Archives November 2021

جڑانوالہ میں دیرینہ دشمنی پر دو بھائیوں کو قتل کر دیا گیا،، ملزم فائرنگ کرتے فرار ہوگئے،،
تھانہ لنڈیانوالہ کی حدود میں دیرینہ دشمنی پر موٹرسائیکل سواروں نے اندھا دھند فائرنگ کرکے اشتیاق اور جاوید کو قتل کر دیا، مقتولین کا ایک بھائی بھی تین سال قبل قتل ہوا تھا،، ملزم دونوں کو مقدمہ کی پیروی سے روکتے تھے،، پولیس نے لاشوں کو پوسٹ مارٹم کے لئے ہسپتال منتقل کیا،، ملزموں کی گرفتاری کے لئے چھاپے مارے گئے مگر کوئی گرفتاری عمل میں نہ آئی۔

موٹروے ایم ٹو پر شدید دھند کے باعث شیخوپورہ میں 3 مقامات پر درجنوں گاڑیاں آپس میں ٹکرا گئیں، حادثے میں 20سے زائد افراد زخمی ہوگئے۔
موٹروے ایم ٹو پر صبح ہی شدید دھند چھاگئی، جس سے لاہور تا شیخوپورہ سیکشن میں 3مقامات کالاشاہ کاکو، خان پور اور قلعہ ستار شاہ کے قریب درجنوں گاڑیاں آپس میں ٹکرا گئیں، جس سے 20سے زائد افراد ذخمی ہوگئے۔
اطلاع ملتے ہیں ریسکیو 1122 کے اہلکار موقع پر پہنچے اور امدادی کاروائیاں کرتے ہوئے 12افراد کو ڈی ایچ کیو ہسپتال منتقل کر دیا جبکہ دیگر مسافروں کو موقع پر طبی امداد دی گئی۔ حادثے کے باعث موٹروے پر گاڑیوں کی لمبی لائنیں لگ گئیں اور موٹروے کو بند کر دیا گیا۔

مصطفی کمال نے سندھ حکومت کو شدید تنقید کا نشانہ بناتے ہوئے کہا ہے کہ سندھ حکومت کرپشن میں ملوث ہے، فائلوں پر دستخط کروا کر تمام رقم لے لی جاتی ہے، سندھ میں تعلیم کا نظام تباہ ہوگیا، تھر میں بچے بھوک سے مر رہے ہیں۔
پاک سر زمین پارٹی کے سربراہ مصطفی کمال نے کراچی میں پریس کانفرنس کرتے ہوئے کہا کہ پیپلزپارٹی کی سندھ حکومت سکیورٹی رسک ہے، پیپلزپارٹی کی حکومت سندھ کے لوگوں میں احساس محرومی پیدا کر رہی ہے، ایسےنظام میں سیاست ختم ہو جانی چاہیے۔ پی ایس پی کے لوگ حکومت کے نہیں، ریاست کے وفادار ہیں، ریاست ہماری ہے، جسے پیپلزپارٹی خراب کر رہی ہے۔
مصطفیٰ کمال کا کہنا تھا کہ چترال کے لوگوں کی ڈیمانڈ ہے کہ وہاں کے قومی و صوبائی اسمبلیوں کی نشتوں میں اضافہ کیا جائے، چترال میں قومی اسمبلی کی 2 جبکہ صوبائی اسمبلی کی 4 نشتیں ہوا کرتی تھیں، موجودہ حکومت کے آنے کے بعد چترال کی ایک قومی اور 2 صوبائی اسمبلی کی نشستیں کر دی گئی ہیں۔

شاہد خاقان عباسی نے کہا ہے کہ مہنگائی میں روز بروز اضافہ ہو رہا ہے، آئی ایم ایف معاہدے سے مہنگائی کا ایک نیا سیلاب آئے گا، حکومت پوری طرح ناکام ہوچکی ہے۔
رہنما شاہد خاقان عباسی نے میڈیا سے گفتگو کرتے ہوئے کہا کہ ملکی مسائل کے حل کیلئے فوری شفاف انتخابات کرائے جائیں، حکومتی چوری پر پردہ ڈالنے کی کوشش کی جا رہی ہے، 3 سال ہوگئے قرضہ کمیشن کی رپورٹ سامنے نہیں آئی،
شاہد خاقان عباسی کا کہنا تھا کہ حکومت پوری طرح ناکام ہوچکی، ملکی مسائل کا حل شفاف اور فوری انتخابات ہیں، ہم نے 5 سال کسی کو سیاسی انتقام کا نشانہ نہیں بنایا، نیب کے ہوتے ہوئے ملک نہیں چل سکتا، چیئرمین نیب بتائیں کس سیاستدان سے کتنے پیسے ریکور کیے؟ مریم نواز نے کوئی قانون توڑا ہے تو کارروائی کریں۔

پنجاب کے نئے بلدیاتی نظام بارے آرڈیننس کے اجرا کے معاملے پر حکومت پنجاب کی سیاسی ٹیم نے چودھری پرویز الہی سے ملاقات کا فیصلہ کرلیا۔ ملاقات وزیراعلی پنجاب عثمان بزدار کی ہدایات کی روشنی میں کی جائے گی۔
وزیراعلی پنجاب عثمان بزدار سے سیکرٹری بلدیات نور الامین مینگل نے ملاقات کی، سیکرٹری بلدیات نور الامین مینگل نے چودھری پرویز الہی سے ملاقات کی تفصیلات سے آگاہ کیا۔ وزیراعلی کو مسلم لیگ ق کی جانب سے نئے بلدیاتی نظام میں تحصیل کونسلز کا سسٹم لانے کے لئے دی جانے والی تجویز سے آگاہ کیا گیا۔ سیکرٹری بلدیات نے وزیراعلی کو اتحادی مسلم لیگ ق کی جانب سے میئر اور ضلع کونسل کے چیئرمین کے لئے تعلیمی شرط رکھنے کی تجویز سے بھی آگاہ کیا۔

بلاول بھٹو زرداری نے کہا ہے کہ عوام کے حق حاکمیت کیلئے جدوجہد جاری رکھیں گے، وقت آگیا اب پاکستان میں حقیقی جمہوریت کو موقع دیا جائے، لاڈلہ سازی کا خاتمہ کرنا ہوگا۔
چیئرمین پاکستان پیپلزپارٹی بلاول بھٹو زرداری نے پارٹی کے 54 ویں یوم تاسیس پر اپنے پیغام میں مبارکباد دی اور کہا کہ طویل جدوجہد اور بے مثال قربانیوں کے بعد اب پاکستان میں جمہوریت کا ترجمہ پاکستان پیپلز پارٹی ہے، پارٹی کا منشور و لائحہ عمل ہی اب 22کروڑ پاکستانیوں کے وطن کو ایک حقیقی جمہوری و فلاحی ریاست بنانے کا واحد راستہ ہے۔
بلاول بھٹو زرداری کا کہنا تھا کہ پاکستان پیپلزپارٹی ایک تحریک، جس کی اساس قائدِ عوام کا نظریہ، شہید محترمہ بینظیر بھٹو کا فلسفہ، اور کئی نسلوں کی جدوجہد و قربانیاں ہیں، پیپلزپارٹی نے مشکل ترین حالات کا مقابلہ کر کے بھی ملک و قوم کو بیش بہا اسٹریٹجک تحفے دیئے۔

قائد حزب اختلاف شہباز شریف نے ملکی معاشی صورتحال کو خطرناک ترین قرار دیتے ہوئے کہا کہ آئندہ برس تنخواہوں، پنشن اور حکومت چلانے کیلئے قرض لینا پڑے گا۔
صدر مسلم لیگ ن شہباز شریف نے اپنے بیان میں کہا کہ کرنٹ اکاﺅنٹ خسارے میں تاریخی اضافہ کے نتیجے میں ڈالرز میں قرض لینا پڑے گا، ڈالرز میں قرض نہ لیا تو پھر غیرملکی زرمبادلہ کے ذخائر تیزی سے گریں گے، حکومت مسلسل جھوٹ بول رہی ہے کہ ماضی کے قرض کی ادائیگی کے لئے قرض لے رہی ہے۔
شہباز شریف کا کہنا تھا کہ حقائق اور دستاویزات پی ٹی آئی حکومت کے اس جھوٹ کی نفی کر رہے ہیں، یہ سب قرض قومی معیشت کی تباہی، غلط فیصلوں اور معاشی غلط حکمت عملی کا نتیجہ ہے، غلط معاشی پالیسیوں کے نتیجے میں قومی معیشت کو قرض پر چلنی والی اکانومی بنا دیا گیا، نواز شریف دور میں قومی معیشت، قومی آمدن بڑھ رہی تھی، نواز شریف دور میں شرح ترقی میں اضافے سے معیشت دوبارہ زندہ ہو رہی تھی، آئی ایم ایف سے موجودہ معاہدہ پاکستان کی معیشت کی بنیاد میں بارود بھرنے کے مترادف ہے۔

اسلام آباد ہائیکورٹ نے سابق چیف جج گلگت بلتستان اور دیگر کیخلاف توہین عدالت کیس میں رانا شمیم سے جواب طلب کرلیا۔ عدالت نے سابق جج رانا شمیم کو اصل بیان حلفی بھی پیش کرنے کا حکم دے دیا۔ سابق چیف جج گلگت بلتستان رانا شمیم نے بیان دیا کہ ان کا بیان حلفی سربمہر تھا جو انہوں نے اشاعت کے لیے نہیں دیا تھا اور انہیں نہیں معلوم یہ کیسے لیک ہوا۔
اسلام آباد ہائیکیورٹ نے سابق چیف جج رانا شمیم اور دیگر کیخلاف توہین عدالت کیس کی سماعت کی۔ چیف جسٹس ہائیکورٹ نے استفسار کیا آپ بیان حلفی کے مندرجات کو تسلیم کرتے ہیں؟ جس پر سابق چیف جج رانا شمیم نے کہا کہ مجھے نہیں معلوم جو بیان حلفی رپورٹ ہوا، وہ کونسا ہے؟ میرا بیان حلفی سیل شدہ اور لاکر میں ہے، مجھے نہیں معلوم کہ وہ کس طرح لیک ہوا؟ مجھے جواب جمع کرانے کیلئے 2 ہفتے کا وقت دیا جائے۔
جسٹس اطہر من اللہ نے سوال کیا کہ آپ نے لندن میں بیان حلفی کسی مقصد کے لیے دیا؟ عدالت آپ کو 5 دن دے رہی ہے، اپنا جواب جمع کرائیں، آپ بتائیں کہ 3سال بعد یہ بیان حلفی کس مقصد کے لیے دیا گیا؟ آپ نے عوام کا عدالت سے اعتماد اٹھانے کی کوشش کی، آپ نے جو کچھ کہنا ہے اپنے تحریری جواب میں لکھیں۔
اٹارنی جنرل نے عدالت کو بتایا کہ آج کل عدلیہ کی توہین اور متنازع بنانے کا سیزن ہے، جس شخص نے بیان حلفی دیا اسے یاد نہیں کہ بیان حلفی میں کیا لکھا ہے، اگر انہیں نہیں معلوم تو پھر یہ بیان حلفی کس نے تیار کرایا؟ ایک شخص لندن جا کر بیان حلفی لکھواتا ہے اور بھول کیسے جاتاہے؟۔
چیف جسٹس اطہرمن اللہ نے ریمارکس دیئے کہ رانا شمیم اصل بیان حلفی کے ساتھ تحریری جواب داخل کریں، رانا صاحب کی آج کی اسٹیٹمنٹ بہت خطرناک ہے، سیاسی بیانیے کیلئے عدالت کو استعمال نہیں کرنا چاہیئے، اصل بیان حلفی مختلف ہوا تو اخبار پر بڑا سوالیہ نشان لگ سکتا ہے۔
اسلام آباد ہائیکورٹ نے کہا کہ رانا شمیم شوکاز نوٹس کا تحریری جواب بھی جمع کرائیں، میں توہین عدالت پر یقین نہیں رکھتا، ججزکوتنقید کا سامنا کرنا چاہیے، سیاسی بیانیے کے لیے کم ازکم اس ہائیکورٹ کو بدنام کرنے سے باز رہیں۔
اٹارنی جنرل کے مؤقف پر عدالت نے رانا شمیم کو اوریجنل بیان حلفی کے ساتھ تحریری جواب داخل کرنے کا حکم دے دیا۔

امریکی گلوکارہ لیڈی گاگا نےکہا ہے کہ انہیں اداکاری کے آغاز میں اپنے کام کو بہتر بنانے میں بہت مشکل پیش آئی جس کا حل انہوں نے خود کو تھپڑمارکرنکالا،
ایک انٹرویو میں لیڈی گاگا کا کہنا تھا کہ جب میں نے فلم “اے سٹار از بورن” شروع کی تو ایک منظر فلمانے کے بعد جب میں اپنے اندر بہتری لانے کیلئے الفاظ کا سہارا نہیں لے سکتی تھی تو میں نے خود کو تھپڑ مارا اور کہا کہ آپ کو وہ تمام کام چھوڑنے ہوں گے جو آپ کرتی رہی ہیں، پھر میں نے بہت تیزی سے سیکھا۔

بالی وڈ سپرسٹار سلمان خان آئندہ ماہ اپنی بھانجی علیزے کو بالی وڈ میں متعارف کروائیں گئے،
علیزے بہت جلد ایک رومانٹک فلم میں نظر آئیں گی جس کو سلمان خان خود پروڈیوس کر رہے ہیں، سلو میاں خود علیزے کے کیریئر میں دلچسپی لے رہے ہیں اور گذشتہ کئی دنوں سے بھانجی کی ٹریننگ بھی کر رہے ہیں،
سلمان خان علیزے کی فلم کی شوٹنگ آئندہ سال شروع کریں گے، امید کی جا رہی ہے فلم 2023میں ریلیز ہو گی، اس سے قبل یہ خبریں بھی سامنے آئی تھیں کہ علیزے سلمان کے قریبی دوست سورج کی فلم میں نظر آئیں گی تاہم ایسا نہیں ہو سکا۔