Category بزنس

فیڈرل بورڈ آف ریونیو (ایف بی آر) نے ٹیکس گزاروں کو انکم ٹیکس ڈیفالٹرز لسٹ سے متعلق ای میلز کے حوالے سے خبردار کردیا۔

ایف بی آر کی جانب سے جاری اعلامیے کے مطابق انکم ٹیکس ڈیفالٹرز لسٹ سے متعلق ای میلز جعلی ہیں اور اِن جعلی ای میلز میں انکم ٹیکس ڈیفالٹرز لسٹ کا معائنہ کرنے کا کہا جارہا ہے۔

ایف بی آر نے کہا ہے کہ ٹیکس گزاروں کو متنبہ کیا جاتا ہے کہ یہ ای میلز جعلی اور وائرس زدہ ہیں۔

ایف بی آر کے مطابق جعلی وائرس زدہ ای میلز کے ذریعے معلومات لینے کی کوشش کی جارہی ہے لہٰذا ایسی جعلی ای میلز کو مکمل طور پر نظر انداز اور متعلقہ حکام کو آگاہ کریں۔

2 سرکاری کمپنیوں اور 2 مجوزہ ایل این جی ٹرمینل کے اسپانسرز، تعبیر اور انرگیس کے درمیان منصوبوں کے لیے پائپ لائن کی گنجائش مختص کرنے کے حوالے سے تنازع طویل عرصے تک جاری رہے گا۔

رپورٹ کے مطابق جب سرمایہ کار پورٹ قاسم پر ان دو ٹرمینلز کا تعمیراتی کام شروع کرنے سے پہلے سوئی سدرن گیس کمپنی (ایس ایس جی سی) اور سوئی نادرن گیس پائپ لائن (ایس این جی پی ایل) کی جانب سے گیس پائپ لائنز گنجائش کے لیے ٹھوس وعدے کے منتظر ہیں۔

گیس کمپنیوں کا کہنا تھا کہ وہ ایل این جی پائپ لائن کی گنجائش مختص کے لیے کابینہ کی تشکیل دی گئی کمیٹی کے فیصلے کے تحت منصوبے کی تکمیل سے قبل پائپ لائن کی گنجائش مختص کرنے کی پابند نہیں ہیں۔

انرگیس کے ایک سینئر عہدیدار نے ڈان کو بتایا کہ تعبیر اور انرگیس دونوں نے ایس ایس جی سی اور ایس این جی پی ایل سے درخواست کی تھی کہ انہیں ان کے ٹرمینلز کی مشترکہ گنجائش 1500 ملین کیوبک فیٹ روزانہ کی صرف 40 فیصد پائپ لائن گنجائش مختص کردیں۔

تاہم دونوں گیس کمپنیوں نے درخواست یہ کہتے ہوئے مسترد کردی کہ ان کے پاس اضافی گنجائش نہیں ہے۔

عہدیدار نے دعویٰ کیا کہ ایس ایس جی سی اور ایس این جی پی ایل دونوں کے پاس نئے ٹرمینلز کو مختص کرنے کے لیے 400 اور 600 ایم ایم سی ایف ڈی گنجائش اضافی ہوتی ہے۔

ان کا کہنا تھا کہ اس گنجائش کو تبادلے کے انتظام سے بڑھایا بھی جاسکتا ہے جس کے تحت گیس کمپنیاں سسٹم گیس کی جگہ پرائیویٹ ٹرمینلز کے ذریعے لائی گئی ایل این جی کو اجازت دیں گی۔

تاہم ایس ایس جی سی اور ایس این جی پی ایل چاہتی ہیں کہ اوگرا کی جانب سے متعین 6 فیصد نقصانات کے بجائے وہ 10 سے 18 فیصد یو ایف جی (ان اکاؤنٹڈ گیس) کی لاگت برداشت کریں۔

تعبیر اور انرگیس کو پاکستان میں ری گیسیفایئڈ نیچرل گیس (آر ایل این جی) کی فروخت سے متعلق ریگولیٹڈ سرگرمی کرنے کے لیے جنوری میں لائسنس دیے گئے تھے۔

دونوں آر ایل این جی کمپنیوں کے ٹرمینلز پر تعمیراتی کام شروع کرنے سے قبل آخری مرحلے میں اوگرا اور ریگولیٹر کی جانب سے تعمیراتی لائسنس اور دونوں گیس کمپنیوں سے گیس منتقلی کا معاہدہ شامل ہے۔

اوگرا نے پیر کے روز کراچی میں عوامی سماعت کا انتظام کیا ہے جو ان ٹرمینلز کے سرمایہ کاروں کو ترقیاتی لائسنس دینے کے عمل کو تیز کرے گی۔

ٹرمینلز کے ڈیولپرز کی جانب سے طویل عرصے سے سرکاری گیس کمپنیوں پر ان کے منصوبوں کی راہ میں رکاوٹ ڈالنے کا الزام لگایا جارہا ہے تاہم گیس کمپنیوں کا مؤقف کچھ اور ہی کہتا ہے۔

مارچ 2021ء میں ملکی درآمدات 3سال کی بلند ترین سطح 5.66 ارب ڈالر پر پہنچ گئیں۔

درآمدات میں اضافہ اس امر کا اشارہ ہے کہ کووڈ کی تیسری لہر کے دوران ملک میں اقتصادی سرگرمیاں فروغ پارہی ہیں۔ تاہم بڑھتی ہوئی درآمدات کی وجہ سے کرنٹ اکاؤنٹ خسارے میں بھی اضافہ متوقع ہے۔ اہم درآمدات میں چینی، تیل اور گیس، کھادیں، حشرات کش ادویہ، آٹوموبائل، موبائل فون اور صنعتی مشینری اور آلات شامل ہیں۔

مارچ 2020ء میں درآمداتی بل کا حجم 3.30 ارب ڈالر تھا جو مارچ 2021ء میں 71 فیصد اضافے سے 5.66 ارب ڈالر کی بلند سطح پر پہنچ گیا ہے۔ کرنٹ اکاؤنٹ خسارہ بڑھنے سے بین الاقوامی ادائیگیوں کی گنجائش محدود ہوجائے گی۔

عارف حبیب لمیٹڈ کے ریسرچ ہیڈ طاہر عباس نے کہا کہ حالیہ تجارتی اعدادوشمار اس بات کی غمازی نہیں کرتے کہ معیشت نمو پارہی ہے۔ اچھی بات یہ ہے کہ مارچ میں درآمدات کے ساتھ ساتھ برآمداتی حجم بھی وسیع ہوا ہے۔

پاکستان بیورو آف اسٹیٹکس کے مطابق مارچ میں برآمدات 31 فیصد اضافے سے 2.36 ارب ڈالر رہیں۔ مسئلہ یہ ہے کہ درآمدات کے مقابلے میں برآمدات میں اضافے کی رفتار آدھی بھی نہیں ہے۔ طاہر عباس کے مطابق بیرون ملک ملک کارکنان کی ترسیلاتِ زر جاری کھاتے کا خسارہ متوازن رکھنے میں مددگار ثابت ہوئی ہیں۔

ملک بھر میں ہفتہ وار بنیادوں پر مہنگائی کی شرح میں 0.54 فیصد کا اضافہ ریکارڈ کیا گیا۔

ادارہ شماریات کی طرف سے جاری کردہ رپورٹ کے مطابق ایک ہفتے میں کیلے، ٹماٹر، آلو، آٹا، گوشت گھی مہنگا ہوگیا۔ حالیہ ہفتے کیلا 16 روپے 22 پیسے فی درجن مہنگے ہوا۔ ٹماٹر 7روپے 16 پیسے، آلو 3روپے 17 پیسے فی کلو مہنگے ہوئے۔ 20کلو آٹے کا تھیلا 26 روپے 9 پیسے مہنگاہوا۔

ادارہ شماریات کے مطابق 20 کلو آٹے کے تھیلے کی قیمت 988 روپے 36 پیسے ہوگئی ہے۔ ایک ہفتے میں بیف 4روپے 62 پیسے ، مٹن 6 روپے 72 پیسے فی کلو مہنگاہوا۔ بیف کی فی کلو قیمت 494روپے 32 پیسے مٹن 1030 روپے 55 پیسے فی کلو کا ہوگیاہے۔

رپورٹ کے مطابق ایک ہفتے میں برائلر مرغی کی قیمت بھی ایک روپے 20 پیسے فی کلو بڑھی، ڈالڈا کوکنگ آئل 5 روپے 95 پیسے مہنگاہوا، ڈالڈا، حبیب گھی کا اڑھائی کلو کا ڈبہ 1 روپے 77 پیسے مہنگاہوا۔

ادارہ شماریات کے مطابق ایک ہفتے میں 11 اشیائے ضروریہ کی قیمتوں میں کمی ہوئی، حالیہ ہفتے لہسن 7 روپے 35 پیسے فی کلو سستا ہوا، دال چنا 3 روپے 92 پسے دال مسور2 روپے 70پیسے سستی ہوئی۔ دال ماش 4 روپے 22 پیسے فی کلو سستی ہوئی، ایل پی جی کا گھریلو سلنڈر 16روپے 59 پیسے سستا ہوا، چینی 72 پیسے فی کلوسستی ہوئی، چینی کی اوسط قیمت 97 روپے 10 پیسے فی کلو ہوگئی ہے۔

بین الاقوامی بلین مارکیٹ میں فی اونس سونے کی قیمت 30 ڈالر کے اضافے سے 1777ڈالر کی سطح پر پہنچ گئی۔

بین الاقوامی منڈی میں اضافے کے بعد مقامی صرافہ مارکیٹوں میں بھی فی تولہ اور فی دس گرام سونے کی قیمتوں میں بالترتیب 1300روپے اور 1115روپے کا اضافہ ہوا۔ جس کے بعد کراچی، حیدرآباد، سکھر، ملتان، لاہور، فیصل آباد، راولپنڈی، اسلام آباد، پشاوراور کوئٹہ کی صرافہ مارکیٹوں میں فی تولہ سونے کی قیمت بڑھ کر 104300روپے اور فی دس گرام سونے کی قیمت بڑھ کر 89420روپے ہوگٸی ہے۔

جب کہ فی تولہ چاندی کی قیمت 30روپے اضافے کے بعد 1360روپے اور دس گرام چاندی کی قیمت 25.72روپے اضافے کے بعد 1165.98روپے ہوگئی.

عالمی بینک نے پاکستان کے لیے ایک ارب 50 کروڑ ڈالر مالیت کے نئے قرض کے لیے کڑی شرائط عائد کی ہیں۔

عالمی بینک نے پاکستان کو 1 ارب 50 کروڑ مالیت کا نیا قرض فراہم کرنے کے لیے کڑی شرائط پیش کی ہیں جن میں بجلی کی قیمتوں میں اضافہ، توانائی اور ٹیکس کے حوالے سے نئی پالیسیوں کو متعارف کرانا شامل ہے۔

ماہرین کا کہنا ہے کہ عالمی بینک کی ان شرائط نے حکومت کو مشکلات میں ڈال دیا ہے جو پہلے ہی عالمی مالیاتی فنڈ (آئی ایم ایف) سے قرض کی نئی قسط کی حصول کی خواہاں ہے۔

حکومت کو بجلی سپورٹ کی مد میں جون کے اختتام سے قبل 1 ارب 50 کروڑ ڈالر درکار ہیں اور اس حوالے سے حال ہی میں اپنی ذمہ داریوں سے سبکدوش ہونے والے وزیر خزانہ حماد اظہر نے ایک اجلاس کی صدارت کی جس میں عالمی بینک کے نئے قرض اور اس کی شرائط پر غور کیا گیا۔

عالمی بینک نے جو شرائط پیش کی ہیں وہ پہلے ہی آئم ایم ایف پروگرام کا حصہ ہیں جس پر تین ہفتے پہلے ہی آئی ایم ایف اور حکومت کے درمیان جائزہ اجلاس ہوا اور اب حکومت دوبارہ اس حوالے سے بات چیت کا ارادہ رکھتی ہے اور حال ہی میں وزیر خزانہ منتخب ہونے والے شوکت ترین نے واضح طور پر کہا ہے کہ وہ آئی ایم ایف سے دوبارہ مذاکرات کریں گے۔

ذرائع کا کہنا ہے کہ عالمی بینک سے قرض کی منظوری کی صورت میں حکومت پاکستان کو جون میں بجلی کی قیمتوں میں ایک روپے 39 پیسے جبکہ جولائی میں 2 روپے 21 پیسے فی یونٹ اضافہ کرنا ہوگا۔

پاکستان کے شماریات بیورو (پی بی ایس) کے جاری کردہ اعداد و شمار کے مطابق پاکستان میں ٹیکسٹائل اور لباس کی برآمدات ویلیو ایڈڈ سیکٹر کی بدولت مارچ میں مستحکم ہوئیں اور ایک سال پہلے کے مقابلے میں اس میں 30.4 فیصد کا اضافہ ریکارڈ کیا گیا۔

رپورٹ کے مطابق ان شعبوں کی برآمدی مالیت مارچ میں ایک ارب 35 کروڑ 50 لاکھ ڈالر رہی جو گزشتہ سال کے اسی مہینے کے دوران ایک ارب 3 کروڑ ڈالر تھی۔

ویلیو ایڈڈ سیکٹر کی برآمدات میں نمو سے مجموعی برآمدات میں اضافہ ہوا۔

فروری میں ٹیکسٹائل اور کپڑوں کی برآمد میں سال بہ سال بنیادوں پر 3.12 فیصد کی کمی واقع ہوئی۔

جولائی تا مارچ کے اعداد و شمار کے مطابق ٹیکسٹائل اور کپڑوں کی برآمدات میں اضافہ ویلیو ایڈڈ سیکٹر سے ہوا ہے۔

رواں سال جولائی تا مارچ کے عرصے میں برآمدات کی مالیت 11 ارب 35 کروڑ ڈالر تک پہنچی گئی تھی جبکہ گزشتہ برس کے ان ہی مہینوں کے دوران 10 ارب 41 کروڑ ڈالر تھی جو 9.06 کی نمو کو ظاہر کرتی ہے۔

کابینہ کی اقتصادی رابطہ کمیٹی (ای سی سی) نے حال ہی میں بھارت سے کپاس اور دھاگےکی درآمد کی اجازت دی تھی لیکن وفاقی کابینہ نے اس فیصلے کو موخر کردیا تھا۔

ویلیو ایڈڈ سیکٹر کے لیے دھاگے کی قلت کے مسئلے کو حل کرنے کے لیے ای سی سی نے اپنے آخری اجلاس میں اس کی ڈیوٹی فری درآمد کی اجازت دی۔

جس کے بعد ویلیو ایڈڈ سیکٹر کے لیے آرڈرز برقرار رکھنا مشکل ہوگا۔

حکومت نے گھریلو مارکیٹ میں دھاگے کی بروقت دستیابی میں آسانی پیدا نہیں کی۔

پروڈکٹ وار تفصیلات کے مطابق تیار شدہ ملبوسات کی برآمدات میں 22.9 فیصد، نٹ ویئر میں 49.64 فیصد، بیڈ ویئر میں 43.71 فیصد اور تولیے میں 20.95 فیصد اصافہ دیکھنے میں آیا۔

حکومت پہلے ہی صنعتی خام مال پر ڈیوٹی اور ٹیکس ختم کرنے کے ساتھ ساتھ برآمد کنندگان کو ماضی میں زیر التوا رقم کی واپسی کی ادائیگی کرچکی ہے۔

روپے کی قدر میں کمی اور شرح سود کم ہونے سے خاص کر برآمدی صنعتوں کی نمو میں تیزی آئی ہے۔

پی بی ایس کے اعداد و شمار کے مطابق گزشتہ برس مارچ میں دھاگے کی برآمد میں 39 فیصد، سوتی کپڑے میں 8.7 فیصد اور سوتی کارڈڈ میں 100 فیصد ہوا ہے۔

جبکہ رواں سال کے مارچ میں میں روئی کے سوت کے علاوہ سوت کی برآمد میں بھی 56.87 فیصد کا اضافہ ریکارڈ کیا گیا۔

وفاقی حکومت نے روایتی سرنج کی درآمد پر پابندی عائد کر دی ہے۔

وزارت تجارت کی جانب سے روایتی سرنج کی درآمد پر پابندی کا نوٹیفکیشن بھی جاری کر دیا گیا ہے۔

اعلامیے کے مطابق 2ملی لیٹر، 2.5 ملی لیٹر، 3 ملی لیٹر اور 5 ملی لیٹر کی سرنج کی درآمد پر پابندی ہو گی۔

ذرائع کے مطابق روایتی سرنج کے دوبارہ استعمال ہونے کے باعث پابندی عائد کی گئی ہے، گزشتہ ماہ حکومت نے آٹو ڈسپوزیبل سرنج کی درآمد پر ڈیوٹیاں ختم کی تھیں۔

کابینہ کمیٹی برائے توانائی نے پاور ڈویژن کے تحفظات کے باوجود صنعتی صارفین کے لیے مہنگے پیک چارجز کے بغیر بجلی کے یکساں نرخوں کی منظوری دے دی۔

رپورٹ کے مطابق اس کے ساتھ ہی کمیٹی متبادل توانائی کے 100 منصوبوں کے مستقبل پر پاور ڈویژن اور پاور ریگولیٹر کا تنازع نہیں حل کرسکی۔

کابینہ کمیٹی برائے توانائی کا اجلاس وزیر منصوبہ بندی اسد کی سربراہی میں ہوا، کمیٹی نے 2 نومبر 2020 کو صنعتی صارفین کے لیے بجلی کے استعمال کے وقت کی ٹیرف اسکیم ختم کردی تھی۔

جس کے تحت پیک اور آف پیک اسٹرکچر کو 30 اپریل 2021 تک ختم کیا گیا تھا اور اس کو جاری رکھے کے لیے 31 مارچ یا اپریل تک نظرِ ثانی کی جانی تھی۔

باخبر ذرائع نے بتایا کہ پاور ڈویژن نے اس سے متعلق سمری پیش کی اور بتایا کہ نومبر سے فروری کے عرصے میں اوسطاً بجلی کی کھپت میں 21 فیصد اضافہ دیکھا گیا جس میں صرف فروری میں پیک ٹائم کے دوران کھپت 28 فیصد زیادہ رہی۔

دیگر کیٹیگریز میں بی-3 اور بی-2 میں زیادہ کھپت ہوئی اور مجموعی سبسڈی 7 ارب 75 کروڑ روپے کی رہی۔

ایک اعلامیے میں کہا گیا کہ ‘پاور ڈویژن کی سمری پر کابینہ کمیٹی برائے توانائی نے صنعتی صارفین کے لیے ٹی او یو ٹیرف اسکیم کو یکم مئی 2021 سے 30 جون 2022 تک توسیع دینے کی منظوری دی ہے۔

پاور ڈویژن نے مطالبہ کیا تھا کہ اس اسکیم کو مئی تا ستمبر کے اہم مہینوں میں معطل کیا جائے کیوں کہ اس کے لیے اضافی 26 ارب روپے کی سبسڈی درکار ہوگی جو ترسیلی اور تقسیم کار حد بندیوں کے باعث اتنی زیادہ کھپت کے ساتھ جاری رکھنا تکنیکی طور پر ناقابل عمل ہوگا۔

خاص کر جب فرنس آئل اور ڈیزل سے چلنے والے پلانٹس کو استعمال کرنا پڑے، بصورت دیگر شدید لوڈشیڈنگ اور ٹرپنگ ہوگی۔

پاور ڈویژن نے تجویز دی تھی کہ مناسب کھپت کے طریقوں اور وسائل کے بہت استعمال کو برقرار رکھنے کے لیے مراعات ستمبر کے اواخر میں واپس لائی جاسکتی ہیں۔

اجلاس کے کچھ شرکا نے کہا کہ صنعتی پیداوار کی رفتار میں مدد کرنی چاہیے تاکہ حالیہ مہینوں میں پیداوار کے اچھے اعداد و شمار جاری رہ سکیں۔

کمیٹی نے پاور ڈویژن کی ایک اور سمری پر غور کیا جس میں یہ تجویز کیا گیا تھا کہ نیپرا کو جنریشن ٹیرف اور لائسنسوں کو زمرہ – III منصوبوں کے حوالے سے واپس لینے کی ہدایت کی جاسکتی ہے کیونکہ ان کے تعین معاملے منظور شدہ پالیسیوں کے مطابق نہیں تھے۔

علاوہ ازیں سمندری امور ڈویژن نے پورٹ قاسم کراچی پر 2 نئے ایل این جی ٹرمینلز کے قیام کی پیش رفت سے متعلق رپورٹ پیش کی۔

اجلاس کو بتایا گیا کہ وزارت سمندری امور کی سربراہی میں ذیلی کمیٹی نئے ٹرمینلز کے قیام کے عمل کو آسان بنانے کے لیے باقاعدگی سے اجلاس منعقد کررہی ہے۔

اقوام متحدہ کی رپورٹ میں کہا گیا ہے کہ نیپرا اور اوگرا کے ناقص اقدامات کی وجہ سے اصل صارفین پر اخراجات کا بوجھ بڑھ جاتا ہے۔ پاکستان میں نظام انصاف کا جھکاؤ امیر اورطاقتور کی طرف نظر آتا ہے۔

پاکستان میں عدم مساوات کی وجوہات پر بنائی گئی اقوام متحدہ کی رپورٹ میں بتایا گیا ہے کہ سٹیٹ بینک مالیاتی شعبے میں کریڈٹ سہولیات پر متعلق بڑھتی اجارہ داری پر قابو پانے میں بے بس دکھائی دیتا ہے۔ ایس ای سی پی سٹاک مارکیٹ پر لوگوں کا اعتماد بڑھانے میں ناکام دکھائی دیتا ہے۔

رپورٹ کے مطابق مسابقتی کمیشن منصفانہ قیمتیں یقینی بنانے میں غیر فعال دکھائی دیتا ہے۔ ریگولیٹری شعبہ ملک میں اجارہ داری اور کارٹلز ختم کرنے میں بری طرح ناکام ہے۔ جن صنعتوں میں کارٹلرز دھوکہ دہی کے طریقے اپنائے ان مین سیمنٹ،چینی، موٹر گاڑیاں، آٹو پارٹس، ادویہ سازی سر فہرست ہیں۔

اقوام متحدہ کی رپورٹ کے مطابق اگرملک کی اصل دولت لوگ ہوتے ہیں تو پاکستان اس دولت سے مالامال غریب ملک ہے، پاکستان میں امیر کو بہترین مواقع جبکہ غریب روکھی سوکھی پر گزر بسر کرنے پر مجبور ہے۔

رپورٹ میں بتایا گیا کہ پاکستان میں نظام انصاف کا جھکاؤ امیر اورطاقتور کی طرف نظر آتا ہے۔ رسمی نظام انصاف کم آمدنی والے طبقے کی پہنچ سے باہر ہے۔ طاقتور طبقہ اور کمزور طرز حکمرانی پاکستان میں عدم مساوات کو بڑھانے کا سبب بن رہے ہیں۔

رپورٹ کے مطابق پاکستان میں مخصوص مفادات کے حامل طبقات کی مراعات کی مالیت 18-2017 میں 2660 ارب روپے بنتی ہے۔ صنعتی اور بینکاری شعبہ سب سے زیادہ مرعات حاصل کررہا ہے۔ جاگیردارنہ طبقہ 370 ارب روپے، بڑے تاجر 348 ارب روپے کی مرعات کے مزے لوٹ رہے ہیں۔

رپورٹ کے مطابق ریاست کے ملکیتی ادارے 345 ارب اور ایکسپورٹرز 248 ارب روپے کی مراعات لے رہے ہیں، مخصوص مفادات کے لوگ جوڑ توڑ کے ذریعے لاتعداد قسم کی ٹیکس چھوٹ حاصل کرلیتے ہیں۔ ٹیکسوں نے آمدنی کی تقسیم کا جھکاؤ امیروں کی طرف کم کرنے میں محدود کردار اداکیا ہے۔