Archives November 2018

File photo of PM Imran chairing a federal cabinet meeting.
ISLAMABAD: Prime Minister Imran Khan has summoned an emergency meeting of the federal cabinet today (Thursday).

The country’s current economic and political situation will be discussed during the meeting, according to sources. The cabinet will also be briefed on the premier’s China visit, they added.

“The current situation in the country following a Supreme Court verdict acquitting Asia Bibi, a Christian woman sentenced to death over blasphemy allegations, is also expected to be discussed,” the sources further said.

Religious parties are staging protests in major cities across the country following the top court’s verdict. Roads have been blocked and educational institutes have been closed due to the protests.

On Wednesday, PM Imran backed the Supreme Court’s decision in the Asia Bibi case and warned protesters against clashing with the state.

PM says Asia Bibi verdict constitutional, warns agitators of stern action

“I’m here only because a Supreme Court verdict was announced today. The way a small section reacted to it and the language that they used, I am forced to address you,” PM Imran said.

“The decision of the judges is according to the constitution and Pakistan’s constitution is according to the Holy Quran and Sunnah,” he said, referring to Asia Bibi’s acquittal by the apex court.

“Only enemies of the state call for execution of judges and rebellion against the army chief.”

PM Imran appealed to the nation not to listen to such elements, warning the agitators not to clash with the state or hurt the country only for their vote bank and political gain. “If you do this, the state will fulfill its responsibility,” he said.

(ایمرا نیوز)

کیا منظر تھا ، زرداری صاحب اور شہباز شریف کا معانقہ بھرا مصافحہ کرنا، ایک دوسرے کو ضرورت بھرے پیار سے دیکھ دیکھ مسکرانا، پہلے آپ ،نہیں پہلے آپ کہہ کر اسمبلی ہال میں قدم رنجہ فرمانا ،مل بیٹھنے ، رابطے رکھنے کے عہدوپیماں کرنا۔ وقت بھی کیا ظالم شے ہے ، کل شہباز شریف جسے چوکوں ،چوراہوں میں لٹکانا چاہتے تھے ، جو چا لیس چوروں کا علی بابا تھا ، جسکا پیٹ چیرنا تھا ، جسے لاہور، لاڑکانہ کی سڑکوں پر گھسیٹنا تھا ، جسکے بار ے میں فرمایا کرتے ’’غیروں کے سامنے جھکنے والے زرداری تم نے تو ملک کا حشر نشر کر دیا ،بھکاری بنا دیا‘‘، وقت بدلا،مطلب پڑاتو اسی زرداری صاحب سے جپھی مارنے میں ایک سیکنڈ نہ لگایا ، زرداری صاحب کی سن لیں، کل تک ’شریفوں ‘ کا اصلی والا احتساب چاہتے تھے ،وہ مغل بادشاہ مطلب نواز شریف کی گرفتاری چاہتے تھے ، فرمایا کرتے ’’ میاں صاحب نے پاکستان کی جڑیں کاٹ دیں، وہ تو ’گریٹر پنجاب ‘ بنانے کے چکر میں ‘‘،منی لانڈرنگ کا گھیرا تنگ ہوا تو کل تک ’شریفوں‘ کو پکڑائی نہ دینے والے زرداری صاحب شہباز شریف کا ہاتھ پکڑے کھڑے ملے ، بھول گئے کہ نواز شریف کو دھرتی کا ناسور کہہ چکے ،مُک گیا تیرا شو نواز،گو نواز گو نوازکے نعرے مارچکے ، بھول گئے کہ جب نواز شریف ملنے کی درخواستیں کررہے تھے تو انکا جواب ہوتا ’’مومن ایک سوراخ سے بار بار نہیں ڈسا جاتا‘‘ وقت بھی کیا ظالم شے ہے،آج مومن پھر ڈسے جانے کی خواہش میں تڑپ رہا اور بلاول جس قاتل اعلیٰ سے ماڈل ٹاؤن قتلوں ،کمیشنوں ،کرپشنوں کا حساب لینا تھا ، کے پاپا اسی سے تجدید ِمحبت فرما رہے ۔
جب بھی سوچوں یہ کل جھوٹ بول رہے تھے یا آج اداکاریاں کر رہے ، یہ کل سچے تھے یا آج جھوٹے ،یہ کل صراطِ مستقیم پر تھے یاآج بھٹک گئے اوریہ کل دھوکے دے رہے تھے یا آج فراڈ کر رہے تو لگے یہی کہ کل بھی ہیراپھیریاں اور آج بھی گھمن گھیریاں ، کیونکہ یہ سب جماندرو سیانے ،ا ن کا بولنا، ان کی خاموشی ، ان کی تردیدیں ، انکی تصدیقیں ، ان کے دعوے ،انکے وعدے، انکی معصومیت ،انکی مظلومیت ،انکا ملنا، مل کر بچھڑنا ، بچھڑ کر ملنا،سب کچھ منصوبہ بندی سے ، سب کچھ اپنے فائدے کیلئے ،کل جب زرداری صاحب نے’ اینٹ سے اینٹ‘ بجانے والی تقریر فرمائی تو نواز شریف نے نہ صرف اگلی صبح طے شدہ ناشتہ میٹنگ کینسل کردی بلکہ پلٹ کرخبر ہی نہ لی کیوں ، اس لئے کہ تب نواز شریف کا اسی میں فائدہ تھا، جب میاں صاحب پاناما میں پھنسے تو زرداری صاحب نے خواجہ آصف کا فون سننا بھی گوارہ نہ کیاکیوں ،اس لئے کہ تب زرداری صاحب کا اسی میں فائدہ تھا، دھرنوں کے دورا ن دونوں اکٹھے تھے کیوں ،اس لئے کہ تب اسی میں دونوں کا فائد ہ تھا، یا د آیا برے وقتوں میں جس خواجہ آصف کا زرداری صاحب نے ایک فون بھی نہ سنا، اسی خواجہ آصف نے وصیت کے زور پر پارٹی چیئرمینی لے چکے زرداری صاحب کی تب مدد کی جب وہ وزارت عظمیٰ کی دوڑ سے امین فہیم کو آؤٹ کرنا چاہ رہے تھے ،پھر خواجہ آصف نے کیسے نواز شریف کی مرضی سے امین فہیم کے خلاف یہ بیان دے کر کہ ’’ ان کے تو اسٹیبلشمنٹ سے درپردہ تعلقات ہیں ‘‘ مخدوم صاحب کا پتا صاف کیا ،یہ سب ،سب کومعلوم ۔

آج چونکہ نواز شریف کو اوپر تلے 3ریفرنسز کا سامنا، شہباز شریف آشیانہ اور56کمپنیوں کے رُولوں میں اورزرداری صاحب، بہن اور چہیتوں سمیت منی لانڈرنگ دلدل میں،لہٰذا آج پھر فاصلے سمٹ رہے کیوں ،اس لئےکہ اسی میں ان کا فائدہ ، اس بار’ میلاپ گاڑی ‘کے ڈرائیور مولانافضل الرحمٰن ، وہ ڈرائیونگ سیٹ پر کیوں، اس لیے کہ اسی میں ان کا فائدہ ،ا س طرح تو ہوتا ہے ،اس طرح کے کاموں میں ،نواز شریف اقتدار میں تھے تو ڈان لیکس غلط ،اقتدار سے نکلے تو ڈان لیکس ٹھیک کیوں ،اس لئے کہ اسی میں ان کا فائدہ ،نواز شریف وزیراعظم تھے تو ’عمران دھرنوں‘ کے پیچھے کوئی خفیہ ہاتھ نہ تھا ،وزارت عظمیٰ گئی تو دھرنوں کے پیچھے خفیہ ہاتھ نظر آگیا کیوں، اس لئےکہ اسی میں ان کا فائدہ ،اقتدار میں تھے تو پرویز مشرف کو جانے دیا ،اقتدار سے نکلے تو مشرف کو واپس لانے کی صدائیں دینے لگے کیوں ،اس لئےکہ اسی میں ان کا فائدہ ، جلا وطن تھے تومیثاقِ جمہوریت کی جپھیاں، وطن واپسی ہوئی تو میثاقِ جمہوریت ہَوا ہوئی کیوں، اس لئےکہ اسی میں ان کا فائدہ ،حدیبیہ فیصلہ کرنے والی سپریم کورٹ کما ل کی ، نااہل کرنے والی سپریم کورٹ بغض وعناد سے بھری ہوئی کیوں ، اس لئے کہ اسی میں ان کا فائدہ ۔

شہباز شریف کی بات کر لیں ، راتوں کو مفاہمتیں ،دن کے اجالوں میں حبیب جالبیاں ،اس لئے کہ اسی میں ان کا فائدہ ، ریلی لاہور ائیرپورٹ نہ پہنچے ، فلائٹ اسلام آباد نہ آپائے ، مشکل وقت میں کمر درد نکل آئے کیوں ،اس لئے کہ اسی میں ان کا فائدہ ،زرداری صاحب تو کمال ہی کر چکے، رائے ونڈ جاکر پچاس کھانے کھا لیں یانواز شریف کو قومی سلامتی کیلئے خطرہ قرار دیدیں یابلاول سے نوازشریف کو مودی کا یار کہلو اکر،گلی گلی شور ہے ،نوا زشریف چور ہے کے نعرے لگوالیں ، بی بی کے قاتلوں کو جانتاہوں کہہ کر پھر 5سالہ صدارت میں قاتلوں کی بات نہ کریںکیوں ،اس لئے کہ اسی میں انکا فائدہ، ابھی انتخابات ہوئے ،پہلی اے پی سی ہوئی ،زرداری ،بلاول نہ تھے کیوں ،اس لئے کہ اسی میں ان کا فائدہ ،دوسری اے پی سی میں زرداری ،بلاول کیساتھ نواز،مریم بھی نہیں کیوں ،اس لئےکہ اس میں ان کا فائدہ ،سب نے کہا الیکشن جعلی ،اسمبلیاں نقلی ،سب کے سب اسی سیٹ اپ کا حصہ بن گئے کیوں ،اس لئےکہ اسی میں سب کا فائدہ ۔حال یہ کہ زرداری صاحب بول رہے لیکن خاموشی سے بہت کچھ کر بھی رہے ، نواز شریف بظاہر چپ لیکن اندر اندر بہت کچھ کہہ بھی رہے ، بتانے کا مقصد یہ کہ نواز شریف کی چپ ،زرداری صاحب کا بولنا ،مولانا کی بھاگ دوڑ، سب اپنے اپنے چکر ،سب اپنے اپنے ایجنڈے، سب اپنے اپنے مفادات ،کہیں کیسز ختم کرو، کہیں لاڈلوں کو کچھ نہ کہو ، کہیںمٹی پاؤ،ویسے آپس کی بات ہے جس طرح کا بھی ’ممی ڈیڈی‘ احتساب ہورہا ،قید میں گھر کے کھابے، رنگ برنگی ملاقاتیں ،صبح وشام کی واکیں اورمنڈیلا پن ،حالت یہ کہ شہباز شریف کو دیر سے لانے پر اپوزیشن واک آؤٹ کر جائے اور حکومت ترلے منتیں کرنے مطلب منانے پہنچ جائے، اس ’ممی ڈیڈی ‘ احتساب میں کچھ اگلوایا اور نہ نکلوایا جا سکے گا،اگر کوئی سنجیدہ ہے تو اگلوانے ،نکلوانے کے دوطریقے ،ایک چین کا ،دوسرا سعودی عرب کا ،خیر چھوڑیں ،ذرا یہ ملاحظہ کریں، مولانا، نواز شریف کو ’اے پی سی‘ میں شرکت کیلئے راضی کرنے گئے تو میاں صاحب بولے ’’میری اورمریم کی گرفتاری ‘ پر’ اے پی سی ‘تو کی نہیں ،اب کیوں ہور ہی ‘‘ یقین جانیے اس ایک فقرے میں گزشتہ تین دہائیوں کی سیاست کا نچوڑ ،مطلب مجھے بچایا جو میں اب بچاؤں ، مطلب مجھے بچاتے تو میں تمہیں بچاتا مطلب کل بھی سب کا سب کچھ اپنے اور اپنوں کیلئے، آج بھی سب کا سب کچھ اپنے اور اپنوں کیلئے ،پھر سے اپنا پرانا جملہ یا دآگیا کہ سب کا سب کچھ ’’حال بچاؤ،آل بچاؤ اور مال بچاؤ‘‘۔
(بشکریہ جنگ لاہور)

(ایمرا نیوز)
ریاست مدینہ کی نام لیوا تحریک انصاف حکومت کے وفاقی وزیر سائنس و ٹیکنالوجی اعظم خان سواتی کے تیز طرار اور باصلاحیت ہونے میں کوئی کلام نہیں۔ مانسہرہ سے کراچی منتقل ہوئے۔ وہاں سے امریکہ منتقلی کا وسیلہ ڈھونڈا ۔ اسی وسیلے کے ذریعے امریکی شہریت حاصل کی ۔ وہاں سینکڑوں پاکستانیوں اوربنگالیوں سے رقوم جمع کرکے اربوں روپے کا کاروبار شروع کیا۔ اس قدر تیز تھے کہ ری پبلکن پارٹی میں بھی اپنے لئے جگہ بنائی اور 2001 ء کے انتخابات میں اپنے گھر اور دفتر کو صدر بش کی تصاویر سے بھر دیا ۔ جن لوگوں سے انہوں نے رقوم جمع کی تھیں، انہوں نے شور مچایا اور ان کے خلاف مقدمات بن گئے چنانچہ انہیں امریکہ سے بھاگ کر پاکستان آنا پڑا لیکن اپنے ساتھ اربوں ڈالر لے آئے ۔پاکستان آکر انہوں نے جنرل پرویز مشرف کی حکومت کے ابتدائی دنوں میں دولت کے زور پر ضلع مانسہرہ کی نظامت حاصل کرلی اور ڈالروں والے ناظم کے نام سے شہرت پائی۔ 2002 ء کے انتخابات کے بعد انہوں نے مفتی کفایت اللہ کے ذریعے مولانا فضل الرحمان سے ڈیل کرلی ۔ کچھ ایم پی ایز ان کو جے یو آئی نے عنایت کئے اور باقی انہوں نے ایم ایم اے ہی کی صفوں سے خرید کرسینیٹ کی نشست حاصل کرلی ۔ امریکہ کا کاروبار انہو ںنے اپنے بچوں کے حوالے کیا جہاں وہ صدر بش کی پارٹی کو چندے دے کر اپنا الو سیدھا کرتے رہے لیکن پاکستان میں ایم ایم اے کا سینیٹر بن کر اعظم سواتی امریکہ کو للکارتے رہے۔ کیسز کی وجہ سے تب سے لے کر اب تک اعظم سواتی امریکہ نہیں جاسکتے اور وہ میکسیکو جاکر وہاں اپنے منیجرز بلا کر کاروبار کا حساب کتاب کرکے واپس پاکستان آتے ہیں ۔ اس دوران انہوں نے یواے ای میں بھی کاروبار شروع کیا اور وہاں جائیدادیں بھی خریدیں۔ پیپلز پارٹی کی حکومت میں وہ جے یو آئی کے کوٹے سے گیلانی کابینہ میں وفاقی وزیر بنے ۔ جن قوتوں نے پی ٹی آئی کے غبارے میں ہوا بھرنے کا فیصلہ کیا ، انہی قوتوں کے کہنے پر اعظم سواتی صاحب پی ٹی آئی میں چلے گئے اور آتے ہی عمران احمد خان نیازی صاحب کو تحفوں اور کروڑوں روپے کے فنڈز کے ذریعے اپنا گرویدہ بنا لیا۔ 2012ء کے انٹرا پارٹی انتخابات ، جن میں اسد قیصر صوبائی صدر بنے، کے دوران انہوں نے بھرپور پیسے کا استعمال کیا اور پی ٹی آئی کے لوگوں کو خریدنے کی کوشش کی جس کی ویڈیوز پی ٹی آئی رہنمائوں کے پاس آج بھی موجود ہیں ۔ پیسے کے زور پر وہ 2013ء کے انتخابات میں پی ٹی آئی کے سینیٹر بنادئیے گئے اور پھر انہیں صوبائی صدر نامزد کیاگیا۔ ان کی نامزدگی پر پی ٹی آئی کے نظریاتی کارکن سخت ناراض تھے لیکن ظا ہر ہے ان کی کس نے سننی تھی ۔ دھرنوں کے موقع پر جب انہیں پی ٹی آئی کے خیبر پختونخوا کے پارلیمنٹرین کا انچارج مقرر کیا گیا تو خیبر پختونخوا ہائوس میں پارلیمانی پارٹی کے ایک اجلاس کے دوران بعض اراکین قومی اسمبلی نے اپنے چیئرمین سے شدید احتجاج کیا۔ اس موقع پر خیبر پختونخوا کے بعض ممبران نے شکایت کی کہ ایسا شخص جس نے پارٹی انتخابات کے دوران خود انہیں خریدنے کی کوشش کی تھی، کیسے ان کا لیڈر بن سکتا ہے۔ اس پر عمران احمد خان نیازی نے اعظم سواتی کو کچھ دیر کے لئے اجلاس سے باہر نکالا اور پھر اپنے پارلیمنٹرین کو حکمت وتدبر کا لیکچر دیتے ہوئے فرمایا کہ چونکہ بلدیاتی انتخابات میں بہت زیادہ پیسہ خرچ ہوگا اور چونکہ اعظم خان سواتی کے پاس پیسہ بہت ہے ، اس لئے انہیں بلدیاتی انتخابات تک برداشت کرلیا جائے۔ گزشتہ عام انتخابات سے قبل پارٹی ٹکٹوں کی تقسیم میں اعظم سواتی صاحب کا بنیادی کردار تھا۔ کئی لوگوں کو ان کی سفارش پر ٹکٹ سے نوازا گیا اور کئی کو استحقاق کے باوجود محروم رکھا گیا۔ انتخابات کے بعد انہیں سینیٹر بنا دیا گیا اور جب ریاست مدینہ کے نام لیوائوں کی حکومت قائم ہوئی تو اعظم سواتی صاحب سائنس و ٹیکنالوجی کے وفاقی وزیر بنادئیے گئے ۔

اعظم خان سواتی نے پی ٹی آئی کے دیگر کھرب پتیوں کی طرح بنی گالہ کے پڑوس میں اپنا ایک عالی شان فارم ہائوس بنا رکھا ہے۔ اس فارم ہائوس کے ساتھ ایک خشک نالہ ہے جس کے دوسری طرف کچی آبادی ہے جس میں باجوڑ ایجنسی سے آئی ڈی پیز بن جانے والے بعض پختون مقیم ہیں ۔ ایک روایت کے مطابق اعظم سواتی صاحب کی اس کچی آبادی کی زمین پر بھی نظر ہے اور وہ اسے اپنے فارم میں شامل کرانا چاہتے ہیں جبکہ دوسری روایت کے مطابق اپنے فارم کے قریب کچی آبادی کی موجودگی انہیں یوں ہی اچھی نہیں لگ رہی تھی ، اس لئے وہ ان لوگو ں کو یہاں سے اٹھانے کی ایک عرصہ سے کوشش کررہے تھے ۔ مجھے وہاں پر مقیم باجوڑ کے ان آئی ڈی پیز نے بتایا کہ 26اکتوبر کے واقعے سے قبل بھی جب سے پی ٹی آئی کی حکومت آئی ہے، پولیس ان کو بہت تنگ کررہی ہے ۔ اعظم خان سواتی کے مطابق 26اکتوبر کو کچی آبادی میں مقیم نیاز خان کی گائے نے گستاخی کامظاہرہ کرتے ہوئے ان کے باغ میں پودوں کو نقصان پہنچایا۔ ایف آئی آر میں انہوں نے مزید کوئی تفصیل نہیں بتائی بلکہ یہ لکھا ہے کہ پہلے ان کی گائے نے دراندازی کی اور پھر نیاز خان اپنی بیوی، بیٹی اور کمسن بچوں سمیت ان کے گھر پر حملہ آور ہوئے جس کے نتیجے میں ان کے گارڈز زخمی ہوئے ۔ میں نے جب نیاز خان کے کمسن بچے سے احوال پوچھا (اس کی ویڈیو میرے فیس بک اور ٹویٹر پر موجود ہے ) تو بچے نے کہا کہ گائے کی گستاخی کے بعد اعظم سواتی کے مسلح لوگ ان کے گھر پر حملہ آور ہوئے اور جب انہو ں نے ان کی والدہ (نیاز خان کی اہلیہ) کو گالی دی اور ان پر ہاتھ اٹھایا تو اس پر طیش میں آکر ان کے بچوں نے ردعمل ظاہر کیا۔ کوئی بھی علاقے کا دورہ کرکے دیکھ سکتا ہے کہ جو کچھ ہوا ہے وہ فارم ہائوس میں نہیں بلکہ نیاز خان کی جھونپڑی میں ہوا ہے ۔ اعظم سواتی کے بندوں نے گائے کے جرم پر چادر اور چاردیواری کا تقدس پامال کیا اور فائرنگ بھی کی لیکن اس کے بعد پولیس سے ان کا مطالبہ تھا کہ وہ پورے گھرانے کو اٹھا کر جیل میں ڈال دے ۔ اس مقصد کے لئے اعظم سواتی نے وزیر داخلہ شہریار آفریدی کومتحرک کررکھا تھا اور اسی لئے وہ وزیراعظم سے سفارشیں کروارہے تھے ۔ پولیس کا موقف یہ تھا کہ گائے کے جرم میں اتنی بڑی سزانہیں ملنی چاہئے اور وہ نیاز خان وغیرہ کو تھانے بلا کر معافی دلوادیں گے لیکن سواتی صاحب ان کے خلاف ایف آئی آر کٹواکر جیل میں ڈالنا چاہتے تھے ۔ چنانچہ اس جرم میں انسپکٹر جنرل پولیس اسلام آباد، جو اس وقت بیرون ملک تھے کو تبدیل کردیا گیا۔ چنانچہ نیاز خان ، ان کی اہلیہ ، بیٹی اور دو بیٹوں جن میں ایک کی عمر بارہ سال ہے کے خلاف ایف آئی آر درج کرلی گئی اور انہیں اڈیالہ جیل میں بند کردیا گیا ۔ یہ ہے ریاست مدینہ کے نام لیوائوں کا وہ انصاف جس کا وعدہ کرکے عوام کو گمراہ کیا گیا تھا۔ نیاز خان کے کمسن بیٹے سے ملاقات اور اس کی زبانی روداد سن کر میں نے ٹی وی پر خاتون اول سے اپیل کی کہ وہ مداخلت کرکے کم ازکم نیاز خان کی اہلیہ اور بیٹی کو رہا کروادیں کیونکہ پختون روایات کے مطابق کسی خاتون کو جیل بھجوانا پورے قبیلے کی بے عزتی سمجھی جاتی ہے لیکن افسوس کہ کچھ نہ ہوسکا۔ میں نے خود وفاقی وزیراطلاعات فواد چوہدری سے بھی بات کی اور قائمقام آئی جی سے بھی رابطہ کیا لیکن جھونپڑی میں پڑے تین معصوم بچوں، جن میں سب سے بڑا بارہ سال کا تھا ،کو اس رات ان کی ماں اور بہن واپس نہ دلواسکا۔ رات کو پڑوسیوں اور فاٹا یوتھ جرگہ کے ریحان زیب نے ان بچوں کی رکھوالی کی جبکہ نظام الدین سالارزئی نے ان کے لئے وکیل وغیرہ کا انتظام کیا ۔ آج صبح اعظم سواتی کے بیٹے نے دبائو ڈلواکر راضی نامہ کروادیا جس کے بعد نیاز خان اور ان کے اہل خانہ ضمانت پر رہا ہوجائیں گے ۔

نئے پاکستان میں پاک پتن کے ڈی پی او کو اس بنیاد پر اوایس ڈی بنایا گیا کہ نگرانی کے لئے ہی سہی لیکن ان کی موبائل نے خاتون اول کی بیٹی کا پیچھا کیوں کیا جبکہ آئی جی اسلام آباد کو اس لئے گھر بھیج دیا گیا کہ انہوں نے فوری طور پر اعظم خان سواتی کی انا کی تسکین کے لئے فوری طور پر ایک قبائلی خاتون ، ان کی جواں سال بیٹی اور کمسن بچوں کو جیل میں کیوں نہیں ڈالا۔ اگر یہ ڈرامہ بازی نہیں تو پھر سلطان راہی بننے والے وزیرداخلہ شہریار آفریدی اس معاملے میں ظالم اعظم سواتی کے ساتھ کیوں کھڑے نظر آئے ۔وزیراعظم صاحب چونکہ اعظم سواتی کے زیراحسان ہیں اس لئے وہ کچھ نہیں کرسکیں گے لیکن میری خاتون اول صاحبہ سے التجا ہے کہ وہ باجوڑ کے اس مظلوم اور بے گھر خاندان کے ساتھ ہونے والے ظلم کا حساب لیں ۔ خاتون اول صاحبہ ایک لمحے کے لئے سوچ لیں کہ اگر خاکم بدہن نیاز خان کی اہلیہ کی جگہ وہ خود ہوتیں یا پھر اگر اڈیالہ جیل میں رات گزارنے والی نیازخان کی بیٹی کی جگہ ان کی بیٹی ہوتی یا پھر اگر رات کو ماں باپ سے محروم رہ کر جھونپڑی میں بے آسرا معصوم بچوں کی جگہ ان کے بچے ہوتے تو اس صورت میں ان کا کیا ردعمل ہوتا؟

(کالم نگار کے نام کیساتھ ایس ایم ایس اور واٹس ایپ رائےدیں00923004647998)
(بشکریہ جنگ لاہور)

(ایمرا نیوز)
کئی دنوں سے سوچ رہا ہوں۔ آپ بھی میری مدد کیجئے۔

اس وقت پاکستانی معاشرے کو کون زیادہ اپنے رنگ میں رنگ رہا ہے۔ یونیورسٹیاں یا میڈیا۔

یونیورسٹیوں کی تعداد میں معقول اضافہ ہورہا ہے۔ ہر سال سینکڑوں طلبہ و طالبات فارغ التحصیل ہوکر عملی زندگی کا حصّہ بن رہے ہیں۔ کیا وہ ماحول پر اثر انداز ہورہے ہیں۔

میڈیا کی تعداد بھی مسلسل بڑھ رہی ہے۔ یہ بھی دیکھنا چاہئے کہ 2002 کے بعد ٹی وی چینلوں والا معاشرہ 2002سے پہلے والے معاشرے کے مقابلے میں کتنا تبدیل ہوا ہے۔ کیا یہ تبدیلی معکوس ہے یا مثبت۔ اخلاقی اعتبار سے کتنا فرق پڑا ہے۔

یہ بھی دیکھنا ہوگا کہ ہماری زمین میں پھول پیدا کرنے کی صلاحیت زیادہ ہے یا کانٹے۔

ایک انگریزی اخبار کے سروے کے مطابق پاکستان کے حکمرانوں میں سے سب سے زیادہ نقوش جنرل ضیا کے دور نے ثبت کئے ہیں۔ غور کریں تو یہ تحقیق درست لگتی ہے کہ جنرل ضیا اپنی پالیسیوں سے جیسا پاکستان چاہتے تھے ۔ ویسا زیادہ بنا ہے ۔مذہبی دکھاوا، تعصّبات، فرقہ پرستی۔ جنرل ایوب کی اعتدال پسندی اس معاشرے کو پسند نہ آئی۔ ذوالفقار علی بھٹو کی میانہ روی، آزاد خیالی نے اس ماحول کو متاثر نہیں کیا۔

اب ہم فوجی اور سیاسی تعلقات پر کھل کر بات کرتے ہیں۔ لیکن ضیا کے فوجی دَور کے مذہبی اثرات سے صرف نظر کرلیتے ہیں۔

ہمارے تحقیقی ادارے ان رُجحانات پر کام کررہے ہوں یا نہیں۔ امریکہ یورپ چین اور بھارت والے اس پر ریسرچ کرتے رہتے ہیں۔

ان دنوں اتفاق سے یونیورسٹیوں سے میرا رابطہ کچھ زیادہ ہے۔ اپنے ماضی سے خوف زدہ ہوں ۔حال پر اثر انداز نہیں ہوسکتا۔اس لئے وہاں جارہا ہوں جہاں ہمارا مستقبل پرورش پارہا ہے۔کوئٹہ گیا تو سردار بہادر خان ویمنز یونیورسٹی میں دس ہزار طالبات کو حصول علم میں مصروف دیکھا۔ بلوچستان یونیورسٹی کے وائس چانسلر کوئٹہ ایئرپورٹ پر ملے۔ ان سے وعدہ ہوا کہ لیکچر کے سلسلے میں ان کے ہاں جائیں گے۔ کراچی میں محمد علی جناح یونیورسٹی کے ایک کتاب میلے کے افتتاح کے لئے جانا ہوا۔ یہاں جاتے ہیں تو استادوں کے استاد ڈاکٹر عبدالوہاب کی یاد تازہ ہوجاتی ہے۔ کیسے صاحب کردار ڈسپلن کے قائل۔ آئی بی اے کی معروضی بنیاد رکھ گئے کراچی یونیورسٹی کی کئی ایکڑ اراضی واگزار کرواگئے۔ اب ڈاکٹر زبیر شیخ اس یونیورسٹی کے وائس چانسلر ہیں ۔سردیاں آتی ہیں تو کراچی میں کتاب میلوں کا موسم بھی شروع ہوجاتا ہے۔ اس کتاب میلے میں تو زیادہ تر ٹیکنیکل کورسز کی کتابیں رکھی گئی ہیں کہ یہ طلبہ و طالبات کی ضرورت ہیں۔ پبلشر اور بک سیلر حضرات بہت مطمئن تھے کہ ان میلوں سے کتابوں کی کافی فروخت ہوجاتی ہے۔ دسمبر میں کراچی کتاب میلہ منعقد ہوتا ہے۔ لاکھوں کراچی والے اہل خانہ بچوں بزرگوں، وہیل چیئروں، بچہ گاڑیوں سمیت جوق در جوق آتے ہیں۔ کروڑوں کی کتابیں خرید تے ہیں۔ پھر بھی پبلشر گلہ کرتے ہیں کتابیں نہیں بکتیں۔ اگر ایسا ہے تو یہ پبلشر لاہور میں بھاٹی لوہاری سے گلبرگ، ڈیفنس کراچی میں ناظم آباد ،پی ای سی ایچ ایس سے ڈیفنس کیسے منتقل ہوتے رہتے ہیں۔

سندھ مدرسۃ الاسلام یونیورسٹی وہ مقدس درسگاہ ہے جہاں بانیٔ پاکستان اپنا بستہ اٹھائے پرائمری تعلیم کے لئے آتے تھے۔ کتنے خوش قسمت ہیں وہ اساتذہ اور طالب علم جو انہی برآمدوں، راہداریوں سے گزرتے ہیں۔ جہاں قائد اعظم کا بچپن گزراتھا۔ مجھے لیکچر کے لئے بلایا گیا تھا۔’’ ڈیجیٹل دَور میں میڈیا کے بدلتے رُجحانات ‘‘وائس چانسلر محمد علی شیخ نے اس کالج کو یونیورسٹی کا درجہ دلانے میں اہم کردار ادا کیا ہے۔اب وہ اسے بین الاقوامی یونیورسٹی کے معیار پر لے جارہے ہیں۔ میں نے میڈیا کے مختلف ادوار کے مناظر الفاظ میں بتائے۔ آج جب میڈیا شدید بحران سے دوچار ہے اس کے اسباب پر بھی روشنی ڈالی۔

گلستان جوہر سے گزرتے ہیں تو حبیب یونیورسٹی کی شاندار جدید خطوط پر تعمیر نظر آتی ہے۔ ایک بار اندر جانا ہوا ۔ ایک مشاعرے کے لئے۔ شاہجہاں ایس کریم مرحوم نے بھی ایک تاج محل تعمیر کیا تھا۔ انسٹی ٹیوٹ آف بزنس مینجمنٹ۔ یہ درسگاہ بھی بین الاقوامی معیار کی ہے۔

مگر میں اسی الجھن میں ہوں کہ یونیورسٹیوں سے پڑھ کر نکلنے والے معاشرے میں کوئی تبدیلی لارہے ہیں یا نہیں۔ یا دریا کے میٹھے پانی کی طرح سمندر کے کھاری پانی میں مل کر کھاری ہورہے ہیں۔

یہ پاکستان آرٹس کونسل کراچی کا پُر شکوہ آڈیٹوریم ہے۔ یہاں ایک درد مند پاکستانی ان دنوں وہیل چیئر پر سیّد عبدالباری جیلانی کو خراج تحسین پیش کیا جارہا ہے۔ آرٹس کونسل کے صدر سید احمد شاہ مبارکبادیں اور تعریفیں سمیٹ رہے ہیں کہ وہ مخلص اور صاحبِ بصیرت پاکستانیوں کی ان کی زندگی میں ہی پذیرائی کررہے ہیں۔ بلند قامت، بلند آہنگ سید عبدالباری جیلانی سیاست دان بھی ہیں۔ سفارت کار بھی کراچی میں کیمرون کے اعزازی قونصل جنرل ہیں۔ پاکستان میں کیمرون کا سفارت خانہ نہیں ہے، اس لئے جیلانی صاحب سب کچھ ہیں۔ کراچی کے لئے ان کی طویل خدمات ہیں۔ طالب علم لیڈر سے لے کر کونسلر، پھر سندھ اسمبلی کے ممبر، ڈپٹی اسپیکر، بے شُمار سماجی معرکے، سارے سفارت کار اعزازی یا غیر ملکی۔ سب ڈیفنس، کلفٹن میں چلے گئے ہیں۔ جیلانی صاحب مزار قائد اعظم کے پڑوس میں خداداد کالونی میں مُقیم ہیں۔ آڈیٹوریم بھرا ہوا ہے۔ اسٹیج پر بھی ایک کہکشاں ہے۔ آرٹس کونسل کے سب کچھ سید احمد شاہ، سعادت علی جعفری، شکیل خان، حاجی حنیف طیب، جسٹس(ر) صلاح الدین مرزا، سابق ایم این اے اعجاز محمود، جماعت اسلامی سندھ کے امیر محمد حسین محنتی، جسٹس(ر) غوث محمد، نوشابہ صدیقی، پی آئی اے کے چیف آپریشنل آفیسر اعجاز مظہر، سامعین میں بھی معزز ہستیاں۔ باری صاحب کے صاحبزادے ندیم باری جیلانی خوش بھی ہیں اور جذباتی بھی ۔ اللہ نے انہیں موقع دیا ہے کہ وہ اپنے عظیم والد کی دن رات خدمت کررہے ہیں۔

ہم نے انہی کالموں میں عرض گزاری تھی کہ حکومتی اداروں کو، غیر سرکاری تنظیموں کو ایسی عمر رسیدہ ہستیوں کے اعزاز میں تقریبات منعقد کرنا چاہئیں۔ خود ان درد مند پاکستانیوں کو یہ احساس ہوتا ہے کہ ان کی زندگی کا سفر رائیگاں نہیں گیا۔ دوسرے نئی نسل کو بھی اندازہ ہوتا ہے کہ ان کو جو سہولتیں اور آزادیاں میسر آئی ہیں اس کے لئے ان کے پُرکھوں نے کتنی مشکلات برداشت کی ہیں۔ کوئٹہ، گوادر، پشاور، لاہور، اسلام آباد، ملتان، فیصل آباد، سیالکوٹ، سکھر، لاڑکانہ، حیدر آباد ہر شہر میں ہی اپنے اپنے باری جیلانی ہیں جن کی عمر اپنے ہم نفسوں کی خدمت میں گزر رہی ہے۔ ان کے لئے خراج تحسین تو ہماری ذمہ داری بنتی ہے۔

آخر میں پھر میرا وہی سوال کہ ہمارے معاشرے پر زیادہ اثر انداز کون ہورہا ہے۔ یونیورسٹیاں یا میڈیا۔ اسے بڑھا بھی سکتے ہیں ۔

(کالم نگار کے نام کیساتھ ایس ایم ایس اور واٹس ایپ رائےدیں00923004647998)
(بشکریہ جنگ لاہور)

(ایمرا نیوز)
ایک تکلیف دہ موازنہ وئی فرنگیوں کو لاکھ برا بھلا غاصب، عیار،مکار کہے لیکن سچی بات ہے گورننس کی تمیز گورے کو ہی تھی کہ 90سال 1857ء تا 1947ء 90سال میں جہالت اور پسماندگی میں غرق برصغیر کو کہاں سے کہاں پہنچا دیا۔سیاسی نظام سے عدالتی و انتظامی نظام تک، نہری نظام سے کئی نئے شہروں تک، میڈیکل کالجز سے زرعی کالجوں اور دیگر تعلیمی اداروں اور یونیورسٹیوں تک، ’’بمبمے‘‘یعنی ہینڈپمپ سے ریلوے اور ماچس تک، جدید منظم فوج سے لاء اینڈ آرڈر تک کمال ہی کمال ہے ۔رٹ تھی ایسی زبردست کہ ہندوئوں کے روحوں سے سَتّی کی بے رحم رسم اکھاڑ پھینکی، برہمنوں اور مسلمان اشرافیہ کو اس کی عدلیہ پر بڑی خار تھی کہ اچھوت اور کمی کمین بھی انہیں عدالتوں میں گھسیٹ سکتے ہیں۔حرام خور برہمن نے ریل کے خلاف زہریلا پروپیگنڈا کیا کہ اس میں شودر بھی برہمن کے برابر بیٹھ سکتا ہے لیکن گورے نے جو کیا ڈٹ کر کیا اور خوب کیا ….. ہم سے کہیں بہتر کیا کہ آج نہ وہ پولیس نہ عدالتیں نہ ریلوے نہ نہری نظام نہ ’’کمپنی باغ‘‘ کہ باغوں کیا ہم نے تو قبرستانوں پر قبضے شروع کر دیئے۔کوئی ہے جو قسم اٹھا کر کہہ سکے کہ آج کا گورنمنٹ کالج لاہور اور پنجاب یونیورسٹی اتنے ہی عالیشان تعلیمی ادارے ہیں جتنے کبھی تھے۔میں نے کہیں نہیں پڑھا کہ تب وکلاء ججوں پر اس طرح چڑھ دوڑتے تھے
،طلبہ اساتذہ کے گریبان پکڑتے تھے اور ڈاکٹرز اسی طرح مریضوں کو’’گاہکوں‘‘ کی طرح ٹریٹ کرتے تھے۔ حقیقت یہ کہ ہم نے ہمارے ساتھ اس سے کہیں برا کیا جتنا گورے نے کیا لیکن بہرحال ’’آزادی‘‘ بڑی بات ہے ۔ ’’اپنوں‘‘ کے ہاتھوں برباد ہونا غیروں کے ہاتھوں آباد ہونے سے کہیں بہتر ہے ۔ان لاکھوں کو کیا کہیں جو آزاد وطن چھوڑ کر سابق آقائوں کے ملکوں کی شہریت والی ’’غلامی‘‘ پر ناز کرتے ہیں۔محبت پاکستان سے لیکن شہریت انگلستان تا امریکہ ،کینیڈا، آسٹریلیا کی۔ جائیدادیں بھی وہیں، اولادیں بھی وہیں اور بضد اس بات پر کہ ’’یہ وطن ہمارا ہے، ہم ہیں پاسباں اس کے‘‘ تضادات کے یہ مائونٹ ایورسٹ کیوں؟ فرق کیا ہے ؟تب’’ رول آف لاء‘‘ تھا، اب ’’رول آف دی رولر‘‘ ہے ورنہ ہمارا وزیر باتدبیر یہ نہ کہتا کہ اگر وزیراعظم آئی جی پولیس نہیں بدل سکتا تو الیکشن کی کیا ضرورت؟ حضور! پروسیجرز، قواعدوضوابط، اصول قانون بھی کوئی شے ہے کہ مادر پدر آزاد ہو کر تو کائنات نہیں چل سکتی، ملک کیسے چلے گا؟ لمبی کہانی ہے جسے سمجھنے کیلئے ایک چھوٹا سا واقعہ عرض ہے ۔یہ 1930تا 35ء کی درمیانی کہانی ہے ۔لیجنڈپطرس بخاری تب پنجاب ٹیکسٹ بک کمیٹی کے چیئرمین تھے جب فیض احمد فیض جیسا لیجنڈ انہیں ملنے گیا۔وہاں ایک ضخیم فائل پر نظر پڑی جس پر جلی حروف میں لکھا تھا ʼʼOFFICE CATʼʼ فیض صاحب یہ عنوان دیکھ کر متجسس ہوئے اور پطرس بخاری صاحب سے پوچھا …..’’یہ کیا ہے ؟‘‘ جس پر بخاری صاحب نے فرمایا ۔’’قصہ یوں ہے کہ ایک دن میرے آفس میں بلی آگئی۔مجھے اچھی لگی تو میں نے کسی سے کہا اسے تھوڑا سا دودھ لادو۔پھر وہ بلی ہر روز آنے لگی اور ہر روز اسے دودھ بھی باقاعدگی سے ملنے لگا۔مہینے کے آخر پہ سپرنٹنڈنٹ نے دفتر کے اخراجات کا بل مجھے بھیجا تو اس کے ساتھ ایک تحریری سوال بھی منسلک تھا کہ بلی کے دودھ پر چودہ روپے چھ آنے کی جو رقم خرچ ہوئی ہے، وہ کس مد میں جائےگی ؟میں نے لکھ بھیجا CONTIGENCES یعنی متفرق خرچ میں ڈال دو۔چند روز کے بعد اکائونٹنٹ جنرل نے بل لوٹا دیا اور نوٹ لکھا کہ CONTIGENCYکی مد دفتر کے سازو سامان اور دیگر غیر جاندار اشیاء کے لئے مخصوص ہے ۔بلی جاندار شے ہے جس کے اخراجات اس میں شامل کرنا رولز کی خلاف ورزی ہے ۔اس پر آفس سپرنٹنڈنٹ نے مجھ سے تحریری ہدایت طلب کی۔میں نے لکھا کہ اگر جاندار غیر جان دار کا مسئلہ ہے تو ESTABLISHMENTیعنی عملے کی مد میں ڈال دو۔بل دوبارہ خزانے کو بھیجا گیا اور تھوڑے دنوں میں لوٹ آیا اور اس بار طویل مراسلے میں یہ استفسارات تھے کہ اگر یہ خرچ عملہ کی مدد میں جائے گا تو واضح کیا جائے کہ اس رقم کو تنخواہ تصور کیا جائے گا یا کہ الائونس ۔ اگر تنخواہ ہے تو بھی قاعدہ ضابطہ نمبر فلاں فلاں، دفتر کی پیشگی منظوری درکار ہے اور اگر یہ الائونس ہے تو بموجب رول اینڈ ریگولیشن فلاں فلاں متعلقہ افسر سے اس کی تصدیق لازمی ہے چنانچہ یہ فائل چھ مہینے سے چل رہی ہے اور اس میں ایسے ایسے باریک انتظامی قانونی نکتے بیان ہوئے ہیں جن کاتصور بھی نہیں کیا جا سکتا۔‘‘یہ ہے گورننس اور قواعدوضوابط کا احترام جبکہ ’’آزادی‘‘ کے بعد کی مادر پدر آزادی میں تو قدم قدم پر ’’انہی ‘‘(اندھی) پڑی ہوئے ہے ۔حلوائی کی دکان پر نانا دادا سب کی فاتحہ، سکھا شاہی، واہی تباہی کا ناتمام سلسلہ ہے جس کا سب سے بڑا موجد نواز شریف جس نے رولز ریلیکس کرنے کی بدعت عام کی اور اپنا ووٹ بینک بنانے کیلئے 60،60سال کے بابوں کو پٹواری اور ʼʼWANTEDʼʼقسم کے جرائم پیشہ لوگوں کو پولیس میں بھرتی کیا۔پبلک پارکس ،چمچوں کو دان کئےکواپریٹوز کے ساتھ کھلواڑ کیا اور نوبت یہاں تک آپہنچی کہ آج وکیل وزیر یہ کہتا ہے کہ اگر وزیر اعظم IGپولیس بھی نہیں بدل سکتا تو الیکشن کی کیا ضرورت تھی؟وزیر اعظم کا قصور نہیں یہ ’’کٹلری بوکس‘‘ کا کام تھا کہ کوئی اسے بتاتا ’’پرائم منسٹر صاحب !آپ آئی جی کو تبدیل تو کر سکتے ہیں لیکن فون پر نہیں کہ اس کا ایک پراسیس پروسیجر اور طریق کار ہے ‘‘ لیکن آلات خورونوش ایسا رسک نہیں لیتے، یہ انسانوں کا کام ہے !
(بشکریہ جنگ لاہور)