Category سیاست

اسلام آباد (میڈیا 92 نیوز آن لائن ) الیکشن کمیشن نے ممبران قومی اسمبلی کے اثاثوں کی تفصیلات جاری کردیں۔

وزیراعظم کے اثاثوں کی تفصیلات

الیکشن کمیشن کی جانب سے جاری تفصیلات کے مطابق وزیراعظم عمران خان نے 10 کروڑ 82 لاکھ روپے مالیت کی پراپرٹی اور رقم ظاہر کی، وزیراعظم نے ورثے اور تحفے میں ملی پراپرٹی کی مالیت ظاہرنہیں کی۔

دستاویزات کے مطابق وزیراعظم کی زمان پارک میں ورثہ میں ملی رہائشگاہ کی تعمیر پر4 کروڑ53 لاکھ روپے لاگت آرہی ہے، وزیراعظم نے بنی گالہ میں 300 کنال کا گھر تحفہ کے طور پر ظاہر کیا، ٹیکس سال 2015/16 میں رہائشگاہ کی اضافی تعمیر پر ایک کروڑ 14 لاکھ روپے اخراجات آئے۔

دستاویزات میں بتایا گیاہےکہ وزیراعظم عمران خان کے پاس بنی گالہ میں 50 لاکھ روپے کی 6 کنال 16 مرلہ اراضی ہے، وزیراعظم کو میانوالی میں 10 مرلہ پر بنا گھر ورثہ میں ملا، وزیراعظم کے پاس شیخو پورہ میں ورثہ میں حاصل کی گئی 80 کنال اراضی ہے، عمران خان کو بھکر میں 260 کنال، 8 ایکڑ کی 4 مختلف اراضی ورثہ میں ملی، وزیراعظم کے پاس میاں چنوں میں 50 ہزار روپے مالیت کی زرعی اراضی ہے۔

دستاویزات کے مطابق وزیراعظم عمران خان نے 4 غیر ملکی کرنسی کے بینک اکاؤنٹس میں سرمایہ کاری کر رکھی ہے، وزیراعظم کے پاؤنڈ اکاؤنٹ میں 2 ہزار67 پاونڈ ہیں اور ڈالر اکاؤنٹ میں 3 لاکھ 29 ہزار60 ڈالرز، دوسرے اکاونٹ میں 1 ہزار 470 ڈالرز ہیں جب کہ وزیراعظم عمران خان کے یورو اکاونٹ میں کوئی رقم نہیں۔

دستاویزات میں مزید بتایا گیا ہےکہ عمران خان نے گرینڈ حیات ٹاور میں فلیٹ کیلئے 1 کروڑ19 لاکھ روپے ایڈاوانس جمع کرا رکھے ہیں، وزیراعظم عمران خان کے پاس ذاتی گاڑی نہیں ہے، ان کے پاس 2 کروڑ 40 لاکھ روپے کیش موجود ہے، وزیراعظم کے 2 ملکی بینک اکاؤنٹس میں96 لاکھ روپے ہیں، وزیراعظم 2 لاکھ روپے مالیت کی 4 بکریوں کے مالک ہیں۔

وزیراعظم کی اہلیہ کے اثاثوں کی تفصیلات

اس کے علاوہ وزیراعظم کی اہلیہ بشریٰ بی بی کے پاس پاکپتن، اوکاڑہ اور بنی گالہ میں پراپرٹی ہے، بشریٰ بی بی کے پاس پاکپتن میں 52 کنال اور 379 کنال اراضی ہے، ان کے پاس اوکاڑہ میں 267 کنال اراضی ہے اور بنی گالہ میں 3 کنال کی رہائشگاہ ہے۔

شہبازشریف اور ان کی اہلیہ کے اثاثوں کی تفصیلات

قومی اسمبلی میں قائد حزب اختلاف شہبازشریف کے اثاثوں کی مالیت 18 کروڑ 96 لاکھ روپے ہے۔

دستاویزات کے مطابق شہبازشریف کے پاکستان سے باہر14 کروڑ 78 لاکھ روپے مالیت کے اثاثے ہیں، ان کی لندن میں 2 پراپرٹی اور ایک بینک اکاؤنٹ ہیں، شہبازشریف کی پاکستان میں جائیداد کی مالیت 1 کروڑ 47 لاکھ روپے ہے، ان کی حدیبیہ پیپرمل، حدیبیہ انجینیرنگ اور حمزہ ملز میں 2 لاکھ 73 ہزارر وپےکی سرمایہ کاری ہے۔

شہبازشریف کی اہلیہ نصرت شہباز کے اثاثوں کی مالیت 23 کروڑ روپے سے زائد ہے، شہبازشریف کی اہلیہ تہمینہ درانی کے اثاثوں کی مالیت 57 لاکھ روپے سے زائد ہے۔

آصف زرداری کے اثاثوں کی تفصیلات

پاکستان پیپلزپارٹی کے صدر آصف زرداری کے اثاثوں کی مالیت 67 کروڑ روپے سے زائد ہے۔

دستاویزات کے مطابق آصف زرداری کی پاکستان سے باہر کوئی جائیداد نہیں، ان کے پاس 1 کروڑ 62 لاکھ روپے مالیت سے زائد کا اسلحہ ہے، ان کے پاس 99 لاکھ روپے مالیت کے جانور اور گھوڑے ہیں جب کہ سابق صدر 6 گاڑیوں کے مالک ہیں۔

اس کے علاوہ آصف زرداری کے پاس دبئی کا اقامہ بھی ہے۔

اسلام آباد: وزیراعظم عمران خان نے کہا ہےکہ منی لانڈرنگ اور کرپشن میں ملوث ارکان اسمبلی کے پروڈکشن آرڈر جاری نہیں ہونے چاہیے۔

وزیراعظم عمران خان کی زیرصدارت وفاقی کابینہ کا اجلاس ہوا جس میں وزیراعظم نے اراکین پارلیمنٹ کے پروڈکشن آرڈر سے متعلق قوانین میں ترمیم کی ہدایت کردی۔

ذرائع کے مطابق کابینہ اجلاس میں وزیراعظم نے کہا کہ منی لانڈرنگ اور کرپشن میں ملوث ارکان کے پروڈکشن آرڈرجاری نہیں ہونے چاہیے، اس طرح کے قیدیوں کو جیل میں سیاسی قیدی کا درجہ نہیں ملنا چاہیے۔

وزیراعظم نے اراکین پارلیمنٹ کے پروڈکشن آرڈر کا معاملہ وزارت قانون کے سپرد کردیا۔

واضح رہے کہ پیپلزپارٹی کے صدر آصف علی زرداری کی جعلی اکاؤنٹس کیس میں گرفتاری کے بعد پیپلزپارٹی نے اسپیکر قومی اسمبلی سے ان کے پروڈکشن آرڈر جاری کرنے کا مطالبہ کیا تاہم حکومتی ارکان کی جانب سے پروڈکشن آرڈر کے اجرا پر تحفظات کا اظہار کیا گیا۔

وزیراعظم عمران خان نے بھی بجٹ سیشن میں اظہار خیال کے دوران کہا کہ منی لانڈرنگ اور کرپشن کے الزام میں گرفتار افراد کے پروڈکشن آرڈر جاری نہیں ہونی چاہئیں اور انہیں پارلیمنٹ میں آکر بات کرنے کا بھی موقع نہیں ملنا چاہیے۔

لاہور (افضل سیال سے ) انسداد منشیات فورس (اے این ایف) نے مسلم لیگ ن کے رہنما رانا ثناء اللہ کو حراست میں لے لیا۔

ترجمان اے این ایف ریاض سومرو نے کہا ہے کہ رانا ثناء اللہ کی گاڑی سے منشیات کی بھاری مقدار برآمد ہوئی ہے، ان کے خلاف نارکوٹکس ایکٹ کے تحت مقدمہ درج کیا جارہا ہے۔

مسلم لیگ ن پنجاب کے صدر اور رکن قومی اسمبلی رانا ثناء اللہ کو فیصل آباد سے لاہور جاتے ہوئے انسداد منشیات فورس نے موٹر وے پر سکھیکی کے مقم پر حراست میں لیا۔

ذرائع کے مطابق رانا ثناء اللہ کی گاڑی FH255 تین بجکر 19 منٹ پر لاہور ٹول پلازہ سے ایگزٹ ہوئی تاہم ان کا دوپہر ڈیڑھ بجے کے بعد سے خاندان کے کسی فرد سے رابطہ نہیں ہوا، ان کے ذاتی گارڈز اور ڈرائیور کے نمبر بھی بند مل رہے تھے۔

مسلم لیگ ن کے مطابق رانا ثناء اللہ لاہور میں پارٹی اجلاس میں شرکت کے لیے جا رہے تھے تاہم سکھیکی کے بعد ان سے رابطہ منقطع ہو گیا۔

انسداد منشیات فورس کے ترجمان ریاض سومرو نے رانا ثناء للہ کی گرفتاری کی تصدیق کرتے ہوئے کہا ہے کہ انہیں اے این ایف لاہور نے گرفتار کیا ہے، رانا ثناء اللہ کی گاڑی سے منشیات کی بھاری مقدار برآمد ہوئی ہے اور ان کے خلاف نارکوٹکس ایکٹ کے تحت مقدمہ بنا ہے۔

ترجمان اے این ایف کے مطابق رانا ثناء اللہ کی گرفتاری ٹھوس شواہد کی روشنی میں کی گئی ہے اور انہیں ریمانڈ کے لیے منگل کو انسداد منشیات کورٹ میں پیش کیا جائے گا، معلومات جلد منظر عام پر لائی جائیں گی۔

خیال رہے کہ قومی اسمبلی قواعد کے مطابق کسی بھی رکن کی گرفتاری کی صورت میں اسپیکر کو آگاہ کرنا ضروری ہوتا ہے تاہم اسپیکر اسد قیصر اس وقت سرکاری دورے پر ماسکو میں ہیں اور ڈپٹی اسپیکر قاسم سوری عمرہ کی ادائیگی کیلئے سعودی عرب میں ہیں۔ قومی اسمبلی سیکریٹریٹ حکام کے مطابق وہ رانا ثناء اللہ کی گرفتاری کی باضابطہ اطلاع کے منتظر ہیں۔

3 ماہ قبل ہونے والی گرفتاریوں کے شواہد کی روشنی میں رانا ثناء کو گرفتار کیا گیا: ذرائع

ذرائع کا بتانا ہے کہ تین ماہ قبل اے این ایف کے اسپیشل انویسٹی گیشن سیل نے 6 سے 7 گرفتاریاں کی تھیں جن سے تحقیقات کے دوران یہ بات سامنے آئی کہ یہ لوگ رانا ثناء اللہ کے ساتھ مل کر کام کرتے ہیں اور پھر ان شواہد اور ان کی کچھ کال ریکارڈنگ کی بنیاد پر بخاری نامی شخص کو حراست میں لیا گیا، ان پر الزام ہے کہ یہ لوگ کالعدم تنظیموں کے لیے فنڈ جمع کرتے تھے۔

ذرائع کا کہنا ہے کہ ان ہی شواہد کی بناء پر رانا ثناء اللہ کو گرفتار کیا گیا ہے۔

ذرائع کے مطابق اے این ایف لاہور ڈائریکٹوریٹ کے سربراہ جو ایک حاضر سروس بریگیڈیئر بھی ہیں، ان کی نگرانی میں اسپیشل انویسٹی گیشن سیل نے لاہور کے علاقے سمن آباد میں رانا ثناء اللہ کے ڈیرے پر چھاپہ بھی مارا تھا جہاں مبینہ طور پر لیگی رہنما کے خاندان کے کچھ لوگ موجود تھے تاہم چھاپے سے قبل وہ لوگ وہاں سے جا چکے تھے۔

رانا ثناء کی گرفتاری میں عمران خان کا ذاتی عناد کھل کر سامنے آ گیا: شہباز شریف
پاکستان مسلم لیگ (ن) کے صدر اور قائد حزب اختلاف شہباز شریف نے رانا ثناء اللہ کی گرفتاری کی شدید الفاظ میں مذمت کرتے ہوئے کہا کہ رانا ثناء کی گرفتاری لاقانونیت اور سیاسی انتقام کی بدترین مثال ہے۔

شہباز شریف نے الزام عائد کیا کہ وزیراعظم کے حکم پر اداروں کو سیاسی مخالفین کے خلاف استعمال کی گھناؤنی مثال قائم کی گئی، کبھی نیب، کبھی نیب ٹو کا سیاسی مخالفین کی گرفتاری اور دباؤ کے لیے استعمال افسوسناک ہے۔

انہوں نے مزید کہا کہ اے این ایف کا سیاسی مخالفین کی گرفتار ی اور دباؤ کے لیے استعمال افسوسناک ہے۔

صدر ن لیگ نے مطالبہ کیا کہ رانا ثناء اللہ کو فوری طور پر عدالت میں پیش کیا جائے اور بتایا جائے ان پر کیا الزام ہے۔

شہباز شریف نے کہا کہ رانا ثناءاللہ کی گرفتاری میں عمران خان کا ذاتی عناد کھل کر سامنے آگیا ہے۔

دوسری جانب مسلم لیگ ن کے رہنما اور سابق گورنر پنجاب محمد زبیر کا کہنا ہے کہ رانا ثناء اللہ کا موبائل فون بند جا رہا ہے اور ان سے کسی قسم کا رابطہ نہیں ہو پا رہا۔

رانا ثناء اللہ کی گرفتاری میں براہ راست وزیراعظم ملوث ہیں: مریم نواز

What has ANS got to do with Rana Sanaullah? It could not get more absurd. He has been arrested for his bold & courageous stance. Jaali-e-Azam being the small & petty minded man that he is, is directly behind his arrest. Make no mistake. https://t.co/7ziuR51u6h

— Maryam Nawaz Sharif (@MaryamNSharif) July 1, 2019

مسلم لیگ ن کی نائب صدر مریم نواز نے رانا ثناء اللہ کی گرفتاری کی مذمت کرتے ہوئے کہا ہے کہ ان کی گرفتاری میں براہ راست وزیراعظم ملوث ہیں۔

مریم نواز نے کہا کہ اس سے زیادہ بے ہودہ صورتحال نہیں ہو سکتی، اے این ایف کا رانا ثناء اللہ سے کیا لینا دینا؟

رہنما ن لیگ نے کہا کہ رانا ثناءاللہ کو جرات مندانہ مؤقف کی وجہ سے گرفتار کیا گیا، ‘جعلی اعظم’ چھوٹا ذہن رکھنے والی شخصیت ہے۔ مریم نواز نے رانا ثنااللہ کی گرفتاری پر اپنے ٹوئیٹر اکاوئنٹ کی پرفائل تصویر تبدیل کرتے ہوئے رانا ثنااللہ کی تصویر لگا لی

رانا ثنااللہ کے داماد کا موقف

رانا ثناء اللہ کے داماد شہریار کا بتانا ہے کہ مسلم لیگ ن پنجاب کے صدر دوپہر ڈیڑھ بجے فیصل آباد سے لاہور کے لیے روانہ ہوئے، 2 بجے رانا ثناء اللہ سے رابطہ کرنے کی کوشش کی لیکن رابطہ نہیں ہو سکا۔

شہریار کا مزید بتانا ہے کہ رانا ثناء اللہ کو موٹر وے سے حراست میں لیا گیا، ہمیں نہیں معلوم کہ انہیں کہاں لےکر گئے ہیں۔

رانا ثناء اللہ کی گرفتار سیاسی انتقام کی مایوس کن کوشش ہے: بلاول
چیئرمین پیپلز پارٹی بلاول بھٹو زرداری نے رانا ثناءاللہ کی گرفتاری پر ردعمل دیتے ہوئے کہا کہ اے این ایف کا رانا ثناءاللہ کو گرفتار کرنا سیاسی انتقام کی مایوس کن کوشش ہے۔

بلاول بھٹو نے کہا کہ رانا ثناء اللہ ماضی میں پاکستان پیپلز پارٹی کے سخت ترین ناقد رہے اور موجودہ حکومت کے سخت ترین ناقدین میں مؤثر ترین آواز ہیں۔

انہوں نے مزید کہا کہ سیاسی بنیادوں پر گرفتاریاں حکومت کی کمزوری اور مایوسی کو ظاہر کرتی ہیں۔

رانا ثناء تین چار ہفتے سے کہہ رہے تھے انہیں گرفتار کر لیا جائے گا: حامد میر
جیو نیوز کے اینکر پرسن اور سینئر صحافی حامد میر نے بتایا کہ رانا ثناء اللہ تین چار ہفتے سے مجھے اسلام آباد میں ملتے تھے تو بتاتے تھے کہ شاید یہ ہماری آخری ملاقات ہو کیونکہ مجھے گرفتار کر لیا جائے گا۔

حامد میر نے کہا کہ جب پوچھا جاتا کہ کیوں گرفتار کریں گے تو رانا ثناء اللہ کہتے کہ وہ ابھی مجھے گرفتار کرنے کی وجوہات ڈھونڈ رہے ہیں۔

خیال رہے کہ رانا ثناء اللہ مسلم لیگ ن پنجاب کے صدر اور رکن قومی اسمبلی ہیں۔ وہ عام انتخابات میں ن لیگ کے ٹکٹ پر این اے 106 فیصل آباد سے ایم این اے منتخب ہوئے۔

اسلام آباد (میڈیا 92 نیوز آن لائن ) وفاقی وزیر سائنس اینڈ ٹیکنالوجی فواد چوہدری نے کہا ہےکہ جب عمران خان کہیں گے سندھ میں تبدیلی آجائے گی۔

اسلام آباد میں میڈیا سے گفتگو کرتے ہوئے فواد چوہدری نے کہا کہ ہماری حکومت میں کرپشن کا ایک اسکینڈل بھی سامنے نہیں آیا، احتساب کے عمل میں تیزی آئی ہے، اوپرکی کرپشن ختم ہوگئی ہے، نچلی سطح پر کرپشن میں کمی آئی ہے، نچلی سطح پرکرپشن کاخاتمہ بھی ضروری ہے۔

انہوں نے کہا کہ نوازشریف اور زرداری شوگر مافیا کے لوگ ہیں، انہوں نے زراعت کو نقصان پہنچایا، دس سالوں میں لیا گیا قرضہ کہاں گیا؟ خوشی ہے زرداری صاحب کو ایک اور کیس میں گرفتار کیا گیا ہے۔

فواد چوہدری کا کہنا تھا کہ گورنر سندھ جادوگر آدمی ہے،جب وزیراعظم عمران خان کو کہیں گے سندھ میں تبدیلی آئے گی اور جب عمران خان کہیں گے سندھ میں تبدیلی آجائے گی، کراچی کی سب سے بڑی جماعت ایم کیوایم نہیں تحریک انصاف ہے۔

وزیر سائنس اینڈ ٹیکنالوجی نے مزید کہا کہ پچھلے 10سالوں میں جس نےکرپشن کی سب جیلوں میں جائیں گے، جب سیاسی انٹری کا وقت تھا چوہدری نثار کڑک مرغی کی طرح بیٹھے رہے، اب ان کا وقت نکل چکا، اب ان انڈوں سے بچے نکل آئے ہیں، سیاست میں ٹائمنگ اہم ہوتی ہے، چوہدری نثار، نوازشریف اور آصف زرداری کا کوئی مستقبل نہیں ہے، یہ ماضی کا حصہ بن چکے، جب شہبازشریف لندن گئے تو مریم نواز نے پارٹی پر قبضہ کرلیا، (ن) لیگ کو توڑنے میں سب سے اہم کردار مریم نواز نے ادا کیا۔

فواد چوہدری کا کہنا تھا کہ مسلم لیگ (ن) سے آنے والوں کو آشیانہ فراہم کریں گے، پی ٹی آئی صاف شفاف حکومت،کرپشن کے خاتمے اور گڈگورننس کا وعدہ پورا کرے گی۔

اسلام آباد (میڈیا 92 نیوز آن لائن ) گزشتہ روز حزب اختلاف سے تعلق رکھنے والے ارکان اسمبلی کی وزیراعظم عمران خان سے ملاقات کی تفصیلات سامنے آ گئی ہیں۔

قابل اعتماد ذرائع کا کہنا ہے کہ وزیراعظم سے ملاقات کرنے والے ارکان میں قومی اسمبلی کا کوئی رکن شامل نہیں تھا۔

29 جون کو بنی گالہ میں 12 ارکان پنجاب اسمبلی آئے تھے جن میں 11 کا تعلق نون لیگ سے اور ایک کا پاکستان پیپلزپارٹی سے تھا۔

ذرائع کے مطابق بنی گالہ جانے والوں میں حلقہ پی پی 133 کے ابو حفصہ اور پی پی 270 کے شعیب اویسی شامل تھے، ان کے علاوہ حلقہ پی پی 93 کے چوہدری اشرف اور پی پی 209 سے ایم پی اے فیصل نیازی نے بھی وزیراعظم سے ملاقات کی۔

مزید ارکان اسمبلی میں پی پی پی 268 سے ایم پی اے ملک غلام قاسم ہنجرا، پی پی 114 کے چوہدری محمد ارشد، پی پی 269 کے اظہر عباس، پی پی 139 کے میاں جلیل، نشاط ڈاہا اور پی پی 285 سے پیپلزپارٹی کے ایم پی اے غضنفر علی شامل تھے۔

ذرائع کا کہنا ہے کہ وزیراعظم نے حزب اختلاف سے تعلق رکھنے والے ممبران قومی اسمبلی سے رابطوں کی ذمہ داری بھی سونپ دی ہے اور اس ضمن میں 5 ارکان سے رابطے بھی جاری ہیں۔

راولپنڈی (میڈیا 92 نیوز آن لائن )سابق وفاقی وزیر داخلہ چودھری نثار علی خان کا کہنا ہے کہ اقتدار میری منزل نہیں ہے،چاہتا توآج بھی میری گاڑی پر کسی وزارت کا جھنڈا لہراسکتا تھا،

اپنے ضمیراور خمیرکا سودا کرکے عوام کیساتھ بےوفائی کبھی نہیں کی۔کلر سیداں میں کارکنوں سے گفتگو کرتے ہوئے چودھری نثار علی خان نے کہا کہ بہت سے رازوں سے آگاہ ہوں، اگر سچ بولوں گا تو سب حیران ہو جائیں گے،ملکی صورتحال کے اصل ذمہ دار وہ طاقت ور عناصر ہیں جنہوں نے کار ڈرائیور کو پائلٹ کی سیٹ پر بٹھایا ہے۔

ان کا کہنا تھا کہ سیاستدانوں نے حالات کی سنگینی کے ادراک کے باوجود کبوترکی طرح آنکھیں بند کی ہوئی ہیں،ہم اندرونی اوربیرونی سازشوں کا شکار ہیں،آج کا دشمن ہمارے سامنے نہیں ہے،1970 میں دشمن بھارت ہمارے سامنے تھا،آج کے حالات 1970 سے بھی زیادہ بد تر ہیں۔

لاہور (میڈیا 92 نیوز آن لائن ) وزیراعظم عمران خان سے ملاقات کرنے والے مسلم لیگ (ن) کے اراکین کے نام سامنے آگئے جب کہ سابق لیگی رکن اسمبلی یونس انصاری نے دعویٰ کیا ہے کہ اُن کی قیادت میں 15 ایم پی ایز اور 5 ایم این ایز نے وزیراعظم عمران خان سے ملاقات کی ہے۔

ذرائع کے مطابق وزیراعظم عمران خان سے ملاقات کرنے والے 11 لیگی اراکین میں غیاث الدین، شعیب اویسی، چوہدری اشرف انصاری، فیصل خان نیازی، غلام قاسم ہنجرا، محمد ارشد، اظہر چانڈیہ، غضنفر لنگاہ، جلیل احمد شرقپور، نشاط احمد خان ڈاہا شامل تھے۔

سابق لیگی رہنما اور آزاد حیثیت سے انتخابات میں کامیاب ہونے والے رکن صوبائی اسمبلی یونس انصاری نے کہا کہ مسلم لیگ (ن) کے ممبران اسمبلی نے میری قیادت میں عمران خان سے ملاقات کی اور جلد ہی پارٹی کے سندھ کے بڑے گروپ کی وزیر اعظم سے ملاقات کرائی جائے گی۔

یونس انصاری کا کہنا تھا کہ شہباز شریف نااہل سیاستدان ہیں، جنھیں اپنے گھر کی خبر نہیں، اقبال گوجر نے انہیں مسلم لیگ (ن) میں واپسی کی دعوت دی جو ٹھکرا دی تھی۔

ذرائع کے مطابق وزیراعظم عمران خان سے ملنے والوں میں سابق لیگی رکن اسمبلی یونس انصاری کے بھائی ایم پی اے اشرف انصاری بھی شامل تھے۔

دوسری جانب لیگی رکن صوبائی اسمبلی مولانا غیاث الدین کا کہنا ہے کہ عمران خان سے میں اور جلیل شرقپوری اپنے حلقے کے مسائل بارے ملے تھے تاہم میں مسلم لیگ (ن) میں ہی ہوں۔

x

لاہور (اپنے رپورٹرسے ) وفاقی وزیر ریلوے شیخ رشید احمد نے انکشاف کیا ہے کہ 9 ارکان قومی اسمبلی تحریک انصاف کا حصہ بننے کے لیے تیار ہیں اور یہ تعداد بیس تک جا سکتی ہے۔

ایکسپو سنٹر لاہور میں میڈیا سے گفتگو کرتے ہوئے انہوں نے کہا کہ حزب اختلاف والے کہتے تھے کہ بجٹ منظور نہیں ہو گا، اب وہ پچیس ووٹوں سے ہو چکا ہے، مرکز میں اس وقت نو ممبر جوگر پہن کر پی ٹی آئی میں شامل ہونے کو تیار بیٹھے ہیں۔

وفاقی وزیر کا کہنا تھا کہ کل سے عمران خان کی سیاست شروع ہو گئی ہے، ہم کرپٹ مافیا اور کمیشن خوروں کے لئے ملک کو سیاسی قبرستان بنا دیں گے۔

انہوں نے کہا کہ مولانا فضل الرحمن اپوزیشن کے ساتھ ہاتھ کرنا چاہتے تھے لیکن ان کے اپنے ساتھ ہاتھ ہو گیا۔

انہوں نے قبضہ گروپ کو تنبیہ کی کہ وہ نوے دن کے اندر ریلوے میں پیسے جمع کرا دیں۔

چیئرمین سینیٹ کی تبدیلی کو سیاسی سودے بازی قرار دیتے ہوئے انہوں نے کہا کہ آصف زرداری کو چیئرمین بننا اور بنانا آتا ہے۔

ان کا کہنا تھا کہ شہباز لیگ اور نواز لیگ الگ الگ پارٹی ہیں، شہباز شریف کی بھتیجی نے نون لیگ پر قبضہ کر لیا ہے، اب میثاق جمہوریت نہیں مذاق جمہوریت بن گیا ہے۔

شیخ رشید نے اعلان کیا کہ رائل پام کیس جیتنے کی خوشی میں وہ 11 اپریل کو تمام صحافیوں کو ڈنر دیں گے۔

ان کا کہنا تھا کہ فریٹ کی 6 ٹرینیں شروع کی جائیں گی اور فریٹ کا شعبہ کراچی منتقل کر دیا جائے گا۔

انہوں نے کہا کہ کسی کو الٹا کر کچھ نہیں نکلےگا، پیار سے پیسے نکالنا چاہئیں۔

پاکستان پیپلز پارٹی (پی پی پی) کے چیئرمین بلاول بھٹو زرداری کا کہنا ہے کہ جس وزیر اعظم کو وزیر نکالنے اور بجٹ بنانے کا اختیار تک نہ ہو اسے سلیکٹڈ نہیں تو اور کیا کہیں؟

گوجر خان میں عوامی جلسے سے خطاب کرتے ہوئے بلاول بھٹو زرداری نے کہا کہ اس وقت ملک معاشی اور قیادت کے ایک ایسے بحران سے گزر رہا ہے جو پہلے کبھی نہیں دیکھا تھا اور یہ بحران عمران خان کی نالائقی اور سلیکشن کی بنا پر ہے۔

ان کا کہنا تھا کہ ‘عمران خان کہتے تھے کہ جب ان کی حکومت آئے گی تو ملک میں لاکھوں ڈالر آئیں گے، لیکن سلیکٹڈ وزیر اعظم جب بھی آتے ہیں ظلم کرکے بھاگ جاتے ہیں، یہ کہتے ہیں مجھے سلیکٹڈ مت بولو، یہ لفظ تو اب ڈکشنری میں آگیا ہے، جس وزیر اعظم کو وزیر نکالنے اور بجٹ بنانے کا اختیار تک نہ ہو اسے سلیکٹڈ نہیں تو اور کیا کہیں؟’

بلاول بھٹو زرداری نے کہا کہ یہ کیسا نیا پاکستان ہے جہاں غریب کا گھر حرام اور بنی گالہ کی تجاوزات حلال ہیں؟ یہ کیسی حکومت ہے جس میں لاڈلی کی آف شور حلال اور نواز شریف کی آف شور حرام ہے؟ یہ کیسی حکومت ہے کہ لاڈلے کے دوست کے بے نامی اکاؤنٹس حلال اور آصف زرداری کے دوست کے بے نامی اکاؤنٹس حرام ہیں؟

انہوں نے کہا کہ نندی پور پاور پراجیکٹ کیس میں ہمارے سابق وزیر بابر اعوان بے قصور اور راجہ پرویز اشرف گناہ گار قرار پائے، یہ کس قسم کا انصاف ہے کہ یا جیل جاؤ یا تحریک انصاف میں جاؤ۔

ان کا کہنا تھا کہ عوام کے صبر کا پیمانہ لبریز ہوچکا ہے، جس دن عوام نے حکومت کی چھٹی کا فیصلہ کرلیا وہ حکومت کا آخری دن ہوگا۔

سابق صدر اور والد آصف علی زرداری اور پھوپھی فریال تالپور کی گرفتاری کے حوالے سے چیئرمین پیپلز پارٹی نے کہا کہ ‘ہم گرفتاریوں سے نہیں ڈرتے، اگر یہ سمجھتے ہیں کہ ہم پر جھوٹے مقدمات بنا کر یہ ہمیں ڈرا لیں گے تو یہ ان لوگوں کی بھول ہے جبکہ کسی صورت اصولوں پر سمجھوتہ نہیں کریں گے۔

اسلام آباد (ایمرا نیوز آن لائن)
وفاقی وزیر سائنس و ٹیکنالوجی فواد چوہدری کا کہنا ہے کہ اپوزیشن بکھر رہی ہے، ہماری مخالف سیاسی جماعتیں اس وقت بکھرنے کے موڈ میں ہیں، ن لیگ میں جو گروپنگ ہورہی ہے وہ ان کی اپنی لیڈر شپ کی وجہ سے ہورہی ہے۔

پریس کانفرنس سے خطاب کرتے ہوئے فواد چوہدری کا کہنا تھاکہ مسلم لیگ (ن) میں قیادت کی جنگ ہے، لوگ پارٹی چھوڑ رہے ہیں، ایم این ایز اور سینیٹرز بھی (ن) لیگ کو جلد چھوڑیں گے، رات کو ایک ملاقات میں کچھ لوگ ملے ہیں اور 12 ایم پی ایز کی فہرست جلد سامنے آئے گی۔

فواد چوہدری نے کہا کہ مریم نواز نے اپنے والد کو اقتدار سے نکلوایا، جیل بھجوایا اور قیادت سنبھال لی جب کہ شہباز شریف کی لیڈرشپ پر بھی شب خون مارا، لوگ اس لیے (ن) لیگ چھوڑ رہے ہیں کیونکہ انہیں مریم نواز کی ذہنیت کا پتہ ہے۔

وفاقی وزیر کا کہنا تھا کہ شہباز شریف کبھی کرائسز کے لیڈر نہیں تھے، انہیں پارٹی میں اب کوئی نہیں پوچھتا، وہ پارٹی کے اندر فضل الہیٰ بن کر رہ گئے ہیں، کہتے ہیں جب کشتی ڈوبتی ہے تو بوجھ ہٹا دیا جاتا ہے، شہباز شریف بھی یہی کررہے ہیں، شہباز شریف تمام کمیٹیوں سے استعفا دے چکے ہیں اور وہ اب صرف لیڈر آف اپوزیشن ہیں۔

فواد چوہدری نے کہا کہ مسلم لیگ (ن) میں کوئی قیادت اور ذہانت نہیں ہے اس لیے پارٹی ٹوٹ کر بکھر رہی ہے جب کہ کل گوجر خان میں چند لوگوں کا اجتماع تھا اور بلاول وہاں خطاب کرنے چلے گئے۔

ایک سوال کے جواب میں فواد چوہدری کا کہنا تھا کہ ‘میرا نہیں خیال اپوزیشن سینیٹ چیئرمین کی تبدیلی کا رسک لے گی’۔

فواد چوہدری کا کہنا تھا کہ مریم نواز کی بات کو مان کر سیاست کرنے والوں نے اپنا بیڑا غرق کیا، دانیال عزیز کا پتا کریں اب کدھر ہیں، جو لوگ حلقے کی سیاست کرتے ہیں وہ زمینی حقائق کو دیکھ کر سیاست کرتے ہیں۔

انہوں نے کہا کہ شہباز شریف اپوزیشن کے لیڈر ہی نہیں ہیں، خواجہ آصف نے کہا کہ میں مریم نواز کے مؤقف کی تائید کرتا ہوں، شہباز شریف کا کوئی بیانیہ نہیں، مریم نواز کا بیانیہ ہے۔

فواد چوہدری نے کہا کہ بلاول بھٹو، شہباز شریف اور دیگر سلیکٹڈ سلیکٹڈ کرتے رہے اور ہم نے بجٹ پاس کرالیا، خارجہ پالیسی کے نئے اہداف حاصل کرنے جارہے ہیں، چھ ماہ بعد معاشی طور پر حالات بہتر ہوں گے۔

وفاقی وزیر کا بتانا تھا کہ قطر سے 3 ملین ڈالر کی قسط موصول ہوگئی ہے، 9.8 بلین ڈالر اب تک قرضوں کی مد میں واپس کرچکے ہیں، سود اور قرضہ جو واپس کیا وہ سندھ کے پورے بجٹ کے برابر ہے۔

فواد چوہدری کا کہنا تھا کہ 5600 ارب روپے کا ٹیکس وصولی کا ہدف رکھا ہے، معیشت کا اصل چیلنج ٹیکس کلیکشن ہے۔

ممالک سے تعلقات سے متعلق بات کرتے ہوئے وفاقی وزیر نے کہا کہ شہزادہ ولیم اور ان کی اہلیہ جلد پاکستان آرہے ہیں، بھارت سے بھی اب ہمیں مثبت رسپانس ملے گا جب کہ قندھار میں ایک کاسمیٹکس یونیورسٹی اور کابل میں معدنیات کی ایک یونیورسٹی بنانے کی بھی پیش کش کی ہے۔