Tag firing

لندن(ایمرا نیوزآن لائن) لندن کی سیون کنگ مسجد میں نماز تراویح کے دوران مسلح شخص کی مسجد میں گھسنے کی کوشش کو وہاں موجود نمازیوں نے ناکام بنا دیا۔برطانوی میڈیا کےمطابق مسلح شخص کو مسجد میں موجود نمازیوں نے باہر دھکیل دیا، جبکہ مبینہ حملہ آور نے مسجد میں گھسنے کی کوشش کے دوران اپنا چہرہ ڈھانپ رکھا تھا۔ذرائع کے مطابق باہر نکالے جانے کے بعد مسلح شخص مسجد کے باہر ایک فائر کرکے فرار ہوگیا، تاہم واقعے میں کسی شخص کے زخمی ہونے کی اطلاع موصول نہیں ہوئی ہے۔میٹروپولیٹن پولیس کی جانب سے ملزم کی تلاش کا کام جاری ہے، واقعے کے بعد ہائی روڈ سیون کنگ پر سیکیورٹی بڑھا دی گئی ہے۔

حافظ آباد(ایمرا نیوزآن لائن) پنجاب کے شہر حافظ آباد میں مسلح ملزمان کی فائرنگ سے ایک شخص جاں بحق ہوگیا،واردات کے بعد ملزمان باآسانی فرار ہو گئے۔پولیس کے مطابق فائرنگ کا واقعہ حافظ آباد کے علاقے بیرانوالہ میں پیش آیا جہاں زمین کے تنازع پر مخالفین نے فائرنگ کی۔پولیس کا کہنا ہے کہ جاں بحق ہونے والے شخص کی لاش کو اسپتال منتقل کیا گیا ہے جبکہ ملزمان کو گرفتار کرنے کی کوشش کی جا رہی ہے۔

کیرولینا(ایمرا نیوزآن لائن) امریکی ریاست نارتھ کیرولینا کی یونیورسٹی میں فائرنگ سے 2 افراد ہلاک اور 4زخمی ہوگئے ۔میڈیا ذرائع کے مطابق فائرنگ سے ہلاک افراد کی عمریں 17 اور 18 سال کے درمیان کی ہیں ، جبکہ یونیورسٹی انتظامیہ کا کہنا ہے کہ فائرنگ سے 2 زخمیوں کی حالت نازک ہے۔عینی شاہدین کے مطابق فائرنگ کے بعد یونیورسٹی کی لائبریری اور دیگر کمروں سے طلباء کو بھاگتے ہوئے دیکھا گیا ہے، جبکہ جائے وقوعہ سے ایک شخص کو حراست میں بھی لیا گیا ہے۔

یونیورسٹی انتظامیہ کا کہنا ہے کہ فائرنگ کے واقعے بعد یونیورسٹی کیمپس کو لاک کردیاگیا ہے اور سیکیورٹی اہلکار عمارت میں سوئپنگ کا عمل جاری رکھے ہوئے ہیں ۔انتظامیہ کی جانب سے لوگوں کو محفوظ مقام پرمنتقل ہونے کی ہدایت جاری کر دی گئی ہیں ۔

(ایمرا نیوزآن لائن) لاہور میں شفیق آباد کے علاقے میں گھریلو جھگڑے پر ایک شخص نے فائرنگ کرکے اپنے باپ، دو بہنوں کو قتل اور بھائی کو زخمی کردیا، ملزم نےخود کو بھی گولی مار کر خودکشی کرلی۔پولیس کے مطابق شیفق آباد کے علاقے میں اویس نے گھریلو جھگڑے پر فائرنگ کرکے اپنے باپ 60 سالہ ریاض، دو بہنوں 25 سالہ سدرہ اور 23 سالہ مریم کو قتل کردیا جبکہ 28 سالہ بھائی فرحان اس موقع پر زخمی ہوگیا، جسے میو اسپتال منتقل کردیا گیا۔

پولیس کے مطابق واردات کے بعد ملزم اویس نے خود کو بھی گولی مار کر خودکشی کرلی، فرانزک ٹیموں نے جائے واردات سے شواہد اکھٹے کرلیے اور لاشوں کو پوسٹ مارٹم کے لیے ڈیڈ ہاؤس منتقل کردیا گیا ہے۔ایس پی سٹی نے میڈیا سے گفتگو کرتے ہوئے کہا کہ واقعہ کی تمام پہلوؤں سے تفتیش کی جائے گی اور زخمی فرحان کے بیان کے بعد مزید حقائق سامنے آئیں گے۔

لاہور(ایمرا نیوزآن لائن) لاہور کے نواحی علاقے فیروزوالہ میں دیرینہ دشمنی پر فائرنگ کے تبادلے میں چار افراد زندگی کی بازی ہار گئے۔فیروزوالہ پولیس کے مطابق یوسی 108 گجرپورہ کا چیئرمین محمد افضل اپنے گن مین محمد جمیل کے ہمراہ بلکھے گاؤں کے قریب سے گزر رہا تھا کہ موٹرسائیکل سواروں نے فائرنگ کر دی، گولیاں لگنے سے محمد افضل اور گن مین محمد جمیل موقع پر دم توڑ گئے۔

پولیس کے مطابق گن مین جمیل نے بھی فائرنگ کی جس سے ایک حملہ آور عدیل جاں بحق ہو گیا جبکہ فائرنگ کی زد میں آکر ایک راہگیر اجمل بھی زندگی کی بازی ہار گیا۔پولیس کے مطابق فائرنگ ریاض سندھی گروپ اور صاحب گروپ میں دریائے راوی سے ریت نکالنے کے تنازع پر ہوئی۔

مقتول یوسی چیئرمین محمد افضل کا تعلق صاحب گروپ سے جبکہ حملہ آور عدیل کا تعلق ریاض سندھی گروپ تھا، پولیس نے لاشیں قبضے میں لے کر پوسٹمارٹم کے لیے اسپتال منتقل کر دیں۔آئی جی پنجاب عارف نواز نے واقعے کا نوٹس لیتے ہوئے ڈی پی او شیخوپورہ سے رپورٹ طلب کر لی ہے۔

(ایمرا نیوزآن لائن) بلوچستان کے ساحلی علاقے اورماڑہ کے قریب مکران کوسٹل ہائی وے پر ایک بس کے مسافروں پر نامعلوم مسلح ملزمان نے فائرنگ کر دی جس کےنتیجے میں 14 افراد جاں بحق ہو گئے۔ذرائع کے مطابق مسلح ملزمان نے بس سے مسافروں کو شناخت کے بعد اتارا اور ان پر فائرنگ کر دی، واقعے کے بعد ملزمان فرار ہونے میں کامیاب ہو گئے۔

لیویز ذرائع کے مطابق واقعے کے بعد لیویز اور مقامی پولیس پہنچ گئیں، جنہوں نے علاقے کو گھیرے میں لے لیا۔لیویز ذرائع کا یہ بھی کہنا ہے کہ جاں بحق ہونے والے تمام افراد کی لاشیں اورماڑہ اسپتال منتقل کی گئی ہیں۔

لاہور: (ایمرا نیوزآن لائن) لاہور کے علاقے مصطفی ٹاؤن میں سرعام فائرنگ کر کے خوف و دہشت پھیلانے والا مرکزی ملزم ساتھی سمیت گرفتار، پسٹل بھی برآمد کر لیا گیا، پولیس کے دیگر ساتھیوں کی گرفتاری کیلئے چھاپے جاری ہیں۔پولیس نے فائرنگ کر کے خوف و ہراس پھیلانے والے مرکزی ملزم شان کو ساتھی سمیت گرفتار کر لیا۔ ملزم کے قبضے سے پسٹل بھی برآمد ہوا ہے۔ پولیس کا کہنا ہے کہ دیگر ملزمان کی گرفتاری کیلئے چھاپے مارے جا رہے ہیں۔یاد رہے کہ ملزم نے مصطفی ٹاون میں موٹرسائیکل پر سفر کے دوران سرعام فائرنگ کر کے قانون ہاتھ میں لیا تھا۔ پولیس نے ملزمان کو قابو کرنے کے لئے جدید ٹیکنالوجی استعمال کی۔

اوٹاوا:(ایمرا نیوزآن لائن) کینیڈا کے علاقے پینٹیکن میں فائرنگ کے تین مختلف واقعات میں 4 افراد ہلاک ہوگئے جب کہ پولیس نے حملہ آور کو حراست میں لے لیا۔کینیڈین پولیس کے ایک بیان کے مطابق تین مختلف مقامات پر فائرنگ کے واقعات پیش آئے اور تمام واقعات 5 کلو میٹر کے فاصلے پر پیش آئے۔خبر رساں ایجنسی رائٹرز کے مطابق پینٹیکن میں فائرنگ کا واقعہ مقامی وقت کے مطابق صبح 10 بجکر 30 منٹ پر پیش آیا، اطلاع ملتے ہی پولیس جائے وقوعہ پر پہنچی لیکن پولیس کے پہنچنے سے قبل کچھ دوری پر ہی فائرنگ کا دوسرا واقعہ پیش آیا۔پولیس کے مطابق حملہ آور نے ایک، ایک گھنٹے کے وقفے سے فائرنگ کی تاہم فائرنگ کے تینوں واقعات ٹارگٹڈ کارروائی تھے۔پولیس نے بتایا کہ فائرنگ کی تحقیقات کےدوران 60 سالہ شخص کو گرفتار کیا گیا ہے جو تحقیقات مکمل ہونے تک حراست میں رہے گا تاہم حراست میں لیے گئے ملزم کی شناخت ظاہر نہیں کی گئی۔مقامی پولیس افسر ٹیڈ دی جیگر کا کہنا ہے کہ فائرنگ کے واقعات کی وجوہات جاننے کے لیے تحقیقات جاری ہیں، فائرنگ کے واقعات کے محرکات معلوم نہیں ہوسکے جب کہ ملزم کا مقصد بھی اب تک سامنے نہیں آسکا۔

لاہور(ایمرا نیوزآن لائن) لاہور کے علاقے ساندہ میں پنکچر لگانے والے مزدور کو صرف 20 روپے کے جھگڑے پر قتل کر دیا گیا جبکہ رائے ونڈ اور مانگا منڈی سے 2 افراد کی لاشیں ملی ہیں۔پولیس نے مقدمات درج کر کے ملزمان کی تلاش شروع کر دی ہے۔پولیس کے مطابق ساندہ میں پنکچر لگانے والے نوجوان ذوالفقار کو ایک گاہک نے 20 روپے کے جھگڑے پر فائرنگ کر کے بے دردی سے قتل کر دیا اور فرار ہو گیا۔مقتول کے بھائی فلک شیر کے مطابق 2 روز قبل مقتول ذوالفقار کا نامعلوم گاہک سے پنکچر کے پیسوں پر جھگڑا ہو اتھا۔پولیس نے مقتول کی لاش پوسٹ مارٹم کے لیے اسپتال منتقل کر کے قتل کا مقدمہ درج کر لیا اورملزم کی تلاش شروع کر دی ہے۔اُدھر رائے ونڈ میں ایک گھر سے 50 سالہ شخص صلاح الدین کی لاش برآمد ہوئی ہے۔پولیس کے مطابق مقتول گھر میں اکیلا رہتا تھا، جس کے جسم پر کوئی نشان نہیں، شبہ ہے کہ اسے زہر دے کر مارا گیا،تاہم حقائق پوسٹ مارٹم کے بعد سامنے آئیں گے۔دوسری جانب پولیس کو نواحی علاقے مانگا منڈی سے بھی ایک نا معلوم شخص کی تشدد زدہ لاش ملی ہے جس کے ہاتھ پاؤں بندھے ہوئے تھے، لاش کو پوسٹ مارٹم کے لیے ڈیڈ ہاؤس منتقل کر دیا گیا ہے۔

مہنگائی اور قرضوں کا بوجھ برداشت نہ کر سکا
ٹانک(ایمرا نیوز آن لائن) خیبرپختونخوا کے ضلع ٹانک میں شوہر نے مہنگائی اور قرضوں کے جکڑنے سے انتہائی قدم اٹھاتے ہوئے بیوی اور 4 بچوں کو قتل کر کے خود کشی کرلی ۔تفصیلات کے مطابق ٹانک کے علاقے میں ایک شوہر نے فائرنگ کر کے بیوی سمیت دو بیٹوں اور بیٹیوں کو ہلاک کر ڈالا۔ اپنی پوری فیملی کو گولیوں سے بھوننے کے بعد سفاک شخص نے خود کو بھی گولی مار کر خود کشی کر لی۔جاں بحق افراد میں حلیمہ بی بی،صوبیہ اور بیٹا سلیمان شامل ہیں۔واقعہ میں 6 افراد جاں بحق ہوئے جبکہ دو زخمی بھی ہو گئے ہیں جنہیں ڈیرہ اسماعیل خان ہسپتال منتقل کر دیا گیا ہے۔پولیس کے مطابق لاشوں کو اسپتال منتقل کر دیا گیا ہے جنہیں ضروری کارروائی کے بعد ورثا کے حوالے کر دیا جائے گا۔ پولیس کے مطابق مقتول کے پڑوسی نے بتایا کہ مقتول سید رسول پیشے کے لحاظ سے سونے کا کام کرتا تھا، جو قرضوں اور مہنگائی سے انتہائی تنگ تھا جب کہ لاکھوں کا قرضہ ادا نہ کرنے کی وجہ سے کئی دنوں سے ذہنی دباؤ کا شکار تھا۔