Archives September 2017

نیویارک (میڈیا پاکستان) اقوام متحدہ کی سلامتی کونسل کے اجلاس میں میانمار کے روہنگیا مسلمانوں کی صورتحال پر تشویش کا اظہار کیا گیا۔ امریکا کی مستقل مندوب نکی ہیلی نے میانمر حکومت پرسخت تنقید کی اور کہا مسلمانوں کو ظلم کا نشانہ بنایا جا رہا ہے، اگر میانمر حکومت نے رویہ نہ بدلا تو کسی ایکشن سے گریز نہیں کریں گے۔
نکی ہیلی نے تمام ممالک پر زور دیا کہ وہ میانمر کو اسلحہ کی سپلائی معطل کردیں، سیکرٹری جنرل انتونیو گترش نے میانمر کی صورتحال کو ڈراؤنا خواب قراردیا۔ انہوں نے میانمر حکومت پر زور دیا کہ فوجی آپریشن فوری بند کرے اور مسلمانوں کو دوبارہ آباد کرے۔
دوسری جانب میانمار سے نقل مکانی کرنے والوں پر سمندر بھی بے رحم ہو گیا، روہنگیا مسلمانوں کی کشتی بنگلہ دیش کےقریب الٹنے سے 8 بچوں سمیت 13 افراد ڈوب گئے۔

لاہور (میڈیا پاکستان) ملک بھر میں آٹھویں محرم الحرام کے سلسلے میں جلوس نکالے جا رہے ہیں، اس موقع پر سکیورٹی کے لئے انتہائی سخت اقدامات کئے گئے ہیں۔ کئی شہروں میں موبائل فون سروس بھی بند جبکہ موٹر سائیکل کی ڈبل سواری پر پابندی ہے۔
کراچی میں آٹھویں محرم پر سکیورٹی کے سخت انتظامات ہیں، جلوس کے تمام راستوں کو کنٹینر اور رکاوٹیں لگا کر سیل کیا گیا ہے، سکیورٹی اہلکاروں کی بھی بڑی تعداد تعینات ہے، سی سی ٹی وی کیمروں سے بھی جلوس کی مانیٹرنگ کی جا رہی ہے۔ لوگوں کو مشکلات سے بچانے کیلئے ٹریفک پولیس نے پلان جاری کیا ہے، شہریوں سے اپیل کی ہے وہ متبادل روٹس استعمال کریں، کراچی میں 8، 9 اور 10محرم کو موٹر سائیکل کی ڈبل سواری پر پابندی لگائی گئی ہے۔
لاہور میں بھی آٹھویں محرم کے جلوسوں کی نگرانی کیلئے سکیورٹی کے سخت انتظامات ہیں، مرکزی جلوس موری گیٹ سے برآمد ہوگا، نویں اور دسویں محرم کو موٹر سائیکل کی ڈبل سواری پر بھی پابندی عائد ہو گی۔ سی سی ٹی وی کیمروں کی مدد سے بھی مانیٹرنگ کی جا رہی ہے۔ پنجاب بھرمیں ایک لاکھ 46 ہزار 696 اہلکار سکیورٹی کے فرائض انجام دیں گے، پاک فوج، ایف سی اور رینجرز کے 20 ہزار جوان بھی سکیورٹی پر مامور ہوں گے۔ پنجاب میں نکلنے والے 8 ہزار 491 جلوسوں کو 3 کیٹیگریز میں تقسیم کیا گیا ہے۔ کیٹیگری اے میں شامل 1221 جلوسوں کو حساس ترین قرار دیا گیا ہے۔ کیٹیگری بی میں ایک ہزار 846، سی کیٹیگری میں 5 ہزار424 جلوس شامل ہیں۔ لاہور ٹریفک پولیس نے نویں اور دسویں محرم الحرام کے لیے ٹریفک پلان بھی جاری کر دیا۔

اسلام آباد(میڈیا پاکستان) عدالت عظمیٰ کا کہنا ہے کہ پولیس اہلکار ہاتھ اٹھانے والوں سے حساب خود برابر کردیتے ہیں اور اپنے گناہوں پر پردہ ڈالنے کے لئے کہانیاں بنالیتی ہے۔سپریم کورٹ میں پولیس اہلکار کے قتل میں ملوث 2 ملزمان کی بریت کے خلاف کیس کی سماعت ہوئی۔ جسٹس آصف سعید کھوسہ نے ریمارکس دیے کہ اگر ٹرائل کورٹس قانون کے مطابق فیصلے کریں تو اعلیٰ عدلیہ پر بوجھ ہی نہ پڑے، راولپنڈی ریجن میں پولیس اہلکار ذاتی جھگڑے میں زخمی ہو تو کہانی بنا لیتی ہے ایک ملزم نے 3 اہلکاروں کو زخمی اور ایک کو قتل کردیا، پولیس اہلکار مسلح ہونے کے باوجود دیکھتے رہے کیا پولیس والوں کے پاس گولیاں نہیں تھیں۔
جسٹس آصف سعید کھوسہ نے کہا کہ سچ بولا جائے تو جھوٹ کی کمر ٹوٹ جاتی ہےکئی پولیس اہلکار ہیروئن فروخت کرتے پکڑے گئے پولیس تو ہاتھ اٹھانے والوں سے خود حساب برابر کردیتی ہے اور اپنے گناہوں پر پردہ ڈالنے کے لئے کہانیاں بنا لیتے ہیں۔ عدالت نے پولیس اہلکار کے قتل میں ملوث دونوں ملزمان کاشف اور جمشید کی بریت کا فیصلہ برقرار رکھتے سماعت ملتوی کردی۔

اسلام آباد(میڈیاپاکستان)نیب نے شریف خاندان اوراسحاق ڈارکے خلاف دائرریفرنسزسے متعلق پیشرفت رپورٹ سپریم کورٹ کے فاضل نگراں جج کو پیش کردی۔پاناما کیس میں سپریم کورٹ کے فیصلے کے مطابق نیب شریف خاندان اوراسحاق ڈارکے خلاف مقدمات میں ہونے والی پیش رفت کی ہفتہ واررپورٹ معاملے کی نگرانی کرنے والے فاضل جج جسٹس اعجازالاحسن کو پیش کرنے کی پابند ہے۔ اس سلسلے میں نیب کے پراسیکیوٹر جنرل نیب وقاص ڈار نے جسٹس اعجازالاحسن سے ملاقات کی۔
نیب نے ملاقات کے دوران جسٹس اعجازالاحسن کو شریف خاندان اوراسحاق ڈارکے خلاف ریفرنسزپرپیشرفت رپورٹ پیش کی اور اس کے علاوہ عدالت عظمٰی کے فاضل جج کو کیس میں گواہان کی فہرست بھی فراہم کردی گئی۔
واضح رہے کہ سپریم کورٹ نے پاناما کیس کے فیصلے میں نیب کو پابند کیا تھا کہ 6 ہفتوں کے دوران احتساب عدالت میں شریف خاندان اوراسحاق ڈار کے خلاف ریفرنسز دائر کئے جائیں جب کہ ٹرائل کورٹس 6 ماہ میں ان ریفرنسزپرفیصلہ سنائیں۔

راولپنڈی(میڈیا پاکستان) وفاقی حکومت نے بے نظیربھٹوقتل کیس کا فیصلہ لاہور ہائی کورٹ میں چیلنج کردیا۔نجی نیوز چینل ایکسپریس نیوزکے مطابق سابق صدر آصف علی زرداری اور سزا پانے والے مجرمان کے بعد وفاقی حکومت نے بھی بے نظیربھٹوقتل کیس کا فیصلہ لاہور ہائی کورٹ کے راولپنڈی بینچ میں چیلنج کردیا ہے۔ وفاقی حکومت کی جانب سے وکیل بھی تبدیل کردئیے گئے ہیں اوراب سابق پراسیکیوٹرز کی جگہ اسسٹنٹ اٹارنی جنرل فیصل محمود راجا نئے وکیل مقررکر دیئے گئے۔
درخواست میں موقف اختیار کیا گیاہے کہ فیصلے میں انصاف کے تقاضے پورے نہیں کئے گئے۔ رفاقت ،حسنین، شیرزمان، عبدالرشید اوراعتزاز شاہ کو سزائے موت دی جائے اور سعود عزیز، خرم شہزاد کی سزاﺅں میں اضافہ کرکے پھانسی کی سزا میں تبدیل کیا جائے۔
حکومت کے پاس فیصلے کے خلاف اپیل دائر کرنے کا آج آخری دن تھا جب کہ حکومتی اپیلوں کی سماعت 2 اکتوبرکو جسٹس طارق عباسی اور جسٹس حبیب اللہ عامر پر مشتمل ڈویثرن بینچ کرے گا۔واضح رہے کہ اس سے قبل آصف زرداری اور مقدمے میں سزا یافتہ پولیس افسران سعود عزیز اور خرم شہزاد نے بھی فیصلے کے خلاے اپیلیں دائر کررکھی ہیں۔

لاہور(میڈیا پاکستان) ایف بی آر نے معروف اداکارہ ثمینہ پیرزادہ سے ان کے تمام بنک اکاﺅنٹس اور اثاثہ جات کی تفصیلات طلب کرتے ہوئے نوٹس جاری کردیا ہے۔ذرائع نے بتایا ہے کہ ایف بی آر نے اداکارہ ثمینہ پیرزادہ کو 2015ءمیں ان کی آمدن کا مکمل ریکارڈ، بنک اکاﺅنٹس سمیت تمام اثاثہ جات کی تفصیلات طلب کرلی ہیں۔ اسکے علاوہ ثمینہ پروڈکشن سے حاصل ہونے والی آمدنی کی بھی تفصیلات طلب کی گئی ہیں۔

سری نگر (میڈیا پاکستان)سرجیکل سٹرائیکس کی فوجی سربراہ کی دھمکی کے چند گھنٹوں بعد بھارت نے نیوکلیائی ہتھیار چلانے کی صلاحیت رکھنے والے فوجی ڈویژن کو اکھنور سیکٹر میں کنٹرول لائن پر بھیج دیا۔100 ٹینکوں کے ہمراہ فوجی ڈویژن ذمہ داریاں سنبھالے گا۔ بھارتی میڈیا نے الزام لگایا ہے پاکستان کی طرف سے کنٹرول لائن پر نیوکلیائی ہتھیار نصب کرنے کا سلسلہ شروع ہو گیا جس کے پیش نظر صورتحال دھماکہ خیز بن گئی۔مقبوضہ کشمیر کے ایک اخبار نے اس بات کا سنسنی خیز انکشاف کرتے اپنی رپورٹ میں لکھا کہ کنٹرول لائن پر مسلسل گولہ باری کے باعث جنگ جیسی صورتحال پیدا ہو گئی دونوں ممالک نے فوجوں کی تعداد میں زبردست اضافہ کرنا شروع کر دیا۔
علاوہ ازیں ورکنگ بائونڈری کے گائوں بینی سلہریاں پر بھارتی فوج کی بلااشتعال شیلنگ سے 7روز قبل زخمی ہونے والی شادی شدہ خاتون تسلیم اختر زوجہ حاجی جاوید سی ایم ایچ سیالکوٹ میں زخموں کی تاب نہ لاتے انتقال کرگئی۔
علاوہ ازیں کھوئی رٹہ سیکٹر کے سرحدی گائوں ججوٹ بہادر میں بھارتی فوج نے اچانک سول آبادی پر بلا اشتعال فائرنگ شروع کر د ی جس سے ججوٹ بہادر موڑہ گراں کا رہائشی چودھری ضاروف گولی لگنے سے شدید زخمی ہو گیا۔

ممبئی(میڈیا پاکستان) بھارتی شہر کے ریلوے اسٹیشن پر بھگدڑ مچنے سے 22 افراد ہلاک اور 30 زخمی ہوگئے۔بھارتی میڈیا کے مطابق ممبئی میں ایلفنسٹن ریلوے اسٹیشن پر بھگدڑ مچنے سے کم از کم 22 افراد ہلاک اور 30 زخمی ہوگئے۔ لاشوں اور زخمیوں کو طبی امداد فراہم کرنے کے لیے اسپتال منتقل کردیا گیا ہے۔ بعض افراد شدید زخمی ہیں جس کی وجہ سے ہلاکتوں میں اضافے کا اندیشہ ہے۔
حکام کے مطابق کام کے اوقات میں ایلفنسٹن ریلوے اسٹیشن پر دفتر جانے والے لوگوں کا شدید رش ہوتا ہے اور بھگدڑ مچنے کا واقعہ پیدل چلنے والوں کے پل پر پیش آیا جو دو اسٹیشنوں کو ملاتا ہے۔
پولیس نے بتایا کہ 4 ٹرینیں ایک ساتھ آئیں جب کہ بارش بھی ہورہی تھی۔ بہت سارے لوگ ٹرینوں میں بیٹھنے کے لیے دوڑے جس کی وجہ سے بعض خواتین پھسل گئیں اور بھگدڑ مچ گئی جبکہ متعدد لوگ پیروں کے نیچے آکر کچلے گئے ۔
اس دوران ریلوے اسٹیشن اور پل پر اتنا ہجوم جمع ہوگیا کہ بعض افراد نے پل سے چھلانگیں لگادیں جس کے نتیجے میں کئی افراد کی ٹانگیں بھی ٹوٹ گئیں اور شدید چوٹیں آئیں۔
سوشل میڈیا پر بھارتی شہریوں نے واقعے پر شدید غم و غصے کا مظاہرہ کرتے ہوئے عوام کو بنیادی سہولیات کی فراہمی میں ناکامی پر مودی حکومت کو کڑی تنقید کا نشانہ بناتے ہوئے کہا کہ ہمارے ٹیکسز کا یہ اچھا صلہ مل رہا ہے۔
بھارتی میڈیا نے بتایا کہ پیدل چلنے والوں کا پل بھی انتہائی خستہ حال اور گنجائش سے چھوٹا ہے جسے ٹھیک کرانے کے لیے بارہا مطالبات کیے گئے لیکن حکومت کے کانوں پر جوں نہیں رینگی۔

اسلام آباد(میڈیا پاکستان) وفاقی حکومت کی جانب سے مجوزہ پاکستان بڑھانے پر اتفاق کیا ہے۔ وزیراعظم شاہد خاقان عباسی کی صدارت میں وزیراعظم آفس میں گیس سیکٹر لیڈر شپ کمیٹی کا پانچواں اجلاس ہوا جس میں وزیراعلیٰ سندھ مرادعلی شاہ، وزیراعلیٰ بلوچستان ثناء اللہ زہری، وزیرمملکت برائے توانائی جام کمال خان، خیبرپختونخوا کے وزیر توانائی عاطف خان، پنجاب کی وزیر خزانہ عائشہ غوث پاشا، چیئرمین اوگرا عظمیٰ عادل خان اور دیگر حکام کے علاوہ عالمی بینک کے پاکستان میں مشن لیڈر ڈیفنی جینسر بھی سینئر حکام کیساتھ شریک ہوئے۔
وزیراعظم نے ملک میں توانائی کی ضروریات اور اصلاحات لانے کیلیے حکمت عملی پر روشنی ڈالی۔ انھوں نے کہا دستیابی، کارکردگی، پائیداری اور قابل خرید ہونا گیس سیکٹر میں اصلاحات کی اہم ترجیحات ہیں۔ وزیراعظم نے کہا رواں سال 100 کے قریب گیس ذخائر دریافت ہونا موجودہ طلب پورا کرنے کیلئے کافی نہیں اس لیے مقامی پیداوار میں اضافے کے باوجود گیس کی دریافت کی ضرورت پڑ رہی ہے۔ وزیراعظم نے اجلاس کو یقین دلایا کہ گیس کے شعبے سے متعلقہ تمام آئینی معاملات مشترکہ مفادات کونسل کی سطح پر حل کیے جارہے ہیں۔ آپریشنل معاملات اور اصلاحات کا عمل جاری رہنا چاہیے۔ گیس سیکٹر میں اصلاحات کے ٹیم لیڈر، ایم ڈی سوئی سدرن گیس کمپنی خالد رحمان نے اصلاحات کے حوالے سے اجلاس کو بریفنگ دی۔
عالمی بینک کے کنسلٹنٹ نے بھی اجلاس کو بریفنگ دی۔ وزیراعظم نے اصلاحات کیلئے متحرک کردار ادا کرنے پر صوبائی حکومتوں اور عالمی بینک کا شکریہ ادا کیا۔ انہوں نے کہا یہ اصلاحات گیس کی پائیدار سپلائی کے نظام کیلیے انتہائی اہم ہیں۔ ان اصلاحات کا بنیادی مقصد صوبوں اور دیگر شراکت داروں کے حقوق متاثر کئے بغیر صارفین کو آسانی فراہم کرنا ہے۔
وزیراعلیٰ بلوچستان نے کہا بلوچستان کے لوگوں کو گیس کی قابل خرید رسائی ضروری ہونی چاہیے۔ وزیراعلیٰ سندھ نے اصلاحات کی حمایت کرتے ہوئے مجوزہ ریگولیٹری باڈیز میں تمام صوبوں کی یکساں نمائندگی پر زور دیا۔ انھوں نے اصلاحات کیلئے آئینی تقاضوں کو پورا کرنے پر بھی زور دیا۔ پختونخوا کے وزیر توانائی نے وزیراعلیٰ سندھ کے موقف کی تائید کی۔ وزیر خزانہ پنجاب نے بتایا پنجاب حکومت نے اصلاحات پر غور کیلئے پہلے ہی ایک کمیٹی تشکیل دیدی ہے۔ اجلاس نے اصولی فیصلہ کیا کہ اصلاحات کے عمل کو آگے بڑھایا جائیگا اور اپنے تعاون کا اعادہ کیا۔

اسلام آباد(میڈیا پاکستان) اوگرا نے پیٹرولیم مصنوعات کی قیمتوں میں اضافے کی سمری وزارت پیٹرولیم کو بھیج دی ہے۔ذرائع کے مطابق اوگرا نے عوام پر پیٹرول بم گرانے کی تیاری کرلی ہے اور وزارت پیٹرولیم کو یکم اکتوبر سے پیٹرولیم مصنوعات کی قیمتوں میں اضافے کی سمری بھی بھیج دی ہے۔اوگرا کی جانب سے بھیجی گئی سمری میں پیٹرول کی قیمت میں 2 روپے 36 پیسے فی لیٹر اضافے کی سفارش کی ہے جس کے بعد پیٹرول کی قیمت 71.50 روپے سے بڑھ کر 73.86 روپے ہوجائے گی۔ سمری میں مٹی کے تیل کی قیمت میں 19 روپے 33 پیسے فی لیٹر بڑھانے کی سفارش ہے جس کے بعد مٹی کے تیل کی قیمت 44 روپے سے بڑھ کر 63.33 روپے فی لیٹر ہوجائے گی جب کہ لائٹ ڈیزل کی قیمت میں 14 روپے 10 پیسے فی لیٹر کے بعد 44 روپے سے بڑھا کر 58.10 روپے کرنے کی تجویز دی گئی ہے۔