Category بزنس

کراچی(میڈیا پاکستان) رشین فیڈریشن کے تجارتی نمائندے یورے کوزلو نے کراچی چیمبر کے دورے کے موقع پر کہا ہے کہ پاکستان اور روس کے درمیان تجارت و سرمایہ کاری کے تعاون میں اگرچہ بہتری رونما ہوئی ہے لیکن یہ بہتری اس وقت تک مستحکم نہیں ہوسکتی کہ جب تک دونوں ممالک اپنی اپنی معیشت کے مختلف شعبوں میں تعاون کے مواقع تلاش نہ کریں۔یورے کوزلو نے کہاکہ روس توانائی کے شعبے، تعمیرات و صنعتی مشینری، کان کنی، ریلویز انجینئرنگ، فارماسیوٹیکل مصنوعات، طبی آلات، ایل ای ڈی لائٹ سسٹم، فرٹیلائزر و کیمیکلز، واٹر مینجمنٹ، ایری گیشن کی سہولت، خودکار ہوائی جہاز، ڈرونز وغذائی اشیا سمیت دیگر شعبوں میں تجارت اور سرمایہ کاری کو فروغ دینے کا خواہش مند ہے، دونوں ملکوں کے مابین تجارتی وفود کے تبادلے میں بہتری آئی ہے لیکن تجارت و سرمایہ کاری کے فروغ کے لیے مزید تجارتی وفود کے تبادلے کی ضرورت ہے۔
انہوں نے کراچی چیمبر کو مشورہ دیا کہ روسی تاجروں کے ساتھ دوطرفہ تجارت کو فروغ دینے اورتجارت کی راہیں تلاش کرنے کے لیے روس کے دورے کے لیے تجارتی وفد تشکیل دے۔ انہوں نے کراچی چیمبر کی جانب سے دونوں ملکوں کے درمیان براہ راست بینکنگ سہولت نہ ہونے سے تجارت میں رکاوٹ کو دور کرنے پر اتفاق کرتے ہوئے کہاکہ براہ راست بینکنگ سہولت کا نہ ہونا واقعی مسئلہ ہے جس پر دونوں جانب سے توجہ دی جانی چاہیے۔
یورے کوزلو نے بتایا کہ روس پہلے ہی شمالی و جنوبی گیس پائپ لائنز کی تعمیر میں تعاون اور جامشورو پاور پلانٹ میں خدمات فراہم کررہاہے تاہم تعاون کے اس عمل کو معیشت کے دیگر شعبوں تک بڑھانے کی ضرورت ہے۔ انہوں نے 150 روسی کمپنیوں کی تفصیلات پر مشتمل سی ڈی چیمبرکے صدر کو پیش کرتے ہوئے کہاکہ یہ تمام کمپنیاں پاکستان میں مواقع تلاش کرنے کی خواہش مند ہیں۔
قبل ازیں کے سی سی آئی کے صدر مفسر عطا ملک نے روس کے تجارتی نمائندے کا خیرمقدم کرتے ہوئے کہاکہ چیمبر روس کے ساتھ دوطرفہ باہمی تجارت کے فروغ اور نئی راہیں تلاش کرنا چاہتا ہے، روس جیسے ممالک کے ساتھ تجارت کے فروغ اور تعلقات میں بہتری سے پاکستان کو درپیش مختلف معاشی چیلنجز سے نمٹنے میں خاطر خواہ مدد ملے گی جو دونوں ملکوں کے لیے فائدے مند ہے۔ انہوں نے کہاکہ روس کی ڈبلیو ٹی او تک رسائی سے پاکستان اور روس کے درمیان تجارت کو فروغ دینے کے کافی مواقع میسر آئیں گے۔
مفسر عطا ملک نے کہاکہ کئی ممالک چائنا پاکستان اقتصادی راہداری منصوبے میں دلچسپی کا اظہار کرتے ہیں جو علاقائی اقتصادی انضمام کو بہتر بنانے کے علاوہ سرمایہ کاروں کو 10سال تک ٹیکس فری سہولت فراہم کرے گا لہٰذا روسی سرمایہ کاروں کو اس صورتحال سے ضرور فائدہ اٹھانا چاہیے، اس مقصد کے لیے سی پیک سے منسلک منصوبوں میں سرمایہ کاری یا جوائنٹ وینچرزکیے جاسکتے ہے، پاکستان بھی ٹیلی کمیونی کیشن، ایری گیشن، اٹامک انرجی، ٹرانسپورٹ اور انفرا اسٹرکچر و دیگر شعبوں میں روس سے تعاون حاصل کرسکتا ہے۔

کراچی(میڈیا پاکستان) اسٹیٹ بینک آف پاکستان نے کہا ہے کہ ملک کو مستقبل قریب میں پانی کی شدید قلت کاسامنا ہوگا۔اسٹیٹ بینک نے معاشی جائزہ رپورٹ برائے مالی سال 2016-17 میں پائیدار بنیادوں پر پانی کی فراہمی کی راہ میں حائل رکاوٹوں کا احاطہ کرتے ہوئے آنے والے خطرے سے خبردار کرتے ہوئے موثر حکمت عملی اورکثیر جہتی اقدامات کی ضرورت پر زور دیا ہے۔
اسٹیٹ بینک نے اپنی رپورٹ میں پانی کے بحران اور مستقبل قریب میں پیدا ہونے والی شدید قلت سے نمٹنے کیلیے موثر پالیس اصلاحات کی ضرورت پر زور دیاہے، بھارت، بنگلہ دیش، سری لنکا اور نیپال میں نیشنل واٹر پالیسی کئی دہائیوں سے نافذہے جس کے تحت پانی کی بچت، ذخیرہ اور تقسیم کے اہداف وفاق اور دیگر سطح پر حاصل کیے جارہے ہیں تاہم پاکستان میں تاحال نیشنل واٹر پالیسی تیار نہ کی جاسکی جس کا مسودہ 2003میں تیارکیے جانے کے باوجود مشترکہ مفادات کی کونسل کی منظوری کا منتظر ہے۔
مرکزی بینک نے کہا ہے کہ پانی کے نظام سے متعلق موجودہ پالیسیاں درپیش چیلنجز کا مقابلہ نہیں کرسکتیں پاکستان نیشنل واٹر پالیسی کے اجراء میں مزید تاخیر کا متحمل نہیں ہوسکتا اور 2030تک پاکستان کا شمار دنیا میں پانی کی قلت سے دوچار 33سرفہرست ملکوں میں کیا جائے گا۔ پاکستان میں گزشتہ چاردہائیوں کے دوران پانی کی کوئی نئی ذخیرہ گاہ تعمیر نہیں ہوئی جس کی وجہ سے نہری نظام میں پانی کی کمی کا سامنا ہے اور پانی کی وافر مقدار سمندر برد ہو رہی ہے، پاکستان میں پانی ذخیرہ کرنے کی مجموعی گنجائش 15.75ملین ایکٹ فٹ سالانہ ہے جو کم ہوکر 13.7 ملین ایکڑ فٹ کی سطح پر آگئی ہے۔

بیجنگ(میڈیا پاکستان) چین نے 13سال کے بعد ڈالر بانڈ فروخت کرنے کااعلان کردیا ہے۔وزارت خزانہ کے مطابق 2ارب ڈالر کے 2 بانڈز فروخت کیے جائیں گے،5سالہ مدت کے بانڈ کی فروخت سے 1ارب ڈالر اور اتنے ہی 10 سالہ نوٹس بیچ کر حاصل کیے جائیں گے، یہ نیلامی ہانگ کانگ میں ہوگی۔ واضح رہے کہ چین نے اس سے پہلے آخری ڈالر بانڈ 2004 میں جاری کیا تھا۔

دبئی(میڈیا پاکستان) بین الاقومی مالیاتی فنڈ نے کہا ہے کہ تیل کی قیمتوں میں کمی کے نتیجے میں کم آمدن کے باعث مشرقی وسطیٰ کی معیشتیں بری طرح متاثر ہوئی ہیں جب کہ مشرق وسطیٰ کے سرفہرست تیل برآمدکنندہ ممالک کی اقتصادی ترقی میں کمی سے پورے خطے کے اقتصادی منظرنامے پر دباؤ بڑھ گیا ہے۔
گزشتہ روز جاری ورلڈ اکنامک آؤٹ لک نامی رپورٹ میں آئی ایم ایف نے کہاکہ رواں سال ایران کی معاشی نمو 3.5 فیصد رہ جائے گی جو 2016 میں 12.5 فیصد تک بڑھ گئی تھی، عراقی معیشت 0.4 فیصد سکر جائے گی، گزشتہ سال اس نے 11فیصد کی ٹھوس رفتار سے ترقی کی تھی، سعودی معیشت جمود کا شکار رہے گی، اس کا 2016 میں گروتھ ریٹ 1.7فیصدتھا، کویتی معیشت 2.1فیصد سکڑے گی۔
متحدہ عرب امارات اور الجزائر کی معشتیں ترقی کریں گی، مجموعی طور پر ایران، عراق، الجزائر اور جی سی سی ممالک پر مشتمل خطہ 1.7فیصد کی رفتار سے ترقی کرے گا، گزشتہ سال خطے نے 5.6 فیصد کی رفتار سے ترقی کی تھی جبکہ مینا کے خطے میں گروتھ ریٹ 5.1فیصد سے گھٹ کر 2.2 فیصد رہ جائے گا۔

لاہور(میڈیا پاکستان) پاکستان کے بیرونی قرضے 83ارب ڈالرسے بڑھ گئے، بیرونی قرضوں کی ادائیگی اور اخراجات پورے کرنے کیلیے پاکستان کو 21ارب ڈالرقرض لینا پڑیگا۔اقتصادی ماہرین نے دسمبر کو معاشی اعتبارسے ملکی تاریخ کا سخت ترین مہینہ قرار دیدیا، انہوں نے بتایا کہ اگر ہم نے سخت اقدامات نہ اٹھائے تو آئندہ 6 ماہ میں بدترین معاشی بحران کا شکار ہوجائیں گے۔ واضح رہے کہ 9ماہ میں غیرملکی قرضوں میں 9 ارب ڈالر کا اضافہ ہوا۔

اسلام آباد(میڈیا پاکستان)ایف بی آرنے ٹیکس چوری میں ملوث لاہور کی اسٹیل ملز کے مالک محمد افتخارکو گرفتار کرلیا جبکہ واجبات15 کروڑ روپے کے واجبات کی ریکوری کیلیے اس کے بینک اکاؤنٹس منجمد اور جائیداد ضبط کرکے نیلام کرنے کی کارروائی شروع کرنے کا فیصلہ کیا ہے۔ایف بی آر کے سینئر افسر نے ذرائع کو بتایا کہ ریجنل ٹیکس آف لاہور کی جانب سے 2013 میں تابش اسٹیل فرنس کی جانب سے کروڑوں روپے کی ٹیکس چوری کا کیس پکڑ کر ایف آئی درج کی گئی تھی اوراس کیس میں تحقیقات کیلیے ڈپٹی کمشنر انٹیلی جنس انویسٹی گیشن اینڈ پراسیکیوشن آر ٹی او لاہور محمد عمران کی سربراہی میں اعلی سطح کی ٹیم تشکیل دی گئی تھی۔
ذرائع کا کہنا ہے کہ مذکورہ ٹیم نے تابش اسٹیل فرنس کیس میں تحقیقات مکمل کرکے ٹیکس واجبات کا تعین کیا اور تحقیقات کے دوران ملزم کی جانب سے 7 کروڑ 45 لاکھ روپے سے زائد کی ٹیکس چوری ثابت ہوئی ہے۔ کیس اسپیشل جج کسٹمز ،ٹیکسیشن اینڈ انسداد اسمگلنگ سردار طاہر صابر کی عدالت میں زیر سماعت تھا ، فاضل جج نے شواہد، گواہوں کے بیانات اور تحقیقاتی رپورٹ کی روشنی میںپیر کو تابش اسٹیل فرنس نامی اسٹیل ملز کے مالک محمد افتخار کی ٹیکس چوری ثابت ہونے پر 3 سال قید اور چوری کردہ7 کروڑ45 لاکھ 34 ہزار 989 روپے کے ٹیکس کی رقم کے برابر جرمانہ عائد کرنے کی سزا سنائی۔
مذکورہ افسر نے بتایا کہ عدالت کے فیصلے پر ایف بی آر کی تحقیقاتی ٹیم نے محمد افتخارکو گرفتار کر کے جیل بھجوادیا اورعدالتی حکم پر ملزم سے 14 کروڑ 90لاکھ 69 ہزار روپے سے زائد کی چوری کردہ ٹیکس اور جرمانے کی رقم وصول کرنے کیلیے قانونی کارروائی کافیصلہ کیا ہے۔
ذرائع کے مطابق مذکورہ رقم وصول کرنے کیلیے ملزم اور اس کے کاروباری یونٹ کے بینک اکاؤنٹ منجمد کیے جائیں گے اور جائیداد ضبط کرکے نیلام کی جائیگی جس کیلیے جلد کارروائی شروع کر دی جائیگی۔ ذرائع کے مطابق مذکورہ ملزم نے ٹیکس چوری کرنے کیلیے ایف بی آر کو ارشد نامی ٹھیکیدار کے ساتھ جعلی معاہدہ پیش کرکے یہ ظاہر کررکھا تھا کہ ارشد نامی شخص مل چلا رہا ہے جو خلاف حقیقت تھا، مل کا بجلی کا ماہانہ بل اوسطاً 90 لاکھ روپے تھا جبکہ تحقیقات کے دوران یہ ثابت ہوگیا کہ محمد افتخار ہی مل کا اصل مالک ہے اورمعاہدہ جعلی تھا جو ٹیکس چوری کی نیت سے کیا گیا تھا۔

کراچی (میڈیا پاکستان) نواز شریف کی برطرفی سے سیاسی عدم استحکام میں اضافہ ہوا ، آئندہ الیکشن معاشی اصلاحات کا عمل متاثر کرسکتے ہیں ۔ ورلڈ بینک نے مالی سال 2018 کے چیلنجزکی نشاندہی کر دی ، ورلڈ بینک نے مالی سال 2018 میں پاکستان کی معیشت کو درپیش چیلنجز پر جامع رپورٹ جاری کر دی ہے ۔ رپورٹ میں کہا گیا ہے کہ سابق وزیر اعظم میاں محمد نواز شریف کی برطرفی اور سیاسی تبدیلوں سے معاشی پالیسوں میں عدم استحکام پیدا ہوا ۔ رپورٹ میں کہا گیا ہے کہ آئندہ الیکشن معاشی اصلات کا عمل متاثر کرسکتے ہیں جس کے باعث معاشی ترقی کی شرح میں سست روی اور سرمایا کاری گھٹ جانے کا خدشہ ہے ۔
بگڑتے معاشی حالات قرضوں کا بوجھ مزید بڑھا سکتے ہیں جبکہ جاری کھاتوں کا خسارہ زرمبادلہ کے ذخائر پر اثر انداز ہوگا ۔ ورلڈ بینک کا مزید کہنا ہے کہ الیکشن کے باعث محصولات میں کمی کا خدشہ ہے جبکہ مالی سال 19-2018 میں ملکی برآمدات میں اضافہ اور درآمدات کم ہونے کا امکان ہے ۔ دوسری جانب عالمی منڈی میں خام تیل کی قیمتیں بڑھ جانے سے مہنگائی کی شرح میں اضافہ ہوسکتا ہے ۔

اسلام آباد(میڈیا پاکستان) نیشنل ہائی وے اتھارٹی (این ایچ اے) کی جانب سے 230 کلومیٹر لاہور ملتان موٹروے (ایم تھری) منصوبے پر 60 فیصد تعمیراتی کام مکمل کر لیا گیا جب کہ منصوبہ اپریل 2018 تک مکمل کر کے عوام کیلیے کھول دیا جائیگا۔لاہور ملتان موٹروے کی تکمیل سے لاہور کا ملتان سے فاصلہ 5 گھنٹے سے کم ہو کر 3 گھنٹے رہ جائے گا۔ اس وقت ملک بھر میں 13 کے قریب موٹرویز پر کام جاری ہے جن میں سے3 منصوبے مکمل ہو چکے ہیں اور 9 تعمیر کے مختلف مراحل میں ہیں۔ لاہور ملتان موٹر وے ایم 4 عبدالحکیم کے مقام پر لنک کریگی، منصوبے پر لاگت 148.6 ارب روپے آئیگی۔
این ایچ اے کی جانب سے کام کی رفتار تیز کرنے کی ہدایت کی گئی ہے، اس موٹروے کو اگست 2018 میں مکمل ہونا تھا تاہم مقررہ مدت سے 4ماہ قبل منصوبے کی تکمیل متوقع ہے، دوسری جانب لاہور تا سیالکوٹ موٹروے پر کام بھی تیزی سے جاری ہے اور یہ بھی اگست 2018 تک مکمل ہو جائیگا، کراچی حیدرآباد اور ہزارہ موٹروے پر کام مکمل ہو چکا۔

اسلام آباد(میڈیا پاکستان) ملک میں بجلی کی پیدوار کے شعبے اور انرجی مکس کو بہتر بنانے کے لیے وفاقی حکومت نے نیشنل الیکڑک سٹی پالیسی بنانے کا منصوبہ تیار کیا ہے جس کے لیے مشترکہ مفادات کونسل سے منظوری لی جائے گی۔دستاویز کے مطابق نئی الیکڑک سٹی پالیسی اور الیکڑک سٹی پلان مییں ملک میں بجلی کی پیدوار کے لیے موجود وسائل کو بہتراور موثر طریقے سے استعمال کرنے کے لیے اقدامات تجویز کیے جائیں گے۔ نئے الیکڑک سٹی پلان میں تمام صوبائی حکومتوں اور سی سی آئی کی منظوری لی جائے گی۔
اس سے قبل نیشنل پاور پالیسی میں صرف پاور سیکٹر کو آپریشنل کرنے کے لیے تیار کی گئی تھی۔ پاورپالیسی میں توانائی کے شعبے میں سرمایہ کاری کو راغب کرنے کے لیے اقدامات شامل تھے تاہم جنریشن مکس کو اس میں زیادہ فوکس نہیں کیا گیا تھا۔ نئے الیکڑک سٹی پلان کے تحت تمام وسائل ملک میں موجود مختلف ذرائع کو وقتا فوقتا بہترین طریقے سے بروئے کار لانا ہے اور بجلی کے نرخوں کے نظام کو مزید بہتر بناناہے۔
نئی پالیسی کے تحت قومی اور صوبائی سطح پر بجلی کی ترسیل کے نظام کا آپس میں انضمام بھی کیا جائے گا۔ دستاویزات کے مطابق وفاقی حکومت قومی بجلی پالیسی کی تیاری کے بعد مشترکہ مفادات کونسل سے منظوری لے کر پالیسی میں ترامیم یا نظر ثانی کر سکے گی۔ وفاقی حکومت صوبائی حکومتوں کی مشاورت کے بعد قومی پالیسی کے تحت نیشنل الیکٹرک سٹی پلان تیار کرے گی اور پانچ سال میں ایک بار اس کا نوٹیفکیشن جاری کرے گی۔ نیشنل الیکٹرک سٹی پلان کا مسودہ تمام شراکت داروں کو بھی فراہم کیاجائے گا اور لائسنس یافتہ اور رجسٹرڈ افراد نیشنل الیکڑک سٹی پلان کے حوالے سے اپنی اپنی تجاویز دیں گے۔
دستاویز میں مزید بتایاگیاہے کہ قومی بجلی پالیسی میں اگر کوئی صوبہ کوئی ترمیم تجویز کرتا ہے تواس سلسلے میں وفاقی اور صوبائی حکومت اپنی اپنی آرا دیں گی جس کے بعد ترمیم کرنے یا نہ کرنے کا فیصلہ کیا جائے گا۔ مجوزہ قومی پالیسی کے تحت نیپرا اپنا کردار ادا کرتا رہے گا اور وفاقی حکومت کو اپنی آرا دیتا رہے گا۔ وفاقی حکومت خود بھی نیپرا سے پاور سیکٹر کی بہتری اور اصلاحات کے لیے تجاویز لیتی رہے گی۔
ریگولیشنز ٹرانسمشنز اینڈ ڈسٹری بیوشن آف الیکڑک پاور ایکٹ میں ترمیم کے بعد ایکٹ کے تحت بجلی پیدا کرنے والی کوئی بھی کمپنی پیدا کرنے جنریشن کے لیے لائسنس لیے بغیر بجلی پیدا کر سکتی ہے۔ اس کمپنی کے لیے لازم ہے کہ وہ گرڈ کو فراہم کرنے کے لیے تکنیکی معیارات پر پورا اترتی ہو۔ دستاویز کے مطابق بجلی پیدا کرنے والی کوئی کمپنی اگر ہائیڈل سے بجلی پیدا کرنا چاہتی ہو تو وہ مالی معاملات، جیالوجیکل ہائیدولوجیکل تکنیکی پہلو اور حفاظت اور ماحولیاتی پہلووں سے متعلق تفصیلات اتفاق رائے کے لیے اتھارٹی کو پیش کرے گی۔
اس سلسلے میں پاور ڈویژن کے ایک اعلی افسر نے نام ظاہر نہ کرنے کی شرط پر بتایاکہ نیشنل پاورپالیسی میں سب سے اہم چیز انرجی مکس ہے کہ کن کن وسائل کو کیسے اور کتنا استعمال کیاجائے تاہم اس سے قبل نیشنل پاورپالیسی میں یہ سب کچھ شامل نہیں تھا اور اب اس کو نئے پلان میں شامل کیا جا رہاہے۔
اعلیٰ افسر کے مطابق نئے پلان میں جنریشن پر زیادہ فوکس کیاجائے گا۔ بجلی کی فروخت اور خرید کس قانون کے تحت کیسے ہو گی بیلنس آف پیمنٹس کی صورتحال پر بھی اقدمات نئے پلان میں شامل کیے گئے ہیں۔ اعلیٰ افسر کامزید کہناتھا کہ دنیا کے بہت سے ممالک بشمول بھارت اورچین پالیسی پہلے بنائی جاتی ہے اور اس کے بعد اس پر عمل کیا جاتا ہے تاہم ہمارے ہاں اب اس بات کی ضرورت محسوس کی گئی ہے کہ نیاالیکڑک سٹی پلان تیار کیاجائے۔ اس سلسلے میں جب پاور ڈویژن کے ترجمان سے رابطہ کرنے کی کوشش کی گئی تو ان کا نمبر مسلسل بند جا رہا تھا۔

کراچی(میڈیا پاکستان) بلند عمارتوں کی تعمیرات پر عائد پابندی کے باعث ریئل اسٹیٹ مارکیٹ میں رہائشی وتجارتی یونٹوں کے طلب و رسد کا توازن بگڑگیا ہے اور اس بگڑتے ہوئے توازن سے فی فلیٹ و دکان کی قیمتوں میں 30 تا 50 فیصد کااضافہ ہو گیا ہے جبکہ اگست 2017 میں ہونے والی آباد ایکسپو کے دوران غیرملکیوں کے ساتھ 250 ملین ڈالر کے طے شدہ سرمایہ کاری معاہدوں پر عمل درآمد بھی خطرے میں پڑگیا ہے۔
کراچی میں سیکڑوں بلند عمارتوں کے تعمیراتی منصوبوں کی پلاننگ مکمل ہونے کے باوجود انہیں متعلقہ اداروں ومحکموں سے منظوری نہ ملنے کی وجہ سے تعمیراتی شعبے میں 600 ارب روپے کی متوقع سرمایہ کاری رک گئی ہے جبکہ سول الیکٹرک انجینئرز، ہنر مند وغیرمندمزدوروں کی بڑی تعداد گزشتہ چند ماہ سے بیروزگار ہوگئی ہے۔ذرائع نے بتایاکہ ان عوامل سے دلبرداشتہ ہوکر تعمیراتی شعبے نے مشترکہ طور پر بڑے نوعیت کا احتجاجی لائحہ عمل مرتب کرلیا ہے۔ اس ضمن میں ایسوسی ایشن آف بلڈرز اینڈ ڈیولپرز (آباد) کے چیئرمین عارف یوسف جیوا نے ’’ایکسپریس‘‘ کے استفسار پر تصدیق کی کہ بلند عمارتوں کے تعمیراتی منصوبوں پر پابندی سے بلڈرز اور ڈیولپرز کی کمر ٹوٹ گئی ہے اور ان کا مرتب کردہ سرمایہ کاری پلان بری طرح متاثر ہوا ہے۔
انہوں نے بتایا کہ سندھ بلڈنگ کنٹرول اتھارٹی کے پاس308 بلند عمارتوں کے منصوبوں کے نقشے گزشتہ کئی ماہ سے منظوری کے منتظر ہیں، اگر ان منصوبوں کے نقشوں کی منظوری دے دی جائے تو ریئل اسٹیٹ سیکٹر میں فوری طور پر 600 ارب روپے کی تازہ سرمایہ کاری ممکن ہوگی اور اس کے نتیجے میں رہائشی وکاروباری یونٹ کی قیمتوں میں چند ماہ سے جاری اضافے کا رحجان تبدیل ہو جائے گا۔
عارف یوسف جیوا نے بتایا کہ ایس بی سی اے نے 23مئی 2017 سے ملٹی اسٹوری اور بلند عمارتوں کی کنسٹرکشن پر پابندی عائد کر رکھی ہے اور پابندی کا یہ تسلسل مزید 3 ماہ تک برقرار رکھا گیا تو اس شعبے سے وابستہ مزید 20 لاکھ افراد کا روزگار خطرے میں پڑ جائے گا کیونکہ تعمیراتی سرگرمیاں معمول کے مطابق جاری رہنے سے 70 دیگر ذیلی صنعتی شعبوں کی سرگرمیاں رواں دواں ہوتی ہیں۔
احتجاجی لائحہ عمل سے متعلق عارف جیوا نے بتایا کہ آباد کسی ادارے سے محاذ آرائی یا اس کے خلاف متحرک نہیں بلکہ وہ اپنے اراکین کے بڑھتے ہوئے دباؤ پر مجبور ہے کہ بڑے پیمانے پراحتجاج کرکے اعلیٰ اور دیگر متعلقہ حلقوں تک اپنا یہ پیغام پہنچائیں کہ یہ مسئلہ صرف بلڈرز اینڈ ڈیولپرز کا نہیں بلکہ یہ مسئلہ 70 سے زائد الائیڈ انڈسٹری اور عوامی بقا کابھی ہے۔