Category انٹرنیشنل

بھارتی ریاست کیرالا میں بارہ گھنٹوں کے دوران دو سیاسی رہنماؤں کو قتل کردیا گیا۔
بی جے پی رہنما رنجیت سری نواسن کو ان کی رہائش گاہ پر قتل کیا گیا، اس سے پہلے ایس ڈی پی آئی لیڈر کے ایس شان کو قتل کیا گیا تھا۔
ایس شان کے قتل کا الزام ان کی پارٹی نے انتہا پسند تنظیم آر ایس ایس پر عائد کیا ہے جبکہ پولیس نے امکان ظاہر کیا ہے کہ بی جے پی لیڈر کا قتل ایس ڈی پی آئی لیڈر کے قتل کا بدلہ ہو سکتا ہے۔

آرمی چیف جنرل قمر جاوید باجوہ نے کہا ہے کہ افغانستان میں انسانی المیہ سے بچنے کے لیے ہنگامی کاوشیں ناگزیر ہیں۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق سپہ سالار جنرل قمر جاوید باجوہ سے انڈونیشیا کی وزیرخارجہ نے ملاقات کی۔ ملاقات کے دوران باہمی دلچسپی کے امور اور دفاعی تعاون کے معاملات پر تبادلہ خیال کیا گیا اور افغانستان سمیت خطے کی سکیورٹی صورتحال پر بات چیت کی گئی۔
اس موقع پر آرمی چیف جنرل قمر جاوید باجوہ کا کہنا تھا کہ پاکستان علاقائی اور عالمی معاملات میں انڈونیشیا کے کردار کی قدر کرتا ہے، اسلام آباد اور جکارتہ کے ساتھ تعلقات کے فروغ کا خواہاں ہے۔ افغانستان کی بحرانی کیفیت ہنگامی ادارہ جاتی میکانزم کی تشکیل کی متقاضی ہے، افغانستان میں انسانی المیہ سے بچنے کے لیے ہنگامی کاوشیں ناگزیر ہیں، افغانستان میں امن و مفاہمتی اقدامات انتہائی اہمیت کے حامل ہیں۔

تل ابیب نے یو اے ای کے ساتھ آئل پائپ لائن ڈیل روک دی، درجنوں آئل ٹینکر ساحلی شہر ایلٹ میں روک دیئے،
وزیر برائے موسمیاتی تحفظ نے ٹینکرز روکنے کی تصدیق کر دی، پائپ لائن منصوبے کے تحت تیل اسرائیل سے یورپ پہنچایا جانا تھا، ٹینکرز سے تیل اسرائیل کے ساحلی شہر ایلٹ میں اتار کر پائپ لائن کے ذریعے بحرروم تک پہنچایا جانا تھا،دوسری جانب اسرائیلی وزیراعظم کا کہنا ہے کہ وزارت کے کام میں مداخلت نہیں کریں گے

امریکا کی متعدد ریاستوں میں طوفانی ہواؤں نے تباہی مچا دی، گھروں کی چھتیں اڑ گئیں،
تباہ کن بگولوں کے بعد طوفانی ہواؤں نے امریکا کی وسطی ریاستوں میں تباہی مچا دی، 4لاکھ سے زائد افراد بجلی سے محروم ہو گئے، آئیووا میں تیز ہوا کی زد میں آکر ٹرک الٹ گیا، طوفانی ہوائوں کے باعث کنساس شہر کے ایئر پورٹ کو خالی کرنا پڑ گیا جبکہ مختلف ہائی ویز کو ٹریفک کیلئے بند کرنا پڑا،،طوفانی ہوائوں سے مختلف علاقوں میں گھر تباہ ہو گئے، درخت جڑوں سے اکھڑ گئے، گلیوں اور سڑکوں پر ملبہ پڑا ہوا ہے ،معمولات زندگی درہم برہم ہونے اور تیز ہواؤں کی وجہ سے امدادی کاموں میں مشکلات کا سامنا کرنا پڑ رہا ہے،،امریکی قومی موسمیاتی سروس کے مطابق طوفان نے اب کینیڈا کی طرف رخ کرلیا ہے،۔ تباہ کن طوفان دسمبر کے مہینے میں وسطی اور شمالی ریاستوں میں غیر معمولی گرمی ہونے کی وجہ سے پیدا ہوا۔

امریکی صدر جوبائیڈن نے کرونا وائرس کے نئے ویرینٹ اومی کرون کے امریکا میں تیزی سے پھیلنے سے متعلق خبردار کیا ہے،،
صدر جوبائیڈن نے خبردار کرتے ہوئے کہا ہے کہ کرونا وائرس کا اومی کرون ویرینٹ امریکا میں زیادہ تیزی سے پھیل سکتا ہے،امریکا میں اومی کرون کے تیزی سے پھیلنے کے پیش نظر جوبائیڈن نے تمام امریکیوں کو کرونا ویکسین اور بوسٹر ڈوز لگوانے کی ہدایت کر دی،،دوسری جانب جی سیون ممالک نے بھی اومی کرون ویرینٹ کو عالمی صحت کے لیے سب سے بڑاخطرہ قرار دیتے ہوئے اتفاق کیا ہےکہ تمام ملک ایک دوسرے سے تعاون بڑھائیں اور اومی کرون کا ڈیٹا شیئرکریں۔

وزیرخارجہ شاہ محمود قریشی کہتے ہیں افغانستان کی فوری مدد نہ کی گئی تو انسانی بحران مزید بڑھ سکتا ہے،
شاہ محمود قریشی نے کہا ہے کہ افغانستان کی معاشی تباہی کے اثرات پڑوسی ممالک پر پڑیں گے، افغانستان اس وقت مخدوش معاشی و انسانی بحران کا سامنا کر رہا ہے، پاکستان کو افغانستان کا قریبی ہمسایہ ہونے کے ناطے اس صورت حال پر گہری تشویش ہے، ہم اپنی اقتصادی ترجیحات پر توجہ مرکوز کیے ہوئے ہیں، اقتصادی ترجیحات کو عملی جامہ پہنانے کیلئے پر امن افغانستان ہمارے مفاد میں ہے،افغانستان او آئی سی کا بنیادی ممبر ہے، انہیں تنہا نہیں چھوڑا جا سکتا جبکہ یورپی یونین کو بھی احساس ہو گیا ہے کہ افغانستان میں حالات بگڑے تو نقصان ہو گا،امریکی حکام کو بھی کہا جا رہا ہے ماضی کی غلطیوں سے سبق سیکھنا چاہیے،
وزیرخارجہ شاہ محمود قریشی نے کہا افغانستان 38 ملین نفوس پر مشتمل ملک ہے، یو این ڈی پی کے مطابق اگر افغانستان کی صورتحال پر فوری توجہ نہ دی گئی تو 2022 کے وسط تک 97 فیصد افغان سطح غربت سے نیچے چلے جائیں گے، ورلڈ فوڈ پروگرام کے مطابق افغانستان میں 5 فیصد افغانوں کو مناسب خوراک دستیاب ہے، گیارہ اہم امریکی شخصیات جن میں سابق سفراء اور کمانڈر شامل ہیں انہوں نے مشترکہ طور پر بائیڈن انتظامیہ سے مطالبہ کیا ہے کہ افغانستان کو انسانی المیے سے بچانے کیلئے انہیں تنہا نہ چھوڑا جائے۔

پاکستان کے ابھرتے نوجوان باکسر آصف ہزارہ نے انٹرنیشنل باکسنگ میلے میں ٹائٹل جیت کر ملک کا نام روشن کردیا ہے۔
دبئی میں منعقد ہونے والے انٹرنیشنل باکسنگ ایونٹ میں پاکستان کے آصف ہزارہ نے یوگینڈا کے باکسرکو شکست دے کر اے بی ایف ٹائٹل اپنے نام کرلیا۔ گلگت بلتستان سے تعلق رکھنے والے عثمان وزیر بھی تنزانیہ کے ٹاپ باکسر روسٹا کو ہرا کر ورلڈ باکسنگ کونسل مڈل ایسٹ چیمپئن بن گئے ہیں۔
قومی باکسرز کا کہنا ہے کہ وہ جیت پر اللہ کا شکر ادا کرتے ہیں اورمستقبل میں بھی پاکستان کے لیے فتوحات حاصل کرنے کی کوشش کریں گے

افغانستان میں 20 سال کے دوران اربوں ڈالرز اور جدید فوجی ہتھیار استعمال کرنے کے باوجود امریکا اور اتحادیوں کو شکست کی تحقیقات کے لیے امریکی گانگریس کے اراکین پر مشتمل کمیشن قائم کر دیا گیا ہے۔
قائم کردہ کمیشن 768ارب ڈالر کے سالانہ دفاعی بجٹ کا حصہ ہے جسے ایوان نمائندگان کے بعد امریکی سینیٹ نے بھی منظور کیا، افغانستان پر بنایا جانے والا کمیشن 16 ارکان پر مشتمل ہوگا۔
دونوں بڑی جماعتوں ڈیموکریٹک پارٹی اور ری پبلکن پارٹی کی طرف سے نامزد کیے جانے والے ارکان کو ایک سال کے اندر طالبان کی فتح کی ابتدائی اور 3 سال میں مکمل وجوہات کا پتہ چلانا ہو گا۔

روس اور چین نے مغربی مداخلت مسترد کرتے ہوئے ایک دوسرے کے سکیورٹی مفادات کا دفاع کرنے پر اتفاق کر لیا۔
روسی صدر پوٹن کے ساتھ آن لائن اجلاس میں صدر شی جن پنگ نے کہا کہ مختلف عالمی طاقتیں جمہوریت اور انسانی حقوق کی آڑ میں چین اور روس کے داخلی معاملات میں مداخلت کر رہی ہیں، وہ عالمی قوانین اور تعلقات کے تسلیم شدہ اصول بھی بری طرح پامال کر رہی ہیں۔
اجلاس کے دوران صدر پوٹن نے چین، روس تعلقات کا ماڈل اور چینی ہم منصب کو عزیز دوست قرار دیتے ہوئے کہا کہ وہ فروری میں بیجنگ گیمز میں شرکت کیلئے بیجنگ پہنچیں گے اور چینی ہم منصب کے ساتھ بالمشافہ ملاقات کریں گے۔

افغانستان کے سابق صدر حامد کرزئی نے کہا ہے کہ افغان طالبان نے ملک پر قبضہ نہیں کیا بلکہ انہیں اشرف غنی کے فرار ہونے کے بعد خود کابل آنے کی دعوت دی تھی۔
سابق افغان صدر حامد کرزئی نے ایک انٹرویو میں کہا عبد اللہ عبد اللہ اور دوحہ میں موجود طالبان قیادت اس حوالے سے ہونے والے معاہدے کا حصہ تھی۔ اشرف غنی کے جاتے ہی دیگر حکام بھی ملک چھوڑ گئے تھے۔ جب میں نے جنرل بسم اللہ خان کو فون کیا تو بتایا گیا اعلیٰ حکام میں سے شہر میں کوئی بھی موجود نہیں ہے۔
پندرہ اگست کی صبح افواہیں پھیلی ہوئی تھیں کہ طالبان نے کابل پر قبضہ کر لیا ہے جس پر انہوں نے دوحہ فون کیا جہاں سے انہیں بتایا گیا کہ طالبان شہر کے اندر داخل نہیں ہوں گے۔ دوپہر کے وقت طالبان نے حکومت سے کسی قسم کی کارروائی نہ کرنے کا کہا کیونکہ ان کا شہر میں داخل ہونے کا کوئی ارادہ نہیں ہے۔ اگر اشرف غنی کابل میں موجود رہتے تو اقتدار کی پرامن منتقلی ہو سکتی تھی۔
انہوں نے بتایا کہ مستقبل کے افغانستان کے لیے ضروری ہے کہ لڑکوں اور لڑکیوں کو یکساں تعلیم کے مواقع ملیں، ان کو سیاست میں جگہ بنانا ہو گی، معاشی میدان، انتظامی امور اور سماجی طور پر بھی، یہ ایسی چیزیں ہیں جن پر کوئی سمجھوتہ نہیں ہو سکتا۔ جب تک ایسا نہیں ہو جاتا دنیا کو طالبان کے ساتھ رابطہ رکھنا چاہیے۔ افغانستان کو اچھے انتظامات کی ضرورت ہے۔ سرکاری ملازمین کو تنخواہیں دینی ہیں جبکہ صحت کی سہولتوں کو بھی بہتر بنانا ہے۔ لڑکیوں اور خواتین کا مرد کے بغیر باہر گھر سے باہر نہ نکل سکنے کی بات درست نہیں، گلیوں میں لڑکیاں اور خواتین دیکھی جا سکتی ہیں۔