Category پاکستان

وزیراعظم عمران خان نے کہا ہے کہ کورونا کے دوران غیر جمہوری سیاسی قیادت سے مقابلہ ہے۔ جب سمارٹ لاک ڈاؤن کی ضرورت ہے، اپوزیشن جلسے کرنا چاہتی ہے۔ مخالفین کو شہریوں کی زندگی کی فکر نہیں، ان کا واحد مقصد لوٹ مار کی دولت کو بچانا ہے، این آر او حاصل کرنے کیلئے کسی بھی حد تک جا سکتے ہیں۔

وزیراعظم عمران خان نے اپنے ٹویٹر پیغام میں کہا کہ سیاسی قیادت عوام کی بہتری کے لئے کسی بھی اچھے کام کا حصہ نہیں بنی۔ وزیراعظم نے کہا کہ ان “قائدین” کو عوام کے ساتھ کوئی ہمدردی نہیں، انہوں نے قومی دولت لوٹ کر انہیں مزید غریب بنایا۔ اپوزیشن کے نام نہاد “لیڈرز” بڑے محلوں میں شاہانہ زندگی بسر کررہے ہیں۔

وزیراعظم نے کہا کہ اپوزیشن رہنماوں کو یہ منصب بھی خاندان سے وراثت میں ملا ہے۔ اب ان کا واحد مقصد اپنے خاندانوں کی لوٹی ہوئی دولت کو بچانا ہے۔ جب ہم نے غریب لوگوں کے روزگار اور معیشت کو تباہی سے بچانے کے لئے سمارٹ لاک ڈاؤن کیا تو ان “لیڈرز” نے مکمل لاک ڈاؤن کا مطالبہ کیا۔ کورونا کی نئی لہر میں دوبارہ سمارٹ لاک ڈاؤن کی ضرورت ہے تو یہ جلسے کرنا چاہتے ہیں۔ یہ سمجھتے ہیں این آر او کے لئے ہم پر دباؤ ڈالنے کا یہ آخری موقع ہے۔ یہ این آر او حاصل کرنے میں کبھی کامیاب نہیں ہونگے۔

وزیراعظم عمران خان کا کہنا تھا کہ ان لیڈرز نےاپنی زندگی میں کبھی ایک دن بھی کام نہیں کیا۔ ان کے “شاہی” طرز زندگی کا انحصار براہ راست اس ناجائز، غیرقانونی طور پر حاصل شدہ دولت پر ہے۔

وزیراعلیٰ عثمان بزدار نے کہا ہے کہ پی ڈی ایم جلسوں کے ذریعے عوام کی زندگیوں سے کھیل رہی ہے، منفی سیاست کرنے والے ہوش کے ناخن لیں، ایس او پیز کی خلاف ورزی کی تو قانون حرکت میں آئے گا۔

وزیراعلیٰ پنجاب عثمان بزدار نے اپنے بیان میں کہا ہے کہ ماضی کے حکمرانوں نے شعبہ صحت کو یکسر نظر انداز کیا، صحت کے شعبے کو کبھی ترجیح نہیں دی گئی، موجودہ حالات میں اپوزیشن جماعتوں کا رویہ مایوس کن ہے، اپوزیشن محض اپنی سیاست چمکانے کے لئے خالی بیان بازی کر رہی ہے۔

عثمان بزدار کا کہنا تھا دکھی انسانیت کی خدمت محض بیانوں سے نہیں ہوتی بلکہ مشکل وقت میں عوام کے ساتھ کھڑا ہونا پڑتا ہے، تحریک انصاف کی حکومت آزمائش کی گھڑی میں عوام کے شانہ بشانہ کھڑی ہے، تحریک انصاف کی حکومت کورونا کنٹرول کے لئے اقدامات کر رہی ہے، عوام کے تعاون سے کورونا کی حالیہ وباء پر بھی قابو پائیں گے، حکومت ہر قدام عوام کے تحفظ کے لئے اٹھا رہے ہیں، حکومت کورونا ایس او پیز پر سختی سے عملدرآمد کرائے گی۔

شہباز گل نے کہا ہے کہ ملتان میں کورونا کیسز کی شرح سب سے زیادہ ہے، یہ لوگ مافیا کے کہنے پر قتل عام کو بھی تیار ہیں، قانون توڑنے پر ان کے خلاف کارروائی ہوگی۔

معاون خصوصی شہباز گل نے گفتگو کرتے ہوئے کہا لوٹ مار کی داستانوں کا سب کو پتا ہے، گیلانی صاحب نے دونوں ہاتھوں سے لوٹ مار کی، عوام چوروں اور ڈاکوؤں کو دوبارہ موقع نہیں دیں گے، ملتان میں کورونا کیسز کی شرح سب سے زیادہ ہے، قانون توڑنے پر ان کے خلاف کارروائی ہوگی۔

شہباز گل کا کہنا تھا یہ اقتدار کے حصول کیلئے ہر حد تک جانے کیلئے تیار ہیں، این آر او نہ ملنے کے باعث یہ ہنگامہ آر ائی پر اتر آئے ہیں، عمران خان دن رات معیشت کی بہتری کیلئے کام کر رہے ہیں، نواز شریف وطن واپس آئیں اور کیسز کا سامنا کریں۔

صوابی کے علاقے چھوٹا لاہور میں زمین کے تنازعے پر فائرنگ سے آٹھ افراد جان کی بازی ہار گئے۔

ڈی پی او کے مطابق دو فریقین کے مابین سابقہ ایم پی اے کے حجرے میں جائیداد کے سلسلے میں جرگہ ہو رہا تھا، اس دوران فائرنگ سے چھ لوگ موقع پر ہی مارے گئے جبکہ دو افراد زخمی ہوگئے۔

ایمرا صحافیوں کی تنظیم ہے آور ان کے حقوق کے لیے ہر قدم اٹھانے کو تیار ہے روز نامہ جہان پاکستان کے کارکنوں کو انکا حق ملنا ایمرا کی نہیں صحافیوں کی جیت ہیں ملتان میں اخباری کارکنوں کو واجبات ادائیگی کا سہرا مرزا ندیم کے سر جاتا ہے ایمرا جلد سیٹلائٹ چینل لانچ کر رہا ہےجس میں بےروزگار صحافیوں کو روزگار دیا جائے گا ان خیالات کا اظہار صدر ایمرا آصف بٹ نےملتان پریس کلب میں روزنامہ جہان پاکستان ملتان کے کارکنوں کو واجبات کی ادائیگی کے موقع پر کیا اور انہوں نے جہاں پاکستان کی انتظامیہ اور مالکان ایم اے روف، اویس راوف اورایڈیٹر ضیاء الرحمان تنولی کا شکریہ ادا کیا انہوں نے ایمرا باڈی کی درخواست پر لاہو،اسلام آباد اورملتان کے جہاں پاکستان کے سابق صحافیوں کے بقایاجات کی ادائیگی کی ہے
تقریب کے مہمان خصوصی ، آصف بٹ صدر ایمرا،ایڈیٹر ایمراعاطف اعوان.. معروف اینکرغلام مرتضیٰ تھے جبکہ میزبان ایڈیٹر جہاں پاکستان،جنرل سیکرٹری ملتان پریس کلب مرزا ندیم تھے
نقابت کے فرائض جوائنٹ سیکرٹری ملتان پریس کلب اظہارعباسی نے سرانجام دے.اس موقع پر مرزا ندیم نے کہاکہ صحافیوں کی فلاح و بہبود کے لئے کام کرتے رہیں گے.
تقریب میں سینیرجرنلسٹ ندیم عالم. شیخ رضوان،شاہد بشیر، ثروت اعجاز، سرفراز احمد،عابد بشیر،صدر ملتان یونین آف جرنلسٹ میاں مقصود، سرفراز انصاری،منصورعباس طارق انجم،لطیف ظفر سمیت دیگر افراد نے شرکت کی۔

کورونا وائرس کی دوسری لہر کی روک تھام کیلئے سول ایوی ایشن نے اندرون ملک جانیوالی تمام پروازوں میں کھانے اورمشروبات پر پابندی عائد کر دی۔
این سی او سی کے فیصلے کی روشنی میں سول ایوی ایشن نے اندرون ملک جانے والی تمام پروازوں میں مسافروں کوکھانے پینے کی اشیا فراہم کرنے پر پابندی لگا دی۔ سی اے اے کے ڈائریکٹر ایئر ٹرانسپورٹ نے نوٹیفکیشن جاری کردیا جس کے مطابق پی آئی اے سمیت تمام نجی ایئرلائنز اور چارٹرڈ پروازیں عملدرآمد کریں گی۔

نوٹیفکیشن میں کہا گیا ہے کہ تمام ایئرپورٹس منیجر اوراے ایس ایف اس پر سختی سے عملدرآمد کرائیں گے۔ پرواز کے عملے اور مسافروں کیلئے ماسک کا استعمال بھی لازمی قرار دیا گیا ہے۔ سول ایوی ایشن کے مطابق تمام ایئرلائنیں ایس او پیز پر مکمل عملدرآمد کرانے کی پابند ہوں گی۔

وزیراعلیٰ عثمان بزدار نے کہا ہے کہ اپوزیشن جماعتوں کا کورونا پر سیاست کرنا المیہ ہے، انہوں نے پہلے بھی اہم تر قومی مسئلے پر سیاست چمکانے کی ناکام کوشش کی، قوم وبا کے باوجود منفی سیاست کرنے والوں کو معاف نہیں کرے گی۔

وزیراعلیٰ عثمان بزدار نے اپنے بیان میں کہا کہ دکھی انسانیت کی خدمت کیلئے عوام کے ساتھ کھڑا ہونا پڑتا ہے، پاکستان تحریک انصاف کی قیادت نے کورونا وباء میں عوام کوتنہا نہیں چھوڑا، اپوزیشن رہنما مشکل کی گھڑی میں عوام کو اکیلا چھوڑ کر صرف بیان داغنے تک محدود ہیں۔

عثمان بزدار کا کہنا تھا اپوزیشن جماعتوں نے ثابت کیا ہے کہ وہ صرف ذاتی مفادات کا تحفظ چاہتی ہیں، یہ وقت سیاست سے بالاتر ہو کر قومی مسئلے پر اکٹھا ہونے کا ہے، کورونا کے باعث دنیا بدل گئی لیکن بدقسمتی سے پاکستانی اپوزیشن کی منفی سیاست نہیں بدلی۔

وزیراعلیٰ عثمان بزدار نے فردوس مارکیٹ انڈر پاس کا افتتاح کر دیا۔ صوبائی وزراء، فردوس عاشق اعوان اور دیگر بھی اس موقع پر موجود تھے۔

وزیراعلیٰ عثمان بزدار کا کہنا تھا کہ حکومت نے شفاف ٹینڈرنگ کے ذریعے تعمیراتی لاگت میں 13 کروڑ روپے کی خطیر رقم کی بچت کی، سنٹر پوائنٹ گلبرگ سے ایم ایم عالم روڈ اور کیولری گراؤنڈ کی طرف جانے والی ٹریفک میں روانی آئے گی، گلبرگ اور کینٹ ایریا کے دوران آمدورفت بلا تعطل ہوگی۔

انہوں نے کہا کہ لعل شہباز قلندرؒ انڈر پاس سے روزانہ تقریباً ایک لاکھ شہری مستفید ہوں گے، ایندھن کی مد میں سالانہ کروڑوں روپے کی بچت ہوگی، شہریوں کا قیمتی وقت ضائع نہیں ہوگا، تعمیراتی لاگت میں 13 کروڑ روپے کی بچت کا کریڈ ٹ موجودہ حکومت کی شفاف پالیسیوں کو جاتا ہے، 560 کلو میٹر طویل لعل شہباز قلندرؒ انڈر پاس دونوں اطراف 2، 2 لین پر مشتمل ہے۔

پاکستان نے ایل او سی پر بھارتی افواج کی جانب سے سیز فائر کی خلاف ورزیوں پر بھارتی ناظم الامور کو دفتر خارجہ طلب کر کے شدید احتجاج کیا اور احتجاجی مراسلہ ان کے حوالے کیا۔

ترجمان دفتر خارجہ کے مطابق بھارتی افواج نے بگسر سیکٹر پر بلا اشتعال فائرنگ کی، بھارتی افواج کی اشتعال انگیزی سے ایک شہری شہید ہوا، بھارت رواں برس 2 ہزار 840 بار سیز فائر کی خلاف ورزیاں کر چکا ہے، رواں برس بھارتی فائرنگ سے 27 شہادتیں اور 245 افراد زخمی ہو چکے ہیں۔

ترجمان دفتر خارجہ کا کہنا ہے کہ بھارت کا معصوم شہریوں کو جان بوجھ کر نشانہ بنانا قابل مذمت ہے، بھارتی فورسز مسلسل لائن آف کنٹرول، ورکنگ باونڈری پر شہری آبادی کو نشانہ بنا رہی ہیں، بھارت کی پے در پے اشتعال انگیزیاں خطے میں امن و سلامتی کے لیے خطرہ ہیں، بھارت ان حرکتوں سے مقبوضہ کشمیر کی صورتحال سے دنیا کی توجہ نہیں ہٹا سکتا۔

پاکستان نے مطالبہ کیا کہ بھارت اقوام متحدہ سلامتی کونسل کی قراردادوں پر عمل درآمد یقینی بنائے، بھارت 2003ء کے جنگ بندی انتظام کی پاسداری کرے، ہندوستان کا نہتے شہریوں کو نشانہ بنانا عالمی قوانین، اقدار کے منافی ہے، اقوام متحدہ فوجی مبصر مشن کو ایل او سی پر کام کرنے دیا جائے۔

اسلام آباد کے سب سے بڑے سرکاری ہسپتال پمز کے عملے میں سے 181 افراد کورونا کا شکار ہو گئے ہیں۔

وفاقی دارالحکومت کے بڑے سرکاری ہسپتال کی انتظامیہ نے سروسزمحدودکرنےکا اعلان کر دیا،پمز ہسپتال میں مرکزی او پی ڈی سروس بند کر دی گئی ہے۔ ترجمان ڈاکٹر وسیم خواجہ کا کہنا ہے کہ شعبہ زچہ بچہ، چلڈرن ہسپتال کی او پی ڈیزکھلی رہیں گی اورموجودہ حالات میں پمزکا شعبہ ایمرجنسی بھی فعال رہےگا۔

ترجمان نے مزید کہاکہ مین او پی ڈی کی بندش کا فیصلہ کورونا صورتحال کے باعث کیا ،ہسپتال میں ایمرجنسی کےعلاوہ کوئی سرجری نہیں ہوگی، کورونا صورتحال میں بہتری پراو پی ڈی سروس بحال کی جائیگی