Category بزنس

کراچی( نیٹ‌نیوز)رواں مالی سال کے پہلے 10 ماہ کے ساتھ اپریل کے مہینے میں مقامی طور پر تیار ہونے والی گاڑیوں کی فروخت میں مجموعی طور پر کمی دیکھنے میں آئی ہے ۔ پاکستان آٹوموٹو مینوفکچررز ایسوسی ایشن (پاما) کی جانب سے

جاری حالیہ اعداد و شمار کے مطابق سوزوکی مہران اور بولان کی فروخت میں کمی، مختلف چیزوں کی قیمتوں میں اضافے ، زائد شرح سود اور بڑھتی ہوئی پیٹرول کی قیمتوں کے باعث مجموعی طور پر مقامی طور پر تیار کردہ گاڑیوں کی فروخت

میں کمی ہوئی۔اعداد و شمار ظاہر کرتے ہیں کہ اپریل میں گاڑیوں کی فروخت مارچ کے 19 ہزار 877 یونٹس کے مقابلے میں 17 ہزار 76 یونٹ تک محدود رہی جبکہ رواں مالی سال کے 10 ماہ کے دوران یہ ایک لاکھ 82 ہزار 911 یونٹس کے مقابلے میں ایک لاکھ 77 ہزار 435 پر ختم ہوئی۔

کراچی(نیٹ‌نیوز)دنیا کی دو بڑی معاشی طاقتوں امریکا اور چین کی لڑائی نے پاکستان سمیت دنیا بھر کی روئی کی منڈیوں کو اپنی لپیٹ میں لے لیا ہے اور صرف 10کاروباری روز کے دوران دنیا بھر کی کاٹن مارکیٹس کریش ہونے سے پاکستان سمیت دنیا بھر میں کاٹن اسٹیک ہولڈرز کے غیر معمولی معاشی بحران میں مبتلا ہونے کے خدشات پیدا ہوگئے ہیں۔چیئرمین کاٹن

جنرز فورم احسان الحق نے بتایا کہ پچھلے کچھ عرصے سے چین اور امریکا کے درمیان جاری اقتصادی جنگ نے اس وقت شدت اختیار کر لی جب چند روز قبل چینی نائب صدر کے دورہ امریکا سے قبل امریکی صدر کے متنازعہ بیانات کے باعث امریکا اور چین نے ایک دوسرے کی مصنوعات کی درآمد پر بھاری ٹیکسز کم کرنے کی بجائے ان میں مزید اضافے کا اعلان

کر دیا جس کے باعث چین کی جانب سے امریکا سے درآمد ہونے والی روئی کی درآمد مکمل طور پر معطل ہو نے سے امریکا،چین اور بھارت کی روئی کی منڈیوں میں غیر معمولی مندی کا رجحان سامنے آ گیا جس کے منفی اثرات دنیا بھر کی

کاٹن مارکیٹس پر مرتب ہونے سے نیویارک کاٹن ایکسچینج میں 16.8فیصدتک ،چین کی کاٹن مارکیٹس میں 11.5 فیصدتک جبکہ بھارت اور پاکستان میں بھی روئی کی قیمتوں میں زبردست مندی کا رجحان سامنے آنے کے ساتھ ساتھ کاروباری سرگرمیاں بھی کافی حدتک محدود ہو گئی ہیں ۔

اسلام آباد(نیٹ نیوز)قومی احتساب بیورو(نیب) نے بحریہ ٹائون کے مالک ملک ریاض اور انکے بیٹے علی ملک کے گرد گھیرا تنگ کردیا ہے ۔باوثوق ذرائع کے مطابق نیب راولپنڈی میں جعلی بینک اکائونٹس کیس تحقیقات جاری ہیں۔ نیب راولپنڈی نے تحقیقات کیلئے پراپرٹی ٹائیکون ملک ریاض کو 15 مئی کو اور انکے بیٹے علی ملک کو16 مئی کو طلب کر لیا ہے ۔باپ

بیٹے سے جوائنٹ وینچر کیس سے متعلق تفتیش کی جائیگی۔ علاوہ ازیں بحریہ ٹائون کی جانب سے کروڑوں روپے کی ادائیگیوں سے متعلق بھی پوچھ گچھ ہوگی ۔قبل ازیں گزشتہ ماہ کی 10تاریخ کونیب ہیڈ کوارٹرز کو بحریہ ٹاؤن کے مالک کیخلاف دوسرا ریفرنس موصول ہوا تھا۔ذرائع کے مطابق زمینوں پرغیر قانونی قبضے کے معاملے پر بحریہ ٹاؤن کے مالک

ملک ریاض پر قانون کی پکڑ مزید سخت ہوگئی ہے ۔ نیب کو موصول ریفرنس میں الزام عائد کیا گیاکہ ملک ریاض نے شاملات دیہہ کے رقبے پر قبضہ کرکے بحریہ گالف سٹی منصوبہ بنایا۔ ریفرنس میں یہ بھی کہا گیا کہ زمین کی الاٹمنٹ بھی غیر قانونی طور پر کی گئی۔ذرائع نے بتایا کہ نیب راولپنڈی نے ملک ریاض کے خلاف بحریہ گالف سٹی ریفرنس نیب ہیڈ

کوارٹرز کو بھجوا دیا ہے تاہم ریفرنس چیئرمین نیب کی منظوری کے بعد عدالت میں دائر کیا جائے گا۔ریفرنس میں ملک ریاض کے بیٹے علی ملک کو بھی نامزد کیا گیا ہے ۔نیب راولپنڈی نے ملک ریاض کیخلاف پہلا ریفرنس تخت پڑی کیس میں تیار کیا تھا۔

کراچی ( نیٹ‌نیوز) عالمی صرافہ مارکیٹ میں فی اونس سونے کی قیمت میں استحکام کے باوجود ملکی صرافہ مارکیٹ میں سونامہنگا ہو کر ملکی تاریخ میں پہلی مرتبہ70ہزار روپے کی سطح سے تجاوز کر گیا ۔ہفتہ کو عالمی صرافہ مارکیٹ میں فی اونس سونے کی قیمت 1286ڈالر پر مستحکم رہی

تاہم ملکی صرافہ مارکیٹوں میں ایک تولہ سونا1300روپے مہنگا ہو کر 70ہزار500روپے اور 10گرام سونا1114روپے مہنگا ہو کر60ہزار442روپے کا ہو گیا ۔آل پاکستان سپریم کونسل جیولرز ایسوسی ایشن کی ہفتہ وار رپورٹ کے مطابق گذشتہ ایک ہفتے کے دوران عالمی صرافہ مارکیٹ میں فی اونس سونے کی قیمت میں

صرف5ڈالر کا اضافہ ہوا جبکہ ملکی صرافہ مارکیٹو ں میں اسی مدت کے دوران ایک تولہ سونے کی قیمت میں 3700روپے اور دس گرام سونے کی قیمت میں 3172روپے پر جا پہنچی ۔

اسلام آباد(نیٹ‌ نیوز) وفاقی حکومت نے کرنسی کی اسمگلنگ روکنے کیلئے نیا ڈائریکٹوریٹ قائم کر دیا، ڈائریکٹوریٹ آف کراس بارڈر کرنسی موومنٹ کی تشکیل کا نوٹیفکیشن جاری کر دیا گیا،

ڈائریکٹوریٹ مشکوک ٹرانزیکشنز کی رپورٹ تیار کر کے فناشل منیجمنٹ یونٹ کو پیش کرے گا۔فیڈرل بورڈ آف ریونیو (ایف بی آر) نے ڈائریکٹوریٹ آف کراس بارڈر کرنسی موومنٹ کی تشکیل کا نوٹیفکیشن جاری کردیا

جس کے مطابق ڈائریکٹوریٹ ڈائریکٹر کسٹمز انٹیلی جنس کے ماتحت کام کرے گا۔اعلامیے کے مطابق ڈائریکٹوریٹ کرنسی اسمگلنگ اور مشکوک ٹرانزیکشنز کی رپورٹ تیار کرے گا۔

اسلام آباد (نیٹ‌نیوز) ایف بی آر کے نئے چیئرمین سید شبر زیدی نےپیشگی اطلاع اور اجازت کے بغیر بنک اکائونٹس منجمد کرنے سے روکدیا، چیئرمین ایف بی آر نے جمعہ کو عہدے کا چارج سنبھالنے کے بعد حکم نامے میں لارج ٹیکس پیئرز یونٹ، کارپوریٹ ریجنل ٹیکس دفاتر اور ریجنل ٹیکس دفاتر کے تمام چیف کمشنرزان لینڈ ریونیو کو ہدایات جاری کی ہیں کہ

ٹیکس وصولی کیلئے پیشگی اطلاع کے بغیر کسی شہری کے بینک اکاؤنٹ منجمد نہ کیے جائیں اورکسی بھی شہری کا بینک اکائونٹ منجمد کرنے سے 24 گھنٹے پہلے متعلقہ شخص، ادارے،کمپنی کے سی ای او یا مالک کو آگاہ کرنا ہوگا اور اکائونٹس منجمد کرنے کیلئے چیئرمین ایف بی آر کی منظوری لازمی ہوگی۔ نئے چیئرمین ایف بی آر شبر زیدی نے جمعہ کی صبح

ادارے کا چارج سنبھال لیا اور ایف بی آر کے افسران سے اپنے پہلے خطاب میں ٹیکس نظام میں بہتری لانے کے اپنے وژن اور ادارے کو درپیش مسائل کا ذکر کیا۔ انہوں نے کہا کہ ٹیکس گزاروں کی سہولتیں فراہم کرنے کیلئے مکمل آٹو میٹڈ نظام کی ضرورت ہے، ریونیو

میں اضافے کی خاطر تمام ٹرانزیکشنز کو ڈاکو مینٹڈ (دستاویزی) کرنے کی ضرورت ہے۔ چیئرمین ایف بی آر نے افسران کو یقین دلایا کہ ان کہ مسائل کو حل کیا جائے گا اور تمام افسران کی حمایت سے ہی وہ ادارے میں بہتری لاسکتے ہیں۔ انہوں نے وزیراعظم کا شکریہ ادا کیا اور کہا کہ وہ اس بھاری ذمہ داری کو احسن طریقے سے پورا کرینگے۔

نئے چیئرمین نے افسران کے سوالات کے جواب نہایت خوشگوار ماحول میں دیئے اور اس توقع کا اظہار کیا کہ انکی مستقبل میں افسران سے باضابطہ ملاقات ہوگی۔ بعدازاں وزارت خزانہ کے باہر صحافیو ں گفتگو کرتے ہوئے چیئرمین ایف بی آر شبر زیدی نے کہا کہ ایف بی آرافسران کو ٹیکس گزاروں کو ہراساں کرنے سے روک دیا ہے میری ترجیح ٹیکس دہندہ کا احترام کرنا ہے اور جو لوگ ٹیکس نہیں دیتے ان کو ٹیکس نظام میں لانا ہے۔ انہوں نے کہا کہ ٹیکس

دہندہ کے ایف بی آر کے ساتھ بہت سے تنازعات ہوتے ہیں اور انکے بنک اکائونٹس منجمد کر دیئے جاتے ہیں، بنک اکائونٹس منجمد کرنے کا قانونی حق تو موجود ہے لیکن اس سے قبل متعلقہ ادارے کو مطلع کیا جائے اور اس ادارے کے سی ای او کو بلایا جائے اور بتایا جانا چاہئے کہ اسکے بنک اکائونٹس منجمد ہوجائینگے،

اس کیلئے چیئرمین ایف بی آر سے منظوری لی جائے، ہمارا ہدف غیر دستاویزی معیشت کو دستاویزی بناناہے، اس سے ٹیکس بیس بڑھے گا، ملک میں تقریباًبلیک اکانومی کا حجم 30 فیصد سے زیادہ ہے، ٹیکس نظام میں لاناہوگا، ایمنسٹی کو مشیرامور خزانہ فائنل کرینگے۔

انہوں نے کہا کہ بجٹ کیلئے ابھی کوئی تاریخ فائنل نہیں ہوئی، ہر کوئی آئی ایم ایف کی بات کررہا ہے ہم وہی کرینگے جو پاکستان کیلئے بہتر ہوگا، آئی ایم ایف کیساتھ میٹنگ میں پاکستان کے ٹیکس نظام سے ان کو آگاہ کیا ہے۔

راولپنڈی:(ایمرا نیوزآن لائن) چین سے سی پیک پراجیکٹ میں سامان کی بڑی اور بھاری پہلی کھیپ کراچی بندرگاہ پہنچ گئی ہے۔چین سے سی پیک پراجیکٹ میں نئی کوچز کی تیاری کے لیے سامان کی بڑی اور بھاری پہلی کھیپ کراچی بندرگاہ پہنچ گئی ہے جس کی 24 گھنٹوں میں ان لوڈنگ شروع کی جارہی ہے، نئی ریلوے کوچز کا رنگ میرون بتایا جارہا ہے۔ریل کی کوچز کے یہ تمام اسپیئر پارٹس ہیں جنھیں ریلوے کیریج فیکٹری میں اسمبل کیا جائے گا یہ 300 کوچز کے اسپیئر پارٹس ہیں۔

لاہور(ایمرا نیوزآن لائن) وزیراعظم عمران خان نے آئی ایم ایف اور وزارت خزانہ کے درمیان ہونے والے اسٹاف لیول معاہدے کے مسودے کو مسترد کردیا ہے۔ذرائع کے مطابق وزیراعظم نے ہدایت کی ہے کہ ٹیکس استثنیٰ سے متعلق آئی ایم ایف سے مزید رعایت لی جائے جبکہ ٹیکس وصولی ہدف کم کرنے کے لیے بھی آئی ایم ایف کو راضی کرنے کی ہدایت کی گئی۔وزیراعظم افراط زر کے معاملے پر آئی ایم ایف کی شرائط میں نرمی چاہتے ہیں۔ذرائع وزارت خزانہ کے مطابق وزارت خزانہ اور آئی ایم ایف اسٹاف لیول معاہدے مکمل کرچکے تھے۔وزارت خزانہ کے ذرائع کا مزید کہنا ہے کہ مذاکرات میں پیش رفت ہوئی ہے تاہم بات چیف آئندہ دو روز تک جاری رہے گی۔

لاہور(ایمرا نیوزآن لائن) وزارت خزانہ کا کہنا ہے کہ آئی ایم ایف سے مذاکرات میں پیش رفت ہوئی ہے، مذاکرات آج اور کل بھی جاری رہیں گے۔آئی ایم ایف سے معاہدے کے بارے میں جو اطلاعات ملی ہیں ان کے مطابق معاہدے کے مطابق ملک میں نئے ٹیکسز لگیں گے، ڈالر پر حکومتی کنٹرول ہٹانے کی بھی تجویز ہے، جبکہ بجلی اور گیس کی قیمتوں میں بھی مزید اضافہ ہو گا۔آئی ایم ایف سے جلد تین سالہ قرض معاہدے کو حتمی شکل دیے جانے کا امکان ہے، پاکستان شرطیں مان گیا تو معاہدے کے تحت پاکستان کو 6 ارب 40 کروڑ ڈالر کا قرض ملنے کی توقع ہے۔قرض معاہدے کی شرائط کے مطابق بجٹ میں 700 ارب روپے کے نئے ٹیکس لگائے جائیں گے۔

توانائی سمیت متعدد شعبوں میں سبسڈی ختم کی جائے گی، شرح سود 12 فیصد تک لائی جائے گی، بجلی اور گیس کی قیمتیں سال میں 2 مرحلوں میں بڑھائی جائیں گی۔وزارت خزانہ کا کہنا ہے کہ آئی ایم ایف سے مذاکرات آج اور اتوار کو بھی جاری رہیں گے، ذرائع کے مطابق وزیراعظم نے آئی ایم ایف، وزارت خزانہ اسٹاف لیول معاہدے کا مسودہ مسترد کر دیا۔ذرائع کے مطابق وزیراعظم افراط زر کے معاملے پر آئی ایم ایف کی شرائط میں نرمی چاہتے ہیں۔

ذرائع کا کہنا ہے کہ وزیراعظم نے ٹیکس وصولی ہدف کم کرنے کے لیے آئی ایم ایف کو راضی کرنے کی ہدایت کی ہے اور کہا ہے کہ ٹیکس استثنیٰ سے متعلق بھی آئی ایم ایف سے مزید رعایت لی جائے۔وزیراعلیٰ پنجاب کے ترجمان شہباز گل کہتے ہیں کہ نون لیگ اور پیپلزپارٹی نے پاکستان کو قرضوں کی دلدل میں دھکیلا، دونوں جماعتوں کی حکومتوں میں 50 ارب ڈالرتک قرضہ لیاگیا۔انہوں نے مزید کہا کہ آئی ایم ایف سے معاہدہ گزشتہ حکومتوں کے کرتوتوں کی وجہ سے کرنا پڑ رہا ہے، وزیر اعظم عمران خان کی قیادت میں پاکستان جلد قرضوں سے جان چھڑا کر ترقی کی راہ پر گامزن ہو گا۔

فیصل آباد: (ایمرا نیوزآن لائن) رمضان المبارک میں چینی کی طلب میں اضافے کے ساتھ ہی ذخیرہ اندوز سرگرم ہو گئے، فیصل آباد کی اوپن مارکیٹ میں چینی ایک ہفتے میں 18 روپے مہنگی کر دی گئی، شہری بلیک میں چینی خریدنے پر مجبور ہو گئے۔ دوسری جانب گوجرانوالہ میں بھی منافع خوروں نے عوام کا خون چوسنا شروع کردیا۔ رمضان المبارک میں پھلوں، سبزیوں اور دیگر اشیاء خورونوش کی قیمتیں دگنی کر دی گئیں۔رمضان المبارک میں زخیرہ اندوز بھی سرگرم ہونے لگے، چینی کی طلب میں اضافے کے ساتھ ہی اوپن مارکیٹ میں چینی کی مصنوعی قلت پیدا کر دی گئی۔ رواں مہینے کے دوران چینی 52 روپے کلو سے 70 روپے کلو تک پہنچ گئی، شہری کہتے ہیں اوپن مارکیٹ میں چینی بلیک میں خریدنے پر مجبور ہیں۔

چینی کی قلت کا جزوی طور پر بحران پیدا کرکے ذخیرہ اندوز کئی گنا زیادہ منافع کما رہے ہیں، ڈپٹی کمشنر سردار سیف اللہ ڈوگر کہتے ہیں ذخیرہ اندوزوں کے خلاف کاروائی جاری ہے۔ذرائع نے دعوی کیا ہے کہ ذخیرہ اندوزوں کی جانب سے آنے والے دنوں میں چینی کی مزید قلت کا بحران پیدا کرکے قیمتیں مزید بڑھا دی جائیں گی۔دوسری جانب گوجرانوالہ میں بھی ماہ رمضان کی آمد کے ساتھ ہی منافع خور سرگرم ہو گئے۔ پھل، سبزیاں اور دیگراشیائے خورونوش کی قیمتیں آسمان سے باتیں کرنے لگی ہیں۔

رمضان کی آمد سے قبل فی درجن 120روپے والے کیلے 200 روپے درجن کر دئیے گئے۔ 280 روپے کلو بکنے والے سیب اب 360 روپے کلو ہو چکے ہیں جبکہ سبزیوں میں ٹماٹر 80 روپے، پیاز 70 روپے، آلو چالیس روپے، لہسن 240 روپے فی کلو کے حساب سے فروخت ہو رہا ہے۔مہنگائی کے سونامی نے غریب عوام کے لیے سحر و افطار کا انتظام کرنا مشکل بنا دیا ہے جس پر ڈپٹی کمشنر کی جانب سے منافع خوروں کے خلاف مقدمات درج کرنے کا اعلان کیا گیا ہے۔ شہریوں کا کہنا ہے کہ وہ قیمتوں میں روز بروز اضافہ سے پریشان ہیں۔ پرائس کنٹرول مجسٹریٹس کو منافع خوروں کے خلاف سخت سے سخت کارروائی کرنی چاہیے۔