Tag afghanistan

بیجنگ:(نیٹ نیوز/ایمرا نیوز) چین میں اب اسکول کے طلبا و طالبات کے یونیفارم کو بھی اسمارٹ کردیا گیا ہے کیونکہ ان پر لگی خاص مائیکرو چپ کے ذریعے اسکول کے باہر بھی ان کی آمدورفت پر نظر رکھی جاسکے گی۔چینی صوبے ’گوائی زُو‘ کے 11 اسکولوں کے بچوں کے یونیفارم پر مائیکروچِپ لگائی گئی ہے جو گلوبل پوزیشننگ سسٹم ( جی پی ایس) کے ذریعے بچوں کا جائزہ لیتی رہتی ہے خواہ وہ اسکول کے میدان سے باہر ہی کیوں نہ نکل چکے ہیں۔بچوں کے لباس کے کندھوں پر دائیں اور بائیں دو چپس لگائی گئی ہیں جن کے ذریعے اسکول انتظامیہ اور والدین دونوں ہی بچوں کی ٹریکنگ کرسکتے ہیں اگر بچہ کمرہ جماعت سے باہر جائے یا اسکول کے احاطے سے نکل جائے تو اس کی فوری اطلاع والدین اور اسکول انتظامیہ کو ہوجاتی ہےیہ سسٹم اسکول میں بچے کے سونے کی خبر بھی انتظامیہ کو پہنچا دیتا ہے اور اسی پر بس نہیں بلکہ اس میں ایک موبائل ایپ کے ذریعے پیسے خرچ کرنے اور ان کی حد قائم کرنے کا بھی انتظام ہے۔

اسے بنانے والی کمپنی کا مؤقف ہے کہ جدید ٹیکنالوجی سے مرصع یونیفارم حفاظتی اقدامات کے تحت بنایا گیا ہے اور اسکول میں بچوں کو منظم رکھنے کا بھی کام کرتا ہے تاہم سوشل میڈیا پر بعض حلقوں نے اس پر تنقید بھی کی ہے۔لوگوں نے کہا ہے کہ بچوں کے انسانی حقوق ہوتے ہیں اور وہ تخلیہ چاہتے ہیں جبکہ ایک شخص نے کمپنی سے سوال کیا کہ اگر آپ بچے ہوتے اور 24 گھنٹے آپ پر نظر رکھی جاتی تو آپ کو کیسا لگتا؟وجہ کوئی بھی ہو چین کے اسکولوں میں اے آئی نظام کے ذریعے حاضری اور چہرہ شناخت کرنے والے سسٹم پر بھی کام جاری ہے۔ قبل ازیں خبریں آئی تھیں کہ چین کے بعض اسکولوں کے کمرہ جماعت میں طالب علموں پر نظر رکھنے والے کیمرے بھی لگائے گئے ہیں۔

ممبئی:(شوبز ڈیسک/ایمرا نیوز) بالی ووڈ کنگ شاہ رخ خان کی فلم’’زیرو‘‘باکس آفس پر ناکامی کے باوجود دنیا بھر میں سب سے زیادہ آمدنی والی 10 فلموں میں شامل ہوگئی۔’’جب ہیری میٹ سیجل‘‘ کی ناکامی کے بعد بالی ووڈ کنگ شاہ رخ خان کو فلم’‘زیرو‘‘ سے بہت زیادہ امیدیں وابستہ تھیں۔ کنگ خان نے اپنی فلم کی بھرپور انداز میں تشہیر بھی کی لیکن فلم تجزیہ نگاروں اورشائقین کے معیار پر پوری نہ اتر سکی اور ریلیز کے ایک ہفتے بعد بھی 100 کروڑ کلب میں داخل نہ ہوسکی اور ناکام ہوگئی۔تاہم باکس آفس پر ناکامی کے باوجود ’’زیرو‘‘2018 کی دنیا بھر میں سب سے زیادہ آمدنی والی 10 فلموں میں شامل ہوگئی ہے۔

باکس آفس انڈیا کی رپورٹ کے مطابق’’زیرو‘‘بیرون ممالک اچھا بزنس کررہی ہے اور اب تک دنیا بھر سے 100 کروڑ 78لاکھ روپے کماچکی ہے۔فلم’’سنجو‘‘دنیا بھر سے 5 سو کروڑ 78 لاکھ روپے کماکر 2018 کی سب سے زیادہ آمدنی والی فلم بن گئی ہے۔ دوسرے نمبر پر جس فلم نے دنیا بھر میں سب سےزیادہ کمائی کی وہ دپیکا پڈوکون کی فلم’’پدماوت‘‘ہے جس نے مجموعی طور پر 5 سو کروڑ 46 لاکھ کمائے۔ رنویر سنگھ کی فلم’’سمبا‘‘ 3 سو کروڑ 10لاکھ کے ساتھ تیسرے نمبر پررہی۔
چوتھے نمبر پر سلمان خان کی ’’ریس3‘‘ تین سوکروڑ 6 لاکھ، پانچویں نمبر پر اکشے کمار اوررجنی کانت کی ’’ٹوپوائنٹ زیرو‘‘2 سوکروڑ 69 لاکھ، چھٹے نمبر پر فلم’’باغی2‘‘دو سوکروڑ 49 لاکھ، ساتویں نمبر پر ’’ٹھگ آف ہندوستان‘‘دو سو کروڑ 47 لاکھ، آٹھویں نمبر پر ’’بدھائی ہو‘‘دو سو کروڑ 15 لاکھ، نویں نمبر پر ’’راضی‘‘100 کروڑ 92 لاکھ اوردسویں نمبر پر شاہ رخ خان کی فلم’’زیرو‘‘نے دنیا بھر سے مجموعی طور پر سو کروڑ 78 لاکھ کی کمائی کی۔

برلن:(نیٹ نیوز/ایمرا نیوز) جرمنی کے مختلف شہروں کی عدالتوں میں بم کی اطلاعات پر عمارتوں کو خالی کرالیا گیا۔غیر ملکی خبر رساں ادارے کے مطابق جرمنی کے تین شہروں، کائل، ارفورٹ اور میگڈی برگ کی عدالتوں میں بم کی اطلاع پر عمارتیں فوری طور پر خالی کرالی گئیں، کمرہ عدالت میں بم کی اطلاع ای میل کے ذریعے بھیجی گئی جس کے بعد پولیس کی جانب سے کارروائی کرتے ہوئے عمارتوں کو خالی کرالیا گیا۔جرمن حکام کے مطابق بم کی اطلاع ملنے کے بعد پولیس نے فوراً عدالتوں کو گھیرے میں لے کر تمام افراد کو باہر نکال دیا اور سراغ رساں کتوں کی مدد سے عمارتوں کی تلاشی لی جارہی ہے، دوسری جانب مغربی ریاست ہیسی کی پولیس کا کہنا ہے کہ کمرہ عدالت سے مشتبہ پیکٹ برآمد ہوئے ہیں۔

حافظ آباد:(نیٹ نیوز/ایمرا نیوز) کسوکی روڈ پر نامعلوم افراد کی فائرنگ سے خاتون سرکاری وکیل جاں بحق ہوگئیں۔حافظ آباد میں کسوکی روڈ پر نامعلوم افراد سول کورٹ میں خاتون سرکاری وکیل نائلہ امجد کو فائرنگ کا نشانہ بنانے کے بعد فرار ہونے میں کامیاب ہوگئے، نائلہ امجد ابتدائی طبی امداد کی فراہمی سے قبل ہی جاں بحق ہوگئیں۔ لاش کو ڈسٹرکٹ ہیڈ کوارٹرز اسپتال منتقل کردیا۔ جہاں قانونی کارروائی کے بعد لاش کو لواحقین کے حوالے کردیا۔پولیس کے مطابق جائے وقوعہ سے شواہد اکٹھے کرلئے گئے ہیں جس کی مدد سے ملزمان کی گرفتاری کے لیے کارروائی بھی شروع کردی گئی ہے۔

راولپنڈی(نیٹ نیوز/ایمرا نیوز) چوہدری شجاعت حسین کے صاحبزادے چوہدری سالک نیب راولپنڈی میں پیش ہوگئے ، ان سے ایک گھنٹہ سے زائد نیب حکام نے پوچھ گچھ کی ہے۔نیب نے آمدن سے زائد اثاثوں کی انکوائری میں چوہدری سالک حسین کو طلب کیا تھا۔نیب سے واپسی پر میڈیا سے بات کرتے ہوئے چوہدری سالک حسین نے بتایا کہ ان سے ایک گھنٹہ سے زائد نیب حکام نے پوچھ گچھ کی اور انہوں نے تمام سوالات کے جواب دیئے ہیں ۔اس موقع پر چوہدری سالک نے کہاکہ انہیں نیب نے دوبارہ نہیں بلایا ہے، ان کا مزید کہنا تھا کہ کوئی غلط کام نہیں کیا، امید ہے دوبارہ نیب نہیں بلائے گا۔

اسلام آباد(نیٹ نیوز/ایمرا نیوز) وزیراطلاعات فواد چوہدری کہتے ہیں کہ علیمہ آپا ملک کی وزیراعظم نہیں رہیں، تمام جائیدادیں انہوں نے خود ڈکلیئر کی ہیں۔سماجی رابطے کی ویب سائٹ ٹوئٹر پر مسلم لیگ نون کی ترجمان مریم اورنگزیب کے بیان پر اپنے رد عمل کا اظہار کرتے ہوئے فواد چوہدری نے مزید کہاکہ جب خود کوئی ٹکے کی بھلائی کا کام نہیں کیا تو پھر شوکت خانم اور نمل کو متنازع نہ بنائیں۔انہوں نے مزید کہا کہ آپ اپنی مرحوم سیاست کو نئی زندگی دینے کے لیے ان اداروں کو متنازع بنانے کی کوشش نہ کریں۔وزیر اطلاعات فواد چوہدری نے یہ بھی کہا کہ آپ کی سیاست اب جھوٹی کہانیاں گھڑنے تک محدود ہے۔مسلم لیگ نون کی ترجمان مریم اورنگزیب نے اس سے قبل ٹوئٹر پر اپنے بیان میں کہا تھا کہ کیا تھے وہ ذرائع جن سے علیمہ باجی نے اربوں روپے کی پراپرٹی خریدی؟

ممبئی(شوبز ڈیسک/ایمرا نیوز) ایکشن سے بھرپور ہالی ووڈ تھرلر فلم’کولڈ پرسوئٹ‘کا نیا ٹریلر جاری کردیا گیاہے۔ہالی ووڈ تھرلر، ایکشن فلم کولڈ پرسوئٹ (Cold Pursuit) کا نیا ٹریلر جاری کردیا گیا ہے،ہنس پیٹر مولینڈ کی ہدایتکاری میں بننے والی اس فلم کی کہانی شمالی امریکی قصبے میں رہائش پذیر ایک ایسے شخص کے گرد گھوم رہی ہے جو اپنے بچے کے قتل کے بعد ڈرگ مافیا کے خلاف میدان میں آجاتا ہے۔

فلم کی کاسٹ میں لیام نیسن،لاؤرا ڈرن،ایمی روسم،ٹام بیٹ مین،جولیا جونز اور ولیم فورسیتھ سمیت دیگر اداکار شامل ہیں۔مائیکل شیم برگ اور فن جرڈرم کی مشترکہ پروڈیوس کردہ ایکشن اور سنسنی سے بھرپور یہ فلم 8فروری کو سینما گھروں کی زینت بنے گی۔

لاہور(نیٹ نیوز/ایمرا نیوز) پاک بحریہ کے جہاز وں پی این ایس خیبر، راہ نورد ، مدد گار اورپاکستان میری ٹائم سیکورٹی ایجنسی کے جہاز ژوب نے ایران کی بندرگاہ بندر عباس کا دورہ کیا۔ترجمان پاک بحریہ کے مطابق بندر گاہ آمد پر ایرانی بحریہ کے آفیسرز نے جہاز کاپُر جوش استقبال کیا اورمشن کمانڈر کموڈور محمد سلیم نے ایرانی فرسٹ نیول ریجن کے کمانڈر اور گورنر ہرموزگان سے ملاقاتیں کی۔ملاقاتوں کے دوران باہمی دلچسپی کے امور اور دوطرفہ تعاون پر تبادلہ خیال کیا گیا ۔مختلف ممالک کے سفارت کاروں اور ایرانی بحریہ کے آفیسرزنے پی این ایس خیبر کا دورہ بھی کیا۔ترجمان پاک بحریہ کا کہنا ہے کہ جہازوں کے ان دوروں سے دونوں ممالک کے درمیان برادرانہ تعلقات کو مزید فروغ ملے گا۔

چین(نیٹ نیوز/ایمرا نیوز) چین میں یخ بستہ ہواؤں نے آبشار کا پانی جما دیا، قدرت کا یہ حسین منظر کیمرے نے اپنی آنکھ میں محفوظ کرلیا۔یہ حسین مناظرچین کے صوبے Shaanxi میں واقع Hukou نامی آبشار پر دیکھے گئے جہاں خون جما دینے والی سردی اور یخ بستہ ہواؤں کے سبب بہتی آبشارکا پانی جم کر برف کی شکل اختیار کر گیا۔ یوں بہتی آبشار کا برف میں تبدیل ہونے کا خوبصورت منظر جس نے دیکھا مبہوت رہ گیا جسے دیکھنے کے لیے لوگوں کی بڑی تعداد یہاں کا رُخ کر رہی ہے۔

سکھر(نیٹ نیوز/ایمرا نیوز) سندھ کے شہر سکھر کے علاقے صالح پٹ میں جائیداد کی لالچ میں لے پالک بیٹے نے ضعیف باپ کو قتل کر دیا اور پولیس کو گمراہ کرنے کے لیے الزام مخالفین پرلگا دیا۔پولیس نے ملزم کو تحویل میں لے کر پوچھ گچھ کی تو اس نے اعترافِ جرم کر لیا۔دو ایکڑ زمین کے لالچ نے سارے احسانوں کو بھلا ڈالا،لےپالک بیٹے نے 70سال کے ضعیف باپ کو قتل کر ڈالا۔محمد نواز نے 27 دسمبر کی رات کو صعیف شخص ڈاترڈنو کو سوتے میں فائرنگ کر کے قتل کیا اور گھر پر مخالفین کے قاتلانہ حملے کا ڈرامہ رچایا، ساتھ ہی مخالفین کے خلاف تھانہ صالح پٹ میں مقدمہ بھی درج کرا دیا۔قتل کے اس کیس کی گتھی سلجھی تو قاتل لے پالک بیٹا نکلا، دوران تفتیش ملزم نے والد کو قتل کرنے کا اعتراف کر لیا، ملزم کے قبضے سے آلہ قتل بھی برآمد کرلیا گیا ہے۔ملزم محمد نواز دتر ڈنو کا سگا بھتیجا تھا جسے بچپن سے مقتول نے ہی پالا تھا اور اپنی بیٹی سے شادی بھی کرائی تھی، عدالت نے ملزم کو 12جنوری تک جسمانی ریمانڈ پر پولیس کے حوالے کر دیا ہے۔