جب وہ بن جائے گی تو سیاست سے ریٹائرمنٹ لے لوں گا۔

وزیر خارجہ شاہ محمود قریشی نے کہا ہے کہ سندھ کے عوام تبدیلی چاہتے ہیں اور انہیں یہ باور کرانے کی ضرورت ہے کہ ایک متبادل جماعت ہے جو ان کی داد رسی کر سکتی ہے، جس دن وہاں کے عوام قائل ہو گئے تو سندھ میں بھی خوشگوار تبدیلی نظر آئے گی۔

ملتان میں پریس کانفرنس کرتے ہوئے شاہ محمود قریشی نے کہا کہ پی پی-38 سیالکوٹ عرصہ دراز سے مسلم لیگ(ن) کے کنٹرول میں تھا اور وہاں سے وہ کامیابیاں حاصل کرتے رہے لیکن عوام نے وہاں کایا پلٹی اور تحریک انصاف کے نامزد کردہ امیدوار کو منتخب کیا، یہ ایک ابھرتا ہوا ٹرینڈ ہے اور ہمیں اسی ٹرینڈ کو آگے لے کر چلنا ہے۔

انہوں نے کہا کہ ہم نے صوبہ سندھ میں کام شروع کردیا ہے اور وزیر اعظم کی سربراہی میں سندھ کے سیاسی رابطوں کے بارے میں حکمت عملی طے پائی ہے۔

ان کا کہنا تھا کہ میں خود بھی کراچی گیا تھا جہاں کچھ دوستوں سے بھی ملاقات ہوئی ہے جبکہ آئندہ آنے والے دنوں میں مزید دوستوں سے ملاقات ہو گی تاکہ ہم سندھ کے عوام سے رجوع کریں، وہاں متعلقہ مسائل کو سمجھ کر ان کا حل تلاش کریں اور وہاں کے عوام کو متبادل بھی فراہم کریں۔

وزیر خارجہ نے کہا کہ ہمارا تجزیہ یہ ہے کہ سندھ کے لوگ تبدیلی چاہتے ہیں، انہیں قائل کرنے کی ضرورت ہے کہ اب ایک متبادل جماعت ہے جو ان کی داد رسی کر سکتی ہے اور جو ان کے مسائل کو حل کرنے میں دلچسپی رکھتی ہے، مجھے یقین ہے کہ جس دن وہ قائل ہو گئے تو آپ سندھ میں بھی حیرت انگیز اور خوشگوار تبدیلی دیکھیں گے۔

انہوں نے ملتان کی سالڈ ویسٹ مینجمنٹ کمپنی کی انتظامیہ کو مبارکباد پیش کرتے ہوئے کہا کہ عید کے دنوں میں سالڈ ویسٹ ٹھکانے لگانا بہت بڑا چیلنج ہوتا ہے لیکن انہوں نے اس سال ماضی سے بہتر کام کیا اور ہمیں اس حوالے سے بہت اچھی رپورٹ موصول ہوئی ہے۔

شاہ محمود قریشی نے کہا کہ جنوبی پنجاب سیکریٹریٹ کے قیام کے حوالے سے معاملات طے پا گئے ہیں اور پیر سے ٹھییدار اس پر کام شروع کردے گا جبکہ جنوبی پنجاب سکریٹریٹ کے سیکریٹریز خود مختار اور بااختیار ہوں گے تاکہ وہ وہاں کے معاملات کو وہیں حل کردیں۔