All posts by Emra TV

اسلام آباد ہائیکورٹ نے یوسف رضا گیلانی کی چیئرمین سینیٹ الیکشن کیخلاف درخواست قابل سماعت ہونے یا نہ ہونے پر فیصلہ محفوظ کرلیا۔ چیف جسٹس اطہر من اللہ نے ریمارکس دیئے کہ پارلیمنٹ کی پروسیڈنگ کو استثنی حاصل ہے، آرٹیکل 69 سے کیسے باہر جا سکتے ہیں؟۔

اسلام آباد ہائی کورٹ کے چیف جسٹس اطہر من اللہ نے چیئرمین سینٹ الیکشن کے نتائج کے خلاف پیپلزپارٹی کی درخواست پر سماعت کی۔ سینیٹر یوسف رضا گیلانی کے وکیل فاروق ایچ نائیک اور جاوید اقبال عدالت میں پیش ہوئے۔

وکیل فاروق ایچ نائیک نے عدالت کو بتایا کہ صدر نے جی ڈی اے سے سید مظفر حسین شاہ کو بطور پرائزاڈنگ مقرر کیا، ووٹ کیسے مارک ہوگا اس کا ذکر رولز میں موجود نہیں۔ جس پر چیف جسٹس اطہر من اللہ نے استفسار کیا کیا الیکشن کمیشن کی جانب سے کوئی اس پراسس میں شامل تھا ؟ اس پر فاروق ایچ نائیک نے کہا الیکشن کمیشن سے کوئی اس پراسس میں شامل نہیں تھا۔

امریکی ریاست کولوراڈو میں گروسری اسٹور میں فائرنگ کے واقعے میں پولیس آفیسر سمیت دس افراد ہلاک ہو گئے، واقعے کو یوٹیوب پر براہ راست دکھایا بھی گیا۔

ریاست کولوراڈو کے شہر بولڈر میں نامعلوم شخص کی فائرنگ کے نتیجے میں دس افراد ہلاک ہوگئے۔ ہلاک ہونے والوں میں ایک پولیس افسر بھی شامل ہے۔ فائرنگ کا واقعہ ایک سپر مارکیٹ میں پیش آیا۔
پولیس نے ایک مشتبہ شخص کو حراست میں لے لیا ہے۔ پولیس کا کہنا ہے فائرنگ کنگ سپر مارکیٹ میں ہوئی۔ خبر ایجنسی کے مطابق فائرنگ کرنے والے شخص کا مقصد اب تک معلوم نہیں ہو سکا۔

وزیراعلی عثمان بزدار نے کہا ہے کہ آزادی بہت قربانیوں کا ثمر ہے، قیام پاکستان سے تعمیر پاکستان کا سفر جاری ہے۔

وزیراعلیٰ پنجاب عثمان بزدار نے یوم پاکستان پر اپنے پیغام میں کہا کہ آزادی کی تاریخ میں یوم پاکستان 23 مارچ کے دن کو کبھی فراموش نہیں کیا جاسکتا، یہ ایک ایسا دن ہے جب آزاد وطن کے خواب کو عملی تعبیر دینے کی بنیاد رکھی گئی، آج ہم آزاد ہیں لیکن یہ آزادی بہت سی قربانیوں، کاوشوں اور محنتوں کا ثمر ہے، بحیثیت قوم ہم قائداعظم اور ان کی زیر قیادت قرارداد پاکستان منظور کرنیوالے مسلم لیگ کے اکابرین کو شاندار الفاظ میں خراج عقیدت پیش کرتے ہیں۔

عثمان بزدار کا کہنا تھا کہ منٹو پارک کے تاریخی جلسے میں منظور کی جانے والی قرارداد پاکستان کے قیام کی بنیاد بنی، 23 مارچ کا دن جذبوں کی تعمیر اور خوابوں کی تعبیر کا دن ہے، حصول آزادی کا سفر کبھی آسان نہیں ہوتا، پاکستان کی منزل پانے کیلئے آگ اور خون کے دریاؤں سے گزرنا پڑا، قائداعظم محمد علی جناح کی ولولہ انگیز قیادت میں بے شمار قربانیاں دے کر الگ وطن کی جدوجہد کامیاب ہوئی، برصغیر میں بسنے والی مختلف نسلیں، مختلف قبیلے اور مختلف فرقے ایک قوم بننے کا فیصلہ نہ کرتے تو پاکستان کا معجزہ کبھی ظہور پذیر نہ ہو پاتا۔

وزیراعلیٰ پنجاب نے مزید کہا کہ قیام پاکستان سے تعمیر پاکستان کا سفر بتدریج جاری ہے، اس مرحلے میں قوم کے ہر فرد کو آگے بڑھ کر اپنا کردار ادا کرنا ہوگا، بحیثیت قوم ہم نے پاکستان کے موجودہ چیلنجز کو سمجھتے ہوئے ذمہ داری کا ثبوت دینا ہے، وزیراعظم کی قیادت میں تحریک انصاف کی حکومت نئے پاکستان کی بنیاد رکھ چکی ہے، عمران خان کی قیادت میں پاکستان اس منزل کی جانب بڑھ رہا ہے جس کا خواب قائد اور اقبال نے دیکھا، 23 مارچ 1940 والے جذبے، عزم اور یکجہتی کو اپنا کر وطن عزیز کو آگے لے کر جائیں گے۔

امریکی صدر جو بائیڈن نے صدر مملکت عارف علوی کو یومِ پاکستان پر مبارکباد دی ہے۔

امریکی صدر جو بائیڈن نے صدر مملکت ڈاکٹر عارف علوی کو یوم پاکستان کے موقع پر خط میں مبارکباد دیتے ہوئے لکھا ہے کہ پاکستان، امریکہ پارٹنرشپ علاقائی امن و خوشحالی کے مشترکہ مقصد پر مبنی ہے، مشترکہ چیلنجز خصوصاً افغانستان میں قیامِ امن، کورونا وبا اور ماحولیاتی تبدیلی پر قابو پانے کیلئے باہمی تعاون جاری رکھیں گے، ہم پاکستان کے ساتھ شراکت داری کو مستقبل میں مضبوط بنائیں گے۔ خط میں صدر جو بائیڈن نے یومِ پاکستان کے موقع پر پاکستانی قوم کو مبارکباد بھی پیش کی ہے۔

دوسری جانب یوم پاکستان کے موقع پر صدر مملکت عارف علوی نے اپنے پیغام میں کہا کہ آج کے دن ہمیں اپنے کشمیری بھائیوں کو بھی یاد رکھنا چاہیے، مظلوم کشمیریوں کو بھارتی فورسز نے دہائیوں سے محکوم بنا رکھا ہے، اقوام عالم کو غیر قانونی مقبوضہ جموں و کشمیر میں انسانی حقوق کی پامالیوں کا نوٹس لینا چاہئے، اپنے کشمیری بھائیوں کے حق خودارادیت کی منصفانہ جدوجہد کی حمایت جاری رکھنے کا عہد کرتے ہیں۔

صدر مملکت عارف علوی نے پاکستان کو معاشی طور پر مضبوط اور خوشحال بنانے کے عزم کا اعادہ کرتے ہوئے کہا کہ پاکستان میں بسنے والی اقلیتوں کیلئے رواداری اور انسان دوست معاشرہ بنانے کی جدوجہد جاری رکھنے کا عہد کرتے ہیں۔ ان کا کہنا تھا کہ کورونا وبا کا پھیلاؤ روکنے کیلئے اہم کردار ادا کرنے والے اپنے ہیروز کو سلام پیش کرتے ہیں، اتحاد، ایمان اور تنظیم کی مدد سے ہم اپنی راہ میں آنیوالے کسی بھی چیلنج پر قابو پاسکتے ہیں

پاکستان پیپلزپارٹی کے سینیٹر یوسف رضا گیلانی نے چیئرمین سینیٹ کا الیکشن اسلام آباد ہائیکورٹ میں چیلنج کر دیا۔
پیپلز پارٹی کے چیئرمین سینیٹ کے لئے امیدوار یوسف رضا گیلانی کی جانب سے فاروق ایچ نائیک نے درخواست عدالت میں دائر کی جس میں چیئرمین سینیٹ کا انتخاب کالعدم قرار دے کر صادق سنجرانی کو ذمہ داریاں ادا کرنے سے روکنے کی استدعا کی گئی۔ درخواست میں مؤقف اپنایا گیا کہ یوسف رضا گیلانی کے حق میں ڈالے گئے 7 ووٹ غیر قانونی طریقے سے مسترد کیے گئے، ان ووٹوں کو منظور کیا جائے۔

یاد رہے کہ یوسف رضا گیلانی چیئرمین سینیٹ کا الیکشن 7 ووٹ مسترد ہونے پر ہار گئے تھے۔ یوسف رضا گیلانی نے 42 ووٹ حاصل کئے تھے۔ سینیٹ میں حکمران اتحاد کے صادق سنجرانی 48 ووٹ لے کامیاب ٹھہرے تھے

وزیراعلیٰ پنجاب سردار عثمان بزدار سے صوبائی وزراء اور مختلف اضلاع سے تعلق رکھنے والے اراکین صوبائی اسمبلی کی ملاقاتیں،منتخب نمائندوں کے حلقوں کے مسائل کے حل کے حوالے سے بات چیت،اراکین اسمبلی نے وزیراعلیٰ عثمان بزدار کو حلقوں میں جاری ترقیاتی سکیموں پر ہونے والی پیشرفت سے آگاہ کیا،
اس موقع پر وزیر اعلیٰ پنجاب کا کہنا تھا کہ ہر ضلع کا علیحدہ ڈویلپمنٹ پیکیج کررہے ہیں ،منتخب نمائندوں کے حلقوں میں ترجیحی بنیادوں پر ترقیاتی کام ہوں گے،حلقوں میں عوامی ضروریات اور ترجیحات کو مد نظر رکھ کر ترقیاتی منصوبے شروع کریں گے۔ انکا مزید کہنا تھا کہ مخصوص شہروں پر فوکس کرنا ترقی نہیں بلکہ پسماندہ علاقوں کی حق تلفی ہے-تحریک انصاف کی حکومت ترقی کے سفر کو دور دراز علاقوں میں لے کر گئی ہے- سابق حکمرانوں نے اپنے دور میں صوبے کے عوام کی ترجیحات کو نظر انداز کر کے نمائشی منصوبے شروع کئے-شوبازی والے منصوبے”سفید ہاتھی“ بن کر خزانے پر بوجھ بنے-
وزیر اعلیٰ پنجاب عثمان بزدار نے مزید کہاعوام کے خون پسینے کی کمائی کو بے دریغ ذاتی پسند و ناپسند پر ضائع کیا گیاہے-سابق حکمرانو ں نے عوام کو بنیادی سہولتیں فراہم کرنے پر کوئی توجہ نہ دی-تحریک انصاف کی حکومت یکساں ترقی پر عمل پیرا ہے-نظر انداز علاقوں میں پہلی بار ترقیاتی کام ہورہے ہیں –
انہوں نے کہا کہ ارکان اسمبلی کو ہمیشہ مشاورت میں شامل کیا ہے۔ون مین شو کا قائل نہیں،ٹیم ورک پر یقین رکھتا ہوں۔عوام کی خدمت ہی اصل سیاست ہے۔شوبازی پر یقین نہیں رکھتا۔عوام کے مسائل کے حل کیلئے ہر علاقے کا دورہ کر رہا ہوں۔
وزیراعلیٰ سے ملاقات کرنے والوں میں صوبائی وزراء جہانزیب کھچی،شوکت لالیکا، اراکین پنجاب اسمبلی علی رضا خان خاکوانی، غزین عباسی، ام البنین،واثق قیوم عباسی اورمامون تارڑ،چیف وہپ پنجاب اسمبلی ایم پی اے سید عباس علی شاہ اور سیکرٹری گڈ گورننس کمیٹی اعجاز حسین منہاس بھی اس موقع پر موجود تھے

سٹیج اداکار بھولا مغل نے بے روزگاری سے تنگ آکر خودکشی کرلی. بھولا مغل کا اصل نام اعظم راہی ہے. وہ چونیاں کے نواحی گائوں دوگٹا کا رہائشی ہے اور آٹھ برس سے لاہور میں ڈرامہ پروڈیوسر اور ہدایتکار ایم اے ٹھاکر کی ٹیم میں کام کر رہا تھا تاہم سرکاری تھیٹروں میں ڈراموں کی نمائش بند ہونے کے بعد وہ بے روزگار ہو گیا اور اپنے گاؤں واپس چلا گیا. جہاں پیسے مانگنے پر اس کا اپنے گھر والوں سے جھگڑا ہوگیا اور بھولا مغل نے دلبرداشتہ ہو کر خود کو آگ لگا دی. وہ دو گھنٹے بعد جاں بحق ہوگیا.
تھیٹر سے وابستہ فنکاروں نے بھولا مغل کے روزگاری سے تنگ آکر خودکشی کرنے پر شدید رد عمل کا اظہار کیا ہے.ایم اے ٹھاکر نے حکومت سے مطالبہ کیا ہے کہ فوری طور پر سرکاری تھیٹر کھولے جائیں.تاکہ مزید فنکار مفلسی اور بے روزگاری کی بھینٹ نہ چڑھیں.

لاہور:اقبال گارڈن نے ایل ڈی اے کے رولز کی کھلم کھلا خلاف ورزی شروع کر دی۔ تفصیلات کے مطابق اقبال گارڈن نے بغیر منظوری کے نیوز چینلز پر پبلسٹی شروع کر دی ہے۔ اقبال گارڈن نے لاہور اللہ ہو چوک میں ایل ڈی اے سے منظوری کے بغیر پی ایچ اے سے ملی بھگت کرکے سجاوٹ شروع کر دی ہے۔
اقبال گارڈن کی انتظامیہ نے ایل ڈی اے کے بائی لاز کو چیلنج کرکے پیسے کے زور پر نیوز چینلز اور اخبارات پر اشتہارات چلانے شروع کر دیئے ہیں۔ جو پیمرا کے ضابطہ اخلاق کے بھی منافی ہے۔

اسلام آباد: سپریم کورٹ نے این اے 75 ڈسکہ کے ضمنی الیکشن کو کالعدم قرار دینے کے الیکشن کمیشن کے فیصلے کو معطل کرنے کی پی ٹی آئی کی استدعا دوبارہ مسترد کردی۔

سپریم کورٹ میں جسٹس عمر عطا بندیال کی سربراہی میں این اے 75 ڈسکہ میں دوبارہ انتخابات سے متعلق کیس کی سماعت ہوئی جس دوران جسٹس عمر عطا نے کہا کہ الیکشن کمیشن کے مطابق قانون کی خلاف ورزی پردوبارہ پولنگ کا حکم دیا گیا اور پیش کردہ نقشے کے مطابق 20 پریزائیڈنگ افسران صبح تک غائب تھے جب کہ تمام کشیدگی ڈسکہ کے شہری علاقے میں ہوئی

متحدہ عرب امارات نے اسرائیل اور دیگر عرب ریاستوں کے ساتھ آئندہ ماہ ہونے والی سمٹ کو ملتوی کردیا۔

عرب میڈیا کے مطابق اسرائیلی میڈیا کا بتانا ہےکہ متحدہ عرب امارات نے اسرائیل اور دیگر عرب ریاستوں کے ساتھ ابوظبی میں طے شدہ سمٹ کو فی الحال ملتوی کردیا ہے اور عرب ممالک کے ایک حکمراں کو اپنی الیکشن مہم کا حصہ بنانے پر برہمی کا اظہار کیا ہے۔

اسرائیلی میڈیا کے مطابق متحدہ عرب امارات کی جانب سے یہ سمٹ آئندہ ماہ اپریل میں رکھی گئی تھی جس میں اسرائیلی وزیراعظم نیتن یاہو نے بھی شرکت کرنا تھی۔