Category انٹرنیشنل

نئے غلافِ خانہ کعبہ کو تبدیل کرنے کے لیے اسے مسجد الحرام تک ٹرکوں کے ذریعے منتقل کرنے کی تیاری مکمل کرلی گئی ہے۔

عرب میڈیا کے مطابق غلافِ کعبہ کی نقل و حمل کے لیے ٹرکوں کا انتظام کیا گیا ہے جن پر غلاف کو حفاظتی اقدامات کے ساتھ رکھا جائے گا۔

اس حوالے سے عرب میڈیا کا کہنا ہے کہ غلاف کے مختلف حصوں کو ٹرکوں پر رکھنے کے بعد انہیں مسجد الحرام لے جایا جائے گا۔

عرب میڈیا کے مطابق اس حوالے سے ٹرکوں کی تیاری اور حفاظتی اقدامات کی تصدیق بھی کردی گئی ہے۔

واضح رہے کہ خانہ کعبہ کے غلاف کو یکم محرم الحرام کو تبدیل کیا جائے گا۔

عرب میڈیا کے مطابق اس حوالے سے تیاریاں کر لی گئی ہیں اور 15 افراد کو خصوصی تربیت فراہم کی گئی ہے۔

اس حوالے سے کسوہ فیکٹری کی انتظامیہ نے بتایا ہے کہ غلافِ کعبہ پر لکھی قرآنی آیات کو سونے اور چاندی کے دھاگوں سے بُنا گیا ہے۔

کسوہ فیکٹری کی انتظامیہ کے مطابق غلافِ کعبہ کی تیاری کے لیے 120 کلو گرام سونا، 100 کلو گرام چاندی اور 670 کلو ریشم استعمال کیا گیا ہے۔

متحدہ عرب امارات کے وزیراعظم شیخ محمد بن راشد المکتوم کو دبئی کی ایک لفٹ میں دیکھ کر بھارتی فیملی کے تمام فرد حیران رہ گئے۔

بھارتی میڈیا کے مطابق انس رحمٰن جنید اپنی فیملی کے ہمراہ چھٹیوں پر دبئی میں تھے کہ اسی دوران ان کی لفٹ میں متحدہ عرب امارات کے وزیراعظم بھی آگئے۔

مقامی اخبار کے مطابق ہفتے کو انس رحمٰن جنید 22 ویں منزل سے لفٹ میں موجود تھے تب شیخ محمد بن راشد المکتوم اپنے دیگر ساتھیوں کے ساتھ اسی لفٹ میں داخل ہوئے تھے۔

انس رحمٰن جنید نے مقامی اخبار کو بتایا کہ ہم انہیں دیکھ کر حیران رہ گئے تھے، ان کا رویہ بہت دوستانہ تھا، شیخ محمد بن راشد المکتوم نے میری بیٹی کے کندھے پر ہاتھ رکھا اور اس سے پوچھا کہ کیا وہ جانتی ہے کہ وہ کون ہیں۔

انس رحمٰن جنید نے کہا کہ شیخ محمد بن راشد المکتوم نے میری فیملی کے ساتھ بات چیت کی اور متعدد تصاویر بھی کھینچوائیں۔انہوں نے مزید کہا کہ ہمیں یقین نہیں آ رہا تھا کہ ہم واقعی وزیراعظم سے ملے تھے اور ان اس سے بات کی تھی۔ میری اہلیہ نے بعد میں لفٹ کی ایک تصویر لی اور اسے سوشل میڈیا پر شیئر کرتے ہوئے لکھا کہ یہ دنیا کی اس کی سب سے پسندیدہ لفٹ ہے۔

اس حوالے سے انس رحمٰن جنید نے سوشل میڈیا پر سارا واقعہ بھی بیان کیا ہے۔

انس رحمٰن جنید نے شیخ محمد بن راشد المکتوم کو انتہائی سادہ انسان قرار دیتے ہوئے لکھا کہ انہوں نے ہمیں تصاویر لینے کی اجازت دی اور ہم سے بات چیت بھی کی۔

امریکا کے کئی علاقوں میں گرمی خطرناک حد تک پہنچ جانے کی پیش گوئی کی گئی ہے۔

فلوریڈا سے لے کر کیلی فورنیا اور واشنگٹن تک، امریکا کی تقریباً ایک تہائی آبادی کو شدید گرمی کی وارننگ جاری ہو چکی ہے۔

دنیا کے گرم ترین علاقوں میں سے ایک کیلی فورنیا کی موت کی وادی میں درجہ حرارت  54  ڈگری سینٹی گریڈ تک پہنچنے کا امکان ہے۔

بھارتی ریاست اوڈیشا کے ایک نیوز چینل نے آرٹیفیشل انٹیلیجنس پر مبنی پہلی نیوز اینکر ’لیزا‘ کو متعارف کروایا ہے۔

بھارتی نیوز چینل کی جانب سے حال ہی میں ٹوئٹر پر شیئر کی گئی ایک ویڈیو میں اے آئی نیوز اینکر لیزا نے انتہائی جاندار اور اعتماد کے ساتھ اپنا تعارف کروایا۔

بھارتی میڈیا رپورٹس کے مطابق اے آئی نیوز اینکر لیزا کے پاس متعدد زبانیں بشمول اوڈیا، انگریزی اور دیگر بولنے کی صلاحیت موجود ہے۔

ریاست اوڈیشا سے تعلق رکھنے والے ٹی وی ’او ٹی وی‘  نے لیزا سے متعلق جاری کیے گئے اپنے بیان میں کہا ہے کہ لیزا کی اوڈیا زبان میں مہارت کو مزید بڑھانے کے لیے کوششیں جاری ہیں۔

واضح رہے کہ بھارتی صحافت کے شعبے میں اے آئی پر مبنی نیوز اینکر، لیزا مصنوعی ذہانت کی حامل پہلی نیوز اینکر نہیں ہے، دو سال قبل چین نے بھی اپنے اے آئی نیوز اینکر ’شنہوا‘ کو متعارف کرایا تھا۔

چینی اے آئی نیوز اینکر ’شنہوا تھری ڈی میں انسانی آوازوں، اشاروں اور طرز عمل کی نقل کر سکتا ہے۔

دوسری جانب رواں سال کے آغاز میں بھارتی میڈیا ہاؤس ’انڈیا ٹوڈے‘ گروپ نے بھی اپنی اے آئی نیوز اینکر ’ثنا‘ کو متعارف کروایا تھا۔

صحافت میں اب ’لیزا‘ نامی ایک اور اے آئی (Artificial Inteligence) کا قدم رکھنا اس بات کا ثبوت ہے کہ میڈیا انڈسٹری میں اے آئی کے استعمال کو آگے بڑھایا جا رہا ہے۔

جیمز ویب اسپیس ٹیلی اسکوپ نے سُپر سائز کا انتہائی قدیم بلیک ہول دریافت کر لیا۔

ماہرین کا خیال ہے کہ یہ بلیک ہول آج سے 13 ارب سال پہلے وجود میں آیا، یہ بلیک ہول ایک انتہائی عمر رسیدہ کہکشاں میں واقع ہے۔ 

ماہرین کا کہنا ہے کہ یہ کہکشاں بِگ بینگ کے 570 ملین سال بعد وجود میں آئی تھی۔ 

امریکی خلائی ادارے ناسا کے مطابق اس سُپر سائز بلیک ہول کا حجم ہمارے سورج سے 90 لاکھ گنا زیادہ بڑا ہے۔

سعودی عرب میں 2 شہریوں کو سزائے موت دے دی گئی ہے۔

2 سعودی شہریوں کو سزائے موت دیے جانے کی تصدیق سعودی وزارتِ داخلہ کی جانب سے کی گئی ہے۔

دونوں شہریوں نے سیکیورٹی اہلکار کو فائرنگ کر کے زخمی کیا اور فورس کی گاڑی پر حملہ کیا تھا۔سعودی وزارتِ داخلہ کے مطابق دونوں شہریوں نے ملک میں بد امنی پھیلانے کے لیے اسلحہ بھی جمع کیا تھا۔

روس کے زیر انتظام یوکرینی علاقے کریمیا کے پل پر ڈرون سے حملہ کیا گیا جس سے پل کو جزوی نقصان پہنچا ہے۔

روس کے مطابق یوکرین کی اسپیشل سروسز کے کریمیا کے پل پر ڈرونز حملے میں 2 افراد ہلاک ہوئے۔

روسی وزارت ٹرانسپورٹ نے کہا ہے کہ یوکرینی حملے سے کریمیا کے قریب پل کی سڑک کو نقصان پہنچا ہے، پل کے ستونوں کو کوئی نقصان نہیں پہنچا۔

غیر ملکی خبر رساں ادارے کے مطابق روس کو کریمیا سے ملانے والے پل پر حملے کے بعد ٹریفک  کو روک دیا گیا ہے۔

میڈیا رپورٹس کے مطابق  کریمیا کا پل روسی فوج کی سپلائی لائن کے لیے کلیدی حیثیت رکھتا ہے

نئی دہلی :بھارتی بحریہ بھارتی عوام پر بوجھ بن گئی،2000 سے لے کر اب تک بھارتی بحریہ 26 بڑے حادثات کا شکار ہو چکی ہے،بھارتی بحریہ ہر5سال میں 1جنگی جہاز اورہر 2سال میں ایک تربیت یافتہ افسر یا جوان غفلت کے باعث کھو دیتی ہے،انڈیا ٹوڈے کی رپورٹ کے مطابق زیادہ تر حادثات کپتان کی غفلت، غیر معیاری دیکھ بھال اور ناکافی تربیت کے باعث پیش آئے،صرف 2014کے 7مہینوں میں 11 حادثات میں بھارتی بحریہ کے 21افسران و جوان ہلاک ہوئے،8مارچ2023کو بھارتی بحریہ کا ہیلی کاپٹر بحیرہ عرب میں ڈوب کر تباہ ہوا،18جنوری 2022 کو INS رنویر پر دھماکے کے نتیجے میں 3سیلر ز ہلاک ہوئے،اکتوبر2017میں واحد بھارتی نیوکلئیر سَب میرین غفلت کے باعث حادثے کا شکار ہوگئی،فروری 2014 میں بھارتی سَب میرین سندھورَتنا میں آگ لگنے سے 2 افسران سمیت 7 سیلرز جان سے ہاتھ دھو بیٹھے ،سَب میرین حادثے کے نتیجے میں بھارتی نیول چیف DK جوشی کو استعفیٰ دیناپڑا تھا، گزشتہ 6 برسوں کے دوران پاکستان 4 مرتبہ بھارتی آبدوزوں کا پاکستانی پانیوں میں سْراغ لگا کر بھارتی بحریہ کی ناقص کارکردگی کا ثبوت دْنیا کے سامنے رکھ چکا ہے،بھارتی عوام نے سوال اٹھایا کہ کیا حادثات کا شکار بھارتی فوج چین یا پاکستان سے لڑ بھی پائے گی؟

چین میں چار سال قبل کھانے میں زہر ملا کر ایک بچے کو ہلاک اور 24 کو زخمی کرنے والی کنڈرگارٹن کی سابق خاتون ٹیچر کو پھانسی دے دی گئی۔

چینی میڈیا کے مطابق 39 سالہ وانگ یون نے مارچ 2019 میں اپنی ایک ساتھی ٹیچر کے ساتھ جھگڑے کے بعد سوڈیم نائٹریٹ خرید کر اسے اگلی صبح بچوں کے کھانے میں ڈال دیا تھا۔

مقامی میڈیا کے مطابق جنوری 2020 میں ایک بچہ زہر کے باعث مختلف اعضا کے ناکارہ ہونے کے بعد انتقال کر گیا تھا جبکہ دیگر بچے بیمار ہوگئے تھے۔

چینی میڈیا کے مطابق وانگ یون نے ستمبر 2020 میں صوبہ ہینان کے ایک عدالتی فیصلے کے خلاف اپیل بھی دائر کی تھی۔

رپورٹس کے مطابق چین میں اس کیس کو ہائی پروفائل کیس کے طور پر دیکھا جا رہا تھا۔

بھارتی وزیراعظم نریندر مودی سرکاری دورے پرمتحدہ عرب امارات پہنچ گئے جہاں ان کا استقبال ابوظہبی کے ولی عہد شیخ خالد بن محمد بن زید النہیان نے کیا۔

غیر ملکی خبر ایجنسی کے مطابق بھارتی وزیراعظم نریندر مودی نے بذریعہ ٹوئٹ ائیر پورٹ پر استقبال کرنے پر ولی عہد شیخ خالد بن محمد بن زید النہیان کا شکریہ ادا کیا۔

بھارتی وزیر خارجہ نے اپنے جاری کردہ بیان میں کہا ہے کہ نریندر مودی متحدہ عرب امارات کے سرکاری دورے کے دوران ابوظہبی کے ولی عہد شیخ خالد بن محمد بن زید النہیان سے ملاقات کرکے تفصیلی گفتگو کریں گے۔

وزیر خارجہ کے مطابق وزیراعظم نریندر مودی اپنے اس دورے کے دوران اسٹریٹجک پارٹنرشپ کو مزید مضبوط کریں گے اور توانائی، تعلیم، صحت، خوراک، فن ٹیک، دفاع اور ثقافت جیسے مختلف شعبوں پر تبادلہ خیال کریں گے۔

ان کے مطابق یہ عالمی مسائل بالخصوص UNFCCC کے COP28 کی یو اے ای کی صدارت اور جی 20 کی بھارت کی صدارت کے تناظر میں جس میں UAE ایک خصوصی مدعو ہے، پر تبادلہ خیال کرنے کا بہترین موقع پے۔