Archives February 2018

لاہور (سٹاف رپورٹر/میڈیا 92 ںیوز)
چیمبر آف کامرس اینڈ انڈسٹری کی “آن لائن بزنس رجسٹریشن پورٹل” کی افتتاحی تقریب صوبائی وزرا یمبر عہدیداروں اور دیگر کاروباری شخصیات کی شرکت۔ لاہور چیمبر آف کامرس اینڈ انڈسٹری کی “آن لائن بزنس رجسٹریشن پورٹل” کی افتتاح کر دیا گیا۔ پورٹل کی بدولت چیمبر اراکین کو سہولت میسر آئے گی۔ افتتاحی تقریب میں صوبائی وزرا شیخ علاوالدین عائشہ غوث پاشا صدر لاہور چیمبر طاہر جاوید ملک اور دیگر عہدیدار شریک ہوئے۔ صوبائی وزیر صنعت و تجارت شیخ علاؤالدین نے اس موقع پر خطاب کرتے ہوئے کہا کہ پنجاب صنعتی پالیسی کی تیاری آخری مراحل میں ہے چند ہفتوںمیں پالیسی لاگو کردی جائے گی۔ وزیر خزانہ پنجاب ڈاکٹر عائشہ غوث پاشا نے کہا کہ نجی شعبہ سب سے زیادہ روزگار فراہم کرتا ہے کاروباری سرگرمیوں کی راہ میں حائل رکاوٹیں دور کی جارہی ہیں۔ تقریب میں چئیر مین پی اینڈ ڈی جہانزیب خان سیکرٹری انڈسٹریز ڈاکٹر مجتبیٰ پراچہ چئیر مین پنجاب آئی ٹی بورڈ عمر سیف سمیت کاروباری شخصیات شریک ہوئیں۔

لاہور ( کورٹ پورٹر/میڈیا 92 ںیوز)
گزشتہ روز سیشن کورٹ میں فائرنگ کا افسوسناک واقعہ پیش آیا
جس کے نتیجے میں پولیس اہلکار سمیت 2 افراد جاں بحق ہوئے۔ اس واقعہ کے پیشِ نظر آج سیشن کورٹ میں داخلی اور خارجی راستوں پر پولیس کی بھاری نفری تعینات کردی گئی ہے۔ چیکنگ کا نظام بھی مزید سخت کردیا گیا ہے۔ دوسری جانب ذرائع کے مطابق سیشن جج لاہور کو فائرنگ کے واقعہ کے حوالے سے رپورٹ پولیس تاحال ارسال نہ کرسکی۔

لاہور ( اسپورٹس رپورٹر/ میڈیا 92نیوز)

پی ایس ایل 3 نزدیک آگئی تاہم ایسے میں پی سی بی نے بھی کرپشن کیسز کی گرد آلود فائل جلد بند کرنے پر کام تیز کردیا ہے۔

گزشتہ سال پاکستان سپر لیگ 2کے آغاز میں ہی سامنے آنے والے اسپاٹ فکسنگ اسکینڈل میں شرجیل خان، خالد لطیف، شاہ زیب حسن اور محمد عرفان کے نام سامنے آئے، ناصر جمشید کو سہولت کاری کا ملزم ٹھہرایا گیا تھا۔

جسٹس(ر) اصغر حیدر کی سربراہی میں کام کرنے والے اینٹی کرپشن ٹریبیونل نے شرجیل خان کو ڈھائی سال معطل سمیت 5سال پابندی کی سزا سنائی، اپیل میں پی سی بی نے کم سزا جبکہ اوپنر نے پابندی کو چیلنج کیا تھا لیکن ایڈجوڈیکیٹر جسٹس(ر) فقیر محمد کھوکھر نے دونوں کی درخواستیں مسترد کرتے ہوئے ٹریبیونل کا فیصلہ برقرار رکھا، خالد لطیف پر ٹریبیونل نے 5 سالہ پابندی کے ساتھ 10لاکھ روپے جرمانہ عائد کیا تھا، پی سی بی نے کم سزا کیخلاف اپنی اپیل واپس لے لی جبکہ اوپنر نے فیصلے کیخلاف درخواست دائر کر رکھی تھی جس پر ایڈجوڈیکٹر نے 8 جنوری کو اپنا فیصلہ محفوظ کر لیا تھا جو بدھ کو سنا دیا گیا۔
خالد لطیف پر پابندی کی سزا برقرار رکھی گئی جبکہ تھوڑی رعایت برتتے ہوئے 10 لاکھ روپے جرمانہ ختم کر دیا گیا ہے۔ یاد رہے کہ اسی کیس میں سہولت کاری کے ملزم ناصر جمشید کو تحقیقات میں عدم تعاون پر ٹریبیونل نے ایک سال پابندی کی سزا سنائی تھی، بکی کے رابطے کی اطلاع نہ کرنے پر محمد عرفان 6 ماہ کیلیے معطل ہوئے تھے، طویل قامت پیسرکی سزا پوری ہوچکی اور انھوں نے ڈومیسٹک کرکٹ میچز میں حصہ بھی لیا،وہ پی ایس ایل میں بھی شریک ہونگے، شاہ زیب حسن کا کیس ٹریبیونل میں چل رہا تھا۔

گزشتہ روز سماعت کے دوران پی سی بی نے حتمی تحریری دلائل جمع کرا دیے جبکہ شاہ زیب حسن نے 6فروری تک مہلت مانگی ہے۔ اس کارروائی کے بعد ٹریبیونل نے اوپنر کا فیصلہ محفوظ کرلیا جو قوائد کے مطابق 30دن میں سنایا جائے گا، پی سی بی نے دیگر کھلاڑیوں کو فکسنگ پر اکسانے کا الزام بھی ثابت ہونے پر شاہ زیب حسن کو سخت سزا دینے کی درخواست کردی ہے، تیزی سے اسپاٹ فکسرز کے کیسز نبٹائے جانے سے ظاہر ہوتا ہے کہ پی ایس ایل تھری سے قبل پی سی بی گذشتہ ایونٹ کی تنازعات ختم کرتے ہوئے عبرت کی کہانیوں کے ساتھ نئی شروعات کرنے کا خواہاں ہے۔

میڈیا سے بات چیت کرتے ہوئے بورڈکے قانونی مشیر تفضل رضوی کا کہنا ہے کہ خالد لطیف پر عائد کردہ تمام الزامات درست ثابت ہوئے ہیں، اوپنر نہ صرف بک میکر سے 2 بار ملے بلکہ دوسری مرتبہ جاتے ہوئے ساتھی کرکٹر شرجیل خان کو بھی اپنے ساتھ لے گئے تھے،یہ شواہد جرم ثابت کرنے کیلیے کافی ہیں۔

تفضل رضوی نے کہا کہ کسی کو سزا دلانے پر پی سی بی کو خوشی نہیں ہوتی لیکن قانون سے کوئی بالاتر نہیں،کرپٹ کرکٹرز سے چھٹکارا پانا ضروری ہے،امید ہے کہ دیگر کھلاڑی اس سے سبق سیکھیں گے،اگر کوئی ایسا سوچ بھی رہا ہے تو خیال جھٹک دے،اگر کسی سے کوئی بکی رابطہ کرے تو اس کو بلاتاخیر متعلقہ حکام کو رپورٹ کرنا چاہیے۔

دوسری جانب جرمانہ ختم کیے جانے کے حوالے سے عام تاثر یہی ہے کہ پابندی کی سزا مکمل ہونے تک خالد لطیف 36سال کے ہوچکے ہونگے،اس وقت ان کیلیے کرکٹ کیریئر کا احیا ممکن نظر نہیں آتا۔

تفضل رضوی نے اس حوالے سے سوال پر کہا کہ 5سالہ پابندی کے فیصلے سے بظاہر ان کا کیریئر ختم ہوتا دکھائی دیتا ہے، وہ اس پوزیشن میں نہیں ہونگے کہ جرمانے کی رقم ادا کرسکیں۔یاد رہے کہ خالد لطیف کے وکیل بدرعالم ایٖڈجوڈیکیٹر کا فیصلہ سننے کیلیے نیشنل کرکٹ اکیڈمی لاہور میں موجود نہیں تھے، ماضی میں وہ پی سی بی پر جانبداری کا الزام عائد کرتے ہوئے ٹریبونل کی سماعتوں میں پیش ہونے سے گریز کرتے رہے ہیں،انھوں نے ٹریبیونل کی کارروائی رکوانے کیلیے لاہور ہائیکورٹ میں درخواست اور پھر اپیل بھی کی لیکن دونوں مسترد ہوئیں۔

ذرائع کے مطابق پی سی بی کی جانب سے تفصیلی فیصلے کی کاپی ملنے پر خالد لطیف نے ایک بار پھر لاہور ہائیکورٹ کا دروازہ کھٹکھٹانے کا فیصلہ کیا ہے جب کہ اس سے قبل شرجیل خان بھی اسلام آباد ہائیکورٹ سے رجوع کرچکے ہیں۔

(میڈیا 92نیوز)
متحدہ عرب امارات میں وزارت صحت نجی سیکٹر کی شراکت سے خلا میں ایک اسپتال قائم کرے گا جس کا مقصد نینو ٹیکنالوجی کا استعمال کرتے ہوئے خلا نوردوں کو علاج کی سہولت پیش کرنا ہوگا۔

خلیج ٹائمز کے مطابق اس اسپتال میں مزمن امراض کے طبی حل پیش کیے جائیں گے اور پرسنالائزڈ میڈیسن کو جدید ترین صورت میں دے کر مریضوں کے لیے یہ ممکن بنایا جائے گا کہ وہ دُور رہ کر اپنے علاج کے انتظامی امور میں کامیاب ہو سکیں۔

وزارت نے واضح کیا کہ منصوبے کا نتیجہ مریخ سیارے میں امارات خلائی کلینک کی صورت میں سامنے آئے گا۔ اس کا مقصد اماراتی خلاء نوردوں کو نینو ٹیکنالوجی کے ذریعے دُور سے علاج کی فراہمی ہے۔

متحدہ عرب امارات 2020 ءمیں مریخ کی سطح دریافت کرنے کا ارادہ رکھتا ہے۔ اسی دوران خلائی اسپتال کو بھیجنے سے قبل اس کا ٹیسٹ کیا جائے گا۔

اسلام آباد (بیورو چیف / میڈیا 92نیوز) وفاقی کابینہ نے پاکستان میں افغان مہاجرین کے قیام میں مزید 2 ماہ کی توسیع کردی۔

پاکستان اور افغانستان میں بڑھتی ہوئی کشیدگی کے باوجود وفاقی کابینہ نے بدھ کو پاکستان میں افغان مہاجرین کے قیام میں مزید دو ماہ کی توسیع کردی تاہم یہ فیصلہ ایسے موقع پر کیا گیا جب افغان خفیہ ایجنسی نیشنل ڈائریکٹوریٹ آف سیکیورٹی (این ڈی ایس)کے سربراہ معصوم ستانکزئی اور وزیر داخلہ ویس برمک پاکستان کے دورے پر پہنچے ہیں جنہوں نے وزیراعظم شاہد خاقان عباسی اور دیگر اعلیٰ حکام سے وزیراعظم ہاؤس میں ملاقات کی ہے۔

وفاقی کابینہ کے اجلاس کے بعد وزیراعظم آفس سے جاری بیان میں کہا گیاکہ کابینہ نے افغان مہاجرین کے لیے ’’پروف آف رجسٹریشن کارڈ‘ کی مدت میں 60 دن کی توسیع کردی۔ پاکستان، افغانستان اور اقوام متحدہ کے مابین سہ فریقی معاہدے کے تحت پاکستان نے ان افغان مہاجرین کو ’پی او آر‘ کارڈ جاری کیے ہیں جواقوام متحدہ کی تنظیم برائے مہاجرین کیساتھ رجسٹرڈ ہیں۔
پی او آر کارڈ افغان مہاجرین کو پاکستان میں ایک خاص مدت کے لیے قیام کی اجازت دیتے ہیں جو وفاقی حکومت متعین کرتی ہے۔ یہ کارڈ ہولڈر یہاں پر روزگار کرسکتے ہیں حتیٰ کہ جائیداد بھی خرید سکتے۔ 31 دسمبر 2017 کو ان رجسٹرڈ مہاجرین کے قیام کی مدت ختم ہوگئی تھی جس پر وفاقی کابینہ نے 30 دن کی توسیع کی تھی جو اب تک کی سب سے قلیل المدت توسیع تھی اور یہ منگل 30 جنوری کو ختم ہوگئی ہے تاہم اب کابینہ نے دو ماہ کی مزید توسیع کردی ہے۔

اس معاملے سے باخبر سرکاری ذرائع نے نام ظاہر نہ کرنے کی شرط پر بتایا کہ افغانستان مہاجرین کے قیام میں کم ازکم رواں سال کے آخر تک توسیع چاہتا تھا تاہم حکومت ان کی یہ درخواست منظور کرنے کے موڈ میں نہیں تھی۔

علاوہ ازیں وزیراعظم آفس کے بیان کے مطابق کابینہ نے کم ترقی یا فتہ علا قوں کے طلبا کے لیے وزیر اعظم کی فیس واپسی اسکیم کی منظوری بھی دی گئی۔ چیئرمین ایچ ای سی مختار احمد نے کابینہ کو آگاہ کیا بشمول بلوچستان، سندھ، خیبرپختونخوا، جنوبی پنجاب، فاٹا، گلگت بلتستان اور آزاد کشمیر اس اسکیم کو 114 اضلاع تک توسیع دی جائے گی۔

کابینہ نے اقتصادی رابطہ کمیٹی کے فیصلوں کی بھی توثیق کی جبکہ چینی اکیڈ می آف سائنس اور محکمہ موسمیات پاکستان میں تعاون کے ایم او یوکی منظوری بھی دی، اجلاس میں چین کیساتھ 2018 سے 2022 تک ثقافتی پروگرام کے معاہدے پر دستخطوں کی منظوری بھی دی گئی، چائنہ اکیڈمی آف سائنس اور محکمہ موسمیات کے درمیان یادداشت کی منظوری بھی دی گئی ہے جبکہ نیشنل فوڈ سیکیورٹی پالیسی موخر کر دی گئی۔

دوسری جانب افغانستان کے وزیر داخلہ ویس احمد برمک اور افغان خفیہ ایجنسی این ڈی ایس کے سربراہ محمد معصوم ستانکزئی پر مشتمل افغان وفد بدھ کو پاکستان کے دورے پر پہنچ گیا ہے۔

دفتر خارجہ کے ترجمان ڈاکٹر محمد فیصل نے اپنے ایک ٹویٹ میں اعلیٰ سطح کے افغان وفد کی اسلام آباد میں موجودگی کی تصدیق کرتے ہوئے کہا کہ افغان وفد افغانستان کے صدر اشرف غنی کا خصوصی پیغام لیکر اعلیٰ پاکستانی حکام کیساتھ ملاقات کی غرض سے اسلام آباد میں موجود ہے۔ بات چیت کے دوران دوطرفہ تعلقات اور تعاون کے حوالے سے امور پر تبادلہ خیال کیا جائیگا۔

خبر ایجنسی کے مطابق افغان وفد نے وزیراعظم شاہد خاقان عباسی سے ملاقات کی ہے جو دو گھنٹے تک جاری رہی۔ ذرائع کے مطابق ملاقات اس لحاظ سے مثبت تھی کہ وزیراعظم نے شارٹ نوٹس پر نہ صرف ملاقات کے لیے وقت دیا بلکہ افغان وفد کے دورے کی وجہ سے دیگر مصروفیات میں تبدیلی کی۔

افغان نائب سفیر زردشت شمس نے بتایا کہ ملاقات میں پاکستانی وزیر داخلہ اور اعلیٰ سیکیورٹی اہلکاروں نے بھی شرکت کی۔ انھوں نے کہا افغان رہنماؤں کے دورے کا مقصد پاکستانی رہنماؤں کیساتھ حالیہ حملوں سے متعلق گفتگو کرنی تھی جس کی ذمے داری طالبان نے قبول کی تھی۔ انھوں نے کہاکہ افغان رہنماؤں نے اس سلسلے میں فوری طور پر اقدامات کرنے کا مطالبہ کیا۔

( لاہور (سٹی رپورٹر/میڈیا 92 ںیوز) سابق وزیراعظم نوازشریف آج دوروزہ دورے پرکراچی روانہ ہوں گے۔

میڈیا 92 ںیوز کے مطابق سابق وزیراعظم نوازشریف آج دوروزہ دورے پرکراچی روانہ ہوں گے۔ نوازشریف اپنے دورہ کے دوران پارٹی کے اہم اجلاس کی صدارت کریں گے۔

اجلاس کی صدارت کے بعد پارٹی رہنماوں سے ملاقات اورمشاورت بھی کی جائے گی اورملاقات کے بعد سابق وزیراعظم سینٹ کے الیکشن اوردیگر پارٹی معاملات پربات چیت کریں گے۔

اسلام آباد (کورٹ رپورٹ / میڈیا 92نیوز) ن لیگ کے رہنما اور سینیٹرنہال ہاشمی کو ایک ماہ قید کی سزا سنا دی گئی۔

میڈیا 92نیوز کے مطابق جسٹس آصف سعید کھوسہ کی سربراہی میں سپریم کورٹ کے 3 رکنی بینچ نے سینیٹر نہال ہاشمی کے خلاف توہین عدالت کیس کی سماعت کی۔ سپریم کورٹ نے 24 جنوری کو نہال ہاشمی توہین عدالت کیس کا محفوظ کیا گیا فیصلہ سنا دیا۔

عدالت نے نہال ہاشمی کو ایک ماہ قید کی سزا سنا تے ہوئے ان کا معافی نامہ مسترد کردیا۔ سپریم کورٹ نے نہال ہاشمی کو 50 ہزارروپے جرمانہ عائد کرتے ہوئے 5 سال کے لیے نا اہل بھی کردیا ہے۔

اس خبرکوبھی پڑھیں: شریف خاندان کا احتساب کرنے والوں پرزمین تنگ کردیں گے، نہال ہاشمی کی دھمکی

فیصلے کے بعد نہال ہاشمی کو پولیس نے اپنی حراست میں لے لیا جب کہ ممکنہ طور پر انہیں اڈیالہ جیل میں منتقل کیا جائے گا۔

واضح رہے کہ نہال ہاشمی نے 28 مئی کو تقریرمیں پاناما فیصلہ سنانے والے ججوں کوسنگین نتائج کی دھمکیاں دی تھیں جس کے بعد چیف جسٹس نے نہال ہاشمی کی تقریرپر31 مئی کو ازخود نوٹس لیا تھا۔

( لاہور (سٹی رپورٹر/میڈیا 92 ںیوز)
پاکستان عوامی تحریک کے سربراہ طاہر القادری بیرون ملک روانہ ہوگئے،وہ لاہور سے براستہ ترکی برطانیہ کے دورے پر روانہ ہوئے ہیں ۔

اس دوران وہ مختلف تنظیمی پروگراموں میں شرکت کرنے کے ساتھ ساتھ برطانیہ کی مختلف یونیورسٹیوں میں لیکچر دیں گےاور بعد میں طاہر القادری کینیڈا جائیں گے، جہاں وہ اپنا میڈیکل چیک اپ بھی کروائیں گے۔

پاکستان عوامی تحریک کے سربراہ طاہرا لقادری کا بیرون ملک دورہ 22دن کا ہوگا اور اس طرح وہ اپنا دورہ مکمل کرنے کے بعد وطن واپسی پر سعودی عرب میں عمرہ کی ادائیگی کے لیے روکیں گے اور پھر واپس وطن آ جائیں گے۔

ادھر لاہور کے مختلف سیاسی حلقے طاہرالقادری کے اس دورے کو دھرنوں مظاہروں اور سیاسی کزنز سے مایوسی کی وجہ قرار دے رہے ہیں۔