Category صحت

کیلیفورنیا: امریکی سائنسدانوں نے 26,802 بالغ افراد کا مطالعہ کرنے کے بعد ثابت کیا ہے کہ خواتین کے بیشتر دماغی حصوں میں ہونے والی سرگرمیاں مردوں کے مقابلے میں زیادہ ہوتی ہیں جبکہ ان میں دماغ کے وہ حصے بھی شامل ہیں کا تعلق ردِعمل کنٹرول کرنے، اضطراب اور مزاج سے ہوتا ہے۔
نیوپورٹ بیچ، کیلیفورنیا کے ایک نجی ہسپتال میں کی گئی اس تحقیق کے نتائج ’’جرنل آف الزائیمرز ڈزیز‘‘ میں شائع ہوئے ہیں جن سے پتا چلتا ہے کہ خواتین کے دماغوں میں خون کا بہاؤ مردوں کے مقابلے میں زیادہ بہتر ہوتا ہے اور اسی لیے عام طور پر ان کا دماغ نہ صرف مردانہ دماغ کے مقابلے میں زیادہ بہتر طور پر کام کرتا ہے بلکہ انہیں مردوں کی نسبت دماغی امراض کا بھی خاصا کم سامنا کرنا پڑتا ہے۔
اس مطالعے میں 119 صحت مند جبکہ 26,683 ایسے خواتین و حضرات شریک تھے جنہیں کوئی نہ کوئی دماغی بیماری لاحق تھی۔ مطالعے کے دوران جدید تکنیکوں کی مدد سے مجموعی طور پر دماغ کے 128 مقامات کا جائزہ لیا گیا۔ اس دوران بنیادی نوعیت کی آزمائشوں (بیس لائن اسٹڈیز) میں خواتین کے دماغوں میں 65 مقامات پر سرگرمی میں اضافہ مشاہدے میں آیا جبکہ مردانہ دماغوں میں صرف 9 مقامات پر اضافی سرگرمی نوٹ کی گئی۔
اسی طرح جب ان لوگوں کو توجہ مرکوز رکھنے کی آزمائش سے گزارا گیا تو خواتین کے دماغوں میں 48 مقامات پر زیادہ سرگرمی کا مشاہدہ ہوا جبکہ مردوں میں یہ تعداد صرف 22 تھی۔
واضح رہے کہ مردوں میں ساری عمر لاحق رہنے والے ڈپریشن کی شرح خواتین کے مقابلے میں دوگنا زیادہ ہوتی ہے جبکہ ’’آٹزم‘‘ کہلانے والی نفسیاتی بیماری کی شرح بھی لڑکوں میں لڑکیوں کی نسبت 4.5 گنا زیادہ ہوتی ہے۔ اب پہلی بار اس کی بنیادی وجہ بھی سامنے آگئی ہے اور معلوم ہوا ہے کہ دماغ کے زیادہ تر حصوں میں بہتر دورانِ خون کی وجہ سے عورتوں کی دماغی صحت بھی مردوں کے مقابلے میں زیادہ بہتر رہتی ہے۔

بیجنگ: دانتوں میں ٹھنڈا اور گرم پانی لگنا ایک تکلیف دہ صورتحال ہے لیکن اب ماہرین نے سبز چائے سے ایک مرکب نکالا ہے جس کے ذریعے حساس دانتوں کے اس مرض سے نجات مل سکتی ہے۔
صرف امریکا میں ہی 25 فیصد آبادی دانتوں کی حساسیت کی شکار ہے اور ان کے لیے گرم غذا یا آئسکریم کھانا ناقابلِ برداشت ہوتا ہے۔ دانتوں کی اس کیفیت کے علاج کے لیے اب تک کوئی مؤثر طریقہ دریافت نہیں ہوسکا ہے۔ دانتوں کی حفاظتی پرت انیمل دھیرے دھیرے ختم ہو جاتی ہے اور دانت کی اگلی پرت ڈینٹائن نمایاں ہو جاتی ہے اور اس پر ٹھنڈی اور گرم اشیا بہت تکلیف دیتی ہیں۔ ڈینٹائن میں دانتوں کی حساس رگیں ہوتی ہیں جو سرد اور گرم اشیا کا احساس دلاتی ہیں۔
اب ڈووہان یونیورسٹی چین کے ڈاکٹر چوئی ہوانگ نے گرین ٹی کے پولی فینولز نکال کر اس میں ایک نینو ہائیڈروکسی ایپیٹائٹ شامل کرکے ایک بایومٹیریل (حیاتی مادہ) بنایا ہے۔ واضح رہے کہ سبز چائے میں جو پولی فینول پایا جاتا ہے اس کا پورا نام ایپی گیلوکٹیچن تھری گیلاٹ (ای سی جی سی) ہے اور اس میں میسو پورس سلیکا نینوپارٹیکلز شامل کیے گئے ہیں۔ اب اگر یہ مٹیریل دانتوں پر لگایا جائے تو ڈینٹائن کو نہ صرف بند کرتا ہے بلکہ انیمل کو تباہ کرنے والے بیکٹیریا کے حملے کو بھی روکتا ہے۔
اگر آپ ایک مرتبہ یہ مٹیریل دانتوں پر لگائیں تو 96 گھنٹوں تک یہ خاص کیمیکل خارج کرکے ڈینٹائن کی حساسیت روکتا ہے۔ توقع ہے کہ اگر یہ دریافت مصنوعہ کی صورت میں بازار میں آ گئی تو اس کی کامیابی کے بہت روشن امکانات ہیں۔

مگر یہ گلابی نقطہ یا طبی زبان میں پلاکا سیمیلیونیرس (Plica semilunaris) کس مقصد کے لیے ہوتا ہے، کیا آپ جانتے ہیں؟
درحقیقت متعدد طبی ماہرین کا ماننا ہے کہ یہ انسانوں میں کسی زمانے میں تیسری پلک کی نشانی ہے جو اب باقی نہیں رہی۔
اس طرح کی پلکیں پرندوں اور حشرات الارض میں پائی جاتی ہے اور ماہرین کے خیال میں کبھی ہمارے آباﺅ اجداد کی آنکھوں پر دو نہیں بلکہ تین پلکیں ہوتی تھیں۔
جانوروں میں یہ تیسری پلک آنکھوں کے تحفظ یا نمی کے لیے ہوتی ہے جس سے وہ دیکھنے کے قابل ہوتے ہیں۔
اب انسانوں میں یہ بظاہر بلا مقصد موجود ہے یا بس ایک نشانی ہے۔
تاہم اب بھی یہ ٹشو کسی حد تک کارآمد ثابت ہوتا ہے جو کہ آنسوﺅں کو بہنے میں مدد دینے کے ساتھ آنکھ میں داخل ہونے والی بیرونی اشیاء کو باہر نکالتا ہے۔
سائنسدانوں کے خیال میں یہ کسی زمانے میں آنکھوں کی نمی اور صفائی کا کام کرتا ہوگا یا کسی جنگلی علاقے میں شکاری جانوروں کو دیکھنے میں مدد دیتا ہوگا۔

سائنسدانوں کا کہنا ہے کہ کینسر کے علاج میں سونے کے ذرات کا استعمال مفید ہو سکتا ہے۔
ایڈنبرگ یونیورسٹی کے سائنسدانوں نے ایک تجربہ کیا ہے جس میں انھوں نے پھیپھڑے کے کینسر کے علاج کی دواؤں میں قیمتی دھات کی آمیزش کی ہے جس کے نتیجے میں اس کے موثر ہونے میں اضافہ دیکھا گیا ہے۔
سائنسدانوں نے سونے کے ذرات کو ایک کیمیائی آلے میں رکھ کر اس کا تجربہ کیا ہے۔
بہر حال ابھی یہ تجربہ انسانوں پر نہیں کیا گیا ہے تاہم یہ امید ظاہر کی گئی ہے کہ ایک دن کیموتھریپی میں سائڈ ایفیکٹ کو کم کرنے کے لیے اس کا استعمال کیا جا سکتا ہے تاکہ صحت مند خلیوں کو محفوظ رکھتے ہوئے صرف مرض کے زیر اثر خلیوں کو نشانہ بنایا جا سکے۔
خیال رہے کہ سونا محفوظ کیمیائی عنصر ہے جس میں کیمیائی رد عمل میں اضافے اور اس کے تیار کرنے کی اہلیت ہے۔
ایڈنبرگ یونیورسٹی نے اس دھات کے کیمیائی عناصر کی دریافت کی ہے جو کہ کسی سائڈ ایفکٹ کے بغیر زندہ چیزوں میں کیٹالسٹ کا کام کرتا ہے۔
اس کا تجربہ ایک زیبرا مچھلی پر کیا گیا ہے جس سے یہ اشارہ ملتا ہے کہ اس کا استعمال دوسرے جانداروں پر ہو سکتا ہے۔
عالمی خبررساں ادارے ایسوسی ایٹڈ پریس کے مطابق ایڈنبرگ یونیورسٹی میں کینسر ریسرچ شعبے کی ڈاکٹر اسیئر انسیٹی بروسیٹا نے کہا: ہم نے سونے کی نئی پراپرٹیز (خواص) کا پتہ چلایا ہے جس کا پہلے علم نہیں تھا اور ہماری دریافت سے یہ پتہ چلتا ہے کہ ٹیومر میں اس کے استعمال سے دوا کو محفوظ طریقے سے داخل کیا جا سکتا ہے۔
بہر حال انھوں نے کہا کہ اس کا مریضوں پر استعمال کرنے سے پہلے ابھی بہت کام باقی ہیں۔ لیکن یہ تحقیق اس ضمن میں ایک اہم قدم ہے۔
اسی شعبے کی سینیئر سائنس انفورمیشن آفیسر ڈاکٹر اینی میکارتھی نے کہا: ‘کینسر کی نئی اور بہتر دوائیں بنانے اور اس طرح کی تحقیق سے کینسر کے علاج اور اس کے سائڈ ایفکٹ کو کم کرنے میں مدد ملے گي۔ بطور خاص اس سے دماغ میں ہونے والے ٹیومر اور دوسرے مشکل علاج والے کینسر کے علاج میں فائدہ ہوگا۔’

یہ انتباہ کینیڈا میں ہونے والی ایک طبی تحقیق میں سامنے آیا— شٹر اسٹاک فوٹو
اگر چھ گھنٹے سے کم نیند کو معمول بنالیا جائے تو یہ دماغ کے لیے اسی طرح تباہ کن عادت ثابت ہوتی ہے جیسے شراب نوشی۔
یہ انتباہ کینیڈا میں ہونے والی ایک طبی تحقیق میں سامنے آیا۔
ویسے تو نیند کی کمی موٹاپے، ڈپریشن، ہارٹ اٹیک اور فالج جیسے امراض کا بھی بڑھاتی ہے مگر اب یہ بات سامےن آئی ہے کہ یہ دماغ پر بھی نقصان دہ اثرات مرتب کرنے والی عادت ہے۔
ڈیجیٹل ہیلتھ کمپنی Medisys کی تحقیق میں بتایا گیا کہ نیند کیکمی توقعات سے بھی زیادہ دماغ کے لیے تباہ کن ثابت ہوتی ہے۔
تحقیق میں بتایا گیا کہ اٹھارہ یا اس سے زائد گھنٹوں تک جاگتے رہنا دماغی صلاحیتوں پر اسی طرح اثرانداز ہوتا ہے جیسا شراب کے نشے میں دھت ہونے سے ہوتا ہے۔
تحقیق میں بتایا گیا کہ کبھی کبھار تو چھ گھنٹے یا اس سے کم نیند کوئی خاص اثر صحت پر مرتب نہیں کرتی تاہم اسے عادت بنالینا جان لیوا ثابت ہوسکتا ہے۔
تحقیق کے مطابق نیند ہارمونز کو ریگولیٹ کرنے میں انتہائی اہم کردار ادا کرتی ہے اور اس کی کمی کھانے کی خواہش کو بڑھا کر موٹاپے کا باعث بن جاتی ہے۔
محققین نے دریافت کیا کہ زیادہ گھنٹے تک بیدار رہنے سے دماغ غیر مستحکم ہوتا ہے اور اس کی توجہ مرکوز کرنے کی صلاحیت میں کمی آتی ہے۔
اس تحقیق کے نتائج جریدے ڈیجیٹل جرنل میں شائع ہوئے۔

انجیر پاکستان میں ایک عام پھل ہے جس کا ذکر قدیم یونانی اور رومی تاریخ میں بھی ملتا ہے۔

اس زمانے میں اس پھل کو خوشحالی، بانجھ پن سے بچاﺅ اور فراخی رزق کی علامت سمجھا جاتا تھا۔

آج بھی یہ پھل متعدد حوالوں سے فائدہ مند ثابت ہوتا ہے اور عام صحت کو بھی بہتر بناتا ہے جس کے چند فوائد درج ذیل ہیں۔
بانجھ پن سے تحفظ
یہ مردوں اور خواتین دونوں کو بانجھ پن سے تحفظ دیتا ہے، طبی سائنس کے مطابق اس پھل میں موجود منرلز ان ہارمونز کے لیے ضروری ہیں جو بانجھ پن سے بچانے میں مددگار ثابت ہوتے ہیں۔
بواسیر کے خلاف مفید
انجیر قدرتی فائبر سے بھرپور ہے جو کہ بواسیر کے حوالے سے مددگار ثابت ہوتا ہے۔
نظام ہاضمہ کے لیے بہترین
انجیر کا استعمال معدے کے تیزاب کو الکلی میں بدل دیتا ہے تو جن افراد کو معدے کے امراض جیسے تیزابیت، بدہضمی اور مرض کروہن کا سامنا ہوتا ہے، ان کے لیے انجیر کھانا فائدہ مند ہوتا ہے، کچھ ہفتوں تک رات کو انجیر پانی میں بھگو کر صبح کھانا ایسے افراد کے لیے مفید ہے۔
جسمانی توانائی اور اعصاب کے لیے
انجیر میں قدرتی وٹامن بی کمپلیکس موجود ہوتا ہے جو کہ اعصاب کے لیے انتہائی ضروری ہوتا ہے، اسی طرح وٹامن بی جسمانی توانائی کے لیے بھی بہت ضروری ہے کیونکہ اس کی کمی ہیموگلوبن کی مناسب مقدار نہ بننے کا باعث بنتی ہے، جس کے نتیجے میں جسم تھکاوٹ کا جلد شکار ہوتا ہے جبکہ اکثر سر بھی چکرانے لگتا ہے۔
توند نکلے بغیر جسمانی وزن میں اضافہ
انجیر میٹابولزم کو قدرتی استحکام فراہم کرنے والا پھل ہے جو جسمانی وزن میں صحت مند اضافہ کرتا ہے مگر توند نہیں نکلتی۔
بلڈ پریشر میں کمی
انجیر میں موجود کیلشیئم اور میگنیشم خون کی شریانوں کو سکون پہنا کر بلڈ پریشر کوبڑھنے سے روکتے ہیں۔

چائے یا کافی پینا کچھ اتنا نقصان دہ بھی نہیں، مختلف طبی رپورٹس میں ثابت ہوا ہے کہ کافی یا چائے نوشی سے ذیابیطس ٹائپ ٹو میں مبتلا ہونے کا خطرہ کم ہوجاتا ہے۔ ہارورڈ اسکول آف پبلک ہیلتھ کی ایک تحقیق میں یہ بات سامنے آئی تھی کہ روزانہ 6 کپ کافی کا استعمال ذیابیطس کا خطرہ 33 فیصد تک کم کردیتا ہے، چائے اور کافی میں موجود مخصوص اجزاء انسولین کی مزاحمت کو کم کرتے ہیں اور گلوکوز میٹابولزم کو فروغ دیتے ہیں، جو گلوکوز کو توانائی میں منتقل کرنے میں مدد دیتا ہے۔

اگر رات گئے کا وقت آپ کے لیے دن کا پسندیدہ حصہ ہے تو آپ خود ذیابیطس کے خطرے کو دعوت دے رہے ہیں، ایک حالیہ کورین طبی تحقیق کے مطابق جو لوگ رات گئے یا علی الصبح تک جاگتے رہتے ہیں ان میں ذیابیطس کے مرض تشکیل پانے کا امکان بہت زیادہ ہوتا ہے چاہے وہ 7 سے 9 گھنٹے کی نیند ہی کیوں نہ لیں، تحقیق میں بتایا گیا کہ رات گئے تک جاگنے والے مصنوعی روشنی جیسے ٹیلیویژن اور موبائل فون کی روشنی کی زد میں زیادہ آتے ہیں جس سے انسولین کی حساسیت میں کمی اور بلڈ شوگر ریگولیشن خراب ہوتی ہے۔

ایک امریکی تحقیق کے مطابق اگر معدے میں اچھے کی جگہ خراب بیکٹریا کی مقدار بڑھ جائے تو ذیابیطس کا خطرہ بھی زیادہ ہوتا ہے۔ تحقیق میں بتایا گیا کہ معدے کو اچھے بیکٹریا یعنی پرو بائیوٹیکس کی ضرورت ہوتی ہے تاکہ غذا کو مناسب طریقے سے ہضم کیا جاسکے۔ ان کی کم تعداد سے سوجن پیدا ہوتی ہے جو انسولین کی مزاحمت کا باعث بن سکتی ہے، دہی، پنیر اور ایسی ہی دیگر غذائیں معدے کے لیے بہترین بیکٹریا سے بھرپور ہوتی ہیں۔

یہ ٹھیک ہے کہ سورج کی مضرصحت شعاعوں سے تحفظ ضروری ہے مگر اس کے لیے باہر نہ نکلنا یا دھوپ سے بچنا ذیابیطس کے خطرے کا باعث بن سکتا ہے۔ اسپین میں ہونے والی ایک حالیہ تحقیق کے مطابق وٹامن ڈی کی کمی ذیابیطس ٹائپ ٹو کا باعث بن سکتی ہے۔ تحقیق میں بتایا گیا کہ وٹامن ڈی لبلبے کے افعال کو ٹھیک رکھنے میں مددگار ہے جو انسولین کو پیدا اور بلڈ شوگر کو ٹھیک کرنے کا کام کرتا ہے۔

اگر آپ اکثر کئی کئی گھنٹے بیٹھ کر گزار دیتے ہیں تو ذیابیطس کی تشخیص ہونے پر آپ کو حیرت نہیں ہونی چاہیے۔ یہ بات نیدرلینڈ میں ہونے والی ایک نئی طبی تحقیق میں سامنے آئی۔ ماسٹریچٹ یونیورسٹی کی تحقیق میں بتایا گیا کہ ہر وہ گھنٹہ جو بیٹھ کر گزارا جائے ذیابیطس ٹائپ ٹو کا خطرہ 22 فیصد تک بڑھا دیتا ہے۔ اس تحقیق کے دوران ڈھائی ہزار کے لگ بھگ خواتین کا 8 روز تک جائزہ لیا گیا اور نتائج سے معلوم ہوا کہ جن لوگوں نے اپنا زیادہ وقت بیٹھ کر گزارا ان میں اس مرض کا خطرہ بڑھ گیا۔ محققین کے مطابق نتائج سے معلوم ہوتا ہے کہ سست طرز زندگی ذیابیطس ٹائپ ٹو کے شکار ہونے یا اس کی روک تھام کے حوالے سے اہم کردار ادا کرسکتا ہے۔

ایک امریکی تحقیق کے مطابق ٹی وی کے ساتھ گزارے جانے والا ہر گھنٹہ ذیابیطس میں مبتلا ہونے کے خطرے کو لگ بھگ چار فیصد تک بڑھا دیتا ہے۔ تحقیق میں بتایا گیا کہ بہت زیادہ بیٹھنا معدے کے ارگرد چربی کے جمع ہونے کا باعث بنتا ہے جس سے توند نکلتی ہے، یہ اضافی چربی جسم میں انسولین کی حساسیت کو کم کرکے ذیابیطس کا مریض بناسکتی ہے۔
صبح اٹھ کر ناشتہ نہ کرنا نہ صرف دن کے باقی حصے میں آپ کے اندر نقاہت کا احساس برقرار رکھتا ہے بلکہ یہ ذیابیطس ٹائپ ٹو کو دعوت دینے کے مترادف ہوتا ہے۔ ایک امریکی تحقیق کے مطابق جب لوگ جسم کو غذا سے محروم رکھتے ہیں تو انسولین کا لیول متاثر ہوتا ہے اور بلڈ شوگر کو کنٹرول کرنا مشکل ترین امر ہوجاتا ہے۔
یہ وہ وجہ ہے جس پر کسی کو حیرت نہیں ہونی چاہیے، ایک طبی تحقیق کے مطابق شکر کے استعمال سے اگر کوئی فرد روزانہ اضافی ڈیڑھ سو کیلوریز حاصل کرے تو اس میں ذیابیطس کا خطرہ 1.1 فیصد زیادہ بڑھ جاتا ہے۔
ذیابیطس کے شکار افراد کو اپنی غذا میں چربی کے استعمال سے کافی حد تک گریز کرنا چاہیے، جنرل آف نیوٹریشن میں 2011 میں شائع ہونے والی ایک تحقیق کے مطابق چربی سے بھرپور غذا کے استعمال کے نتیجے میں بلڈ شوگر کی سطح میں 32 فیصد تک اضافہ ہوسکتا ہے۔ تحقیق کے مطابق چربی سے بھرپور اشیاء جسم میں دوڑنے والے خون پر اثرانداز ہوتی ہیں جس سے اس کی خون سے شوگر صاف کرنے کی صلاحیت متاثر ہوتی ہے۔
یقیناً تمباکو نوشی کی عادت کسی کے لیے بھی صحت بخش نہیں مگر سگریٹ خاص طور پر اُن افراد کے لیے خطرناک ہے جو ذیابیطس کے شکار ہوں۔ کیلیفورنیا اسٹیٹ یونیورسٹی کی تحقیق کے مطابق جتنا زیادہ نکوٹین انسانی خون میں شامل ہوتا ہے اتنا ہی بلڈ شوگر بڑھ جاتا ہے اور اس سطح میں بہت زیادہ اضافہ ذیابیطس کی سنگین پیچیدگیوں کا باعث بن سکتا ہے جیسے دل کا دورے، فالج اور گردوں کا فیل ہونا وغیرہ۔

لاہور (حکیم محمد عثمان)طب اسلامی کی مدد سے بلڈپریشر کا نہایت بہتر علاج کیا جاسکتا ہے ۔اطبا اگر اپنی تحقیق کا دائرہ وسیع کریں تو انہیں ایسی بہت سی نباتات سے آگاہی حاصل ہوسکتی ہے جو زمانہ قدیم سے مسلمان اطبا کے ہاں مستعمل رہی ہیں ۔اور ابھی تک بہت سے اسلامی ملکوں مین ان کا رواج ہے۔مجھے یاد ہے ایک غیر ملکی دورہ کے دوران ایران کے عالم دین سے ملاقات ہوئی تھی جو طب اسلامی پر بھی عبور رکھتے تھے ۔انہوں نے بتایا کہ وہ ایران میں اسلامی طب کی مدد سے خطرناک ترین امراض کا علاج کرتے ہیں۔ایران میں شاہی نامی سبزی کو بلڈپریشرمین کمی لانے کے لئے کھایا جاتا ہے۔جبکہ رات کو سونے سے پہلے سداب نامی پتے کو کھانے سے بلڈ پریشر اور دردوں کی دوسری بیماریاں دور ہوجاتی ہیں۔
بلڈ پریشر کا غذا سے علاج بھی کیا جا سکتا ہے ۔مثلاً آٹھ گھنٹے بعد انگور کا ایک خوشہ یا ایک گلاس انگور کا جوس پی لیا جائے تو یہ پھل بلڈپریشر کم کرنے کے علاوہ خون میں زہریلے نمک کو کم کرتا ہے،ماں کے دودھ میں اضافے کا باعث ہے اور گردے کی کارکردگی کو زیادہ کرتا ہے۔اسیطرح روزانہ ایک مشت تمشک نامی پھل کھانے سے خون کے گاڑھے پن اور بلڈپریشر میں کمی آتی ہے اور عفونت کا علاج ہوتا ہے،سفید شہتوت بھی ایسے پھلوں میں سے ہے جو بلڈ پریشر کے لیے مفید ہے۔
طب اسلامی میں بلڈپریشر کا علاج عناب کے جوشاندہ میں پایا جاتا ہے۔ اس جوشاندہ میں شہد ڈال لیا جائے تو جگر کے لیے عناب کے مضرات ختم ہوجاتے خون کا ابال کم ہوجاتا ہے۔

انسانی جین میں ترمیم کی ایک ایسی کامیابی جس سے امیدوں کے ساتھ ساتھ سینکڑوں خدشات بھی وابستہ ہیں۔ (فوٹو: فائل)
انسانی جین میں ترمیم کی ایک ایسی کامیابی جس سے امیدوں کے ساتھ ساتھ سینکڑوں خدشات بھی وابستہ ہیں۔ (فوٹو: فائل)
کراچی: عالمی میڈیا پر خبر گرم ہے کہ سائنسدانوں کی ایک عالمی ٹیم نے جین میں تبدیلی (جین ایڈیٹنگ) کی جدید ترین تکنیک ’’کرسپر-کاس9‘‘ (CRISPR-Cas9) استعمال کرتے ہوئے انسانی جنین (ایمبریو) میں سے ایسا خراب جین نکال باہر کیا ہے جو دل کی ایک موروثی بیماری کی وجہ بنتا ہے۔ یعنی سائنسدانوں نے جین ایڈیٹنگ کی مدد سے دل کی اس بیماری کو اگلی نسل تک منتقل ہونے سے روک دیا ہے۔
توقع ہے کہ یہ کامیابی آئندہ برسوں میں سینکڑوں دوسری موروثی بیماریوں کے مؤثر علاج کا پیش خیمہ بنے گی؛ لیکن اس تحقیق میں شریک ماہرین نے خبردار کیا ہے کہ مذکورہ کامیابی کو بہت زیادہ بڑھا چڑھا کر پیش نہ کیا جائے کیونکہ یہ ایک لمبے سفر کا پہلا قدم ہے۔ یہ کامیابی اہم ضرور ہے لیکن ابھی یہ اپنے بالکل ابتدائی مرحلے پر ہے جسے پختہ ہونے میں مزید کئی مرحلوں اور رکاوٹوں کو عبور کرنا ہے۔ چونکہ اس تحقیق کا براہِ راست تعلق انسان سے ہے اس لیے ماہرین کا کہنا ہے کہ انہیں پھونک پھونک کر، بڑی احتیاط سے ایک ایک قدم آگے بڑھانا پڑے گا تاکہ ان تحقیقات سے انسانیت کو فائدہ پہنچے اور کوئی نقصان نہ ہو۔
البتہ یہی پیش رفت اخلاقیات کے تناظر میں متعدد سوالات اور خدشات کو مہمیز بھی کررہی ہے۔ مثلاً اس سوال کی گونج ایک بار پھر زیادہ ہوگئی ہے کہ کیا انسان اس قابل ہوجائے گا کہ وہ جین ایڈیٹنگ کی جدید تکنیکوں کی مدد سے اپنی آئندہ نسلوں کو ہر طرح کی موروثی (نسل در نسل چلنے والی) بیماریوں سے محفوظ کرسکے؟ اگر انسان اپنی جینیاتی ساخت (جنیٹک میک اپ) اپنی مرضی کے مطابق بدلنے پر قادر ہوگیا تو کیا آنے والے عشروں اور صدیوں میں ’’مافوق الفطرت انسان‘‘ (سپرمین) بنانے کا دیرینہ خواب شرمندہ تعبیر ہوجائے گا؟
ایسے خدشات بھی موجود ہیں کہ انسانی جینوم سے مکمل اور گہری واقفیت نہ رکھنے کی وجہ سے ہم اس میں ایسی تبدیلیاں بھی کرسکتے ہیں جو ہماری آنے والی نسلوں کےلیے مفید کے بجائے مضر اور ہلاکت خیز ثابت ہوں؛ اور انہیں طاقتور کے بجائے معذور بنادیں۔ سماجی نقطہ نگاہ سے یہ بات بھی قابلِ تشویش ہے کہ کہیں ایسا نہ ہو کہ معاشرے کا مالدار طبقہ اپنی اگلی نسل کو جین ایڈیٹنگ کی بدولت زیادہ طاقتور، زیادہ ذہین اور زیادہ باصلاحیت بناتے ہوئے انسانی غلامی کے ایک دورِ جدید کی بنیاد رکھ دے۔
غرض کہ جین ایڈیٹنگ کے شعبے میں ہونے والی اس تازہ پیش رفت سے امیدوں کے ساتھ ساتھ ہزاروں خدشات بھی وابستہ ہیں جن کا ازالہ کیے بغیر شاید ہی کوئی انقلاب انسانوں کےلیے مفید کے درجے پر فائز ہوسکے۔ ایسا کیوں کہا جارہا ہے؟ یہ جاننے کےلیے آپ کو تفصیل سے یہ سارا معاملہ سمجھنا پڑے گا۔
ریسرچ جرنل ’’نیچر‘‘ کے تازہ شمارے میں شائع شدہ تحقیقی رپورٹ کے مطابق امریکا، جنوبی کوریا اور چین کے ماہرین پر مشتمل ایک بین الاقوامی تحقیقی ٹیم نے مذکورہ تجربات میں ’’کرسپر-کاس9‘‘ (CRISPR-Cas9) کہلانے والی جدید تکنیک سے استفادہ کیا ہے جس نے حالیہ برسوں کے دوران جین میں تبدیلی یعنی ’’جین ایڈیٹنگ‘‘ کو ماضی کے مقابلے میں بہت آسان، تیر بہدف اور تیز رفتار بنادیا ہے۔
تجربات کےلیے پہلے مرحلے پر ایک ایسے رضاکار سے کھال کے خلیات حاصل کیے گئے جو ’’ہائپرٹروفک کارڈیو مایوپیتھی‘‘ (ایچ سی ایم) نامی موروثی بیماری میں مبتلا تھا۔
دل کو متاثر کرنے اور جوانی میں ناگہانی موت کی وجہ بننے والی یہ بیماری ’’ایم وائی بی پی سی تھری‘‘ (MYBPC3) جین میں خرابی کے باعث ہوتی ہے۔ اندازہ ہے کہ دنیا بھر میں اس کے مریضوں کی تعداد 1 کروڑ 40 لاکھ کے لگ بھگ ہے؛ یعنی ہر 500 میں سے 1 انسان اس بیماری (ایچ سی ایم) سے متاثر ہے۔
ایچ سی ایم براہِ راست دل کے پٹھوں پر اثرانداز ہوتی ہے اور انہیں معمول کے مقابلے میں قدرے موٹا کردیتی ہے؛ جس کے نتیجے میں دل کی دھڑکن کسی بھی وقت رک سکتی ہے اور انسان اچانک ہی موت کے منہ میں جاسکتا ہے۔ تشویش ناک بات یہ ہے کہ ایچ سی ایم کی کوئی ابتدائی علامات نہیں ہوتیں جبکہ اس کی وجہ بننے والا خراب جین والدین سے بچوں میں منتقل ہو کر نسل در نسل کےلیے نادیدہ خطرہ بنا رہتا ہے۔ عام طور پر نوجوان ایتھلیٹ اس کا آسان ہدف ثابت ہوتے ہیں جو کھیل کے دوران اچانک ہی دل کی دھڑکن بند ہونے سے ہلاک ہوجاتے ہیں۔
رضاکار سے کھال کے خلیات حاصل کرنے کے بعد ان میں سے خراب MYBPC3 جین علیحدہ کیا گیا جس کی مدد سے ’’کرسپر-کاس9‘‘ تکنیک پر مبنی خصوصی حکمتِ عملی ترتیب دی گئی تاکہ صرف اسی خراب جین کو ڈی این اے میں سے کاٹ کر نکال باہر کیا جاسکے۔
جب کرسپر-کاس9 اس مقصد کےلیے تیار ہوگئی تو اگلے مرحلے میں اسی رضاکار سے نطفے (sperms) لیے گئے جنہیں 12 مختلف لیکن صحت مند خواتین سے حاصل کردہ بیضوں (eggs) کے ساتھ ٹیسٹ ٹیوب میں ملایا گیا۔ اس ملاپ کے نتیجے میں ماہرین کو ایسے 58 بارور بیضے (fertilized eggs) حاصل ہوئے جو نشوونما کے مراحل طے کرنے کے بعد صرف چند خلیات پر مشتمل جنین (ایمبریو) میں تبدیل ہوگئے؛ یعنی ٹیسٹ ٹیوب میں حمل کا بالکل ابتدائی مرحلہ حاصل کرلیا گیا۔
واضح رہے کہ ’’آئی وی ایف‘‘ یا ’’ٹیسٹ ٹیوب بے بی‘‘ کہلانے والی تولیدی تکنیک میں بھی یہی سب کچھ ہوتا ہے؛ جس کے بعد یہ جنین (ایمبریو) خاتون کے رحم میں منتقل کردیا جاتا ہے جہاں یہ نو ماہ کے دوران اپنی نشوونما کی منزلیں طے کرنے کے بعد ایک بچے کی حیثیت سے جنم لیتا ہے۔
البتہ حالیہ تجربات میں سائنسدان صرف جنین تک محدود رہے اور اسی مرحلے پر انہوں نے جنین میں پہلے سے تیار شدہ کرسپر-کاس9 ’’سالماتی قینچی‘‘ (مالیکیولر سیزر) داخل کردی جسے خراب MYBPC3 جین کو کاٹ کر نکال باہر کرنے کےلیے بطورِ خاص بنایا گیا تھا۔
غیرمعمولی کامیابی
خصوصی طور پر تیار شدہ ’’کرسپر-کاس9‘‘ نے بڑی مہارت سے جنین میں موجود خراب MYBPC3 جین کو نشانہ بنایا اور اسے کاٹ کر باہر نکال دیا۔ لیکن ساتھ ہی ساتھ کچھ اور بھی ہوا: خراب جین کے کٹ کر علیحدہ ہوجانے پر جنین کے اپنے (قدرتی) ’’مرمتی نظام‘‘ نے سرگرمی دکھائی اور خاتون کے بیضے سے آئے ہوئے صحت مند MYBPC3 جین کی ہوبہو نقل تیار کرکے اس (خراب جین) کی جگہ لگا دی۔
ان تجربات کے دوران ’’کرسپر-کاس9‘‘ کی درستگی حیرت انگیز رہی، یعنی اس نے بہت نپے تلے انداز سے انسانی ڈی این اے میں صرف خراب MYBPC3 جین والے حصوں ہی کو نشانہ بنایا جبکہ دوسرے جین بالکل بھی نہیں چھیڑے۔ علاوہ ازیں 58 میں سے 42 جنین اس تکنیک کی بدولت بالکل درست اور صحت مند ہوگئے؛ مطلب یہ کہ ان میں تمام درست MYBPC3 جین موجود تھے۔ ان 42 میں سے بھی صرف ایک جنین ایسا تھا جس کے مختلف خلیوں میں الگ الگ طرح کے ڈی این اے موجود تھے؛ اس قسم کا جنین ’’موزائیک‘‘ کہلاتا ہے اور عملاً بے کار تصور کیا جاتا ہے۔
ان تجربات کا اہم پہلو یہ ہے کہ ان میں مرمت کے بعد درست اور صحت مند ہونے والے تمام جنین (ایمبریوز) اس قابل تھے کہ انہیں مزید نشوونما دے کر جیتے جاگتے انسان کو جنم دیا جاسکتا؛ لیکن چونکہ ان تجربات کا مقصد یہ نہیں تھا اس لیے یہ جنین بھی ضائع کردیئے گئے۔
یہ بتانا ضروری ہے کہ اس سے پہلے (2015 اور 2016 میں) چینی ماہرین بھی ’’کرسپر-کاس9‘‘ کی تکنیک استعمال کرتے ہوئے ایسے ہی کم از کم دو کامیاب تجربات کرچکے ہیں جن میں تولیدی خلیات (نطفے، بیضے اور بارور بیضے) میں سے مختلف خراب جین نکال باہر کیے گئے تھے، البتہ یہ تولیدی خلیات جان بوجھ کر ایسے رکھے گئے تھے کہ اپنی نشوونما ایک خاص مرحلے سے آگے نہ بڑھاسکیں تاکہ اخلاقی اعتراضات سے بچا جاسکے۔
جین ایڈیٹنگ میں یہ اہم کامیابی اپنی جگہ لیکن اب بھی یہ کہنا قبل از وقت ہے کہ کرسپر-کاس9 سے مستقبل میں انسانیت کو واقعتاً کوئی فائدہ پہنچے گا یا پھر موجودہ مسائل مزید سنگین ہوجائیں گے۔

واشنگٹن(این این آئی)کچھ دیر بیٹھنے کے بعد اٹھنے پر آپ کا سر چکرانے لگتا ہے ؟ اگر ہاں تو یہ قبل از وقت موت، پارکنسن یا ذہنی تنزلی کے امراض کی علامت ہوسکتی ہے۔امریکی ٹی وی کے مطابق یہ انتباہ امریکا میں ہونے والی ایک طبی تحقیق میں سامنے آیا ،ہاورڈ میڈیکل سکول کی تحقیق کے مطابق کبھی کبھار کھڑے ہونے کے کچھ منٹ بعد سر چکرانا یا سر ہلکا محسوس زیادہ پریشان کن نہیں کیونکہ یہ اچانک بلڈ پریشر کم ہونے، پانی کی کمی یا کسی دوا کا اثر بھی ہوسکتا ہے۔مگر ایسا اکثر ہو اور کھڑے ہونے کے ساڑھے 3 منٹ بعد اس کا اثر محسوس ہو تو یہ کسی سنگین مرض کی علامت ہوسکتا ہے۔165 افراد پر ہونے والی اس تحقیق میں یہ بات سامنے آئی کہ جو لوگ اس طرح کی علامت کا شکار ہوتے ہیں ان میں اموات اور دماغی امراض کی شرح تشویشناک حد تک زیادہ ہوتی ہے۔
محققین کے مطابق اس طرح کی علامت بار بار ظاہر ہونے کی صورت میں اگلے 10 برسوں میں موت کا خطرہ 29 فیصد تک ہوتا ہے جبکہ پارکنسن یا ڈیمینشیا کے امراض میں مبتلا ہونے کا امکان 31 فیصد تک بڑھ جاتا ہے۔محققین کے مطابق تحقیق کے نتائج سے معلوم ہوتا ہے کہ کھڑے ہونے کے 3 منٹ بعد سر چکرانے کے احساس کا شکار ہونے والے افراد میں یہ مرض زیادہ سنگین شکل اختیار کرلیتا ہے۔