Category بزنس

کراچی: قومی ایئرلائن نے کم ایندھن خرچ کرنے والے 4 جدید ایئر بس 320 طیارے خریدنے کا فیصلہ کیا ہے۔

ترجمان پی آئی اے کے مطابق قومی ایئرلائن نے کم ایندھن خرچ کرنے والے 4 جدید ایئر بس 320 طیارے خریدنے کا فیصلہ کیا ہے۔ پی آئی اے نیرو باڈی کے 4 نئے جہاز 6سالہ ڈرائی لیز پر حاصل کرے گا، 4 نئے طیارے آنے کے بعد پی آئی اے کے فضائی بیڑے کی تعداد 34ہوجائے گی۔

ترجمان پی آئی اے کا کہنا ہے کہ جولائی کے وسط میں پہلا ایئر بس 320 پی آئی اے کے بیڑے میں شامل ہوگا، دوسرا طیارہ اگست میں شامل ہوجائے گا، مزید 2 طیارے اکتوبر اور دسمبر پی آئی اے کو مل جائیں گے۔

اسلام آباد: وفاقی حکومت نے پرچون فروشوں کو بھی ٹیکس نیٹ میں لانے کا فیصلہ کیا ہے۔

وزیر خزانہ شوکت ترین اور چیئرمین ایف بی آر عاصم احمد کے درمیان ملاقات ہوئی جس میں آئندہ مالی سال کے لیے ریونیو اہداف، پالیسی انفورسمنٹ پر بات چیت کی گئی۔ ملاقات میں وزیر خزانہ نے چیئرمین ایف بی آر سے کہا کہ آئندہ مالی سال کے لیے ٹیکس وصولیوں کا بڑا ہدف ہے، اس ہدف کے حصول کو یقینی بنانے کے لیے جامع حکمت عملی اختیار کی جائے۔

وزیر خزانہ نے چیئرمین ایف بی آر کو ہدایت دی کہ ریٹیل سیکٹر کو ٹیکس نیٹ میں لایا جائے، ریٹیل سیکٹر میں بڑے پیمانے پر ٹیکس چوری ہو رہی ہے۔

شوکت ترین نے کہا کہ ٹیکس گزاروں کو بار بار نوٹسز نہ جاری کیے جائیں جس پر چیئرمین ایف بی آر عاصم احمد نے کہا کہ رواں مالی سال کا ٹیکس ہدف حاصل کر لیا جائے گا، آئندہ مالی سال کےلیے ٹیکس ہدف حاصل کرنے کے اقدامات کیے جائیں گے اورٹیکس نیٹ بڑھانے کے لیے آئی ٹی کا استعمال بڑھایا جا رہا ہے۔

دریں اثنا حکومت نے نئی ریفائننگ پالیسی کے تحت آئل ریفائنریز کو اَپ گریڈیشن پراجیکٹس کے لیے 10 سال کی ٹیکس چھوٹ دینے کا اصولی فیصلہ کیا ہے۔ وزیر خزانہ شوکت ترین کی زیر صدارت گزشتہ روز ہونے والے اجلاس میں اس کی منظوری دے دی گئی ہے۔

ذرائع کے مطابق وزیر خزانہ کی زیر صدارت ہونے والے اجلاس میں نئی ریفائننگ پالیسی کے مسودے کا بھی جائزہ لیا گیا۔ اجلاس میں آئل ریفائنریز کےلیے ٹیکس ریلیف کی سہولت حاصل کرنے کے لیے ڈیپ کنزرویشن کے ساتھ ایک لاکھ بیرل پیداواری صلاحیت کی شرط ہٹانے کی بھی اصولی منظوری دی گئی ہے۔

نئی ریفائننگ پالیسی 2021ء کے تحت آئل ریفائنریز اپ گریڈیشن کریں گی اور یورو فائیو کی خصوصیات کی حامل پراڈکٹ متعارف کروائیں گی۔

ملک بھر میں مہنگا ہونے والا امریکی ڈالر چار ماہ کی بلند ترین سطح پر پہنچ گیا۔ سٹاک مارکیٹ میں اُتار چڑھاؤ کے بعد مندی دیکھی گئی جبکہ سونا مزید مہنگا ہو گیا۔

سٹیٹ بینک آف پاکستان کی سماجی رابطے کی ویب سائٹ پر جاری کردہ اعداد و شمار کے مطابق رواں ہفتے کے دوسرے کاروباری روز کے دوران بھی امریکی ڈالر ایک مرتبہ پھر 68 پیسے مہنگا ہو گیا اور قیمت 158روپے 19پیسے ہو گئی ہے۔

گزشتہ 50 روز کے دوران ڈالر 5 روپے 91 پیسے مہنگا کا ہوگیا ہے۔

دوسری طرف اوپن مارکیٹ میں ڈالر30پیسے مہنگا ہوگیا، اوپن مارکیٹ میں ڈالر 158روپے 30پیسے کا ہوگیا۔

سٹاک مارکیٹ میں اُتار چڑھاؤ کے بعد مندی

اُدھر پاکستان سٹاک مارکیٹ میں اُتار چڑھاؤ کے بعد 25.38 پوائنٹس کی مندی دیکھی گئی جس کے باعث 48 ہزار کی نفسیاتی حد گر گئی اور انڈیکس 47987.14 پوائنٹس کی سطح پر پہنچ کر بند ہوا۔

فی تولہ سونا 450 روپے مہنگا

آج عالمی مارکیٹ میں فی اونس سونے کی قیمت میں 2 امریکی ڈالر کا اضافہ دیکھا گیا اور قدر 1 ہزار 785 ڈالر کی سطح پر پہنچ کر بند ہوئی تھی۔

ملک بھر میں فی تولہ سونے کی قیمت میں 450 روپے کا اضافہ دیکھا گیا اور نئی قیمت 1 لاکھ 9 ہزار 300 روپے ہو گئی ہے۔ جبکہ دس گرام کی قیمت 386 روپے کی بڑھوتری کے بعد 93 ہزار 707 روپے ہو گئی ہے۔

کراچی: سوئی سدرن گیس کمپنی لمیٹڈ (ایس ایس جی سی ایل) نے سندھ کے سی این جی اسٹیشنز کو 176 گھنٹوں کے لیے گیس کی فراہمی روک دی۔

رپورٹ کے مطابق گیس کی کمی کے باعث بندش کا یہ سلسلہ 22 جون رات 12 بجے سے شروع ہوا اور 29 جون کی صبح 9 بجے تک جاری رہے گا۔

کمپنی نے اسٹیشن مالکان کو بتایا کہ اسے ٹنڈو الہٰیار میں کنڑ پساہی فیلڈ کی سالانہ مرمت و بحالی کے کام کے باعث 160 ایم ایم سی ایف ڈی گیس کی کمی کا سامنا ہے جو گیس کی دستیابی میں کمی کا سبب بنا اور اس کے نتیجے میں لائن پیک ختم اور سسٹم میں کم پریشر آیا۔

کمپنی کا کہنا تھا کہ گھریلو صارفین کی طلب پوری کرنے کے لیے اسٹیشنز کو سی این جی کی فراہمی روک دی گئی ہے۔

آل پاکستان سی این جی ایسوسی ایشن کے سندھ زون کے کووآرڈینیٹر سمیر نجم الحسین نے اس بات پر حیرت کا اظہار کیا کہ سندھ سب سے زیادہ گیس پیدا کرنے والا صوبہ ہے اور اسے بحران کا سامنا ہے جو صارفین اور سی این جی اسٹیشن مالکان کے ساتھ ناانصافی ہے۔

انہوں نے کہا کہ ایس ایس جی سی ایل نے اسٹیشنز مالکان کو آگاہ کیا ہے کہ اس نے وفاقی حکومت کے حکم کے مطابق فیصلہ کیا ہے۔

نجم الحسین نے کہا کہ ایس ایس جی سی ایل نے اسٹیشنز مالکان کو یقین دہانی کروائی تھی کہ آر ایل این جی پر منتقل ہونے کے بعد گیس کی لوڈشیڈنگ بالکل نہیں ہوگی لیکن گیس بحران اب بھی بہت ہے۔

انہوں نے کہا کہ کیپٹو پاور یونٹس کو گیس کی فراہمی کا سلسلہ جاری رہے گا۔

انہوں نے بتایا کہ ایس ایس جی سی ایل کے ایک ہزار 250 ایم ایم سی ایف ڈی سپلائی نیٹ ورک میں سے سندھ کے سی این جی اسٹیشنز صرف 28 ایم ایم سی ایف ڈی استعمال کرتے ہیں لیکن اتنی کم مقدار کے باوجود انہیں سب سے پہلے بند کردیا جاتا ہے۔

لاہور: ملک میں پانی کی فراہمی گزشتہ ہفتے 50 فیصد تک کم ہوگئی تھی اب انڈس ریور سسٹم اتھارٹی (ارسا) نے خطرے کی گھنٹی بجادی کہ اگر صورتحال ایک ہفتے سے زائد تک برقرار رہی تو یہ کمی 30 سے 35 فیصد تک گر سکتی ہے۔

ارسا کے اعداد و شمار کے مطابق ملکی دریاؤں کا بہاؤ 13 جون 4 لاکھ 56 ہزار کیوسک تھا جو پیر کے روز 2 لاکھ 3 ہزار کیوسک تک کم ہوگیا یعنی اس میں 50 فیصد کمی ہوئی۔

رپورٹ کے مطابق سب سے زیادہ کمی دریائے سندھ میں ریکارڈ کی گئی جو 2 لاکھ 25 ہزار کیوسک سے 97 ہزار 800 ہوگئی۔

ارسا ترجمان خالد ادریس رانا نے کہا کہ اتھارٹی نے تربیلا اور منگلا ڈیمز سے اضافی پانی نکالنا شروع کردیا ہے لیکن صوبوں میں کمی کو دور کرنا شروع نہیں کیا۔

انہوں نے کہا کہ ارسا صرف آئندہ 10 روز تک اضافی پانی فراہم کرسکتی ہے اگر صورتحال بہتر نہ ہوئی تو پورے ملک کو اس سے چوٹ پہنچے گی۔

ارسا قومی سطح پر 2 لاکھ 73 ہزار 100 کیوسک پانی فراہم کررہی ہے جس میں ایک لاکھ 49 ہزار سندھ، 14 ہزار بلوچستان اور 3 ہزار 100 کیوسک پانی خیبر پختونخوا کو دیا جارہا ہے۔

اس مقصد کے لیے اتھارٹی تربیلا سے ایک لاکھ 55 ہزار کیوسک پانی جاری کررہی ہے جبکہ منگلا ڈیم سے پانی کے اخراج کو 25 ہزار سے بڑھا کر 55 ہزار کیوسک کردیا گیا ہے۔

تاہم اتھارٹی نے پنجاب کو بتایا ہے کہ چشمہ جہلم لنک کنال اس وقت 12 ہزار کیوسک ہے جسے گریٹر تھل کنال میں پینے کے پانی کی فراہمی کی غرض سے کم کر کے 2 ہزار کیوسک کردیا جائے گا۔

اسے منگلا ڈیم سے اضافی فراہمی لینی چاہیے جس کے لیے جھیل سے اخراج دگنا کردیا گیا۔

محکمہ آب پاشی کے عہدیدار نے کہا کہ ‘مجموعی طور پر کمی واقع ہوئی ہے اور گزشتہ ہفتے کے دوران نہ صرف دریائے سندھ بلکہ دریائے کابل سے پانی کی فراہمی بھی 80 ہزار کیوسک سے کم ہوکر 42 ہزار کیوسک، دریائے چناب سے 60 ہزار کیوسک سے کم ہو کر 34 ہزار کیوسک جبکہ دریائے جہلم سے پانی کی فراہمی 78 ہزار 400 سے کم ہو کر 48 ہزار 400 کیوسک رہ گیا’۔

انہوں نے کہا کہ منگلا سے مزید پانی کے اخراج کا مطلب پنجاب کے لیے آئندہ پورے سال کے لیے پنجاب کے لیے مشکلات ہوں گی۔

ان کا کہنا تھا کہ پانی کے اضافی اخراج کی وجہ سے ڈیم میں صورتحال پہلے ہی خراب ہے ایک لاکھ 2 ہزار 8.65 فٹ کے بجائے جھیل میں پانی کی سطح ایک ہزار 153.5 فٹ ہے یعنی 55.15 فٹ کا فرق ہے۔

انہوں نے بتایا کہ ‘پریشانی یہ ہے کہ تربیلا جھیل کو 4 فٹ یومیہ یا ایک لاکھ 55 ہزار کیوسک سے زیادہ خالی نہیں کیا جاسکتا لیے اضافی پانی منگلا ڈیم سے آنا ہے۔

دوسری جانب خالد رانا نے کہا کہ موسم کی تمام پیش گوئیاں خبردار کررہی ہیں کہ کم درجہ حرارت آئندہ ہفتے تک برقرار رہے گا اس کا مطلب گلیشیئرز سے پانی کا کم بہاؤ اور اگر یہی سلسلہ آئندہ چند روز تک جاری رہا تو 2 جولائی تک ملک مشکل کا شکار ہوجائے گا تربیلا ڈیڈ لیول تک جاسکتا ہے اور پانی کی قومی کمی 30 سے 35 فیصد ہوسکتی ہے۔

اسلام آباد: 24 جون کو شیڈول اختتامی خطاب کا انتظار کیے بغیر وفاقی وزیر خزانہ شوکت ترین نے وفاقی بجٹ 22-2021 پر بحث کے درمیان قومی اسمبلی کے اجلاس میں شرکت کی اور اپوزیشن ارکان کی جانب سے بجٹ دستاویزات کو مسلسل ‘جعلی اور جھوٹ پر مبنی’ قرار دینے پر رد عمل دیا۔

رپورٹ کے مطابق انہوں نے 11 جون کو ایوان کے سامنے پیش کیے گئے بجٹ کا دفاع کرتے ہوئے کہا کہ ‘جمشید احمد ترین کا بیٹا شوکت ترین کبھی جھوٹ نہیں بولتا، وہ (اپوزیشن ارکان) کہتے ہیں کہ یہ بجٹ جھوٹ ہے، یہ میرا بجٹ ہے، اسے میں نے بنایا ہے لہذا یہ باتیں کرنا چھوڑ دیں’۔

پاکستان تحریک انصاف (پی ٹی آئی) سے وابستہ دیگر وزرا کی طرح شوکت ترین جو پی ٹی آئی کے تین سالہ دور حکومت میں چوتھے وزیر خزانہ ہیں، نے اس کے بعد ملک کی معیشت کو برباد کرنے کے الزام پر سابقہ حکومتوں پر تنقید کی اور کووڈ 19 وبا کا سامنا کرنے کے باوجود اس کی بحالی کی کوششوں پر وزیر اعظم عمران خان کی تعریف کی۔

وزیر خزانہ نے ایوان کو بتایا کہ اپوزیشن کے دعوے کے مطابق 25 فیصد نہیں بلکہ ملک میں قیمتوں میں 11 فیصد اضافہ ہوا اور 13 فیصد غذائی اجناس کی قیمتوں میں مہنگائی ہوئی ہے۔

ان کا کہنا تھا کہ ‘غذائی اجناس کی قیمتیں مہنگی اس وجہ سے ہیں کہ اب آپ خوراک کے خالص درآمد کنندہ بن چکے ہیں، آپ کے پاس گندم نہیں ہے، آپ کے پاس چینی نہیں ہے، مجھے حیرت ہوئی جب پرائس کنٹرول کمیٹی کے اجلاس کے دوران مجھے معلوم ہوا کہ ہم 70 فیصد دالیں درآمد کررہے ہیں جو ایک اہم غذا ہے’۔

انہوں نے بتایا کہ ‘عالمی سطح پر غذائی اجناس کی قیمتیں 10 سال کی بلند ترین سطح پر ہیں’۔

اس سے قبل پاکستان پیپلز پارٹی (پی پی پی) کی حکومت کے دوران اسی عہدے پر خدمات انجام دینے والے شوکت ترین نے سوال کیا کہ ‘گزشتہ 8 سے 10 سالوں میں سابقہ حکومت نے زراعت کے شعبے کے لیے کیا کیا؟’

شوکت ترین نے اعتراف کیا کہ پی ٹی آئی کی حکومت کو بین الاقوامی مالیاتی فنڈ (آئی ایم ایف) کی تجویز پر ڈسکاؤنٹ ریٹ، محصولات میں اضافہ اور کرنسی کی قدر میں کمی کرنا پڑی۔

تاہم ان کا کہنا تھا کہ اس کی وجہ سابقہ حکومتوں کی خراب پالیسیاں تھیں جس کی وجہ سے انہیں آئی ایم ایف سے رجوع کرنا پڑا۔

انہوں نے کہا کہ انہیں آئی ایم ایف سے رجوع کرنا پڑا کیونکہ ملک کو 28 ارب سے 30 ارب ڈالر واپس کرنے کی ضرورت تھی جو 20 ارب ڈالر کے کرنٹ اکاؤنٹ خسارے اور مختصر مدتی قرضوں کی وجہ سے جمع ہوئی تھی جو سابقہ مسلم لیگ (ن) کی حکومت نے لیا تھا۔

شوکت ترین نے کہا کہ انہوں نے ‘تعمیری بجٹ’ پیش کیا ہے جس میں پہلی مرتبہ غریب عوام کی ترقی پر توجہ دی جارہی ہے۔

انہوں نے رہائش اور تعمیراتی صنعت پر توجہ دینے پر وزیر اعظم کی تعریف کی۔

انہوں نے کہا کہ پہلی مرتبہ موجودہ حکومت پیش گوئی کے قوانین میں بہتری لائی ہے، رہائش کی پالیسی کے بغیر کوئی بھی ملک ترقی نہیں کرسکتا اور انہوں نے اس سلسلے میں بھارت، تھائی لینڈ اور ملائیشیا کی مثالیں پیش کیں۔

انہوں نے اپوزیشن سے کہا کہ وہ غریبوں کے حق میں پالیسیوں کا کم از کم وزیر اعظم عمران خان کو کچھ تو سہرا دیں۔

ان کا کہنا تھا کہ حکومت زراعت پر توجہ دینے کے علاوہ اب صنعتوں، بجلی اور رہائش کے شعبوں پر بھی توجہ دے گی۔

اسلام آباد: حکومت نے اعلان کیا ہے کہ سعودی عرب سے سالانہ ڈیڑھ ارب ڈالر مالیت کے تیل کی سہولت دستیاب ہوگئی ہے۔

رپورٹ کے مطابق وزیر توانائی حماد اظہر کے ہمراہ مشترکہ پریس کانفرنس کرتے ہوئے وزیراعظم کے معاون خصوصی برائے ریونیو اینڈ فنانس ڈاکٹر وقار مسعود نے بتایا کہ تاخیری ادائیگیوں پر سعودی عرب سے سالانہ ڈیڑھ ارب ڈالر مالیت کے تیل کی فراہمی کا اعلان کردیا ہے۔

تاہم انہوں نے تیل کی سہولت کی تفصیلات اور 3 سال قبل طے پانے والے 3 ارب ڈالر کے سمجھوتے میں کمی کی وجوہات کے حوالے سے مزید بات کرنے سے انکار کردیا۔

مذکورہ سمجھوتے پر دونوں ممالک کے درمیان باہمی تعلقات میں آنے والی دراڑ کے باعث عملدرآمد نہیں ہوسکا تھا۔

معاون خصوصی کا کہنا تھا کہ حکومت نے آئندہ مالی سال کے دوران 6 کھرب 10 ارب روپے پیٹرولیم لیوی اکٹھا کرنے کے حوالے سے بہت حقیقت پسندانہ تخمینہ لگایا ہے اس کے باوجود کچھ ناقدین اسے غیر حقیقت پسندانہ کہہ کر دعوٰی کررہے ہیں کہ لیوی کو 4 سے 5 روپے بڑھا کر 25 روپے لیٹر کردیا جائے گا۔

انہوں نے کہا کہ حکومت نے 4 ماہ تک پیٹرولیم مصنوعات کی قیمتیں مستحکم رکھیں حالانکہ بین الاقوامی منڈیوں میں قیمتوں میں نمایاں اضافہ ہوا ہے۔

ڈاکٹر وقار مسعود نے کہا کہ ‘ہم نے اس سیکٹر کی استعداد اور متوقع ترقی کی بنیاد پر اپنے اہداف مقرر کیے ہیں، آئندہ مالی سال کے آغاز میں کچھ مشکلات ہوسکتی ہیں لیکن آگے جا کر اس میں کمی ہوجائے گی۔

انہوں نے کہا کہ ایران سے پابندی ختم ہونے سے تیل کی پیداوار بڑھنے میں مدد ملے گی جس کا قیمتوں پر بہت مثبت اثر پڑے گا۔

ان کا مزید کہنا تھا کہ ریونیو کا تخمینہ بھی حقیقت پسندانہ ہے اور 25 دیگر مدات بھی ہیں جنہیں آئندہ مالی سال کا بجٹ بناتے ہوئے مدِ نظر نہیں رکھا گیا۔

انہوں نے کہا کہ حکومت نے صرف ایل این جی پر چلنے والے پاور پلانٹس کی نجکاری کا ہدف بنایا تھا لیکن بہت سی دیگر ٹرانزیکشن آئندہ مالی سال میں مکمل ہوں گی جس میں ففتھ جنریشن ٹیلی کمیونکیشن لائسنسز اور موجود لائسنسز کی تجدید شامل ہے۔

عالمی مارکیٹ میں سونے کی فی اونس قیمت میں 19 ڈالر جب کہ پاکستان میں فی تولہ سونے کی قیمت میں 1550 روپے کا اضافہ ہوا۔

تفصیلات کے مطابق بین الاقوامی بلین مارکیٹ میں فی اونس سونے کی قیمت میں 19 ڈالر کا اضافہ ہوا اور عالمی بازار میں سونے کی فی اونس قیمت 1783 ڈالر کی سطح پر پہنچ گئی، جس کے باعث مقامی صرافہ مارکیٹوں میں بھی کاروباری ہفتے کے پہلے روز فی تولہ اور دس گرام سونے کی قیمتوں میں بالترتیب 1550 روپے اور 1329 روپے کا اضافہ ہوگیا۔

قیمتوں میں اضافے کے نتیجے میں کراچی، حیدرآباد، سکھر، ملتان، لاہور، فیصل آباد، راولپنڈی، اسلام آباد، پشاور اور کوئٹہ کی صرافہ مارکیٹوں میں فی تولہ سونے کی قیمت بڑھ کر 1 لاکھ 8 ہزار 850 روپے اور دس گرام سونے کی قیمت بڑھ کر 93 ہزار 321 روپے ہوگٸی۔

وفاقی وزارت خزانہ نے مسلم لیگ ن کے رہنما مفتاح اسماعیل کی پریس کانفرنس پر رد عمل دیتے ہوئے کہا ہےکہ عالمی مالیاتی فنڈ(آئی ایم ایف) کا پروگرام معطل نہیں ہے اور ورلڈ بینک نے بھی پاکستان کا قرض نہیں روکا۔

ایک بیان میں وزارت خزانہ کا کہنا ہےکہ آئی ایم ایف مشن کا اگست میں دورہ متوقع ہے، جس میں مشن پورے سال کی معاشی کارکردگی کا جائزہ لےگا۔

وزارت خزانہ کا کہنا ہےکہ پاکستان نےمارچ تک آئی ایم ایف پروگرام کے تمام اہداف حاصل کیے ہیں،آئی ایم ایف پروگرام کےدوران پاکستان نےبہترین معاشی کارکردگی کامظاہرہ کیا۔

وزارت خزانہ کے مطابق ورلڈ بینک نےپاکستان کا قرض نہیں روکا، ورلڈ بینک نےایک روز قبل ہی پاکستان کےلیےقرض کی منظوری دی ہے۔

مفتاح اسماعیل پر تنقید کرتے ہوئے وزارت خزانہ کا کہنا ہے کہ مسلم لیگ ن کے وزیر خزانہ نے ملکی معیشت کو تباہ کیا، آئی ایم ایف قرض پروگرام کی ذمہ دار ن لیگ ہے۔

بیان میں کہا گیا ہےکہ حکومت عالمی مارکیٹ میں تیل کی قیمتوں میں اضافہ صارفین کو منقل نہیں کررہی، حکومت تیل کی قیمتوں میں استحکام لانےکی کوشش کررہی ہے، ایران پر عالمی پابندیاں ختم ہونے کی توقع ہے جس سے بین الاقوامی مارکیٹ میں تیل کی قیمتوں میں کمی کا امکان ہے، سعودی عرب کے ساتھ ادھار پر تیل کے معاہدے کو حتمی شکل دی جا رہی ہے۔

وزارت خزانہ کا مزید کہنا ہے کہ 700 ارب روپے کے ٹیکس ری فنڈز روکنے میں کوئی صداقت نہیں ہے۔

خیال رہے کہ کراچی میں پریس کانفرنس کے دوران مسلم لیگ ن کے رہنما مفتاح اسماعیل نے دعویٰ کیا تھا کہ حکومت کو آئی ایم ایف، ورلڈ بینک اور ایشیائی ترقیاتی بینک نے قرضہ دینے سے منع کردیا ہے۔

ملک بھر میں ڈالر کے مقابلے میں ملکی روپیہ پر دباؤ بڑھنے لگا، امریکی کرنسی مقامی مارکیٹوں میں قدر 157 روپے سے بھی بڑھ گئی ہے۔

سٹیٹ بینک آف پاکستان کی سماجی رابطے کی ویب سائٹ ٹویٹر پر جاری کردہ اعداد و شمار کے مطابق رواں ہفتے کے پہلے کاروباری روز کے دوران انٹر بینک میں روپے کے مقابلے میں امریکی ڈالر مزید 62 پیسے مہنگا ہو گیا۔ جس کے بعد امریکی کرنسی کی قیمت 156.89 روپے سے بڑھ کر 157 روپے 51 پیسے ہو گئی ہے۔

یاد رہے کہ 7 مئی سے ابتک انٹربینک میں ڈالر 5 روپے 23 پیسے مہنگا ہو چکا ہے، 7 مئی کو انٹربینک میں ڈالر 152 روپے 28 پیسے پر بند ہوا تھا۔

دوسری طرف پاکستان سٹاک مارکیٹ میں 226.15 پوائنٹس کی بدترین مندی دیکھی گئی جس کے بعد 100 انڈیکس 48012.52 پوائنٹس کی سطح پر پہنچ کر بند ہوا۔

پورے کاروباری روز کے دوران کاروبار میں 0.47 فیصد کی تنزلی دیکھی گئی جبکہ 22 کروڑ 72 لاکھ 45 ہزار 778 شیئرز کا لین دین ہوا جس کے باعث سرمایہ کاروں کو 38 ارب روپے سے زائد کا نقصان برداشت کرنا پڑا۔