All posts by fayaz

لاہور(نیٹ نیوز/ایمرا نیوز) گرین ٹاؤن کے علاقے میں تلخ کلامی پر جھگڑا، ایک شخص جاں بحق ہوگیا۔ لاش کو پورسٹمارٹم کیلئے جناح ہسپتال منتقل کر دیا گیا۔

اسلام آباد(نیٹ نیوز/ایمرا نیوز)سوشل میڈیا پر وزیرِاعظم عمران خان کی کفایت شعاری کے چرچے ہیں لیکن وزیرِاعظم کے ایوان وزیراعظم سے بنی گالہ تک ہیلی کاپٹر پر سفر موضوع بحث ہے۔
عمران خان وزیراعظم منتخب ہونے سے پہلے اپنی سیاسی اور انتخابی سرگرمیوں کیلئے متعدد بار ہیلی کاپٹر استعمال کرچکے ہیں ، کے پی کے میں سرکاری ہیلی کاپٹر کے استعمال پر انہیں تحقیقات کا بھی سامنا ہے، اس وقت بھی ان کے ہیلی کاپٹر کا سفراس وقت پاکستانیوں کا موضوعِ بحث بنا ہوا ہے۔
وزیر اطلاعات کا کہنا ہے کہ ہیلی کاپٹر کا سفر وزیراعظم اور وزرائے اعلیٰ کا استحقاق ہے تو کوئی یہ کہتا نظر آتا ہے کہ سادگی اپنانے کے اعلانات کے بعد ایسا عمل مناسب نہیں۔وفاقی وزیرِاطلاعات فواد چوہدری نے گذشتہ روز یہ کہہ کر ہیلی کاپٹر کے استعمال کا دفاع کیا تھا کہ ‘ہیلی کاپٹر کا خرچ 50 سے 55 روپے فی کلومیٹر ہے۔
وزیر اطلاعات فواد چوہدری کہتے ہیں یاتو سڑکیں بند ہوں گی، لوگ خوار ہوں گے، پچاس پچاس سیکیورٹی گاڑیاں ساتھ ہوں گی یا پھر لوگوں کی آسانی کےلیے وزیراعظم ہیلی کاپٹر کا سفر کریں۔
فواد چوہدری کے اس بیان پر کسی نے یقین بھی کرلیا ہو لیکن ایوان وزیراعظم سے بنی گالا کے سفر سے متعلق کچھ تفصیلات سامنے آئی ہیں۔دونوں کے درمیان فاصلہ 15 کلومیٹر ہے ، ہیلی کاپٹرکے اڑ کر آنے جانے سے سفر تیس کلومیٹر ہوگیا ۔ ہوابازی کی زبان میں یہ فاصلہ 8 ناٹیکل میل بنتا ہے۔
وزیر اعظم عمران خان جو سرکاری ہیلی کاپٹر استعمال کر رہے ہیں وہ دو انجن والا 15 نشستوں والا آگسٹا ویسٹ لینڈ 139 ہیلی کاپٹر ہےجس کا آٹھ ناٹیکل میل کا خرچ 104 ڈالر بنتا ہے جو پاکستانی روپوں میں 12800 روپے سے زیادہ بنتا ہے۔
عملے، فضائی حدود کے استعمال اور دو طرفہ سفر کے اخراجات شامل کیے جائیں تو مزید اضافہ ہو جائے گا۔
اگر اس فضائی سفر کی عوامی نقطہ نظر سے دیکھا جائے تو اس کا ایک یہ فائدہ تو ضرور ہے کہ زمین پر ہونے والی وی آئی پی موومنٹ نہیں ہوتی اور جس کا فائدہ عوام کو ہوتا ہےلیکن عوامی حلقوں کا کہنا ہے کہ ایک طرف کفایت شعاری کا پرچار اور دوسری طرف ہیلی کاپٹر کی اتنی آنیاں جانیاں۔
سوشل میڈیا صارفین کے ہیلی کاپٹر پر دلچسپ ٹوئٹ
https://twitter.com/Imran_hj/status/1034418771560153089
ایک صاحب نے لکھا کہ وہ ایک مہم کا آغاز کر رہے ہیں جس میں ہم تمام دوست مل کر فنڈز جمع کریں گے اور اس سے ہیلی کاپٹر خریدیں گے، 55 روپے کا خرچہ برا نہیں ہے۔
ایک اور صاحب نے رکشہ کی تصویر شیئر کی جو ہیلی کاپٹر کی طرز پر ڈیزائن کیا گیا ہے۔
ایک صاحب نے لکھا ’ضرورت ہے ہزاروں ایسے اڑن کھٹولوں المعروف بنی گالوی ہیلی کاپٹروں کی جو ۵۵ روپے فی کلومیٹر چلتے ہیں ۔ ان کو مانسہرہ سے ایبٹ آباد اور حویلیاں کے درمیان چلایا جائے گا تاکہ لاکھوں شہریوں کو ٹریفک جام سے بچا کر نئے پاکستان میں عوام اور حکمرانوں کا فرق ختم کیا جا سکے‘.

New Pakistan :p Rs 55 per km @fawadchaudhry #TabdeeliAgaee #FakeTabdeeli pic.twitter.com/BE4dBWZx07

— ABDUL KARIM ODHEJO (@AbdulKarimPPP) August 28, 2018

ایک صاحب نے مختلف دلچسپ تصویریں شیئر کیں اور لکھا نیا پاکستان، 55 روپے فی کلو میٹر۔

-لاہور(ایمرا نیوز)
oعمران خان کی شخصی انفرادیت میں کوئی شبہ نہیں، یہ انفرادیت ہی ان لوگوں کے لئے اَنا کا سوال بن جائے گی جن کے نزدیک ان کی انفرادیت اصل شے ہے، وہی حب الوطنی کی ’’پھُننگ‘‘پر ٹکی ہوئی ہے۔

-oخان صاحب لازم نہیں الزامات پر یقین کیا جائے البتہ عوام میں آپ کے جن ساتھیوں کا ’’تاثر‘‘ گڑبڑ ہے، انہیں اس ’’پہلی بار‘‘ میں کم از کم اپنے اور قوم سے دور رکھیں۔

-oزندگی موت اللہ کے ہاتھ میں ہے، ہمیں اس کے سامنے سرنڈر کر دینا چاہئے، اپنے دشمنوں اور سمیت سب کیلئے کسی بے بسی اور معذوری سے پناہ طلب کرنی چاہئے۔

-oاچانک موت، ان دیکھی مصیبتوں آزمائشوں اور حادثات سے پناہ مانگتے رہو، وقت نے ایسا ہی سکھایا اور پڑھایا ہے۔

-oلمبے شوکت عزیز کا نام بھی ’’احتساب‘‘ کے دائرے میں سامنے آیا ہے، یہ وہی شخص ہے جو لال مسجد میں گولیوں کی بوچھاڑ کے درمیان یہ کہہ کر وہاں سے چلا گیا تھا ’’میں اپنی بیوی کے ساتھ قلفی کھانے جا رہا ہوں‘‘ یہ شخص اس وقت اس ملک کا وزیراعظم تھا۔

-oدوستی صرف برابر کی ہے باقی سب ’’گزارہ‘‘ ہے۔

-oپچاس برس بعد جائز اور ناجائز دانشور اپنا ماضی بھول جاتے یا ملتوی کر دیتے ہیں۔

-o’’متحمل مزاج‘‘ کے طور پر مشہور حضرات کی اکثریت ’’میسنوں‘‘ کی ہوتی ہے۔

-oغریب کو رحم کی چلتی پھرتی اپیل بھی کہا جا سکتا ہے۔

-oاخلاقیات بھی طاقتور کے حضور رحم کی اپیل ہی ہے۔

-oخفیہ ایجنسیاں انسانوں کے باطنی عدم اعتماد نے تشکیل دی ہیں۔

-oاس صدی کے اختتام تک ’’حب الوطنی‘‘، ’’ملکی سالمیت‘‘، جغرافیائی و نظریاتی سرحدیں‘‘ اور ’’کفار‘‘ جیسی اصطلاحات کی فکری اور عملی ایکسپلائٹیشن تاریخ کی مسترد داستانوں کا حصہ ہو گی۔

-oٹی وی چینلوں پر ’’آزادی صحافت‘‘ اور ’’عوامی فرائض‘‘ کے لیکچرار اپنی تصوراتی نمازیں ٹیڑھی صفوں پر ادا کرتے ہیں۔

-oطاقتور کا مہینہ 20دن کا بھی ہوتا ہے۔ سلطان راہی نے بھی یہی کہا تھا۔

-oپنجاب میں بلاول بھٹو زرداری کی متوقع آمد پیپلز پارٹی کے نظریاتی جیالوں اور ’’سیاسی بکیوں‘‘ کے درمیان مقابلے کا میدان ہو گا۔ ’’سیاسی بکیوں‘‘ کے جیتنے کا امکان زیادہ ہے۔

-oبیورو کریسی اور ریاستی اہلکاروں کی تربیت کے لئے انہیں انسانی اخلاقیات کے گھٹیا معیارات کا مجموعہ ازبر کرایا جاتا ہے۔

-oکتابوں کی زیادہ تر تقریبات رونمائی اپنی تخلیقی نالائقی اور علمی کمی کے گناہوں پر پردہ ڈالنے کی کوشش ہوتی ہے۔

-o’’شامت اعمال‘‘ کا مکمل ترین لغوی اور معنوی مطلب پوچھنے کے لئے صوبے کے ’’آئی جی‘‘ اور صوبائی محکمہ اطلاعات کے ’’ڈی جی پی آر‘‘ سے زیادہ مناسب اور کوئی نہیں ہو سکتا۔

-oبوڑھی ہیروئنیں فلم انڈسٹری کے زوال اور تباہی کی باتیں کرتے ہوئے دراصل اپنی جوانی کا سیاپا کر رہی ہوتی ہیں ۔

-oلہری نے مرنے سے کچھ عرصہ قبل ایک جاننے والے سے حالت فالج میں باتیں کرتے ہوئے کہا تھا ’’شہرت ایک سراب ہے‘‘ پیارے لہری! دنیا بھی ایک سراب ہی ہے مگر دنیا دنیا ہے، ہم سب اس میں مبتلا رہتے ہیں۔

-oمذہبی حوالوں سے پیش گوئیاں کرنے والے دو کالم نگار اپنی اپنی پیش گوئیاں فراموش کر دینے کی ’’لازوال‘‘ صلاحیتوں کے مالک ہیں۔

-oنجومیوں، پیروں، عاملوں، سٹہ بازوں اور وغیرہ وغیرہ کے پاس دھڑا دھڑ جانے والی قوم اپنے مقدر پر بدقسمتی کی مہر تصدیق ثبت کرتی ہے۔

-oبعض لکھنے والوں کی اکثریت پاکستانیوں کے لئے ناگزیر عذاب جاں کی حیثیت رکھتی ہے۔

-oخوبصورت عورت کو عظیم پنجابی وژنری صوفی اور شاعر میاں محمد بخش نے صندل کی سفید لکڑی سے تشبیہ دی ہے۔ پوری اردو شاعری میںیہ تشبیہ کسی نے استعمال نہیں کی۔

-oقائداعظمؒ، اقبالؒ اور لیاقت علی خان قیام پاکستان کی ابتدائی دہائی تک زندہ رہ جاتے تو انہیں پتا چل جاتا ’’دایاں بازو‘‘، ’’مذہبی جماعتیں‘‘ اور ’’ایجنسیاں‘‘ کس بھائو پڑتی ہیں؟

-oمشاہد حسین ’’ن‘‘ لیگ کے احسن اقبال، خواجہ آصف اور خواجہ سعد رفیق پر بھاری ہے۔ تقریر کروا کے، مضمون لکھوا کے، مذاکرہ کروا کے دیکھ لیں، شرط صرف ایک ہے یعنی آمنے سامنے۔

-oانگریزی زبان کے دو سینئر کالم نگاروں ایاز امیر اور خالد حسن مرحوم کی شاعرانہ نثر پڑھ کر اکثر پاکستان ٹائمز کے محمد ادریس اور زیڈ آئی مرزا یاد آ جاتے ہیں۔

-oمستنصر حسین تارڑ کے سفر ناموں کی تعداد زیادہ ہے، عطاء الحق قاسمی نے سفر زیادہ کئے ہیں، فارمولا تو مستنصر صاحب کے پاس ہوا۔

-oمیز کے دوسری طرف بیٹھا ہوا شخص جب چاہے اپنے سامنے موجود فرد کو پرلے درجے کا نا اہل اور بیوقوف ثابت کر سکتا ہے اس کی وجہ قابلیت نہیں ’’ٹیکنیکل پوزیشن‘‘ ہے۔

-oننانوے فیصد اچھے یا بُرے، نیک یا بد، دولت مند مفلس اور ضرورت مند کے لئے ذہنی اور سماجی عذاب ہوتے ہیں۔

-oضرورت مند اور مقروض، صاحب حیثیت اور قرض خواہ کے سامنے اکثر خواہ مخواہ بتیسی نکال کر اپنے منہ کے زاویئے خراب کرتا ہے دونوں حضرات اس کی تمام تر ’’محنت‘‘ کے باوجود اس سے سخت بوریت محسوس کرتے ہیں۔

-oموجودہ جمہوری نظام عوام کے حق ووٹ اور حق عزت کا اولین دشمن ثابت ہو چکا ہے۔

-oنوسر باز سرکاری درباروں اور محکموں کے برآمدوں جبکہ درماندہ اور مقہور عوام گیٹوں کے باہر ہوتے ہیں۔

-oسابق چیف جسٹس افتخار محمد چوہدری اور آزاد عدلیہ کا عملی نتائج کا ریکارڈ مرتب ہو رہا ہے۔ عوامی دانش کی بیلنس شیٹ میں ’’عدل کی منزل‘‘ کے سوا عظیم داستانوں کا مینا بازار لگا ہوا ہے۔

-oریاست واقعی ماں جیسی ہوتی ہے۔ اعتزاز نے درست یاد دہانی کروائی لیکن نالائق اولاد اس کے پائوں کے نیچے سے جنت چھین لیا کرتی ہے۔

-oفوج، طالبان اور سابق چیف جسٹس (ر) افتخار محمد چوہدری کے حوالے سے سینیٹرفیصل رضا عابدی نہ جانے کیوں پاکستان کے گلی محلوں کا عمومی مکاملہ بنے رہے، ان دنوں کہاں ہیں؟

-oاقبالؒ، قائداعظم اور مذہبی جنونیت کے موضوعات پر یاسر پیرزادہ کی نظریاتی تحریریں دائیں بازوں کی فکری تنگ و تاریک اندھی گلی میں روشنی کا تازہ ترین شاہکار ہیں۔

-oپاکستان کی دھرتی پر قیامت تک کسی اتاترک کی پیدائش ناممکن ہے۔ اگر پیدا ہو بھی گیا تو چند گھنٹے سے زیادہ زندہ نہیں رہ سکے گا۔ حسن نثار کو اطلاع ہو۔

(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

لاہور(ایمرا نیوز)
سلیم خان ! ’’ستاسو یوازے نئیں، منگم تاسو سرا ولاڑ یو‘‘ آپ اکیلے نہیں ہیں۔جرات مند ،باضمیر،سچے کھرے پاکستانی آپ کے ساتھ ہیں ۔عمران خان نے اگر تو جانتے بوجھتے جنونی نو خیز نوجوان نسل بمعہ پختہ عمر لواحقین، مقلدین کا اخلاق بگاڑا ہے،منصوبہ بندی کے تحت جھوٹ، دشنام طرازی، بہتان کا رسیا بنایا ہے تو گریجویشن مبارک ۔اگر کسی مفاد کے حصول اپنی ناکامیوں کے غصے میں بحالت مجبوری میں ایک بڑے گروہ اور جتھے کو مادر پدر آزادی استعمال کی حوصلہ افزائی دی ہے ،تو بھی سودا سود مند،کامیابی مبارک۔
موضوع کئی اہم، ہر موضوع کئی کالموں کا متقاضی۔ کالم نہ لکھنے کا فیصلہ کہیں زیادہ اہم، کہ آئین و قانون کی پابندیوں میں ’’ حاصل آزادی‘‘ کا استعمال آج کل قابلِ گرفت ،تعزیرات گوشمالی، خطرہ جان و مال۔ قلم چھوڑ رکھا تھاکہ آئین و قانون موجود ،جمہوری حق کے مطابق لکھناکوہِ گراں ٹھہرے تو جائے اماں ڈھونڈنا واجب ۔ مملکت کی چولیںہلا دینے والے واقعات، دانشوری پر رعشہ طاری،سمندر کی لہریںگننے سے ترکِ قلم بہتر ۔کیا کِیا جائے؟ برادرم سلیم صافی پر یلغارنے سوتے کو جھنجھوڑ دیا۔لکھنے کی اُمنگ جاگ اُٹھی ۔بات نئی نہ انوکھی، پچھلے دس سالوں کا انصافی کلچرآج جوبن پر ہے ۔ہر وہ صحافی جو مخصوص ذہن، سوچ، فکر کے مطابق کچھ لکھنے کہنے کی جسارت ،جرات، رکھتا ، کرتا ہے۔اخلاقی باختگی کی زد میں۔ ایس ایم ایس سے شروع طوفان بدتمیزی، بذریعہ واٹس ایپ ،ٹوئٹر ،فیس بک، بد تہذیبی، بدتمیزی، مادر پدر آزادبہتان تراشی سونامی بن چکا ہے۔اچنبھے کی بات اس لیے نہیں کہ سونامی لانا عمران کا وعدہ تھا، دیکھنا کیا،بھگتنا تھا۔

اپنے تئیں ، چند سالوں سے دامے درمے سخنے تندہی سے واٹس ایپ تک محدودہوں۔ٹوئٹر،فیس بک اکاؤنٹ ضرور،استعمال میں نہیں۔طبیعت کبھی بھی نرم خو نہ پائی۔غصہ موجو، عمر کے ساتھ مزید ڈھلکنا تھا۔ محسوس کیا کہ چند سالوں میں غصہ بے قابو۔ اعصاب دل و دماغ میںمکمل غصہ گھس چکا،جاں گُسل،وبالِ جا ںبن چکا،جاں گھول رہا ہے۔اوپر سے بلڈ پریشر، ہر وقت لڑنے ،کٹ مرنے کو آمادہ پاتاتھا۔ہمیشہ کی طرح ،خود احتسابی کی،سخت تجزیہ کیا کہ صحت مند جان ہے تو جہان ہے۔اس نتیجے پر پہنچا کہ موجودہ دباؤ کی بنیادی وجہ واٹس ایپ پر آئے معاندانہ پیغامات ہیں۔اشتعال میں رکھتے ہیں۔ تین ہفتے پہلے طے کیا کہ واٹس ایپ پر سرسری نظر ضرور ڈالوں گا۔شادی غمی، ایمر جنسی ذاتی پیغامات دیکھ کر اور باقی بغیردیکھے DELETE کرناہونگے ۔یک گونہ آسودگی ملی،طبیعت میں خاطر خواہ بہتری پائی۔سلیم صافی پر اٹیک ،سوشل میڈیا کا میرا بائیکاٹ تتر بتر کر گیا۔سلیم خان کو اکیلا نہیں چھوڑنا، کمر کس لی کہ دل کی بھڑاس نکالنی ہے کہ بہت تکلیف ہوئی۔نہ چاہتے قلم اُٹھایاکہ تیکھے دانشورسلیم خان پر رکیک حملوں کو نظر انداز کرنا پیشہ وارانہ بد دیانتی رہتی۔ حملہ آوروں کو حوصلہ افزائی ملتی۔انگریزی کا معقولہ،’’ تلوار کے زور پر زندہ رہنے والے ،تلوار کی زد میں رہتے،مرتے ہیں‘‘۔برسوں پہلے عمران خان کے کان بجائے کہ گالی کے زور پر سیاست کا انجام، جوتے اور گالیاں واپس اپنی دبوچ میں لے کر رہیں گی۔خاطر جمع رکھیں،وہ دن دور نہیں، یار زندہ، عنقریب بھگتنے کو۔ اکابرین کی حوصلہ افزائی پر تیار یہ جتھہ اپنے قائدین کو بھنبھوڑے گا، پھاڑے،کھائے گا۔

ان حملہ آوروں کی گالم گلوچ، جھوٹ،بہتان،الزام تراشی سے کسی کا کچھ نہیں بگڑا۔نواز شریف، مریم نواز کا پچھلے دس سال سے سوشل میڈیا پر بھرکس نکالنے کا ہر بندو بست ہوا۔پچھلے چار سال سے زبردستی ہتھیایا (CAPTIVE) قومی میڈیا، نواز شریف کا میڈیا ٹرائل، اینٹ سے اینٹ بجانے کی ہر حد ٹاپی۔نواز شریف کو قصہ پارینہ بنانا ،وعدہ وفا کا حصہ تھا۔ الیکشن دھاندلی،کرپشن، پانامہ ، انڈین ایجنٹ 24گھنٹے،7دن ،چار سال دن رات منادی کرائی۔پیچھے بیٹھے کئی ڈائریکٹر جھوٹ، ننگ فریب کی فیکٹریاں دن رات چلاتے رہے۔جھوٹ،فریب بہتان کی پوسٹس،ویڈیو کی یلغار کچھ بھی نواز شریف کا نہ بگاڑ سکی،ایک ووٹ نہ ٹوٹا۔بگڑے تگڑوں کا اخلاق ضرور بگاڑ گئی۔ حد یہ ٹھہری کہ نواز شریف کے سچے گناہ، بڑے بلنڈر آج اپنی افادیت کھو بیٹھے۔ بظاہر قانونی حکومت نصب و مامور۔جمہوری کہلوانا پسند فرماتی ہے۔ آئین موجود، آئین کی تضحیک وتوہین روز مرہ کا معمول۔نئی نویلی حکومت چند محکموں تک مؤثر ۔اتنی مؤثر ضرور کہ بشریٰ بی بی کے سابق شوہر خاور مانیکا کو ناکے پر روکنے کی جسارت پر پوری ضلعی پولیس تہس نہس کرنی پڑی۔ادراک کرنا ہوگاکہ حکومتی نظام ایک نیا حکومتی ماڈل ہے۔ پنجاب،KP،وفاقی وزارت داخلہ پر سجے چہرے نمائشی۔ عمران خان، بزدار ، وزیر اعلیٰ KP کے پیچھے اصل ڈائریکٹر پردہ سیمیں کے پیچھے اور کچھ چہرے جہانگیر ترین، علیم خان، عاطف خان جیسے سامنے ۔ شاہ محمود قریشی کا کہنا کہ ’’ اب فیصلے وزارت خارجہ سے ہونگے‘‘،غیر ضروری وضاحت بھی اور اس بات کی تصدیق بھی کہ پہلے فیصلے باہرسے ہوتے تھے۔شاہ محمود صاحب! کیا پِدی اور کیا شوربا۔جناب والا، 70سال سے جاری عملیات کا نظام زیادہ بہتر اور زیادہ مؤثر،بالآخر مستحکم ہوچکا ہے۔ چند دن پہلے امریکی وزیر خارجہ POMPEO اور عمران خان کی ٹیلی فونک گفتگو کا تنازع، بھارت کا بیان کہ ہم نے مذاکرات کی پیشکش نہیں کی، پاکستان نے جھوٹ بولا ہے۔بین الاقوامی میڈیا میں جگ ہنسائی کا سامان دے گیا۔شروعات، آگے آگے دیکھے ہوتا ہے کیا۔حکومت کیا،لگتا ہے بچوں کے ہاتھ نائی کا اُسترا آگیا ہے۔بین الاقوامی، خارجی امور پر بے ربطی، اُلجھنیں، نفسا نفسی عیاں ہے،ابتدائے عشق ہے روتا ہے کیا۔ ویسے توسلیم صافی تختہ مشق ہمیشہ سے تھے۔مجیب الرحمٰن شامی صاحب جیسے کُہنہ مشق، سکہ بند دانشور ہوں یا ذہین و فطین، محنتی، مشقتی ذی فہم سہیل وڑائچ ، جاوید چوہدری جیسامدلل یاعقلیت پسند نصرت جاویدیاسوچنے، سمجھنے، پرکھنے کی صلاحیتوں سے مالامال طلعت حسین، صحافتی کہکشاںمعمولی گستاخی پر دشنام طرازی،بہتان کی زد میں،عرصہ بیت چکا ۔صرف ان لوگوں کا ذکر کیا جن کی زندگی معقول، معتدل ،مدلل علمی بحث و تمحیص و تحقیق سے بھری ہے۔مجیب الرحمٰن شامی صاحب کی دیانتداری اور اصول پرستی کا ہمہ تن معترف ہوں،گواہی دیتا ہوں۔ افسوس یہ کہ سب کچھ عمران خان کی ناک کے نیچے پلان ہوا، پروان چڑھا۔ہفتہ پہلے ایک رشتہ دار، گریڈ 22 کے ریٹائرڈ پولیس افسر نے سلیم صافی بارے ایک کلپ بھیجا، ’’ لفافہ صحافی،چمک‘‘ ، وجہ، یہ جسارت کیوں کر ڈالی کہ’’ نواز شریف نے پرائم منسٹر ہاؤس کے اپنے اخراجات اپنی جیب سے ادا کیے ہیں‘‘۔ افسوس اس لیے ہوا کہ موصوف پانچ وقت کے نمازی ،اللہ سے ڈرنے والے،بھلے مانس انسان ہیں۔کلب کی مسجد میں دو،تین نمازوں میں ٹاکرا رہتا ہے۔ایک اضافہ ضرورحیران کُن ، پختہ عمر کے کئی مذہبی دوست ،تحریک انصاف کی اندھی محبت میں اندھی تقلید کے فلسفہ پر کار بند ، نواز شریف، مریم نواز اور ہمارے درجنوں صحافی ساتھی ( جو نواز شریف کو گالی دینا، الزام بہتان لگانا پسند کرتے ہیں نہ حصہ بنتے ہیں)بارے ہربے پر کی بیہودہ ،اخلاق باختہ پوسٹس، کلپس،BLOGS،گالی گلوچ،بہتان کو عام کرنے میں رات دن وقف کیے ہیں۔دین داروں کو سورۃ الحجرات کی آیات بھیجیں ، بہتان اور سنی سنائی باتیں، بغیر ثبوت آگے بڑھائے بارے قرآنی احکامات بھیجے ، ایسوں کے کان پر جوں کیا رینگتی،کھلم کھلا خلاف ورزی ،تکذیب کے زمرے میں ، انا للہ وانا الیہ راجعون۔ریٹائرڈ نمازی پرہیز گارپولیس افسر نے سلیم صافی کو ’’ لفافی صحافی، چمک‘‘ کی پوسٹ فارورڈ کی تو میرے پاس اس کے علاوہ چارہ نہ رہا کہ سلیم صافی کے علم میں لائے بغیر مختصراً جواب لکھ بھیجوں۔

’’محترم !اگر سلیم صافی لفافہ یا چمک کی سیاست میں ملوث ہے تو اللہ اُسے بدترین انجام سے دوچار رکھے، اگر آپ کی پوسٹ جھوٹ ، بہتان ہے تواس پوسٹ کو تخلیق دینے والوںسے اللہ نے عذاب عظیم کا وعدہ کر رکھا ہے کہ قرآنی احکامات کی جانتے بوجھتے تکذیب کے مرتکب ہے،کا ٹھکانہ برا بتایا ہے‘‘۔صوم و صلوٰۃ کا پابند پولیس افسر کا جواب زیادہ دلچسپ،’’ حفیظ اللہ صاحب! آپ سے متفق مگرسلیم صافی کو ایسی تراشیدہ کہانیاں ،جو نواز شریف کی نام نہاد تصوراتی دیانت داری کی باتیںبنانے سے احتراز کرنا ہوگا‘‘۔اس جواب نے مجھے ششدر بھی رکھا اور تکلیف میں بھی ۔جب پارسا نیک بزرگ ذہنی اختلاج و خلفشار کی گرفت میں ہوں تو بگڑے نوجوان جن کو محنت سے سوشل میڈیا حملہ آور بنایا گیا ہے،ان سے گلہ شکوہ کیسا؟البتہ نوجوانوں کا اخلاق باختگی پر آموز ش اور تربیت ریاست اسلامیہ کا المیہ بھی اور لمحہ فکریہ بھی۔بھلے دنوں ،عمران خان کو بتایا تھا کہ یہ راہ ،بے راہ روی کی پختہ سڑک ہے۔فراٹے مارے تو واپسی نا ممکن ہوگی۔سنی ان سنی کر دی گئی۔پہلی دفعہ، 2011ء میں جناب عطاء الحق قاسمی صاحب کی شکایت پر میں نے برملا برہمی کا اظہار کیا عمران خان ہنس دیئے،مسکرا دیئے۔تحریک انصاف کا ناپسندیدہ صحافیوں کو گالیاںآج کلچر اور وطیرہ بن چکا ہے۔2011ء کے وسط میں حامد میر اور نصرت جاویددرجنوں دوسروں کوارزہ تفنن گالیوں سے نوازا جاتا تھا،بار بار پوچھا ، اختلاف رائے والوں کو گالیوں والے درجنوں ایس ایم ایس کیوں؟عمران خان باچھیں کھول،دل کھول ہنسے ۔مجھے اس ہنسی سے خوف آیا۔ ایک دفعہ عمران خان کی موجودگی میں چند چہیتے دفتر میں میری موجودگی میں حامد میر کو گندی گالیاںدیتے پائے گئے ، عملاً میں نے تھپڑ مارنے کا قصد کیا کہ ایک دفعہ جب بھیانک طریقے سے روکوں گا توسیاسی پارٹی کے دفتر سے میڈیا کو گالیاں رُک جائیں گی کہ اس کے اپنے لیے نقصان دہ۔سیاسی پارٹی میڈیا سے لڑائی کی متحمل ہو نہیں سکتی کہ نقصان قومی قیادت کارہتا ہے ۔آج پورا قومی میڈیا ( حق اور مخالف دونوں ) دلجمی سے عمران خان کو سنجیدگی سے لینے کو تیار نہیں ۔دل سے عزت دینے پر آمادہ نہیں ۔بڑی وجہ گالیاں ،جھوٹ،بہتان تحریک انصاف کا وطیرہ۔نقصان وطن عزیزکا کہ اگلی کئی دہائیاں دشنام طرازی، الزامات، بہتان کا میچ مملکت کو نا قابل تلافی نقصان پہنچانے کو ۔سلیم خان صافی کا کچھ نہیں بگڑا،بگڑا دہن،خبث ِدرون کھل کر سامنے آیا ہے۔

(بشکریہ جنگ لاہور)

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

لاہور(ایمرا نیوز)
25؍اگست کو امریکہ کے نامور کنزرویٹو ری پبلکن سینیٹر جان مکین برین کینسر کے مرض میں ایک سال تک مبتلا رہے اور 81؍سال کی عمر میں امریکی سیاست اور تاریخ میں اپنا رول ادا کرکے دنیا سے رخصت ہوگئے۔ ری پبلکن سینیٹر ہونے کے باوجود ری پبلکن صدر سے پالیسی اور پالیٹکس کا اتنا شدید اختلاف تھا کہ صدر ٹرمپ ان کا نام لئے بغیر بھی اپنے بیانات اور ٹویٹ میں انہیں اپنا ٹارگٹ بناتے اور سینیٹر جان مکین بھی ٹرمپ پالیسیوں کو شدید تنقید کا نشانہ بناتے۔ وہ مسلسل 30؍سال سے ایری زونا ریاست سے سینیٹر منتخب ہوکر سینٹ کی آرمڈ سروسز کمیٹی کے رکن اور پھر اپنی موت تک چیئرمین رہے۔ دفاعی امور، اسلحہ کی تیاری سپلائی اور عالمی فروخت، امریکی افواج کے امور، امریکہ کے دیگر ممالک سے اعلانیہ اور خفیہ دفاعی اور جنگی معاہدے سمیت دنیا میں امن اور جنگ کے امور سے عملی طور پر ڈیل کرنے والی یہ کمیٹی عالمی سطح پر امریکہ کے اتحادی ممالک اور دیگر ممالک کے لئے بھی اس قدر اہم ہے کہ دنیا بھر کی ’’ملٹری وار مشین‘‘ کے ذمہ داروں کے لئے اس کی اہمیت مسلم ہے۔ دفاعی تجزیہ نگاروں اور مبصرین سے لے کر مختلف ممالک کے حکمران اور قومی دفاع کے ذمہ دار اور خفیہ یا اعلانیہ دفاعی اور جنگی معاہدوں میں امریکہ کے اتحادی بھی سینیٹر جان مکین جیسے قوم پرست امریکی جان مکین سے 15؍منٹ کی ملاقات کے منتظر رہتے اور ملاقات کے بعد ان کے حکومتی ترجمان ملاقات سے بھی طویل بریفنگ دیا کرتے۔ پاک۔امریکہ تعلقات کی تاریخی اور موجودہ نوعیت کے پیش نظر پاکستان کے آرمی چیف جنرل قمر جاوید باجوہ کا سینیٹر جان مکین کی موت پر تعزیتی پیغام کا متن عملی طور پر بہت مناسب مگر تجزیہ طلب ہے وہ واقعی امریکی قوم کے لئے ویت نام کی جنگ کے ایک ممتاز جنگی ہیرو تھے۔ انہوں نے پاک۔ امریکہ دفاعی تعلقات، دفاعی امداد پاکستان کی صورت حال سے لے کر دہشت گردی، افغان جنگ سمیت خفیہ اور اعلانیہ حقائق سے بھی واقف تھے لیکن وہ ایک انتہائی نیشنلسٹ امریکی تھے جو پوری دنیا میں امریکہ اور امریکی نظام کی برتری چاہتے تھے۔ مجھے ان تمام سالوں کے دوران سینیٹر جان مکین سے ملنے گفتگو، خصوصی انٹرویوز اور بعض اوقات ’’آف دی ریکارڈ‘‘ جملے کہنے اور سننے کے مواقع ’’جیو‘‘ کے قیام سے قبل بھی ملے اور پھر ’’جیو‘‘ کے لئے بھی انٹرویوز کئے۔ میرے تجربہ اور مشاہدہ کے مطابق وہ ایک کنزرویٹو قوم پرست امریکی تھے جو دنیا بھر کے دفاعی، جنگی اور اسلحہ کے امور سے ضرور واقف تھے۔ ری پبلکن صدر ٹرمپ سے بھی ان کے پالیسی اور سیاست کے بارے میں اختلافات نے اتنی شدت اختیار کرلی کہ انہوں نے اپنی موت سے تین ماہ قبل ہی یہ وصیت کردی کہ صدر ٹرمپ کو ان کی آخری رسومات اور تدفین میں شریک نہ ہونے دیا جائے۔ اس کے ردعمل میں صدر ٹرمپ کی انتقامی سیاست ملاحظہ کیجئے کہ صدر ٹرمپ کے وہائٹ ہائوس پر قومی جھنڈا سرنگوں کرنے کی روایت کو 48گھنٹوں سے زیادہ دیر نظر انداز کیا گیا اور صدر ٹرمپ نے صحافیوں کے سوالات کرنے پر بھی خاموشی اختیار کئے رکھی۔ ہر طرف سے دبائو اور سرزنش کے ہجوم میں صدر ٹرمپ نے قومی پرچم کو سرنگوں کرنے کے احکامات جاری کئے اور ان کے معاونین سینیٹر مکین کی آخری رسومات میں شریک ہوں گے لیکن صدرٹرمپ نہیں۔ سینیٹر جان مکین دو مرتبہ امریکی صدر کے عہدے کے امیدوار بھی رہے مگر ناکامی ہوئی۔ وہ 2008ء میں ڈیموکریٹ صدارتی امیدوار بارک اوباما کے مقابلے میں ری پبلکن صدارتی امیدوار تھے لیکن میری رائے میں خاتون سارہ پالن کو اپنا نائب صدر انتخابی ساتھی چننے کے غلط فیصلہ کے باعث شکست کھا گئے۔ جی ہاں! وہی سارا پالن جس نے ہمارے صدر آصف زرداری کو مسحور کردیا تھا۔ سینیٹر مکین اپنے مرض کی تشخیص کے بعد موت کی قربت کے بارے میں اتنے حقیقت پسند ہوگئے تھے کہ اپنی خواہشات اور موت کے حوالے سے تجاویز مشورے اور وصیت کے مراحل اپنی زندگی میں ہی نہ صرف مکمل کرلئے بلکہ بہت کچھ لکھ کر بھی چھوڑ گئے۔ روا داری کی یہ کیفیت کہ سابق ڈیموکریٹ صدر بارک اوباما اور سابق ری پبلکن صدر جارج بش کو اپنی آخری رسومات میں سینیٹر مکین کے بارے میں روایتی خراج تحسین (EULOGY) پر مبنی تقریر کی وصیت چھوڑی ہے حالانکہ صدر اوباما کے ہاتھوں انتخاب میں شکست کھائی تھی۔ ویت نام کی جنگ میں ویت نامیوں نے ان کا طیارہ مار گرایا اور پانچ سال جنگی قیدی بن کر سخت ٹارچر کا سامنا کیا لیکن دیگر قیدیوں کی رہائی اور امریکہ واپسی سے قبل اپنی رہائی کی آفر مسترد کردی کیونکہ یہ امریکی ضوابط کی خلاف ورزی تھی کہ ان سے پہلے کے قیدی رہا نہ ہوئے ہوں۔ امریکی سینٹ کی آرمڈ سروسز کمیٹی کے چیئرمین ہونے کی دنیا بھر کے ممالک کے لئے اہمیت اور اثر و رسوخ کا اندازہ اس حقیقت سے لگایا جاسکتا ہے کہ (1) امریکہ نہ صرف عصر حاضر کی سب سے بڑی جنگی اور عالمی سپر پاور ہے بلکہ دنیا میں امن اور جنگ سے براہ راست وابستہ ٹرلین ڈالرز کی اسلحہ سازی اور جنگی ساز و سامان کی امریکی انڈسٹری اور سپلائی کے عالمی نظام کے امور کی پارلیمانی نگرانی اس کمیٹی کے دائرہ اختیار میں ہے۔ (2) امریکی افواج کی اعلیٰ ترین قیادت کی تقرریوں کی منظوری اور توثیق جنگی اور دفاعی نوعیت کے امریکہ اور دیگر ممالک کے درمیان کئے گئے اعلانیہ اور خفیہ معاہدوں کی توثیق اور منظوری بھی اسی کمیٹی کے دائرہ اختیار میں ہے جہاں بسا اوقات امریکی صدر بھی اس کمیٹی کے تعاون کے بغیر بے اختیار نظر آتا ہے۔ (3) امریکی اسلحہ اور امریکہ سے دفاعی اور جنگی اتحاد پر انحصار کرنے والے ممالک کے لئے تو اس کمیٹی اور پنٹاگان کی عسکری قیادت سے خوشگوار رابطے سب امور سے زیادہ کلیدی اور ترجیحی اہمیت رکھتے ہیں۔ پاکستان کی 70؍سالہ تاریخ میں پاک۔ امریکہ تعلقات کا سب سے اہم ترین پہلو بھی یہی رہا ہے اور پاکستان میں جمہوریت کے اتار چڑھائو کی حقیقت بھی اسی پہلو سے وابستہ ہے۔ پاکستان کے موجودہ آرمی چیف جنرل قمر جاوید باجوہ نے سینیٹر جان مکین کی موت پر اپنے تعزیتی بیان میں بڑے مناسب اور نپے تلے الفاظ میں خراج تحسین پیش کرتے ہوئے انہیں اپنے ملک کا کامیاب نمائندہ اور ممتاز جنگی ہیرو قرار دیا ہے۔ انہوں نے سینیٹر مکین کو پاکستان کا ایسا دوست بھی قرار دیا جو دونوں ممالک کی مشترکہ بھلائی کے لئے پاک۔ امریکہ تعلقات میں مزید بہتری پر یقین رکھتے تھے۔ ہمارے آرمی چیف کا رسمی تعزیتی بیان بالکل مناسب اور مکمل ہے۔ مجھے یہ کہنے کی اجازت دیں کہ میں نے سینیٹر جان مکین کو اول تا آخر ایک کنزرویٹو ری پبلکن محب وطن امریکی پایا جو امریکہ کی عالمی برتری پر مکمل یقین رکھتے تھے۔ اپنی ری پبلکن پارٹی میں بھی ان کی دوستی اور اختلافات کی وجہ بھی ان کا نظریہ حب الوطنی تھا۔ 2012ء کے صدارتی ری پبلکن کنونشن کے دوران متعدد بار آمنا سامنا بھی ہوا اور پاک۔امریکہ تعلقات کے بارے میں کچھ نرم و گرم گفتگو ’’آن دی ریکارڈ‘‘ اور ’’آف دی ریکارڈ‘‘ بھی رہی۔ دوسرے روز جب آمنا سامنا ہوا تو ’’جیو‘‘ کے کیمرہ پرسن عظیم خان کو مستعد ہوتا دیکھ کر مسکرائے اور کہنے لگے کہ پاکستان کے بارے میں کل بہت گفتگو ہوگئی آج کوئی سوال نہیں کروگے۔ اس کے بعد چند لمحوں کے لئے چین۔ پاکستان تعلقات، افغانستان اور دہشت گردی کے بارے میں اپنے بعض مشاہدات اور توقعات کا ’’آف دی ریکارڈ‘‘ اظہار کیا۔ جو خالص امریکی نقطہ نظر اور ان کی اپنی معلومات پر مبنی تھا۔وہ اپنے معاون کے ساتھ یہ کہتے ہوئے آگے بڑھ گئے کہ میں امریکی ہوں اور امریکی ووٹرز اور مفادات کی نمائندگی کرنا میرا فرض ہے۔ یہ بات درست ہے۔ سینیٹر جان مکین دنیا کے ممالک کی فوجی قیادتوں اورحکمرانوں سے دفاعی امور پر ملاقاتیں کرتے رہے مگر امریکی فوج اور امریکہ کی برتری ان کے لئے سب پر مقدم تھی۔

ان کا الوداعی پیغام ان کے خاندان نے 27؍اگست کو جاری کیا وہ یہ ہے ’’میں فخر سے ایک امریکن کے طور پر زندہ رہا اور مرا‘‘ اسی طرح ان کا امریکی ہم وطنوں کے نام ایک خط بھی ان کے سابق ترجمان نے ان کی موت کے بعد پڑھا جس میں امریکی ہم وطنوں بالخصوص ریاست ایری زونا کے عوام کی 60؍سال تک خدمت کرنے کا موقع ملنے پر شکریہ ادا کرتے ہوئے لکھا ہے کہ ’’میں نے اپنے ملک کی باوقار انداز میں خدمت کرنے کی بھرپور کوشش کی ہے۔ میں نے غلطیاں بھی کی ہیں امید ہے کہ امریکہ کے لئے میری محبت کو میری غلطیوں سے زیادہ وزن دیا جائے گا‘‘۔ انہوں نے اسی خط میں امریکہ کو دنیا کی عظیم ترین ری پبلک اور انسانیت کے لئے ایک نعمت قرار دے کر اپنے آپ کو امریکی بلکہ امریکہ پر فخر کرنے والا امریکی شہری قرار دیا ہے۔ وہ ساری دنیا کو امریکہ کا تابع دیکھنا چاہتے تھے۔

سینیٹر جان مکین کے بارے میں ان مفروضات کا مقصد یہ واضح کرنا ہے کہ اکیسویں صدی کے گلوبلائزیشن کے ہجوم میں بھی اپنی سرزمین اور قوم سے محبت کرنے والوں کا مقام اور احترام بھی کیا جاتا ہے۔ انتقامی سیاست اگر ایشیائی ترقی پذیر ممالک میں کارفرما ہے تو امریکہ جیسے مہذب اور جمہوری طور پر مضبوط روایات والے ملک میں بھی ایک ہی پارٹی کے انتخابی عہدوں والوں کے درمیان پالیسی اور پالیٹکس کے اختلافات انتقامی سیاست کا روپ دھار سکتے ہیں اور موت جیسی اٹل حقیقت اور ٹریجڈی کے باوجود بعض اوقات انتقامی جذبات کارفرما رہتے ہیں لیکن اگر معاشرہ میں مہذب عوامی شعور کار فرما ہوں تو امریکی صدارت جیسے طاقتور منصب کو بھی عوامی شعور کے سامنے سر جھکا کر وہائٹ ہائوس پر قومی پرچم کو سرنگوں کرنا اور نہ چاہتے ہوئے بھی تعزیتی بیان جاری کرنا پڑتا ہے۔
(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

لاہور(ایمرا نیوز)
ہم اسکول میں نویں جماعت میں تھے جب ہمیں بتایا گیا کہ میٹرک کا امتحان زندگی کا سب سے اہم امتحان ہوتا ہے، دنیا میں جہاں کہیں نوکری کے لئے جاؤ گے، کسی کالج میں داخلے کے لئے فارم جمع کرواؤ گے یا کسی گھر میں اپنا رشتہ بھیجو گے تو پہلا سوال یہی کیا جائے گا کہ بیٹا میٹرک میں کتنے نمبر آئے تھے، سو بہتر یہی ہے کہ ابھی سے کمر کس لو، کھیل کود کو خیرباد کہہ دو، ویڈیو گیمز کو بھول جاؤ اور میٹرک کی تیاری شروع کر دو، یاد رکھو اگر میٹرک میں نمبر نہ آئے تو ساری عمر اچھا رشتہ ملے گا نہ نوکری۔ الحمدللہ، دونوں باتیں غلط ثابت ہوئیں۔ اُس وقت نویں اور دسویں جماعت کا اکٹھا امتحان ہوا کرتا تھا، کُل ملا کر 850نمبروں میں سے جو700 سے اوپر نمبر حاصل کرتا اسے دنیا کا خوش نصیب ترین لڑکا/لڑکی سمجھا جاتا تھا۔ اب زمانہ بدل گیا ہے، اب نویں اور دسویں کا امتحان اکٹھا نہیں ہوتا، کُل نمبر بھی 1100ہو گئے ہیں، امسال میٹرک میں اول پوزیشن لینے والے کے 1091نمبر ہیں، اِس سے نیچے بھی 1090اور 1080نمبر لینے والوں کی طویل فہرست ہے جبکہ 1050نمبر لینے والے یوں رو رہے ہیں جیسے اُن کی زندگی ختم ہو گئی ہو۔ اچنبھے کی بات یہ ہے کہ اب کوئی بچہ فیل نہیں ہوتا یا کم از کم کسی کو فیل ہونے والے بچوں کی خبر نہیں ہوتی، جس ماں سے پوچھو جواب یہی ملتا ہے کہ اُس کے بچے نے ٹاپ کیا ہے، جس باپ سے پوچھو وہ بھی یہی کہتا ہے کہ اُس کا بچہ ذہانت میں نیوٹن سے کم نہیں۔ لیکن یہ تمہید میٹرک کا مرثیہ لکھنے یا بچوں کے والدین کا جھوٹ پکڑنے کے لئے نہیں باندھی گئی۔ سوال یہ ہے کہ سکول /کالج پاس کرنے والے بچوں کے ذہن میں کس قسم کی فصل پک کر تیار ہو رہی ہے، اُن کا دنیا کو دیکھنے کا نظریہ کیا ہے اور اُن کی اخلاقی تربیت کس قسم کی ہوئی ہے!

ہم لوگ جب اسکول میں تھے تو نصابی کتابیں پڑھ کر ہمارے دماغ میں چند باتیں راسخ ہو چکی تھیں کہ پاکستان کا دنیا کے کسی بھی بکھیڑے میں کوئی قصور نہیں، ہماری پالیسیاں شفاف اور درست ہیں، ذہانت اور فطانت ہم میں کوٹ کوٹ کر بھری ہے، ہم ایک عظیم تہذیب کے وارث ہیں، روس ہم سے پناہ مانگتا ہے بھارت ہم سے خائف ہے امریکی ہم سے متاثر ہیں اور برطانیہ کو ہم کرکٹ میں مات دے چکے ہیں، ہمارے پاس صالح مسلم حکمرانی کی شکل میں بہترین گورننس ماڈل موجود ہیں جنہیں بعض مغربی ممالک نے نہایت چالاکی سے اپنے ہاں لاگو کرکے تمام مسائل حل کر لئے ہیں اب ضرورت صرف اِس بات کی ہے کہ ان ممالک کو کلمہ پڑھا کر مسلمان کر لیا جائے اور اگر اِس ضمن میں وہ ردّ و کد سے کام لیں تو ہمیں چاہیے کہ صلاح الدین ایوبی کی طرح سر پر صافہ باندھ کر گھوڑے کو کک لگائیں اور دشت اور صحرا عبور کرتے ہوئے سویڈن میں فتح کا جھنڈا لہرا دیں۔ جی ہاں یہ ٹھیک ہے کہ بچوں کو اپنے ملک، ثقافت اور تہذیب کے بارے میں فخر کرنا چاہیے، انہیں اپنی تاریخ اور جغرافیے کے بارے میں مثبت باتوں کی تعلیم دینی چاہئے، شاید باقی دنیا میں بھی ایسا ہی ہوتا ہے، مگر اِس کا یہ مطلب نہیں کہ انہیں سچائی سے دور رکھا جائے یا اِس بات کی تعلیم ہی نہ دی جائے کہ سچ اور جھوٹ کو کیسے پرکھا جاتا ہے۔ ہم نے میٹرک میں جو پڑھا سو پڑھا، آج کل کے بچے تو اس سے بھی دو ہاتھ آگے ہیں، فل مارکس لینے والے یہ بچے ہی آگے چل کر میڈیکل کالجوں، انجینئرنگ یونیورسٹیوں اور بڑے بڑے بزنس اور آئی ٹی اسکولز میں داخلے لیتے ہیں اور وہاں سے ایسی اعلیٰ نسل کی سندیں لے کر نکلتے ہیں کہ جنہیں چوم چاٹ کر اُن کے والدین صدقے واری ہوجاتے ہیں (اور ہونا بھی چاہئے)۔ ہمارے دور کی طرح اِن بچوں کے ذہن میں بھی بہت سی باتیں راسخ ہو چکی ہیں جن میں سے ایک بات یہ ہے ہمارے ملک کے مسائل کا حل بہت آسان ہے بشرطیکہ کوئی مرد آہن ہمیں نصیب ہو جائے (حوالہ بھارتی فلم ’’نائک‘‘)۔ یہ فسطائیت کی پہلی نشانی ہے۔

ان اسکول کالجوں کے بچوں کی طرح بڑوں کے پاس بھی مسائل کے حل کے لئے جادو کی چھڑی موجود ہے، اس چھڑی کو گھما کر پاکستان کا گھمبیر ترین مسئلہ بھی حل کیا جا سکتا ہے، آج کل بہت سے پروفیشنل کنسلٹنٹ اسی کام میں جتے ہیں اور اپنے مضامین میں بار بار دہائیاں دے رہے ہیں کہ خدارا اُن کی صلاحیتوں سے فائدہ اٹھا کر ملک کی سمت درست کر لیں! اِن لوگوں کے پاس بھی مسائل کا وہی حل ہے جو ہمارے میٹرک ایف اے پاس نوجوان کے پاس ہے، فرق صرف یہ ہے کہ کنسلٹنٹ صاحبان مینجمنٹ کے دلفریب ماڈلز کو پاور پوائنٹ پریزنٹیشن میں استعمال کرکے ایسی مسحور کن تصویر کشی کرتے ہیں کہ دیکھنے والا سوچتا ہے کہ سارا کام اس کے سپرد کرکے مجھے بس کرسی پر جھولنا چاہئے جبکہ میٹرک ایف اے پاس بیچارہ اسکول میں تقریری مقابلے جیت کر ہی خوش ہو جاتا ہے۔ مسائل کے یہ حل بہت دلچسپ ہیں۔ مثلاً اِن لوگوں کا خیال ہے کہ قانون میں ہر بری بات پر پابندی لگا کر آدھے مسائل ختم کئے جا سکتے ہیں، گویا آج سے پہلے گلی محلے میں کوڑا پھینکنے کی اجازت تھی اب اس پر پابندی لگا دینی چاہئے، پہلے ٹریفک قانون توڑنے کی اجازت تھی اب اس پر پابندی ہونی چاہئے، پہلے امیگریشن کاؤنٹر پر پروٹوکول لینے کی اجازت تھی اب اس پر پابندی ہونی چاہئے، پہلے قومی اداروں کو نالائقی سے کام کرنے کی اجازت تھی اب ان کی نالائقی پر پابندی لگا دی جائے، پہلے ملاوٹ شدہ اشیا بیچنے کی اجازت تھی اب ان پر پابندی ہونی چاہئے، پہلے تجاوزات کی آزادی تھی اب اس پر پابندی لگانے سے مسئلہ خود بخود حل ہو جائے گا۔ مسائل کے حل کا ایک دوسرا اسٹائل بھی ہے اور یہ مزید دلچسپ ہے۔ اس اسٹائل میں یہ لوگ بظاہر کسی مسئلے کا حل بتاتے نظر آتے ہیں مگر اصل میں یہ خواب بیچتے ہیں، جیسے ہر غریب شخص کے لیے ملک کے بہترین اسپتال میں مفت علاج، ہر غریب بچے کے لئے ایچیسن کالج جیسے اسکول میں مفت تعلیم، ہر غریب مزدور کے لئے کم ازکم اجرت اور بے روزگاری الاؤنس کی ضمانت۔۔۔۔ یہ تمام باتیں بہت خوش کن ہیں مگر یہ حل نہیں خواہشات ہیں، ان کے حل کے لئے نہ صرف گورننس کے بہترین ماہر چاہئیں بلکہ اندھا دھند پیسہ بھی چاہئے، قحط الرجال کے مارے اس معاشرے میں ماہر تو نہ جانے دستیاب ہیں یا نہیں، بجٹ کی صورتحال البتہ یہ ہے کہ پوری سول حکومت کا کُل خرچہ (تنخواہوں کے علاوہ) 218ارب روپے ہے گویا یہ وہ روپے ہیں جس کی عیاشیوں کا ہر وقت شور مچتا ہے، انہی پیسوں میں پوری وفاقی حکومت کام کرتی ہے، یہی پٹرول، کاغذ، بجلی، چائے، پانی کی مد میں خرچ ہوتا ہے اور ہم اس بجٹ کی بچت سے امید لگائے بیٹھے ہیں جو ریٹائرڈ فوجیوں کی پینشن کا بمشکل اسّی فیصد ہے، یہی نہیں بلکہ 1620ارب روپے ہم نے بین الاقوامی قرضوں کے سود کی مد میں ادا کرنے ہیں، 1100ارب روپے دفاع کے لئے ہیں اور 601ارب غیر ملکی قرضوں کی ادائیگی کی مد میں ہیں۔ یہ وہ حقائق ہیں جو ہم سننا نہیں چاہتے، ہم بس یہ چاہتے ہیں کہ کوئی نائک آئے اور ٹھکا ٹھک آرڈر پر آرڈر نکالے، ملک پانچ سال کیا ایک سال میں ٹھیک ہو جائے گا۔ اس قسم کی تجاویز آپ کو میٹرک میں 1090نمبر تو دلوا سکتی ہیں مگر ملک کو ٹھیک نہیں کر سکتیں۔ تاریخ میں کوئی ملک ایسے ٹھیک نہیں ہوا، ترقی یافتہ قوموں نے عظیم جدوجہد اور قربانیوں کے ذریعے ملک کی سمت درست کی ہے، پاور پوائنٹ پریزنٹیشن دینے والے کنسلٹنٹ اگر ملک ٹھیک کر سکتے تو دنیا بھر میں ٹیکنو کریٹس کی حکومت ہوتی، ان ٹیکنو کریٹس اور میٹرک پاس بچوں کے گورننس ماڈل میں کوئی فرق نہیں۔

(بشکریہ جنگ لاہور)

لاہور(ایمرا نیوز)

اللہ کا شکر ہے ذاتی تجربہ تو کوئی نہیں لیکن سنا بہت ہے کہ قرض کا عذاب قبر کے عذاب سے کم نہیں ہوتا۔ اس عربی محاورہ کا تو ترجمہ ہی بہت ڈرائونا ہے کہ ’’مقروض ذبح کیا ہوا ہوتا ہے‘‘۔ قرض صرف روپیہ پیسہ کا ہی نہیں ہوتا اس کی اور بھی بہت سی قسمیں ہیں اور آج مجھے اس قسم کے تین قرض اتارنے ہیں۔پہلا قرض ہے شاعر مشرق علامہ اقبال بلکہ ان کے پوتے ولید اقبال کا جو گزشتہ سات سال سے PTI میں ہے اور اس سے پہلے کبھی کسی سیاسی پارٹی کا حصہ نہیں رہا حالانکہ اپروچ کیا جاتا رہا۔ PTIلاہور کا صدر بھی رہا اور بوقت ضرورت پارٹی کے لئے آنسو گیس، لاٹھیاں، لاک اپ بھی جھیلے اور اپنے قائد عمران خان کا وکیل بھی تھا یا ہے۔ یہ گھرانہ مجھے پسند نہیں کرتا کیونکہ مجھے علامہ صاحب سے تھوڑا اختلاف بھی ہے جس کا میں نے دلیل کے ساتھ کئی بار اظہار بھی کیا۔ بہت سے بدنصیب نہیں جانتے کہ اختلاف کا مطلب احترام میں کمی یا عدم احترام ہرگز نہیں ہوتا لیکن اس موضوع پر پھر سہی۔ فی الحال تو فقط اتنا ہی کہنا ہے کہ پی ٹی آئی نے لاہور کے کسی ضمنی الیکشن کے لئے ولید اقبال اور ہمایوں اختر میں سے کسی ایک کو ٹکٹ دینا ہے اور یہ ٹکٹ سے کہیں زیادہ اک پیغام ہو گا ان عوام کے لئے جو PTIسے بے پناہ امیدیں وابستہ کئے ہوئے ہیں۔ عام انتخابات سے پہلے تو ’’الیکٹ ایبلز ‘‘ کا تُک

بنتا تھا لیکن اب تو یہ مِتھ بھی کریک اور کریش کر چکی تو ولید اقبال کو نظر انداز کرنے سے نظر لگنے کا خطرہ ہے۔ ولید اقبال کو ٹکٹ دینے کی علامتی اہمیت کو نہ سمجھنا نامناسب ہو گا خصوصاً ان حالات میں جب PTIکی حکومت بھی بن چکی۔ اس سے زیادہ لکھنا دخل در معقولات ہو گا۔ میں تو اتنا بھی نہ لکھتا اگر علامہ اقبال کا مقروض نہ ہوتا۔اب چلتے ہیں اقوام متحدہ میں پاکستان کی مستقل مندوب ڈاکٹر ملیحہ لودھی کی طرف جن سے زندگی میں ڈیڑھ ملاقاتیں ہیں۔ ڈاکٹر ملیحہ لودھی پر آج کل سوشل میڈیا کچھ کچھ مہربان ہے جبکہ کسی ایک ’’الزام‘‘ میں بھی جان نہیں۔ کہا گیا وہ ایک لگژری اپارٹمنٹ میں رہتی ہیں۔ اول تو لگژری کی اپنی اپنی Defination ہے، دوم یہ کہ ملیحہ اسی سرکاری رہائش میں قیام پذیر ہے جہاں تمام متعلقہ لوگ 1965سے رہ رہے ہیں۔ دوسرا الزام یہ کہ ان کے پاس BMW 8 Seriesکار ہے۔ اول یہ کہ ایسی کاروں کی وہاں کوئی اوقات نہیں، یہ صرف ہم جیسے ملکوں میں ہی بے تحاشہ ڈیوٹی کے باعث بہت مہنگی سمجھی جاتی ہیں اور کمال یہ کہ یہ بھی ڈاکٹر ملیحہ کے زیر استعمال نہیں۔ ملیحہ لودھی ’’ٹاپ ٹو ٹو‘‘ ایک اپ رائٹ ٹیکنو کریٹ ہیں جنہوں نے مختلف ادوار میں اپنے ملک کی بہت بہتر طور پر خدمت کی، البتہ آصف زرداری صاحب کو سرو کرنے سے معذرت ضرور کی تھی۔ملیحہ کی موجودگی و سربراہی میں ہم نے گزشتہ سال Human Rights Councilکا الیکشن جیتا، UNمیں عید کی تقریبات منعقد کرائیں جو اس سے پہلے کبھی نہ ہوا تھا، کشمیر پر پاکستانی موقف ہمیشہ موثر انداز میں پیش کیا، دہشت گردی کے ایشو پر انڈین لابی کے پاکستان مخالف پروپیگنڈہ کا ہمیشہ مدلل اور بھرپور جواب دیا۔ فلسطین اور القدس کے معاملات پر پاکستانی قوم کی امنگوں کی عمدہ ترجمانی کی۔ تمام ملکوں کے نمائندوں سے مثبت مثالی روابط رکھے۔آخر پر برصغیر کے انتہائی سینئر معتبر صحافی سفارت کار، دانشور بزرگ سور گباشی کلدیپ نائر کے بارے میں جو فرزندہ سیالکوٹ تھے، گورنمنٹ کالج لاہور میں پڑھے اور زندگی بھر پاکستان اور پاکستانیو ںسے محبت میں مبتلا رہے۔ ہمارے دوست کالم نگار اسد مفتی نے نائر آنجہانی کی کتاب ’’ایک زندگی کافی نہیں‘‘ کے دیباچہ میں ان کے بارے یہ کمال جملہ لکھا۔’’سیکولر ازم کا اردو ترجمہ کلدیپ نائر ہے‘‘امن کے اس عظیم سفیر بارے کچھ لکھنا میری اوقات سے باہر ہے اس لئے خود ان کی اپنی تحریر سے چند اقتباسات کے بعد اجازت چاہوں گا۔ پڑھیئے۔’’میں نے سیاستدانوں، بیورو کریٹس، صنعت کاروں، میڈیا کے سربر آواردہ لوگوں اور صحافیوں میں عظیم، جابر اور غیر اہم لوگ دیکھے۔ مجھے زیادہ تر لوگوں نے مایوس کیا ہے اور میرا مشاہدہ یہ رہا ہے کہ بڑے بڑے عہدوں پر براجمان زیادہ تر لوگ ان کے اہل نہیں تھے۔ وہ معتبر لوگ تھے لیکن ان میں قابلیت کی کمی تھی‘‘(قارئین! کیا یہی پاکستان کا بھی المیہ نہیں؟)اک اور جگہ لکھتے ہیں۔’’اس کتاب میں قارئین کو پاک بھارت تعلقات کے حوالہ سے کافی بحث پڑھنے کو ملے گی۔ اس میں بہتری لانا میرے جنون کے ساتھ ساتھ میری عبادت بھی رہی ہے۔ یہ صرف میرے ماضی کی یادوں تک محدود نہیں بلکہ میرا عزم بھی ہے۔ مجھے امید ہے کہ ایک دن میں دوستانہ ریاستوں پر مشتمل خطہ دیکھوں گا جو اپنے مشترکہ مفاد کے لئے مل جل کر کام کریں گی‘‘۔اس سے زیادہ کیا لکھوں کہ اس خطہ کو ایسے ہی ذہنوں اور ظرفوں کی اشد ضرورت ہے۔ الوداع کلدیپ نائر صاحب الوداع۔
(بشکریہ جنگ لاہور)

راولپنڈی(نیٹ نیوز) وفاقی وزیر ریلوے شیخ رشید احمد کے پروٹوکول کے لیے شہریوں کی موٹرسائیکلیں گرا کر انہیں نقصان پہنچانے والے ٹریفک وارڈن کو معطل کردیا گیا۔

جیو نیوز کے مطابق وفاقی وزیر ریلوے شیخ رشید لال حویلی جانے کے لیے بوہڑ بازار سے گزرے تو راستے میں کھڑی موٹر سائیکلوں کی غلط پارکنگ انھیں ناگواری گزری۔

شیخ رشید نے شہریوں سے کہا کہ وہ لحاظ کرتے ہیں، ورنہ یہ ساری موٹر سائیکلیں اٹھوا سکتے ہیں۔

اس موقع پر ٹریفک وارڈن شیخ رشید کی گاڑیوں کا راستہ بنانے کے لیے شہریوں کی موٹر سائیکلوں کو ہٹانے کی بجائے گراتا رہا۔

ٹریفک وارڈن نے شیخ رشید کو بتایا کہ انہوں نے اسی وجہ سے تنگ آکر یہ موٹر سائیکلیں پھینکی ہیں۔

دوسری جانب ٹریفک وارڈن کی جانب سے موٹر سائیکلیں گرانے کے خلاف شہریوں نے شدید احتجاج بھی کیا۔

واقعے کی خبر میڈیا پر نشر ہونے کے بعد چیف ٹریفک آفیسر (سی ٹی او) محمد بن اشرف نے مذکورہ ٹریفک وارڈن کو معطل کرتے ہوئے اس کے خلاف کارروائی کا حکم دے دیا۔

اسلام آباد(نیٹ نیوز) وزیراعظم عمران خان کی زیرصدارت وفاقی کابینہ کا اجلاس جاری ہے جس میں کئی اہم فیصلے کیے جانے کا امکان ہے۔

وزیراعظم ہاؤس میں وفاقی کابینہ کا آج تیسرا اجلاس وزیراعظم عمران خان کی زیرصدارت ہورہا ہے جس 9 نکاتی ایجنڈے پر غور کیا جارہا ہے۔

ذرائع کے مطابق وفاقی حکومت نے کرمنل پروسیجر کوڈ میں اصلاحات، سول لاء ریفارمز اور نیب قوانین میں تبدیلیوں کے لیے ٹاسک فورسز بنانے کا فیصلہ کیا ہے جب کہ وفاقی کابینہ ٹاسک فورس کےقیام کی منظوری دے گی۔

ذرائع کا کہنا ہے کہ وزیراعظم کے 100 روزہ پلان پر عملدرآمد کے بارے میں جامع نظام بنانے کی منظوری دی جائے گی جب کہ کابینہ وفاقی حکومت کے سینئر افسران کی تبادلوں کی توثیق کرے گی۔

وفاقی وزارتوں، محکموں اور ڈویژنز میں سادگی اور اخراجات میں کمی کا طریقہ کار بنانے کا فیصلہ کیا گیا ہے اور وزارت صحت کی اصلاحات کی سفارشات کی تیاری کیلئے ٹاسک فورس بنائی جائے گی۔

ملک بھر میں مون سون شجرکاری مہم سے متعلق تفصیلی رپورٹ پیش کی جائے گی۔

ذرائع کے مطابق وفاقی حکومت نے ایف بی آر میں بڑی اصلاحات متعارف کرانے کا فیصلہ کیا ہے جس کے تحت ایف بی آر کے 3 ارکان کی نشستیں ختم کی جائیں گی۔

یاد رہے کہ وفاقی کابینہ اپنے پہلے اجلاس میں سابق وزیراعظم نواز شریف اور ان کی صاحبزادی مریم نواز کا نام ایگزٹ کنٹرول لسٹ ( ای سی ایل) میں ڈالنے کی منظوری دے چکی ہے۔
صدر، وزیراعظم اور ایم این ایز کے صوابدیدی فنڈز ختم کرنے کا فیصلہ

اسی طرح وفاقی کابینہ کے 24 اگست کو ہونے والے دوسرے اجلاس کے دوران صدر، وزیراعظم، وزرا اور ارکان پارلیمنٹ کے صوابدیدی فنڈز ختم کرنے کی منظوری دی گئی۔

کابینہ کے اجلاس میں دفتری کام کے اوقات کار تبدیل کرنے کی بھی منظوری دی گئی، کام کے اوقات کار صبح 9 بجے سے شام 5 بجے تک ہوں گے جب کہ کابینہ کے بیشتر ارکان نے ہفتے کی چھٹی فی الحال ختم کرنے کی مخالفت کی جس کے بعد ہفتے کی چھٹی فی الحال ختم نہ کرنے کی منظوری دی گئی۔

لاھور(نیٹ نیوز)

اچھی صحت کے لیے سب سے اہم ہے کہ صبح کا ناشتہ کیا جائے لیکن اکثر صبح دفاتر جانے والے افراد اور خاص طور پر طلباء وقت کی کمی کے باعث ناشتہ نہیں کرپاتے، ایسی صورت میں بادام صحت کے لیے نہایت مفید ثابت ہوتے ہیں۔

کیلیفورنیا یونیورسٹی کی ایک حالیہ تحقیق کے مطابق جو افراد ناشتہ ترک کردیتے ہیں، وہ اس کے بجائے بادام کھالیں تو یہ صحت کے لیے مفید نسخہ ہے۔

تحقیق کے مطابق بادام میں بھرپور غذائیت پائی جاتی ہے۔ اس میں چکنائی، پروٹین، وٹامن ای اور میگنیشئیم وافر مقدار میں موجود ہوتا ہے جو جسم کو کمزوری سے دور رکھتے ہیں۔

بادام کھانے سے بھوک مٹ جاتی ہے، بلڈ پریشر اور کولیسٹرول کنٹرول رہتا ہے اور ساتھ ہی وزن میں بھی اضافہ ہوتا ہے۔

اس تحقیق کے لیے فرسٹ ایئر کے نوجوان طلباء کے دو گروپ بنائے گئے جن میں سے ایک گروپ 30 طلباء جبکہ دوسرا 35 طلباء پر مشتمل تھا۔

30 طلباء کو 8 ہفتوں تک ہر روز ناشتے کے بجائے 56 گرام بادام کھانے کی ہدایت کی گئی جو کہ 320 کیلوریز کے برابر ہیں جب کہ 35 طلباء کو اسنیک کھانے کا کہا گیا جو کہ 338 کیلوریز کے برابر ہوں۔

تحقیق کے لیے ان طلباء پر 8 ہفتوں تک کڑی نظر رکھی گئی، جس کے نتیجے میں یہ بات سامنے آئی کہ اسنیکس کھانے والے طلباء کے مقابلے میں بادام کھانے والے طلباء میں ذیابیطس اور بلڈ پریشر متوازن رہا۔

تاہم غذائی ماہرین کے مطابق اُصولاً ناشتہ کبھی ترک نہیں کرنا چاہیے لیکن اگر ایسا ہوجائے تو پھر باداموں سے بھی کام چلایا جاسکتا ہے، ہاں لیکن اسے معمول نہ بنائیں۔