Category تازہ ترین

امریکی مسافر طیارے کو پرواز کے دوران شدید ہچکولوں اور جھٹکوں کا سامنا کرنا پڑا جس کی وجہ سے 4 افراد زخمی ہوگئے۔

غیرملکی میڈیا کے مطابق طیارہ شمالی کیرولینا سے فلوریڈا جا رہا تھا جس میں 179 مسافر اور عملے کے 6 افراد سوار تھے۔

رپورٹس کے مطابق ہوا کے شدید دباؤ کے باعث 2 مسافر اور عملے کے 2 ارکان زخمی ہوئے جنہیں بحفاظت لینڈگ کے بعد فوری طور پر اسپتال منتقل کردیا گیا۔

غیرملکی میڈیا کے مطابق پرواز کے دوران طیارہ کچھ ہی منٹس میں 5 ہزار فُٹ نیچے آگیا تھا جس کے باعث 4 افراد زخمی ہوئے۔

رپورٹس کے مطابق طیارے میں سوار مسافروں نے اس واقعے کو بہت ہی خوفناک قرار دیا ہے۔

لاہور:پاکستان کی بڑی صنعتوں میں گزشتہ مالی سال کے دوران پیداوار میں 9.89 فیصد کمی ریکارڈ کی گئی۔ادارہ شماریات پاکستان کے مطابق لارج اسکیل مینوفیکچرنگ انڈسٹریز کی پیداوار میں مئی 2022 کی نسبت مئی 2023 کے دوران 14.37 فیصد کمی ریکارڈ کی گئی۔گزشتہ مالی سال کے دوران کاٹن یارن، گارمنٹس، آئرن اسٹیل سمیت 8 سیکٹر کی پیداوار میں کمی ہوئی، سیمنٹ کی پیداوار میں 12.36 فیصد، پٹرولیم پراڈکٹس کی پیداوار میں 12.23 فیصد کمی ریکارڈ کی گئی۔کاٹن یارن کی پیداوار میں 21.38 فیصد اور آٹو موبائل سیکٹر کی پیداوار 47.70 فیصد گر گئی، فرٹیلائزر شعبے کی پیداوار 9.24 فیصد اور آئرن اینڈ اسٹیل کی مینوفیکچرنگ میں 4.76 فیصد کی کمی ریکارڈ کی گئی۔

وفاقی تحقیقاتی ادارے ایف آئی اے کے امیگریشن سیل نے کراچی ایئر پورٹ پر کارروائی کرتے ہوئے ایک ایرانی شہری کو گرفتار کر لیا جو جعلی پاکستانی سفری دستاویزات پر ملازمت کے لیے قطر جانے کی کوشش کر رہا تھا۔

جاسم نامی ملزم کے موبائل فون کے معائنے کے دوران ڈیٹا میں ایرانی شہریت کی دستاویزات بھی موجود تھیں۔

ملزم اپنے پاس موجود پاکستانی سفری دستاویزات پر درج رہائشی پتے اور اہلِ خانہ کی تفصیلات کے حوالے سے جوابات دینے سے قاصر رہا۔

دورانِ تفتیش یہ انکشاف سامنے آیا ہے کہ ملزم نے پاکستانی سفری دستاویزات مبینہ طور پر انسانی اسمگلر کی مدد سے حاصل کی تھیں۔

ملزم کو حراست میں لیے جانے کے بعد مزید کارروائی کے لیے ایف آئی اے کے انسدادِ انسانی اسمگلنگ سرکل منتقل کر دیا گیا ہے

2018 کے الیکشن میں شہباز شریف کو ہرانے والے محمد خان لغاری نے پاکستان تحریک انصاف (پی ٹی آئی) چھوڑنے کا اعلان کردیا۔

سردار محمد خان لغاری 2018 کے الیکشن میں قومی اسمبلی کے حلقے این اے 192 ڈیرہ غازی خان  سے منتخب ہوئے تھے، انہوں نے انتخابات میں 80522 ووٹ حاصل کیے تھے، جبکہ ان کے مقابلے میں مسلم لیگ (ن) کی طرف سے شہباز شریف نے 67608 ووٹ حاصل کیے۔

محمد خان لغاری کا کہنا ہے کہ 9 مئی کے پرتشدد واقعات کی وجہ سے پی ٹی آئی چھوڑنے کا فیصلہ کیا ہے۔

انہوں نے کہا کہ چیئرمین پی ٹی آئی کے ریاست مخالف بیانیے کے ساتھ مزید نہیں چل سکتا۔

اسلام آباد :پاکستان تحریک انصاف نے امپورٹڈحکومت پر کڑی تنقید کرتے ہوئے کہا کہ ملک بھر میں آٹے اور چینی سمیت اشیائے خورونوش کی قیمتوں میں تکلیف دہ اضافہ ہوگیا ہے،اپنے آئینی حقوق اور انتخاب کا حق مانگنے والے عوام کو مہنگائی کے ذریعے سزا دینے کا سلسلہ نہایت شرمناک اور قابلِ مذمت ہے، تحریک انصاف کے میڈیا سیل کی جانب سے جاری بیان میں کہاگیا ہے کہ شہباز حکومت بیرحمی، نالائقی اور مجرمانہ طرزِ حکومت کی جیتی جاگتی تصویر ہے، اس ظالم سرکار نے پہلے بجلی کے نرخوں میں اضافہ کرکے عوام کو مہنگائی کے بوجھ تلے کچلنے کی کوشش کی، اب آٹے، چینی اور دیگر اشیائے خورونوش کے دام بڑھا کر عوام خصوصاً کروڑوں غریبوں کے منہ سے روٹی کا نوالہ چھیننے میں لگی ہوئی ہے، اس بے رحم حکومت کے ہاتھوں ملک میں بیروزگاری کا سیلاب ہے،تنخواہ دار طبقے کیلئے اپنے بچوں کیلئے دو وقت کی روٹی میسر کرنا مشکل ترین بنا دیا گیا ہے، ترجمان نے کہا کہ چھ فیصد کی سالانہ شرح سے ترقی کرتی معیشت کو 0.3 فیصد کی شرمناک سطح تک گرادیا گیا ہے، میڈیا کے زبان پر تالے ڈال کر عوام کے معاشی قتلِ عام کا ظالمانہ سلسلہ جاری ہے، ان پندرہ ماہ میں روپے کو ردّی، زرِمبادلہ کے ذخائر کو نچوڑ دیا گیا،لارج سکیل مینوفیکچرنگ، زراعت، صنعت اور تجارت کو بیک گیئر میں ڈال کر تباہی کی ڈھلوان پر لڑھکا دیا گیا، ملک کو قرض کے ڈھیر تلے دفن کرکے مزید قرض لے رہے اور اس پر شادیانے بجا رہے ہیں، ان کی بدانتظامی اور نااہلی سے تجربے اور مہارت کی حامل ورک فورس تیزی سے ملک چھوڑ کر جارہی ہے، تازہ ترین اعداد و شمار کے مطابق 12 لاکھ افراد مایوس ہو کر پاکستان چھوڑ کر باہر جاچکے ہیں،ملک میں باقی رہ جانے والوں کو مہنگائی اور فسطائیت کے دْہرے عذاب میں مبتلا کیا جارہا ہے، انہوں نے کہا کہ قوم جھولیاں اٹھا اٹھا کر اس بے چہرہ بندوبست سے نجات کی دعائیں مانگ رہے ہیں، ریاستی فیصلہ ساز عوام کی حالتِ زار پر رحم کریں اور مجرموں کی سیاست کے مردہ لاشے میں ’’سیاسی انجینئرنگ‘‘ سے روح پھونکنے سے باز رہیں، عوام کو اپنی زندگیاں عذاب بنانے والوں کے محاسبے کا آئینی و جمہوری حق بغیر کسی مداخلت کے دیا جائے۔

اسلام آباد:وزیر داخلہ رانا ثنااللہ نے ہندو برادری کو دھمکیوں کا نوٹس لے لیا، رانا ثنا اللہ کی ہدایت پر وزارت داخلہ کے حکام نے سندھ حکومت کے افسران سے رابطے کیے ہیں،گزشتہ روز وزیر داخلہ رانا ثنااللہ سے رکن قومی اسمبلی کھیل داس کوہستانی نے ملاقات کی ،کھیل داس نے سندھ میں حالیہ واقعات سے وفاقی وزیرداخلہ کو آگاہ کیا،ملاقات میں ہندو برادری کے تحفظ کے حوالے سے اقدامات مزید بہتر کرنے پر زور دیا گیا،رانا ثناء اللہ نے کہا کہ ہندو برادری سمیت تمام اقلیتوں کے حقوق کا تحفظ ذمہ داری ہے،کشمور ،جیکب آباد،گھوٹکی سمیت دیگر شہروں کیحالیہ واقعات کے تناظر میں صورتحال کا جائزہ لے رہے ہیں،سندھ کے شمالی اضلاع میں پولیس نے ہندو کمیونٹی کی عبادت گاہوں اور بستیوں کی سکیورٹی بڑھا دی ہے، ڈاکوئوں کی جانب سے سیما رند کی واپسی کے لیے دی گئی دھمکیوں کے بعد یہ حفاظتی انتظام کیے گئے ہیں، سوشل میڈیا پر سندھ کے ڈاکوں کے مختلف گروہوں نے انڈین حکومت کو دھمکی دی تھی کہ سیما کو اس کے ملک واپس بھیجا جائییاد رہے کہ رواں ماہ کے اوائل میں ایک پاکستانی خاتون سیما حیدر پب جی گیم پر ایک بھارتی لڑکے سے دوستی کے بعد 4بچوں سمیت بھارت پہنچ گئی تھی۔

وفاقی تحقیقاتی ادارے ایف آئی اے کے عملے نے ایک کارروائی کے دوران جنسی ہراسگی اور بلیک میلنگ میں ملوث ملزم کو بلوچستان کے شہر لورالائی سے گرفتار کر لیا۔

ملزم احسان اللّٰہ نے شکایت کنندہ کی قابلِ اعتراض تصاویر موبائل فون کے ذریعے شیئر کی تھیں۔

ایف آئی اے حکام کے مطابق ملزم نے قابلِ اعتراض مواد کی آڑ میں شکایت کنندہ کو بلیک میل کر کے اس سے پیسے بھی وصول کیے۔

ملزم گزشتہ کئی ماہ سے شکایت کنندہ کو بلیک میل کر رہا تھا، جس کے قبضے سے موبائل، سمز اور لیپ ٹاپ برآمد کر لیا گیا ہے۔

ملزم کے موبائل کو قبضے میں لے کر فرانزک کے لیے بھجوا دیا گیا ہے۔

ملزم کے خلاف پیکا ایکٹ کے تحت مقدمہ درج کر لیا گیا ہے جبکہ اس سے تفتیش بھی کی جا رہی ہے۔

اسلام آباد :وفاقی وزیرخزانہ اسحاق ڈار نے کہا ہے کہ آئی ایم ایف سے معاہدہ بڑی کامیابی ہے،معیشت اور روپے کی قدر میں بہتری آئے گی،پاکستان کو دیوالیہ بنانے کے خواہشمندوں کو ناکامی اور مایوسی ہوئی،آئی ایم ایف کی مزیدشرائط کی تکمیل میں کوئی مسئلہ درپیش نہیں ہوگا،جمعہ کے روز صحافیوں سے غیررسمی گفتگو کرتے ہوئے اسحا ق ڈار نے کہا کہ آئی ایم ایف کے ساتھ حقیقت پسندی سے معاملات طے کیے ہیں،آئی ایم ایف پروگرام مکمل کریں گے،پہلے بھی آئی ایم ایف کے ساتھ پروگرام کو کامیابی کے ساتھ مکمل کیا تھا،معاہدوں کی پاسداری ریاست کی ذمہ دارء ہوتی ہے،انہوں نے کہا کہ پی ٹی آئی حکومت نے آئی ایم ایف معاہدہ سے انحراف کرکے ملک اور معیشت کو نقصان پہنچایا ہے،پی ٹی آئی حکومت آئی ایم ایف معاہدہ سے انحراف نہ کرتی تو موجودہ صورتحال کا سامنا نہ کرنا پڑتا،آنے والی حکومت کو آئی ایم ایف سے طے شدہ معاملات کی پاسداری کرنا ہوگی،اللہ کرے آئی ایم ایف کے ساتھ یہ تیئیسواں پروگرام آخری پروگرام ہو،اللہ کرے آئی ایم ایف کے ساتھ 24ویں پروگرام کی ضرورت کبھی نہ پڑے،ایک سوال کے جواب میں وزیرخزانہ اسحاق ڈار نے اسمبلیوں کی مدت میں توسیع کے امکان کو مسترد کردیا اور کہا کہ وزیراعظم نے واضح کردیا ہے کہ مدت کی تکمیل پر حکومت چھوڑ دیں گے،نگران وزیراعظم کے حوالے سے فیصلہ اتحادیوں کی مشاورت سے ہوگا،آخری دو ہفتوں میں اس حوالے سے مشاورتی عمل اور پراسس مکمل کرلیں گے۔

فرانس نے یوکرین میں قتل ہونے والے صحافی ارمان سولڈن کو ملک کا اعلیٰ ترین ایوارڈ دے دیا۔

غیرملکی میڈیا کے مطابق صحافی ارمان سولڈن روس یوکرین جنگ شروع ہونے کے ایک سال بعد 9 مئی کو یوکرین میں راکٹ حملے میں ہلاک ہوگئے تھے۔

رپورٹس کے مطابق 32 سالہ ارمان سولڈن یوکرین میں فرانسیسی نیوز ایجنسی کے لیے بطور ویڈیو کور آڈی نیٹر کام کر رہے تھے۔

غیرملکی میڈیا کے مطابق ارمان سولڈن فرانسیسی نیوز ایجنسی کے رپورٹرز کی ٹیم کا حصہ تھے جو یوکرینی فوجیوں کے ساتھ ایک جنگ زدہ شہر میں موجود تھی۔

دنیا بھر میں صحافیوں کے حقوق کے لیے سرگرم تنظیم کمیٹی ٹو پروٹیکٹ جرنلسٹس کے اعداد و شمار کے مطابق 24 فروری 2022 کو روس کے حملے کے بعد سے یوکرین میں کم از کم 17 صحافی اور میڈیا کارکن ہلاک ہوچکے ہیں۔

اسلام آباد:ضلعی عدالت کے ایڈیشنل سیشن جج ہمایوں دلاورنے الیکشن کمیشن کے وکیل کی استدعا پر پی ٹی آئی چیئرمین عمران خان کے خلاف توشہ خانہ فوجداری کیس کی سماعت 17 جولائی تک ملتوی کردی۔ تفصیلات کے مطابق اسلام آباد کے ایڈیشنل سیشن جج ہمایوں دلاور نے چیئرمین پی ٹی آئی کے خلاف توشہ خانہ فوجداری کیس کیس کی سماعت کی۔دوران سماعت الیکشن کمیشن کے وکیل سعد حسن اور چیئرمین پی ٹی آئی کے وکیل بیرسٹر گوہر عدالت کے روبرو پیش ہوئے۔عدالت نے الیکشن کمیشن کے وکیل سے مکالمہ کیا کہ جی آج آپ نے دلائل دینے ہیں جس پر سعد حسن نے کہا کہ دلائل امجد پرویز صاحب ہی دیں گے تاہم آج وہ گھریلو مصروفیات کی وجہ سے پیش نہیں ہو سکیں گے۔وکیل الیکشن کمیشن نے کیس کی سماعت کل تک ملتوی کرنے کی استدعا کی، اس پر عدالت کا کہنا تھا کہ کل ممکن نہیں ہے کل کچہری کی شفٹنگ ہے۔اسی لئے کل یہاں کوئی کیس نہیں ہوسکے گا یا ایسا ممکن ہے کہ کل نئی کچہری میں سماعت کر لیتے ہیں۔سعد حسن نے عدالت سے مخاطب ہوکر کہا کہ کچہری کی شفٹنگ ہو رہی ہے تو ہم بھی چاہتے ہیں کہ سوموار تک ملتوی کر دی جائے۔عدالت نے پی ٹی آئی وکیل بیرسٹر گوہر سے مکالمہ کرتے ہوئے کہا کہ بیرسٹر صاحب آج کل بہت مصروف ہیں۔امجد پرویز صاحب آج پیش نہیں ہو سکتے وہ بھی سماعت سوموار تک ملتوی کرنے کی استدعا کر رہے ہیں۔لہٰذا سوموار کو نئی کچہری میں صبح 11 بجے سماعت کریں گے۔عدالت نے الیکشن کمیشن کی سماعت ملتوی کرنے کی استدعا منظور کرتے ہوئے سماعت سوموار تک ملتوی کردی۔سپریم کورٹ کے بعد گڈ ٹو سی یو کے الفاظ کا کچہری میں بھی استعمال ہوگیا۔بیرسٹر گوہر نے جج ہمایوں دلاور سے کہا کہ نئی کچہری میں نئے ماحول کے ساتھ سماعت ہو گی، گڈ ٹو سی یو ان نیو کچہری۔ عدالت نے سماعت 17 جولائی تک ملتوی کردی۔