Category کالم

ایمرا نیوز
اس کالم کا عنوان اس جین کے نام پر ہے جو انسان اور دوسرے جانوروں کے دماغ میں ایک نمایاں فرق ظاہر کرتا ہے۔ FOX P2وہ جین ہے جس کی مدد سے انسان بولنے اور اس سے بھی بڑھ کر آپس میں گپ شپ کرنے کے قابل ہوا وگرنہ انسان اور بندر کے دماغ میں اس جین کے علاوہ کوئی بڑا فرق نہیں ہے۔

نظریہ ارتقاء، انسانی ترقی اور جانوروں و انسانوں کے اذہان کا تقابل کرنیوالے سائنس دانوں نے گزشتہ دو دہائیوں میں غیر معمولی انکشافات کئے ہیں۔ اس حوالے سے پیٹر واٹسن کی تہلکہ خیز کتاب Ideasقابل ذکر ہے جس میں تفصیل سے بیان کیا گیا ہے کہ انسان نے کس طرح خیالات کے ذریعے ارتقاء کے عمل کو آگے بڑھایا۔ یووال نوح حراری کی دو کتابیں Sapiensاور Homo Deusنے تو سائنسی تحیرات کو انتہائی آسان زبان میں سمجھا دیا۔ اسی حوالے سے سائنس دان ڈیوڈ ریخ کی کتاب Who we are and How we got Hereنے جینیاتی سائنس، نظریہ ارتقاء اور اب تک اس پر ہونے والی تحقیق کو تحریر کر دیا ہے۔

نئے سائنسی انکشافات سے یہ ظاہر ہوا ہے کہ ہزاروں سال پہلے کے مردہ انسان کے DNA سے اس کی پوری وراثتی تاریخ کو جانا جا سکتا ہے اور یہ پتہ لگایا جا سکتا ہے کہ یہ خاص انسان کن نسلوں کا ورثہ ہے، ان کا اصل وطن یوریشیا تھا یا میسو پوٹیمیا حتیٰ کہ یہ تک پتہ چلا لیا گیا ہے کہ کب افریقی انسانوں نے ہجرت کی اور کب عراق اور شام کے علاقے میں قدیمی انسان (Non Neanderthal)اور جدید انسان (Homo Sapiens)کا تصادم ہوا۔ یہ بھی پتہ چل چکا ہے انسانی تاریخ میں قدیم ترین دریافت شدہ انسانی نام ’’کشم‘‘ ہے اور انسانی تاریخ کی جو گم شدہ اور پرانی ترین نشانی ملی ہے وہ انسانی ہاتھ کا پرنٹ ہے جو تقریباً 30ہزار سال پرانا ہے۔ اسی تحقیق کے نتیجے میں اب تک جو سب سے پرانی تحریر برآمد ہوئی ہے وہ گیہوں کا حساب کتاب ہے۔ اس میں نہ کوئی فلسفیانہ نکتہ ہے اور نہ کوئی حکیمانہ احکامات۔

اب یہ کہا جا رہا ہے کہ باقی جانوروں سے بڑا دماغ، اوزاروں کا استعمال، سیکھنے کی بہترین صلاحیتیں اور پیچیدہ سماجی ڈھانچہ وہ اہم ترین عناصر ہیں جن کی وجہ سے انسانی نسل دنیا کی طاقتور ترین اور ذہین ترین نسل بن گئی اور اس نے تمام جانوروں اور انسانوں کی ابتدائی نسلوں کو اپنا زیر نگین بنا لیا جبکہ پیٹر واٹسن کا خیال ہے کہ دماغ بڑا ہونے یعنی FOX P2کے بڑا ہونے اور بالخصوص انسان کے چوپائے سے دوپائے ہونے کے عمل نے ارتقاء کو تیز کر دیا۔ جب انسان کے دو ہاتھ آزاد ہو گئے تو پھر انسان نے ان دو ہاتھوں سے اوزار بنانے، آگ جلانے اور شکار کرنے جیسی ترکیبیں نکال لیں۔ ایک بات پر سب سائنس دان متفق ہیں کہ FOX P2 کا جب دماغی جین بڑا ہوا، اس کا تناسب قدیمی انسانی نسل سے 2اور 200کا ہے، پہلے انسان اور بن مانس اشارے کنائے میں بات ضرور کرتے تھے ایمرجنسی کیلئے آوازیں بھی نکالی جاتی تھیں لیکن FOX P2 نے انسان کو آپس میں گپ شپ لگانے اور باہم مشورے کرنے کا موقع فراہم کر دیا اور انسانی ترقی اور ارتقاء کی سب سے بڑی وجہ یہی بنی۔

انسانی تاریخ کا مطالعہ یہ بتاتا ہے کہ جنگ، وبا اور قحط، نسل انسانی کے سب سے بڑے دشمن رہے ہیں لیکن انسانی نسل نے تیز ترین معاشی اور سائنسی ترقی کر کے اپنے تینوں دشمنوں کو تباہ و برباد کر دیا ہے۔ آنے والے کل کے حوالے سے کہا جاتا ہے کہ آہستہ آہستہ دنیا میں جنگ متروک ہو جائے گی۔ یورپ اور دنیا کے کئی حصوں میں تو جنگ کا تصور ہی محال ہو گیا ہے لیکن غریب اور پسماندہ ممالک کے استحصال کیلئے اب بھی جنگ کا استعمال جاری ہے۔ مشرقِ وسطیٰ کی اندرونی لڑائیاں اور بیرونی مداخلت اس کا واضح ثبوت ہے۔ اب اندازہ لگایا جا رہا ہے پہلے انسانی نسل جنگوں، قحطوں اور بیماریوں کی وبائوں سے ماری جاتی تھی اب سماجی اور معاشی پیچیدگیوں نے جنگ میں انسانوں کے مارے جانے کا امکان تو کم کیا ہے لیکن انسان انہی پیچیدگیوں کا شکار ہو کر خودکشی کرنے پر آمادہ ہو جاتے ہیں اسی لئے ترقی یافتہ ممالک میں خودکشیوں کے رجحان میں اضافہ ہوا ہے۔ پہلے غذائی بحران اور قحط انسانوں کو بھوک اور پیاس سے ہلاک کر دیتے تھے اب دنیا میں قحط کا امکان ختم ہو گیا ہے مگر موٹاپے اور زیادہ کھانے سے اموات کا سلسلہ بڑھ گیا ہے۔

21ویں صدی سے پہلے مذہب نے ہمیشہ انسانی نسل کے اتحاد اور انتشار یعنی جنگوں دونوں میں اہم کردار ادا کیا۔ سائنس دانوں کا خیال ہے آنے والی دنیا اور انسان کی اگلی نسلوں میں مذہب کا رجحان کم نہیں بلکہ زیادہ ہو گا۔ بائیو ٹیکنالوجی، الگورتھم اور انفارمیشن ٹیکنالوجی سے مذہبی رجحانات میں شدت اور سختی آئے گی البتہ نئی ٹیکنالوجی کی مدد سے حقیقت اور افسانے کو الگ کرنا آسان ہو جائے گا۔

انسانی ڈی این اے پر تحقیق اور تاریخی حقائق کو سامنے رکھتے ہوئے یہ نتیجہ بھی نکالا گیا ہے کہ دنیا میں انقلاب یا تبدیلی اکثریت کی وجہ سے نہیں بلکہ تنظیم کی وجہ سے آتی ہے۔ معاشرے کا جو بھی طبقہ زیادہ منظم ہوتا ہے وہ غیرمنظم اکثریت کو محکوم رکھتا ہے۔ ڈاکٹر نوح حراری لکھتے ہیں کہ انقلاب روس کا باعث 180ملین غریب روسی کاشتکار نہیں تھے بلکہ زار روس کے خلاف انقلاب لانے والے صرف 23ہزار منظم کمیونسٹ تھے لیکن یہ کمیونسٹ اپنے مقصد کیلئے جڑے ہوئے تھے اور انتہائی منظم تھے جبکہ غیرمنظم عوام کوئی تبدیلی لا ہی نہیں سکتے۔ رومانیہ میں تبدیلی کی مثال دیتے ہوئے کہا گیا ہے کہ رومانیہ کے مطلق العنان آمر نکولس کیوسکو نے اپنے خلاف اٹھنے والی آوازوں کو دبانے کیلئے دارالحکومت میں بہت بڑی ریلی کا اہتمام کیا، لاکھوں لوگ جمع تھے، نکولس نے تقریر شروع کی تو مکمل خاموشی اور احترام کا منظر تھا مگر آٹھ منٹ کے بعد جونہی نکولس کیوسکو نے توقف کیا تو ایک شخص نے ہوٹنگ کی۔ دیکھتے ہی دیکھتے ہزاروں افراد نے یہی حرکت کی۔ آمر مطلق اور اس کی بیوی حواس باختہ ہو گئے اور یوں اقتدار اس کے ہاتھوں سے پھسل گیا لیکن نکولس کے جانے کے بعد بھی اقتدار عوام کے ہاتھوں میں نہ آیا بلکہ کمیونسٹ پارٹی ہی کے ایک سابق رکن نے خود کو جمہوریت پسند ظاہر کر کے اقتدار پر قبضہ کر لیا۔ آج بھی اسی ٹولے کی حکومت ہے اور وہ عوام جنہوں نے زندگیاں خطرے میں ڈال کر آمر کو للکارا تھا وہ چونکہ منظم نہیں تھے اس لئے ان کو نہ تو اقتدار ملا اور نہ ہی کوئی سہولت ملی بلکہ الٹا نئی جنتا نے سرکاری ادارے لوٹ کر ان پر بھی قبضہ کر لیا۔

انسانی تاریخ اور نظریہ ارتقاء کی روشنی میں یہ کہا جا سکتا ہے کہ کسی بھی ملک، نسل یا قبیلے میں تبدیلی منظم ہوئے بغیر نہیں آ سکتی۔ پاکستان نے بھی اگر تبدیل ہونا ہے تو معاشرے کے متحرک طبقات کو منظم ہونا ہو گا۔ حکومتی پارٹی پی ٹی آئی اپنے رینک اینڈ فائل کو منظم کر لے تو اس کی اصلاحات پر عمل ہو سکے گا وگرنہ انقلاب روس یا رومانیہ کے انقلاب کی طرح تبدیلی کا پھل عوام نہیں بلکہ اشرافیہ اور انتخابی گھوڑے کھائیں گے۔ سائنس دان اور تاریخ دان اس پر متفق ہیں لیکن کیا پاکستان میں ایسا ہو سکے گا؟

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

بے شک ہر نفس نے موت کا ذائقہ چکھنا ہے۔اس سے کسی کو مفر نہیں یہاں تک کہ اللہ کے نبی ،پیغمبر ،رسول بھی اس منزل سے گذرے یہ الگ بات کہ ہمیں ان کی زندگی اور موت کا شعور نہیں۔شعور تو ہمیں اپنی موت کا بھی نہیں بلکہ سچ پوچھیں تو جس طرح موت انسانی شعور کی قلعی کھولتی ہے اس پر ہم مٹی کے مادھوؤں پر اپنی حقیقت واضح ہو جاتی ہے لیکن ہم اپنی حقیقت کی طرف سے منہ موڑ لینے میں عافیت جانتے ہیں۔لیکن کیا اس طرح ہم خود کو چھپا نے میں کامیاب ہوتے ہیں ہرگز نہیں۔
محترمہ کلثوم نواز کی وفات حسرت آیات کا سانحہ اس لحاظ سے بہت دلگرفتہ رہا کہ موت نے ان کی آنکھیں موند کر بھی ان کی بے نوری سے بہت سے چہرے بے نقاب کردیئے۔پاکستان میں شاید یہ پہلا موقع ہے کہ کسی سیاسی جماعت کے کارکنوں اور حامیوں نے اپنے مخالف لیڈر کی بیوی کے انتقال پر بھی جس قسم کے منفی بلکہ گھٹیارد عمل کا مظاہرہ کیا اسے دیکھتے ہوئے کوئی بھی یہ رد عمل دینے والوں کو انسان تو کجا جانور بھی نہیں کہہ سکتا کہ ہم نے اکثر مشاہدہ کیا ہے کہ جانور بھی اپنے کسی ساتھی کے مرنے پر نم دیدہ ہوجاتے ہیں۔مگر یہ کیسے لوگ ہیں جنہوں نے محترمہ کلثوم نواز کی وفات پر اس قدر اخلاق باختگی کا مظاہرہ کیا جس پر انہیں کروڑوں بار لعین و مردود بھی گردانا جائے تو کم ہے۔
مجھے اپنے قائد محترم کی رفیقۂ حیات کی موت کے المیے سے زیادہ اس بات نے رنجیدہ کیا کہ ایک قومی سطح کے سیاست دان نے اپنے کارکنوں کی اخلاقی حالت اتنی پست کردی ہے کہ ہر ذی شعور انسان ان کے ذہنی و اخلاقی افلاس پر ماتم کناں ہیں۔
پاکستانی سیاست نے بھٹو سے بڑھ کر مقبول لیڈر نہیں دیکھا کہ جس کی حمایت کرنے والوں سے کہیں زیادہ اس کے دشمنوں کی تعداد تھی۔اور ان میں سے کئی انتہا پسند اس کے خون کے پیاسے بھی تھے لیکن جب ایک فوجی آمر نے سچ مچ میں بھٹو کو جھوٹے مقدمۂ قتل میں اپنے زر خرید ججوں کے ذریعے پھانسی دی تو چار اپریل کی تاریخ پاکستانی کیلنڈر میں ہمیشہ کے لئے یوم سیاہ کے طور پر لکھ دی گئی۔بھٹو کی پھانسی کا مطالبہ کرنے والے بھی آبدیدہ ہوگئے اور انہوں نے بھی اس سانحے پر رنج و الم کا اظہار کیا۔
بھٹو کے بعد دوسرے فوجی آمر نے سازش کے ذریعے بھٹو کی بیٹی کو شہید کروایا تو پورا ملک سناٹے میں آگیا۔ سکیورٹی خدشات کے باوجود میاں نواز شریف محترمہ کی شہادت کی خبر سنتے ہی اس حالت میں ہسپتال پہنچے کہ ان کی آنکھوں سے آنسوؤں کی جھڑیاں رواں تھیں۔ اس دن ملک بھر میں صف ماتم بچھی تھی اور ہر آنکھ اشک بار تھی کہ محترمہ کی المناک موت کے سانحے نے انسانوں کو دہلا دیا تھا۔
اپنے پرائے سبھی محترمہ کی شہادت کے غم میں دلگرفتہ تھے۔
مگر افسوس آج سیاست کی ابجد سے ناواقف شخص نے اپنے مہربانوں کے ایما پر شریف خاندان کے خلاف جس نفرت کو ہوا دی اس کی زہرناکی نے نوجوان ذہنوں کو اس قدر غلیظ اور متعفن کردیا ہے کہ اب وہ مجسم بد اخلاق بنے انسانیت کے نام پربد نما دھبے بن چکے ہیں۔ ان مکروہ اذہان نے پہلے تو محترمہ کلثوم نواز کی کینسر جیسی مہلک بیماری کو بھی اس طرح مذاق بنایا کہ اعتزاز احسن جیسا مدبر سیاست دان بھی بہک گیا اور اب محترمہ کلثوم کی وفات پر اظہار ندامت کررہا ہے۔مگر افسوس کہ پی ٹی آئی کے لوگوں کو شرم نام کی چیز سے واسطہ ہی نہیں رہا۔ ان لوگوں نے سوشل میڈیا پر محترمہ کلثوم نواز کی وفات پر جس قدر گھٹیا اور رذیل قسم کے ریمارکس لکھے اس پر انہیں انسان کہتے ہوئے بھی شرم آتی ہے۔
ایک ایسی خاتون جس نے ایسے معزز گھرانے میں آنکھ کھولی جس کے افراد فن پہلوانی میں عالمی شہرت یافتہ ہونے کی وجہ سے پاکستان کے ماتھے کا جھومر تھے جس کے نانا گاما پہلوان کو رستم پاکستان کا اعزاز ملا تھا۔جس کے بھولو پہلوان جیسے ماموں وطن عزیز کے وقار کی علامت تھے ۔ جس نے علم و ادب سے دل لگا کر پہلوانوں کے گھرانے میں علم کی شمع روشن کی اور جسے قدرت نے نواز شریف جیسے نابغۂ روزگار شخص کی رفیقۂ حیات بنایا تو اس نے نہ صرف اس کی اولاد کی بہترین خطوط پر تربیت کرکے مریم نواز کی شکل میں وطن عزیز کو مستقبل کی قیادت مہیا کی بلکہ جس نے اس ملک کے تین بار وزیر اعظم رہنے والے شخص کو اس ملک کی خدمت کے مشن میں قدم قدم پر وہ حوصلہ اور ہمت دی جس نے اسے دنیا کی تاریخ میں ایک ایسے جرأتمند سیاسی قائد کے طور پر متعارف کروایا جس نے تیسری دنیا کے ملک پاکستان کو عالمی برادری میں جوہری قوت کے طور پر نمایاں مقام پر لاکھڑا کیا۔
بے شک محترمہ کلثوم نواز، نواز شریف کی سیاسی قوت کا سرچشمہ تھیں۔ میاں صاحب ہر مشکل اور آڑے وقت میں ان سے مشاورت کرتے اور وہ انہیں مشکل کا جو حل تجویز کرتیں وہ بڑے بڑے طرم خان سیاست دانوں کے تجربات کے نچوڑ سے بڑھ کر تیر بہدف ثابت ہوتا۔محترمہ کلثوم نواز کی معاملہ فہمی ،سیاسی بصیرت اور حسن تدبر نے ہی مشرف جیسے طالع آزما کے گھٹیا حربوں کے مقابلے میں جس جرأتمندی سے اس کا مقابلہ کیا اسی چیز نے مرحومہ کو ملک کے صف اول کے سیاست دانوں کی قطار میں نمایاں مقام پر لاکھڑا کیا۔
محترمہ کلثوم نواز کی وفات سے نواز شریف کے دل پر سخت چوٹ لگی ہے مگر مرحومہ نے کینسر جیسے موذی مرض سے جنگ آزمائی کے دوران انہیں جس ہمت کے ساتھ ملک کی خاطر وطن واپسی پر آمادہ کیا اسی چیز نے اس اعصاب شکن صدمے میں بھی محترمہ مریم نواز اور میاں نواز شریف کو آہنی عزم سے سرشار کرکے حریفان کے مظالم کے خلاف سیسہ پلائی ہوئی دیوار کی طرح استادہ کردیا ہے۔بے شک کلثوم نوز جیسی بہادر خواتین کی رفاقت ہی میاں نواز شریف جیسے قومی لیڈر کی کامیابیوں کا محرک تھیں۔خدا انہیں جوار رحمت میں جگہ دے ۔آمین

(ایمرا نیوز)
ابتدائے زمانہ سے اسلامی معاشرے میں حکمرانی (گورننس) کی مختلف شکلیں دریافت ہوتی رہیں جو بنیادی (اور غالب طور پر بھی) حکمران پھر حکمرانی کے لئے اس کے حامی و تابعدار معاونین (حکمران طبقہ) کے اجتماعی مزاج اور رویے کی عکاس ہوتیں۔ اس کے گہرے اثرات معاشرے اور انسانی تہذیب کے ارتقاء پر پڑتے۔ قبائلی معاشروں سے لے کرعظیم سلطنتوں کے قیام تک اور محکوم و فاتح اقوام کی تشکیل تک پھرسفاک بادشاہتوں کے عیش و عشرت کے دلدادہ ادوار سے لے کر عوام دوست فلاحی اور منصف حکومتوں کے قیام اور سخت گیر آمریتوں سے مثالی جمہورتوں کے قیام تک۔ یہ حکمران اور ان کے معاون طبقے کا انداز حکمرانی ہی رہا، جس نےگورننس کے طرح طرح کے ماڈل تشکیل دیئے جو بعض اقوام کے لئے صدیوں تک ظلم و جور اور عوام الناس کے لئے اذیت کا باعث بنے بالآخر آج کے جدید دور میں آزادی و فلاح وبہبود کا بھی۔ لیکن آج کی بہترین گورننس کے مقابل، بدتر اور عوام دشمن گورننس کا سلسلہ آج تہذیب انسانی کے عروج پر بھی بدستور موجود ہے، بلکہ موجودہ دنیا میں بھی اکثریت بدتر حکمرانی کی ہے۔

پاکستان کا قیام، برصغیر کے کالونی بننے کے بعد معدود ےچند مسلم صاحبان نظر اور علم و دانش کی دوربینی اور عملی حقائق کےمحتاط اندازوں کا مرہون منت ہے۔ ان کے یہ ہی علمی انداز کے (Intellectual calculations) اور دور بینی (ویژن) جب ان کی ’’مسلسل سیاسی سوچ‘‘ میں ڈھلتے ڈھلتے، سیاسی پلیٹ فارم بن گئے، تو اس پر سے ہونے والے ابلاغ اور جدوجہد سے ہی پاکستان بننے کی ان ہونی، ہونی ہوگئی۔ ہوگئی تو ہماری باکمال سیاسی قیادت اور اس کے زور پر مطلوب بہترین گورننس کی ضمانت کا خلاء پاکستان بنتے ہی فقط 13ماہ میں ہوگیا۔ جس کے بعد کی تاریخ میں حکمرانوں پر معاون طبقہ حاوی ہوتا گیا، پھر آنے والے ستر سالوں میں پاکستانی گورننس گھمبیر اور بعض حوالوں سے بہت پیچیدہ اور تباہ کن بھی ہوتی گئی جس کا شاخسانہ قوم آج بھی ملک میں حقیقی جمہوریت اور گڈگورننس کے ابتدائی امکانات پیدا ہونے پر بھگت رہی ہے، بلکہ برسراقتدار آنے والی تبدیلی کی علمبردار حکومت عمران حکومت، اسٹیٹس کو کے چھوڑے اور غالب سرکاری ڈھانچے کے شدید دبائو میں معلوم دے رہی ہے۔

گزشتہ روز اسلام آباد، میانوالی ریل سروس کاافتتاح کرتے ہوئے وزیر اعظم عمران خان نے ملک کی گھمبیر اقتصادی صورتحال کا ذکر کرتے ہوئے کہا کہ ’’کرپشن سب سے بڑا مسئلہ ہے، احتساب کے بغیر ملک نہیں بچ سکتا۔ گورننس ٹھیک کرلی تو 2سال میں روزگار اور قرض کی ادائیگی کا مسئلہ حل ہو جائے گا، بیوروکریسی کو سیاست سے پاک کریں گے۔‘‘

جناب وزیر اعظم! بلاشبہ مالی اور کتنے ہی اور حوالوں سے آپ کی دیانت عوام الناس کی نظر میں جتنی مسلمہ ہے اور ملک میں آئین و قانون کی بالادستی کے ساتھ گڈ گورننس قائم کرنے کا آپ کا عزم مطلوب درجے پر اور مبنی براخلاص ہے، لیکن، اس کی بنیاد پر مطلوب ڈلیور کرنے کے لئے ملکی اقتصادی تشویشناک صورتحال آپ کے حکومت سنبھالتے ہی اتنی ہی بڑی رکاوٹ بن گئی ہے۔ گویا اسٹیٹس کو آپ کی جدوجہد سے ضرب کاری کھانے سے پہلے آپ کی گورننس کو کٹھن بنانے کا انتظام کر چکا تھا۔ اس کے باوجود، آپ نے اقتدار ایک آئیڈیل صورتحال میں سنبھالا ہے، ایسے کہ ملک میں عین آئین و قانون کے مطابق، آئینی اداروں کی جانب سے آپ کے اقتدار سنبھالنے سے قبل ایک منتخب اور آئینی حکومت کی موجودگی میں تباہ کن کرپشن کے خلاف احتساب کا عمل شروع ہو کر ابتدائی نتائج بھی دے چکا۔ پاکستان میں احتساب کی ضرورت کو کرپٹ ترین حکمرانوں نے بھی تسلیم کرلیا، لیکن یہ دیانت دار حکمرانوں کے ہاتھوں ہونا بھی ممکن نہ تھا، لیکن یہ ہوگیا۔ یہ فقط پاکستان کے اسلامی جمہوریہ کے تشخص کے تحفظ کے لئے نکلے قدرتی راستے سے ممکن ہوا۔ اب وہ رہے تو اسی سے پاکستان کو بحران سے نکلنا ہے۔

لیکن گڈگورننس کو آپ کی جانب سے مشروط کرنا کہ ’’گورننس ٹھیک کرلی تو‘‘ تو دو سال میں بےروزگاری اور قرض کی ادائیگی کا مسئلہ حل ہو جائےگا۔ اس فقرے کا ’’تو‘‘ آپ کے معمول کے بلا کے اعتماد میں کمی کا اشارہ معلوم دیتا ہے۔ بلاشبہ پاکستان کی گورننس ایسی ہی پیچیدہ بنا دی گئی اور حد درجہ بے لچک، لیکن کسی صورت آپ کا عزم بھی لچکدار نہیں ہونا چاہیے۔ لازم ہے کہ آپ ہر حالت میں اس کمٹمنٹ پر قائم رہیںکہ گورننس کو ہر حالت میں بہتر بنائیں گے۔جو آپ کو حکومت میں آکر اب مشکل تر معلوم دے رہا ہے تبھی تو ’’گورننس ٹھیک ہوگئی تو‘‘ آپ کے منہ سے نکلا ’’تو‘‘ کی تو کوئی گنجائش ہی نہیں، یہ تو اولین ہدف کہ ہر حالت میںگورننس کو مطلوب درجے پر بہتر بنانا ہے۔ سب کچھ اس کے ساتھ جڑا ہوا ہے۔

یہ بھی درست ہے کہ آپ کا آغاز اس لحاظ سے کافی حوصلہ افزا ہے اور 20روز تک کی کارکردگی کی گورننس کا جائزہ گزشتہ ’’آئین نو‘‘ میں لیا گیا ہے کہ کس طرح کابینہ سرگرم ہوگئی، وزارت خارجہ بحال ہو کر سرگرم ہورہی ہے۔ اہم ترین موضوعات ایڈریس کئے جا رہے۔ ڈیمز کی تعمیر ترجیحی ایجنڈا بن گیا اور انتہائی اطمینان بخش پاکستان کو پوری دنیا میں رسوا کرنے والا سول، ملٹری مصنوعی طور پر پیدا کیا گیا خلاء اور اس کا پروپیگنڈہ دنوں میں ختم ہوگیا ہے۔ جس سے یکدم ملک میں بالائی گورننس کی سطح پر استحکام پیدا ہونے کا واضح پیغام خود پاکستانی قوم اور پاکستان سے تعلق رکھنے والے ممالک کو گیا ہے۔

وزیراعظم عمران خان کو اگر گورننس کے مسائل کو سمجھنے اور اس میں رکاوٹوں کا احساس پیدا ہوا ہے تو ان کایہ دھڑکا کوئی غلط نہیں، لیکن اس کا تو واضح حل ایک مکمل اہل معاون ٹیم کی تشکیل میں کامیابی ہے۔ اس کی پہلی ضرورت یہ ہے کہ سیاسی مصلحتوں اور ضرورتوں کے مطابق آپ کی اپنی کابینہ، صوبائی وزراء اعلیٰ اور کابینہ تو تشکیل پا گئیں ہیں، جن کی مجموعی اہلیت حالات کی سنگینی اور اس کے لئے مطلوب گورننس کے تقاضوں کے مطابق تو نہیں اوپر سے جو مشاورتیں حاصل کی جاری ہیں وہ بھی یا تو سیاسی نوعیت کی ہیں یایہ اور طرح کی مطلوب ضرورت کو پورا نہیں کررہی ہیں۔ کسی وزارت یا محکمے کے لئے مشاورت کسی طور پر سیاسی نہیں ٹیکنیکل اور پروفیشنل ہونی چاہیے، جس کے ٹی او آر میں اولین متعلقہ وزارت یا محکمے کی خدمات سے متعلق مکمل تعلیم، تجربہ اور ویژن ہے، جسے کوئی بہت اہل کمیٹی کسی مخصوص بنیاد (ٹی اور آرز) پر ہی ٹیسٹ کر سکے۔ وگرنہ جس طور پی ٹی وی کا گورننگ بورڈ بنایاگیا ہے جس طرح وزیراعظم ہائوس اورگورنر ہائوسز کے متبادل کے فیصلے ہوتے ہیں، ایسے ہی فیصلے اور ایسا ہی سرکاری ابلاغ پر ہوتا جائے گا جو اسٹیٹس کو کے نظام کا متبادل استعمال نہیں بلکہ چہروں کی تبدیلی کے ساتھ بیڈ گورننس کی حامل حکومتوں کی ہی پریکٹس ہوگی۔ وماعلینا الالبلاغ۔
(بشکریہ جنگ لاہور)

(ایمرا نیوز)
کلثوم، کلثوم… (میں ہوں تمہارا) ’’باؤجی‘‘، میاں نواز شریف نے آخری بار عالمِ بیہوشی میں اپنی شریکِ حیات کو پکارا، پل بھر کو اُس نے آنکھیں کھولیں بھی۔ شاید الوداع کہنے کو، مگر کچھ کہہ نہ پائیں۔ اور یوں سابق وزیراعظم کلثوم بی بی کی لاڈلی مریم کو ساتھ لیے اڈیالہ جیل جانے کو لاہور کے لیے روانہ ہو گئے۔ اس منظر کی ویڈیو سوشل میڈیا پہ اب ایسی وائرل ہوئی کہ ملک کے طول و عرض میں غم و غصے کی لہر دوڑ گئی، اور لاہور کی بیٹی کو آخری سلامِ عقیدت پیش کرنے کو سارا شہر اُمڈ آیا۔ سوچتا ہوں اگر یہ جنازہ 25؍ جولائی سے پہلے لاہور آتا تو جانے کیا سیاسی طوفان بپا ہو جاتا۔ زندگی کے لمبے ساتھ کے یوں ٹوٹنے پر جانے میاں نواز شریف اور کلثوم نواز کے دل پہ کیا گزری ہوگی۔ تصور ممکن نہیں۔ ناموافق سیاست کے ظالم تقاضے، انسان کے انتہائی جذباتی رشتوں پہ کیسے حاوی ہو جاتے ہیں اور پھر ساری زندگی کسک بن کر کچوکے مارتے رہتے ہیں۔ مجھے یاد ہے جب کسی انقلابی تقاضے کی پیروی میں میں اپنی بہت ہی پیاری ہستی دادی امراؤ کو بسترِ مرگ پہ چھوڑ کر چلا گیا تھا اور وہ میری بے وفائی پہ آنسو بہاتی رخصت ہو گئی تھیں۔ انقلابی تقاضا تو آج تک پورا نہیں ہوا، لیکن اپنی پیاری اماں سے کی گئی بے رُخی پہ میں آج تک خود کو معاف نہیں کر سکا۔ اپنے کسی بھی پیارے کی زندگی کے آخری ایام میں فرائضِ اُلفت و عیادت کی قربانی سے بڑی قربانی کوئی کیا ہو سکتی ہے۔ ہارلے اسٹریٹ کے آئی سی یو وارڈ میں کئی ماہ سے موت سے لڑتی کلثوم آنکھیں کھولتی بھی کیوں، کہ اُس کے ’’باؤ جی‘‘ کو تاریخ کا بلاوا آ گیا تھا۔ لیکن تاریخ بھی غُچہ دے گئی اور لاہور ایئرپورٹ کے گرد و نواح میں متوالوں کے بے ہنگم نعرے صدا بہ صحرا ہوئے۔ اور اگر اسلام آباد ہائیکورٹ نے یہ مان کر کہ ’’سزا مفروضوں پہ دی گئی‘‘، باپ بیٹی کو ضمانت پہ رہا کر دیا اور بعد ازاں نواز شریف اور مریم کی اپیل بھی قبول کر لی تو انصاف کے ہاتھوں انصاف کے ایوانوں اور ووٹ کی تذلیل کا کیا بنے گا؟
ایک صنعتکار کا چھیل چھبیلا بیٹا جو اپنی اسپورٹس کار میں بیٹھا گلوکار محمد رفیع کے گیت گاتا پھرتا تھا، اسے بھائی بھی تو رستم زماں گاما پہلوان کی نواسی جو مصری شاہ کے ایک مشہور ڈاکٹر کی خوبرو اور سخن ور بیٹی جو ٹھیٹھ کشمیری پنجابن ہونے کے باوجود اُردو ادب، شعر و شاعری اور نقد و نظر کی شوقین تھی۔ پھر دو دل ایسے ملے کہ کبھی جدا نہ ہوئے۔ کلثوم کو ’’باؤ جی‘‘ کیا مل گیا، ساری کائنات مل گئی۔ اور ’’باؤ جی‘‘ کو کیا سوجھی کہ اچھا بھلا کاروباری آدمی سیاست میں پڑ گیا۔ بھٹو صاحب کے ہاتھوں اپنی اتفاق فاؤنڈریز گنوا کر، میاں شریف کا خاندان بہت زخم خوردہ تھا۔ میاں شریف دبئی چلے گئے اور بے نامی کاروبار میں لگ گئے کہ باہر کاروبار کرنا سزا کا موجب تھا اور ویسے بھی دبئی میں ابھی خاک اُڑتی تھی۔ جب جنرل ضیا الحق کا مارشل لا لگا اور بھٹو صاحب کو پھانسی دی گئی تو اُس وقت بھی ایک بیوی اور ایک بیٹی میدان میں اُتری تھیں، جنہوں نے جمہوری مزاحمت کی بے مثال تاریخ رقم کی تھی۔ مجھے شریف خاندان کا سیاسی ماضی کبھی بھی بھلا نہیں لگا کہ یہ جنرل ضیا الحق کے غیرسیاسی انتخابات کے چھکڑے پہ سوار ہو کر جمہوری لہر کے خلاف کھڑے ہو گئے تھے۔ 1990ء میں محترمہ بے نظیر بھٹو کی حکومت کو ختم کروانے اور جنرل اسلم بیگ اور جنرل درّانی کے گھڑے ہوئے اسلامی جمہوری اتحاد میں شامل ہو کر میاں نواز شریف پہلی بار وزیراعظم تو بن گئے لیکن اُن شرائط پہ پورا نہ اُترے جن کا تقاضا تھا۔ پھر کیا تھا وزیراعظم نے وزیراعظم بننے کی کوشش کی تو جھگڑا بیوروکریٹ اعظم غلام اسحاق خان سے ہو گیا۔ یہ وہ مرحلہ تھا جب نواز شریف نے اپنے تئیں ایک عوامی لیڈر بننے کا آغاز اپنی مشہور تقریر سے کرتے ہوئے وزیراعظم ہاؤس کو خیرباد کہا۔ اور وہ عوام کے ہو گئے۔ لیکن عوام کا ہونا گھاٹے کا سودا ہے۔ پنجابی بورژوازی کے نمائندے نواز شریف نے طے کیا کہ وہ محض ایک طبقہ نہیں (Class by itself) ایک آزاد بورژوا طبقے کے لیے کھڑا ہوگا ۔ جدید نوآبادیاتی ڈھانچے پہ قائم پنجابی بالادستی کے لیے نواز شریف ایک بڑا دردِ سر ثابت ہوا۔ اگر بے نظیر بھٹو اور نواز شریف باہم دست و گریباں نہ ہوتے تو پاکستان کی جمہوری کایا پلٹ کب کی ہو چکی ہوتی۔

یہ سب منظر خاتونِ خانہ کلثوم نہایت نزدیک سے دیکھا کیے۔ نواز شریف کی پہلی برطرفی انھیں یہ سکھلا گئی کہ بیساکھیوں کے سہارے اقتدارِ اعلیٰ ملنے والا نہیں۔ اصل امتحان اُس وقت شروع ہوا جب اپنی دوسری حکومت میں نواز شریف کو کمانڈو چیف جنرل مشرف سے واسطہ پڑا۔ جب وزیراعظم واجپائی کی لاہور یاترا ہو رہی تھی تو کارگل آپریشن شروع ہو چکا تھا۔ اور یہیں سے دوسری بار منتخب وزیراعظم کی ابتلا کا دور اور کلثوم نواز کی سیاست کا آغاز ہوا۔ وزیراعظم تو نئے آرمی چیف کو تمغے لگاتے گرفتار ہو گئے اور کلثوم نواز نے خانہ داری سے چھٹی لی اور اپنے دوپٹے کو پرچم میں بدل دیا۔ وہ تنِ تنہا میدان میں اُتریں کہ یا تو مرد لوگ گرفتار تھے یا پھر گھروں میں دُبک کر بیٹھ رہے تھے۔ مجھے کلثوم بی بی کی سیاسی قلب ماہیت کا اندازہ تب ہوا جب ہمیں دی نیوز کے دفتر میں یہ خبر ملی کی اُن کی گاڑی کو کرین سے اُٹھا کر کہیں جی اور آر میں ہوا میں معلق کر دیا گیا تھا اور گاما پہلوان کی نواسی نے گھنٹوں پولیس کو ناکوں چنے چبوا دیے۔ بس پھر کیا تھا، اب ہر طرف کلثوم نواز بھاگتی دوڑتی نظر آئیں۔ اور وہ تین برس تک مسلم لیگ کی بلاشرکتِ غیرے قوتِ متحرکہ بنی رہیں۔ اُن کا ذاتی دُکھ، جمہوری مزاحمت میں ڈھل گیا۔ قید میں ’’باؤجی‘‘ کو پتہ چلا کہ اُن کی کلثوم کے کون کون سے گُن تھے جو انہیں جیل جا کر معلوم پڑے۔ اُنہیں اپنے ’’باؤ جی‘‘ کے لیے اُن کی تیسری بار وزارتِ عظمیٰ سے برطرفی کے بعد پھر سے میدان میں اُترنا تھا جب اُنہیں نواز شریف کی خالی نشست پہ میدان میں اُتارا گیا۔ لیکن اب وہ جسمانی طور پر بے بس ہو چکی تھیں اور اُنہیں پرچم اپنی ہونہار اور بہادر بیٹی کے حوالے کرنا پڑا۔ جس طرح کلثوم نواز نے 1999-2002ء کے سالوں میں سب کو حیران کر دیا تھا، اُسی طرح مریم نواز نے بھی اپنی صلاحیتوں سے سب کو حیران کر دیا۔ اگر پہلے ماں اپنے خاوند کے لیے کھڑی ہوئی تھی تو اب بیٹی باپ کے ساتھ جیل کی عقوبتیں برداشت کر رہی ہے۔ جانے ہم مرد لوگ اپنی گھریلو عورتوں کو اتنا کمزور کیوں سمجھتے ہیں؟ ہم مردوں سے کیے گئے ظلم کے خلاف صبح شام عورتوں بچوں کے مظاہرے دیکھتے ہیں، پھر بھی اُنہیں کمزور اور آدھا سمجھتے ہیں۔ نواز شریف کے تمام امتحانوں میں کلثوم نواز سرخرو ہوئی تھیں۔ اور اُنہوں نے بہتر جانا تھا کہ لڑکوں کو سیاست سے باہر رکھا جائے، جس طرح میاں شریف نے نواز شریف کو کاروبار سے علیحدہ کر دیا تھا۔ لیکن پھر بھی پانامہ نے پیچھا نہ چھوڑا۔ آج جب بی بی کلثوم کے قُل پڑھے جا رہے ہوں گے تو میں اُن کی لحد پر ایک پھول لے کر جاؤں گا اور اُن سے کہوں گا کہ کلثوم، کلثوم… فکر مت کرو، تمہارے باؤ جی کے ساتھ اب تمہاری جگہ تمہاری اپنی مریم کھڑی ہے۔ اور آواز آئے گی کہ ’’باؤ جی، باؤ جی! میں ہوں آپ کی کلثوم اور میری بیٹی کا خیال رکھنا!‘‘ انا للہ و انا الیہ راجعون!
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

(ایمرا نیوز)
سقراط نے جب زہر کا پیالہ پیا تو ایتھنز کے حکمرانوں نے سکھ کا سانس لیا کہ اُن کے نوجوانوں کو گمراہ کرنے والا جہنم رسید ہوا، یونان کی اشرافیہ جیت گئی، سقراط کی دانش ہار گئی۔وقت گزر گیا۔

اسکاٹ لینڈ کی جنگ آزادی لڑنے والے دلاور ولیم والس کو جب انگلینڈ کے بادشاہ ایڈورڈ اوّل نے گرفتار کیا تو اُس پر غداری کا مقدمہ قائم کیا، اسے برہنہ کرکے گھوڑوں کے سموں کے ساتھ باندھ کر لندن کی گلیوں میں گھسیٹا گیا اور پھر ناقابل بیان تشدد کے بعد اُسے پھانسی دے کر لاش کے ٹکڑے ٹکڑے کر دیئے گئے۔ اُس وقت کا بادشاہ جیت گیا، ولیم والس ہار گیا۔ وقت گزر گیا۔

گلیلیو نے ثابت کیا کہ زمین اور دیگر سیارے سورج کے گرد گھومتے ہیں تو یہ کیتھولک عقائد کی خلاف ورزی تھی، چرچ نے گلیلیو پر کفر کا فتویٰ لگایا اور اسے غیرمعینہ مدت تک کے لئے قید کی سزا سنا دی، یہ سزا 1633میں سنائی گئی، گلیلیو اپنے گھر میں ہی قید رہا اور 1642میں وہیں اُس کی وفات ہوئی، پادری جیت گئے سائنس ہار گئی۔ وقت گزر گیا۔

جیو رڈانو برونو پر بھی چرچ کے عقائد سے انحراف کرنے کا مقدمہ بنا یاگیا، برونو نے اپنے دفاع میں کہا کہ اس کی تحقیق عیسائیت کے عقیدہ خدا اور اُس کی تخلیق سے متصادم نہیں مگر اُس کی بات نہیں سنی گئی اور اسے اپنے نظریات سے مکمل طور پر تائب ہونے کے لئے کہا گیا، برونو نے انکار کر دیا، پوپ نے برونو کو کافر قرار دے دیا، 8فروری1600کو جب اسے فیصلہ پڑھ کر سنایا گیا تو برونو نے تاریخی جملہ کہا ’’میں یہ فیصلہ سنتے ہوئے اتنا خوفزدہ نہیں ہوں جتنا تم یہ فیصلہ سناتے ہوئے خوفزدہ ہو۔‘‘برونو کی زبان کاٹ دی گئی اور اسے زندہ جلا دیا گیا۔ پوپ جیت گیا، برونو ہار گیا۔ وقت گزر گیا۔

حجاج بن یوسف جب خانہ کعبہ پر آگ کے گولے پھینک رہا تھا تو اُس وقت ابن زبیرؓ نے جوانمردی کی تاریخ رقم کی، انہیں مسلسل ہتھیار پھینکنے کے پیغامات موصول ہوئے مگر آپ ؓ نے انکار کردیا، اپنی والدہ حضرت اسماؓ سے مشورہ کیا، انہوں نے کہا کہ اہل حق اس بات کی فکر نہیں کیا کرتے کہ ان کے پاس کتنے مددگار اور ساتھی ہیں، جاؤ تنہا لڑو اور اطاعت کا تصور بھی ذہن میں نہ لانا، ابن زبیر ؓ نے سفاک حجاج بن یوسف کا مقابلہ کیا اور شہادت نوش فرمائی، حجاج نے آپؓ کا سر کاٹ کر خلیفہ عبد المالک کو بھجوا دیا اور لاش لٹکا دی، خود حضرت اسماؓ کے پاس پہنچا اور کہا تم نے بیٹے کا انجام دیکھ لیا، آپؓ نے جواب دیا ہاں تو نے اس کی دنیا خراب کر دی اور اُس نے تیری عقبیٰ بگاڑ دی۔ حجاج جیت گیا، ابن زبیر ؓ ہار گئے۔ وقت گزر گیا۔

ابو جعفر منصور نے کئی مرتبہ امام ابو حنیفہ ؒکو قاضی القضاۃ بننے کی پیشکش کی مگر آپ نے ہر مرتبہ انکار کیا، ایک موقع پر دونوں کے درمیان تلخی اس قدر بڑھ گئی کہ منصور کھلم کھلا ظلم کرنے پر اتر آیا، اُس نے انہیں بغداد میں دیواریں بنانے کے کام کی نگرانی اور اینٹیں گننے پر مامور کر دیا، مقصد اُن کی ہتک کرنا تھا، بعد ازاں منصور نے امام ابوحنیفہ کو کوڑے مارے اور اذیت ناک قید میں رکھا، بالآخر قید میں ہی انہیں زہر دے کر مروا دیا گیا، سجدے کی حالت میں آپ کا انتقال ہوا، نماز جنازہ میں مجمع کا حال یہ تھا کہ پچاس ہزار لوگ امڈ آئے، چھ مرتبہ نماز جنازہ پڑھی گئی۔ منصور جیت گیا، امام ابو حنیفہ ہار گئے۔ وقت گزر گیا۔

تاریخ میں ہار جیت کا فیصلہ طاقت کی بنیاد پر نہیں ہوتا، یونان کی اشرافیہ سقراط سے زیادہ طاقتور تھی مگر تاریخ نے ثابت کیا کہ سقراط کا سچ زیادہ طاقتور تھا۔ ولیم والس کی دردناک موت کے بعد اس کا نام لیوا بھی نہیں ہونا چاہئے تھا مگر آج ابیرڈین سے لے کر ایڈنبرا تک ولیم والس کے مجسمے اور یادگاریں ہیں، تاریخ میں ولیم والس امر ہو چکا ہے۔ گلیلیو پر کفر کے فتوے لگانے والی چرچ اپنے تمام فتوے واپس لے چکی ہے، رومن کیتھولک چرچ نے ساڑھے تین سو سال بعد تسلیم کیا کہ گلیلیو درست تھا اور اُس وقت کے پادری غلط۔ برونو کو زندہ جلانے والے بھی آج یہ بات مانتے ہیں کہ برونو کا علم اور نظریہ درست تھا اور اسے اذیت ناک موت دینے والے تاریخ کے غلط دوراہے پر کھڑے تھے۔ تاریخ میں حجاج بن یوسف کو آج ایک ظالم اور جابر حکمران کے طور پر یاد کیا جاتا ہے جس کی گردن پر ہزاروں بے گناہ مسلمانوں کا خون ہے جبکہ حضرت عبداللہ ابن زبیرؓ شجاعت اور دلیری کا استعارہ ہیں، حجاج کو شکست ہو چکی ہے ابن زبیرؓ فاتح ہیں۔ جس ابو جعفر منصور نے امام ابوحنیفہ کو قید میں زہر دے کر مروایا اس کے مرنے کے بعد ایک جیسی سو قبریں کھو دی گئیں اور کسی ایک قبر میں اسے دفن کر دیا گیا تاکہ لوگوں کو یہ پتہ نہ چل سکے کہ وہ کس قبر میں دفن ہے، یہ اہتمام اس خوف کی وجہ سے کیا گیا کہ کہیں لوگ اُس کی قبر کی بے حرمتی نہ کریں، گویا تاریخ کا فیصلہ بہت جلد آگیا۔

آج سے ایک سو سال بعد ہم میں سے کوئی بھی زندہ نہیں رہے گا، تاریخ ہمیں روندتی ہوئی آگے نکل جائے، آج یہ فیصلہ کرنا مشکل ہے کہ ہم میں سے کون تاریخ کی صحیح سمت میں کھڑا ہے اور کون تاریخ کے غلط دوراہے پر ہے، کون حق کا ساتھی ہے اور کون باطل کے ساتھ کندھا ملائے ہوئے ہے، کون سچائی کا علمبردار ہے اور کون جھوٹ کی ترویج کر رہا ہے، کون دیانت دار ہے اور کون بے ایمان، کون ظالم ہے اور کون مظلوم۔ ہم میں سے ہر کوئی خود کو حق سچ کا راہی کہتا ہے مگر ہم سب جانتے ہیں کہ یہ بات دنیا کا سب سے بڑا جھوٹ ہے، کیونکہ اگر ہر شخص نے حق کا علم تھام لیا ہے تو پھر اس دھرتی سے ظلم اور ناانصافی کو اپنے آپ ختم ہو جانا چاہئے لیکن سب اچھی طرح جانتے ہیں کہ ہم اُس منزل سے کہیں دور بھٹک رہے ہیں۔ آج سے سو برس بعد البتہ جب کوئی مورخ ہمارا احوال لکھے گا تو وہ ایک ہی کسوٹی پر ہم سب کو پرکھے گا، مگر افسوس کہ اُس وقت تاریخ کا بے رحم فیصلہ سننے کے لئے ہم میں سے کوئی بھی زندہ نہیں ہوگا۔ سو آج ہم جس دور سے گزر رہے ہیں کیوں نہ خود کو ہم ایک بے رحم کسوٹی پر پرکھ لیں اور دیکھ لیں کہ کہیں ہم یونانی اشرافیہ کے ساتھ تو نہیں کھڑے جنہوں نے سقراط کو زہر کا پیالہ تھما دیا تھا، کہیں ہم برونو کو زندہ جلانے والے پادریوں کے ساتھ تو نہیں کھڑے، کہیں ہم حجاج کی طر ح ظالموں کے ساتھ تو نہیں کھڑے، کہیں ہم امام ابوحنیفہ اور امام مالک پر کوڑے برسانے والوں کے ساتھ تو نہیں کھڑے، کہیں ہم ابن رشد کے خلاف فتویٰ دینے والوں کے ساتھ تو نہیں کھڑے….. کہیں ہم تاریخ کی غلط سمت میں تو نہیں کھڑے؟ اس سوال کا جواب تلاش کرکے خود کو غلطی پر تسلیم کرنا بڑے ظرف کا کام ہے جس کی آج کل شدید کمی ہے۔ وقت تو گزر ہی جاتا ہے، دیکھنا صرف یہ ہوتا ہے کہ کسی باضمیر نے وہ وقت کیسے گزارا!
(کالم نگار کے نام کیساتھ ایس ایم ایس اور واٹس ایپ رائےدیں00923004647998)
(بشکریہ جنگ لاہور)

(ایمرا نیوز)
میرے نزدیک کراچی، جوخدا جانے کتنے کروڑ کی آبادی کا شہر ہے، نہ صرف ناقابل حکمرانی ہے بلکہ ناقابل انتظام بھی ہے جبکہ دوسروں کا خیال ہے کہ اس کا انتظام کیاجاسکتا ہے۔ میں نے دیکھا ہے کہ کس طرح اس شہر کو سیاسی اور غیر سیاسی کھلاڑیوں کی جانب سے لوٹا اور برباد کیا گیا۔نومنتخب وزیراعظم عمران خان جو آج کراچی کے دورے پر شہر کیلئےاپنا ایک منصوبہ لے کر پہنچ رہے ہیں، اس شہر کیلئے اجنبی نہیں، اس پر عمل درآمد اس وقت تک ممکن نہ ہوگا جب تک کراچی میں شہری ایمرجنسی نافذ نہ کردی جائے۔ یہ سچ ہے کہ کراچی کی ترقی کے بغیر پاکستان ترقی نہیں کرسکتا اور کراچی اس وقت تک ترقی نہیں کرسکتا جب تک گند صاف نہ ہوجائے۔ وزیراعظم ایسا کرسکتے ہیں، یہ ایک بڑا سوالیہ نشان ہے لیکن شاید وہ ہی ایسا کرسکتے ہیں اگر کرنے کی پختہ ارادہ ہو۔ گذشتہ چالیس سالوں میں اگر کسی چیز نے شہر میں ترقی کی ہے تو وہ ایک مافیا کے بعد دوسری مافیا ہے۔ یہ مافیا ایک دوسرے کا خیال رکھتی ہیں اور وزیراعظم عمران خان کو اس عنصر کو اس وقت ذہن میں رکھنا چاہیےجب انہیں ان ہی پرانے
افسران کی طرف سے بریفنگ دی جارہی ہو۔ ائرپورٹ سے اسٹیٹ گیسٹ ہاوس آنے کیلئے انہیں ہیلی کاپٹر نہیں بلکہ شارع فیصل استعمال کرنا چاہیے تاکہ انہیں پتہ چلا کہ کس طرح قیمتی زمین پر تجاوزات قائم ہیں اور کس طرح یہ قیمتی زمینیں استعمال کی جارہی ہے۔ سڑک کے ایک طرف کے ایم سی ہے جبکہ دوسری جانب کنٹونمنٹ بورڈ۔ یہ وزیراعظم عمران خان کے لئے موقع ہے کہ وہ اس شہر کا قرض ادا کریں جس نے ان کی پارٹی تحریک انصاف کو 14نشستیں جیت کردیں اور جن نشستوں نے انکے بطور وزیراعظم انتخاب میں فیصلہ کن کردار ادا کیا۔ عمران خان کیلئے یہ بھی ضروری ہے کہ وہ سابقہ میئر ز اور ایڈمنسٹریٹرز جیسے ڈاکٹر فاروق ستار، مصطفیٰ کمال، نعمت اللہ، فہیم زمان، ڈاکٹر عارف حسن جیسے لوگوں سے ملیں اور شہر کے متعلق ان کے خیالات معلوم کریں۔ وہ کراچی سے متعلق اپنے منصوبے کے حوالے سے پہلے ہی مثبت پیغام دے چکے ہیں اور اب انہیں جس چیز کی ضرورت ہے وہ لوگ ہیںجو ان کے منصوبوں کو عملی جامع پہنا سکیںکیونکہ ایسے لوگ پہلے ہی موجود ہیں جن کی نظریں کام سے زیادہ پیسے پر مرکوز ہوتی ہیں۔ کراچی کو میٹروپولیٹن شہر قرار دینے سے یہ میٹروپولیٹن شہر نہیں بن جائیگا، اسے ایک چھتری تلے آناہوگا اور میئر کا براہ راست انتخاب کوئی برا خیال نہیں۔ لیکن اس سے پہلے ہمیں اس شہر کی صحیح صحیح آبادی معلوم کرنے کی ضرورت ہے ۔ 2017میں ہونیوالی مردم شماری نے یا تو کراچی یا سندھ کے ساتھ انصاف نہیں برتا۔ اس معاملے کو مشترکہ مفادات کی کونسل میں اٹھایا جاسکتا ہے۔ لہذا میں کہتا ہوں کہ وزیراعظم کو کراچی میں فوری طور پر شہری ایمرجنسی کا اعلان کردینا چاہیے اور سول سوسائٹی اور لائق افراد پر مشتمل بورڈ تشکیل دینا چاہیے جو سندھ حکومت کی مشاورت سے منصوبوں کی نگرانی کرے۔ اگر ارادہ پختہ ہو تو راہ نکل ہی آتی ہےلیکن اس مرتبہ سرخ فیتے کا شکار نہیں ہونا چاہیے۔ وزیر اعلی سندھ سید مراد علی شاہ، اور ان کے کراچی سے تعلق رکھنے والے مشیر اور وزیر جیسے سعید غنی اور مرتضی وہات کی طرف سے مثبت رد عمل کی امید ہے۔ کراچی میں شہری ایمرجنسی اس لئے ضروری ہے کیوں کہ یہ منی پاکستان ہے جہاں تمام برادریاں بستی ہیںلیکن جس طرح گذشتہ پانچ دہائیوں میں اس شہر کو چلایا گیا اس نے اس شہر کو روشنی کے شہر سے کچی آبادی کے شہر میں تبدیل کردیا۔ موجودہ صورتحال میں شہر کی نصف سے زائد آبادی سات یا آٹھ ہزار کچی آبادیوں میں رہتی ہےجن میں سے اکثر شہر کے بیچوں بیچ آباد ہیں۔ مبینہ طور پر ان کچی آبادیوں کے وجود میں لانے میں ایک منظم مافیا کا ہاتھ ہے۔ کراچی میں کوئی چالیس لاکھ غیر ملکی آباد ہیں جبکہ پولیس کو شہر کی ترقی میں بہت ہی کم دلچسپی ہے۔ کراچی میں شہری ایمرجنسی لگانا اس لئے بھی ضروری ہے کیونکہ ہر وہ میگا پروجیکٹ جس سے شہر ترقی کرسکتا تھا، دس سے لے کر چالیس سال تک کی تاخیر کا شکار رہا۔ ان منصوبوں میں لیاری ایکسپریس وے اورکراچی ماس ٹرانزٹ پروگرام شامل ہیں۔ لہذاعمران خان کے ذہن میں جو بھی منصوبے ہیں اس کی تکمیل کیلئے انہیں ٹائم فریم بھی دینا چاہیے جس کی مدت تین سال سے زائد نہیں ہونی چاہیے۔ انہیں شہر کا باقاعدگی سے دورہ بھی کرتے رہنا چاہیے کیونکہ وزیراعظم نے اگلے روز خود کہا تھا کہ کراچی میں ریلوے کی زمین کا ایک ٹکڑا اروبوں روپے مالیت کا ہے۔ بعض حالات میں انہیں عدلیہ کی مدد کی ضرورت ہو گی جو پہلے ہی کراچی بد امنی کیس اور واٹر کمیشن کی صورت میں اپنا کردار ادا کررہی ہے۔ کراچی کو سرسبز بنانا شہر سے آلودگی اور گند صاف کئے بغیر ممکن نہ ہوگا۔ اس مقصد کے لئے شہر کو بڑی سائز کی بسیں اور بغیر کسی تاخیر کے سرکر ریلوے کی بحالی درکار ہےجبکہ اس کے ساتھ ساتھ گرین لائن پروجیکٹ کو فوری طور پر مکمل کرنا بھی ضروری ہے۔ شہر کے اکثر فلائی اوور اور انڈر پاس ناقص ہیں جس کے باعث ٹریفک کی روانہ متاثر رہتی ہے۔ اگر وزیراعلیٰ خود اعتراف کر چکے ہیں کہ سندھ کا بڑا مسئلہ لائق افراد کا نہ ہونا ہے تو حکومت کو کس طرح مثبت نتائج مل سکتے ہیں۔ کوئی بھی ادارہ اٹھاکر دیکھ لیں، چاہے وہ کے ایم سی ہو، کنٹونمنٹ بورڈ، ڈی ایچ اے، ایم ڈی اے، کے ڈی اے، سندھ بلڈنگ کنٹرول اتھارٹی، کراچی واٹر اینڈ سیوریج بورڈ، فائر بریگیڈ، کے ایم سی اسکول یا اسپتال، یہ سمجھنا قطعا مشکل نہیں ہوگا کہ شہر کا اس قدر بےترتیب حال کیوں ہے۔ شہر کے حوالے سے عام طور پر خیال کیا جاتا ہے کہ یہاں کوئی بھی فائل بغیر پیسے کے حرکت نہیں کرتی۔ کے الیکٹرک بھی وہ ادارہ ہے جہاں فوری نظر ثانی کی ضرورت ہے۔ اس شہر میں جس کی آبادی کروڑوں میں ہو، ملی بھگت سے پانی اور بجلی چوری کی جاتی ہے۔

(بشکریہ جنگ لاہور)

عام ٹیسٹ کرکٹ ہو یا ون ڈے کرکٹ کا ورلڈ کپ۔ اس میں ہارنے جیتنے کی گنجائش ہوتی ہے۔ ہم تو پہلے سے یہ گارہے ہوتے ہیں تم ہارو یا جیتو۔ ہمیں تم سے پیار ہے۔ لیکن یہ جو 5 سالہ ٹیسٹ ہے۔ اس میں ہارنے کی کوئی گنجائش نہیں ہوتی۔ یہاں جو ٹیم ہارتی ہے چاہے ذاتی طور پر فتح مند ہوتی ہے۔وہ ملک کو کئی سال پیچھے لے جاتی ہے۔ قوم غربت کا شکار ہوتی ہے۔ ملکی خزانہ خالی ہوجاتا ہے۔

طارق عزیز ’نیلام گھر‘ میں کہا کرتے تھے۔ غلطی کی گنجائش نشتہ۔ایک مقام آجاتا ہے آزمائش میں کہ اتنی غلطیاں ہوچکی ہوتی ہیں کہ پھر غلطی ہونے پر مقابلے سے باہر ہونا پڑتا ہے۔ میرے خیال میں پاکستان اب ایسے ہی مقام پر کھڑا ہے۔

کھڑے ہیں اب تو وجود و عدم کی سرحد پر

بس ایک لغزش پا پر ہے فیصلہ ہونا

اب پاکستان مزید کوئی تجربہ یا آزمائش برداشت نہیں کرسکتا۔ اب ہمیں اپنی معیشت کو ہر حال میں واپس پٹری پر لانا ہے اور کتنی بھیک مانگیں گے اور کتنے کروڑوں کو غربت کی لکیر کے نیچے بھیجیں گے۔

پارلیمانی نظام کی ستم ظریفی دیکھئے پاکستان میں اعلیٰ عہدوں پر جو ہستیاں فائز ہوتی ہیں۔ صدر۔ وزیر اعظم۔ چیف جسٹس۔ آرمی چیف۔ ان میں چیف جسٹس بھی اور آرمی چیف اپنے اپنے شعبوں میں نچلے عہدوں سے کام کرتے۔ سرد و گرم چکھتے۔ مختلف آزمائشوں سے گزرتے۔ دُنیا کو سمجھتے۔ اس مقام تک پہنچتے ہیں۔ ان تین دہائیوں میں ان میں کتنا اعتماد اور معاملہ فہمی پیدا ہوچکی ہوتی ہے۔ ان کے مقابلے میں صدر اور وزیر اعظم کے لئے کسی تجربے اور مرحلہ وار آگے بڑھنے کی ضرورت نہیں ہے۔ انہیں حکومت گرانے۔ انتظامیہ کو غیر مستحکم کرنے کا تجربہ تو ہوتا ہے۔ حکومت چلانے کا تجربہ بالکل نہیں ہوتا۔ جب وہ اپنی اکثریت کی بنیاد پر ان اعلیٰ مناصب پر متمکن ہوتے ہیں تو وہ اپنے گرد و پیش میں سب سے کم تجربہ کار ہوتے ہیں۔ اس لئے کبھی چیف جسٹس کا سہارا لینا پڑتا ہے۔ کبھی آرمی چیف کا۔ آٹھویں ترمیم کے خاتمے سے پہلے ٹرائیکا تھی۔ صدر۔ وزیرا عظم۔ آرمی چیف ۔ آرمی چیف اپنا وزن جس کے پلڑے میں ڈال دیتے۔ تیسرا فارغ ہوجاتا تھا۔ صدر زرداری نے خود صدر کو بے اختیار کرکے اختیارات پارلیمنٹ یعنی وزیرا عظم کو منتقل کردئیے۔ اس کے بعد صدر مملکت صرف ممنون و عارف رہ گئے۔اب ٹرائیکا وزیر اعظم۔ چیف جسٹس اور آرمی چیف پر مشتمل ہے۔ آخر الذکر دونوں زیادہ سمجھ بوجھ۔ زیادہ اختیارات رکھتے ہیں۔ اپنے اپنے شعبوں کے با اختیار سربراہ ہیں۔ یہ شعبے بہت منظّم۔ بہت منضبط۔ کسی قسم کی سرکشی۔ بے رُخی اور انحراف کی گنجائش نہیں ہے۔ وزیر اعظم جس شعبے اور اداروں کے سربراہ ہیں وہاں نظم و ضبط کو اچھا نہیں سمجھا جاتا۔ سرکشی لائق تحسین ہوتی ہے۔ قانونی طور پر ایک اپوزیشن بھی موجود ہوتی ہے۔ جو اچھے برے ہر سرکاری فیصلے کی مخالفت اپنا پیشہ خیال کرتی ہے۔

تھوڑے لکھے کو کافی جانیں۔ اکثر وزرائے اعظم ہوائی جہازوں۔ ہیلی کاپٹروں کے ملکی اور غیر ملکی جھولوں سے خوش ہوتے رہتے ہیں اور جب وہ واقعی اپنے آپ کو ملک کا سب سے با اختیار انتظامی سربراہ سمجھنے لگتے ہیں تو ان کا راج سنگھاسن ڈولنے لگتا ہے۔

تاریخ گواہی دیتی ہے کہ اکثر سیاسی سربراہوں کو حکومت میں آنے کی بے تابی رہتی ہے۔ لیکن حکومت کرنے کی تیاری کوئی نہیں کرتا۔ پہلے سے کوئی کابینہ اور متعلقہ شعبوں کے وزیروں کی کوئی تربیت نہیں ہوتی۔ کلیدی عہدوں پر تقرری کے لئے کوئی فہرست تیار نہیںہوتی۔جب حکومت میں آجاتے ہیں تو تیاری شروع کرتے ہیں ۔ اس لئے پہلے چار پانچ مہینے تیاریوں میں گزر جاتے ہیں۔

یہ تو اب ٹی وی تبصروں، کالموں، کتابوں سے قریباً طے ہوچکا ہے کہ ہماری موجودہ خرابی 40سال پہلے شروع ہوئی ۔ ماہرین معیشت اس سے پہلے کی 3دہائیوں کو کسی حد تک بہتر اور آگے بڑھتا قرار دیتے ہیں ان 40برسوں میں مختلف جگہ رکھے گملوں سے جو سیاستدان پروان چڑھائے گئے ۔ان میں یہ گمان پروگرام کیا گیا کہ وہ عقل کُل ہیں۔انہیں اسکول کالج یونیورسٹی جانے کی ضرورت ہے نہ کچھ پڑھنے لکھنے کی۔ نہ کسی انتظامی تجربے کی۔ وہ’ سب کچھ جانتے ہیں ‘کے زعم میں ان اعلیٰ عہدوں تک پہنچتے رہے اور جلد از جلد ناکام ہوکر رُخصت ہوتے رہے۔ مبصرین نے ایک فارمولا تراش لیا کہ منتخب نمائندوں کو غیر منتخب اداروں نے چلنے نہیں دیا۔ حقیقت یہ تھی کہ وہ وزارتِ عظمیٰ کو اپنا پیدائشی حق تصور کرتے رہے۔ تربیت کی بات کا تمسخر اُڑاتے رہے۔ دوسرے شعبے مضبوط ہوتے رہے۔
(ایمرا نیوز)
ہم اپنے صحافتی دَور میں بعض اوقات کوشش کرتے تھے کہ ایسے سیمینار منعقد کیے جائیں جن میں ہر مرکزی موضوع کے ذیلی موضوعات بھی متعین ہوں۔ مختلف مقررین اپنی تیاری صرف ان موضوعات تک محدود رکھیں۔ غیر سیاسی شخصیتیں۔ ڈاکٹرز۔ ماہرین تعلیم۔ انجینئرز اس سے اتفاق کرلیتے تھے۔ لیکن بڑے چھوٹے سیاستدان اسے اپنی توہین سمجھتے تھے اور کہتے تھے ہمیں آپ پابند نہ کریں۔ کیونکہ وہ تیاری کرنا ہی نہیں چاہتے۔

اب بھی سیاسی پارٹیوں میں یہی منظر دیکھنے میں آتا ہے۔ اس وقت پی ٹی آئی تو ساری سرکاری ایوانوں میں گم ہوگئی ہے کہیں بطور سیاسی پارٹی نہیں ملتی ہے۔

جن جمہوریتوں میں حکومت میں آنا ملک چلانے کے لئے ہوتا ہے۔ وہاں سیاسی پارٹیاں اپنے عہدیداروں اور کارکنوں کو باقاعدہ مختلف شعبوں کی تربیت دلواتی ہیں۔ برطانیہ کا ایک واقعہ اکثر سنا ہے کہ جان میجر جب وزیر اعظم تھے اور ٹونی بلیئر کی پارٹی زور پکڑ رہی تھی۔ پورا یقین تھا کہ اب ان کی حکومت آئے گی تو جان میجر نے ان کو خط لکھا کہ اب جب آپ کی پارٹی بر سر اقتدار آنے والی ہے ہم دیکھتے ہیں کہ گزشتہ 12سال سے آپ کی پارٹی انتظامیہ میں نہیں رہی آپ کے کسی بھی عہدیدار کو حکومت کا تجربہ نہیں ہے۔ اس لئے حکومت آپ کو تربیت کورسز کی پیشکش کرتی ہے کہ یہ ملک کے مفاد میں ضروری ہے۔ آپ کچھ اعلیٰ عہدیدار نامزد کریں۔ ایک اور امر واضح رہے کہ آپ حکومت میں نہیں ہیں۔ اس لئے اس تربیتی کورسز کی فیس آپ کو ادا کرنا ہوگی۔

ہمارے ہاں سیاست میں ریاست محور و مرکز نہیں ہے۔ اس لئے ریاست کو چلانے کی تربیت۔ فہم ضروری نہیں ہے۔ نتیجہ جمہوریت لڑکھڑاتی رہتی ہے۔ سرکاری شعبوں میں ہونے والے نت نئے آزمائشی تجربے۔ انہیں غیر مستحکم کردیتے ہیں۔ ایسے بچگانہ اقدامات اور بے سوچے سمجھے کیے جانے والے فیصلوں کی وجہ سے ہی اداروں کالجوں یونیورسٹیوں کو سیاست سے پاک رکھنے کی بات کی جاتی ہے۔ پولیس میں سیاسی مداخلت کو سب ناپسندیدہ کہتے ہیں۔ فوج بھی سیاسی مداخلت پسند نہیں کرتی۔ کیا سیاستدانوں نے اس تصوّر کو ختم کرنے کے لئے کچھ کیا کہ ان کا شعبہ سیاست ناپسندیدہ کیوں ہوتا جارہا ہے۔

غور تو کریں نوبت یہاں تک کیوں پہنچی ہے۔ آج کل جو اعلانات ہورہے ہیں۔ خواب دکھائے جارہے ہیں ۔ کھلونے دے کر بہلایا جارہا ہے۔ گورنر تو اسی اشرافیہ نے بننا ہے۔ عام پاکستانی گورنر ہائوس کو اندر سے دیکھنے کو ہی اپنی جمہوری جدو جہد کا ثمر سمجھ کر خوش رہے۔ آپ کا کیا خیال ہے۔ تربیت ضروری ہے یا نہیں؟
(کالم نگار کے نام کیساتھ ایس ایم ایس اور واٹس ایپ رائےدیں00923004647998)
(بشکریہ جنگ لاہور)

مغربی تہذیب اور جمہوریت کے گہوارے(افضال ریحان)
لندن کا نام ہم نے تین چار برس کی عمر میں پہلی بار ریڈیو سے سنا تھا۔ صبح سویرے ہمارے گھر میں ریڈیو لگتا جس میں خبروں کا آغاز اس طرح ہوتا ’’یہ بی بی سی لندن ہے اس وقت یہاں برطانیہ میں صبح کے۔۔۔۔۔‘‘ بڑی خواہش تھی کہ بی بی سی اردو سروس کے وہ دفاتر ملاحظہ کیے جائیں جن میں سدھو بھائی کے ساتھ ہمارے رضا علی عابدی کی خوبصورت آواز گونجتی تھی مگر عابدی صاحب سے رابطہ کیا تو انہوں نے بتایا کہ وہ تو اٹلی آئے ہوئے ہیں۔ اسی طرح یہاں کے جدی پشتی ٹم گرین اور ریچل گرین سے ہمارے گہرے فیملی تعلقات ہیں مگر وہ لوگ ان دنوں ملائیشیا گئے ہیں۔ پیٹریشیا بھابھی سپین گئی ہوئی ہیں یوں محسوس ہو ا کہ دنیا واقعی گلوبل ویلیج ہے لہٰذا جو لوگ میسر ہیں انہی سے کام چلایا جائے۔ انگلستان کے مختلف مقامات پر گھومتے ہوئے اتنی دلچسپیاں سامنے آئی ہیں کہ سمجھ نہیں آرہی کس کا ذکر کیا جائے اور کس کا گول کر دیا جائے بالخصوص مغربی معاشرتی و خاندانی زندگی، سماجی اسلوب، باہمی تعلقات، اپنوں اور غیروں سے ملنے کا انداز، ان کی شخصی کے ساتھ ساتھ ذرائع ابلاغ یا میڈیا کی آزادیاں اور جمہوری رویے بالخصوص ان کی اخلاقی اقدار اور فرد کی اہمیت مذہبی سیکولر یا لبرل اپروچ۔ بہت سی باتیں ایسی ہیں جن کے لکھے جانے کو ہم وطن شاید پسندیدہ نظروں سے نہیں دیکھیں گے۔ جب سر سیدجیسی مہان ہستی کی ایسی تحریروں پر اعتراضات اٹھے تو پھر ہماری کیا حیثیت ہے۔

بہرحال ایک پاکستانی کی نظر سے دیکھیں تو لندن سے ہماری شناسائی یا دلچسپی قائداعظم محمد علی جناحؒ، علامہ اقبال ؒ اور سرسید احمد خان کے یہاں گزارے لمحات کے حوالوں سے بھی ہے کہ وہ یہاں کہاں اور کیسے رہے اُن کے اس قوم اور ان کی تہذیب و ترقی کے متعلق کیا خیالات تھے؟ اور پھر جب ہم تحریک آزادی یا تحریک پاکستان کے حوالے سے پڑھتے ہیں تو بھی ہمیں قدم قدم پر انگلستان اور لندن کے حالات سے واسطہ پڑتاہے ہمارے بزرگ یہاں کہاں کہاں رہے؟ اُن کی ذہنی آبیاری یہاں کس طرح کے ماحول میں ہوئی؟ گول میز کانفرنسز کہاں منعقد ہوتی رہیں وغیرہ۔ آج کا لندن اُس وقت کے لندن سے کتنا اور کس طرح مختلف ہے؟

آج یہاں انگریز کے بجائے پاکستانی نژاد مسلمان لندن کا میئر ہے تو یہ کیسے ممکن ہوا ہے؟ درویش بارہا یہ بھی سوچتا رہا ہے کہ تھے تو مغل بھی غیر ملکی (یعنی ترک) حملہ آور ہی مگر انہوں نے جب ہندوستان پر قبضہ کیا تو پھر وہیں کے ہو گئے اُن کی زبان یا معاشرت بھی اگرچہ مقامی ہندوستانیوں سے مختلف تھی مگر وہ کچھ لے دے کر اس کا حصہ بن گئے آخر کیا وجہ تھی کہ انگریز جنہیں مغلوں کی نسبت اس خطے میں زیادہ پذیرائی مل سکتی تھی اس طرح مکس اپ کیوں نہ ہوسکے؟ جنوبی افریقہ آسٹریلیا یا امریکا کی طرح انہوں نے یہاں اپنی وسیع آبادیوں یا کالونیوں کو کیوں نہ بسایا ؟ حالانکہ وہ بڑے شہروں میں رہے لوگوں کے لیے مضبوط قلعہ نما کالونیاں بنا سکتے تھے اور کچھ انھوں نے بنا بھی رکھی تھیں مگر مقامی آبادی سے کمپنی بہادر نے جو تعلق بنایا تھا بعدازاں وہ بھی ختم کر دیا۔

’’پیسج ٹو انڈیا‘‘ جیسی کلاسیکل مووی میں ہم اس تفاوت کو بخوبی دیکھ سکتے ہیں آخر اس دوری یا اجنبیت کی وجہ کیا تھی حالانکہ کمتر طبقے سے تعلق رکھنے والے انگریز بھی جو کچھ عرصہ ہندوستان میں گزار کر آتے تھے واپس برطانیہ آکر خود کو ایسی ایلیٹ کلاس خیال کرتے تھے جسے یہاں کی جدی پشتی ایلیٹ کلاس حیرت سے دیکھتی تھی اور انہیں نودولتیے خیال کرتی تھی۔ ہم دیکھتے ہیں کہ اپنی تمامتر مقبولیت کے باوجود پارٹیشن کے ساتھ ہی اُن کا یہاں سے ایسے صفایا ہوا ہے جیسے اسپین سے مسلمانوں کا، تو اس کی ٹھوس وجوہ کیا ہیں؟ ہمیں یہاں بڑی دلچسپی ہے کہ اپنے پیرومرشد سرسید کے سفر انگلستان سے اقتباسات پیش کریں جو بڑی دلچسپی کے حامل ہیں۔ اس کا ایک فائدہ یہ بھی ہو گا کہ جو باتیں ہم مغربی تہذیب کی ستائش میں براہ راست تحریر نہیں کر سکتے وہ سر سید کے شیلٹر میں کر گزریں گے مگر کیا کریں ایک تو کالم کی طوالت زیادہ ہوتی جا رہی ہے دوسرا وقت بھی کم ہے تیسرے ہمارے عامۃ المسلمین کا ذوق یا میلان آج بھی شاید ڈیڑھ صدی قبل کے مقام یا اس کے کہیں آس پاس کھڑا ہے۔ سرسید نے جب اپنے اس سفرنامے کو لکھتے ہوئے ساتھ ساتھ اشاعت کے لیے ہندوستان بھیجنا شروع کیا تو ایسی تنقید شروع ہوئی کہ جس کے وہ عادی نہیں تھے۔ حیاتِ جاوید میں مولانا حالی کا یہ اقتباس اس امر کی غمازی کرتا ہے ’’15اکتوبر 1869ء کو انہوں نے ایک لمبی تحریر سوسائٹی اخبار میں چھپنے کو بھیجی جس میں چھ مہینے کے حالات مختصر طور پر بیان کیے تھے۔ یورپ کی ترقی اور اپنے ملک کے تنزل کی مثالیں پیش کر کے اہل وطن کو غیرت دلائی۔ اس تحریر کا نتیجہ بھی سوائے اس کے کہ لوگ برافروختہ ہوں اور بُرا بھلا کہیں، کچھ حاصل نہ ہوا تو 22 مارچ 1870ء کو ایک دوسری تحریر بعنوان ’’عرض ازطرف گنہگار سید احمد‘‘ہندوستان میں بھیجی پھر ایک اور تحریر بعنوان ’’عرضداشت سید احمد بخدمت اہل وطن‘‘ اخبار میں چھپنے کے لیے روانہ کی۔

ان تمام تحریروں کے دیکھنے سے بخوبی اندازہ ہو سکتا ہے کہ اُس زمانے میں سرسید کو وطن کی بھلائی کا کس قدر خیال تھا گو ان تحریروں سے قوم و ملک کے کانوں پر جوں نہیں رینگی مگر درحقیقت یہ سب تمہیدیں تھیں اُن کارروائیوں کی جو آخرکار ہندوستان پہنچ کر سر سید کے ہاتھوں ظہور پذیر ہونے والی تھیں‘‘۔ مولانا حالی دوسری جگہ تحریر کرتے ہیں ’’یہ سفر نامہ نہایت دلچسپ طریقے سے لکھنا شروع ہوا تھا مگر جب اُس کے کچھ حصے ہندوستان میں شائع ہوئے تو مسلمانوں کی طرف سے اُس پر اعتراضوں کی بوچھاڑ پڑنی شروع ہوئی اور سرسید کو بھی لندن ہی میں لوگوں کی مخالفت کا حال معلوم ہوا۔ ابھی حضرت کے کان ایسی مخالف صداؤں سے زیادہ آشنا نہ تھے اس لیے انہوں نے ناراض ہو کر سفرنامہ لکھنا موقوف کر دیا مگر زمانہ باآواز بلند کہہ رہا تھا
ابتدائے عشق ہے روتا ہے کیا
آگے آگے دیکھئے ہوتا ہے کیا
مولانا الطاف حسین حالی ایک اور جگہ سر سید کی لندن یاترا کے متعلق لکھتے ہیں:الغرض سرسید بمبئی سے چوبیس دن میں لندن پہنچے اور میکلن برگ اسکوائر میں ایک مکان کرایہ پر لے کر ٹھہرے اپنے تمام دوستوں اور آشناؤں سے ملے۔ لارڈ لارنس سب سے زیادہ مہربانی، مروت اور خلق سے اُن کے ساتھ پیش آئے جیسے کہ وہ ہندوستان کے مسافروں کے ساتھ پیش آتے تھے وہ ہندوستان میں سرسید اور ان کے خاندان کو اچھی طرح جانتے تھے اور اُن کی خدمات سے آگاہ تھے۔ لندن میں وہ اکثر ان کو اپنے گھر ڈنر پر بلاتے اور مہینے میں ایک بار اُن سے ملنے کو آتے۔ انہوں نے ہی سرسید کو لندن کے اکثر امراء و مشاہیر سے ملوایا تھا‘‘۔۔۔۔

بہرحال ہم اپنے اس آرٹیکل کا اختتام لندن کے عظیم فلاسفر اور مدبر سر برٹینڈرسل کے ایک اقتباس پر کرتے ہیں جسے ان کی مغربی تہذیبی فکر کا ایک سمبل کہا جا سکتا ہے۔ ’’تین سادہ مگر پُرجوش جذبے میری زندگی پر ہمیشہ حکمرانی کرتے رہے ہیں ان میں سے ایک محبت کی تلاش ہے اور دوسرا علم کی جستجو ہے جبکہ تیسرا انسانی دکھوں کا بے پایاں درد ہے۔ طوفانی ہواؤں کی طرح یہ تینوں جذبے میری زندگی کی ناؤ کو کبھی یہاں کبھی وہاں کھینچتے رہے ہیں، میں نے محبت کی تلاش اس لیے کی کہ وہ وجد آفریں ہے۔ اس قدر وجد آفریں کہ ایسی مسرت کے چند لمحوں کی خاطر میں پوری زندگی فدا کر دوں۔ میں نے محبت کو اس لیے پانا چاہا کہ وہ تنہائی کے احساس کو مٹاتی ہے۔ اتنی ہی شدت سے میں نے علم کی خواہش کی۔ میں نے انسانوں کے دلوں کو سمجھنا چاہا اور یہ جاننے کی کوشش کی کہ ستارے کیوں چمکتے ہیں۔ محبت اور علم مجھے ممکن حد تک آسمانوں میں بلندیوں کی جانب لے جاتے ہیں لیکن ہر بار انسانی دکھ درد مجھے واپس زمین پر لے آتے ہیں درد بھری چیخوں کی صدائے باز گشت میرے دل میں مرتعش ہو جاتی ہے۔‘‘
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)

13ماہ سے لندن میں زیر علاج بیگم کلثوم نواز انتقال کر گئیں، ان کا جسد خاکی وطن کی دھرتی کے سپرد کردیا گیا، انا للہ و انا الیہ راجعون۔

وہ تین مرتبہ ملک کی خاتون اول رہیں، رستم زماں گاما پہلوان کی نواسی، اسلامی اور مشرقی روایات کا ایک متاثر کن نمونہ اور مثال تھیں، یہ سطور بدھ کی صبح مورخہ 12ستمبر کو لکھی جارہی ہیں، ایک کمرے میں بیٹھے کالم نگار کو لیکن پورے ملک کی فضائوں سے سوگوار ہوائوں کی خاموش سی صدائیں سنائی دے رہی ہیں۔

جو آیا، اس نے جانا ہے، یہ خالق کائنات کا فیصلہ ہے، بس ان کے جانے سے ہمارے قومی سیاسی سماج میں عظمت کی امیدوں کے دیئے جل اٹھے، یہ مرحومہ کے نیک طینت ، نیک سرشت اورنیک قلب ہونے کی تصدیق ہے، بھلا کس شکل میں؟ ا س شکل میں کہ جب اعتزاز احسن جیسے قوی دانشور اور تحریک انصاف کے رکن قومی اسمبلی فیصل واوڈا ان کی علالت کے دوران میں اپنے ریمارکس پر قومی سطح پر معذرت اور معافی کا اعلان کررہے ہیں، تحریک انصاف پنجاب نے انتقال کی خبر کے ساتھ ہی پنجاب اسمبلی میں تعزیتی قرارداد جمع کرا دی!

غم اور صدمے کے سارے لمحے اپنی جگہ، ملکوں اور قوموں کی تلخ تاریخ میں ایسی عظمتوں کی چنگاریوں کے وجود کا ابھر آنا ان لمحوں کے شدید زخموں پر کہیں نہ کہیں اندمال کا باعث بن جاتا ہے، قومی سفر کو اخلاقی اقدار کے فروغ کی طاقت ملتی ہے، ہمارے نزدیک اعتزاز صاحب ، فیصل واوڈا اور اور تحریک انصاف پنجاب تینوں نے اس جانکاہ موقع پر نواز خاندان ہی کو نہیں، پاکستانی قوم کو ذہنی بحالی کی قوت فراہم کی، دونوں حضرات نے معافی مانگ کر ان کی علالت کے دوران اپنے ریمارکس کی غلطی کا ازالہ کردیا جس نے، بالخصوص اعتزاز جیسے رہنماکا اُجلا دامن نہایت داغدار کردیا تھا!

نواز خاندان زخم خوردگی اور دنیاوی بحرانوں کے جزیروں میں ہے، انسانوں نے انسانوں کے ساتھ جو کچھ کیا وہ ناقابل بیان اور ناقابل ادراک ہے۔ اس لئے اس خاندان کے لئے، قلباً دعائے رحمت اور بیگم صاحبہ مرحومہ کے لئے دعائے مغفرت!

پاکستان کے حکمرانوں اور پنجاب پولیس کی پاکستانی تاریخ میں ہر انسانیت کی تذلیل کے قابل نفرت اور قابل انتقام سیاہ نشانوں کی کمی نہیں، ان میں وہ سیاہ تاریخی واقعہ بھی شامل ہے جب کلثوم نواز، غیر آئینی حکمران مشرف کے خلاف جدوجہد کررہی تھیں، نوازشریف جیل میں تھے، لکشمی چوک میکلوڈ روڈ میں پنجاب پولیس کے ٹریفک لفٹر نے بیگم صاحبہ کو گاڑی سمیت قانون کی خلاف ورزی کے نام پر اوپر اٹھا لیا اور اس عجیب و غریب مزاج کی حامل قوم نے سرعام یہ تماشا دیکھا، مگر پاکستان کے حکمرانوں اور پنجاب پولیس کے واقعات میں یہ سیاہ لمحے ایسے ہیں جن کا بدلہ نہیں چکایا جاسکا، ہاں! دل سے ایک ہوک سی اٹھتی اور خالق کائنات کے آسمان کی جانب نگاہ اٹھ جاتی ہے! کلثوم نواز مرحومہ نے واجب الاحترام زندگی گزاری، ہم ایک بار پھر انہیں دعائے مغفرت و رحمت کے ساتھ اللہ کے سپرد کرتے ہیں!

قید و بند میں مبتلا نوازشریف، مریم صفدر اور کیپٹن (ر) صفدر کی پیرول کی رہائی، بیگم صاحبہ کے سفر آخرت کے آخری مراحل میں ان کی شرکت پر تحریک انصاف نے جس قانونی تہذیب اور وسیع الظرفی کا مظاہرہ کیا، وہ بھی پاکستان کی سیاست میں دم توڑ چکی اخلاقی اقدار کو ناقابل تردید طاقت فراہم کرے گا۔

سابق وزیراعظم شاہد خاقان عباسی اور سابق وزیر داخلہ احسن اقبال کے ہمراہ لاہور میں بروز ہفتہ مورخہ 8ستمبر 2018ء، مسلم لیگ ’’ن‘‘ کے صدر، قومی اسمبلی میں اپوزیشن لیڈر شہباز شریف نے ایک مشترکہ پریس کانفرنس سے خطاب کیا۔ ان کا کہنا تھا! ’’عمران خان غلط فہمی میں نہ رہیں، دھاندلی کے خلاف پارلیمانی کمیشن بننے تک ایوان کی کارروائی چلنے نہیں دیں گے۔ ہم نے عوام کے 160ارب بچائے، عمران خان نے آتے ہی بجلی، گیس اور کھاد کی قیمتوں میں ہوشربا اضافہ کردیا، حکومت کی 20دنوں کی کارکردگی سامنے آگئی، اگر یہ نیا پاکستان ہے تو ہمارا اللہ ہی حافظ ہے، ہماری حکومت نے بھاشا ڈیم کے لئے 100ارب روپے خرچ کئے، عمران خان کام کریں، بیڑا غرق نہ کریں، شہباز شریف کا مزید کہنا تھا! ’’صرف حزب اختلاف نہیں بلکہ سرکاری بنچوں کی سیاسی پارٹیاں بھی دھاندلی کا رونا رو رہی ہیں، 17۔اگست کو اسمبلی ہال میں عمران خان نے مجھ سے کہا تھا کہ وہ پارلیمانی کمیشن بنانے کو تیار ہیں،3ہفتے گزر جانے کو ہیں، کمیشن کا نوٹیفکیشن نہیں ہوسکا۔ صدر ’’ن‘‘ لیگ نے مطالبہ کیا: ’’دھاندلی کے خلاف پارلیمانی کمیشن فوری بنایا جائے تاکہ دھاندلی کی تہہ تک پہنچا جاسکے۔ ہمارے دور میں کھاد کی قیمتوں کو کم کرنے کے لئے سبسڈی دی گئی اور کھاد کو سستا کیا، اب اربوں کی سبسڈی ختم کر دی گئی ہے جبکہ کھاد کی 800روپے قیمت بڑھا دی گئی۔ حکومت کے ان اقدامات سے غریبوں کے لئے زیادتی اور تذلیل کا بندوبست کیا گیا ہے!‘‘

قارئین میں سے بہت سے حضرات کو چند روز قبل عمران خان کا بیان یاد ہونا چاہئے جس کے مطابق ’’اپوزیشن کمزور ہے، اس سے کوئی خطرہ و خوف نہیں‘‘۔ خان صاحب نے پاکستان کی سیاسی تاریخ میں اپوزیشن کی ہیت ترکیبی کے اصل عنصر کو دریا میں کوزے کی طرح بند کردیا۔ یہ بیان اس ماضی کی تصدیق کرتا ہے جس میں اپوزیشن’’ عوام‘‘ کے نام پر ’’اقتدار‘‘ کا ہولناک کھیل کھیلتی، پاکستانی تاریخ کے مطابق، اندر خانے سینکڑوں ہزاروں تضادات اور مفادات کی لڑائیاں جاری رہتی ہیں چنانچہ جب بھی برسراقتدار گروہ کسی زد میں آیا، وہ اپوزیشن کے دبائو کے باعث نہیں بلکہ پس پردہ کچھ بین الاقوامی اور قومی ’’عناصر‘‘ کے حصہ ڈالنے کے نتیجے میں ’’تاج و تخت‘‘ سے محروم ہوا۔

موجودہ اپوزیشن کی اصولی طاقت کی اخلاقی اور واقعی تارپود اسی روز بکھر گئی تھی جب پاکستان پیپلز پارٹی نے صدارتی انتخاب، کے موقع پر ن لیگ کو جواباً یہ سندیسہ بھیجا ’’قطعاً اپنا امیدوار نہیں بٹھائیں گے، پہلی بار بھی اعتزاز، دوسری بار بھی اعتزاز اور تیسری بار بھی اعتزاز‘‘ چنانچہ ’’ن‘‘ لیگ نے مجبوراً مولانا فضل الرحمٰن پر اکتفا کیا۔

ہمارے ایک کولیگ کالم نگار نے بھی اس حوالے سے پاکستان میں اپوزیشن اتحادوں کی عملی سچائی بیان کی جس میں پاکستان قومی اتحاد (پی این اے) ایوبی آمریت کے خلاف ڈیمو کریٹک ایکشن کمیٹی، 1967ء میں پانچ اپوزیشن جماعتوں کا ’’پاکستان جمہوری تحریک‘‘ کے نام سے متحد ہونا جسے بعد میں ’’ڈیموکریٹک ایکشن کمیٹی‘‘ کا نام دیدیا گیا، بھٹو صاحب کے دور میں ایک متحدہ محاذ کا قیام، ضیاء الحق کے خلاف ایم آر ڈی کی تحریک، 1999ء میں جنرل پرویز مشرف کے خلاف اپوزیشن جماعتوں کا اے آر ڈی کے پلیٹ فارم پر جمع ہونا وغیرہ وغیرہ اور پھر پاکستان میں اپوزیشن کے مجموعی کردار کوایک تاریخی جملے میں سمو دیا یعنی ’’اب ان مثالوں کو موجودہ ایسے اتحاد پر کیونکر منطبق کیا جاسکتا ہے جس کے رہنمائوں میں باہمی اعتماد کو کجا، ایک دوسرے کے خلاف جن کی بیان بازیاں، قلابازیاں اور بغض و عناد سربازارہیں‘‘ ایسے اتحاد تارعنکبوت سے بھی کمزور ثابت ہوئے ہیں‘‘۔

ملکوں، قوموں اور افراد کی ناقابل گرفت طویل داستان تو معلوم نہیں کیا، کہاں اور کیسے شروع ہوئی، پاکستان کی حد تک ہمارے کولیگ کالم نگار نے اپوزیشن کا جو قصہ بیان کیا، وہ لوگ اس کے عینی شاہد ٹھہرتے ہیں جو پاکستان کی عمر کے برابر برابر ہیں!

سوال یہ ہے، ’’ن‘‘ لیگ کے تقریباً 30برس پر مشتمل ملکی اقتدار کے تاریخی تسلسل میں جوہری تبدیلی کیا ہے؟ جوہری تبدیلی، یہ کہ وقت کا طرز عمل اپنے چہرے کے دوسرے رخ کو ن لیگ کے مستقبل کا فیصلہ قرار دینے پر مصر دکھائی دیتا ہے، باقی وہ جانتا ہے جو سب جانتا ہے!

اپوزیشن اور شہباز شریف، اقتدار سے محرومی اور شہباز شریف، امکانی خدشات اور شہباز شریف، ان سوالات پر گفتگو کی ہمت نہیں پڑتی! کہنے کو تو لوگ یہ بھی کہتے ہیں، کاش! قومی اسمبلی میں خواجہ آصف اور صوبائی اسمبلی پنجاب میں خواجہ سعد رفیق اپوزیشن لیڈر ہوتے، اس لئے ابھی بہت سے موضوعات پر کہنے کی جرات نہیں ہورہی!‘‘

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
جب یہ سطور لکھی جا رہی ہیں تو اکیسویں صدی کے اٹھارہویں برس میں ستمبر کی 14 تاریخ ہے۔ صبح کے ساڑھے چار بجے ہیں۔ پاکستان کی قومی ایرلائنز کا ایک طیارہ بحیرہ عرب کے اوپر محو پرواز ہے اور اس طیارے میں ایک تابوت ہے۔ تابوت میں، جیسا کہ ہم جانتے ہیں، دنیا سے رخصت ہونے والوں کے جسد خاکی رکھے جاتے ہیں۔ ہم سب کو ایک روز دنیا سے رخصت ہونا ہے۔ موت زندگی کی حتمی حقیقت ہے۔ موت مکالمہ نہیں کرتی۔ موت سے این آر او نہیں کیا جا سکتا۔ موت معنی کی وہ سرحد ہے جس کے پار کی حقیقتیں فانی انسانوں کے لیے سربستہ راز ہیں۔ گوشت پوست سے بنے انسانوں کے لیے سود و زیاں کے سب معاملات سانس کی ڈوری سے بندھے ہیں۔ اس سے کوئی فرق نہیں پڑتا کہ رخصت ہونے والوں کو تابوت نصیب ہوتا ہے یا ان کے حصے میں شمشان گھاٹ کی ارتھی آتی ہے۔ تاریخ انسانی میں ان گنت خاک کے پتلوں کو جنگ کے میدانوں میں، گہرے سمندروں میں، برف کی لامتناہی سفید چادر کی تنہائی اور فضا کی پہنائیوں میں اس طرح رخصت ہونا پڑا کہ رکھ لی میرے خدا نے مری بے کسی کی لاج۔ آج تو یوں بھی 1440 ہجری کے محرم کا دوسرا دن ہے۔ ہماری تاریخ میں عاشورہ اس فلسفے کا استعارہ ہے کہ گزاری گئی زندگی کی قدر و قیمت کا تعین موت کے انتخاب سے ہوتا ہے، دائمی خوف کے سائے میں زندہ جبروت کی طوالت سے نہیں۔ ہمارے ملک کی تاریخ صرف ستر برس پرانی ہے اور یہ ستر برس کا وقفہ ایک کے بعد ایک گزرتے تابوت کی لامتناہی قطار ہے۔ کہیں ہرے بھرے شاہ کی وقت کے آر پار دیکھتی آنکھیں ہیں تو کہیں ظہیر احمد دہلوی کھڑے ہیں،

گھروں سے کھینچ کے کشتوں کے پشتے ڈالے ہیں
نہ گور ہے، نہ کفن ہے، نہ رونے والے ہیں

کہیں بیاس کا پانی سرخ ہے تو کہیں 1947ء کے موسم سرما میں مہاجر کیمپوں کی خاردار تاروں پر اکڑی ہوئی لاشیں ہیں۔ کہیں بابڑہ کے بے گوروکفن لاشے ہیں تو کہیں کرنال کے درویش صفت نوابزادےکا تابوت ہے جس کے بینک اکاؤنٹ میں چند روپے تھے اور جسے قتل کرنے والوں نے اس ملک کی تاریخ کا پہلا ڈاکہ مارا تھا۔ چوری اور ڈاکے کی گھمبیرتا سکوں میں نہیں تولی جاتی۔ 16 اکتوبر 1951 کی رات پنڈی سے جو تابوت کراچی بھیجا گیا اس کا تاوان بھی اس لوٹ مار کی میزان میں شمار کرنا چاہئے جس کا آج کل بہت چرچا ہے۔ نواب صدیق علی خان روایت کرتے تھے کہ وسط اکتوبر میں کراچی کے حبس آلود موسم میں لیاقت علی خان کے جسد خاکی کی حالت غیر ہو رہی تھی لیکن ان کے جانشینوں میں قلمدانوں کی تقسیم طے نہیں ہو رہی تھی۔

15 جولائی 1960 کو حیدرآباد جیل سے نواب نوروز خان زرک زئی کے بیٹے سمیت سات تابوت ایک ہی ٹرک پہ رکھ کر قلات لے جائے گئے تھے۔ حسن ناصر اور نذیر عباسی کو تو شاید کفن بھی نصیب نہیں ہوا لیکن مارچ 1981ء میں حمید بلوچ کے تابوت میں ہم نے 1973ء کا آئین دفن کیا تھا۔ ایک تابوت ہم نے بیروت سے وصول کیا تھا۔ کہنے کو اس تابوت میں حسین شہید سہروردی کی لاش تھی لیکن 8 دسمبر 1963 کی سہ پہر ہم نے اس تابوت میں مشرقی پاکستان کو دفن کیا تھا۔ کہتے ہیں کہ محترمہ فاطمہ جناح کا انتقال جولائی 1967 میں ہوا، تاریخ میں مگر لکھا جائے گا کہ مادر ملت کے تابوت میں 4 جنوری 1965 کی شام وہ بے چہرہ لاشے رکھ کر کیل ٹھونک دیے گئے تھے جن کے لہو سے وقت کے بھوپت ڈاکو نے انتخابی فتح کا جشن منایا تھا۔

1971 کے لہو رنگ برس میں جو بے گور وکفن لاشے بحیرہ بنگال کی تہہ میں اتر گئے، ہم نے ان کی گنتی کا تکلف بھی نہیں کیا۔ ڈھاکہ والوں کو میرپور کے سیلابی جوہڑ میں گرے چودہ دانشور یاد رہ گئے اور ہم اپنے ایک سو پچانوے قیمتی اثاثے جنگی جرائم کی آزمائش سے بچا لائے۔ قائد اعظم کے پاکستان کا تابوت پلٹن گراؤنڈ میں خاک آلود ہو گیا۔ کچھ تابوت 23 مارچ 1973 کی رات کے اندھیرے میں عبدالولی خان راولپنڈی سے چارسدہ لے گئے تھے۔ جوہر میر پشاور کا جواہر ریزہ تھا۔ 1978ء میں صحافیوں کی تحریک کے دوران کراچی میں قید رہا، ذوالفقار علی بھٹو کی شہادت پر جوہر میر نے ایک لافانی سطر بیگم نصرت بھٹو کے کردار سے منسوب کی تھی، ’اسلام آباد کے کوفے سے میں سندھ مدینے آئی ہوں‘۔ ہم نے 27 دسمبر 2007 کی رات راولپنڈی ہی کی زمین سے بے نظیر بھٹو کا تابوت بھی اٹھایا تھا۔ پنڈی کی زمین پر ہمارا قرض بہت بڑھ گیا ہے۔

ہم نے 27 سالہ شاہنواز کا تابوت 1985ء میں فرانس سے منگوایا تھا۔ 42 سالہ مرتضیٰ بھٹو کا تابوت 20 ستمبر 1996 کی رات کراچی کے مڈ ایسٹ اسپتال سے اٹھایا تھا۔ 40 سال پر پھیلی افغان پالیسی کے لاکھوں تابوت پورے ملک میں گلی قصبوں میں گڑے ہیں۔ اتنے بہت سے تابوت اور ادھ کھلی آنکھیں ہیں جنہیں ثروت حسین نے دو سطروں میں سمیٹ دیا ہے۔ ’کتنے گھاؤ لگے ہیں، پیارے کون گنے، دس سے اوپر کون گنے؟ ‘

ان دنوں سدھائے ہوئے کھوجی چوریوں کا سراغ ڈھونڈ رہے ہیں، ایک دن انہیں یاد دلانا پڑے گا کہ آنے ٹکے کی جھوٹی سچی فردجرم کا روکڑا ستر برس پہ پھیلے ڈاکے سے ملایا جائے۔ آنے والی نسلیں نسخہ ہائے وفا کے فرد فرد اوراق پر رقم نوحہ پڑھ لیں گی، ’کہیں نہیں ہے، کہیں بھی نہیں لہو کا سراغ‘۔ لہو کا سراغ ملے نہ ملے، ناصر کاظمی ہمیں بتا گئے ہیں کہ ’بوئے خوں ہے ایاغ میں گل کے‘۔

آج شام لاہور کی زمین میں ایک تابوت اتارا جائے گا۔ ٹھیک چودہ برس پہلے اسی مقام پر ایک تابوت دفن کیا گیا تھا، یہ تو کچھ دوستویفسکی کے جرم و سزا کا سا معاملہ ہے۔ جرم کے تعین سے پہلے سزا طے کی جاتی ہے اور جرم ایک ہی ہے، 11 ستمبر 1948 کی شام رخصت ہونے والے بابائے قوم نے ہمیں ایک وراثت دان کی تھی۔ محمد علی جناح کی وراثت واپس مانگنے والوں کے تابوتوں پر کندہ ماہ و سال کے اختلاف سے کچھ غرض نہیں، مقدمہ بھی اسی زمین کا ہے، تابوت بھی یہیں گڑے ہیں اور بائیس کروڑ مدعی اپنے حق سے دستبردار نہیں ہو سکتے کیونکہ ان نسل در نسل زمین پر نمودار ہوتے تودہ ہائے خاک پر ایک ہی صلیب گڑی ہے جو مریم کی معصومیت کی گواہی دیتی ہے۔ ایک روز عیسیٰ تخت سے اترے گا اور کلام کرے گا۔ سولی کے نقطے پر کلام کرنے والوں کا استغاثہ جے آئی ٹی کی دس جلدوں میں بند نہیں ہوتا کیونکہ وہ تو صرف چاندی کے ان تیس سکوں کا حساب مانگتے ہیں جو کسی یہوداہ، میر جعفر، میر صادق، حکیم الٰہی بخش، جسٹس منیر یا مولوی مشتاق نے سچائی کے عوض وصول کیے تھے۔ کچھ لوگ اربوں ڈالر بازیاب کرنا چاہتے ہیں۔ ہمارے شہیدوں کے تابوت قاضی کی کچہری میں نہیں، وقت کی عدالت میں کھڑے ہو کر حساب مانگیں گے کیونکہ اڑھائی صدی پہلے لاہور کے نواح میں بھی تابوت ہی کا جھگڑا تھا اور تابوت میں بند درویش باصفا نے ہمیں بتا دیا تھا ’بلھے شاہ اسیں مرنا ناہیں، گور پیا کوئی ہور‘۔
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)