Archives November 2021

کیپٹن بابرفصیح امین (شہید) سپورٹس کمپلیکس فیز 6 ڈی ایچ اے لاہور میں قومی ائلیٹ باکسنگ چمپین شپ کی افتتاحی تقریب ہوئی، مردوں کی 38ویں چیمپیئن شپ میں بارہ ٹیمیں جبکہ دوسری خواتین کی چیمپئن شپ میں سات ٹیمیں حصہ لے رہی ہیں، ویٹ کیٹیگری میں مجموعی طور پر 153مقابلے ہوں گے.
ایڈمنسٹریٹر ڈی ایچ اے لاہور بریگیڈئیر وحید گل ستی افتتاحی تقریب کے مہمانِ خصوصی تھے۔ پاکستان باکسنگ فیڈریشن کے صدر محمد خالد محمود نے بریفنگ دی۔ بریگیڈئیر وحید گل ستی نے اپنے خطاب میں باکسنگ فیڈریشن اور ڈی ایچ اے لاہور سپورٹس برانچ کی مشترکہ کوششوں کو سراہا۔

چیمپیئن شپ کا پہلا مقابلہ بلوچستان کی رابعیہ بتول اور آزاد کشمیر کی سیرت پرویز کے مابین ہوا جس میں رابعیہ(بلوچستان) سرخرو ہوئیں۔ دوسرا مقابلہ پاکستان نیوی کے زوہیب رشید اور پاکستان آرمی کے محمد فہیم کے مابین ہوا، جس میں زوہیب(نیوی)کامیاب ہوئے۔ بعد ازاں پاکستان باکسنگ فیڈریشن نے مہمانِ خصوصی کو ایک مومینٹو پیش کیا۔

آئل اینڈ گیس ریگولیٹری اتھارٹی (اوگرا) کی جانب سے دسمبر سے ایل پی جی کی قیمت میں کمی کا اعلان کیا گیاہے، اس حوالے سے اوگرا نے نوٹی فکیشن بھی جاری کردیا ہے۔اوگرا کے اعلان کے مطابق ملک میں ایل پی جی کی فی کلو قیمت میں 14 روپے 31 پیسے فی کلو گرام کمی کی گئی ہے ، ایل پی جی کی ایک کلوگرام کی نئی قیمت202 روپے 89 پیسے مقرر کردی گئی ہے۔
نئی قیمتوں کے اطلاق کے بعد ایل پی جی کا 11.8 کلو کا گھریلو سلنڈر 168 روپے 90 پیسے سستا ہوگیا ، گھریلو سلنڈر کی نئی قیمت 2390 روپے 44 پیسے مقرر کی گئی ہے۔
اس سے قبل نومبر میں ایل پی جی کا گھریلو سلنڈر 2559 روپے 35 پیسے کا تھا۔ ایل پی جی کی نئی قیمتوں کا اطلاق یکم دسمبر 2021ء کیلئے ہے۔

ملک میں جاری گیس بحران پر قابو پانے کے لئے پاکستان گیس پورٹ نے گوادر سمیت ملک بھر میں ایل این جی سپلائی کے لیے ساڑھے 22کروڑ ڈالر کے منصوبے کا اعلان کر دیا ہے۔
کمپنی کے چیئر مین اقبال زیڈ احمد کا کہنا ہے کہ گوادر کی عوام گیس جیسی بنیادی سہولت سے محروم ہیں لہٰذا گوادر میں ایل این جی لا کر بلوچستان سمیت پورے ملک کو دی جاسکتی ہے۔ اقبال زیڈ احمد نے دعویٰ کیا کہ وہ 7 مہینوں میں ایل این جی لا سکتے ہیں جو گوادر کے عوام کو ایل پی جی سے آدھی قیمت پر سلینڈر کے ذریعے فراہم کی جائے گی تاہم اس کے لیے اوگرا سمیت متعلقہ ادارو ں سے این او سی کا انتظار ہے۔
چیئرمین پاکستان گیس پورٹ کے مطابق یہ ایل این جی بلوچستان سمیت ملک بھر میں سلینڈرز اور ٹینکرز کے ذریعے فراہم کی جائے گی، بحری جہاز سے ٹینکرز صنعتوں کو دیے جائیں گے جب کہ گھریلو صارفین کو سلینڈرز میں دی جائی گی۔انہوں نے کہا کہ پچھلے 8 ماہ سے این او سی کاانتطار ہے، 7 مہینے میں ایل این جی لے آئیں گے جو صرف گوادر بلوچستان نہیں پورے ملک میں جائے گی۔
پاکستان گیس پورٹ گوادر پورٹ کے ذریعے یومیہ 30کروڑ مکعب فٹ ایل این جی درآمد کرنے کا ارادہ رکھتی ہے، 125ملین ڈالر کی سرمایہ کاری فیز ون 100ملین دالر کی فیز ٹو میں ہو گی۔

پاک فوج کے سپہ سالار جنرل قمر جاوید باجوہ نے کہا ہے کہ خطے میں امن و استحکام کے لئے افغانستان پر عالمی اتفاق رائے پیداکرنا ناگزیر ہے. پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق نیشنل گارڈ بحرین کے چیف آف سٹاف میجر جنرل شیخ عبدالعزیز بن سعود الخلیفہ نے راولپنڈی میں جنرل ہیڈ کوارٹرز (جی ایچ کیو) کا دورہ کیا اور آرمی چیف جنرل قمر جاوید باجوہ سے ملاقات کی۔
آئی ایس پی آر کے مطابق ملاقات میں افغانستان کی موجودہ سکیورٹی صورتحال، مختلف شعبوں میں دوطرفہ تعاون، باہمی دلچسپی کے امور اور علاقائی سکیورٹی صورتحال پر تبادلہ خیال کیا گیا۔
ملاقات کے دوران آرمی چیف کا کہنا تھا کہ پاکستان بحرین کے ساتھ روایتی تعلقات برقرار رکھنے کی خواہش رکھتا ہے، بحرین سے مختلف شعبوں میں طویل مدتی اور دیرپا تعلقات چاہتے ہیں، علاقائی امن و استحکام کے لئے افغانستان پر عالمی اتفاق رائے پیداکرنا ہوگا۔

وزیراعظم عمران خان نے وزرا کو ملک سے باہر جانے سے روک دیا۔
وزیراعظم عمران خان کی زیرصدارت وفاقی کابینہ کا اجلاس ہوا جس میں ملکی معاشی و سیاسی صورتحال پر غور کیا گیا،، وزیراعظم نے حکم دیا کہ کوئی وزیر ملک سے باہر نہ جائے کہا کہ حکومت کو مختلف چیلنجز کا سامنا ہے۔
وزیراعظم نے وزراسے کہا کہ اگلے تین چارماہ معاشی معاملات کیلئے اہم ہیں، وزیراعظم نے وزرا کو ہدایت کی کہ اپنی اپنی وزارتوں میں رہیں۔

جنوبی افریقہ میں کرونا وائرس کے نئے ویرینٹ’اومی کرون وائرس‘کے سامنے آنے کے باعث پاک ویسٹ انڈیز سیریز کے براڈ کاسٹرز کو دشواری کا سامنا کرنا پڑ رہا ہے،
اومی کرون وائرس سے بچاؤ کے پیش نظر جنوبی افریقی باشندوں کی پاکستان آمد پر پابندی عائد کردی گئی، ہوم سیریز کیلئےبراڈ کاسٹرزعملے کے دیگر آپشنز پر غور کیا جارہا ہے جبکہ جنوبی افریقی براڈ کاسٹر عملے کو طویل آئسولیشن کروانے کا آپشن بھی زیرغور ہے،جنوبی افریقی براڈ کاسٹرز کو دیگر ممالک سے سفر کرکے پاکستان لانے کے آپشن پر بھی غور کیا جارہا ہے۔

پاکستان کرکٹ بورڈ کے چیئرمین رمیز راجہ نے پاکستان کی جیت پر خوشی کا اظہار کیا اور قومی ٹیم کو مبارکباد پیش کی۔
اپنی ٹوئٹ میں رمیزراجہ کا کہنا تھا ٹرننگ پِچ پر 200 رنز کا تعاقب ایک طرح کا امتحان تھا، ٹیم نے رنز کا تعاقب بہترین طریقے سے کیا، گھر سے دور فتح حاصل کرنا ہمیشہ بہت خاص ہوتا ہے۔

پاکستان کرکٹ ٹیم کے سابق فاسٹ بولر شعیب اختر کی ایک خواہش پاکستان کی بنگلادیش کیخلاف فتح کے باوجود ادھوری رہ گئی۔
شعیب اختر نے اپنے ٹویٹ میں کھلاڑیوں کی تعریف کرتے ہوئے ان کی کارکردگی کر سراہا اور کہا کہ ٹیسٹ فتوحات ہمیشہ دلکش ہوتی ہیں۔ شعیب اختر نے اپنی خواہش سے متعلق بتایا کہ خواہش تھی کہ عابد علی ٹیسٹ میں دوسری سنچری بھی بناتے۔

چٹاگانگ ٹیسٹ میں پہلی اننگ میں سنچری اور دوسری اننگ میں 91رنز کی شاندار کارکردگی دکھانے پر عابد علی کو پلیئر آف دی میچ کا ایوارڈ دیا گیا۔ عابد علی نے کہا کہ ڈومیسٹک کرکٹ کھیلتا ہوا آرہا ہوں، پر اعتماد تھا اور ایک اچھی پارٹنر شپ ہی لگانی تھی۔ مین آف دی میچ قرار دیے جانے کی بہت خوشی ہے جس کا کریڈٹ ڈومیسٹک میں کھیلنے کو جاتا ہے، ڈومیسٹک کرکٹ کھیلنے سے مجھے اعتماد ملا ہے، پہلی اننگز میں سنچری مکمل کی مگر دوسری میں نہ کر سکا جس کا افسوس ہے لیکن یہ کھیل کا حصہ ہے اور خوشی ہے کہ ہم میچ جیت گئے۔

پاکستان نے بنگلادیش کو 8 وکٹوں سے شکست دے کر چٹاگانگ ٹیسٹ میں فتح حاصل کرلی۔
ٹیسٹ سیریز کے پہلے میچ کے آخری روز پاکستان نے اپنی اننگز شروع کی تو اس کی پہلی وکٹ 151رنز پر گرگئی اور عبداللہ شفیق 73رنز بناکر مہیدی حسن کی گیند پر ایل بی ڈبلیو ہوگئے۔
پاکستان کی دوسری وکٹ 171رنز پر گری اور عابد علی نروس نائنٹیز کا شکار ہوکر 91 رنز پر آؤٹ ہوگئے۔
عابد علی کو پلیئر آف دی میچ کا ایوارڈ دیا گیا، انہوں نے پہلی اننگز میں 133 اور دوسری میں91 رنز بنائے۔
اوپنر کے آؤٹ ہونے کے بعد کپتان بابراعظم اور اظہر علی نے میچ کو آگے بڑھایا اور پرسکون انداز میں کھیلتے ہوئے ٹیم کو فتح دلائی۔ بابراعظم 13 اور اظہر علی 24 رنز بناکر ناٹ آؤٹ رہے۔
پاکستان اور بنگلادیش کے درمیان دو ٹیسٹ میچوں کی سیریز میں قومی ٹیم کو 0-1 کی برتری حاصل ہوگئی ہے اور دونوں ٹیموں کے درمیان دوسرا ٹیسٹ 4 دسمبر سے شروع ہوگا۔