Category بزنس

لاہور(ایمرا نیوز رپورٹ)پنجاب ریونیو اتھارٹی نے9ماہ میں 80ارب روپے ٹیکس اکٹھا کرکے ریکارڈ قائم کردیا۔ سندھ ریونیو بورڈ سے17 ارب روپے زائد ریونیو اکٹھا کرنے میں پی آر اے نے دیگر صوبوں کو پیچھے چھوڑ دیا ہے۔ ذرائع کے مطابق پی آر اے نے گزشتہ سال مارچ کے مہینے میں6ارب 70کروڑ جبکہ روا ں سال مارچ میں 10ارب40کروڑ کا ریونیو اکٹھا کیا ہے،مارچ2017میں ٹیلی کام سیکٹر سے1.56ارب روپے ٹیکس وصول کیا گیا تھا جبکہ رواں سال مارچ کے مہینے میں ٹیلی کام سیکٹر سے3ارب روپے ٹیکس لیا گیا، اسی طرح گزشتہ سال مارچ میں ود ہولڈنگ ٹیکس کی مد میں120کروڑ روپے جبکہ روا ںبرس مارچ میں239کروڑ ریونیو اکٹھا کیا گیا ہےخ اسی طرح مارچ2017میں ٹرانسپورٹیشن سیکٹر سے127ملین روپے ٹیکس وصول کیا جبکہ رواں برس مارچ کے مہینے میں اسی سیکٹر سے588ملین روپے ٹیکس اکٹھا کیا گیا۔ ذرائع کے مطابق پی آر اے کے رجسٹرڈ ٹیکس گزاروں کی تعداد47000سے تجاوز کرگئی ہے۔ گزشتہ9ماہ کے دوران پی آر اے کے پاس11ہزار سے زائد افراد نے ٹیکس رجسٹریشن کروائی۔ رواں مالی سال2017-18میں پنجاب ریونیو اتھارٹی کےلئے130ارب روپے کا ریونیو ٹارگٹ رکھا گیا ہے جس میں سے80ارب روپے کا ٹیکس وصول کرلیا ہے، جوکہ ایک ریکارڈ ہے۔گزشتہ مالی سال2016-17میں پنجاب ریونیو اتھارٹی کا ریونیو ہدف85ارب روپے تھا۔ اس حوالے سے پنجاب ریونیو اتھارٹی کے چیئرمین ڈاکٹر راحیل صدیقی نے نمائندہ ایمرا نیوزسے گفتگو کرتے ہوئے کہا کہ پی آر اے مسائل اور چیلنجز کے باوجود اپنا ٹارگٹ پورا کرےگی۔ہم نے 80ارب روپے کا ریونیو اکٹھا کرلیا ہے۔ انہوںنے کہا کہ ہم وزیراعلیٰ شہبازشریف کے ویژن کے مطابق پی آر اے کو مثالی ٹیکس کو لیکشن ادارہ بنانے کےلئے کوشاں ہیں۔

اسلام آباد:(بیورورپورٹ ایمرا نیوز)10 ہزار کا کرنسی نوٹ: اسٹیٹ بینک نے سوشل میڈیا پر زیر گردش افواہوں کو غلط قرار دیدیا

اسٹیٹ بینک نے 10 ہزار روپے کا کرنسی نوٹ جاری کرنے سے متعلق سوشل میڈیا پر زیر گردش افواہوں کو غلط قرار دیدیا ہے۔

اسٹیٹ بینک کی جانب سے جاری بیان میں کہا گیا ہے کہ سوشل میڈیا میں بڑی مالیت کے نوٹ سے متعلق خبر کی تردید کرتے ہیں، موجودہ مالیت کے بینک نوٹ لین دین سمیت دیگر ضروریات پوری کر رہے ہیں۔

مرکزی بینک کی جانب سے جاری بیان میں مزید کہا گیا ہے کہ بڑی مالیتوں کے بینک نوٹ جاری کرنے کی کوئی ضرورت نہیں ہے اور عوام ایسی افواہوں پر توجہ نہ دیں۔

کراچی(کامرس رپورٹر/ایمرا نیوز)چیئرمین سینیٹ اور ڈپٹی چیئرمین سینیٹ کے انتخاب پر حصص بازار میں سرمایہ کار سرگرم نظر آئے، جبکہ100 انڈیکس 400 پوائنٹس اضافے سے 43 ہزار 400 کی سطح سے اوپر بند ہوا۔

پاکستان حصص بازار میں آج کاروبار کے دوران مثبت رجحان کا سلسلہ دیکھا گیا اور 100 انڈیکس میں 469 پوائنٹس کا اضافہ ریکارڈ کیا گیا۔

اس سے 100 انڈیکس 43 ہزار 479 کی بلند سطح تک پہنچ گیا تاہم کاروبار کے اختتام پر100 انڈیکس 400 پوائنٹس اضافے سے 43 ہزار410 کی سطح پر بند ہوا۔

معاشی تجزیہ کاروں کا کہنا تھا کہ چیئرمین اور ڈپٹی چیئرمین سینیٹ کو منتخب کرنے کے سلسلے میں سیاسی جماعتوں پر مل کر چلنے کو سرمایہ کار مثبت نظر سے دیکھ رہے ہیں لیکن حصص بازار میں اس کے ساتھ کاروبار کے لین دین کے حجم میں بھی کمی دیکھی جارہی ہے۔

امریکا(کامرس رپورٹر/میڈیا 92نیوز)عالمی مارکیٹ میں سونا 25 ڈالر فی اونس سستا ہوگیا جب کہ خام تیل کی قیمت میں اضافہ دیکھا گیا۔

عالمی مارکیٹ میں خام تیل اور سونے کی ہفتہ وار قیمتوں سے متعلق رپورٹ کے مطابق گزشتہ ہفتے کے مقابلے میں سونا 25 ڈالر فی اونس سستا ہوا ہے جس کے بعد ایک ہفتے کے دوران سونا 1353 ڈالر سےکم ہوکر 1328 ڈالرفی اونس پرآگیا۔

دوسری جانب گزشتہ ہفتے کے مقابلے میں امریکی خام تیل 2 ڈالر مہنگا ہوا ہے اور ایک ہفتے کے دوران خام تیل 61.57 ڈالر سے بڑھ کر 63.57 فی ڈالر کی قیمت پر بند ہوا۔

کراچی(کامرس رپورٹر/میڈیا 92نیوز) سندھ ہائیکورٹ نے دودھ کی قیمت بڑھانے کی استدعا مسترد کرتے ہوئے 85 روپے فی لیٹر پر ہی فروخت کرنے کا حکم دیاہے۔

سندھ ہائیکورٹ میں دودھ فروشوں کی جانب سے قیمت بڑھانے کی درخواست کی سماعت ہوئی جس دوران ریٹیلرز نے مؤقف اپنایا کہ مقرر کردہ قیمت 85 روپے فی لیٹر دودھ فروخت کرنے پر مالی نقصان ہورہا ہے اس لیے قیمت میں اضافہ کرنے کی اجازت دی جائے۔

عدالت نے دودھ فروشوں کی قیمت بڑھانے کی استدعا مسترد کرتے ہوئے قیمت کے تعین کے اختیار سے متعلق قانونی دلائل طلب کرلیے جب کہ قیمت کے تعین سے متعلق اجلاس کی تفصیلات بھی طلب کرلیں۔

کمشنر کراچی نےعدالت کو بتایا کہ دودھ کی قیمت اسٹیک ہولڈرز کی مشاورت سے مقرر کی گئی ہے۔

عدالت عالیہ نے کمشنر کراچی کو دودھ کی 85 روپے فی لیٹر فروخت پر عملدرآمد یقینی بنانے اور زائد قیمت پر دودھ بیچنے والوں کے خلاف کارروائی کا حکم دیا۔

گٹکے پر پابندی برقرار رکھنے کا حکم
دوسری جانب سندھ ہائیکورٹ نے گٹکے کی فروخت پرپابندی برقرار رکھنے کا بھی حکم دیا ہے اور کمشنر کراچی سے ہر تین ماہ کی عمل درآمد رپورٹ طلب کرلی ہے۔

کراچی(کامرس رپورٹر/میڈیا 92نیوز) پنجاب فوڈ اتھارٹی کے بعد محکمہ داخلہ سندھ نے بھی چائنیز کھانوں کا لازمی جز تصور کیے جانے والے اجینو موتو یعنی چائنیز نمک پر پابندی لگانے کا اعلان کردیا۔

محکمہ داخلہ سندھ نے اجینوموتو پر پابندی کا نوٹیفکیشن بھی جاری کردیا۔

نوٹیفکیشن کے مطابق انسانی صحت کے تحفظ کے پیش نظر اجینوموتو کی درآمد، تیاری اور فروخت پر پابندی عائد کی گئی۔

پنجاب میں چائنیز نمک پر پابندی عائد

نوٹیفکیشن کے مطابق پابندی کا اطلاق دفعہ 144 کے تحت پورے سندھ میں ہوگا۔

اس سے قبل گذشتہ ماہ پنجاب فوڈ اتھارٹی نے اجینو موتو پر پابندی لگانے کا اعلان کیا تھا۔

پنجاب فوڈ اتھارٹی کے سائنٹیفک پینل کا کہنا تھا کہ اجینو موتو میں مونو سوڈیم گلومیٹ پایا جاتا ہے جو سر درد، دل کی دھڑکن کے مسائل اور دماغی و اعصابی بیماریوں کا باعث بنتا ہے۔

کراچی(کامرس رپورٹر/میڈیا 92نیوز) زیر جائزہ سال کے لیے نیشنل بینک کی آپریٹنگ آمدنی 85.3 ارب روپے رہی جب کہ خالص انٹریسٹ مارک اپ کی مالیت 54.3ارب روپے رہی۔

نیشنل بینک آف پاکستان کے بورڈ آف ڈائریکٹرز کا اجلاس بینک کے ہیڈ آفس واقع کراچی میں منعقد ہوا جس میں مالی سال مختتمہ 31دسمبر، 2017کے لیے بینک کے مالی گوشواروں کی منظوری دی گئی۔انڈسٹری میں اپنی پوزیشن برقرار رکھتے ہوئے بینک نے اپنی 69سالہ تاریخ کے سب سے زیادہ بعد از ٹیکس منافع کا اعلان کیا ہے۔

بینکاری کی صنعت کے لیے عمومی طور پر مشکل سال ہونے کے باوجود نیشنل بینک نے مجموعی طور پر مثبت کارکردگی کا مظاہرہ کیا ہے ۔ زیر جائزہ سال کے لیے بینک کی آپریٹنگ آمدنی 85.3ارب روپے رہی جب کہ خالص انٹریسٹ/ مارک اپ کی مالیت 54.3ارب روپے رہی۔

اسی طرح نان-انٹریسٹ/مارک اپ آمدنی میں3.7فیصد اضافہ ہوا جس کی مالیت 31.1ارب روپے رہی۔بینک کے بعد از ٹیکس منافع کی مالیت 23.03ارب روپےرہی جو گزشتہ سال کے مقابلہ میں 1.2فیصد زیادہ ہے۔

کراچی(کامرس رپورٹر/ایمرا نیوز) سعودی عرب نے بھارت کے بعد برڈ فلو کی وبا پھوٹ پڑنے کے باعث افغانستان سے پولٹری اور پولٹری مصنوعات کی درآمدات پر پابندی عائد کردی ہے۔

وزارت ماحولیات، پانی وزراعت کی جانب سے جاری کردہ بیان کے مطابق وبائی برڈ فلو وائرس کی اطلاع ملنے کی وجہ سے ورلڈ آرگنائزیشن فار اینیمل ہیلتھ (اوآئی ای) کی جاری کردہ وارننگ کے مطابق افغانستان سے زندہ پرندوں، انڈوں وچکس کی درآمدات پر عارضی پابندی لگا دی گئی ہے۔

او آئی ای کے مطابق افغان حکومت نے حال ہی میں برڈ فلو 2 مقامات پرپھوٹ پڑنے کی اطلاع دی ہے، کابل کے قریب ایچ فائیووائرس پایا گیا گیا جس سے 6 پرندے ہلاک ہو گئے ہیں جبکہ قریبی بگرامی گاؤں میں 15 پرندے مرنے کی اطلاع ہے۔
قبل ازیں رواں ماہ افغان چیمبرآف کامرس اینڈ انڈسٹری نے متعلقہ اداروں سے وبا پر قابو پانے کے لیے مدد کی درخواست کی تھی کیونکہ انھیں اس سے پولٹری فارمرز کو بڑے پیمانے پر نقصان پہنچنے کا اندیشہ ہے، اس سے پہلے صوبہ خوست میں بھی برڈ فلو کی وبا پھوٹی تھی۔

افغان چیمبر کے ترجمان نے کہاکہ ہم ان علاقوں میں پیشہ ورانہ طریقوں سے کام کر رہے ہیں مگر بدقسمتی سے برڈ فلو کی وبا سے کئی مرغیاں مر گئی ہیں۔

افغان وزارت زراعت کے مطابق وائرس جنگلی پرندوں کے ذریعے خوست میں پھیلا اور اس کی علامتیں پکتیا میں بھی ملی ہیں، بعض علاقوں میں بین الاقوامی تنظیموں کی مدد سے اس وبا پر قابو پا لیا ہے۔

وزارت کے ترجمان اکبررستمی نے کہاکہ وزارت زراعت نے ایف اے او سمیت متعدد عالمی تنظیموں کے تعاون سے وبا کو پھیلنے سے روکنے کیلیے متعدد سنجیدہ اقدامات کیے ہیں۔

اسلام آباد(کامرس رپورٹر/ایمرا نیوز) پاکستان نے کینیڈا سے دالوں کی درآمد پر پابندی اٹھانے سے انکار کردیا ہے اور پابندی اٹھانے کو کینیڈا سے ٹیکسٹائل مصنوعات کی ڈیوٹی فری رسائی دینے سے مشروط کر دیاہے۔

وزارت تجارت و ٹیکسٹائل کے ذرائع کے مطابق وزیر تجارت محمد پرویز ملک کے حالیہ دورہ کینیڈا کے دوران پاکستان اور کینیڈا کے درمیان دوطرفہ تجارت کے فروغ اور پاکستان کی مصنوعات کو کینیڈا کی منڈیوں تک رسائی دینے کے حوالے سے امور پر تبادلہ خیال کیاگیا، مذاکرات کے دوران کینیڈا نے دالوں کی پاکستان کو برآمد پر پابندی عائد کرنے پر تشویش کا اظہار کرتے ہوئے اسے ختم کرنے کا مطالبہ کیا ہے۔

ذرائع کے مطابق کینیڈا سے دالوں کی درآمد پر غیر مشروط پابندی اٹھانے سے انکار کردیا ہے اور واضح کیاہے کہ کینیڈا سے دالوں کی درآمد کی اجازت اسی صورت دی جائے گی جب کینیڈا پاکستانی ٹیکسٹائل مصنوعات کو ڈیوٹی فری مارکیٹ رسائی کی اجازت دے گا۔
ذرائع کے مطابق کینیڈا کی جانب سے یہ مطالبہ کیا گیا تھاکہ پاکستان یک طرفہ طور پر کینیڈا کی دالوں کی درآمدپر عائد پابندی ختم کرے اور دالوں کی درآمد کی اجازت دے۔ ذرائع کے مطابق پاکستان نے کینیڈا پر واضح کیا کہ وہ متعین کردہ عالمی معیارات پر کوئی سمجھوتہ نہیں کرے گا اور مصنوعات کی برآمد پر پابندی ختم کرنے پر غور اسی صورت ہوسکتاہے جب پاکستانی مصنوعات کو ڈیوٹی فری رسائی اور متعین کردہ معیارات کی تکمیل ہو گی۔

وزارت تجارت کے حکام کے مطابق کینیڈا پاکستان کو سالانہ 40کروڑ ڈالر سے زائد کی دالیں برآمد کرتا ہے، عالمی معیارات پر پورا نہ اترنے کے باعث چند ماہ قبل پاکستان نے کینیڈا سے دالوں کی درآمد پر پابندی عائد کی تھی، حالیہ دورے میں وزیر تجارت محمد پرویز ملک اور کینیڈین وزارت تجارت کے حکام کے درمیان اس معاملے پر تفصیلی مذاکرات ہوئے تاہم فریقین کے اپنے موقف پر قائم رہنے کی وجہ سے کوئی مثبت پیش رفت نہ ہوسکی۔

علاوہ ازیں حکام کے مطابق پاک کینیڈا تجارت کا حجم صلاحیت سے بہت کم ہے تاہم اسے3 ارب ڈالر تک بڑھایا جا سکتا ہے۔

اسلام آباد(کامرس رپورٹر/ایمرا نیوز) وزارت منصوبہ بندی و ترقی نے سرکاری شعبے کے ترقیاتی پروگرام کے تحت مختلف منصوبوں کے لیے 9فروری تک 4 کھرب56 ارب 19 کروڑ 21 لاکھ روپے جاری کردیے۔

حکومت نے پی ایس ڈی پی کے لیے 10 کھرب 1 ارب روپے کے فنڈز مختص کیے ہیں۔ پلاننگ کمیشن کے مطابق حکومت نے پرائم منسٹر یوتھ اور ہنرمند پروگرام کے لیے10 ارب83 کروڑ، عارضی طورپر بے گھر ہونے والے افراد کی بحالی کے لیے42 ارب7 کروڑ، ایرا کے لیے3 ارب15 کروڑ، پائیدار ترقی اہداف کے لیے 30 ارب، سیفران فاٹا کے لیے 10 ارب63 کروڑ، ریلویز ڈویژن کے لیے 15 رب24 کروڑ، گلگت بلتستان بلاک کے لیے7 ارب 70 کروڑ، اے جے کے بلاک کے لیے 14 ارب80 کروڑ، نیشنل ہائی وے اتھارٹی کے لیے2 کھرب 2 ارب 84 کروڑ، واپڈا پاور سیکٹر23 ارب 89 کروڑ، پانی و بجلی ڈویژن کے لیے 13 ارب 18 کروڑ، پارکو کے لیے 1 ارب، سائنس ٹیکنالوجیکل ریسرچ ڈویژن کے لیے 87 کروڑ 39 لاکھ، ریونیو ڈویژن کے لیے 24 کروڑ 19 لاکھ، پورٹس اینڈ شپنگ ڈویژن کے لیے89 کروڑ51 لاکھ، منصوبہ بندی ترقی و اصلاحات ڈویژن کے لیے 1ارب 83 کروڑ، پٹرولیم و قدرتی وسائل کے لیے 10 ارب77 کروڑ، پاکستان اٹامک انرجی کمیشن کے لیے3 ارب99 کروڑ، ملک میں صحت کی سہولتیں بہتر بنانے کے لیے8 ارب10 کروڑ، نیشنل فوڈ سیکیورٹی ریسرچ ڈویژن کے لیے 40 کروڑ، ہائر ایجوکیشن کمیشن کے لیے11 ارب62 کروڑ، داخلہ ڈویژن کے لیے9 ارب ایک کروڑ، فنانس ڈویژن کے لیے10 ارب، ایوی ایشن ڈویژن کے لیے 1 ارب 87 کروڑ 44 لاکھ، کیڈڈویژن کے لیے2 ارب45 کروڑ، کامرس ڈویژن کے لیے24 کروڑ، موسمی تبدیلی ڈویژن کے لیے32 کروڑ60 لاکھ روپے سمیت مختلف ترقیاتی منصوبوں کے لیے فنڈز جاری کردیے ہیں۔