All posts by fayaz

لاہور(ایمرا نیوز)
کون کہتا ہے کہ ابن صفی مر گیا، ابن صفی اب بھی زندہ ہے۔ عمران سیریز بھی چل رہی ہے اور جاسوسی ناولوں کے تمام کردار بھی اسی طرح اپنا کام کر رہے ہیں۔ ہنودویہود کی سازشیں اب بھی اسی طرح جاری و ساری ہیں۔ ساری دنیا متحد ہو کر پاکستان کے لئے اب بھی معاشی مشکلات پیدا کر رہی ہے۔ امریکہ نے 300 ملین ڈالر کی جو امداد بند کی ہے اس سے امریکہ کے پاکستان مخالف ارادے صاف ظاہر ہوتے ہیں۔
عوام خان کل بھی ابن صفی کی دنیا میں زندہ تھا اور آج بھی اسی دنیا میں زندہ ہے۔ وہ کل بھی افسانوی اور جاسوسی کہانیوں کو سچ سمجھتا تھا اور آج بھی انہیں سچ سمجھتا ہے، ملک و قوم بچانے کے لئے ابن صفی کا ہیرو عمران تھا اور آج عوام خان بھی دنیا بھر کا مقابلہ کرنے کے لئے عمران کو ہیرو سمجھتا ہے۔ کل کا افسانہ بھی یہی تھا کہ دنیا بھر کے یہود و ہنود اکٹھے ہو کر ہمارے ملک کے خلاف سازشیں تیار کر چکے ہیں۔ پاکستان میں ان کے سیاسی ایجنٹ اور حسینائیں، عوام خان کو جھانسے میں لانے کے لئے میدان میں اتر چکے ہیں۔ اسی جاسوسی دنیا سے یہ خبر بھی آئی ہے۔ آصف زرداری کو ڈاکٹر نے دوپہر کے کھانے میں دس ڈالر اور ہزار پائونڈ کا ملیدہ کھانے کا مشورہ دیا ہے اسی لئے وہ آج کل دوپہر کا کھانا عوام خان کے سامنے نہیں بلکہ چھپ کر کرتے ہیں۔ یہ بھی پتہ پڑا ہے کہ آصف زرداری نے سوئس بینکوں میں سرنگ لگا کر وہاں سے اپنے ڈالر غائب کر لئے ہیں۔ اسی جاسوسی کی دنیا کے جیمز بانڈ نے یہ بھی بتایا ہے آصف زرداری نے فرانس کا پرانا محل اور برطانیہ کا سرے محل دوبارہ سے آراستہ کروا لئے ہیں جونہی اعتزاز احسن صدر کا انتخاب ہاریں گے زرداری صاحب برطانیہ اور فرانس کے ’’سرکاری‘‘ دورے پر روانہ ہو جائیں گے۔ اسی ’’ابن صفات‘‘ میں ہیرو عمران کے ذمہ یہ لگا ہے کہ وہ ولن آصف زرداری کو بیرون ملک جانے سے روکے اور چاہے پیٹ میں چاقو ہی کیوں نہ مارنا پڑے، پیٹ چاک کرکے کروڑوں ڈالر برآمد کرے جو آج کل زرداری صاحب دوپہر کے کھانے میں کھاتے ہیں۔
یہودی سازشوں کے حوالے سے فریدی سیریز کے ذریعے انکشاف ہوا ہے کہ سنگ ھی نامی ولن دراصل پاکستان کا ایک نامور سیاستدان تھا جس نے اپنے اصلی نام کو چھپا کر سنگ ھی کے نام سے خود کو مشہور کیا ہوا تھا۔ جونہی منی ٹریل کے ذریعے سے منی لانڈرنگ کی پوری کہانی ملی فوراً ہی فیصلہ کیا گیا کہ کس طرح عمران کی مدد سے منی لانڈرنگ کے سارے نیٹ کو بے نقاب کرکے لوٹی ہوئی دولت کو واپس لانا ہے۔
عمران سیریز کی تازہ کتاب ’’اڈیالہ سازش کیس‘‘ میں ملک و قوم کے خلاف بڑی سازش اور اس کے ذمہ داروں کا تعین کیا گیا ہے۔ ہیرو عمران کو ایک معتبر ذریعے سے خبر ملتی ہے جس کی حمید عون چودھری تصدیق کرتے ہیں کہ خواجہ آصف نامی ایک سیالکوٹی مفرور، پرویزرشید نامی ایک بین الاقوامی گروہ کا سرغنہ اور بین الاضلاعی لائلپوری گینگ کا اہم کردار رانا ثناءاللہ گزشتہ رات بارہ بجے اڈیالہ جیل سے دو کلو میٹر دور ایک اندھیرے مکان سے گرفتار کر لئے گئے ہیں۔ حمید عون چودھری نے صحافیوں کو بتایا کہ یہ تینوں پاکستان کے خلاف ایک گہری سازش میں مصروف تھے۔ اگر یہ کامیاب ہو جاتے تو پاکستان کا قرضہ دوگنا ہوجاتا، گردشی قرضے چھ گنا ہو جاتے۔ سیلاب آجاتا، طوفان آجاتا، سب کچھ ادھر ادھر ہو جاتا۔ ایک صحافی نے پوچھا کہ یہ کرنا کیا چاہتے تھے۔ حمید عون چودھری جو عمران سیریز میں ہمیشہ عمران کے مددگار ہوتے ہیں، نے روتے ہوئے بتایا کہ یہ سارے مجرم دراصل اندھیرے میں بیٹھے ٹامک ٹوئیاں مار رہے تھے جس پر ہمیں شک ہوا اور اب یہ شک یقین میں بدل چکا ہے کہ سارے اکٹھے ہو کر نواز شریف کی خوبیاں بیان کر رہے تھے جو کہ ایک بہت بڑی سازش کاپیش خیمہ ہے، اس لئے انہیں فوراً گرفتار کرلیا گیا ہے اور اب ان کی اس غداری کی سزا انصاف کے ایوانوں سے ملے گی۔
عمران سیریز کے ہیرو کو یہ مصدقہ اطلاع بھی ملی ہے کہ مولانا فضل الرحمٰن ملک و قوم کے خلاف ایک خفیہ اتحاد بنانے کی کوششوں میں ہے۔ اس اتحاد کا مقصد ملک میں ڈینگی وائرس پھیلانا، ملیریا کو عام کرنا اور خاص کر ان ووٹرز کو بیمار کرنا ہے جنہوں نے اس بار تحریک انصاف کو ووٹ دیا تھا۔ جونہی حکومتی عہدیداروں کو اس باغیانہ سرگرمی کی اطلاع ملی ، اسی لمحے سرکاری اور غیر سرکاری ہر سطح پر اس خفیہ اتحاد کے خلاف منظم کارروائی کا آغاز کر دیا گیا۔ امید ہے کہ چند دنوں تک پوری سازش طشت ازبام ہو جائے گی اور اس کے باقی کردار بھی سامنے آجائیں گے۔ البتہ یہ بات طے ہے کہ اس سازش میں امریکہ، اسرائیل، بھارت، افغانستان اور دنیا کےدیگر ممالک شامل ہیں۔ امید کی جارہی ہے کہ عمران سیریز کے ہیرو ہمیشہ کی طرح ان وطن دشمنوں کو کیفر کردار تک پہنچائیں گے اور ایسا قلع قمع کریں گے کہ یہ مجرمانہ گروہ کبھی دوبارہ سے ایسی سازش کا سوچ بھی نہ سکے۔
عمران سیریز کی ایک اور کتاب ’’شیخو کی شیخیاں‘‘ میں یہ دلچسپ واقعہ بیان کیا گیا ہے کہ کس طرح عمران کے بہادر ساتھی شیخوپنڈی وال نے دیوار پھلانگ کر امریکی صدر ٹرمپ کے اس ٹویٹ کا کھوج لگایا جو اس نے پاکستان کے خلاف دیا تھا۔ شیخوپنڈی وال کو اب مودی کی جاسوسی کے لئے بھیجا رہا ہے۔ اب ان کے ذمہ یہ لگایا جا رہا ہے کہ وہ یہ پتہ لگائیں کہ مودی کے اندر سے بھارت دشمنی کی جو بو آتی ہے اس کا مرکز کیا مودی کے جسم کے اندر ہے یا پھر کہیں اور؟ امید ہے ہمیشہ کی طرح شیخوپنڈی وال اس مشن سے بھی کامیاب لوٹیں گے اور عمران سیریز کے لئے ایک نئی کتاب ’’شیخو اور مودی‘‘ کا اضافہ کریں گے۔
ابن صفی کبھی مرا نہیں تھا پہلے بھی اپنی کتابوں کے ذریعے زندہ تھا اور آئندہ بھی زندہ رہے گا۔ البتہ ابن صفی کی عمران سیریز ان دنوں کچھ زیادہ ہی پاپولر ہوگئی ہے۔ لگتا ہے کہ افسانوی دنیا، حقیقی دنیا پر اتر آئی ہے۔ ہر حقیقی کردار پر بھی آج کل افسانوی کردار کا گمان ہونے لگا ہے۔ آس پاس کوئی بھی اصلی انسان نظر نہیں آرہا، یاتو کوئی عمران سیریز کا ہیرو ہے یا پھر اس کا ولن؟ وہ جو اس سیریز کے کردار نہیں ان کا کوئی کردار ہی نہیں رہا، انہیں چاہئے وہ سو جائیں۔۔۔۔!!!
(بشکریہ جنگ نیوز)

لاہور(ایمرا نیوز)
کپتان کو یہ ضرور سوچنا چاہئے کہ کیا وجہ 12دنوں میں اتنی بات پرفارمنس پر نہ ہوئی جتنی ان غلطیوں پر، جن سے باآسانی بچا جا سکتا تھا۔
سہ پہر پونے 3بجے وزیراعظم سیکرٹریٹ کے پورچ میں گاڑی سے اترا،سامنے نظر پڑی، وزیراعظم کی دو مرسیڈیز کاریں کھڑیں ،صرف دو گاڑیاں، میں نے سوچا، گیلانی صاحب اور میاں نواز شریف نے تو حد ہی کر دی تھی، مگر ظفر اللہ جمالی اور شوکت عزیز کیلئے بھی یہیں اپنی آنکھوں سے 20بیس ،25پچیس گاڑیاں کھڑی دیکھیں اور پھر یہ بھی دیکھا کہ ایک اشارے پر سفید کرولا رُکی،ڈرائیور کے ساتھ اکیلئے جمالی صاحب،نہ کوئی آگے ،نہ پیچھے، نجانے اقتدار میں آکر لوگ قیمتی اور اقتدار سے نکل کر سستے کیوں ہو جاتے ہیں، میں ابھی وہیں کھڑا تھا کہ ایک گاڑی آکر رُکی،یہ دوست فواد چوہدری تھے ،سلام دعا اور پھر اگلے دو منٹوں میں چوتھے فلور پر، ہمیں وزیراعظم کے دفتر کے عین سامنے اس کمرے میں بٹھایا گیا ،جو وزیراعظم کے مہمانوں کاویٹنگ روم ، وقت ِ ملاقات تھا 3بجے، ٹھیک 3بجے عمران خان آئے، ہاتھ ملانے کی زحمت میں پڑے بنا ایک مشترکہ سلام پھینک کر وہ سامنے صوفے پر بیٹھے اور کوئی بھاشن دیئے بنا بس یہ کہہ کر کہ ’’میں نے سوچا آپ سب سے ملا جائے، ایشوز پر آن بورڈ کیا جائے ‘‘ جی پوچھئے، سوال جواب شروع ہوئے اور پونے دو گھنٹوں تک ہوتے رہے۔
ان پونے دو گھنٹوں میں 18صحافیوں نے وزیراعظم کیساتھ بلامبالغہ ٹوئنٹی ٹوئنٹی کھیلا، پاکپتن سے امریکہ تک ، خاور مانیکا سے ٹرمپ تک، ہیلی کاپٹر خرچے سے ملکی قرضوں تک اور سیاسی و بیوروکریسی تقرریوں سے دورہ جی ایچ کیو تک ویسے تو ہر معاملے پر ہی چبھتے، تلخ سوال ہوئے لیکن پاکپتن ایشو پر وزیراعظم پر یوں تابڑ توڑ حملے ہوئے کہ بعض موقعوں پر کپتان کے پاس کہنے کو کچھ نہ تھا، دو چار سوالوں کے بعد میں نے پوچھا ’’خاور مانیکا کی کوئی سیاسی یا قانونی حیثیت‘‘ وہ بولے ’’ نہیں ‘‘ پوچھا ’’ کیا وہ قانون سے بالاتر‘‘جواب آیا ’’ وہ کیا میں بھی قانون سے بالاتر نہیں‘‘ میں نے کہا ’’پھر پولیس کے روکنے پر مانیکا صاحب کا یہ ردِعمل کیوں ‘‘وزیراعظم کا جواب تھا ’’ مگر میرے پاس جو کہانی، اسکے مطابق پولیس نے زیادتی کی ‘‘ عامر متین بول پڑے ’’لگ رہا آپ کو حقائق کا علم نہیں، آپ کی کہانی درست نہیں‘‘ وزیراعظم بولے ’’چلو پھر تو اچھا ہوا کہ سپریم کورٹ نے نوٹس لے لیا ، حقائق سامنے آجائیں گے ‘‘۔
بات یہیں پہنچی تھی کہ دوست روف کلاسرا نے وزارت ِعظمیٰ کی مبارکباد دیکر مانیکا ایشو پر میٹھے، دھیمے انداز میں چڑھائی کی تو کپتان نے کہا ’’کیا میں نے کسی کو فون کیا ،کیا میں نے آئی جی یا وزیراعلیٰ کو کہا کہ یہ کرو یا وہ کرو ، کسی نے وزیراعظم ہاؤس سے کسی پر کوئی دباؤ ڈالا،یہ چھوڑیں، بشری بی بی نے کوئی فون کیا یا پریشر ڈالا ہو ، بلکہ 5اگست کو جب پولیس نے مانیکا فیملی سے بدتمیزی کی،تو بشری بی بی نے مجھے کہا کہ آپ نے اس معاملے میں نہیں پڑنا ، کہانیاں بنیں گی، ہاں اس بارے میں نے پرنسپل سیکرٹری سے یہ ضرور کہا کہ’’ آئی جی سے اس معاملے کی رپورٹ لیں‘‘،باقی یہ تو آئی جی سطح کا معاملہ تھا ،انہیں حل کر لینا چاہئے تھا ، بات وزیراعلیٰ تک بھی نہیں پہنچنا چاہئے تھی ‘‘وزیراعظم کے ساتھ بیٹھے رؤف کلاسرا بھلا اس جواب پر کب مطمئن ہونے اور خاموش رہنے والے تھے ،انہوں نے ڈیڑھ منٹ میں بشری بی بی کی دوست فرح کے خاوند احسن جمیل گجر کی وزیراعلیٰ پنجاب کی موجودگی میں ڈی پی او،آر پی اوپاکپتن کو جھاڑنے اور خاور مانیکا سے معافی مانگنے تک پوری کہانی سناڈالی ،ابھی خان صاحب جواب دینے والے ہی تھے کہ مجھ سے بھی نہ رہا گیا ،میں نے کہا’’ وزیراعظم صاحب ابھی سابقہ ’’شاہی خاندانوں ‘‘ سے جان چھو ٹنے کی امید ہی پیدا ہوئی تھی کہ ’’مانیکا شاہی ‘‘ شروع ہو گئی ‘‘ عمران خان کا چہرہ سرخ ہوا مگر اگلے ہی لمحے اپنے روایتی غصے پر قابو پا کر وہ مسکرا کر بولے ’’ میں ،میرا خاندان ،میرے دوست یا کوئی بھی قانون سے بالاتر تھا،نہ ہوگا،میں بادشاہت کا قائل ہوں اور نہ شاہی رویوں کا ،کیس سپریم کورٹ میں ہے ،سب پتا چل جائے گا کہ قصور کس کا ‘‘۔
ویسے تو پاکپتن معاملے پر اتنے سوال ، جواب ہوئے کہ سامنے دیوار پر لگی گھڑی دیکھ کر وزیراعظم کو کہنا پڑا ’’ یار آدھا گھنٹہ ہو گیا اسی معاملے پر ،کچھ ملکی معاملات پر بھی بات کر لیں ‘‘اور ویسے تو ایک سوال اور ، بس ایک آخری سوال کہہ کہہ کر دوستوں نے مزید 15منٹ اس ایشو کے بخیئے ادھیڑ ے لیکن اس حوالے سے ایک کہانی یہ بھی کہ وزیراعظم چاہتے ہوئے بھی ہمیں یہ نہ بتا پائے کہ 5اگست کو پولیس بدتمیزی کے بعد خاور مانیکا کو پتا چلا کہ یہ سب اوپر سے ہورہا ،تو خاور مانیکا نے گھر آکر بتایا کہ مجھے لگ رہا کہ فلاں فلاں وجوہات کی بنا پر یہ سب ہمارے ساتھ بشری بی بی اور عمران خان کروا رہے اور پھر جب دوسرا واقعہ ہو اتو خاور مانیکا کی بیٹی نے اپنی والدہ بشری بی بی کو فون کر کے کہا’’ پہلے تو میں نہیں مان رہی تھی ، لیکن اب یقین ہوگیا کہ یہ سب آپ لوگ کروا رہے ، مجھے بازو سے پکڑ کر گاڑی سے اتارنا اور ہم پر بندوقیں تاننا ، سب کچھ منصوبہ بندی کے تحت ہورہا، یہ بھی سنا جارہا کہ بشری بی بی یہ سوچ رہیں کہ یہ سب اپنے وفاداروں کے ذریعے لیگی کروا رہے ، مقصد عمران خان کو سکینڈلائز کرنا اور یہ بھی سنا جارہا کہ وزیر اعظم کے کہنے پر وزیراعلیٰ عثمان بزدار نے پولیس افسران سے میٹنگ کی ابتداء ہی یوں کی کہ’’ سائیں اس معاملے کو جلدی نمٹائیں ،سب کچھ ہم پر آرہا ہے ‘‘ بلکہ جب انہوں نے اپنے ہاتھوں سے کیک پیش کیا اور گوندل صاحب نے یہ کہہ کر مجھے بھوک لگی ہوئی تقریباً آدھا کیک پلیٹ میں ڈال لیا تو وزیراعلیٰ ہنس کر بولے ’’ سائیں اب میں یہ سمجھوں کہ معاملہ ختم ہو گیا ‘‘۔
خیر اصل کہانی کیا ،یہ توپتا چل ہی جائے گا‘‘ لیکن حیرت کی بات یہ کہ عمران خان مطلب وزیراعظم پاکستان کو وزیراعلیٰ اور احسن جمیل گجر کی پولیس افسران سے ملاقات سمیت بہت ساری چیزوں کا علم ہی نہیں تھا، یعنی الیکٹرانک وپرنٹ میڈیا اور خاص طور پر سوشل میڈیا پر طوفان برپا مگر عمران خان بہت کچھ سے لا علم ،حیرت تب بھی ہوئی جب فیاض چوہان صاحب کے ’’ نرگس ‘‘ سمیت فرمودات کا بتایا گیا تو عمران خان نے ساتھ بیٹھے فواد چوہدری سے پوچھا’’ یہ اس نے آن ائیر کہایا آف ائیر‘‘ جس پر فواد چوہدری نے بتایا کہ آن ائیر،مطلب وزیراعظم اس حوالے سے بھی لاعلم ،خیر بات آگے بڑھی اور سیاسی وبیوروکریٹ تقرریوں پر جب میں نے کہا کہ ’’ آپ کے کافی وزراء اورسیکریٹری ایسے کہ جن پر سنگین الزامات ‘‘تو وزیراعظم کا جوا ب تھا ’’ جب میں انکی سنتاہوں تو ان کے پاس دوسری کہانی لیکن پھر بھی میں کسی کے ماضی کا ذمہ دار نہیں ،میں ان سب کے حال کا ذمہ دار ہوں ، اب فرشتے کہاں سے لاؤں، مگر آپ بے فکر رہیں ، میں اوپر بیٹھا ہوں، وزیر ہو یا بیوروکریٹ ، ،پرفارمنس دیکھوں گا، اگر کارکردگی ٹھیک نہ ہوئی تو تبدیل کر دوں گا ‘‘۔
دوست کاشف عباسی کے اس سوال پر کہ چند دنوں کے معاملات دیکھ کر لگ رہا کہ آپ تیار نہیں تھے حکومت کیلئے ، وزیراعظم کا جواب تھا ’’ ہم تیار تھے مگر ملکی حالات اتنے برے ہوں گے ۔
یہ اندازہ نہیں تھا ، آج بحیثیت وزیراعظم میرا پانچواں ورکنگ ڈے ،ان پانچ دنوں میں ہی جو کچھ دیکھا ،یہی کہوں گا کہ ملک جن کے حوالے تھا ،انہیں خوفِ خدا نہیں تھا‘‘ ، حامد میر صاحب کے اس مشورے پر کہ ’’ آپکو یواین اوجنرل اسمبلی سے خطاب کرنے جانا چاہئے اور خطاب بھی اردو میں کرنا چاہئے ‘‘ وزیراعظم کا جواب تھا ’’ اس وقت جو ملکی حالات ، میں صرف خطاب کرنے یا صدر ٹرمپ کو ملنے چار دنوں کیلئے نہیں جا سکتا ‘‘یہیں عمران خان نے پھر کہا کہ ’’ میری اور امریکی وزیرخارجہ کی دہشت گردی پر کوئی بات نہیں ہوئی اورامریکہ سے باعزت تعلقات رکھیں گے ‘‘انہوں نے یہ بھی بتایا کہ ’’ میں تو یہ کال سننا ہی نہیں چاہتا تھا،امریکی وزیرخارجہ کو ہمارے وزیر خارجہ سے بات کرنی چاہئے تھی لیکن اپنے فارن آفس کے مجبور کرنے پر بات کی ‘‘۔
اسی بیٹھک میں صورتحال تب دلچسپ ہوئی جب ملٹری سیکرٹری اور سیکرٹری خارجہ نے آکر کہا’’ فرانسیسی صدر بات کرنا چاہ رہے‘‘ ، عمران خان بولے ’’ مبارکباد ہی دینا ہوگی ،بتا دیں میں میٹنگ میں ہوں ،آدھے گھنٹے بعد بات کروں گا ‘‘پندرہ بیس منٹوں پر ایم ایس دوبارہ آئے تو وزیراعظم نے انہیں دیکھتے ہی کہا’’پھر آگئی کال ‘‘ جس پر قہقہے لگے لیکن ایم ایس نے مسکراتے ہوئے کہا کہ’’ سر میں تو بتانے آیا تھا کہ آپکی اگلی میٹنگ کا وقت ہو گیا ہے ‘‘ اسی بیٹھک کے عین درمیان ڈاکٹر شاہد مسعود نے کھڑے ہو کر بتایا ’’وزیراعظم صاحب میں چلا ہی جاؤں تو اچھا کیونکہ مجھے 45منٹ پہلے اس ملاقات کے حوالے سے بتایا گیا ،نسیم زہرہ نے پی ٹی آئی سوشل میڈیا کی صحافیوں کی کردار کشی کی جانب توجہ دلائی ،روف کلاسرا نے 4سو کلو میٹر طویل تلہ کنگ ،میانوالی، ملتان روڈ کی بات کی جہاں سنگل ٹریک ہونے کی وجہ سے روزانہ درجنوں جانیں ضائع ہوں ،صابر شاکر بولے ’’میرے ڈویژن سے بھی کوئی وزیر بنادیں ‘‘ ، چوہدری غلام حسین نے کہا ’’جو تقرریاں آپ کر چکے بس فواد حسن فواد کی کمی رہ گئی ‘‘، اپنے دورہ جی ایچ کیو پر بات کرتے ہو ئے وزیراعظم کا کہنا تھا ’’مجھے خوشی کہ آرمی چیف جنرل قمر جاوید باجوہ کا جمہوریت پر یقین ،جمہوریت کے ساتھ اور جمہوریت کی مضبوطی کے خواہاں ‘‘ ، وزیراعظم نے یہ بھی کہا’’ میر ی حکومت کیلئے دو معاملے سنگین ،قرضے اور انرجی بحران ،انہوں نے یہ بھی بتایا کہ ’’ہم سی پیک ،ایل این جی سمیت سابقہ ادوار میں کئے گئے ہر معاہدے کا جائزہ لے رہے ، وزیراعظم عمران خان نے آخر میں کہا’’ آپ مجھ پر تنقید کریں مگر ایک تو مجھے 3ماہ کا وقت دیں ،ڈلیور کر کے دکھاؤں گا،دوسرا مجھے دو چیزوں پر آپکی مدد درکار، پہلی کفایت شعاری ،بچت مہم ، اس حوالے سے آپ قوم کو شعور وآگہی دیں ،دوسرا احتساب پر میری مد د کریں ، احتساب بلا امتیاز اور بے رحم ہوگا ، کوئی بچ نہیں پائے گا،میں نے قوم کا لٹا پیسہ واپس لانا ہے اگر یہ نہ ہوسکا تو پھر آگے اندھیرا ہی اندھیرا ‘‘‘۔
ملاقات کے بعد ڈھلتی سہ پہر وزیراعظم سیکرٹریٹ سے نکلتے ہوئے جہاں میں یہ سوچ رہا تھا کہ یہ عمران خان ہی جنہوں نے ’’صحافی عدالت ‘‘میں سخت اور مشکل سوالات کا تحمل سے جواب دیا،تلخ باتوں کو مسکرا کر سنا، برداشت کیا ، جہاں میں یہ سوچ رہا تھا کہ بلاشبہ کپتان کی نیت ٹھیک ،وہ کچھ کرنا چاہتے اورانہیں وقت بھی دینا چاہئے ،وہاں ذہن میں بار بار یہ خیال بھی آرہا تھا کہ کپتان کو یہ ضرور سوچنا چاہئے کہ کیا وجہ 12دنوں میں اتنی بات پرفارمنس پر نہ ہوئی جتنی ان غلطیوں پر،جن سے باآسانی بچا جا سکتا تھا ۔
(بشکریہ جنگ نیوز)

اسلام آباد/ لاہور: (نیٹ نیوز/ایمرا نیوز) صدارتی الیکشن میں صرف ایک دن باقی ہے لیکن بڑے مقابلے سے پہلے اپوزیشن کا آپس میں مقابلہ جاری ہے۔ مولانا فضل الرحمان اور اعتزاز احسن ایک دوسرے کو دستبردار کرانے کی کوششوں میں لگے ہیں لیکن ابھی اپوزیشن کے متفقہ امیدوار کی راہ ہموار نہیں ہو سکیں.
اپوزیشن کے دونوں امیدواروں کی طرف سے متفقہ امیدوار کے صرف بیانات ہی آ رہے ہیں لیکن اصل میں اپوزیشن کی اپنی اپنی پوزیشن برقرار ہے۔ ن لیگ مولانا فضل الرحمان کے ساتھ قدم سے قدم ملائے کھڑی ہے جبکہ پیپلز پارٹی کو اعتزاز احسن پر ہی اصرار ہے۔
پیپلز پارٹی کے رہنماؤں نے ایک مرتبہ پھر مولانا فضل الرحمان سے دستبردار ہونے کی درخواست کر دی ہے۔ خورشید شاہ کا کہنا ہے کہ اپوزیشن کے دو امیدوار ہونے کا فائدہ حکومت کو ہو رہا ہے، آخری وقت تک ایک امیدوار کی کوششیں جاری رکھیں گے۔
سوال یہ ہے کہ کیا کوئی مائنس ہو کر اپوزیشن کو تقسیم سے بچا پائے گا؟ اور کیا اپوزیشن جمع ہو کر حکومتی امیدوار کو ضرب لگا سکیں گی؟ اپوزیشن کی تقسیم پر حکومتی امیدوار کے جیت کے امکانات بھی روشن ہیں۔
صدارتی انتخاب کے حوالے سے مولانا فضل الرحمان نے ن لیگ کے صدر میاں شہباز شریف سے اہم ملاقات کی جس میں مستقبل کے لائحہ عمل پر بات چیت کی گئی۔
بعد ازاں میڈیا سے گفتگو میں مولانا فضل الرحمان کا کہنا تھا کہ پیپلز پارٹی کو متحدہ اپوزیشن کے امیدوار کو قبول کر لینا چاہیے، کوشش ہے اپوزیشن جماعتیں ایک امیدوار پر متفق ہوں، ایم آر ڈی میں ڈنڈے کھانے کے لیے ہم قابل قبول ہیں تو پھر صدارتی امیدوار کے لیے کیوں قابلِ قبول نہیں؟ یہی باتیں آصف زرداری کو سمجھا رہا ہوں۔
انہوں نے کہا کہ پیپلز پارٹی کے لیے اپنا امیدوار کا نام واپس لینا آسان ہے، وزیراعظم کے ووٹ کے لیے پیپلز پارٹی نے اپنے ووٹ خاموش کر دیئے تھے، کوشش ہے پیپلز پارٹی اس فیصلے کو قبول کرے گی۔

اسلام آباد: (نیٹ نیوز/ایمرا نیوز) ڈی پی او پاکپتن کے تبادلے کے کیس میں خاور مانیکا اور احسن جمیل گجر سپریم کورٹ میں پیش ہوگئے، آئی جی پنجاب کلم امام، سابق ڈی پی او پاکپتن رضوان گوندل، وزیراعلیٰ کے پی ایس او اور سی ایس او بھ عدالت میں پیش ہوئے۔
سپریم کورٹ میں ڈی پی او پاکپتن تبادلہ ازخود نوٹس کیس کی سماعت ہوئی۔ چیف جسٹس نے استفسار کیا آئی جی صاحب! آپکے علم میں تھا کہ ڈی پی او کو وزیراعلیٰ نے بلایا ہے ؟ مجھے اس وقت پتہ چلا جب ڈی پی او وزیراعلیٰ آفس روانہ ہوچکے تھے، میں نے کہا کہ آئندہ وزیراعلیٰ دفتر روانگی سے قبل مجھ سے اجازت لینا ہوگی۔
چیف جسٹس نے آئی جی سے مکالمہ کرتے ہوئے کہا آپ نے ڈی پی او کو وزیراعلیٰ آفس جانے سے منع کیوں نہیں کیا ؟ آپ وزیراعلیٰ کے پی ایس او کو کہتے کہ میرے علم میں لائے بغیر ڈی پی او کو نہیں بلا سکتے، ڈی پی او پاکپتن کے تبادلے کا حکم کہاں ہے ؟ جس پر آئی جی پنجاب نے بتایا ڈی پی او پاکپتن رضوان گوندل کے تبادلے کا حکم زبانی تھا۔
چیف جسٹس نے آئی جی سے استفسار کیا رات 1 بجے تبادلہ کیا تو اس وقت آپ کہاں تھے ؟ میں نے آپ سمیت تمام آئی جیز کو کہا تھا کہ سیاستدانوں پر انحصار نہ کریں، میں نے آپ سے کہا تھا کہ آزاد ہو جائیں، آئی جی پنجاب نے کہا تبادلے کا حکم دیتے وقت میں اسلام آباد میں تھا۔
چیف جسٹس نے استفسار کیا آپ نے ڈی پی او سے پوچھا کہ وزیراعلیٰ نے بلا کر کیا کہا ؟ آئی جی پنجاب نے کہا واقعہ سے متعلق متضاد اطلاعات مجھ تک پہنچیں، ڈی پی او پاکپتن کو حقائق کے تحت ٹرانسفر کیا، ڈی پی او رضوان گوندل نے حقائق چھپائے اور غلط بیانی کی۔
چیف جسٹس پاکستان نے آئی جی پنجاب سے استفسار کیا آپ نے تبادلے کے زبانی احکامات کیوں دیئے ؟ کیا صبح نہیں ہونی تھی ؟ وہ فائل دکھائیں جس میں آپ نے تبادلے کے احکامات جاری کیے۔ آئی جی پنجاب کلیم امام نے کہا میں نے شام 8 بجے ڈی پی او پاکپتن کے تبادلے کا فیصلہ کر لیا تھا۔
چیف جسٹس نے احسن جمیل گجر سے مکالمہ کرتے ہوئے کہا آپ ہوتے کون ہیں تبادلے کی ہدایت دینے والے ؟ آپ وزیراعلیٰ کے دفتر میں کیا کر رہے تھے ؟ احسن جمیل گجر نے کہا میں بچوں کا گارڈین ہوں، مبشریٰ مانیکا 5 روز سے پیدل چل کر جا رہی تھی۔ چیف جسٹس نے کہا افریقہ سے فون کرائے جا رہے ہیں، آپ سمجھتے ہیں سیاسی اثر کی وجہ سے پولیس کو ذلیل کرالیں گے ؟ میں بچوں کا کفیل ہوں، ان کی وجہ سے ایکشن لیا۔
رضوان گوندل نے عدالت کو بتایا کہ احسن جمیل نے کہا آپ کو پیغام دیا لیکن آپ نے عمل نہیں کیا، کہا گیا آپ ان کے ڈیرے پر جا کر معافی مانگیں۔ چیف جسٹس نے آئی جی پنجاب سے استفسار کیا پولیس پر دباؤ ڈالنے پر کیا مقدمہ بنتا ہے ؟ کلیم امام نے جواب دیا احسن جمیل کیخلاف پولیس پر دباؤ ڈالنے کا مقدمہ بنتا ہے۔

اسلام آباد:(نیٹ نیوز/ایمرا نیوز) سابق وزیراعظم نواز شریف کے خلاف العزیزیہ اسٹیل ملز اور فلیگ شپ انویسٹمنٹ ریفرنس کی سماعت آج دوبارہ ہوگی، جس کے لیے نواز شریف کو اڈیالہ جیل سے احتساب عدالت پہنچا دیا گیا۔
احتساب عدالت نمبر 2 کے جج ارشد ملک نواز شریف کے خلاف نیب ریفرنسز کی سماعت کریں گے۔
مذکورہ کیس کی 30 اگست کو ہونے والی گزشتہ سماعت پر نواز شریف کے وکیل خواجہ حارث نے پاناما جے آئی ٹی کے سربراہ واجد ضیا پر جرح جاری رکھی تھی۔
تاہم واجد ضیاء نے شماریات ، بزنس اور بینکنگ کی تکنیکی ٹرمز والے سوالات کا جواب دینے سے گریز کیا تھا۔
واجد ضیاء نے جرح کے دوران بتایا کہ نواز شریف کے صاحبزادے حسین نواز نےآڈٹ بیورو رپورٹ جے آئی ٹی میں جمع کرائی تھی، جس پر خواجہ حارث نے کہا کہ واجد ضیاء شریک ملزمان کی جمع کرائی گئی دستاویزات بھی ہمارے کھاتے میں ڈال رہے ہیں۔
ایک موقع پر جے آئی ٹی رپورٹ پڑھ کر خواجہ حارث نے سوال کرنا چاہا تو واجد ضیاء نے کہا کہ اس میں ٹائپنگ کی غلطی ہے، لفظ or کی جگہ غلطی سے لفظ of لکھا گیا۔
عدالت نے ایک موقع پر واجد ضیاء کے ریکارڈ کیے گئے بیان میں نیب پراسیکیوٹر کے کہنے پر تبدیلی کرائی تو خواجہ حارث برہم ہوگئے اور کہا کہ عدالتی ریکارڈ میں ٹیمپرنگ کی اجازت نہیں دوں گا، جس کے بعد خواجہ حارث احتجاجاً عدالت سے چلے بھی گئے۔
بعد میں ان کی طرف سے معاون وکلاء نے بیان میں تبدیلی کو چیلنج کرنے کی درخواست دائر کر دی۔
دوران سماعت نیب کی پراسیکیوشن ٹیم اور خواجہ حارث کے معاون وکلاء کے درمیان بھی تلخ جملوں کا تبادلہ ہوا تھا۔
نیب ریفرنسز کا پس منظر
سپریم کورٹ کے پاناما کیس سے متعلق 28 جولائی 2017 کے فیصلے کی روشنی میں نیب نے شریف خاندان کے خلاف 3 ریفرنسز احتساب عدالت میں دائر کیے، جو ایون فیلڈ پراپرٹیز، العزیزیہ اسٹیل ملز اور فلیگ شپ انویسمنٹ سے متعلق ہیں۔
نیب کی جانب سے ایون فیلڈ پراپرٹیز (لندن فلیٹس) ریفرنس میں سابق وزیراعظم نواز شریف، ان کے بیٹوں حسن اور حسین نواز، بیٹی مریم نواز اور داماد کیپٹن ریٹائرڈ محمد صفدر کو ملزم ٹھہرایا گیا تھا۔
ایون فیلڈ ریفرنس: نوازشریف کو 11، مریم کو 8 اور محمد صفدر کو ایک سال قید کی سزا
اس کیس میں احتساب عدالت کی جانب سے نواز شریف، مریم نواز اور کیپٹن (ر) صفدر کو سزا سنائی جاچکی ہے اور وہ اس وقت جیل میں ہیں۔
دوسری جانب العزیزیہ اسٹیل ملز اور 15 آف شور کمپنیوں سے متعلق فلیگ شپ انویسٹمنٹ ریفرنس میں نواز شریف اور ان کے دونوں بیٹوں حسن اور حسین نواز کو ملزم نامزد کیا گیا ہے، جو اس وقت زیرِ سماعت ہیں۔
نواز شریف کے صاحبزادے حسن اور حسین نواز اب تک احتساب عدالت کے روبرو پیش نہیں ہوئے جس پر عدالت انہیں مفرور قرار دے کر ان کا کیس الگ کرچکی ہے۔
نیب کی جانب سے احتساب عدالت میں تین ضمنی ریفرنسز بھی دائر کیے گئے، جن میں ایون فیلڈ پراپرٹیز ضمنی ریفرنس میں نواز شریف کو براہ راست ملزم قرار دیا گیا تھا جبکہ العزیزیہ اسٹیل ملز اور فلیگ شپ انویسٹمنٹ ضمنی ریفرنس میں نواز شریف، مریم نواز اور کیپٹن (ر) صفدر نامزد ہیں۔

لاہور(اپنے نمائندے سے) ایل ڈی اے کی ٹاﺅن پلاننگ برانچ میں تعینات جونیئرافسران نے سینئر عہدوں پر تعینات ہو کر غیر قانونی تعمیرات کی منڈیاں لگا دیں اور اور لابی سسٹم کے تحت چیف ٹاﺅن پلانر کے احکامات کو بھی ہوا میں اڑانے لگے تفصیلات کے مطابق ایل ڈی اے کی ٹاﺅن پلاننگ میں گریڈ 17کے جونیئر آفیسر سلمان محفوظ اور اس کے ساتھی ٹاﺅن پلانر سید فراز اخترنے اپنی سابقہ روایت کو برقرار رکھتے ہوئے سرکاری اور پرائیویٹ ہاﺅسنگ سکیموں پر نقشہ کے برعکس رہائشی پلاٹوں پر کمرشل تعمیرات کروانے شروع کر دی ہے جبکہ جن روڈز پر کمرشل تعمیرات کی پابندی ہے وہاں بھی کھلم کھلا غیر قانونی کمرشل تعمیرات کی جا رہی ہیں اس وقت کینال روڈ، جوبلی ٹاﺅن ، رائے ونڈ روڈ، واپڈا ٹاﺅن، پی آئی اے ہاﺅسنگ سکیم، ویلنشیا ٹاﺅن، الحمرا ٹاﺅن، آرکیٹیکٹ روڈ، شوکت خانم روڈ سمیت مختلف ایریا میں فیکٹریاں کارخانے گھروں میں دکانیں اور پلر والی تعمیرات ہو رہی ہیں اور کئی تعمیرات تو زیر پوائنٹ بھی کی گئی ہیں ۔ ڈپٹی ڈائریکٹر سید فراز اختر اس سے قبل غیر قانونی کمرشل تعمیرات کروانے اور ان کو رہائشی کمپیلیشن سرٹیفکیٹ جاری کرنے کے الزام میں پیڈا ایکٹ 2006ءکے تحت انکوائری بھگت چکے ہیں اور معافی مانگ کر دوبارہ بحال ہو کر پھر غیر قانونی تعمیرات شروع کروا دی ہیں ۔جبکہ سیکرٹری ہاﺅسنگ نے ان دونوں افسران اور ان کی لابی کے خلاف بڑھتی ہوئی شکایات اور غیر قانونی تعمیرات کی نشاندہی پر ایل ڈی اے کی انتظامیہ کو ان دونوں کے خلاف پیڈا ایکٹ کے تحت کارروائی کرنے کا حکم دیا ہے ان دونوں افسران سلمان محفوظ اور سید فراز اختر نے لیک سٹی اور پرائیویٹ سکیموں پر پلاٹس خرید کر تعمیرات کا سلسلہ بھی شروع کر رکھا ہے ایل ڈی اے انتظامیہ نے دونوں افسران اور ان کے ٹاﺅٹوں کے خلاف تحقیقات شروع کر رکھی ہیں اور جلد ہی ان کے خلاف کیس نیب کو بھجوایا جائے گا۔ایل ڈی اے کے چیف ٹاﺅن پلانر سید ندیم اختر زیری کا کہنا ہے کہ وہ غیر قانونی تعمیرات کی رپورٹ تیار کر رہے ہیں اور اس حوالے سے ڈائریکٹر ایڈمن کے پاس ایک درخواست پر انتظامیہ کمیٹی تشکیل دے دی گئی وہ جو بھی تحقیقات کے بعد فیصلہ کریں گی اس پر کارروائی ہو گی۔

عامر محمود بٹ
0321-6666202
[email protected]

بے روزگاری، تفرقہ اور اقربا پروری نے جہاں معاشرے کو اپنی لپیٹ میں بری طرح جکڑ رکھا ہے وہاں آج جس بھی محکمے کی سمت نظر دوڑائی جائے تو وہاں لابی سسٹم، لاقانونیت، اختیارات کا ناجائز استعمال، پسند نا پسند کی بنا پر ٹرانسفر پوسٹنگ اور خلاف قانون مقدم ایگزیکٹو لیٹر کے ذریعے کام چلانے کی مثالیں واضح نمایاں نظر آتی ہیں چوں کہ اب پاکستان بھی نیا ہو چکا ہے اور ضلع لاہور کے محکمہ ریونیو کی بیورو کریسی بھی اپنا کام احسن طریقے سے کر رہی ہے تو میں نے سوچا کہ آج ان سے چند گزارشات ہی کر لوں شاید میں کہیں لیٹ نہ ہو جاﺅں، تو جناب محترمہ کمشنر صاحب ڈپٹی کمشنر صاحب اور ایڈیشنل ڈپٹی کمشنر ریونیو سمیت تمام ریونیو انتظامی افسران سے اپیل کرنا چاہتا ہوں گذارش ہے کہ سرپلس پول میں جانے والے 84شعبہ سیٹلٹمنٹ کے پٹواریوں میں سے جن کی دوبارہ واپسی محکمہ ریونیو میں ہو وہ کم از کم ایسا پٹواری ضرور ہو جس نے اپنی سروس کے دوران سیلٹمنٹ موضع جات کے ریکارڈ کو اپ گریڈ کیا ہو موضع جات کی مثل حقیت مکمل کرتے ہوئے موضع کو آن لائن کروایا ہو کیوں کہ ایسے متعدد ، سینکڑوں پٹواری بھی واپس آرہے ہیں جنہوں نے شعبہ سیٹلمنٹ میں تعیناتی کے دوران کسی ایک بھی پٹوار سرکل کا سیٹلمنٹ نہ کیا بلکہ سیاسی سفارشات کے ذریعے اربن پٹوار سرکل انجوائے کئے جائیدادیں بنائیں، کرپشن کی اور ہر نئے آنیوالے اے ڈی سی آر، ڈپٹی کمشنر صاحبان اور اسسٹنٹ کمشنرز صاحبان کی خوشنودی حاصل کرتے ہوئے اپنے آپ کو تمام قوانین اور کنٹریکٹ کی شرائط سے بری الذمہ قرار پائے جانے کی آشیر باد حاصل کی اور حکومتی خزانے سے تنخواہوں کی مد میں لاکھوں روپے بھی وصول کئے جو کہ غبن سرکار کے تحت ان سے واپس لئے جانے چاہئیں جنہوں نے کہیں بھی موضع کا سیٹلمنٹ مکمل نہ کیا ہے اچھی کارکردگی دکھانے والے شعبہ سیٹلمنٹ کے پٹواریوں کو کارکردگی کی بنیاد پر پٹوار سرکل الاٹ کرنے چاہئیں تاکہ وہ مزید دل لگا کر کام کریں، ایک اور گذارش ہے کہ گزشتہ دس سال قبل بنائی جانے والی پٹواریوں کی بلیک لسٹ میں سے 90فیصد پٹواری 10سال بعد لسٹ کی کلیئرنس کے بعد قانگوترقی پا گئے اور بعض پٹواریوں کو بھی پٹوار خانے دیدیئے گئے مگر اب بھی گنتی کے چند پٹواری ایسے ہیں جن کے پاس کوئی سفارش نہ ہے اور نہ ہی وہ لابی سسٹم کے من پسند ہیں جو محکمہ ریونیو کی تگڑی لابی اے ڈی سی ا ٓر یا ڈپٹی کمشنر کو بتا سکے کہ جناب ان کا کوئی والی وارث نہ ہے اور ان کوئی بھی لگا دیا جائے جن میں وسیم اللہ، محمد عارف ہمایوں، اکمل چیمہ ، ظہیر الدین بابر سمیت اور پٹواری بھی شامل ہیں صرف ان کے پاس تاحال کوئی سفارش نہ ہونے کی بنا پر ان کو نظر انداز کیا جا رہا ہے یہ میرٹ نہ ہے، جناب اگر آپ ضلع لاہور کی عوام کو حقیقی معنوں میں ریلیف دلانا چاہتے ہیں تو پرچہ رجسٹری قانون پر عمل درآمد کروا دیں پرچہ رجسٹری کے
مطابق پٹواری حضرات فری آف کاسٹ انتقال کی کاپی عوام کو 15 روز کے اندر دینے کے پابند ہیں یہ ضلع لاہور کی عوام کیلئے بہت بڑا ریلیف ہو گا اور ریونیو افسران کا دورہ پروگرام لازم دیکھیں جو کہ کبھی ایک ماہ بعد کبھی 20دن بعد کبھی 2ماہ بعد غرض اپنی مرضی اور مزاج کے مطابق دورہ پروگرام تیار کیا جا رہا ہے جو کہ غیر اخلاقی، غیر قانونی اور خلاف قانون بھی ہے اس حوالے سے سابقہ کمشنر لاہور اور بورڈ آف ریونیو پنجاب کی بھی سخت ہدایات موجود ہیں جن پر آج کل عمل درآمد نہیں ہو رہا جس کی وجہ جہاں کمشنر لاہور، ڈپٹی کمشنر لاہور ڈینگی، صفائی، پولیو، شادی ہالوں کی چیکنگ اور دیگر انتظامی ڈیوٹیوں میں مصروف ہیں وہاں محکمہ ریونیو کی ذمہ داریوں کو بھی ان کو لازم دیکھنا ہو گا ڈپٹی کمشنر لاہور کیپٹن(ر) انوار الحق صاحب سے ٹیلی فون پر جب بھی بات ہوئی انہوں نے بتایا کہ ریونیو کے معاملات وہ دیکھنے میں دلچسپی نہیں لیتے ان کو اے ڈی سی آر اور اسسٹنٹ کمشنر صاحبان دیکھ رہے ہیں یہاں پر بھی ایک گڑ بڑھ ہو رہی ہے
سر وہ یہ کہ تمام تحصیلوں کے اسسٹنٹ کمشنر کے دفاتر میں چند مخصوص پٹواریوں کی اجارا داری اور قربت لازم بخوبی دیکھی جا سکتی ہے جس کی وجہ سے جو ایکشن اور نوٹس آپ لے سکتے ہیں وہ کوئی اور شاید نہ لیں سکے ایک ایسے ڈی سی او کا بھی ذکر کرنا ضروری سمجھوں گا جن کے حوالے سے مشہور تھا کہ یہ سابق وزیر اعلیٰ پنجاب شہباز شریف کے استاد بھی تھے اور یہ رات کو سوتے بہت کم تھے سارا دن انتہائی ہارڈ ورکنگ کرتے رہتے اور اس بات میں کوئی شک بھی نہ تھا کہ وہ محکمہ ریونیو کی تمام انتظامی میٹنگیں خود کرتے تھے عمارہ خان اے ڈی سی آر اس بات سے بھی انتہائی خوش تھی کہ ریونیو کے معاملات میں انتہائی اچھے فیصلے جو کئے گئے ان میں نسیم صادق کا بھی ایک اہم کرداررہا ہے ایک اور اہم بات کی طرف بھی آپ انتہائی معزز افسران کی توجہ دلانا چاہتاہوں کہ ضلع لاہور میں ایسے ریونیو سٹاف سے کام لیا جا رہا ہے جن پر سرکاری زمینوں پر قبضے کروانے کا الزام ہے سرکاری زمینیں بیچنے کا الزام ہے ریکارڈ میں رد و بدل، کرپشن، رشوت وصولی اور انتہائی سنگین الزامات کے تحت ہونے والے مقدمات میں ملوث سٹاف سے بھی آپ کام لے رہے ہیں جس کی وجہ مجبوری بتائی جاتی ہے اور وہ مجبوری میں دس سالوں سے سن رہا ہوں کہ چونکہ پٹواریوں کی نئی بھرتی پر پابندی عائد ہے تو اس پرانے اور الزامات سے بھرے سٹاف سے کام لینا آپ کی مجبوری بن چکا ہے۔آپ پرانے سٹاف کو نکال کر نیا نہیں رکھ سکتے ہیں پرانے سٹاف کو بھی پتا ہے کہ جتنی مرضی بڑی کرپشن کر لو ریکارڈ میں ٹمپرنگ کرتے ہوئے دیہاڑی لگا لو، آفسر3ماہ یا چھ ماہ تک معطل رہنے کے بعد دوبارہ سرکل مل ہی جاتا ہے تو وہ زیادہ دلیری سے کھیل رہے ہیں سر زائد بیع انتقالات کرنے والوں ، سرکاری زمینوں کو بیچنے والوں اور ریکارڈ میں ٹمپرنگ کرنے والوں کو ہرگز نظر انداز مت کریں میڈیا کے نمائندے آپ کی آنکھیں اور بازو ہیں محکمہ ریونیو کے تمام انتظامی افسران کو یہ بات بھی بتاتا چلوں کہ جسے پولیس، ایل ڈی اے ہیلتھ ، ریلوے اوقاف، ایجوکیشن، پی ایچ اے اور دیگر صوبائی محکموں کی روزانہ کی بنیاد پر خبریں لگتی ہیں اور ان بیٹوں پر عبور حاصل کرنے والے ایک سے بڑھ کر ایک رپورٹر موجود ہیں مگر بورڈ آف ریونیو کی بیٹ میں ایسا نہ ہے یہ ٹیکنیکل سی بیٹ ہے اور اس پر کام کرنے والے پروفیشنل جرنلسٹ بھی کم ہیں جو صرف آپ کی توجہ ان بااثر سٹاف اور کاموں کی طرف کرواتے ہیں جہاں لاکھوں کروڑوں روپے کے مفادات کسی نہ کسی لینڈ مافیا کے ضرور ہوتے ہیں اور رپورٹر اپنی جان جوکھوں میں ڈال کر آپ کے نوٹس اور علم میں وہ بے ضابطگی لانے کی کوششیں کر رہا ہوتا ہے تو پلیز نوٹس لیا کریں اسٹیٹ لینڈ کے تحفظ کیلئے جس طرح موجودہ ڈپٹی کمشنر انوار الحق اور پانچوں تحصیلوں کے اسسٹنٹ کمشنرز متحرک ہو چکے ہیں وہ قابل تعریف اور خوش آئند بات ہے جس کی وجہ سے اس محکمے کے وقار میں جہاں اضافہ ہو رہا ہے وہاں حکومت کی ملکیتی جائیدادیں بھی محفوظ ہو رہی ہیں جن کو قابل ازیں بندر بانٹ کرتے ہوئے تقسیم کر لیا جاتا تھا، اس بات میں کوئی شک نہیں کہ پاکستان کا ہر افسر دبنگ بننے کی خواہش رکھتا ہے مگر حقیقت میں وہی لوگ یہ اعزاز حاصل کرنے کا حق رکھتے ہیں جو محب وطن ہوں اور اپنے فرائض کو ملک و قوم کی امانت اور ان کی خدمت سمجھ کر سرانجام دیتے ہوں۔

لاہور (اپنے نمائندے سے)لاہور میں اتوار بازاروں میں سبزیوں کی قیمتوں کوپرلگ گئے،عام مارکیٹ کے ساتھ اتوار بازاروں میں بھی قیمتیں بڑھ گئیں۔اتوار بازار میں قیمتوں نے کیا سب کو پریشان ، سب ان کی قیمتیں سن کر ہکا بکا رہ گئے ۔نگران حکومت نے نہیں کیا کوئی انتظام اور شہریوں پر ڈالا ہے مزید بوجھ۔ جو لاہور درمیانے طبقے سے تعلق رکھتے ہیں ان پر تو آسمان ہی ٹوٹ پڑا ہے کہ ہر دفعہ اتوار بازار میں قیمتوں کو برقرار نہیں رکھا جا سکتاہر کوئی قیمتوں کا رونا رو رہا ہے ۔ اتوار بازار میں سبزیوں کی قیمتوں میں ہوشربا اضافہ ہو گیا،ٹماٹر مہنگا ہو گیا ٹماٹر لال ہونے کی وجہ سے خریداروں کو بھی لال کر دیا۔ پیاز اور مٹر کی قیمت بھی بڑھ گئی۔ خریداروں نے انتظامیہ کی نااہلی کا بھی رونا رو دیا۔ سہولیات کا فقدان باخوبی نظر آ یا گرمی سے بچاﺅ اور بیٹھنے کا انتظام دور دور تک دکھائی نہیں دیا جس کے باعث شہریوں کو شدید مشکلات کا سامنا کرنا پڑا۔ قیمت میں سب سے زیادہ اضافہ لیموں کی قیمت میں ہوا جو بازاروں میں بہت تھوڑی مقدار میں دستیاب تھا۔ گاجریں بھی کم سٹالز پر نظر آئیں۔ سبزیوں میں لیموں دیسی100 روپے اضافہ سے 120 روپے کلو اور چائنہ لیموں 20 روپے اضافہ سے 130روپے کلو ہو گیا۔ دیگر سبزیوں میں شلجم3 روپے اضافہ سے 15، مٹر13 روپے اضافہ سے 45، ادرک چائنہ 11 روپے اضافہ سے 146، ٹماٹر 4 روپے اضافہ سے 40، پیاز 3روپے اضافہ سے 30 روپے کلو ہو گئی،گھیا کدو 40روپے کلو، بیگن 40روپے کلو، سبز مرچ55روپے کلو، آلو30روپے، جب کہ لہسن برنائی5روپے کی کمی سے 90، لہسن چائنہ10 روپے کی کمی سے 130، ادرک تھائی لینڈ4 روپے کی کمی سے 100، مونگرے 5روپے کی کمی سے 40، پالک 2 روپے کی کمی سے 10، شملہ مرچ 65، ٹینڈے دیسی10 روپے کی کمی سے 100، بندگوبھی ایک روپیہ کمی سے 14، اروی 38روپے، گھیاکدو15 روپے کمی سے 35، سبزمرچ13 روپے کمی سے 55، شملہ2 روپے کمی سے 20، بھنڈی10 روپے کمی سے 110 روپے کلو ہو گئی۔ پھلوں میں سیب امری10 روپے کمی سے 100، آم چونسہ130روپے کلو، آم لنگڑا 150روپے کلو ہو گئی جب کہ کیلا60 روپے سے 75 روپے درجن، کیلا(دوم) 45 روپے اضافہ سے 50 روپے درجن، مٹھا 100روپے درجن، گرما60، آڑو 130، انگور 180، انگور کالا 140روپے کلو ، باقی پھلوں کی قیمتیں برقرار رہیں۔

لاہور(نیٹ نیوز) پیپلز پارٹی کے رہنما قمر زمان کائرہ کا کہنا ہے کہ اپنے صدارتی امیدوار کے لیے ووٹ مانگنے نواز شریف کے پاس جیل جانے کو بھی تیار تھے۔

لاہور میں خورشید شاہ اور اعتراز احسن کے ہمراہ پریس کانفرنس کرتے ہوئے قمر زمان کائرہ نے کہا کہ سیاسی سفر میں معافیاں نہیں مانگی جاتیں اگر معافی مانگنے کی روایت چلی تو پیپلز پارٹی سے ہر جماعت کو معافی مانگنی پڑے گی۔

اعتزاز احسن نے کہا کہ شہباز شریف کی خواہش تھی ہم نواز شریف سے مل لیں لیکن ملاقات نہ ہوسکی اور ہم اپنے امیدوار کے لیے ووٹ مانگنے جیل میں نواز شریف کے پاس جانے کو بھی تیار تھے۔

ان کا کہنا تھا کہ ہم نے ایک دوسرے کے خلاف الیکشن لڑا تاہم اب اپوزیشن جماعتوں کے ساتھ ایشوز پر اکٹھے بھی ہوں گے، ہمیں صدارتی الیکشن لڑنا ہے اور لڑیں گے، کوشش ہے کہ مولانا فضل الرحمان ہماری بات مان لیں اور وہ بات مان گئے تو ہم الیکشن جیت لیں گے۔

پیپلز پارٹی کے رہنما نے کہا کہ صدارتی امیدوار اعتزاز احسن کے ساتھ لاہور آئے ہیں جہاں مختلف ارکان اسمبلی سے ملاقاتیں کریں گے، اعتزاز احسن سے بہتر صدارتی امیدوار نہیں ہوسکتا۔

قمر زمان کائرہ نے کہا کہ صدر کا عہدہ اب بڑے اختیارات کا حامل نہیں اور مولانا فضل الرحمان نے خفت مٹانے والی بات کی تاہم اعتزاز احسن کے صدر بننے سے اس عہدے کے اختیارات اہمیت اختیار کرجائیں گے اور اگر وہ صدر ہوں گے تو اس عہدے کو چار چاند لگ جائیں گے۔

انہوں نے کہا کہ اعتزاز احسن ہر دور کے آمر کے خلاف لڑے ہیں، توقع تھی سب اعتزاز احسن کے نام پر متفق ہوجائیں گے۔

لاہور(نیٹ نیوز) ہائیکورٹ کے حکم پر میٹروپولیٹن کارپوریشن کا آپریشن عمل میں آگیا۔ ہال روڈ سے 20 بڑے اور 10 چھوٹے سائن بورڈ اتروا دئیے گئے۔ سائن بورڈ اتارنے کے لئے بھاری مشینری کا استعمال کیا گیا۔ سپریم کورٹ کے حکم پر یہ آپریشن کیا گیا جس کے تحت لاہور کے مال روڈ کو ماڈل روڈ بنایا جائے گا۔ تاہم مال روڈ پر تمام بڑے سائین بورڈز اتار لئے گئے ہیں اور بعد ازاں ایک ہی مناسب سائز کے بورڈ لگائے جائیں گے تاکہ تاریخی عمارتوں کی خوبصوتی ظاہر ہوسکے۔