Category بزنس

اسلام آباد(ایمرا نیوز آن لائن)
فیڈرل بورڈ آف ریونیو(ایف بی آر)نے آئندہ مالی سال 2019-20 کے وفاقی بجٹ میں غیر منقولہ جائیداد پر ٹیکس وصولی کے لیے رہائشی و کمرشل جائیدادوں و پلاٹس کی ویلیو ایشن میں 20 فیصد اضافہ کرنے کا اصولی فیصلہ کیا ہے۔ فیڈرل بورڈ آف ریونیو کے سینیئر افسر نے بتایا کہ آئندہ مالی سال کے وفاقی بجٹ میں جائیداد کی ویلیو مارکیٹ ریٹ کے قریب لے جانے کے لیے ایف بی آر نے جائیدادوں کی مقرر کردہ ویلیو ایشن میں 20 فیصد اضافہ کرنے کا اصولی فیصلہ کیا ہے تاہم حتمی فیصلہ بجٹ میں کیا جائے گا اور بجٹ کی پارلیمنٹ سے منظوری کے بعد یکم جولائی سے اطلاق کیا جائے گا۔

ایف بی آر حکام کا کہنا ہے کہ ریئل اسٹیٹ کنسلٹنٹس ایسوسی ایشن کی جانب سے بھی بجٹ تجاویز موصول ہوگئی ہیں اور ان بجٹ تجاویز کا جائزہ لیا جارہا ہے۔ ریئل اسٹیٹ کنسلنٹنٹس ایسوسی ایشن کی طرف سے بھجوائی جانے والی بجٹ تجاویز کی ’’ ایکسپریس‘‘ کو دستیاب کاپی کے مطابق حکومت کو تجویز دی گئی ہے کہ آئندہ مالی سال کے وفاقی بجٹ میں انکم ٹیکس آرڈیننس 2001 کی سیکشن 236 سی کے تحت غیر منقولہ جائیداد فروخت کرنے پر جائیداد کی ریئل ویلیو پر ایک فیصد ٹیکس لاگو کیا جائے، اسی طرح سیکشن 236 کے میں ترمیم کرکے غیر منقولہ جائیداد کے خریدار پر فائلر ہونے کی صورت میں ریئل ویلیو پر ایک فیصد اور نان فائلر کی صورت میں ریئل ویلیو پر 2 فیصد ٹیکس لاگو کیا جائے۔

اسی طرح انکم ٹیکس آرڈیننس کی سیکشن 236 ڈبلیو کے تحت ایف بی آر ویلیو اور ڈی سی ریٹ میں پائے جانے والے فرق پر 3 فیصد اضافی ٹیکس لاگو ہوتا ہے لہٰذا تجویز ہے کہ آئندہ بجٹ میں بیرون ممالک سے جو قانونی طریقے سے بینکنگ چینل کے ذریعئے پیسہ پاکستان آتا ہے اس سے اگر جائیداد خریدی جائے تو اس پر اس شق کا اطلاق نہ کیا جائے۔

سیکشن 236 ڈبلیو کے اطلاق کے لیے مقرر کردہ رقم کی زیادہ سے زیادہ حد کی شرط بھی ختم کی جائے اور جو کوئی اس شق کے تحت ٹیکس ادا کرنا چاہتا ہے اسے اجات دی جائے اور یہ پابندی عائد نہ کی جائے کہ صرف اس رقم سے اوپر والی جائیدادوں پر اس کا اطلاق ہوگا۔

اس کے علاوہ یہ بھی تجویز دی گئی ہے کہ انکم ٹیکس آرڈیننس کی سیکشن 37(1A) میں بھی ترمیم کی جائے اور اس شق کے تحت گین ٹیکس متعین کرنے کے لیے 2 سال کی حد مقرر کی جائے اور 5 فیصد کی فلیٹ شرح سے گین ٹیکس لاگو کیا جائے، اس اقدام سے جائیداد کی خرید فروخت میں اضافہ ہوگا اور اقتصادی سرگرمیاں بحال ہوںگی جس سے اقتصادی ترقی کی رفتار تیز ہوگی۔

یہ بھی تجویز دی گئی ہے کہ حکومت آئندہ مالی سال کے وفاقی بجٹ میں تمام اوور سیز پاکستانیوں اور نان ریزیڈینٹ پاکستانیوں کو فائلر ہونے کا اسٹیٹس فراہم کرے جس پر وہ اپنے نائکوپ،پی او سی اور غیر ملکی پاسپورٹ پر جائیدادیں خرید سکیں، اس اقدام سے حکومت کو ترسیلات زر کی مد میں بھاری زرمبادلہ موصول ہوگا اور ریونیو میں بھی اضافہ ہوگا۔

دستاویز کے مطابق حکومت کو یہ تجویز بھی دی گئی ہے جس طرح منی بجٹ میں نان فائلرز کو 1300سی سی تک کی گاڑی خریدنے کی اجازت دی گئی ہے اسی طرح آئندہ بجٹ میں نان فائلرز کو 500 مربع گز تک کے پلاٹ و مکانات خریدنے کی بھی اجازت دی جائے، اس کے علاوہ یہ بھی تجویز دی گئی ہے کہ رئیل اسٹیٹ کے کاروبارکو باقاعدہ صنعت کا درجہ دیا جائے۔

ایف بی آر حکام کا کہنا ہے کہ مختلف شعبوں سے بجٹ تجاویز موصول ہوئی ہیں، اسی طرح ریئل اسٹیٹ کنسلٹنٹس ایسوسی ایشن کی جانب سے موصول ہوئی ہیں اور ان تجاویز کا جائزہ لیا جارہا ہے اور جو تجاویز قابل عمل ہوں گی انھیں بجٹ میں شامل کیا جائے گا۔

کراچی( نیٹ‌نیوز)بلوم برگ نے پاکستانی روپے کو ایشیاء کی بدترین کرنسی قرار دے دیا۔ پاکستانی کرنسی افغانستان، بنگلہ دیش اور نیپال سے بھی کمزور ہو گئی ، بھارت،بھوٹان ، تھائی لینڈاور سائوتھ افریقہ کی کرنسی بھی پاکستان سے بہتر ہے۔ معروف امریکی نیوز ایجنسی بلوم برگ نے روپے کی قدر کے حوالے سے تازہ ترین رپورٹ جاری کی ہے جس میں روپے

کو گزشتہ 8 ماہ کے دوران کارکردگی کے لحاظ سے ایشیاء کی بدترین کرنسی قرار دیا۔ ڈالر150 کا، اسٹاکس کریش، روپے کے مقابلے میں ڈالر تاریخ کی بلند ترین سطح پر، اسٹاک مارکیٹ انڈیکس 804 پوائنٹس کم ہوکر 33 ہزار 166 پر بند، سونا مزید مہنگا

رپورٹ کے مطابق پاکستان میں ایک ڈالر 149 روپے پر پہنچ گیا ،دیگر ممالک کی کرنسی پاکستان کے مقابلے میں کچھ بہتر ہے۔ ایک ڈالر میں افغانستان کے79افغانی ملتے ہیں جبکہ بھارت میں ایک ڈالر کے 70روپے جبکہ بنگلادیش میں ایک ڈالر84ٹکے کے برابر ہے،اسی طرح نیپال میں ایک ڈالر112 کا روپے ہے، بھوٹان میں ڈالر 69 گلٹرم میں فروخت ہوتا ہے۔

تھائی لینڈ میں ایک ڈالر کی قیمت 32 بھات کے برابر ہے، سائوتھ افریقہ میں ایک ڈالر کے14.45رینڈ ملتے ہیں،ایک سال میں پاکستان کا کرنسی کے حساب سے بدترین مارکیٹوں میں شمار ہوتا ہے، مئی 2018 سے اب تک روپے کی قدر میں 29 فیصد کمی ہوئی، پہلی اور دوسری نمبر پر سوڈان اور ارجنٹائن کی کرنسی ہے۔ دونوں ممالک کی کرنسی میں ایک سال کے دوارن

149 فیصد اور 81 فیصد کمی ہوچکی ہے۔پاکستان میں تحریک انصاف کی حکومت نے جب اقتدار سنبھالا تو ڈالر 124 روپے 50 پیسے کا تھا، اس وقت ڈالر انٹر بینک میں 149 روپے میں ہوچکا ہے۔

کراچی (میڈیا 92 نیوز آن لائن ) صوبہ سندھ کے علاقوں رتو ڈیرو اور لاڑکانہ میں اب تک سامنے آنے والے 534 ایچ آئی وی کیسز میں سب سے زیادہ 2 سے 5 سال اور 6 سے 15 سال کی عمر کے بچے سب سے زیادہ متاثر ہوئے اور ان میں بھی سب سے زیادہ تعداد لڑکیوں کی ہے۔

ڈان اخبار کی رپورٹ کے مطابق اب تک ایچ آئی ایڈز سے متاثر ہونے والے کم عمر ترین بچے کی عمر ایک ماہ جبکہ سب سے بڑی عمر کے شخص کی عمر 70 سال ہے۔
یہ بات اس رپورٹ میں سامنے آئی جو میں فیلڈ ایپی ڈیمالوجی اور لیبارٹری ٹیم نے ڈائریکٹوریٹ جنرل ہیلتھ سروسز سندھ حیدر آباد نے جمع کروائی۔

رپورٹ میں اتائی ڈاکٹروں، غیر منظور شدہ لیبارٹریز اور بلڈ بینکس کے خلاف فوری کارروائی کرنے کی تجویز دی گئی۔

رپورٹ کے مطابق 25 اپریل سے 16 مئی تک کُل 14 ہزار 810 افراد کا ٹیسٹ کیا گیا جس میں ایچ آئی وی کے 534 کیسز پائے گئے جس میں 49.4 فیصد مرد جبکہ 50.6 فیصد خواتین شامل ہیں۔

عمر کے لحاظ سے ایچ آئی وی انفیکشن سے متاثر ہونے والوں کی درجہ بندی میں 2 سے 5 سال کی عمر کے بچے (55.05 فیصد)، 6 سے 15 سال کی عمر کے (18.7 فیصد)، 15 سے 45 سال کی عمر کے (16.4 فیصد) اور 46 سے زائد عمر کے 2.4 فیصد افراد متاثر ہوئے۔

اب تک کیے گئے حکومتی اقدامات کے بارے میں رپورٹ میں بتایا گیا کہ ایس اے سی پی نے رتو ڈیرو تعلقہ ہسپتال میں ایک اسکریننگ کیمپ لگایا جبکہ شیخ زید چلڈرن ہسپتال لاڑکانہ میں ایچ آئی وی/ایڈز کا علاج کا سینٹر قائم کیا گیا۔

علاوہ ازیں محکمہ صحت اور ہیلتھ کیئر کمیشن سندھ نے ضلعی انتظامیہ کے تعاون سے غیر منظور شدہ لیبارٹریز اور بلڈ بینکس بھی بند کروادیے۔

اس کے ساتھ رپورٹ میں مزید چھپے ہوئے کیسز دریافت کرنے کے لیے تعلقہ ہیڈکوارٹر ہسپتال رتو ڈیرو میں مزید اسکریننگ کیمپ کے قیام کی بھی تجویز دی گئی، اس کے ساتھ ایڈز کے پھیلاؤ کے بارے میں آگاہی فراہم کرنے اور متاثرہ افراد کے قرینی رشتہ داروں کے ٹیسٹ کرنے کی بھی تجویز دی گئی۔

اس کے ساتھ شناخت کیے گئے کیسز کی ایس اے سی پی کے ذریعے کیس مینجمنٹ، فالو اپ اور ضلعی صحت کے حکام اور ایچ آئی وی پروگرام کے درمیان روابط اور تعاون تشکیل دینے کی ضرورت پر بھی زور دیا گیا۔

کراچی (ایمرا نیوز آن لائن)
اسٹاک مارکیٹ کو بحران سے نکالنے کیلیے 20ارب روپے کا خصوصی فنڈ قائم کردیاگیا۔ اسٹاک مارکیٹ کو بحران کی صورت میں امداد کیلیے 20ارب روپے سے خصوصی فنڈ قائم کردیاگیا اس طرح اسٹاک بروکرز کا دیرینہ مطالبہ پورا کردیاگیا، یہ فیصلہ مشیرخزانہ ڈاکٹر عبدالحفیظ شیخ کی پاکستان اسٹاک ایکسچینج کے ڈائریکٹرز اور اسٹاک بروکرزسے ملاقات میں کیاگیا۔

ذرائع سے معلوم ہوا کہ فنڈ کا انتظام سرکاری مالیاتی ادارہ نیشنل انویسٹمنٹ ٹرسٹ(این آئی ٹی) سنبھالے گا۔ این آئی ٹی فنڈ سے اسٹاک مارکیٹ میں لسٹڈ سرکاری اداروں کے حصص کی خریداری کرکے بحران کی صورت میں کردار اداکرے گا۔

کراچی (میڈیا 92 نیوز آن لائن ) اسٹاک مارکیٹ میں مسلسل مندی کے بعد حکومت حرکت میں آگئی۔

ذرائع کے مطابق گورنر ہاؤس کراچی میں گزشتہ دور روز میں مسلسل مشیرخزانہ حفیظ شیخ اور پاکستان اسٹاک ایکسچینج کے ایک وفد کے درمیان ملاقات ہوئی جس میں بڑے بروکرز شامل تھے۔

ذرائع نے بتایاکہ حکومت نے مارکیٹ میں مسلسل مندی کے بعد اہم اقدام اٹھایا ہے اور مشیر خزانہ نے مارکیٹ کو سنبھالنے کے تمام اقدامات کی منظوری دے دی۔

ذرائع نے مزید بتایا کہ بروکرز نے مشیر خزانہ کو کچھ تجاویز پیش کیں جسے انہوں نے قبول کرلیا۔

ذرائع کے مطابق نیشنل انویسمنٹ ٹرسٹ کے ذریعے 20 ارب روپے کا فنڈ بھی فراہم کیا جائے گا۔

ذرائع کا کہناہےکہ حکومت کے اس اقدام سے مارکیٹ کو سہارا ملے گا۔

گزشتہ 9 ماہ میں پاکستان اسٹاک ایکسچینج میں 10 ہزار پوائنٹس کی کمی واقع ہوئی جس سے سرمایہ کاروں کے 1892 ارب روپے ڈوب گئے۔

رواں ہفتے کاروباری دن کے آخری روز بھی 100 انڈیکس میں 804 پوائنٹس کی کمی رہی اور پاکستان اسٹاک ایکسچینج کو 33 ہزار 166 پر بند کردیا گیا

لاہور(میڈیا 92 نیوز ) پہلے پاکستانی انجینئرزکونوکریاں دیں، پاکستان نے عالمی کمپنیوں کےلیے کاروبار کو مقامی ہنرمندوں کو نوکریاں دینے سے مشروط کردیاہے۔ ۔وزیرسائنس اینڈ ٹیکنالوجی فواد چوہدری نے کہا ہے کہ یہ پابندی پاکستان کی جاب مارکیٹ کے مفاد میں ہے۔

وفاقی وزیر سائنس اینڈ ٹیکنالوجی فواد چودھری نے کہا ہے پاکستان میں کام کرنے والی بین الاقوامی کمپنیوں کومقامی انجینئرز اور تکنیکی ورکرز کو نوکریاں دینا ہونگی،ماہرین کی عدم دستیابی کی صورت میں انہیں غیر ملکی انجینئرز اورتکنیکی ورکرز لانے کے لیےانجینئرنگ کونسل سے اجازت لینا ہوگی۔

فواد چودھری نے یہ بات سماجی رابطے کی ویب سائٹ پر اپنے ٹویٹ پیغام میں کہی ۔ انہوں نے کہا کہ بین الاقوامی کمپنیوں کوہدایات جاری کیں ہیں کہ جو بین الاقوامی کمپنیاں پاکستان میں کاروبارکرناچاہتی ہیں،وہ پاکستانی انجینرز اور تکنیکی ورکرز کو نوکریاں دیں ۔

بین اللقوامی کمپنیاں جو پاکستان میں کاروبارکرناچاہتی ہیں ان کو پاکستانی انجینرز اور تکنیکی ورکرز کو نوکریاں دینا ہوں گی،اگر مخصوص مہارت پاکستان میں دستیاب نہیں اور باہر سے لوگ لانا ضروری ہیں تو انجینرنگ کونسل سے عارضی رجسٹریشن لینی ہو گی یہ پابندی پاکستان کی جاب مارکیٹ کا مفاد ہے

وزیر سائنس اینڈ ٹیکنالوجی فواد چودھری نے کہا اگر مخصوص مہارت پاکستان میں دستیاب نہیں ہے اور بیرون ممالک سے ماہر لوگوں کو لانا ضروری ہے تو بین الاقوامی کمپنیوں کو انجینئرنگ کونسل سے عارضی رجسٹریشن لینا ہو گی۔ انہوں نے کہا کہ یہ پابندی پاکستان کی جاب مارکیٹ کا مفاد ہے۔

اسلام آباد (نیٹ نیوز) چھیاسٹھ سالوں میں سونے کی فی تولہ قیمت 85روپے سے بڑھ کر 70ہزار روپے تولہ سے تجاوز کر گئی ہے۔ تفصیلات کے مطابق قیام پاکستان کے بعد سونے کی مارکیٹ متزلزل رہی‘ البتہ 1952ء میں سونے کی قیمت

87روپے فی تولہ رہی۔ 1954ء تک پاکستان میں سونا 100روپے تولہ سے کم رہا۔ 1972ء میں سونے کی ملکی تاریخ میں قیمت پہلی بار 200روپے تولہ سے تجاوز کر کے 246روپے تولہ ہو گئی۔ اسی کے ساتھ سونے کی ایک تولے کی قیمت کو پر

لگ گئی۔ 1972ء میں سونے کی قیمت 246روپے فی تولہ‘ 1973ء میں دوگنی قیمت 432روپے فی تولہ ہو گئی۔ 1979ء میں سونے کی فی تولہ قیمت 714روپے سے یکسر بدل کر پہلی بار 1230روپے فی تولہ ہو گئی۔ 1982ء تک سونے کی فی تولہ

قیمت 1636روپے تک رہی مگر 1984ء میں فی تولہ قیمت 2244روپے فی تولہ ہو گئی۔ سونے کی فی تولہ قیمت پہلی بار 68ہزار روپے فی تولہ تک پہنچ گئی۔

اسلام آباد(نیٹ نیوز)اسٹاک مارکیٹ مندی‘دوبرس میں سرمایہ کاروں کے 2630ارب ڈوب گئے۔اسٹاک مارکیٹ کے ماہر عارف حبیب کا کہنا ہے کہ سیاسی غیر یقینی اورحکومت کے وقت پر فیصلے نہ کرنے کی وجہ سے اسٹاک مارکیٹ کونقصان ہوا۔تفصیلات کے مطابق،پاکستان اسٹاک مارکیٹ نے سیاسی غیر یقینی اور حکومت کی مبہم مالی پالیسی کی بھاری قیمت ادا کی ہے۔اسٹاک مارکیٹ کے اعداد وشمار کے تجزیے سے یہ بات سامنے آئی ہے کہ گزشتہ دو برس میں سرمایہ کار 2630ارب

روپے کا خسارہ اٹھا چکے ہیں ، جس میں سے 1758ارب روپےکا خسارہ پی ٹی آئی حکومت کے ابتدائی دس ماہ میں ہوا ہے۔اسٹاک مارکیٹ کے ماہر عارف حبیب کا کہنا ہے کہ سیاسی غیر یقینی اور حکومت کے وقت پر فیصلے نہ کرنے کی صلاحیت کی وجہ سے اسٹاک مارکیٹ کو بھاری قیمت ادا کرنا پڑی ہے۔ان کا مزید کہنا تھا کہ بلند شرح سود اور شرح مبادلہ کی وجہ سے بھی سرمایہ کاری میں کمی واقع ہوئی ہے۔پاکستان اسٹاک ایکسچینج کی ویب سائٹ پر موجود اعداد وشمار سے ظاہر ہوتا ہے کہ جون 2017سے 2630ارب روپے کا خسارہ ہوچکا ہے۔جس میں سے 1758ارب روپے یعنی 67فیصد خسارہ 17اگست،

2018سے 13مئی،2019کے دوران ہوا۔اسٹاک ایکسچینج میں یکم جون،2017سے 13مئی ،2019تک مجموعی غیر ملکی فروخت 75اعشاریہ11ارب روپے (636 اعشا ر یہ 93ملین ڈالرز)رہی۔نیشنل کلیئرنگ کمپنی آف پاکستان
لمیٹڈ(این سی سی پی ایل)کی ویب سائٹ پر موجود معلومات کے مطابق، غیر ملکیوں کی جانب سے مجموعی فروخت کا 39فیصد یعنی 29اعشاریہ36ارب روپے (236اعشاریہ9ملین ڈالرز)17اگست 2018 کے بعد رہی۔یہاں یہ بتانا بھی ضروری ہے کہ یکم جون 2017سے 13مئی،2019تک کراچی اسٹاک ایکسچینج کے 100انڈیکس میں مجموعی طور پر 14064پوائنٹس کی

کمی ریکارڈ کی گئی(یکم جون 2017 کو یہ 48780 اور 13مئی،2019کو 33900پوائنٹس رہا)۔قابل ذکر بات یہ ہے کہ مجموعی کمی کا 28اعشاریہ83فیصد گزشتہ دو برس کے دوران ریکارڈ کیا گیا۔یکم جون ،2017کو مارکیٹ میں تمام شیئرز کی سرمایہ کاری 9757اعشاریہ04ارب روپے ریکارڈ کی گئی تھی جو کم ہوکر 7126اعشاریہ36ارب روپے تک پہنچ گئی۔جس سے واضح ہوتا ہے کہ گزشتہ دو برس میں مارکیٹ سرمایہ میں 2630اعشاریہ67ارب روپے کی کمی واقع ہوئی۔

اسلام آباد / کراچی ( نیٹ‌نیوز) وزیراعظم عمران خان نے روپے کی قدر میں کمی کا نوٹس لیا ہے اور اب مہنگا ڈالر بیچنے والوں کیخلاف کارروائی ہوگی اور ایس ای سی پی مقررہ ریٹ سے زیادہ پر کرنسی فروخت کرنے والی کمپنیوں کے ساتھ رعایت نہیں کرے گی۔یہ فیصلہ وزیراعظم کی زیر صدارت اجلاس میں کیا گیا جس میں گورنر اسٹیٹ بینک، چیئرمین ایف بی آر، ڈی جی آئی بی نے شرکت کی ۔ ادھر آئی ایم ایف معاہدے کے بعد کرنسی مارکیٹ میں افواہوں کی بھر مار اور اوپن

مارکیٹ سے ڈالر غائب ہونے کی وجہ سے ڈالر نے ایک بار پھر اونچی اُڑان بھرلی اور مارکیٹ میں ملکی تاریخ کی بلند ترین سطح 146.25؍ پر پہنچ گیا تاہم حکومتی مداخلت اور دباؤ پر واپسی 144پر آگیا۔ادھر آئی ایم ایف سے معاہدے کے بعد اوپن مارکیٹ میں روپے کی بے قدری کی سلسلہ جاری اور گزشتہ 3؍ روز میں ڈالر کی قدر میں 4؍ روپے کا اضافہ ہوا ہے ، انٹر بینک میں قیمت 141.93؍ روپے رہی۔ دریں اثناء وزیراعظم عمران خان سےملاقات میں فاریکس ایسوسی ایشن نے ڈالر کی بڑھتی قدر روکنے کیلئے بیرون ملک جانے والے پاکستانیوں کیلئے ڈالر کی حد 10ہزار ڈالر سے کم کر کے 3ہزار کرنے

جبکہ بینکنگ چینل سے سرمایہ کاروں کو بیرون ملک ڈالر منتقل کرنے پر رکاوٹیں لگانے کی تجویز دی ہے۔ تفصیلات کے مطابق روپے کے مقابلے میں غیر ملکی کرنسیوں کی قدر میں اضافے کے حوالے سے بدھ کو وزیراعظم عمران خان کی زیرصدارت اعلیٰ سطح اجلاس ہوا جس میں چیئرمین ایف بی آر، گورنر اسٹیٹ بینک، ڈی جی ایف آئی اے اور ڈی جی آئی بی کے علاوہ سیکورٹی اینڈ ایکسچینج کمیشن آف پاکستان کا وفد بھی شریک ہوا۔ اجلاس میں ایمنسٹی اسکیم کے تحت اثاثے ظاہر نہ کرنے والوں کے خلاف مجوزہ کارروائی پر بھی غور کیا گیا۔اجلاس کے دوران دی گئی بریفنگ میں بتایا گیا کہ ڈالر کی مارکیٹ قیمت خرید 143؍ روپے 50؍ پیسے جبکہ قیمت فروخت 144؍ روپے ہےاجلاس میں فیصلہ کیا گیا کہ طے شدہ کرنسی

ریٹ سے انحراف کرنے والی کمپنیوں کو کوئی رعایت نہیں دی جائے گی، مارکیٹ سے زائد ڈالر فروخت کرنے والی ایکسچینج کمپنیوں کیخلاف سخت کارروائی کی جائے گی۔ اس سے قبل آئی ایم ایف معاہدے کے بعد کرنسی مارکیٹ میں افواہوں کی بھر مار ، اوپن مارکیٹ سے ڈالر غائب اور ڈالر کی قیمت میں اضافےکی افواہوں پر بدھ کو اوپن مارکیٹ میں ایک موقع پر ڈالر 2سے ڈھائی روپے بڑھ گیا اور اس کی قیمت146.25؍ روپے تک پہنچ گئی لیکن پھر حکومتی مداخلت اور دباؤ پر واپس 144روپے پر آگیا ،ڈیلرز کا کہنا ہے کہ بے یقینی کی وجہ سے مارکیٹ میں ڈالر کے خریدار تو ہیں لیکن فروخت کرنے والے غائب ہیں جس کی وجہ سے ڈالر بلیک مارکیٹ میں فروخت ہو رہا ہے ،ایکسچینج کرنسی ایسوسی ایشن کے ظفر پراچہ کے مطابق جب تک آئی ایم ایف سے معاہدے کی شرائط سامنے نہیں آتی مارکیٹ میں بے یقینی رہے گی ،حکومت کو چاہے کہ

وہ آئی ایم ایف سے معاہدے کو سامنے لے آئے یہ ملک اور کرنسی مارکیٹ کے لیے اچھا ہے اس سے افواہیں بھی ختم ہو نگی ،معیشت کو بھی استحکام ملے گا کیونکہ لوگ بزنس کی درست منصوبہ بندی کر سکیں گے ،انھوں نے تسلیم کیا کہ بدھ کی صبح ڈالر 146 روپے سے بڑھ گیا لیکن بعد ازاں یہ 144پر بند ہوا ۔ دریں اثنا ،فاریکس ایسوسی ایشن آف پاکستان کے جاری کردہ اعدادوشمار کے مطابق بدھ کو انٹربینک مارکیٹ میں ڈالرکی قیمت میں3پیسے کی کمی ریکارڈ کی گئی جس کے نتیجے میں ڈالر کی قیمت خرید 141.40؍ روپے سے گھٹ کر 141.37؍ روپے اور قیمت فروخت 141.50؍ روپے سے گھٹ کر 141.47؍ روپے ہوگئی۔ اوپن کرنسی مارکیٹ میںپاکستانی روپے کے مقابلے میں امریکی ڈالر کی قیمت خرید30پیسے کا اضافہ اور قیمت فروخت میں استحکام رہا جس کے نتیجے میں امریکی ڈالر کی قیمت خرید 143.20؍ روپے سے بڑھ کر 143.50؍

روپے اور قیمت فروخت 143.95؍ روپے پرمستحکم رہی ۔ دریں اثناء فاریکس ایسوسی ایشن نے حکومت کو ڈالر کی بڑھتی قدر روکنے کے لیے بیرون ملک جانے والے پاکستانیوں کے لیے ڈالر کی حد 10ہزار ڈالر سے کم کر کے 3ہزار کرنے جبکہ بینکنگ چینل سے سرمایہ کاروں کو بیرون ملک ڈالر منتقل کرنے پر رکاوٹیں لگانے کی تجویز دے دی ہے،فاریکس ایسوسی ایشن کے وفد نے بدھ کو وزیر اعظم عمران خان سے ملاقات کی اور ملک کے زر مبادلہ ذخائر بڑھانے پر تبادلہ خیال کیا ،ایسوسی ایشن کے صدر ملک بوستان نے جنگ سے بات چیت کرتے ہوئے کہا کہ ہم نے وزیر اعظم کو تجویز دی ہے کہ فارن ایکس چینج باہر لے جانے کی حد 10ہزار ڈالر سے کم کر کے 3ہزار کر دی جائے اس سے ڈالر کی بیرون ملک منتقلی کم ہو گی ۔

کراچی (میڈیا 92 نیوز آن لائن ) اوپن مارکیٹ میں ڈالر ڈھائی روپے بڑھنے کے بعد ملکی تاریخ کی بلند ترین سطح 146 روپے 25 پیسے پر پہنچا لیکن کاروبار کے اختتام پر پھر نیچے آگیا۔

ایکسچینج کرنسی ایسوسی ایشن کے مطابق اوپن مارکیٹ میں ڈالر 2.25 روپے مہنگا ہو کر ملکی تاریخ کی بلند ترین سطح 146 روپے 25 پیسے پر پہنچا۔

جب کہ انٹر بینک میں ڈالر کی قیمت 141.93 پیسے پر رہی۔

ایکس چینج کرنسی ایسوسی ایشن آف پاکستان کے مطابق کاروبار کے اختتام پر ڈالر واپس 144 روپے پر آ گیا۔

واضح رہےکہ حکومت اور آئی ایم ایف کے درمیان معاہدے سے قبل ڈالر کی قدر 141 سے 142 کے درمیان رہی جب کہ آئی ایم ایف سے معاہدے کےبعد ڈالر کی قدر میں مزید اضافے کا امکان ہے۔

اس کے علاوہ صدارتی آرڈیننس جاری ہونے کے بعد ملک بھر میں ایمنسٹی اسکیم بھی نافذ ہوگئی ہے۔