All posts by fayaz

ممبئی (شوبز ڈیسک/ایمرا نیوز) بالی وڈ اداکار رشی کپور نے تصدیق کی ہے کہ کپور خاندان نے متفقہ طور پر آئیکونک آر کے اسٹوڈیو فروخت کرنے کا فیصلہ کیا ہے ۔
جسے تقریبا چار دہائی قبل لیجنڈری آنجہانی راج کپور نے ممبئی چمبڑ میں قائم کیا تھا۔
ممبئی مرر کو ایک انٹرویو میں رشی کپور نے کہا کہ اگرچہ اس جگہ کے ساتھ ایک جذباتی لگاؤ ہے لیکن یہ اسٹوڈیو ایک بہت بڑا سفید ہاتھی بن گیا ہے،اس سے بہت نقصان اٹھانا پڑ رہا ہے۔
اداکار نے کہا کہ ہم بھائی مضبوطی سے جڑے ہوئے ہیں لیکن ہمارے بچوں اور پوتوں کے بارے میں کوئی کیا کہہ سکتا ہے،آئندہ نسلوں میں کیا اختلافات پیدا ہوجائیں، متعدد انڈسٹریل اور ٹیکسٹائل ریاستوں کی طرح اس اسٹوڈیو کو قانونی طریقے سے ختم کرنا ہوگا۔

خاندان کے اختلافات ہوسکتے ہیں اور وکلاء بھاری فیسیں لے کر اسے ختم کریں گے، کیا آپ سمجھتے ہیں کہ ان کی محبت سے کی گئی محنت عدالتی معاملہ بن جائے،میرے والد اسے پسند کریں گے؟گزشتہ سال رئیلٹٰ شو سپر دانسر2 کی شوٹنگ کے دوران آر کے اسٹوڈیو میں آگ لگ گئی تھی جس سے آر کے اسٹوڈیو کی قیمتی یادگاریں تباہ ہوگئیں۔
رپورٹس کے مطابق اس آگ میں نرگس اور وجنتی مالا سے ایشوریا رائے تک سب کے فلموں میں پہنے گئے کاسٹیومز، زیورات،میرا نام جوکر فلم کے جوکر کا ماسک، جس دیس میں گنگا بہتی ہے کی بندوقیں، اشتہاری سامان اور آوارہ،سنگم اور بوبی جیسی معروف فلموں میں استعمال ہونے والا پیانو جل کر خاکستر ہوگئے۔
رشی کپور نے کہا کہ اس کی کوئی حتمی تاریخ نہیں ہے، اسٹوڈیو کی فروخت میں ہوسکتا ہے دو دن، مہینے یا سال بھی لگ جائے۔

(لاہور ایمرا نیوز)

فروری 2018ء میں فنانشل ایکشن ٹاسک فورس (FATF) نے پیرس اجلاس میں دہشت گرد فنانسنگ اور منی لانڈرنگ کی روک تھام کیلئے ناکافی اقدامات پر پاکستان کا نام دہشت گردوں کی مالی معاونت کرنے والے ممالک کی ’’گرے لسٹ‘‘ میں شامل کردیا تھا۔ اس لسٹ میں پاکستان سمیت 9 ممالک ایتھوپیا، سری لنکا، شام، یمن، سربیا، تیونس اور ٹرینڈاڈ اینڈ ٹوباگوشامل ہیں۔ FATF ایک انٹرنیشنل ادارہ ہے جو دنیا میں دہشت گرد فنانسنگ اور منی لانڈرنگ کی روک تھام کے اقدامات کرتا ہے۔ اس ادارے نے گرے اور بلیک لسٹ مرتب کی ہیں جن میں دہشت گردی اور منی لانڈرنگ کے خلاف کمزور ریکارڈ رکھنے والے ممالک کے نام شامل ہیں۔ ادارے کی بلیک لسٹ میں وہ ممالک شامل ہوتے ہیں جو منی لانڈرنگ میں ملوث ہیں اور قانون سازی کے حوالے سے عالمی اداروں سے تعاون نہیں کررہے۔ پاکستان 2012ء سے 2015ء تک FATF گرے لسٹ میں شامل تھا لیکن بعد میں پاکستان کا نام اس لسٹ سے نکال دیا گیا تاہم FATF نے حکومت کو خبردار کیا تھا کہ عسکریت پسندوں کی فنڈنگ پر پاکستان کا نام دوبارہ اس لسٹ میں ڈالا جاسکتا ہے۔
24 سے 29 جون کو پیرس میں ہونے والے FATF کے ICRG جائزہ اجلاس جس میں نگراں وزیر خزانہ ڈاکٹر شمشاد اختر نے پاکستانی وفد کے ہمراہ شرکت کی تھی، میں پاکستان کا نام ’’گرے لسٹ‘‘ سے نکالنے کیلئے 150 صفحات پر مشتمل 26 نکاتی ایکشن پلان 10 ترجیحات کے ساتھ پیش کیا گیا تھا جس پر 31 اگست 2018ء تک عملدرآمد کرنا تھا اور عملدرآمد نہ کرنے کی صورت میں پاکستان کا نام ’’گرے لسٹ‘‘ سے ’’بلیک لسٹ‘‘ میں شامل کیا جاسکتا ہے۔ نگراں وزیر خزانہ ڈاکٹر شمشاد اختر نے اجلاس کو بتایا تھا کہ پاکستان نے اینٹی منی لانڈرنگ، دہشت گردوں کی مالی معاونت روکنے اور کالعدم تنظیموں کے خلاف سخت اقدامات کئے ہیں۔ اس کے علاوہ حکومت نے دہشت گردوں کی مالی معاونت روکنے اور موجودہ قوانین پر عملدرآمد کو یقینی بنانے کیلئے ترامیم بھی کی ہیں جبکہ اسٹیٹ بینک نے منی لانڈرنگ کی روک تھام کیلئے 24 جولائی سے اندرون ملک کیش کرنسی کی نقل و حمل اور اوپن اکائونٹ پر پابندی لگادی ہے جس سے بلیک منی کے پھیلائو کو روکنے میں مدد ملے گی۔ اسٹیٹ بینک کے ڈالر کی بیرون ملک بالخصوص افغانستان اسمگلنگ روکنے کیلئے کئے گئے ان اقدامات کی وجہ سے مارکیٹ میں ڈالر کی خرید اور طلب میں خاطر خواہ کمی ہوئی ہے۔

پاکستان کے انکم ٹیکس آرڈیننس 2001ء، فارن ایکسچینج ریگولیشن ایکٹ 1947ء، اینٹی منی لانڈرنگ ایکٹ، پروٹیکشن آف اکنامک ریفارمز ایکٹ 1992ء، پروٹیکشن آف فارن ایکسچینج ایکٹ کے تحت کوئی بھی بیرون ملک مقیم غیر رہائشی پاکستانی بیرون ملک اپنے اثاثوں کو ظاہر کئے بغیر رکھ سکتا ہے بشرطیکہ اس کی سرمایہ کاری اور آمدنی پاکستان سے نہ ہو۔ اسی طرح فارن ایکسچینج قوانین کے تحت پاکستان میں قانونی طور پر حاصل کی گئی آمدنی کو اسٹیٹ بینک کی منظوری کے بغیر غیر ملکی کرنسی میں بیرون ملک منتقل کیا جاسکتا تھا جس سے وہ بیرون ملک اپنے قانونی اثاثے بناسکتے تھے۔ انکم ٹیکس آرڈیننس 2001ء کے سیکشن III(4) کے تحت بیرون ملک سے بینکنگ چینل کے ذریعے پاکستان بھیجی جانے والی رقوم بغیر ذرائع آمدنی پوچھے قانونی تسلیم کی جاتی تھیں لیکن ان قوانین کا غلط استعمال کیا گیا اور اربوں ڈالر فارن کرنسی اکائونٹ کے ذریعے بیرون ملک بھیجے گئے مگر FATF کی گائیڈ لائن کے تحت حالیہ بجٹ میں ان قوانین میں تبدیلی کی گئی ہے اور اب پاکستان سے بینکوں کے ذریعے فارن کرنسی بیرون ملک بھیجی نہیں جاسکے گی۔

’’گرے لسٹ‘‘ سے پاکستان کا نام نکالنے کے سلسلے میں FATF ایشیاء پیسفک گروپ (APG) کی 6 رکنی ٹیم نے 13 اگست 2018ء کو وزارت خزانہ، نیب، ایف بی آر، اسٹیٹ بینک، ایس ای سی پی، ایف آئی اے، نیکٹا اور مختلف سیکورٹی اداروں کے حکام سے ملاقاتیں کیں جس میں کراس بارڈر کیش منی لانڈرنگ پر تشویش کا اظہار کیا گیا اور FATF کے 26 نکاتی ایکشن پلان کا جائزہ لیا گیا۔ان نکات پر عملدرآمد کیلئے عبوری حکومت نے ایکشن پلان کی منظوری دی تھی جس کی بنیاد پر اسمگلنگ روکنے کیلئے سزائوں اور جرمانوں میں اضافہ، اینٹی منی لانڈرنگ آرڈیننس 2010ء اور فارن ایکسچینج ریگولیشن ایکٹ 1947ء میں مطلوبہ ترامیم کی گئی ہیں۔ اس کے علاوہ SECP اور اسٹیٹ بینک نے بھی اینٹی منی لانڈرنگ قوانین پر عملدرآمد کیلئے سخت اقدامات اٹھائے ہیں جس کے بعد منی لانڈرنگ میں ملوث افراد اپنی شناخت نہیں چھپاسکیں گے اور بینکوں کی ذمہ داری ہوگی کہ وہ اکائونٹ کے حقیقی مالک کی شناخت کریں۔

حکومت کو بھی یہ اہم ذمہ داری سونپی گئی ہے کہ وہ جنوری 2019ء تک دہشت گردوں اور کالعدم تنظیموں کی مالی امداد میں ملوث افراد اور خیراتی اداروں کے اثاثوں کی شناخت کرکے اُسے اسٹیٹ بینک، ایس ای سی پی، ایف آئی اے اور دیگر قانون نافذ کرنے والے اداروں سے شیئر کرے جس کیلئے حکومت کو یکم ستمبر 2018ء سے 31 اکتوبر 2019ء تک کا وقت دیا گیا ہے۔ اس کے علاوہ نجی بینکوں اور ایکسچینج کمپنیوں کو بھی اینٹی منی لانڈرنگ قوانین کے بارے میں معلومات اور ٹریننگ فراہم کرنے کا پابند کیا گیا ہے۔ ان تمام اقدامات پر عملدرآمد کیلئے تحریک انصاف کی نئی حکومت کو پارلیمنٹ میں قوانین میں تبدیلیاں لانا ہوں گی۔

دہشت گردوں کی مالی معاونت کرنے والے ممالک کی فہرست میں پاکستان کا نام دوبارہ شامل کئے جانے کے بعد اس کا رسک پروفائل بڑھ جاتا ہے، پاکستانی بینکوں کے ذریعے رقوم کے تبادلے مشکل ہوجاتے ہیں اور بیرونی سرمایہ کار تجارتی قانونی خدشات کے پیش نظرپاکستان کے ساتھ کاروبار سے گریز کرتےہیں۔ اس کے علاوہ عالمی مالی اداروں سے فنانسنگ مشکل اور مہنگی ہوجاتی ہے جس کی وجہ سے عالمی ریٹنگ ادارے پاکستان کی ریٹنگ میں کمی کرسکتے ہیں۔ دنیا بھر میں آج کل عالمی ریگولیٹرز بینکوں کو منی لانڈرنگ کے قوانین پر عملدرآمد نہ کرنے پر کروڑوں ڈالر جرمانہ کررہے ہیں۔ گزشتہ سال پاکستان کے ایک بڑے مالی ادارے حبیب بینک کو نیویارک میں بینکنگ سیکٹر کی نگرانی کرنے والے امریکی ادارے نے 225 ملین ڈالر کا جرمانہ عائد کیا تھا جس کی وجہ حبیب بینک کا منی لانڈرنگ قوانین کے خلاف سرگرمیاں تھیں۔ اس جرمانے کے بعد حبیب بینک امریکہ میں اپنا آپریشن بند کرنے پر مجبور ہو گیا ہے۔

اسٹینڈرڈ چارٹرڈ بینک، سٹی بینک اور بارکلے بینک جو زیادہ تر کارپوریٹ صارفین کے ساتھ کاروبارہ کرتے ہیں،نے عالمی ریگولیٹرز کی جانب سے شدید دبائو کی وجہ سے حالیہ برسوں میں ہائی رسک ممالک میں اپنے آپریشنز محدود کردیئے ہیں۔ ہانگ کانگ میں مشاورتی کمپنی کوئنلان ایسوسی ایٹس کے مطابق امریکی واچ ڈاگز نے اینٹی منی لانڈرنگ کے قواعد و ضوابط پر عملدرآمد نہ کرنے پر گزشتہ 8 سالوں میں 16 ارب ڈالر کے جرمانے عائد کئے ہیں۔

بھارت اور امریکہ پہلے دن سے سی پیک منصوبوں میں عالمی سرمایہ کاری سے خوش نہیں اور ان کی ہمیشہ سے یہ کوشش رہی ہے کہ خطے میں چین اور پاکستان علاقائی برتری حاصل نہ کرسکیں۔ گرے لسٹ میں پاکستان کا نام ڈالنے کا مقصد پاکستان پر دبائو ڈالنا ہے تاکہ سرمایہ کاروں کی حوصلہ شکنی ہو۔ میرے نزدیک دہشت گرد فنانسنگ کی بنیاد پر گرے لسٹ میں پاکستان کا نام شامل کرانا بھارت اور امریکہ کا ایک سیاسی انتقام ہے۔ پاکستان کا نام ’’گرے لسٹ‘‘ سے نکالنے کیلئے جنوری 2019ء میں جائزہ لیا جائے ہوگا لیکن اس سے قبل FATF کی ٹیم اپنے 26 نکات پر عملدرآمد یقینی بنانے کیلئے پاکستان کا دوبارہ دورہ کرے گی۔ حکومت کو چاہئے کہ وہ نئی جائزہ رپورٹ پر فیصلے سے پہلے FATF ممالک کو پاکستان کی دہشت گرد فنانسنگ اور منی لانڈرنگ کی روک تھام کیلئے کئے گئے اقدامات کو موثر طریقے سے پیش کرے بصورت دیگر پاکستان کا نام ’’بلیک لسٹ‘‘ میں شامل کیا جاسکتا ہے جس کی ہماری معیشت متحمل نہیں ہوسکتی۔

(بشکریہ جنگ لاہور)

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(لاہور ایمرا نیوز)

اوئے او بے صبرو ! صرف چھ ماہ ٹھہر جائو، جہاں 70سال انتظار کیا صرف چھ ماہ اور، سب کچھ بدلنے والا ہے۔

اوئے او مایوسیاں پھیلانے والو! سن لو ہمارے لیڈر کی نیت ٹھیک ہے یہ پہلا حکمراںہے جو ایماندار ہے اس کی نیت میں کوئی شک نہیں، جب لیڈر ایماندار ہے تو پھر سارا ملک بھی ٹھیک ہو جائے گا۔

اوئے او جلد بازو! رک جائو، پاکستان کی تاریخ میں پہلی بار فوج، عوام اور حکمراں ایک صفحے پر۔ ایٹمی پاکستان کو پہلی بار جرأتمند وزیراعظم ملا ہے وگرنہ اس سے پہلے کے تمام حکمراں تو امریکہ اور مغرب سے مرعوب ہو جاتے تھے، عمران آنکھوں میں آنکھیں ڈال کے بات کرے گا۔ اب امریکہ ہمیں ڈو مور نہیں کہہ سکے گا، ہم اسے ڈو مور کہیں گے، ہمارا وزیر خارجہ اب شاہ محمود قریشی ہے جس نے امریکی جاسوس ریمنڈ ڈیوس پر کسی بھی قسم کی مصالحت کرنے سے انکار کر دیا تھا اور مستعفی ہو کر ثابت کر دیا تھا کہ کچھ لوگ ایسے بھی ہیں جنہیں عہدوں کی پروا نہیں جو ملک کے مفادات کو ان عہدوں پر ترجیح دیتے ہیں۔

اوئے او بیوقوفو! آپ کا لیڈر اس قدر عقلمند ہے کہ اس نے نوجوت سنگھ سدھو سے وہ کام لے لیا ہے جو کوئی اور نہیں لے سکا تھا۔ بھارت عمران کی عقل و دانش سے پریشان ہے، کیرالہ میں طوفان کے متاثرین کی امداد کا اعلان کرکے عمران نے مودی کو آئوٹ کر دیا ہے۔ واہ رے عمران، تیری سفارتکاری ایک ہی جھٹکے میں امریکہ اور بھارت کو بتا دیا کہ اب ایک باغیرت حکمراںآچکا ہے اب پرانی پالیسیاں نہیں چلیں گی۔آزاد خارجہ پالیسی ہوگی کسی اور طاقت کی کاسہ لیسی نہیں ہوگی بلکہ ہر ملک سے برابری کی سطح پر تعلقات قائم کئے جائیں گے۔

اوئے اوخوفزدہ لوگو! صرف 180دن اور انتظار کرلو، اسد عمر فنانس کو ٹھیک کر دے گا۔ آئی ایم ایف سے قرضے لئے بغیر ہم ملک چلا کر دکھا دیں گے۔ بیرون ملک آباد پاکستانی، قانونی طریقوں سے رقوم پاکستان بھیجیں گے۔ یہاں اب اوورسیز کی وجہ سے ہن برسے گا کیونکہ ان کی پسندیدہ اور شفاف حکومت برسراقتدار آچکی ہے، جب فضول خرچی نہیں ہوگی، ٹیکس بڑھے گا۔ ہر ادارہ اور ہر شخص بچت کرے گا تو لازماً ملک کی معاشی حالت بہتر ہو جائے گی۔ ملک کی اصل بیماری حکمرانوں کے اللّے تللّے تھے وہ رک گئے ہیں اب سب ٹھیک ہو جائے گا۔

اوئے اوڈاکو لوگو! گھبرانے کی ضرورت نہیں ہمیں صرف 100 ایکسپرٹ لوگ چاہئیں۔ عمران خان نے دنیا بھر کے ایسے 100 پاکستانیوں کی فہرست بنا رکھی ہے جو اپنے تجربے اور ویژن کو بروئے کار لا کر ملک کی حالت بدل دیں گے۔ پی آئی اے ہو یا سوئی گیس یا دیگر سرکاری ادارے، 70 سال بعد ان میں انقلابی تبدیلی آنی والی ہے۔ اب یہ ادارےنقصان کے بجائے منافع دیں گے۔ 1100 ارب روپے سالانہ ان سرکاری کارپوریشنز کا نقصان تھا جب یہ نقصان ختم ہوگا تو سالانہ 1100 ارب روپے تو ان ہی سے بچ جائیں گے۔

اوئے او مظلومو سنو!جس طرح خیبر پختونخوا میں پولیس کلچر بدلا تھا اسی طرح پورے پاکستان میں یہ کلچر بدل جائے گا۔ پختونخوا کے سابق آئی جی درانی صاحب پنجاب میں پولیس کلچر بدلنے کے لئے لائے جا چکے ہیں اب پولیس کسی سے زیادتی نہیں کرسکے گی۔ تھانہ کلچر بدلے گا، اب بدتمیزی نہیں ہوگی۔

اوئے او غریبو! تم بھی سنو!! پاکستان میں مہنگائی ختم ہونے کا وقت آچکا ہے۔ رزاق دائود برآمدات کو بڑھائے گا، پھل اور سبزیاں بیرون ملک بھیجے گا، تجارتی خسارہ کم ہوجائے گا۔ چھ ماہ کے اندر ملک میں تبدیلی آئے گی، غریبوں کی سنی جائے گی۔

اوئے! یہ بھی سنو کہ تعلیم اور صحت کا نظام بھی ٹھیک ہونے والا ہے۔ تعلیمی ایمرجنسی نافذ ہوگی، شریفوں نے تو سارا پیسہ میٹرو اور جنگلہ بس پر خرچ کر دیا، صحت اور تعلیم کی طرف توجہ تک نہیں دی۔

اوئے! پروٹوکول اور وی وی آئی پی کے خلاف مہم چلانے والو سن لو، سب کچھ بدل رہا ہے، وزیراعظم اپنے طیارے پر سفر نہیں کریں گے۔ وزیراعظم چیف جسٹس اور صدر پاکستان فرسٹ کلاس میں سفر کرنے کے بجائے بزنس یا کلب کلاس استعمال کریں گے، صوابدیدی فنڈز ختم کر دیئے گئے ہیں، آئندہ تمام اخراجات پارلیمان سے بجٹ کی منظوری کے بعد ہوں گے، تبدیلی آچکی ہے، چھ ماہ ٹھہریں سب کچھ بدل جائے گا۔

اوئے اوئے! یہ اعلان بھی سن لو، اب قومی تہوار اور تقریبات بھی تبدیل ہوں گی۔ اس بار یوم دفاع بھی مختلف طریقے سے منایا جائے گا۔ یوم آزادی پر اس بار نیا رنگ نظر آیا۔ فوج، عوام اور حکمراں اسی طرح ایک صفحے پر رہیں گے تو پاکستان چھ ماہ میں ہی بدل جائے گا۔

اوئے او مصلحت پسندو! تم بھی سن لو یہاں ہر ایک کا احتساب ہوگا، کرپشن سے کمائی گئی پائی پائی کا حساب ہوگا۔ بیرون ملک سے اثاثے واپس لائیں گے، کوئی این آر او نہیں ہوگا، اب ایمانداری راج کرے گی، اب سوئس بینکوں میں پڑی دولت واپس آئے گی اور سب مسئلے مسائل ختم ہو نگے۔

اوئے او! ہماری صلاحیتوں پر شک کرنے والو سن لو! کپتان کو خدا نے بندوں کی پہچان کی صلاحیت دے رکھی ہے وہ جو بھی بندہ چنتا ہے بہت ہی صحیح چنتا ہے۔ صدر پاکستان کے لئے اگر کپتان نے عارف علوی کو چنا ہے تو ٹھیک ہی چنا ہوگا۔ وزیراعلیٰ پنجاب عثمان بزدار اور وزیراعلیٰ خیبر پختونخوا محمود خان کا انتخاب بھی کپتان کی نگاہ دور بین نے درست ہی کیا ہوگا۔ آج تک کپتان ٹھیک نکلا ہے تو کل بھی کپتان ہی ٹھیک نکلے گا۔ کپتان کو خدا تعالیٰ نے بے شمار صلاحیتیں دے رکھی ہیں۔ وہ پاکستان کے لئے ایک معجزہ بن کر آیا ہے۔ وہ ناممکن کو ممکن کرکے دکھائے گا، بس چھ ماہ اور، پھر دیکھئے گا اس ملک کے حالات کیسے بدلتے ہیں۔

اوئے او معجزوں کا انتظار کرنے والو! سنو، معجزے ہونے کا وقت آگیا ہے۔ عمران کو پہلے سے ہی علم ہوگیا تھا کہ اس کی 116 سیٹیں آئیں گی، اسے یہ بھی بتا دیا گیا تھا کہ اگلا وزیراعظم وہی ہوگا۔ عمران کو یہ بھی علم ہے کہ پاکستان کے حالات بہتر ہونے والے ہیں کیا یہ معجزہ نہیں کہ جس پاکستان میں کوئی غیر ملکی دورہ کرنے نہیں آرہا تھا اچانک امریکہ، چین، تہران اور افغانستان کے وزرائے خارجہ فوراً آنا چاہتے ہیں۔ سعودی عرب، متحدہ عرب امارات اور یورپ کے کئی ممالک بھی پاکستان کے معاملات میں دلچسپی لے رہے ہیں۔

سنو لوگو سنو! نہ صرف دنیاوی کامیابی ملے گی بلکہ روحانی راستے سے بھی مدد آئے گی، موکل بھی مدد کریں گے، غیبی شکل میں بھی ہمیں فائدہ پہنچے گا۔ 70سال کی دعائیں رنگ لے آئی ہیں، بس چھ ماہ اور انتظار کرلو، سب کچھ ٹھیک ہونے جا رہا ہے، صرف چھ ماہ!!!۔
(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

لاہور (شوبز ڈیسک/ایمرا نیوز) بالی ووڈ کی منفرد آواز کو خاموش ہوئے بیالیس برس بیت گئے۔ گلوکار مکیش کے گائے ہوئے گانے آج بھی کانوں میں رس گھولتے ہیں۔ مکیش کو تین بار فلم فیئر اور ایک نیشنل فلم ایوارڈ سے نوازا گیا۔
مکیش نے اپنی آواز میں جو گایا امر کر دیا، فلم نردوش سے بطور اداکار اور گلوکار اپنے فنی سفر کا آغاز کیا۔ گلوکار مکیش کو 60 اور 70 کی دہائی میں محمد رفیع اور کشور کمار جیسے گلوکاروں کا سامنا رہا تاہم انہوں نے اپنی منفرد آواز سے اپنا لوہا منوایا۔ مکیش نے اس دور کے مشہور گلوکار کے ایل سہگل کے انداز میں گانے گا کر خوب داد سمیٹی۔ اس منفرد گلوکار کو فلم پہلی نظر کے گانے دل جلتا ہے نے شہرت کی بلندیوں پر پہنچا دیا۔

مدھر آواز کے مالک مکیش نے 300 کے لگ بھگ فلموں میں بارہ سو گانوں کو اپنی سحر انگیز آواز سے سجایا۔ مکیش کی یادگار فلموں میں جس دیش میں گنگا بہتی ہے ، سنگم ، ملن ، تیسری قسم ، پہچان ، شور ، روٹی کپڑا اور مکان اور کبھی کبھی شامل ہیں۔

بالی ووڈ کے اس مشہور گلوکار کی خاصیت یہ تھی کہ اس دور کے مشہور اداکار راج کپور نے انہیں اپنے اوپر فلمائے جانے والے تمام گانوں کیلئے مخصوص کر دیا تھا اور ان کی موت تک جتنے گانے بھی راج کپور پر فلمائے گئے وہ مکیش کی آواز میں ہی ریکارڈ کئے گئے تھے۔ خاص طور پر ان کا گیت جانے کہاں گئے وہ دن اس دور کا سپرہٹ گیت ثابت ہوا، فلم میرا نام جوکر تو باکس آفس پر پٹ گئی لیکن اس کا یہ گیت انتہائی مشہور ہوا۔ فلم سنگم کا گیت دوست دوست نہ رہا پیار پیار نہ رہا ان کا ایک اور سپرہٹ گیت تھا جو بالی ووڈ کے چند ہٹ گیتوں میں سے ایک مانا جاتا ہے۔
27 اگست 1976 کو امریکا میں ایک کنسرٹ کے دوران مکیش کو دل کا دورہ پڑا جو جان لیوا ثابت ہوا اور دنیا بھر میں اپنی آواز سے سحر طاری کرنے والا گلوکار اپنے مداحوں کو اپنی آواز کی صورت بیش بہا خزانہ دے کر ہمیشہ کے لئے چلتا بنا۔

(لاہور ایمرا نیوز)

برادرم سلیم صافی نے اپنی معلومات کی بنا پرجیو ٹی وی میں اپنے ایک تبصرہ کے دوران سابق وزیر اعظم نواز شریف کے حوالے سے کہا کہ وزیر اعظم ہائوس میں اپنے قیام کے دوران وہ کچن کے اپنے اخراجات اپنی جیب سے ادا کرتےتھے۔ نجانے صافی صاحب کے اس انکشاف میں ایسا کیا تھا کہ جس کی وجہ سے سوشل میڈیا میں تحریک انصاف کے حمایتیوں کو جیسے آگ لگ گئی ہو۔ سوشل میڈیا کے ساتھ ساتھ کچھ ٹی وی اینکرزاور میڈیا سے تعلق رکھنے والے صحافی بھی جیسے سٹ پٹا اُٹھے۔ اگر کوئی یہ سمجھتا ہے کہ سلیم صافی کی معلومات درست نہیں تھیں تو درست معلومات شئیر کرلیتے لیکن جیوکے مقبول پروگرام جرگہ کے میزبان کے ساتھ ایک ایسا طوفان بدتمیزی شروع کر دیا گیا جس میں گالیوں، الزامات اور ہر قسم کی لعن طعن کا بہتات تھا۔ تحریک انصاف اور ان کی حکومت کے کسی ذمہ دار کی طرف سے اس معاملےپر کوئی روک ٹوک نہیں کی گئی۔ جو لوگ سلیم صافی کی تحریر کو پڑھتے رہے اور اُن کے پروگرام کو دیکھتے رہے وہ یہ سب یہ گواہی دے سکتے ہیں کہ اُنہوں نے نواز شریف حکومت کو بہت ٹف ٹائم دیا اور سخت ترین تنقید کی۔ لیکن آج اگر اپنی معلومات کی بنا پر وہ یہ خبر اپنے قارئین سے شئیر کر رہے ہیں کہ سابق وزیراعظم نواز شریف نے وزیر اعظم ہائوس میں اپنے اخراجات خود برداشت کئے تو یہ اتنا بڑا جرم بن گیا کہ سلیم صافی برداشت کے قابل نہیں رہا۔ ایک سیاسی جماعت اور اس کےرہنمائوں نے پاکستانی سیاست میں عدم برداشت اور گالم گلوچ کے جس رواج کو پروان چڑھایا اور جسے اب دوسروں نے بھی نقل کرنا شروع کردیا ہے، اُسے روکنے اور درست کرنے کی ضرورت ہے۔ اختلاف رائے کی بنیاد پر دوسروں پر ہر قسم کی الزام تراشی اور گالم گلوچ کا ایک ایسا سلسلہ چل نکلا ہے جس سے اب کوئی نہیں بچ سکتا ۔ اس کام کے لئے سوشل میڈیا کو بطور خاص ہتھیار کے طورپر استعمال کیا جاتا ہے اور المیہ یہ ہے کہ اچھے خاصے (نام نہاد) پڑھے لکھے افراد بھی اس بہتان تراشی اور گالم گلوچ کے گندے کھیل میں بڑھ چڑھ کر حصہ لے رہے ہوتے ہیں۔ سوشل میڈیا میں ’’پڑھے لکھوں‘‘ کی باتیں سن کر افسوس ہوتا ہے کہ بحیثیت معاشرہ ہماری اخلاقی قدریںکس قدر تنزلی کا شکار ہیں۔میری حکومت، میڈیا اور سیاسی جماعتوں سے گزارش ہے کہ اس تنزلی کو روکنے کے لئے ایک طرف تعلیم کے ساتھ تربیت کو تعلیمی اداروں میں لازم کیا جائے تو دوسری طرف میڈیا اور سیاسی جماعتیں معاشرہ کی اسلامی تعلیمات کی روشنی میں تربیت کرنے میںاپنا کردار ادا کریں تاکہ ہم اچھے مسلمان اور اچھے انسان پیدا کرسکیں۔ جہاں تک سوشل میڈیا کا تعلق ہے، تمام سیاسی جماعتوں اور اہم رہنمائوں کو چاہئے کہ وہ اپنے اپنے کارکنوں کو گندی زبان، گالم گلوچ اور جھوٹا پروپیگنڈہ پھیلانے سے روکیں تاکہ سوشل میڈیا کے استعمال کو بامقصد بنایا جائے نہ کہ اس کو ایسی گندگی سے بھر دیا جائے کہ لوگ اس کو استعمال کرنا چھوڑ دیں۔ سوشل میڈٖیا کی اس مخصوص گندگی کا تو اب ٹی وی چینلز اور اخبارات میں بھی اثر نظر آتا ہے جس کی حوصلہ شکنی بہت ضروری ہے۔ تحریک انصاف کل تک اپوزیشن میں تھی لیکن اب اُس کی وفاق کے علاوہ پنجاب، خیبر پختون خوااور بلوچستان میں حکومتیں ہیں۔ اب تمام حکومتی ادارے اور ایجنسیاں بھی تحریک انصاف کو ہی جواب دہ ہیں۔ صحافیوں پر الزام تراشی اور انہیں گالم گلوچ کا نشانہ بنانے کی بجائے، تحریک انصاف کے کارکنوں کو چاہئے کہ وہ اپنی حکومت سے مطالبہ کریں کہ سلیم صافی کو غلط ثابت کرنے کے لئےتمام حقائق عوام کے سامنے رکھ دیں اور سب کو دکھا دیں کہ سابق وزیر اعظم نے وہ کچھ نہیں کیا جس کی اطلاع سلیم صافی نے عوام کو دی۔ بلکہ بہتر ہو گا کہ نواز شریف کے اُن تین سو ارب روپیے کے ثبوت بھی عوام کے سامنے پیش کردیں جو تحریک انصاف کے الزامات کے مطابق نواز شریف نے کرپشن سے کما کر ملک سے باہر بھیجے۔ عمران خان حکومت نے اچھا کیا کہ لاہور، اسلام آباد اور ملتان میٹرو کے ساتھ ساتھ لاہور اورنج لائن کے فارنسک آڈٹ کا حکم دے دیا جس سے کم از کم تحریک انصاف کے اُس الزام کی حقیقت کا بھی پتہ چل جائیگا کہ ان تمام پروجیکٹس کے ذریعے نواز شریف اور شہباز شریف نے اربوں روپیے کمیشن کے طور پر کمائے۔ تحریک انصاف کے پاس اب سنہری موقع ہے کہ ماضی میں لگائے گئے اپنے ایک ایک الزام کے ثبوت کو ساری دنیا کے سامنے پیش کر دے۔

جہاں تک عوام کے پیسہ کو ضائع ہونے اور حکمرانوں اور افسر شاہی کی عیاشیوں پر خرچ ہونے سے بچانے کے متعلق حکومتی فیصلہ کا تعلق ہے اس کی میں مکمل تائید کرتا ہوں۔ وزیر اعظم نے اگرچہ اپنے آپ سے سادگی کے ذریعے قوم کے پیسے کو ضائع ہونے سے بچانے کا آغاز کر دیا ہے لیکن دیکھنا یہ ہو گا کہ پاکستان کی سول بیوروکریسی، دفاعی اداروں کے افسران اور جج حضرات کس طرح عمران خان کے اس فیصلہ کو کامیاب بنانے کے لئےاپنا اپنا حصہ ڈالتے ہیں۔ ٹیکس کے پیسوں سے بنائے گئے محلات کو سرکاری رہاشگاہوں کے طور پر استعمال کرنے کا ہمارے حکمرانوں اور افسر شاہی میں ہمیشہ سے رواج رہا۔ سرکاری پیسہ سے قیمتی گاڑیوں کا استعمال بھی یہاں عام ہے۔ عوام کے پیسہ سے بیرون ملک دورے کرنا اور بڑے بڑے ہوٹلوں میں رہنا بھی یہاں معمول کی بات ہے۔ تحریک انصاف کی حکومت نے اپنی گزشتہ کابینہ میٹنگ میں اس نوعیت کے حکومتی اخراجات کو کم سے کم کرنے کے لئےکچھ اہم فیصلے بھی کئے جن پر عمل درآمد ایک بڑا چیلنج ہو گا۔ اس نوعیت کے فیصلوں پر عملدرآمد کے لئےوزیر اعظم کو اہم قومی اداروں کی طرف سے مکمل سپورٹ کی ضرورت ہو گی۔ میری چیف جسٹس ثاقب نثار، تینوں مسلح افواج کے سربراہان اور سول بیوروکریسی کے اعلیٰ افسران سے درخواست ہے کہ وہ وزیر اعظم عمران خان کے اس بہترین کام میں عملی طور پر ساتھ دیں تاکہ سادگی اور کفایت شعاری کو عام کیا جا سکے اور اس طرح بچائے جانےوالے پیسے کو عوام کی فلاح و بہبود کے لئے استعمال کیا جا سکے۔
(بشکریہ جنگ لاہور)

(کالم نگار کے نام کے ساتھ ایس ایم ایس اور واٹس ایپ رائے دیں 00923004647998)

(لاہور ایمرا نیوز)

جنہیں سو فیصد سیاسی کالم پڑھنے کا چسکا ہے وہ یہ کالم شروع ہی نہ کریں تو بہتر ہو گا کیونکہ اسےیوں بھی تقریباً میرا ایج گروپ ہی ڈھنگ سے سمجھ سکتا ہے۔میں کچھ عرصہ سے کافی بیزار بلکہ ’’اوازار‘‘ہوں اور اس کی وجہ ہماری ’’ماڈرن موسیقی ‘‘ ہے۔ موسیقی اگر روح کی غذا ہے تو ایسی زہریلی غذا سے کہیں بہتر ہے روح بھوکی ہی رہے۔ ہمارے ’’بینڈوں‘‘ نے جینوئن موسیقی کا بینڈ بجا کے رکھ دیا ہے۔ بدشکلے، بے سرے، بدحلیے، بدآوازے اور بے رسے لوگوں نے قسم اٹھا رکھی ہے کہ انہوں نے نورجہاں، سلیم رضا، منیر حسین، مہدی حسن، نصرت فتح علی اور احمد رشدی وغیرہ جیسے خوش آواز سنگرز کے لازوال گیتوں کی ریڑھ مارنی ہے۔نہلے پہ دہلہ ماشااللہ وہ جعلی ججز ہیں جنہیں موسیقی کی اے بی سی کا بھی علم نہیں ہوتا۔کمزور انگریزی ملی اردو میں یہ سارے ماڈرن بیجوباورے، تان سین اور باز بہادر ایسے ایسے سطحی، پھیکے اور احمقانہ تبصرے کرتے ہیں کہ جی چاہتا ہے کہ کسی کے سر پر ڈرم دے ماروں، کسی کی کنپٹی پر گٹار چلا دوں، کسی کے گلے میں سرمنڈل لٹکا دوں، کس کو پیانو کے نیچے دے دوں، کسی کو مرغا بنا کر اس کی تشریف پر ہارمونیم رکھ دوں۔دھوبی کا ڈبو نہ گھر کا نہ گھاٹ کاآدھے تیتر آدھے بٹیرپلے نہیں دانے لونڈے چلے بھنانےناچ نہ جانے آنگن ٹیڑھایہ نہ مشرقی ہیں نہ
مغربی۔نہ چوں چوں کا مربہ،’’ نہ کہیں کی اینٹ کہیں کا روڑہ بھان متی نے کنبہ جوڑا‘‘اور نہ ہی کاک ٹیل، یہ تو ایسے ہیں جیسے کوئی نہاری میں کسٹرڈ مکس کر دے، پیزے کو سرسوں کے ساگ کے ساتھ کھانا شروع کر دے یا کوبے بیف کو کڑھی پکوڑوں میں ڈال کر کلیم کرے کہ اس نے کوئی نئی ڈش ایجاد کی ہے۔سونے پہ سہاگہ یہ کہ یہ بیجوباورے بلکہ بجوباورے اورتان سین بلکہ نان سینس عجیب وغریب حلیوں میں عجیب غریب حرکتیں کرتے ہوئے اسے ڈانس بھی سمجھتے ہیں۔صحیح کہا تھا کسی دل جلے نے کہ یہ ٹانگوں سے گاتے ہیں ۔چڑ مجھے اس بات پر زیادہ چڑھتی ہے کہ یہ نقالوں کے نقال ہیں۔بھارتیوں نے یہ دھندا اہل مغرب سے متاثر ہو کر شروع کیا، انہوں نے اندھا دھند ان کی نقالی شروع کر دی ۔ان میں اگر کچھ ’’اوریجنل‘‘ ہے تو وہ چیخیں بلکہ ’’چیکاں‘‘ جو یہ اپنی طرف سے گیتوں میں گھسا کر گوروں سے غلامی کا انتقام لیتے ہیں۔بہت سے ’’اوریجنل‘‘فنکاروں کو لکھنے لکھانے کا شوق بھی ہے۔کوئی مصرعہ سیدھا نہیں ہوتا، ایک سے بڑھ کر ایک تک بندی کی انتہا کہ آرزو لکھنوی اور ساحر لدھیانوی سے لیکر قتیل شفائی تک کی روحیں لرزتی ہوں گی لیکن کوئی ان کا کچھ نہیں بگاڑ سکتا کہ یہی جمہوریت کا حسن ہے جس کی پہلی شرط ہی اظہار رائے کی آزادی ہے ۔کہاں ہماری نورجہاں، ایران کی مادام گوگوش، مصر کی ام کلثوم اور وہ لولو جس نے گایا تھا” I Only Live Because You LoveMe”یہ لنڈے کے ا یلوس پریسلے، یہ سیکنڈ بلکہ تھرڈ فورتھ ہینڈ فرینک سناترے اور معذور قسم کے مائیکل جیکسن عجیب الخلقت بگڑے بچے ہیں جو نام نہاد ’’بینڈ‘‘ بنا کر خودکو دیومالائی ’’بیٹلز‘‘ کا بھی باپ سمجھتے ہیں۔جن کو علم نہیں ،عمر بھی کم ہو ان کی اطلاع کیلئے عرض ہے کہ BEATLES،تاریخ کا مقبول ترین راک بینڈ 1960میں لیور پول سے شروع ہو کر پوری دنیا پر چھا گیا تھا جس کے چار ممبرز تھے John Lennon، Paul Mccartney، George Harrisonاور Richard Starkeyیہ موسیقی کی تاریخ کا مقبول اور موثر ترین بینڈ سمجھا جاتا ہے جنہوں نے کئی میوزیکل سٹائلز متعارف کرائے اور انڈین میوزک کو بھی راک سٹائیل میں پیش کیا۔ ٹائم میگزین نے اس بینڈ کے چاروں ممبرز کو 20ویں صدی کے 100بااثر ترین افراد میں شامل کیا تھا۔انہیں بےشمار بین الاقوامی ایوارڈز سے بھی نوازا گیا۔ اپنی ’’پیدائش‘‘ کے دس سال بعد 1970میں یہ بینڈ ٹوٹ گیا لیکن ٹیلنٹ کی انتہا دیکھیں کہ بیٹلز دی گریٹ کے چاروں پارٹنرز علیحدگی کے بعد انفرادی حیثیت میں کامیاب رہے تو گزارش یہ ہے کہ بینڈ بنائو بھی، بجائو بھی لیکن موسیقی، گائیکی کی مت مارنے، جگالیاں کرنے کی بجائے کچھ اچھا، عمدہ، یادگار ، اوریجنل کرنے کی کوشش کرو ورنہ اس کام سے دور رہو جس میں تم وکٹری سٹینڈ تک نہ پہنچ سکو کہ زندگی میں “ALSO RAN”کو کبھی نہ نام نصیب ہوتا ہے نہ مقام اور اس کیلئے تین شرائط ہیں اول محنت، دوم محنت، سوم محنت!
(بشکریہ جنگ لاہور)

(لاہور ایمرا نیوز)
عیدالاضحی گزرگئی ہے حج بھی ہوگیا ہے۔ اللہ پاک سب کو بہت بہت مُبارک کرے اور عبادات قبول فرمائے، آمین۔ آج آپ کی خدمت میں دو دلچسپ، سبق آموز واقعات پیش کرنا چاہتا ہوں اُمید ہے کہ پسند کرینگے۔

(۱) صدقہ کی برکت ۔ اللہ تعالیٰ نے کلام مجید میں صدقہ کی اہمیت اور برکت کا تذکرہ فرمایا ہے۔ اس سے متعلق واقعہ پڑھیے اور اللہ رب العزّت کی قدرت کے کرشموں میں سے ایک چھوٹا سا کرشمہ دیکھئے۔

مصر کا ایک امیر بزنس مین تھا ابھی اس کی عمر صرف پچاس سال کے لگ بھگ تھی کہ ایک دن اس کو دل میں تکلیف کا احساس ہوا، اور جب اس نے قاہرہ کے سب سے بڑے اسپتال میں علاج کرایا تو انہوں نے معذرت کرتے ہوئے اسے یورپ جانے کا کہا، یورپ میں تمام ٹیسٹ مکمل کرنے کے بعد وہاں کے ڈاکٹروں نے اسے بتایا کہ تم صرف چند دن کے مہمان ہو، کیونکہ تمہارا دل کام کرنا چھوڑ رہا ہے۔ وہ شخص بائی پاس کروا کر مصر واپس آگیا اور اپنی زندگی کے باقی دن گن گن کر گزارنے لگا۔ ایک دن وہ ایک دکان سے گوشت خرید رہا تھا جب اس نے دیکھا کہ ایک عورت قصائی کے پھینکے ہوئے چربی کے ٹکڑوں کو جمع کر رہی ہے۔ اُس شخص نے عورت سے پوچھا تم اسے کیوں جمع کررہی ہے؟ عورت نے جواب دیا کہ گھر میں بچّے گوشت کھانے کی ضد کررہے تھے، چونکہ میرا شوہر مر چکا ہے اور کمانے کا کوئی ذریعہ بھی نہیں ہے اس لئے میں نے بچوں کی ضد سے مجبور ہو کر یہ قدم اٹھایا ہے، اس پھینکی ہوئی چربی کے ساتھ تھوڑا بہت گوشت بھی آجاتا ہے جسے صاف کرکے پکالوں گی۔ بزنس مین کی آنکھوں میں آنسو آگئے اس نے سوچا میری اتنی دولت کا مجھے کیا فائدہ میں تو اب بس چند دن کا مہمان ہوں، میری دولت کسی غریب کے کام آجائے اس سے اچھا اور کیاہے۔ اس نے اسی وقت اس عورت کو کافی سارا گوشت خرید کر دیا اور قصائی سے کہا اس عورت کو پہچان لو، یہ جب بھی آئے اور جتنا بھی گوشت مانگے اسے دے دینا اور پیسے مجھ سے لے لینا۔ اس واقعے کے بعد وہ شخص اپنے روزمرہ کے معمولات میں مصروف ہوگیا۔ کچھ دن بعد اسے دل میں کسی تکلیف کا احساس نہ ہوا تو اس نے قاہرہ میں موجود لیبارٹری میں دوبارہ ٹیسٹ کرائے، ڈاکٹروں نے بتایا کہ رپورٹ کے مطابق آپ کے دل میںکوئی مسئلہ نہیں ہے لیکن تسلی کیلئے آپ دوبارہ یورپ میں چیک اپ کروائیں۔ وہ شخص دوبارہ یورپ گیا اور وہاں ٹیسٹ کرائے، رپورٹس کے مطابق اس کے دل میں کوئی خرابی سرے سے تھی ہی نہیں، ڈاکٹر حیران رہ گئے اور اس سے پوچھا کہ آپ نے ایسا کیا کھایا کہ آپ کی بیماری جڑ سے ختم ہوگئی۔ اُسے وہ گوشت والی بیوہ یاد آئی اور اس نے مسکرا کر کہا، علاج وہاں سے ہوا جس پر تم یقین نہیں رکھتے، بے شک میرے نبی ﷺ نے سچ کہا تھا کہ صدقہ ہر بلا کو ٹالتا ہے۔

(2)حضرت عمر ؓ کی عقل و فہم اور نظام حکومت پوری دنیا میں مثالی مانی جاتی ہے۔ آپ زیادہ معلومات کے لئے مولانا شبلی نعمانی ؒ اور محمد حسین ہیکل کی انگریزی میں حضرت عمر فاروق اعظمؒ پڑھ لیں آپ کو احساس ہوجائے گا کہ وہ کتنی بڑی شخصیت کے مالک تھے۔ آئیے ان کی چند باتیں آپ کو بتاتا ہوں۔

ہم نے بچپن میں پڑھا تھا مقدونیہ کا الیگزینڈر 20 سال کی عمر میں بادشاہ بنا۔ 23 سال کی عمر میں مقدونیہ سے نکلا، اسنے سب سے پہلے پورا یونان فتح کیا، اس کے بعد وہ ترکی میں داخل ہوا، پھر ایران کے دارا کو شکست دی، پھر وہ شام پہنچا، پھر اس نے یروشلم اور بابل کا رخ کیا، پھر وہ مصر پہنچا، پھر وہ ہندوستان آیا، ہندوستان میں اس نے پورس سے جنگ لڑی، اپنے عزیز از جان گھوڑے کی یاد میں پھالیہ شہر آباد کیا، مکران سے ہوتا ہوا واپسی کا سفر شروع کیا، راستے میں ٹائیفائڈ میں مبتلا ہوا اور 323 قبل مسیح میں 33 سال کی عمر میں بخت نصر کے محل میں انتقال کرگیا۔ دنیا کو آج تک بتایا گیا وہ انسانی تاریخ کا عظیم جرنیل،فاتح اور بادشاہ تھا اور تاریخ نے اس کے کارناموں کی وجہ سے اسے الیگزینڈر دی گریٹ کا نام دیا اور ہم نے اسے سکندر اعظم یعنی بادشاہوں کا بادشاہ بنادیا، لیکن آج اکیسویں صدی میں پوری دنیا کے مورخین کے سامنے یہ سوال رکھتا ہوں کیا حضرت عمر فاروق رضی اللہ عنہ کے ہوتے ہوئے الیگزینڈر کو سکندر اعظم کہلانے کا حق حاصل ہے؟ میں دنیا بھر کے مورخین کو سکندر اعظم اور حضرت عمر فاروق ؓ کی فتوحات اور کارناموں کے موازنے کی دعوت دیتا ہوں، آپ بھی سوچئے۔

الیگزینڈر بادشاہ کا بیٹا تھا، اسے دنیا کے بہترین لوگوں نے گھڑ سواری سکھائی، اسے ارسطو جیسے استادوںکی صحبت ملی تھی اورجب وہ بیس سال کا ہوگیا تو اسے تخت اور تاج پیش کردیا گیا، جب کہ اس کے مقابلے میں حضرت عمر فاروق رضی اللہ عنہ کی 7 پشتوں میں کوئی بادشاہ نہیں گزرا تھا، آپ بھیڑ بکریاں اور اونٹ چراتے چراتے بڑے ہوئے تھے اور آپ نے تلوار بازی اور تیراندازی بھی کسی اکیڈمی سے نہیں سیکھی تھی۔ سکندر اعظم نے آرگنائزڈ آرمی کے ساتھ 10 برسوں میں17 لاکھ مربع میل کا علاقہ فتح کیا تھا، جبکہ حضرت عمر فاروق رضی اللہ عنہ نے 10 برسوں میں آرگنائزڈ آرمی کے بغیر 22 لاکھ مربع میل کا علاقہ فتح کیا ،اس میں روم اور ایران کی دو سپر پاور بھی شامل تھیں۔آج کے سیٹلائٹ، میزائل اور آبدوزوں کے دور میں بھی دنیا کے کسی حکمراںکے پاس اتنی بڑی سلطنت نہیں جو حضرت عمر فاروق ؓ نے نہ صرف گھوڑوں کی پیٹھ پر فتح کرائی تھی، بلکہ اس کا انتظام و انصرام بھی چلایا تھا، الیگزینڈر نے فتوحات کے دوران اپنے بے شمار جرنیل قتل کرائے، بے شمار جرنیلوں اور جوانوں نے اس کا ساتھ چھوڑا، اس کے خلاف بغاوتیں بھی ہوئیں اور ہندوستان میں اس کی فوج نے آگے بڑھنے سے انکار بھی کردیا،لیکن حضرت عمر فاروق ؓ کے کسی ساتھی کو ان کے حکم سے سرتابی کی جرأت نہ ہوئی۔ وہ ایسے کمانڈر تھے کہ آپ نے عین میدان جنگ میں عالم اسلام کے سب سے بڑے سپہ سالار حضرت خالد بن ولید ؓ کو معزول کردیا اور کسی کو یہ حکم ٹالنے کی جرأت نہ ہوئی۔ آپ نے حضرت عمر بن العاص ؓ کو کوفے کی گورنری سے ہٹا دیا۔ آپ نے حضرت حارث بن کعب ؓ سے گورنری واپس لے لی۔ آپ نے حضرت عمرو بن العاص ؓ کا مال ضبط کرلیا اور آپ نے حمص کے گورنر کو واپس بلا کر اونٹ چرانے پر لگا دیا، لیکن کسی کو حکم عدولی کی جرأت نہ ہوئی۔

الیگزینڈر نے 17 لاکھ مربع میل کا علاقہ فتح کیا، لیکن دنیا کو کوئی نظام، کوئی سسٹم نہ دے سکا، جب کہ حضرت عمرفاروقؓ نے دنیا کو ایسے سسٹم دیئے جو آج تک پوری دنیا میں رائج ہیں۔ آپ نے (1) سن ہجری کا اجرا کیا، (2) جیل کا تصور دیا، (3) مؤذنوں کی تنخواہیں مقرر کیں، (4) مسجدوں میں روشنی کا بندوبست کرایا، (5) پولیس کا محکمہ بنایا، (6) ایک مکمل عدالتی نظام کی بنیاد رکھی، (7) آب پاشی کا نظام قائم کرایا، (8) فوجی چھائونیاں بنوائیں اور فوج کا باقاعدہ محکمہ قائم کیا۔ (جاری ہے)

(بشکریہ جنگ لاہور)

اسلام آباد:(نیٹ نیوز/ایمرا نیوز) وزیراعظم عمران خان سے آرمی چیف جنرل قمر جاوید باجوہ نے ملاقات کی۔
سرکاری ٹی وی کےمطابق وزیراعظم عمران خان اور آرمی چیف جنرل قمر جاوید باجوہ کے درمیان ملاقات میں پاک فوج کے سربراہ نے عمران خان کو وزراتِ عظمیٰ کا منصب سنبھالنے پر مبارکباد دی۔
وزیراعظم اور آرمی چیف نے ملاقات میں سلامتی کی صورت حال پر تبادلہ خیال کیا جبکہ دونوں شخصیات نے ملک میں پائیدار امن اور استحکام کے عزم کا اظہار کیا۔

لاہور:(سپورٹس ڈیسک/ایمرا نیوز) تجربہ کار آل راؤنڈر محمد حفیظ کی بورڈ سے ناراضی ختم ہوگئی، وضاحت پر مطمئن ہوجانے کے بعد انھیں ایشین کپ کیلیے قومی اسکواڈ کے ابتدائی کھلاڑیوں میں شامل کرلیا گیا۔
پی سی بی نے آئندہ ماہ متحدہ عرب امارات میں شیڈول ایشیا کپ کی تیاریوں کے لیے26 کرکٹرز کا اعلان کردیا، منتخب کھلاڑی پیر سے آرمی اسکول آف فزیکل اینڈ ٹریننگ ایبٹ آباد کے فٹنس کیمپ میں شریک ہوں گے، ایشیا کپ کے لیے ٹریننگ کیمپ کے شیڈول کا اعلان بعد میں کیا جائے گا۔تفصیلات کے مطابق پی سی بی نے15 ستمبر سے یو اے ای میں شیڈول ایشیا کپ میں عوامی امنگوں کے مطابق نتائج کے حصول کے لیے کمرکس لی اور ابتدائی مرحلے میں سلیکشن کمیٹی کی طرف سے کھلاڑیوں کا اعلان کرنے کے بعد کیمپ کے مقام کو بھی حتمی شکل دے دی ہے۔
ذرائع کے مطابق ایشیا کپ کی تیاریوں کے لیے کیمپ 2 مقامات پر لگایا جائیگا، پہلے مرحلے میں کھلاڑی27 اگست کو آرمی اسکول آف فزیکل اینڈ ٹریننگ سینٹر ایبٹ آباد میں اکٹھے ہوں گے اورفٹنس میں بہتری لانے کے لیے ماہرکوچزکی نگرانی میں31 اگست تک ایکشن میں دکھائی دیں گے، دوسرا مرحلہ لاہور میں شروع ہوگا جس میں پلیئرز کی بیٹنگ، بولنگ اور فیلڈنگ میں موجود خامیوں کو بہتر بنانے کی کوشش کی جائے گی ، پی سی بی اعلامیے کے مطابق لاہور میں ٹریننگ کیمپ کے شیڈول کا اعلان بعد میں کیا جائیگا۔
پی سی بی کی طرف سے کیمپ کا حصہ بننے والے26 کھلاڑیوں میں فخر زمان، امام الحق، بابر اعظم، شعیب ملک، سرفراز احمد، آصف علی، شاداب خان، فہیم اشرف، محمد عامر، حسن علی، عثمان شنواری، محمد نواز، عماد وسیم، حارث سہیل، محمد حفیظ، یاسر شاہ، شاہین شاہ آفریدی، جنید خان، صاحبزادہ فرحان، شان مسعود، عثمان صلاح الدین ، اسد شفیق، بلال آصف، محمد اصغر، راحت علی اورمیرحمزہ شامل ہیں، مکی آرتھر ہیڈ کوچ ہوں گے جبکہ دوسرے عہدیداروں میں گرانٹ فلاور بیٹنگ کوچ، گرانٹ لیوڈن ٹرینر، اظہر محمود بولنگ کوچ اورکلیفی ڈیکون فزیوتھراپسٹ اورطلحہ اعجاز اینالسٹ ہوں گے۔ یہ بات قابل ذکر ہے کہ ایشیا کپ میں شریک6 ٹیموں کو2 گروپس میں تقسیم کیا گیا ہے۔

گروپ ’اے‘ میں پاکستان، بھارت اور ایک کوالیفائر ٹیم شامل ہوگی جبکہ گروپ ’بی‘ میں سری لنکا، بنگلہ دیش اور افغانستان کورکھا گیا ہے، ہر گروپ سے سرفہرست 2 ٹیمیں سپر چار مرحلے میں جگہ پکی کرنے میں کامیاب رہیں گی، ٹاپ ٹیموں کے درمیان فائنل کھیلا جائے گا۔افتتاحی میچ15 ستمبر کو بنگلہ دیش اورسری لنکا کے درمیان کھیلا جائے گا، 16 ستمبر کو پاکستانی ٹیم گروپ اے کی کوالیفائر ٹیم کے خلاف ایکشن میں دکھائی دیگی،گرین شرٹس ایشیائی ایونٹ کے دوسرے میچ میں 19 ستمبر کو روایتی حریف بھارت کے خلاف ایکشن میں دکھائی دیں گے۔
سپرفورمرحلے کا آغاز21 ستمبر سے شروع ہو کر 26 ستمبر تک جاری رہے گا جبکہ فائنل28 ستمبر کو رکھا گیا ہے۔ایشین کپ کاآغاز1984 میں شارجہ سے ہوا اور اب تک ایشیائی ایونٹ کے13 کامیاب ایڈیشنز ہو چکے ہیں۔ بھارت کو اب تک سب سے زیادہ6 بارایشیا کپ جیتنے کا اعزاز حاصل ہے، بلوز شرٹس نے یہ اعزازات 1984، 1988، 1990،1995، 2010 اور 2016 میں حاصل کیے تھے۔سری لنکا اب تک 5 بار 1986،1997، 2004، 2008 اور2014 میں ٹائٹل اپنے نام کرچکاہے، پاکستانی ٹیم کو صرف 2 بارایشیائی ایونٹ اپنے نام کرنے کا اعزاز حاصل ہوا ہے، گرین شرٹس نے 2000 اور 2012میں ایشیائی چیمپئن بننے کا اعزازحاصل کیا تھا۔ بنگلہ دیش، یو اے ای، ہانگ، کانگ اور افغانستان کی ٹیمیں تاحال ٹائٹل کی دوڑ میں شامل نہیں ہوسکی ہیں۔

(نیٹ نیوز/ایمرا نیوز) بیلجیئم میں ہونے والی بیلجیئن گرینڈ پِرکس (جی پی) فارمولا ون ریسنگ میں کریش کے دوران نئی ٹیکنالوجی ‘ہالو’نے ڈرائیور کی جان بچالی، حالانکہ یہ ٹیکنالوجی ڈرائیور کو کچھ زیادہ پسند نہیں تھی۔
نیوز ڈاٹ کام کی رپورٹ کے مطابق ریس شروع ہوتے ہی اچانک فرنینڈو الونسو نامی ایک ڈرائیور کی گاڑی دوسری گاڑی پر آگری، تاہم گاڑی میں موجود ہالو ڈیوائس، جو ڈرائیور چارلس لیکریک کے سر کے اوپر لگائی گئی تھی،کی بدولت ڈرائیور محفوظ رہا۔

اس حوالے سے ڈرائیور چارلس لیکریک کا کہنا ہے کہ سر کے اوپر لگی یہ ڈیوائس انہیں پسند نہ تھی تاہم اب وہ اس کی اہمیت کے قائل ہوگئے ہیں۔
واضح رہے کہ فارمولا ون ریسنگ میں ہالو نامی ٹیکنالوجی اسی سال متعارف کرائی گئی تھی۔
اس ٹیکنالوجی کا مقصد ڈرائیور کے سر کی حفاظت کو یقینی بنانا ہے۔