Category سیاست

اسلام آباد: الیکشن کمیشن نے فواد چوہدری اور اسد عمر کے خلاف توہین الیکشن کمیشن کیس کی سماعت 22اگست تک ملتوی کردی۔بدھ کے روز الیکشن کمیشن میں فواد چوہدری اور اسد عمر کے خلاف توہین الیکشن کمیشن کیس کی سماعت کے موقع پر فواد چوہدری کے وکیل فیصل چوہدری نے کمیشن سے سماعت ملتوی کرنے کی درخواست کردی جس پر ممبر کمیشن اکرام اللہ خان نے کہاکہ فواد چوہدری نے تو آج معافی نامہ جمع کرانا تھا اس موقع پر ممبر سندھ نثار درانی نے کہاکہ اسد عمر کے وکیل نے طبی بنیادوں پر سماعت ملتوی کرنے کی درخواست جمع کرائی ہے جس پر اسد عمر نے کمیشن کو بتایا کہ کیس کے قانونی پہلو وں کے بارے میں وکلاء بہتر بتائیں گے انہوں نے کہاکہ پاکستان اس وقت الیکشن کی طرف جارہا ہے اور ملک میں شفاف الیکشن جمہوریت کیلئے انتہائی ضروری ہے جس پر ممبر سندھ نے کہاکہ الیکشن کمیشن شفاف انتخابات کرانے کیلئے پرعزم ہے ،اسد عمر نے کہاکہ 22 اگست تک الیکشن کمیشن نے انتخابات کا شیڈول جاری کرنا ہے اورالیکشن شیڈول کے وقت پاکستان کی سب سے بڑی سیاسی جماعت کے خلاف کیسز سے کیا تاثر جائے گا ،جس پر ممبر سندھ نے کہاکہ اس حوالے سے سیاسی جماعتوں کو سوچنا چاہیے وہ اداروں کو کتنا مضبوط کر رہے ہیں ،انہوں نے کہاکہ الیکشن کمیشن ایک سال سے یہ کیسز چلا رہا ہے ممبر خیبر پختونخوا نے کہاکہ کیسز پر فریقین کی جانب سے حکم امتناعی لیے گئے اور استثنیٰ کی درخواستیں دی گئی ہیں ،انہوں نے کہاکہ کیسز پر حکم امتناعی واپس لے لیں تو ایک ہفتے میں فیصلہ سنا دیں گے، ممبر سندھ نے کہاکہ سیاستدانوں نے ملک کو چلانا ہے ان کو سوچنا ہوگا انہوں نے کہاکہ الیکشن کمیشن اس کیس کو ایک ماہ میں نمٹا سکتا تھا، اس موقع پر الیکشن کمیشن نے اسد عمر اور فواد چوہدری کو ائندہ سماعت پر ذاتی حیثیت میں طلب کرتے ہوئے کیس کی سماعت 22اگست تک ملتوی کردی بعدازاں الیکشن کمیشن کے باہر میڈیا سے بات چیت کرتے ہوئے اسد عمر نے کہاکہ اس کیس کے مختلف پہلو ہیں توہین پر سزا دینے کا اختیار صرف سپریم کورٹ اور ہائی کورٹ کو ہے انہوں نے کہاکہ اسمبلی کے صرف دس دن رہ گئے ہیں ہم چاہتے ہیں کہ الیکشن کمیشن پر تمام سیاسی جماعتوں کو اعتماد ہو ایک طرف الیکشن شیڈول جاری ہو رہا ہو گا تو دوسری پی ٹی آئی کے خلاف کیس کی سماعت ہو گی۔

اسلام آباد: توہین الیکشن کمیشن، پی ٹی آئی چیرمین کے خلاف فرد جرم عائد نہ ہوسکی ، الیکشن کمیشن نے 22اگست کو فرد جرم عائد کرنے کی تاریخ دیتے ہوئے سماعت ملتوی کردی۔ بدھ کے روز ممبر سندھ نثار درانی کی سربراہی میں چاررکن بنچ نے پی ٹی آئی چیرمین کے خلاف توہین الیکشن کمیشن کیس کی سماعت کی اس موقع پر پی ٹی آئی چیرمین کمیشن کے سامنے پیش نہ ہوئے اور اس کے وکیل شعیب شاہین نے حاضری سے استشناء کی درخواست دیدی جس پر ممبرکمیشن اکرام اللہ خان نے کہاکہ توہین عدالت کیس میں کیسے استثنیٰ کی درخواست منظورکرلیںآج توچیئرمین پی ٹی آئی پرفرد جرم عائد کرنا تھا جس پر وکیل نے کہاکہ کہ چیئرمین پی ٹی آئی پرتاحال جرم ثابت نہیں ہوا ہے انہوںنے کمیشن کو بتایا کہ مجھے ابھی تک تمام کیسز کا ریکارڈ نہیں ملا ہے اور صرف ایک کیس کا ریکارڈ ملا ہے جس پر ممبر سندھ نثار درانی نے کہاکہ کیا آپ چاھتے ہیں آپ کو مزید وقت دیا جائے کمیشن کے ممبر پنجاب بابر حسن بھروانہ نے پی ٹی آئی وکیل سے استفسار کیا کہ آپ کو کب تک کی تاریخ چاہیے جس پر پی ٹی آئی چیرمین کے وکیل نے کہاکہ توہین الیکشن کمیشن کیس میں قانون کو فالو کرنا ہوتا ہے کمیشن نے کیس کی سماعت 22 اگست تک ملتوی کرتے ہوئے کہاکہ 22اگستکوفردجرم عائد کریں گے

اسلام آباد:سپریم کورٹ نے فوجی عدالتوں میں سویلینز کے ٹرائل کے خلاف درخواستوں پر فل کورٹ بنانے کی استدعا مسترد کردی اور چیف جسٹس آف پاکستان نے کہا کہ ججز میسر نہیں ہے ،کچھ جج چھٹیوں پر ہیں ،عدالت نے پہلے ہی دستیاب ججز پر مشتمل 9 رکنی لارجر بنچ بنایا تھا ،اب ستمبر سے قبل فل کورٹ بنانا ممکن نہیں ہے جس کے بعد 6 رکنی لارجر بنچ نے ہی دوبارہ فوجی عدالتوں میں سویلینز کے ٹرائل کیس کی سماعت شروع کر دی ۔سپریم کورٹ میں فوجی عدالتوں میں عام شہریوں کے ٹرائل کے خلاف کیس کی سماعت ہوئی۔فیصلے سے قبل اٹارنی جنرل نے روسٹرم پر آکر کہا کہ گرفتار افراد کی فیملیز سے ملاقات کروائی گئی ہے، فوجی عدالتوں کے فیصلوں میں مکمل وجوہات کی یقین دہانی ہم کرواچکے ہیں، یہ بھی یقین دہانی کروائی ہے کہ کسی شخص کو سزائے موت یا عمرقید نہ ہو، تمام 102 افراد کے وقار اور احترام کی ضمانت دی جاتی ہے، کسی کے ساتھ برا برتاؤ نہیں ہوا۔اٹارنی جنرل نے بتایا کہ میں نے خود چیک کیا، کسی ملزم کے ساتھ ناروا سلوک نہیں ہوا، ملزمان کو صحت سمیت تمام سہولیات میسر ہیں، ان کے خلاف ناروا سلوک ہوا تو ایکشن ہوگا۔عدالت نے فل کورٹ کی تشکیل پر محفوظ فیصلہ سناتے ہوئے فل کورٹ بنانے کی استدعا مسترد کردی

لندن /اسلام آباد:وزیر اعظم شہباز شریف نے قائد ن لیگ اور سابق صدر آصف زرداری سے ٹیلی فونک رابطہ کیا ہے اور ان سے ملک کی موجودہ سیاسی صورت حال اورنگران وزیراعظم کے تقرر کے معاملے پر مشاورت کی ہے ،ذرائع کے مطابق تینوں کا اس بات پر اتفاق تھا کہ آئین و قانون کے مطابق نگران وزیر اعظم کے تقرر کا عمل مکمل کیا جائیگااور 90 دن کے اندر نگران حکومت انتخابات کروا دے گی ۔ذرائع کے مطابق شہباز شریف نے ان پانچ امید واروں کے ناموں پر بھی آصف زرداری اور نواز شریف سے مشاورت کی جو پیپلز پارٹی اور ن لیگ نے شارٹ لسٹ کئے ہیں ،ان ناموں میں دو سابق بیورو کریٹ ،دو سیاست دان اور ایک ٹیکنوکریٹ کا نام شامل ہے ،وزیر اعظم شہباز شریف نے آصف زرداری سے کہا کہ وہ ان ناموں کو دیگر اتحادیوں کے سامنے پیش کریں تا کہ اتفاق رائے سے فیصلہ ہو سکے۔

اسلام آبا د: توہین الیکشن کمیشن کیس میں فواد چوہدری نے معافی نامہ الیکشن کمیشن کو جمع کرا دیا،، چیف الیکشن کمشنر نے ریمارکس دیئے کمیشن معافی نامہ دیکھ کر فیصلہ کرے گا ۔فواد چوہدری کے خلاف توہین الیکشن کمیشن کیس کی سماعت چیف الیکشن کمشنر کی سربراہی میں پانچ رکنی بنچ نے کی۔ فواد چوہدری الیکشن کمیشن میں پیش ہوئے جبکہ وکیل فیصل چوہدری نے معافی نامہ الیکشن کمیشن کو جمع کرا دیا۔ ممبر کمیشن نے استفسار کیا کسی کو برا بھلا کہنا پارٹی پالیسی ہو سکتی ہے؟ جوابا فواد چوہدری کہا کہ ماحول ہی ایسا بنا ہوا تھا ملک کا، سمجھ نہیں آ رہی تھی تلخیوں میں کہاں جائیں گے؟ چیف الیکشن کمشنر نے ریمارکس دیے معافی کی پہلی تین لائن میں آپ نے کنڈیشن ڈالی ہیں، آپ پراپر طریقے سے معافی لکھتے ورنہ شو کاز نوٹس کا جواب دے دیتے۔ فواد چوہدری کے وکیل نے مؤقف اپنایا یہ تکنیکی معاملات ہیں، ہماری معافی کو قبول کریں۔ چیف الیکشن کمشنر نے واضح کیا کمیشن معافی نامہ دیکھ کر فیصلہ کرے گا اور معافی نامہ دیکھ کر اگلی سماعت پر فیصلہ دے گا۔ الیکشن کمیشن میں کیس کی سماعت پندرہ اگست تک ملتوی کردی گئی۔

اسلام آباد:وفاقی وزیر داخلہ رانا ثنا اللہ عراق کے چار دورہ روزہ دورے پر علمائے کرام کے وفد کے ساتھ عراق روانہ ہو گئے ،اپنے دورے کے دوران وزیر داخلہ عراقی صدر، وزیر اعظم اور وزیر داخلہ سے ملاقات کریں گے،ہر سال لاکھوں زائرین عراق کا سفر کرتے ہیں، جن کو ویزہ کے حصول اور وہاں قیام سے متعلق مشکلات کا سامنا ہوتا ہے، پچھلے سال یہ صورتحال ایک بحرانی کیفیت اختیار کر گئی تھی۔دورے کے دوران زائرین کی سہولت اور ان مشکلات کے حل سے متعلق عراقی حکومت سے بات کی جائے گی اور اس ضمن میں ایک معاہدہ بھی کیا جائے گا،وزیر داخلہ پاکستانی سفارت خانہ میں عراق میں مقیم پاکستانیوں کیلئے مشین ریڈ ایبل پاسپورٹ سسٹم کا افتتاح بھی کریں گے

اسلام آباد:جمعیت علمائے اسلام (ف) کے سربراہ اور پاکستان ڈیموکریٹک موومنٹ (پی ڈی ایم) کے صدر مولانا فضل الرحمٰن نے کہا ہے کہ کیا مجھے اعتماد دلا سکتے ہیں کہ ریاست میری جان کی حفاظت کرسکتی ہے یا نہیں، ہماری پارٹی امن کی جماعت ہے، کارکنوں کو کہوں گا کہ صبر و تحمل کا دامن نہ چھوڑیں، موجودہ صورتحال کے پیش نظر جے یو آئی کی مرکزی مجلس شوری کا اجلاس طلب کرلیا ہے لیکن اس سے پہلے قبائلی زعما کا جرگہ بلانے کی تجویز آئی ، کچھ عرصہ پہلے کورم ایجنسی میں فرقہ وارانہ فسادات بھڑکائے گئے، پورا پشتون بیلٹ آج جل رہا ہے، پوری قوم ریاستی اداروں کی طرف دیکھ رہی ہے وہ کس چیز کی تنخواہ لیتے ہیں ،ملک بھر میں انٹیلیجنس کے 26 ادارے ہیں وہ کہاں غائب ہیں؟ورکرز کنونشن پر ہونے والے حملے پراپنے شدید ردعمل میں مولانا فضل الرحمن نے کہا کہ موجودہ صورتحال کے پیش نظر جے یو آئی کی مرکزی مجلس شوری کا اجلاس طلب کرلیا ہے لیکن اس سے پہلے قبائلی زعما کا جرگہ بلانے کی تجویز آئی ہے۔ان کا کہنا تھا کہ یہ تجویز سامنے آئی ہے کہ زعما اور پختون قیادت بیٹھے اور اس خطے کے بارے میں سوچیں کہ حال میں خیبر ایجنسی میں دو واقعات ہوئے جس میں مسلمانوں کا خون بہا ہے۔مولانا فضل الرحمٰن نے کہا کہ کچھ عرصہ پہلے کورم ایجنسی میں فرقہ وارانہ فسادات بھڑکائے گئے، پورا پشتون بیلٹ آج جل رہا ہے، بلوچ بیلٹ جل رہا ہے، کراچی تک فسادات کی لہر تھم نہیں رہی۔سربراہ جے یو آئی (ف) نے سوال اٹھایا کہ کیا ہمارے ریاستی ادارے صرف اس بات کے لیے رہ گئے ہیں کہ وہ کسی غریب مولوی صاحب کو تھانے میں لے آئیں اور ان پر الزمات لگائیں کہ تمہارے پاس کسی نے کھانا کھایا یا چائے پی ؟ یہی ان کی صلاحیتیں ہیں ؟ ملک بھر میں انٹیلیجنس کے 26 ادارے ہیں وہ کہاں غائب ہیں؟انہوں نے کہا کہ کیا مجھے اعتماد دلا سکتے ہیں کہ ریاست میری جان کی حفاظت کرسکتی ہے یا نہیں یا صرف مجھ سے ٹیکس وصول کریں گے اور میری جان ومال کی حفاظت نہیں کریں گے ؟ان کا کہنا تھا کہ مجھے شکایت ہے، مجھے کرب ہے، میں نے ریاست کو بچانے کے لیے قربانیاں دی ہیں، میں نے اس ریاست کے بقا اور استحکام کے لیے جد وجہد کی ہے، میں ریاست کے شانہ بشانہ کھڑا رہا ہوں لیکن اکیلے ایک جماعت کیا کرسکتی ہے۔مولانا فضل الرحمٰن نے کہا کہ پوری قوم ریاستی اداروں کی طرف دیکھ رہی ہے جو ریاست کی حفاظت کے ذمہ دار اور مسؤول ہیں، اسی کے لیے وہ تنخواہیں لے رہے ہیں وہ کہاں ہیں آج ؟سربراہ پی ڈی ایم نے کہا کہ ریاستی ادارے کب ہمارے شکوں کا ازالہ کریں گے، کب وہ ہمارے زخموں کا مرہم بنیں گے، کب وہ ہمارے مستقبل اور آنے والی نسلوں کی حفاظت کا نظام بنائیں گے؟انہوں نے کہا کہ ان ساری چیزوں پر قومی سطح پر غور کرنا ہے، عنقریب اس حوالے سے ہمہ جہت رابطے کریں گے، سیاسی اور مذہبی ذمہ داروں کے ساتھ گفتگو بھی کریں گے۔ان کا کہنا تھا کہ ساری صورتحال کو سامنے رکھیں گے کہ ہم سالہا سال سے جس کرب میں ہیں اور جس کرب کا اظہار کر رہے ہیں،کرب کا اظہار جرم ہوجاتا ہے لیکن ہمیں کرب میں مبتلا کرنے والے دندناتے پھر رہے ہیں۔جے یو آئی (ف) کے سربراہ نے کہا کہ ہم بری طرح دہشت گردی کا شکار ہیں لیکن دہشت گردی کا خاتمہ مقصود ہونا چاہیے، اس پر تجارت کی اجازت نہیں دی جا سکتی، جرم کا خاتمہ چاہیے، اس کو اپنے مقاصد کے لیے استعمال کرنا خود بہت بڑا جرم ہے۔انہوں نے کہا کہ ہماری پارٹی امن کی جماعت ہے، کارکنوں کو کہوں گا کہ صبر و تحمل کا دامن نہ چھوڑیں، ملک میں سب نظم و ضبط کا مظاہرہ کرنے والے کارکن جے یو آئی (ف) کے ہیں۔

اسلام آباد : پاکستان منرل سمٹ کا افتتاحی سیشن ہوا جس میں وزیراعظم شہباز شریف اور آرمی چیف جنرل سید عاصم منیر نے شرکت کی۔ آرمی چیف جنرل عاصم منیر نے قرآن پاک کی آیات اور علامہ اقبال کے شعر کے ساتھ تقریر کا اآغاز کیا۔آرمی چیف جنرل عاصم منیر نے منرل سمٹ سے خطاب کرتے ہوئے کہا ہے کہ فوج بطور ادارہ خوشحالی ترقی کے سفر میں ریاست کیساتھ کھڑا ہے۔یہ منصوبہ لوکل کمیونٹی کا اوپر اٹھائے گا۔مائننگ منصوبہ میں سرمایہ کاری کرنے کو والوں کو مکمل سیکورٹی فراہم کی جائے گی۔ یہ سمٹ بہت اہم ہے،ہم مقام ریڈ ٹیپ ازم سے نکلنا چاہتے ہیں۔بیوروکریٹ رکاوٹوں سے نکلنا چاہتے ہیں۔ہم نے ملٹری ، سول بیوروکریسی،وفاق، صوبائی حکومتوں کے ساتھ مل کر ایک ادارہ بنایا ہے۔آرمی چیف نے مزید کہا کہ اللہ مہربان ہے، پاکستان کی ترقی کے لیے آگے آئیں اور کامیابیاں سمیٹیں، ہمارے پاس جو وسائل ہیں ہم نے انہیں دریافت کرنا ہے،پاکستان کی ترقی کے لئے تمام افسران مل کر کام کریں، ہاتھ سے ہاتھ اور کندھے سے کندھا ملا کر ہم نے پاکستان کو ترقی کی جانب لے کر جانا ہے۔خدا بھی ان کی مدد کرتا ہے جو اپنی حالت بدلنے کی کوشش کرتے ہیں،اللہ نے کہا میں تمہیں آزماؤں گا، کبھی بھوک سے، کبھی خوف سے،کبھی جان سے لیکن جو لوگ صبر دکھاتے ہیں کامیابی انہی کی ہوتی ہے۔ رب نے جو زندگی دی ہے پھر لوٹ کر اسی کی جانب جانا ہے۔اللہ فرماتے ہیں کہ امن اور خوشحالی کے راستے پر مشکلات کے باوجود ڈٹے رہو، فوج بطور ادارہ خوشحالی و ترقی کے سفر میں ریاست کیساتھ کھڑا ہے،آرمی چیف نے کہا کہ ہم پاکستان کو اوپر لے جانا چاہتے ہیں، ہم مل کر محنت کرکے ملک کو درپیش مشکلات سے نکالیں گے۔ ہم نے گرین انشی یٹو بھی اسی لیے لیا ہے۔بطور قوم ہم سب آگے نکلیں گے،محنت کریں گے اور انشاءاللہ ، اللہ کامیابی بھی دے گا

اسلام آباد:وزیراعظم شہباز شریف سے چیف آف نیول سٹاف امجد خان نیازی نے ملاقات کی ہے جس میں پاک بحریہ سے متعلق پیشہ ورانہ امور پر تفصیلی تبادلہ خیا ل کیا گیا،ملاقات میں چیف آف نیول سٹاف نے وزیراعظم کو پاک بحریہ کو مقامی سطح پر ہتھیاروں و جنگی جہازوں کی تیاری کی حکمت عملی سے آگاہ کیا، نیول چیف نے اس حکمت عملی کے تحت پاکستان کو دفاعی اعتبار سے خودکفیل بنانے اور جدید ٹیکنالوجی کے حصول کے حوالے سے جاری اقدامات سے بھی آگاہ کیا۔

اسلام آبا د:چیف الیکشن کمشنر نے ملازمین کو بڑا ریلیف دیدیا ،الیکشن کمیشن آف پاکستان نے گریڈ 1 سے 15 کے ملازمین کی اپ گریڈیشن کی منظوری دیدی ، 261 ملازمین کو اگلے گریڈ میں ترقی کی منظوری دی گئی ،الیکشن کمیشن نے باضابطہ نوٹیفکیشن جاری کر دیا ،گریڈ 1 سے 5 کے ملازمین کو دو گریڈ ترقی دی گئی ،وزیراعظم نے فروری میں اپگریڈیشن کی منظوری دی تھی،ملازمین کی اپگریڈیشن 5 ماہ سے التوا کا شکار تھی۔