Category پاکستان

چیئرمین تحریک انصاف عمران خان نے وفاقی وزیر صحت عبدالقادر  پٹیل کو 10 ارب روپے ہرجانےکا نوٹس بھجوا دیا۔

نوٹس میں کہا گیا ہےکہ عبدالقادر  پٹیل 15 روز میں اپنے الزامات واپس لیں اور عمران خان سے غیر مشروط معافی مانگیں۔

نوٹس میں کہا گیا ہےکہ عبدالقادر پٹیل 10 ارب روپے بطور ہرجانہ ادا کریں، جسے شوکت خانم اسپتال میں جمع کروایا جائےگا۔

نوٹس میں کہا گیا ہےکہ عبدالقادر پٹیل نے معافی نہ مانگی تو قانونی کارروائی آگے بڑھائیں گے۔

خیال رہےکہ گزشتہ دنوں  وفاقی وزیر صحت عبدالقادر پٹیل نے سابق وزیراعظم عمران خان کی میڈیکل رپورٹ میڈیا کے سامنے پیش کی تھی جس میں انکشاف کیا  گیا کہ چیئرمین پی ٹی آئی کی رپورٹس میں شراب اور کوکین کا بے دریغ استعمال سامنے آیا ہے۔

عبدالقادر پٹیل کا کہنا تھا کہ عمران خان 5 سے 6 ماہ پلستر لگا کر گھومتے رہے لیکن کسی فریکچرکا رپورٹ میں ذکر نہیں ہے،گوشت میں کوئی چوٹ آجائے تو کسی کو پلستر کرتے دیکھا ہے؟ 

ان کا کہنا تھا کہ پیشاب کے نمونے بھی لیےگئے، ابتدائی رپورٹ میں ٹاکسک چیزیں جن میں شراب اور کوکین کا بے دریغ استعمال سامنے آیا ہے، رپورٹ میں یہ بھی کہا گیا ہے کہ عمران کی ذہنی حالت پر سوالیہ نشان ہے، ان کی حرکات و سکنات فٹ آدمی کی نہیں تھیں،  رپورٹ میں ہے کہ جس آدمی کی دماغی حالت ٹھیک ہو ایسی حرکات نہیں کرسکتا۔

کراچی:سندھ کے وزیر بلدیات ناصر حسین شاہ نے چیئرمین تحریک انصاف عمران خان کی سیاست کو ٹائی ٹینک جہاز کی تباہی سے جوڑ دیا۔

اپنے ایک بیان میں پیپلز پارٹی کے رہنما ناصر حسین شاہ نے کہا کہ پی ٹی آئی اور ٹائی ٹینک جہاز کے حادثات میں کافی مماثلت نظر آتی ہے، ٹائی ٹینک جہاز کا بھی وہ پہلا تجرباتی سفر تھا جس میں وہ ڈوب گیا، پی ٹی آئی کے اقتدار کا بھی یہ پہلا تجربہ تھا جس میں ان کی کشتی ڈوب گئی، عمران نیازی بھی ریٹائرڈ کپتان ہے اور ٹائی ٹینک کا کپتان بھی رائل نیوی کا ریٹائرڈ کپتان تھا۔

انہوں نے کہا کپتان ایڈورڈ سمتھ نے ٹائی ٹینک جہاز 12 اپریل 1912 میں ڈبویا، عمران نیازی نے بھی ٹھیک اپنے اقتدار کی کشتی دو دن پہلے 10 اپریل 2022 کو ڈبوئی، کپتان ایڈورڈ سمتھ نے بھی ٹائی ٹینک جہاز ڈبویا، عمران نیازی نے بھی پراجیکٹ عمران کے انجنیئر کی کشتی ڈبوئی، ٹائی ٹینک کا کپتان ایڈورڈ سمتھ ہیرو تھا جس نے مسافروں اور جہاز کے ساتھ خود کی بھی قربانی دی۔
 

اسلا م آباد: وفاقی وزیر  تعلیم رانا تنویر نے کہا کہ نواز شریف ہر صورت الیکشن سے پہلے پاکستان آئیں گے اور انتخابی مہم لیڈکریں گے ۔

ایک بیان میں رانا تنویر نے کہا کہ مذاکرات جمہوریت اور سیاست کا حصہ ہیں،کیا ہمیں دہشتگرد اور ملک دشمن عناصر سے مذاکرات کرنے چاہئیں۔

انہوں نے کہا کہ مذاکراتی ٹیم اگر چند روز میں پی ٹی آئی چھوڑ گئی تو مذاکرات کس سے ہوں گے؟ سپریم کورٹ کے معاملات افسوسناک ہیں۔

رانا تنویر کا کہنا تھا کہ آڈیو لیکس میں جن پرالزامات ہیں وہی منصف بنےبیٹھےہیں۔

اسلام آباد: وفاقی وزیر خزانہ اسحاق ڈار نے کہا ہےکہ ملکی معیشت کو مستحکم کرنے کی کوشش کررہے ہیں۔

اسلام آباد میں تقریب سے خطاب کرتے ہوئے اسحاق ڈار نے کہا کہ اسٹیٹ بینک ملک میں اسلامک فنانس کے فروغ کے لیے بھرپور کوشش کر رہا ہے اور گورنر اسٹیٹ بینک نے اسلامک فنانس کے فروغ کے لیے بڑی محنت کی ہے، اسلامک فنانس سے غربت کے خاتمے اور فنانشل سینٹر کی ترقی میں مدد ملے گی۔

انہوں نے کہا کہ دنیا میں اسلامک فنانسنگ تیزی سے بڑھ رہی ہے اور نان مسلم ممالک میں اسلامک فنانسنگ کا رجحان بڑھ رہا ہے، اسلامک فنانسنگ کے ذریعے حکومتی مالیاتی ضروریات کو پورا کیا جا سکتا ہے۔

وزیر خزانہ کا کہنا تھا کہ 16 ہزار سے زائد ادارے اسلامک فنانسنگ کیلئے ہیں، مجموعی طور پر 570 اسلامک بینک اور اسلامک فنانسنگ کی گروتھ 17 فیصد ہے، پاکستان میں اسلامک فنانس کا حجم 42 ارب ڈالر ہے اور پاکستان میں 2022 میں اسلامک فنانسنگ کی گروتھ 29 فیصد ریکارڈ ہوئی، پاکستان میں اسلامک بینکنگ اثاثوں کا حجم 7.2 ٹریلین روپے ہے، اسلامک بینکنگ میں ڈپازٹ کا حجم 5.2 ٹریلین روپے ہے۔

انہوں نے مزید کہا کہ اسلامک فنانس پاکستان کی معاشی ترقی کے لیے اہم ہے، ہم اسلامک فنانس کے فروغ کے لیے بھرپور کوشش کر رہے ہیں، عالمی سطح پر اسلامک فنانس 4 ہزار ارب ڈالر سے زیادہ ہے، 2026 میں اسلامک فنانس عالمی معیشت میں59 ہزار ارب ڈالر کو پہنچ جائے گی۔

وزیر خزانہ کا کہنا تھا کہ معیشت مستحکم کرنے کی کوشش کررہے ہیں اور کیپیٹل مارکیٹ کے فروغ کیلئے اہم اقدامات کیے جا رہے ہیں، تمام اسلامی ممالک کے اشتراک سے معاشی چیلنجز سے نکل سکتے ہیں۔

ملک میں امریکی ڈالر کی قدر میں اضافے کا سلسلہ آج بھی جاری رہا۔

اسٹیٹ بینک آف پاکستان کے مطابق انٹربینک میں کاروبار کے اختتام پر ڈالر کا بھاؤ 285.41 روپے ہے۔

انٹربینک میں ڈالر آج 26 پیسےمہنگا ہوا ہے۔ انٹربینک میں گزشتہ روز ڈالر 285.15 روپے پر بند ہوا تھا۔

دوسری جانب اوپن مارکیٹ میں ڈالر ایک روپیہ مہنگا ہوکر  311 روپےکا ہوگیا ہے

لاہور: نگران وزیراعلیٰ پنجاب محسن نقوی نے کہا ہےکہ خدیجہ شاہ پولیس کی حراست میں ہیں۔

لاہور میں میڈیا سے گفتگو کرتے ہوئے نگران وزیراعلیٰ محسن نقوی نے جیل میں خواتین سے بدسلوکی کی خبروں کی تردید کی۔

انہوں نے کہا کہ 9 مئی کو 32 خواتین گرفتارہوئی تھیں جن میں سے 11 جیل میں ہیں،  ماؤں بہنوں کا تحفظ میری ذمہ داری ہے۔

نگران وزیراعلیٰ کا کہنا تھا کہ خدیجہ شاہ پولیس کی حراست میں ہیں، وہ جیل میں ہیں ان کی شناخت پریڈ چل رہی ہے۔

انہوں نے مزید کہاکہ جناح ہاؤس میں جو ملوث ہوا خواہ جتنا بھی بااثر ہو اسے نہیں چھوڑا جائے گا۔

بلوچستان کے علاقوں قلعہ عبداللہ، پشین، زیارت، دکی اور ہرنائی میں موسلا دھار بارشوں کا امکان ہے۔محکمہ موسمیات کے مطابق پنجاب، خیبر پختونخوا، بالائی سندھ، شمال مشرقی بلوچستان اور کشمیر میں آندھی، جھکڑ کے ساتھ بارش ہو سکتی ہے۔گزشتہ روز ملتان شہر اور گردونواح میں موسلا دھار بارش اور ژالہ باری کے نتیجے میں مختلف حادثات میں خاتون جاں بحق اور 3 افراد زخمی ہوگئے۔طوفانی بارش اور ژالہ باری کے باعث بجلی کا نظام درہم برہم ہوگیا اور 200 سے زائد فیڈرز بھی ٹرپ کر گئے

سابق گورنر سندھ اور سابق وزیراعظم عمران خان کے قریبی ساتھی عمران اسماعیل نے پاکستان تحریک انصاف کو خیرباد کہہ دیا۔

کراچی پریس کلب میں پریس کانفرنس کرتے ہوئے عمران اسماعیل کا کہنا تھاکی آج شاید میری آخری سیاسی پریس کانفرنس ہے، میں پاکستان تحریک انصاف کے بانی ارکان میں سے ہوں، ترقی، خوشحالی والے پاکستان کا خواب دیکھا تھا، پونے چار سال حکومت میں رہا، ناتجربے کاری تھی۔

انہوں نے کہا کہ 27 سالہ جدوجہد کے بعد ملنے والی حکومت پونے چار سال میں فارغ ہوئی، یہ بیانیہ بننا شروع ہوگیا کہ پی ٹی آئی کا مقابلہ پاک فوج سے ہے، میرا خاندان فوج سے نہیں، لیکن میرا دل پاک فوج کے ساتھ ہے، بچپن سے خواہش تھی کہ جی ڈی پائلٹ بنوں۔

عمران اسماعیل کا کہنا تھاکہ فوجی تنصیبات پر حملہ کرنے والوں کو سزا ملنی چاہیے، 9 مئی کے بعد کچھ دن چھپتا پھرا، پھر پکڑا گیا۔

انہوں نے اعلان کیا کہ کسی کا دل ٹوٹا ہو تو معافی چاہتا ہوں، پی ٹی آئی اور اس کے تمام عہدے چھوڑ رہا ہوں، عمران خان آپ کو خدا حافظ کہتا ہوں اور  پاکستان تحریک انصاف کو اللہ حافظ کہتا ہوں۔

پاکستان تحریک انصاف (پی ٹی آئی) کے 9 رہنماؤں کے ڈپلومیٹک پاسپورٹ منسوخ کردیے گئے۔

شاہ محمود قریشی، اسد عمر، پرویز خٹک، اعظم سواتی، علی امین گنڈا پور کے ڈپلومیٹک پاسپورٹ منسوخ کیے گئے ہیں۔

فرخ حبیب، عون عباس بپی، زرتاج گل اور علی محمد خان کے بھی ڈپلومیٹک پاسپورٹ منسوخ کر دیے گئے۔

اس کے علاوہ عوامی مسلم لیگ کے سربراہ شیخ رشید کا ڈپلومیٹک پاسپورٹ بھی منسوخ کیا گیا ہے۔

پاکستان تحریک انصاف (پی ٹی آئی) کے سابق ایم این اے حاجی شوکت علی نے پارٹی چھوڑنے کا اعلان کر دیا۔

پشاور میں میڈیا سے گفتگو کرتے ہوئے حاجی شوکت علی نے کہا کہ پی ٹی آئی کے تمام عہدوں سے استعفیٰ دیتا ہوں۔

انہوں نے کہا کہ تحریک انصاف کی رکنیت سے اور ایڈوائزری کمیٹی سے بھی استعفیٰ دیتا ہوں۔شوکت علی کا کہنا ہے کہ مشاورت کے بعد سیاست سے متعلق فیصلہ کروں گا۔

واضح رہے کہ پاکستان تحریکِ انصاف (پی ٹی آئی) کے متعدد اہم رہنما حالیہ دنوں میں پارٹی چھوڑنے کا اعلان کر چکے ہیں۔

ان میں سے بعض رہنماؤں نے سیاست سے لاتعلقی و کنارہ کشی تک کا اعلان کر دیا ہے۔