Category بزنس

اسلام آباد(میڈیا پاکستان) پاکستان اورویتنام مستقبل میں آزاد تجارتی معاہدہ کرنے کی غرض سے مذاکرات کے لیے ابتدائی فہرستوں کا تبادلہ کرنے پر متفق ہوگئے۔پاکستان اورویتنام کے مشترکہ تجارتی کمیشن کا 2 روزہ اجلاس جمعرات کو ختم ہوگیا جس میں ترجیحی تجارتی معاہدے (پی ٹی اے) کے لیے ابتدائی فہرستوں کے تبادلہ پر اتفاق رائے ہوا، یہ معاہدہ بعدازاں آزادتجارتی معاہدے (ایف ٹی اے) کی راہ ہموار کرے گا اور اس سے دونوں ملکوں کے درمیان تجارت وسرمایہ کاری کو فروغ ملے گا۔ ملاقات کے دوران فریقین نے توانائی، تیل وگیس ٹیکسٹائل، کیمیکل ، انفارمیشن ٹیکنالوجی اور ٹٰیلی کام سمیت دیگر شعبوں میںتعاون کو مزید مضبوط بنانے کے عزم کا اظہار کیا، پاکستان نے ویت نام کو کینو، آم اور گوشت برآمد کرنے میں دلچسپی کا اظہار کیا۔وزارت تجارت کے سینئرافسر کے مطابق پاکستان نے آسیان جیسی ٹیرف رعایتوں کی تجویز دی۔ اس موقع پر ویت نامی نائب وزیرصنعت سے بات چیت کرتے ہوئے سیکریٹری تجارت محمد یونس ڈھاگہ نے کہاکہ پاکستان اور ویت نام کو دوطرفہ تجارت کے فروغ کے لیے آپس میں ترجیحی تجارتی معاہدے کے لیے کام کرنا چاہیے۔ وزارت تجارت اپنی تجارتی سفارتکاری کی کوششوں کو فروغ دے رہی ہے اور تھائی لینڈ ترکی کے ساتھ آزاد تجارت کے معاہدوں کے لیے کام کررہی ہے، چین پاکستان آزاد تجارتی معاہدے کے دوسرے مرحلے کے سلسلے میں مذاکرات کا عمل جاری ہے۔
محمد یونس ڈھاگہ نے بتایاکہ جنوبی کوریا ، جاپان اور ایران کے ساتھ آزاد تجارتی معاہدوں پر بھی کام جاری ہے، وزارت تجارت جامع تجارتی اصلاحی ایجنڈے پر عمل پیرا ہے اور تزویراتی تجارتی پالیسی فریم ورک میں اصلاحات کر رہی ہے، حکومت تجارتی سہولت کے لیے ٹیرف میں کمی کے لیے دیگر اداروں کے ساتھ مل کر نیشنل سنگل ونڈو کے قیام کے لیے کام کر رہی ہے۔
اس موقع پر ویتنامی وزیر نے کہاکہ دوطرفہ تجارت کو مزید فروغ دینے کی گنجائش موجودہے، پاکستان اور ویت نام کو دوطرفہ تجارتی تعاون کو فروغ دینا چاہیے اور اس سلسلے میںتجارتی نمائشوں میں شرکت، تجارتی وفود اور ایوان صنعت وتجارت کے وفود کے تبادلوں کو بڑھاناچاہیے۔

کراچی(میڈیا پاکستان) ایف آئی اے نے غیرملکی کمپنی کی جانب کروڑوں روپے ٹیکس ادائیگی کے بغیر اربوں روپے مالیت کی بھاری مشینری ملک سے باہر لے جانے کی کوشش ناکام بنادی۔میسرز بی جی پی انٹرنیشنل کی جانب آئل اینڈ گیس انڈسٹری کیلیے جاری ہونے والے ایک ایس آر او کی آڑ میں ڈیڑھ ارب روپے سے زائد مالیت کی مشینری چارٹرڈ طیارے کے ذریعے چین بھیج رہی تھی، قواعد کے مطابق ٹیکس ادائیگی کے بغیر مشینری بیرون ملک لے جانے کی میعاد ایک سال قبل ختم ہوچکی تھی تاہم کمپنی کے کلیئرنگ ایجنٹ آئی ایم ٹی کی جانب سے ایس آراو میں جعل سازی کرکے کروڑوں روپے کا ٹیکس بچایا جارہا تھا، ایف آئی اے کی ٹیم نے کراچی کے جناح انٹرنیشنل ایئرپورٹ کے کارگو ٹرمنل پر چھاپہ مارا تو نہ صرف اربوں روپے مالیت کی مشینری کسٹمز حکام کی جانب سے کلیئر کی جاچکی تھی اور مشینری کو چین پہنچانے کیلیے چارٹرڈ مال بردار ہوائی جہاز ایئرپورٹ پہنچ چکا تھا۔
گزشتہ روز اپنے دفترمیں پریس کانفرنس سے خطاب کرتے ہوئے ایڈیشنل ڈائریکٹر ایف آئی اینٹی کرپشن سرکل اشفاق عالم خان نے بتایاکہ2 اکتوبر کی رات ایف آئی اے نے ایک اطلاع پر کارروائی کرتے ہوئے غیرملکی کمپنی میسرز بی جی پی انٹرنیشنل کی جانب سے دستاویزات میں ردوبدل کرکے اربوں روپے مالیت کی مشینری ٹیکس ادائیگی کے بغیر بیرون ملک لے جانے کی کوشش ناکام بنادی، ایف آئی اے کی کارروائی کے وقت کنسائنمنٹ کسٹمز حکام کی جانب سے کلئیر کی جاچکی تھی اور چارٹرڈ کارگو جہاز بھی کنسائنمنٹ لینے پہنچ چکا تھا۔
اشفاق عالم نے بتایاکہ کنسائنمنٹ کیلیے تمام کاغذات کلیئرنگ ایجنٹ آئی ایم ٹی نے تیار کیے تھے، ایف بی آرسے ٹیکس چوری کو ثابت کرنے کیلیے مطلوبہ دستاویزات کی تصدیق شدہ نقول ملتے ملزمان کے خلاف ایف آئی آر درج کر لی جائے گی۔

اسلام آباد(میڈیا پاکستان) ملک میں بجلی کی پیداوار کیلیے تعمیرکیے گئے ایل این جی پاورپلانٹس اپنی صلاحیت کے مطابق بجلی پیداکرنے میں ناکام ہوگئے ہیں۔’میڈیا‘ کو دستیاب دستاویز کے مطابق حویلی بہادرشاہ اوربھکی پاورپلانٹس اپنی صلاحیت کے مطابق بجلی پیدا نہیں کررہے، ایل این جی سے چلنے والے حویلی بہادر شاہ پاورپلانٹ نے ایک ماہ میں88 کروڑیونٹ کی بجائے صرف 13 کروڑیونٹ بجلی پیداکی، ایل این جی سے چلنے والے دوسرے منصوبے بھکی پاورپلانٹ سے84 کروڑ یونٹ کی بجائے38 کروڑ یونٹ بجلی پیدا کی گئی۔
دستاویزکے مطابق200 ارب روپے کی لاگت سے تعمیر ہونیوالے ان پاور پلانٹس سے ماہانہ 2 ارب 41 کروڑ یونٹ بجلی پیدا کرنے کا دعویٰ کیا گیا تھا۔ پاور ڈویژن کے ترجمان نے بتایا کہ ایل این جی سے چلنے والے منصوبے موجودہ ضرورت کے تحت ہی بجلی پیدا کر رہے ہیں۔

لاہور (میڈیا پاکستان) ہنڈا اٹلس کارز (پاکستان) لمیٹڈ نے پاکستان میں مجموعی طور پر 150,000 سے زائدہنڈا سوک یونٹس فروخت کرنے کا اہم سنگ میل عبور کرلیا۔یہ کامیابی حاصل کرنے کے پس منظر میں جو چیز سب سے نمایاں ہے وہ برانڈ کا اپنے تمام ماڈلز میں معیار کو برقرار رکھنا ہے ۔ نئی ہنڈا سوک نے اپنے منفرد فیچرز اور جدید ڈیزائن کے ساتھ ایک بلند معیار قائم کیا ہے۔
ہنڈا سوک کو پاکستان میں پہلی بار 1994ء میں اپنی لانچ کے ساتھ ہی پاکستانی صارفین میں بے حد مقبولیت حاصل ہوگئی اور اس نے مقامی مارکیٹ میں ہلچل مچا دی۔ سوک کا 6th جنریشن ماڈل نئی شکل و صورت کے ساتھ 1996ء میں متعارف کروایا گیا اورحال ہی میں ہنڈا سوک کی تازہ ترین 10th جنریشن لانچ کی گئی جو ٹیکنالوجی اور ڈیزائن میں سب سے منفرد ہے۔نئے ماڈل میں اب تک فراہم کئے گئے سب سے بہترین فیچرز موجود ہیں، جو ہنڈ ا کی ریسرچ اینڈ ڈویلپمنٹ کے ساتھ وابستگی اور انجینئرنگ میں مہارت کا منہ بولتا ثبوت ہیں۔

کراچی(میڈیا پاکستان) وفاقی وزارت داخلہ نے شمالی کوریاسے ٹیکسٹائل مصنوعات کی درآمد پر پابندی عائد کردی ہے۔پاکستان اسٹاک ایکس چینج کی جانب سے جاری کردہ اعلامیے کے مطابق اقوام متحدہ کی سیکیورٹی کونسل کی شمالی کوریا پر عائد نئی اقتصادی پابندیوں کے تحت پاکستان شمالی کوریا سے ٹیکسٹائل مصنوعات درآمد نہیں کریگا۔ اس ضمن میں وفاقی وزارت داخلہ نے باضابطہ اعلامیہ جاری کردیا ہے اور متعلقہ ایس آر او بھی جلد جاری کردیا جائیگا۔
اعلامیے کے مطابق 11ستمبر 2017 سے پابندی کے اطلاق کے اندرون 90روز میں روانہ ہونے والی کھیپ درآمد کی جاسکتی ہے، ایسی تمام درآمدات کی تفصیل سیکیورٹی کونسل کی کمیٹی کو پابندی کی قرارداد کے اندرون 135روز پیش کرنا ہوگی۔

بیجنگ(میڈیا پاکستان) چین سونے کے ذخائر رکھنے والا دنیا کا دوسرا بڑا ملک بن گیا ہے۔میڈیا رپورٹس کے مطابق چین میں سونے کے نئے ذخائر دریافت ہوئے ہیں جن میں خالص سونے کی مقدار کا اندازہ 12 ہزار ٹن سے بھی زیادہ لگایا گیا ہے۔ اس طرح چین دنیا کا وہ دوسرا بڑا ملک بن گیا ہے جس کے پاس اتنی بڑی مقدار میں سونے کے قدرتی ذخائر موجود ہیں۔ واضح رہے کہ جنوبی افریقا میں سونے کے سب سے وسیع ذخائر پائے جاتے ہیں۔
چین میں سونے کے نئے اور وسیع ذخائر کا انکشاف چائنیز گولڈ ایسوسی ایشن کے وائس چیئرمین ژینگ یونگتاؤ نے ایک پریس کانفرنس میں کیا۔ ان کا کہنا تھا کہ 2016 کے اختتام پر چین میں سونے کے ذخائر 12100 ٹن تک پہنچ چکے تھے۔ گزشتہ سال مارکیٹوں اور بینکوں کے مابین سونے کے تبادلے اور سونے سے متعلق کاروبار کا حجم تقریباً 70 ہزار ٹن رہا تھا جب کہ 2020 تک حجم بڑھ کر ایک لاکھ ٹن پر پہنچنے کی توقع ہے۔
چین گزشتہ 10 سال میں سونے کی پیدوار کے لحاظ سے دنیا کا سب سے بڑا ملک رہا ہے اور پچھلے 4 سال سے سونا استعمال کرنے والے ممالک میں سرفہرست ہے۔ اس وقت چین میں ہر سال اوسطاً 450 ٹن سونا نکالا جارہا ہے جبکہ چین کا منصوبہ اس پیداوار کو 2020 تک 500 ٹن سالانہ پر پہنچانے کا ہے۔

اسلام آباد(میڈیا پاکستان) پیاز، ٹماٹر وایندھن کے نرخوں کے ساتھ ہاؤس رینٹ میں تیز رفتار اضافہ پاکستان میں گزشتہ ماہ صارف قیمتوں کے اشاریے (سی پی آئی) کی بنیاد پر مہنگائی کی شرح میں سال بہ سال 3.86 فیصد کا اضافہ ریکارڈ کیا گیا۔پاکستان بیوروشماریات (پی بی ایس) کے حکام نے کہاہے کہ ملک میں ٹماٹر کا بحران مزید 15 سے 20روز تک جاری رہے گا، محرم کی وجہ سے بھی ٹماٹر کی قیمتوں میں اضافہ ہوا، ایک سال میں پیاز کی قیمتوں میں 153فیصد اضافہ ہوا ہے۔
ماہانہ پریس کانفرنس سے خطاب کرتے ہوئے انھوں نے بتایاکہ سندھ میں ٹماٹر کی فصل خراب ہونے سے ٹماٹر کی ترسیل متاثر ہوئی ہے جس سے ٹماٹر کی قیمت میں اضافہ ہوا جبکہ محرم کی وجہ سے بھی ٹماٹر کی قیمت میں اضافہ ہوا۔ حکام نے بتایاکہ ستمبر 2016کے مقابلے میں ستمبر 2017میں مہنگائی کی شرح میں 3.86فیصد اضافہ ہوا، اگست کے مقابلے میں ستمبر میں پیاز کی قیمت میں 98.33فیصد، ٹماٹر 58.46فیصد، تازہ سبزیاں 10.16 فیصد اور انڈوں کی قیمت میں 4فیصد کا اضافہ ہوا۔
حکام کے مطابق 1ماہ میں مرغی کی قیمت میں 16.19فیصد، تازہ پھل 11.13فیصد اورچینی کی قیمت میں 6.69 فیصدکی کمی ہوئی۔ حکام نے بتایاکہ 1سال کے دوران پیاز کی قیمت میں 153.49 فیصد کا اضافہ ہوا ہے، 1سال کے دوران ٹماٹر کی قیمت میں 33.57فیصد، چاول کی قیمت میں 13.92فیصد، چائے 11.10فیصد، آلو 8.98فیصد، گوشت 7.41 فیصداور شہد کی قیمت میں 4.18فیصد کا اضافہ ہواہے۔ پی بی ایس سے جاری کردہ اعدادوشمار کے مطابق دال ماش کی قیمت میں 25.01فیصد ، چینی 21.05 فیصد، دال چنا 19.49فیصد، دال مسور 19.11 فیصد، دال مونگ 17.75فیصد، سگریٹ 16.51 فیصد، بیسن 12.57 فیصد اور گڑ کی قیمت میں 1سال کے دوران 10.44فیصد کی کمی ہوئی ہے۔
وزارت کے مطابق ایک سال کے دوران ادویہ16.82فیصد مہنگی ہوئیں، اس کے علاوہ تعلیم کے اخراجات میں 8.27 فیصد، موٹر فیول7.91فیصد، ہاؤس رینٹ 7.19فیصد، ڈاکٹر معائنہ فیس 6.79فیصد، مزدوری کی شرح میں 6.75 فیصد اور لانڈری کی قیمت میں 6.63 فیصد اضافہ ہواہے۔
ایک سوال کے جواب میں مردم شماری کے بارے میں وزارت شماریات کے کنسلٹنٹ آصف باجوہ نے بتایاکہ نواز شریف کی نااہلی کے بعد ملک میں غیر یقینی کی صورتحال پیدا ہونے سے مہنگائی کی صورتحال پر اثر پڑ سکتا ہے۔

کراچی(میڈیا پاکستان) وزیر اعلیٰ سندھ مراد علی شاہ نے وفاق سے مطالبہ کیا ہے کہ صوبہ سندھ کو اپنی گیس ڈسٹری بیوشن کمپنی قائم کرنے کی اجازت دی جائے۔گزشتہ روز وزیراعلیٰ کو بریفنگ میں چیئرمین بورڈ آف انویسٹمنٹ نے بتایا کہ ان کی مخلصانہ اور مسلسل کاوشوں کے بعد وفاقی حکومت نے اسپیشل اکنامک زون خیرپور کیلیے 3.5 ایم ایم سی ایف گیس کی منظوری دیدی ہے۔ وزیراعلیٰ نے ایس ایس جی سی کی ٹرانسمیشن لائن سے صوبائی حکومت کے لیے شیئر کا مطالبہ بھی کیا۔
چیئرمین بورڈ آف انویسٹمنٹ مفتاح اسماعیل کا کہنا ہے کہ صوبوں کی اپنی کمپنیاں قائم کرنا ممکن ہے لیکن اس کیلیے وفاق سے اجازت لینا لازمی ہے۔

کراچی(میڈیا پاکستان) ملک میں سپر، ڈپارٹمنٹل اسٹورز، سپرمارٹس ومارکیٹوں کے قیام کے بڑھتے ہوئے رحجان کے باعث برسہا برس سے قائم روایتی تھوک وخوردہ مارکیٹوں کے بیوپاریوں و دکانداروں کی کاروباری سرگرمیاں 50 فیصد تک محدود ہوگئی ہیں۔تھوک وخوردہ مارکیٹوں کے دکانداروں نے ’’میڈیا‘‘ کو بتایا کہ روزمرہ استعمال کی اشیا تیار کرنے والی مقامی وکثیرالقومی کمپنیوں کی تبدیل ہوتی ہوئی پالیسی بھی تھوک وخوردہ مارکیٹوں کی کاروباری سرگرمیاں محدود کرنے میں اہم کردار کررہی ہے، مقامی وکثیرالقومی کمپنیوں نے اب تھوک وخوردہ مارکیٹوں پر اپنی توجہ انتہائی محدود کردیا ہے اور یہ کمپنیاں ان سپر، ڈپارٹمنٹل اسٹورز، سپرمارٹس ومارکیٹوں کو تھوک وخوردہ مارکیٹوں کے دکانداروں کی نسبت طویل مدت کی کریڈٹ پر مال سپلائی کرنے کے علاوہ اپنے پراڈکٹس رکھنے کے لیے شیلف کی مینوفیکچرنگ کے علاوہ پراڈکٹس کی ایڈورٹائزنگ اخراجات کی بھی ادائیگیاں کرتی ہیں۔
ایک بڑے ریٹیلر نے بتایا کہ کمپنیوں کی جانب سے ان سپر اسٹورز اور مارٹس کوہم سے کم اور رعایتی قیمتوں پر مصنوعات کی بلک سپلائی کی جارہی ہیں جس کی وجہ سے تھوک وخوردہ مارکیٹوں کے دکانداروں کا ان سپرمارٹس سے مسابقت مشکل ہوگئی ہے۔
یہاں یہ امر قابل ذکر ہے کہ فی الوقت صرف کراچی کے مختلف علاقوںمیں تقریبا 350 سے زائدسپراسٹورز، ڈپارٹمنٹل اسٹورز، سپرمارٹس اور سپرمارکیٹیں قائم ہیں جبکہ یوٹیلٹی اسٹورز اور سینٹرل اسٹورڈپارٹمنٹ اورصنعتی علاقوں میں مختلف کمپنیوں کی فیئرپرائس شاپش اس کے علاوہ ہیں۔ روایتی تھوک خوردہ مارکیٹوں میں تقریبا50 ہزار تھوک وخوردہ فروشوں کی دکانیں قائم ہیں۔اس ضمن میں آل پاکستان انجمن تاجران کے رہنما رفیق جدون نے ’’میڈیا‘‘ کو بتایا کہ کراچی میں چند سپراسٹور، مارٹس نے شہرکے50 ہزار سے زائد تھوک وخوردہ فروشوں کی50 فیصد سے زائد کاروبار پر اپنا قبضہ جمالیا ہے جس کی وجہ سے ان دکانداروں میں گزشتہ ایک سال سے زبردست اضطراب پایا جارہا ہے اور اب تک ان دکانوں میں کام کرنے والے ہزاروں سیلزمینوں کو بے روزگاری کا سامنا کرنا پڑا ہے۔
رفیق جدون نے بتایا کہ شہر میں پھیلنے والے سپراسٹوروں، مارٹس اور ڈپارٹمنٹل اسٹوروں کی وجہ سے ہرشعبے کے تھوک وخوردہ مارکیٹوں کے بیوپاریوں کو اپنے روزمرہ اخراجات نکالنا بھی مشکل ہوگیا ہے اور بیشتر دکانداروں نے اپنے ذخائر کومحدود رکھ کرمحدود اشیا کی تجارت کرنے لگے ہیں جبکہ فروخت کا حجم انتہائی کم ہونے اورعدم فروخت کی وجہ سے بیشتر پراڈکٹس زائد المیعاد ہوگئی ہیں۔
رفیق جدون نے بتایا کہ پاکستان میں سپر و ڈپارٹمنٹل اسٹورز اور مارٹس سیکٹر میں بڑھتی ہوئی سرمایہ کاری سے اس بات کا خدشہ ہوگیا ہے کہ آئندہ چند برسوں میں روایتی تھوک وخوردہ مارکیٹوں کے دکانداروں کا 100 فیصد معاشی قتل کرتے ہوئے ان کاوجود ختم ہوجائے گا اور ان دکانوں میں طویل عرصے سے کام کرنے والے مزید لاکھوں سیلزمین بے روزگار ہوجائیں گے۔ پالیسی سازوں کو چاہیے کہ وہ روایتی تھوک وخوردہ مارکیٹوں کا وجود برقرار رکھنے اور ان دکانداروں کا معاشی قتل روکنے کے لیے قبل ازوقت اقدامات بروئے کار لائیں۔
ایک سوال کے جواب میں انہوں نے بتایا کہ ملک کے دیگر بڑے شہروں کی طرح کراچی میں محلوں کی سطح پر چھوٹی بڑی نوعیت کی دکانوں کی سرگرمیاں معمول کے مطابق جاری ہیں۔

اسلام آباد(میڈیا پاکستان) فیڈرل بورڈ آف ریونیو (ایف بی آر) نے جے ڈبلیو ڈی شوگر ملز، کراچی الیکٹرک پراویڈنٹ فنڈ اور ایجوکیشنل سروسز پرائیویٹ لمیٹڈ سمیت مزید 14 اداروں کے قابل ٹیکس آمدنی رکھنے کے باوجود ٹیکس گوشوارے جمع نہ کروانے والے مجموعی طور پر 81 ہزار 725 افسران و ملازمین کا سراغ لگا لیا ہے۔فیڈرل بورڈ آف ریونیو کے سینئر افسر نے گزشتہ روزمیڈیا کو بتایا کہ جن سرکاری،نیم سرکاری،خودمختار اور نجی اداروں کے قابل ٹیکس آمدنی رکھنے کے باوجود ٹیکس گوشوارے جمع نہ کروانے والے ملازمین کے بارے میں ریکارڈ حاصل ہوتا ہے تو ایف بی آرکے افسران ٹیکس آگہی مہم کے تحت ان اداروں کے سربراہان سے ملاقاتیں کرکے ان کے ملازمین کو ٹیکس گوشوارے جمع کروانے میں سہولت فراہم کرنے کی پیشکش کررہے ہیں اور اس بارے میں پہلے بھی بہت سے اداروں کے سربراہان سے ایف بی آر کی ٹیم ملاقاتیں کرچکی ہے اور ان اداروں کے سربراہان کی جانب سے حوصلہ افزا تعاون کی یقین دہانی کروائی گئی ہے جو کہ بہت خوش آئند ہے اور توقع ہے کہ ایف بی آر کو اس مہم سے نئے لوگوں کو ٹیکس نیٹ میں لانے میں مدد ملے گی۔
اس بارے میں ’’ایکسپریس‘‘ کودستیاب دستاویز کے مطابق فیڈرل بورڈ آف ریونیو کی جانب سے جن 14 اداروں کے قابل ٹیکس آمدنی رکھنے کے باوجود گوشوارے جمع نہ کروا نے والے 81 ہزار 725 افسران و ملازمین کا سُراغ لگایا ہے۔ ان اداروں کے مجموعی افسران و ملازمین کی تعداد ایک لاکھ 5 ہزار 49 ہے جن میں سے صرف23ہزار324 افسران و ملازمین کی جانب سے انکم ٹیکس گوشوارے جمع کروائے جارہے ہیں اور باقی81 ہزار725ملازمین و افسران قابل ٹیکس آمدنی رکھنے کے باوجود ٹیکس گوشوارے جمع نہیں کروارہے ہیں۔
دستاویز کے مطابق جن اداروں کے ملازمین کا سُراغ لگایا گیا ہے۔ ان میں سے میسرز جے ڈبلیو ڈی شوگر ملزکے مجموعی طور پر9 ہزار969 ملازمین سے 206 ملازمین انکم ٹیکس گوشوارے جمع کروارہے ہیں جبکہ 9 ہزار 763 ملازمین انکم ٹیکس گوشوارے جمع نہیں کروارہے ہیں۔
آغا خان اسپتال اینڈ میڈیکل کالج فاؤنڈیشن کے مجموعی طور پر 10 ہزار 491ملازمین سے ایک ہزار45 ملازمین انکم ٹیکس گوشوارے جمع کروارہے ہیں جبکہ 9 ہزار446 ملازمین انکم ٹیکس گوشوارے جمع نہیں کروارہے ہیں،آئل اینڈ گیس ڈیولپمنٹ کمپنی لمیٹڈکے مجموعی طور پر9 ہزار467 ملازمین سے ایک ہزار782 ملازمین انکم ٹیکس گوشوارے جمع کروارہے ہیں جبکہ سات ہزار 685ملازمین انکم ٹیکس گوشوارے جمع نہیں کروارہے ہیں۔
میزان بینک لمیٹڈ کے مجموعی طور پر8 ہزار 674ملازمین سے دو ہزار419 ملازمین انکم ٹیکس گوشوارے جمع کروارہے ہیں جبکہ چھ ہزار 255ملازمین انکم ٹیکس گوشوارے جمع نہیں کروارہے ہیں۔ بینک الحبیب لمیٹڈکے مجموعی طور پر8 ہزار346 ملازمین سے دو ہزار260 ملازمین انکم ٹیکس گوشوارے جمع کروارہے ہیں جبکہ چھ ہزار86 ملازمین انکم ٹیکس گوشوارے جمع نہیں کروارہے ہیں۔
مسلم کمرشل بینک لمیٹڈکے مجموعی طور پر آٹھ ہزار161 ملازمین سے تین ہزار18 ملازمین انکم ٹیکس گوشوارے جمع کروارہے ہیں جبکہ پانچ ہزار143 ملازمین انکم ٹیکس گوشوارے جمع نہیں کروارہے ہیں۔ کریسنٹ بہومین لمیٹڈکے مجموعی طور پرسات ہزار 945ملازمین سے 82ہزار ملازمین انکم ٹیکس گوشوارے جمع کروارہے ہیں جبکہ سات ہزار 863ملازمین انکم ٹیکس گوشوارے جمع نہیں کروارہے ہیں۔ عسکری بینک لمیٹڈکے مجموعی طور پر سات ہزار545 ملازمین سے دوہزار تین سو پچانوے ملازمین انکم ٹیکس گوشوارے جمع کروارہے ہیں جبکہ پانچ ہزار ایک سو پچاس ملازمین انکم ٹیکس گوشوارے جمع نہیں کروارہے ہیں۔
کراچی الیکٹرک پراویڈنٹ فنڈ کے مجموعی طور پر پانچ ہزار دو سو بیس ملازمین سے ایک ہزار تین سو پندرہ ملازمین انکم ٹیکس گوشوارے جمع کروارہے ہیں جبکہ تین ہزار 905ملازمین انکم ٹیکس گوشوارے جمع نہیں کروارہے ہیں۔ ایجوکیشنل سروسز پرائیویٹ لمیٹڈ کے مجموعی طور پرپانچ ہزار 141ملازمین سے 808ہزار ملازمین انکم ٹیکس گوشوارے جمع کروارہے ہیں جبکہ چارہزار333 ملازمین انکم ٹیکس گوشوارے جمع نہیں کروارہے ہیں۔
اسٹینڈرڈ چارٹرڈ بینک پاکستان لمیٹڈکے مجموعی طور پر چار ہزار557 ملازمین سے ایک ہزار 617ملازمین انکم ٹیکس گوشوارے جمع کروارہے ہیں جبکہ دو ہزار940 ملازمین انکم ٹیکس گوشوارے جمع نہیں کروارہے ہیں۔ بزنس اینڈ کمیونیکیشن سسٹم پرائیویٹ لمیٹڈکے مجموعی طور پرچار ہزار385 ملازمین سے 136ہزار ملازمین انکم ٹیکس گوشوارے جمع کروارہے ہیں جبکہ چار ہزار 249ملازمین انکم ٹیکس گوشوارے جمع نہیں کروارہے ہیں اورفیصل بینک لمیٹڈکے مجموعی طور پر چار ہزار ایک سو بارہ ملازمین سے ایک ہزار413 ملازمین انکم ٹیکس گوشوارے جمع کروارہے ہیں جبکہ دوہزار699 ملازمین انکم ٹیکس گوشوارے جمع نہیں کروارہے ہیں۔