Category شوبز

پاکستانی اداکار اور پروڈیوسر ہمایوں سعید کو متحدہ عرب امارات کا گولڈن ویزا مل گیا۔
ہمایوں سعید نے متحدہ عرب امارات حکومت کا شکریہ ادا کرتے ہوئے لکھا کہ یو اے ای کا گولڈن ویزا حاصل کرنا میرے لیے اعزاز کی بات ہے، یہاں کے لوگوں نے ہمیشہ ہی مجھے پیار دیا اور میرے کام کی تعریف کی، جس کا میں بہت مشکور ہوں۔

معروف پاکستانی اداکارہ کبریٰ خان نے اپنی زندگی کے مشکل ترین وقت کا احوال بتایا ہے۔
کبریٰ خان نے حال ہی میں ایک ویب شو کو انٹرویو دیا جس میں انہوں نے اپنی صحت سے متعلق کئی انکشافات کیے۔
اداکارہ نے بتایا کہ گزشتہ دو سال میرے لیے خوفناک تھے، ایک تو کووڈ تھا پھر کچھ دیگر چیزیں میری زندگی میں چل رہی تھیں۔ اسی دوران میں رواں برس ماہِ جنوری میں لندن چلی گئی، ان دنوں میرے وزن میں غیر معمولی اضافہ ہو رہا تھا جس پر میں اپنا چیک اپ کروانے ڈاکٹر کے پاس گئی۔
دوران انٹرویو کبریٰ خان نے انکشاف کیا کہ چیک اپ کے بعد ڈاکٹر نے میرے جسم میں گِلٹی دریافت کی جس کے بعد انہوں نے خدشہ ظاہر کیا کہ ممکنہ طور پر یہ کینسر ہے، مجھے اس چیز کی بالکل توقع نہیں تھی۔
کبریٰ خان نے کہا کہ اس وقت میں نے سوچا کہ الحمد اللہ مجھے بروقت اس بیماری کا علم ہوگیا، ڈاکٹرز نے اس وقت کہا کہ میرا فوری طور پر آپریشن کرنا ہوگا تاکہ گلٹی نکال کر دیکھا جاسکے کہ اگر یہ کینسر ہے تو آپ کون سے اسٹیج پر ہیں۔
اداکارہ نے بتایا کہ میرے دو آپریشنز کیے گئے جس کے بعد ڈاکٹروں نے بتایا کہ یہ کینسر نہیں تھا لیکن علاج میں تھوڑی سی مزید دیر ہوتی تو یہ کینسر کی بدترین قسم میں تبدیل ہو سکتا تھا۔
اداکارہ نے مزید کہا کہ جب میں پاکستان واپس لوٹی تو سب نے میرے وزن پر بات کی کیونکہ لوگ اس بات سے لاعلم تھے کہ میں لندن سے کون سی جنگ لڑ کر آرہی ہوں۔

پاکستانی اداکار ارسلان اسد بٹ ترک اداکارہ اسرا بلگیج کے ہمراہ جلد ہی ایک پراجیکٹ میں دکھائی دیں گے۔
اسلامی فتوحات پر مبنی معروف ترک سیریز ارطغرل غازی میں اسرا بلگیج نے حلیمہ سلطان کا کردار ادا کیا تھا جسے پاکستان میں مقبولیت حاصل ہوئی۔
تاہم اب اداکار ارسلان بٹ نے انسٹاگرام پر تصویر شیئر کی اور کیپشن میں بتایا کہ دونوں ایک پراجیکٹ میں ساتھ کام کر رہے ہیں۔ اداکار نے اپنی پوسٹ میں لکھا کہ یہ تصویر سیٹ پر لی گئی تھی۔
ارسلان بٹ نے ترک اداکارہ کے حوالے سے کہا کہ مجھے ان کے ساتھ کام کرکے بہت مزہ آیا، یہ ایک شائستہ مزاج خاتون ہیں جن کی کمپنی میں سیٹ پر کافی محظوظ ہوا۔
انہوں نے اسرا کو مینشن کرتے ہوئے یہ بھی کہا کہ آپ کے پاکستان آنے کا انتظار رہے گا، پاکستانی کھانے آپ کا انتظار کر رہے ہیں۔
ارسلان بٹ نے مداحوں کو یہ بھی بتایا کہ وہ جلد ہی اس پراجیکٹ کی تفصیلات شیئر کریں گے۔
اداکار نے انسٹا اسٹوری پر بھی ایک تصویر شیئر کی جو غالباً پراجیکٹ کی عکسبندی کے دوران لی گئی تھی۔

سابقہ مس ورلڈ اداکارہ ایشوریا رائے کو پانامہ کیس کے سلسلے میں انفورسمنٹ ڈائریکٹوریٹ (ای ڈی) نے پوچھ گچھ کے لیے طلب کیا ہے۔
ایشوریا رائے بچن کو پاناما پیپرز کیس کی تحقیقات کرنے والی خصوصی تحقیقاتی ٹیم نے کہا ہے کہ وہ ہی ای ڈی کے دہلی کے دفتر آکر اپنا بیان ریکارڈ کروائیں تاہم اداکارہ نے سماعت ملتوی کرنے کی درخواست کی ہے۔
اس سے قبل اداکارہ کو 9نومبر 2021کو بھی نوٹس بھیجا گیا تھا جس کے مطابق انہیں 15دن میں ہی جواب جمع کروانا تھا جبکہ ایشوریا نے جواب جمع کروانے کے لیے دو بار اضافی وقت مانگا تھا۔
بھارتی میڈیا کا کہنا ہے کہ ایشوریا رائے پر منی لانڈرنگ کی روک تھام ایکٹ 2002(پی ایم ایل اے) کے تحت مقدمہ درج کیا گیا ہے۔

پاکستانی شوبز انڈسٹری کی سابقہ اداکارہ صنم چودھری نے اداکاری کو خیر باد کہنے کی وجوہات بتا دیں۔
صنم چوہدری کہتی ہیں اداکاری میں کامیابی حاصل کرنے کے لیے دِن رات محنت کی اور کامیاب بھی ہوئی، مجھے بہترین اداکارہ کا ایوارڈ بھی مِلا، زندگی بالکل سیٹ تھی اور بہت مزہ آرہا تھا۔ میں جو مانگتی تھی وہ اللہ مجھے دے دیتا تھا، مجھے شادی کرنی تھی، اللہ تعالیٰ نے کروادی، اولاد عطا کی مجھے ہر چیز سے نوازا۔
سابقہ اداکارہ نے کہا کہ ایک بات جو میرے دل سے نکل رہی ہے وہ یہ کہ اصل میں مجھے پتہ نہیں تھا کہ مرنا بھی ہے، یہ وہ وقت تھا جب مجھے احساس ہوا کہ کہیں میں بطور اداکارہ دنیا کو خوش کرنے کے لیے اپنے رب کو ناراض تو نہیں کر رہی۔
صنم نے بات جاری رکھتے ہوئے کہا کہ میرے پاس سب کچھ تھا لیکن پھر بھی کچھ کمی لگتی تھی، بعد میں احساس ہوا کہ میرے پاس سکون نہیں تھا، ہر طرف ایک دوڑ لگی ہوئی تھی، سمجھ نہیں آتا تھا کہ اس کا اختتام کیا ہوگا۔
انہوں نے کہا کہ ایک دن میں نے خود سے سوال کیا تو احساس ہوا کہ آخر زندگی میں مجھے چاہیے کیا؟ سب کچھ ہونے کے باوجود مزید کس چیز کی خواہش ہے؟ میں نے اپنی تمام تر توجہ قرآن کی طرف لگائی، اسے پڑھنا شروع کیا اور تفسیر پڑھی جس نے میری زندگی بدل دی۔

تھیٹر ویڈیو سکینڈل کی متاثرہ اداکارہ زارا خان اور مہک نور کا کہنا ہے کہ ان کی ویڈیوز تھیٹر کے ڈریسنگ روم سےبنائی گئیں اور اداکارہ خوشبو نے ان کی ویڈیوز بنوا کرگھٹیا حرکت کی۔
لاہورمیں میڈیا سے گفتگو کرتے ہوئے اداکارہ زارا خان اور مہک نور نے کہا کہ ان کا خوشبو سے کبھی جھگڑا نہیں ہوا، ملزم کاشف چن ایکسٹرا فنکار ہے جس کے ذریعے یہ کارستانی کرائی گئی، ملزم کاشف نے خود بیان دیا ہے کہ ویڈیوز خوشبو نے بنوائیں۔
اداکاراؤں کا کہنا تھا کہ خوشبو نے ان کی ویڈیوز بنوا کرگھٹیا حرکت کی، خوشبو سچی ہوتی تو ضمانت کرانے کی بجائے عدالت میں پیش ہوتی۔
انہوں نے مزید کہا کہ وفاقی تحقیقاتی ایجنسی ( ایف آئی اے ) نے ابھی تک خوشبو کے خلاف ٹھوس کارروائی نہیں کی۔

اداکارہ خوشبو نے لاہور کی سیشن عدالت سے 21دسمبر تک عبوری ضمانت حاصل کرلی۔
اداکارہ خوشبو پر تھیٹر اداکاراؤں کی خفیہ کیمروں کے ذریعے کپڑے تبدیل کرتے ہوئے ویڈیوز بنوانے کا الزام ہے۔ گرفتار ملزم کاشف چن نے دعویٰ کیا ہے کہ اُس نے اداکارہ خوشبو کے کہنے پر ویڈیوز بنائیں اور اس کام کے لیے اُس کو ایک لاکھ روپے معاوضہ دیا گیا۔
وفاقی تحقیقاتی ایجنسی (ایف آئی اے) نے تھیٹر مالک طارق محمود کی درخواست پر اداکارہ خوشبو اور دیگر کے خلاف مقدمہ درج کر رکھا ہے۔

اداکارہ وینا ملک نے دوسری شادی کی خواہش کا اظہار کر دیا، کہتی ہیں دوسری شادی دین دار انسان سے کروں گی۔
وینا ملک کہتی ہیں ایک دین دار شخص سے شادی کرنا پسند کروں گی کیونکہ جو شخص اللہ تعالیٰ سے ڈرتا ہے وہ اپنی بیوی کے ساتھ غلط نہیں کرسکتا اور جو شخص اللہ سے نہیں ڈرتا وہ بہت ظالم شخص ہوتا ہے۔
وینا ملک کا کہنا تھا کہ میں ایسے شخص سے شادی کرنا چاہوں گی جو خوبصورت ہو، ساتھ ہی میرے ساتھ تعلق کو نہ صرف دنیا میں نبھائے بلکہ جنت تک میرا ہم قدم رہے۔
وینا نے مزید بتایا کہ ابھی تک تو ان کے پاس دوسری شادی کے لیے کوئی شخص نہیں ہے لیکن جلد ہی کوئی نہ کوئی ان کے لیے اس دنیا میں ضرور موجود ہوگا۔

کترینہ کیف اور وکی کوشل کی شادی کی تصاویر کے رائٹس ایمازون نے خریدے، رائٹس 80کروڑ (ایک ارب 60کروڑ پاکستانی روپے) بھارتی روپے میں فروخت کئے گئے۔
بالی وڈ کی مقبول ترین جوڑی کترینہ کیف اور وکی کوشل کی شادی کی تصاویر سے متعلق اہم دعویٰ سامنے آگیا۔ بین الاقوامی ای کامرس کمپنی ایمازون نے جوڑے سے خصوصی رابطہ کیا۔ کترینہ اور وکی نے شادی کی تصاویر جاری کرنے کے رائٹس ایمازون کو 80کروڑ بھارتی روپے میں فروخت کیے۔
پلیٹ فارم کترینہ وکی کی شادی کی تصاویر خاص سیریز کے طور پر جاری کرے گا جس میں وکی کترینہ کی لو اسٹوری پر مشتمل تصاویر کو ان کے اہل خانہ اور دوستوں کی تصاویر سمیت جاری کیا جائے گا۔

بالی وڈ کے سینئر اداکار نصیرالدین شاہ نے انکشاف کیا ہے کہ عرفان خان اپنی موت سے 2سال قبل ہی جانتے تھے کہ وہ زیادہ عرصہ زندہ نہیں رہ سکیں گے۔
نصیر الدین شاہ کے مطابق عرفان کی علالت کے دوران کئی مرتبہ اس سے فون پر بات ہوئی، میری اس سے تب بھی بات ہوتی تھی جب وہ لندن کے اسپتال میں زیرِ علاج تھا اور اپنی بیماری سے جنگ کررہا تھا۔
نصیر الدین شاہ نے کہا کہ جس طرح عرفان نے اپنی بیماری کا مقابلہ کیا وہ حیرت انگیز اور سبق آموز تھا، اس نے بہت بہادری کا مظاہرہ کیا۔ عرفان خان کہتے تھے کہ میں دیکھ رہا ہوں موت میرے قریب آرہی ہے، کتنے لوگوں کو یہ موقع ملتا ہوگا کہ وہ دیکھیں ان کی موت ان کے قریب آرہی ہے اور وہ خوش دلی سے اسے قبول کریں۔
انہوں نے مزید کہا کہ عرفان کا اس دنیا سے جانا ایک بھاری نقصان ہے لیکن ظاہر ہے یہ ہمارے ہاتھوں میں نہیں ہوتا۔