Category جرم وانصاف

پنجاب فوڈ اتھارٹی کے سیکورٹی گارڈ پر دن دھاڑے فائرنگ، گولی لگنے سے شدید زخمی

(میڈیا 92نیوز آن لائن)

سیکورٹی گارڈ پر فائرنگ وحدت روڈ پر پنجاب فوڈ اتھارٹی دفتر کے قریب کی گئی. دو موٹر سائیکل سواروں نے ڈیوٹی کے لیے دفتر جاتے ہوئے طاہر نامی سیکورٹی گارڈ پر گولی چلائی.

ترجمان فوڈ اتھارٹی کا کہنا ہے کہ طاہر سیکورٹی گارڈ کو زخمی حالت میں شیخ زید ہسپتال پہنچا دیا گیا۔. ابتدائی تحقیقات مکمل ہونے کے بعد فائرنگ کی وجوہات کا تعین کیا جا سکے گا۔

(میڈیا 92 نیوز آن لائن)
چوبرجی میں ہونے والے رکشہ دھماکہ کی تحقیقات میں اہم انکشافات سامنے آگئے۔

انٹیلی جنس ذرائع کےمطابق، قانون نافذ کرنے والے اداروں کو پہلے سے تخریب کاری کی اطلاع تھی، ادارے دھماکےمیں ملوث ممکنہ دہشتگرد کا خاکہ بھی پہلے ہی جاری کرچکے ہیں۔
29 نومبر بروز جمعہ چووبرجی کے قریب رکشے میں دھماکہ ہوا جس میں خاتون سمیت دس افراد زخمی ہوئے تھے۔ پولیس اور بم ڈسپوزل اسکواڈ نے دھماکے میں بارودی مواد کے استعمال کی تصدیق کر دی ہے۔
ذرائع کے مطابق، شیراکوٹ سے سوارشخص سمن آباد اترا تو مشکوک بیگ چھوڑ گیا، دھماکے میں ٹائم ڈیوائس استعمال ہونے کا بھی امکان ہے۔
دھماکے میں زخمی ہونے والوں کو سروسز، جناح، میو اور گنگا رام ہسپتال منتقل کیا گیا۔ زخمیوں میں رکشہ ڈرائیور رمضان، عالم، سلمان، جاوید، اسد، فخر عباس، قاسم رضا، علیم، محمد عظیم اور صدف شامل ہیں۔

لاہور(رپورٹ:سفیان ورک + ایمرا نیوز آن لائن )سرائے مغل کے نواحی گاﺅں میگہ سابق ایم این رانا محمد حیات خاں صاحب اور سابق ضلع چیئرمین رانا سکندر حیات نے حلقہ دورہ کیا .اس موقع پرکے میگہ میں یونس بیٹو اور عمران بیٹو، عثمان بیٹو کے درمیان خاندانی رنجش دور کرواکے دونوں پارٹیوں کے درمیان صلح کروائی۔

اس موقع پر دونوں پارٹیوں نے رانا حیات خاں صاحب کے کردار کا شکریہ ادا کرتے ہوئے باہم امن اور محبت کے ساتھ رہنے کا وعدہ کیا۔ اہل خانہ نے خوشی کے اس موقع پر پھول برسائے اور دعوت کااہتمام کیا۔

اس موقع پر علاقے کے معززین میں حاجی محمد علی کمبوہ . حاجی منشاءمینس احمد کمبوہ ایڈووکیٹ صدی احمد چیئرمین اور منا خان صاحب نے خصوصی شرکت کی۔

لاہور(ایمرا نیوزآن لائن) انسداد منشیات کی عدالت نے رانا ثنااللہ کے جوڈیشل ریمانڈ میں 14 روز کی توسیع کردی۔

لاہور کی انسداد منشیات کی عدالت میں مسلم لیگ (ن) کے رہنما رانا ثنااللہ کے خلاف منشیات برآمدگی کیس کی سماعت ہوئی جس سلسلے میں اینٹی نارکوٹکس فورس نے انہیں عدالت کے روبرو پیش کیا۔

رانا ثناء اللہ نے منشیات کا کاروبار کرنے کا اعتراف کرلیا، اے این ایف کا دعویٰ انسداد منشیات کی عدالت کے اسپیشل سینٹرل جج خالد بشیر نے بطور ڈیوٹی جج کیس کی سماعت کی جس دوران رانا ثنا کے وکیل ایڈووکیٹ فرہاد علی شاہ اور اعظم نذیر تارڑ نے دلائل دیے۔ْ

اینٹی نارکوٹکس فورس کی جانب سے موبائل ڈیٹا عدالت میں پیش کیا گیا تاہم مختصر سماعت کے بعد عدالت نے لیگی رہنما کے جوڈیشل ریمانڈ میں 14 روز کی توسیع کردی اور اے این ایف کو ملزم کو 16 نومبر کو دوبارہ عدالت میں پیش کرنے کا حکم دیا ہے۔

احاطہ عدالت میں صحافیوں سے غیر رسمی گفتگو میں رانا ثنااللہ نے آزادی مارچ کو کامیاب قراردیا جب کہ سانحہ تیز گام پر انہوں نے وزیراعظم عمران خان اور وزیر ریلوے شیخ رشید سے مستعفی ہونے کا بھی مطالبہ کیا۔

واضح رہےکہ انسداد منشیات فورس (اے این ایف) نے رانا ثناءاللہ کو 2 جولائی کو فیصل آباد سے لاہور جاتے ہوئے گرفتار کیا تھا اور اے این ایف نے دعویٰ کیا تھا کہ رانا ثناء کی گاڑی سے بھاری مقدار میں منشیات برآمد کی گئی۔

گلوکارہ (ایمرا نیوزآن لائن) میشا شفیع کی وکیل نگہت داد نے کہا ہے کہ وہ گلوکار و اداکار علی ظفر کے خلاف کیس میں نئے گواہ پیش کریں گی۔

نگہت داد نے جیو نیوز کے مارننگ شو ’جیو پاکستان‘ میں ٹیلی فونک گفتگو کرتے ہوئے ہتک عزت کے کیس سے متعلق سماعت کی تفصیلات بتائیں۔

گلوکارہ کی وکیل نے بتایا کہ میشا کی والدہ و اداکارہ صبا حمید سےعلی ظفر کے وکیل نے کوئی سوال نہیں پوچھے تھے بلکہ کمرہ عدالت میں موجود میشا شفیع کے وکیل نے ہی سوال کیے تھے۔ نگہت داد نے کہا کہ صبا حمید نے صرف اپنا بیان ریکارڈ کرایا تھا، انہیں اس لیے اس کیس میں گواہ بنایا ہے کیونکہ میشا نے اپنے ساتھ ہونے والے واقعے متعلق انہیں بتایا تھا اور وہ تفصیلات سے آگاہ تھیں۔

انہوں نے بتایا کہ کراس ایگزامینیشن صبا حمید کے بیان کی روشنی میں کیا جائے گا۔ علی ظفر پر عائد جنسی ہراسانی کے الزام سے متعلق وکیل نگہت داد کا مزید کہنا تھا کہ ضروری نہیں کہ واقعے کے وقت گواہ بھی موجود ہو، بعض دفعہ متاثرہ شخص اپنے بھروسے کے شخص کو معاملہ بتاتا ہے۔

انہوں نے بتایا کہ ہتک عزت کیس میشا شفیع کی جانب سے بھی علی ظفر کے خلاف دائر ہے جس میں گلوکار نے جوابی دعویٰ ابھی تک دائر نہیں کیا۔ نگہت داد کا کہنا تھا کہ ہم کیس میں کچھ نئے گواہ بھی شامل کریں گے۔

یاد رہے کہ گزشتہ روز لاہور کی سیشن کورٹ میں گلوکارہ میشا شفیع کے خلاف 100 کروڑ روپے کے ہتک عزت کیس کی سماعت ہوئی تھی جس میں ان کی والدہ صبا حمید کا بیان ریکارڈ کیا گیا تھا۔ صبا حمید کا کہنا تھا کہ عام طور پر خواتین ایسے واقعات کا نہیں بتاتیں، البتہ میں نے اس کے مثبت اور منفی نتائج کے بارے میں بتایا تھا۔

گزشتہ سال میشا شفیع نے گلوکار علی ظفر پر جنسی ہراساں کرنے کا الزام عائد کیا تھا۔ میشا شفیع کا کہنا تھا کہ جنسی ہراسانی پر بات کرنا آسان نہیں لیکن اس پر خاموش رہنا بھی بہت مشکل ہے، میں خاموش رہنے کے کلچر کو توڑوں گی جو معاشرے میں سرائیت کرچکا ہے۔

گلوکار و اداکار علی ظفر نے میشا شفیع کی جانب سے ہراساں کرنے کے الزامات کی تردید کر تے ہوئےکہا تھا کہ میں الزام کا جواب الزام سے نہیں دوں گا بلکہ میشا شفیع کے خلاف عدالت جاؤں گا اور مجھے پورا یقین ہے کہ سچ ہمیشہ غالب ہوتا ہے۔ علی ظفر کی جانب سے ہراسانی کا الزام لگانے پر میشا شفیع پر 100 کروڑ روپے ہرجانے کا مقدمہ دائر کیا گیا ہے۔

جنوبی کوریا ( میڈیا 92 نیوز آن لائن) کے دارالحکومت سیؤل میں پاکستان بزنس ایسوسی ایشن کوریا کے زیرِاہتمام یومِ سیاہ منایا گیا جس میں کثیر تعداد میں پاکستان بزنس ایسوسی ایشن کے ممبران اور مختلف مکاتبِ فکر سے تعلق رکھنے والے پاکستانیوں سمیت انسانی حقوق کی تنظیموں کے کورین نژاد لوگوں نے بھی بھر پور شرکت کر کے تاریخ رقم کر دی۔

کوریا، پاکستان بزنس ایسوسی ایشن نے یومِ سیاہ منایا: ذرائع کے مطابق سیؤل اسٹیشن اسکوائر کی فضا فلک شگاف نعروں سے گونج اٹھی، مضاہرین سے خطاب میں پاکستان بزنس ایسوسی ایشن کوریا کے نائب صدر مہر سرور نے کہا کہ کشمیر اس دور جدید کا وہ بدقسمت حصہ ہے جس میں اسی لاکھ لوگوں کو جس میں عورتیں اور بچے بھی شامل ہیں جبر میں بھوکا اور پیاسا رکھ کر موت کی طرف دھکیلا جا رہا ہے۔

انسانی حقوق کی تنظیم کے سربراہ جِنگ نے خطاب میں کہا کہ کشمیر میں جو ہو رہا ہے وہ انسانیت کی تذلیل کی جا رہی ہے، انہوں نے اقوام عالم کو مخاطب کرتے ہوئے کہا کہ انڈیا کے اس ظالمانہ اقدام سے آج ہمارے سر شرم سے جھکے ہوئے ہیں۔

پاکستان بزنس ایسوسی ایشن کوریا کے جنرل سیکرٹری صابر خان نے خطاب میں کہا کہ آج اکیسویں صدی کے دور میں جہاں خود ساختہ انسانی حقوق کے علمبرداروں کا راج ہے، انسانی حقوق کے علمبرداروں کے معصومیت سے بھرے انسانیت سے سرشار سوچوں کی عظمتوں کو سلام۔

صابر خان نےکہا کہ کشمیریوں کو جینے دو، اسی لاکھ کشمیریوں کو بناء کسی جرم کے گھروں میں قید کر کے دنیا کی سب سے بڑی جیل بنا دی گئی ہے، اور یہی نہیں بلکہ ستم ظریفی دیکھیں کہ سو دن ہونے کو ہیں مسلسل کرفیو بھی لگا رکھا ہے۔

اس دیدہ دلیر ظلمت کے بادشاہ دور جدید کا ہٹلر مودی سے کوئی یہ بھی نہیں پوچھ رہا کہ ان سو دن کے کرفیو زدہ علاقوں کے انسان بنا کھائے پیئے زندہ بھی ہیں کہ نہیں؟

فرانس (ایمرا نیوزآن لائن) کے دارالحکومت پیرس کے اہم مقام ایفل ٹاور کے سامنے انٹرنیشنل پیس فورم کا انعقاد ہوا۔

فرانس کے صدر زاہد اقبال ہاشمی کی قیادت میں مقبوضہ کشمیر میں بھارتی افواج کے مظالم اور قبضے کے خلاف یوم سیاہ منایا گیا۔

پاکستانی کشمیری کمیونٹی کے مشتاق جرال ، مشتاق پاشا ، صفدر ہاشمی ، چوہدری افضال خونن ، محمد رزاق ڈھل بنگش، عابد ملک ،چوہدری طاہر رزاق ،راجہ گرامت ، ابوبکر گوندل ، منور جٹ اور عمران رشید نے شدید بارش کے باوجود گھنٹوں بھارت کے مظالم بربریت کے متعلق فرانسیسی اور سیاحوں کو آگاہی اور کشمیر کی آواز ان تک پہنچائی ۔

مظاہرین بھارتی مظالم کی تصاویر کے علاوہ کشمیری پرچم اٹھائے ہوئے تھے، ان کے شدید نعروں سے ایفل ٹاور کی فضا مودی دہشت گرد، نکل جا کشمیر سے نکل جا کے نعروں سے گونجتی رہی ۔

جنگ سے گفتگو کرتے ہوئے کشمیری راہنما زاہد ہاشمی اور دیگر کا کہنا تھا کہ بھارت کا اصلی چہرہ دکھانے اور کشمیریوں کے حق خود اراداریت تک ہماری جدوجہد جاری رہے گی اور یہ مسئلہ جس نہج پر پہنچ چکا بھارت کو کشمیر سے نکلنا پڑے گا۔

مظفرگڑھ (میڈیا 92 نیوزآن لا ئن ) نامعلوم شخص نے مدرسے کے 13 سالہ طالبعلم پر مبینہ طور پر پیٹرول چھڑک کر آگ لگا دی۔

مظفر گڑھ کی تحصیل جتوئی میں مدرسے کے 13 سالہ طالبعلم محمد یعقوب پر مبینہ طور پر پیٹرول چھڑک کر آگ لگادی گئی جسے نشتر اسپتال ملتان کے برن یونٹ میں منتقل کردیا گیا۔

پولیس کی مطابق آگ لگنے سے یعقوب کے جسم کا تقریباً 30 فیصد حصہ جھلس گیا ہے۔ ورثاء کے پولیس کو دیے گئے بیان کے مطابق طالب علم یعقوب مدرسے سے دولت واہی میں اپنے گھر واپس جارہا تھا کہ راستے میں کھیت میں چھپے نامعلوم شخص نے اس پر پیٹرول چھڑکا اور آگ لگادی، پولیس نے واقعے کا مقدمہ تھانہ جتوئی میں درج کرلیا ہے۔

( میڈیا 92 نیوز آن لا ئن) سانحہ ساہیوال کیس میں تمام ملزمان کی بریت پر شدید مایوسی کا اظہار کیا جا رہا ہے اور سابق پاکستانی کرکٹر شاہد آفریدی نے بھی اس فیصلے پر اپنا ردعمل ظاہر کیا۔

شاہد آفریدی نے مائیکرو بلاگنگ ویب سائٹ ٹوئٹر پر ساہیوال کے ہیش ٹیگ کے ساتھ حضور پاک صلی اللہ علیہ والہ وسلم کی ایک حدیث لکھی: ’تم سے پہلے لوگ تباہ ہوگئے تھے کیوں کہ وہ غریبوں کو قانونی سزا دیتے تھے اور امیروں کو معاف کرتے تھے۔ اللہ کی قسم اس کے ہاتھ میں میری جان ہے! اگر فاطمہ (رسول اکرم صلی اللہ علیہ والہ وسلم کی صاحبزادی) نے ایسا کیا (چوری کی)، میں اس کا ہاتھ کاٹ دوں گا۔‘

نبی (ﷺ) نے کہا ،

“تم سے پہلے لوگ تباہ ہوگئے تھے کیوں کہ وہ غریبوں کو قانونی سزا دیتے تھے اور امیروں کو معاف کرتے تھے۔ اللہ کی قسم اس کے ہاتھ میں میری جان ہے! اگر فاطمہ (رسول اللہ صلی اللہ علیہ وسلم کی بیٹی) نے ایسا کیا (چوری کی ) ، میں اس کا ہاتھ کاٹ دوں گا ”

شاہد آفریدی نے حدیث نبوی صلی اللہ علیہ والہ وسلم لکھنے کے بعد ہیش ٹیگ میں ساہیوال لکھا جس سے یہ بات ظاہر ہوتی ہے کہ انہوں نے سانحہ ساہیوال کے کیس کے فیصلے پر یہ ٹوئٹ کیا ہے۔

سانحہ ساہیوال کیس کا فیصلہ: واضح رہے کہ گزشتہ روز لاہور میں انسداد دہشت گردی کی خصوصی عدالت نے گزشتہ روز سانحہ ساہیوال کیس کا فیصلہ سناتے ہوئے تمام ملزمان کو شک کا فائدہ دے کر بری کردیا تھا۔ عدالت نے مقدمے میں مقتول ذیشان کے بھائی اور خلیل کے بچوں سمیت 49 گواہان کے بیانات قلمبند کیے تاہم تمام گواہان نے عدالت کے روبرو ملزمان کو شناخت کرنے سے انکار کردیا۔ مقدمے میں وکلا اور سرکاری گواہوں کے بیانات پر 9 ماہ بعد جرح مکمل ہونے کے بعد عدالت نے فیصلہ سناتےہوئے تمام 6 ملزمان کو شک کا فائدہ دیتے ہوئے بری کردیا۔

سانحہ ساہیوال کا پس منظر: یاد رہے کہ 19 جنوری کی سہ پہر سی ٹی ڈی نے ساہیوال کے قریب جی ٹی روڈ پر ایک گاڑی پر اندھا دھند فائرنگ کی جس کے نتیجے میں خلیل، اس کی اہلیہ، بیٹی اور محلے دار ذیشان گولیاں لگنے سے جاں بحق ہوئے جب کہ کارروائی میں تین بچے بھی زخمی ہوئے۔

واقعے کے بعد سی ٹی ڈی کی جانب سے متضاد بیانات دیے گئے، واقعے کو پہلے بچوں کی بازیابی سے تعبیر کیا بعدازاں ویڈیو منظر عام پر آنے کے بعد مارے جانے والوں میں سے ایک کو دہشت گرد قرار دیا گیا۔ تاہم میڈیا پر معاملہ آنے کے بعد وزیراعظم نے واقعے کا نوٹس لیا اور سی ٹی ڈی اہلکاروں کو حراست میں لے کر تحقیقات کے لیے جے آئی ٹی تشکیل دی گئی۔

(میڈیا 92 نیوز آن لا ئن ) سرگودھا میں طالبات سے زیادتی کے بعد ان کی ویڈیو بنا کر بلیک میل کرنے کے تین مجرمان کو 104 سال قید کی سزا اور 10 لاکھ روپے جرمانہ عائد کر دیا گیا۔ سرگودھا کی انسداد دہشت گردی کی عدالت میں طالبات سے زیادتی کے بعد ان کی فحش ویڈیو بنانے اور بلیک میل کرنے کے مقدمے کی سماعت ہوئی۔

پولیس کا کہنا ہے کہ عدالت نے جرم ثابت ہونے پر مجرم عدنان جاوید کو 44 سال قید اور 4 لاکھ روپے جرمانہ جب کہ مجرم اظہر بلال کو 47 سال قید اور ساڑھے 4 لاکھ روپے جرمانہ ادا کرنے کا حکم دیا ہے۔اس کے علاوہ مجرم عاطف رضا کو 13 سال قید اور ڈیڑھ لاکھ روپے جرمانہ ادا کرنے کا حکم دیا گیا ہے۔ تینوں مجرم سرگودھا یونیورسٹی کے سابق طالبعلم تھے جنہیں جیل منتقل کر دیا گیا ہے۔

پولیس کا بتانا ہے کہ مجرم عدنان جاوید، اظہر بلال اور عاطف رضا کے خلاف 17 نومبر 2017 کو مقدمہ درج کیا گیا تھا جس میں 5 طالبات نے اپنے ساتھ زیادتی اور ویڈیو بنانے کی شکایت درج کروائی تھی۔ پولیس کا مزید کہنا تھا کہ مجرمان طالبات سے دوستی کرتے، ان سے زیادتی کرتے اور فحش ویڈیو بناکر بلیک میل کرکے ان سے لاکھوں روپے ہڑپ کر چکے تھے۔