All posts by fayaz

لاہور(اپنے نمائندے سے)سپریم کورٹ میڈیا ورکرز کی تنخواہوں کی عدم ادائیگیوں سے متعلق کیس کی سماعت ہوئی، چیف جسٹس کی سربراہی میں تین رکنی بنچ نے کیس کی سماعت کی، سپریم کورٹ کا ”نوائے وقت “گروپ کوستمبر اور اکتوبر دو ماہ کی تنخواہیں کی ادائیگی 31 اکتوبر تک یقینی بنانے کا حکم دیدیا گیا، سپریم کورٹ نے آرڈر کیا کہ ”نوائے وقت “گروپ ہر ماہ کی سیلری دس تاریخ تک ادا کرنے کا پاپند ہوگا۔جس پر صدر ایمرا بٹ نے کہا کہ اداروں میں سیلریز مانگنے پہ ورکرز کو نکال دیا جاتا ہے۔ورکرز کے ساتھ کیے گئے معاہدے پہ عملدرآمد بھی نہیں کیا جاتا ۔متعلقہ کورٹ کو چار ماہ میں مقدمات نمٹانے کا حکم جاری کر دیتے ہیں ۔صدر ایمرا نے کہا کہ مالکان بیرون ملک دوروں پر چلے جاتے ورکرز کی ادائیگیاں نہیں کرتے ۔مالکان نے پاکستان سے باہر جائیدادیں بنا لیں ،چیف جسٹس صدر ایمرا آصف بٹ نے کہا کہ مالکان کے پاس پراپرٹی بنانے کے لیے پیسے ہیں لیکن ورکرز کو ادائیگیاں نہیں کی جاتیں ۔سپریم کورٹ کا کیپٹل ٹی وی کو ورکرز کی ادائیگیوں کے بعد چیکس کی کاپیاں فراہم کرنے کا حکم بھی جاری کر دیا۔11 نیوز کو نوٹس جاری جواب طلب، سپریم کورٹ کا بول نیوز کا ورکرز کی ادائیگیاں ایک ماہ میں یقینی بنانے کاحکم، آپ پاکستان میں واحد ہیں جو میڈیا ورکرز کی آواز بنے ہیں، آصف بٹ آپ اگر ہماری نہیں سنیں گے تو ہماری آواز کوئی نہیں سنے گا۔سپریم کورٹ کا ڈیلی ٹائمز کو ایک ہفتے میں ورکرز کی ادائیگی ادا کرنے کا حکم دیدیا گیا۔سپریم کورٹ نے کیپیٹل ٹی وی کو تین دن میں تنخواہوں کی ادائیگی کے بعد بیان حلفی جمع کروانے کا حکم بھی جاری کر دیا گیا۔ایکسپریس نیوز چینل لاہور اور اسلام آباد میں سینئرز صحافیوں کو فارغ کیا گیا ہے ۔چیف جسٹس آف پاکستان میاں ثاقب نثار نے کہا کہ بول نیوز چینل پاکستان بھر کے ملازمین کی تنخواہیں کلیئر کریں ۔سپریم کورٹ نے حکم جاری کیا کہ رائل نیوز چینل اور 7 نیوز چینل تمام ملازمین کی تنخواہیں کلیئر کرکے عدالت کو بتائیں ۔آپ نے مجھے بہت تنگ کیا ہے چیف جسٹس ثاقب نثار کا آصف بٹ سے مکالمہ، جس کا جواب دیتے ہوئے صدر ایمرا آصف بٹ نے کہا کہ سر ہم آپکے پاس نہیں آئینگے تو کدھر جائینگے؟ سر آپ پاکستان میں واحد ہیں جو میڈیا ورکرز کی آواز بنے۔سپریم کورٹ نے کہا کہ جوائنٹ ایکشن کمیٹی سپریم کورٹ میں سی ایم جمع کروادیں۔

ویلنگٹن: (نیٹ نیوز/ایمرا نیوز) نیو زی لینڈکے دارالحکومت ویلنگٹن میں انوکھے اور منفرد ملبوسات کی نمائش کی گئی جہاں دنیا بھر کے ڈیزائنرز نے آرٹ کی طرز پر بنے ملبوسات کے عالمی مقابلے میں حصہ لیا۔

ایک سے بڑھ کر ایک انو کھا لباس پہن کر ماڈلز سٹیج پر آئیں تو ایسا لگا جیسے ملبو سات نہیں بلکہ آرٹ کے چلتے پھرتے شاہکار سامنے آ گئے ہوں جنہیں بےحد پذیرائی حاصل ہوئی۔ ان ملبوسات میں ایسے ڈیزائن بھی شامل تھے جو اس سے قبل کبھی ملبوسات میں نہیں دیکھے گئےتاہم ڈیزائنرز نے عالمی مقابلے میں ان کے بل پر خوب داد سمیٹی۔

لاہور(سپورٹس ڈیسک/ایمرا نیوز) فاسٹ بولر محمد عامر کو خراب کارکردگی کی وجہ سے ایک بار پھر ڈراپ کیا جارہا ہے اور اس بار ان کی ٹی ٹوئنٹی ٹیم میں بھی جگہ مشکل دکھائی دے رہی ہے۔
آسٹریلیا کے خلاف ٹیسٹ سیریز کے بعد ٹی ٹوئنٹی سیریز میں بھی آؤٹ آف فارم محمد عامر کا ٹیم میں جگہ بنانا ناممکن دکھائی دے رہا ہے۔ ایک اور لیفٹ آرم فاسٹ بولر وہاب ریاض کو بھی ٹیم میں شامل نہیں کیا جائے گا۔
یاد رہے کہ محمد عامر پانچ سالہ پابندی ختم ہونے کے بعد سے پاکستانی ٹیم کا تینوں فارمیٹس میں مستقل حصہ رہے ہیں تاہم گزشتہ سال چیمپئنز ٹرافی کے فائنل میں بھارت کے خلاف تین وکٹوں کے شاندار اسپیل کے بعد سے ان کی کارکردگی انتہائی مایوس کن رہی ہے اور وہ آخری دس ون ڈے انٹرنیشنل میچوں میں صرف 3 وکٹیں حاصل کرنے میں کامیاب ہو سکے ہیں جبکہ آخری پانچ ون ڈے میچوں میں انہیں کوئی بھی وکٹ نہیں مل سکی ہے۔

محمد عامر اس سال آئرلینڈ اور انگلینڈ کے دورے میں بھی ٹیم میں شامل تھے لیکن ہیڈنگلے میں کھیلے گئے دوسرے اور آخری ٹیسٹ میں وہ انگلینڈ کی واحد اننگز میں 72 رنز دے کر صرف 2 وکٹیں حاصل کرنے میں کامیاب ہو سکے تھے۔
فاسٹ بولر محمد عامر کو ایشیا کپ میں بھی ناقص کارکردگی پر ٹیم سے ڈراپ کردیا گیا تھا اور اب عامر ان دنوں قائد اعظم ٹرافی کھیل رہے ہیں۔عامر کی جگہ عمید آصف اور وقاص مقصود میں سے کسی ایک کو شامل کرنے کی تجویز ہے۔ 26 سالہ محمد عامر پاکستان کی جانب سے تینوں فارمیٹ میں کھیلتے تھے لیکن ایشیا کپ کی خراب کارکردگی کے بعد عامر کو پہلے ٹیسٹ اور اب ٹی ٹوئنٹی ٹیم سے ڈراپ کیا جارہا ہے۔وہ پاکستان کی جانب سے41 ٹی ٹوئنٹی میچز کا تجربہ رکھتے ہیں۔ اسپاٹ فکسنگ اسکینڈل کے بعد پاکستان ٹیم میں واپس آنے کے بعد پہلی بار عامر کا ستارہ گردش میں ہے۔
ایک سال بعد عماد وسیم فٹ ہونے کے بعد پاکستان ٹیم میں واپس آرہے ہیں، گزشتہ سال اکتوبر میں سری لنکا کے خلاف سیریز اور پاکستان سپرلیگ میں شرکت کے بعد عماد وسیم گھٹنے کی تکلیف میں مبتلا ہوگئے تھے۔ ایشیا کپ سے قبل وہ فٹنس ٹیسٹ پاس کرنے میں ناکام رہے تھے۔ ذرائع کا کہنا ہے کہ عماد وسیم اب فٹ ہوگئے ہیں۔
بیٹسمین بابراعظم بھی ٹی ٹوئنٹی ٹیم میں شامل ہوں گے۔ بابر اعظم اور عماد وسیم زمبابوے کے خلاف جولائی میں ہونے والی ٹی ٹوئنٹی سیریز میں پاکستان ٹیم کا حصہ نہیں تھے۔فاسٹ بولر وہاب ریاض کا دبئی ٹیسٹ کی دونوں اننگز میں مایوس کن بولنگ کارکردگی کے بعد پاکستان کی ٹی ٹوئنٹی ٹیم میں جگہ برقرار رکھنا مشکل ہوگیا ہے۔ تاہم آل راونڈر عماد وسیم کو محمد نواز کی جگہ پاکستان ٹیم میں شامل کیا جارہا ہے۔پاکستان اے کی نمائندگی کرنے والے چار کھلاڑیوں آصف علی، حسین طلعت، صاحبزادہ فرحان اور شاہین شاہ آفریدی کو آسٹریلیا کے خلاف تین ٹی ٹوئنٹی میچوں کی سیریز میں پاکستان ٹیم میں شامل کیا جارہا ہے۔وہاب ریاض نے دبئی ٹیسٹ کی پہلی اننگز میں39 اور دوسری اننگز میں 42 رنز دیئے تھے۔ ذرائع کا کہنا ہے کہ وہاب ریاض اور عثمان صلاح الدین ابوظہبی ٹیسٹ کے دوسرے دن کے بعد لاہور کے لیے روانہ ہوگئے ہیں۔
پاکستان اور آسٹریلیا کا پہلا ٹی ٹوئنٹی میچ بدھ کوشیخ زاید اسٹیڈیم ابوظہبی میں کھیلا جائے گا۔ پاکستان کی ٹی ٹوئنٹی ٹیم ان کھلاڑیوں پر مشتمل ہوگی۔ سرفراز احمد (کپتان)، بابر اعظم، فخر زمان، محمد حفیظ، عماد وسیم، حارث سہیل، شعیب ملک، آصف علی، حسین طلعت، صاحبزادہ فرحان، شاہین شاہ آفریدی، عثمان خان شنواری، فہیم اشرف، حسن علی، شاداب خان اور عمید آصف

لاہور(نیٹ نیوز/ایمرا نیوز) زندگی کے ہر شعبے میں خواتین کا یکساں کردار اور نمائندگی ایک ترقی یافتہ ملک کی نشانی سمجھی جاتی ہے۔ پاکستان میں بھی خواتین ہر شعبے میں اپنے آپ کو منوا رہی ہیں، ایسی ہی ایک خاتون عظمیٰ نواز بھی ہیں، جنہیں پاکستان کی پہلی خاتون مکینک ہونے کا اعزاز حاصل ہے۔
24 سالہ عظمیٰ نواز نے مکینیکل انجینئرنگ کی تعلیم حاصل کر رکھی ہے۔

ان کا تعلق ملتان کے چھوٹے سے گاؤں دنیا پور سے ہے جنہوں نے غربت اور مفلسی کو شکست دیتے ہوئے اپنی تعلیم مکمل کی۔انہوں نے اپنے خاندان کی مالی حالت بہتر بنانے کے لیے فرسودہ خیالات کے برعکس جاکر اسے ایک چیلنج کے طور پر لیا۔
عظمیٰ نواز تعلیم مکمل کرنے کے بعد ایک برس سے ملتان میں ٹویوٹا ڈیلر شپ کمپنی میں کام کر رہی ہیں، جہاں ان کے سب مرد ساتھی ان کی ہمت، حوصلے اور عزم کو قابل ستائش قرار دیتے ہیں۔وہ گیراج میں گاڑی کے پرزے ٹھیک کرنے سے لے کر گاڑی کے ٹائرز تبدیل کرنے اور بھاری آلات اٹھا کر کام کرنے میں بھی کبھی نہیں ہچکچاتیں۔عظمیٰ بتاتی ہیں کہ جب وہ گیراج میں کام کرتی ہیں تو لوگ انہیں دیکھ کر حیران رہ جاتے ہیں۔ ان کے والد محمد نواز کا کہنا ہے کہ ’ہمارے معاشرے میں گیراج میں لڑکیوں کا کام کرنا ضروری نہیں، لیکن یہ عظمیٰ کا شوق تھا۔ وہ مشینوں کے ساتھ بہت لگن سے کام کرتی ہے جسے دیکھ کر بہت خوشی ہوتی ہے‘۔

چلی:(نیٹ نیوز/ایمرا نیوز) فلکیات، کائنات کے ماضی میں جھانکنے کا دوسرا نام بھی ہے۔ اب ماہرین نے انکشاف کیا ہے کہ انہوں نے قدیم کائنات میں ایک جگہ اتنی بڑی ساخت دریافت کی ہے جو اب تک ہماری معلومات کے لحاظ سے اجرامِ فلکی کا سب سے بڑا ابتدائی جھرمٹ (پروٹو سپر کلسٹر) بھی ہے۔اگرچہ اس طرح کے کسی جھرمٹ کو فلکیات کی زبان میں ’’جھرمٹوں کا جھرمٹ‘‘ (سپر کلسٹر) کہا جاتا ہے لیکن بگ بینگ کے بعد، کائنات کی پیدائش کے صرف دو ارب تیس کروڑ سال بعد بننے والے اس جھرمٹ کو ’’پروٹو کلسٹر‘‘ کہا جائے تو درست ہوگا۔ تاہم ماہرین نے دیگر آسمانی اجرام کی طرح اسے بھی یونانی دیوتا ہائپیریئن کا نام دیا ہے جو ایک بہت بڑے دیوتا کی اولاد تھا۔ماہرین کے مطابق ہائپیریئن کی کمیت چکرا دینے والی ہے جس میں کروڑوں نوری سال پر پھیلی ہوئی ہزاروں بہت بڑی کہکشائیں اور ان کے اجسام دیکھے گئے ہیں۔ ماہرین کے مطابق اسے جان کر ابتدائی کائنات میں ستاروں، کہکشاؤں اور سیاروں کے ارتقا کو اچھی طرح سمجھا جاسکتا ہے۔

ماہرینِ فلکیات کی بین الاقوامی ٹیم نے پرانے ڈیٹا اور نئے مشاہدوں کی بدولت اسے دریافت کیا ہے۔ ڈیٹا کا اہم حصہ یورپی سدرن آبزرویٹری کے ویری لارج ٹیلی اسکوپ پر نصب ایک خاص آلے سے حاصل کیا گیا ہے جسے وزیبل ملٹی آبجیکٹ اسپیکٹروگراف (وی آئی ایم او ایس) کا نام دیا گیا ہے۔ یہ رصدگاہ چلی میں واقع ہے۔وائموس دور دراز کہکشاؤں کی روشنی کو طیف (اسپیکٹرم) میں دکھاتا ہے اور ہر شے کو روشنی کے ایک فنگرپرنٹ کی صورت میں ظاہر کرتا ہے۔ اسے دیکھ کر ماہرین اجسام کی ساخت، کیفیت اور دیگر تفصیلات معلوم کرتے ہیں۔ ماہرین نے جب اس کا مطالعہ کیا تو حیران رہ گئے ۔ہائپیریئن میں 10 ہزار سے زائد کہکشائیں ہیں اور ان میں کمیت (ماس) بہت زیادہ مقدار میں موجود ہے جو ہموار انداز کے بجائے کہیں کم اور کہیں زیادہ ہے۔واضح رہے کہ ہائپیریئن پروٹو سپر کلسٹر کا یہ منظر آج سے تقریباً 11 ارب 40 کروڑ سال پہلے کا ہے یعنی آج اس کا کوئی وجود نہیں۔ البتہ، ہم اس کی وہ روشنی ہی دیکھ پا رہے ہیں جو لگ بھگ ساڑھے گیارہ ارب سال پہلے وہاں سے چلی تھی۔

رسالپور: (نیٹ نیوز/ایمرا نیوز) صدر مملکت ڈاکٹر عارف علوی کا کہنا ہے کہ پاک افواج کسی بھی چیلنج سے نمٹنے کی صلاحیت رکھتی ہیں، پاکستان کو اندرونی اور بیرونی چیلنجز کا سامنا ہے، پاکستان نے دنیا میں امن کیلئے اہم کردار ادا کیا ہے، عالمی برادری کے ساتھ برابری کی سطح پر تعلقات چاہتے ہیں۔صدر مملکت عارف علوی نے تقریب سے خطاب کرتے ہوئے کہا تمام پاس آؤٹ کیڈٹس کو کامیابی پر مبارکباد پیش کرتا ہوں، ملکی کی ترقی کیلئے کیڈٹس کو تمام صلاحتیں بروئے کار لانی ہوں گی، فورسز کی تمام ضروریات پوری کی جائیں گی، انکو جدید ٹیکنالوجی سے آراستہ کرنے کیلئے ہر اقدام کیا جائے گا۔ انہوں نے کہا کیڈٹس کی بہترین صلاحیتوں کا اظہار اعلیٰ تربیت کا مظہر ہے، ہر حال میں پیشہ ورانہ ذمہ داریوں کی بہترین انجام دہی آپ کا فرض ہے۔قبل ازیں رسالپور پی اے ایف اکیڈمی اصغر خان میں کیڈٹس کی پاسنگ آؤٹ پریڈ ہوئی جس میں صدر مملکت ڈاکٹر عارف علوی نے بطور مہمان خصوصی شرکت کی، ائیرچیف مجاہد انور خان نے صدر مملکت کا استقبال کیا۔تقریب میں کیڈٹس کی جانب سے قومی ترانہ پڑھا گیا، پاسنگ آؤٹ پریڈ میں 140 جی ڈی پائلٹ، 86 انجینرنگ کیڈٹس شامل تھے، پریڈ میں 96 ائیر ڈیفنس اور 21 ایڈمن کورس کے کیڈٹس بھی شریک ہوئے، سعودی سفیر نواف المالکی نے بھی تقریب میں شرکت کی۔

اسلام آباد:(نیٹ نیوز/ایمرا نیوز) سپریم کورٹ نے تھرکول منصوبے میں گیسی فکیشن سے بجلی پیدا کرنے کے منصوبے کی تحقیقات نیب کے سپرد کردیں۔چیف جسٹس پاکستان جسٹس میاں ثاقب نثار نے تھرکول پاور پراجیکٹ سے متعلق کیس کی سماعت کی، منصوبے کے چیئرمین ڈاکٹر ثمر مبارک مند بھی عدالت میں پیش ہوئے۔
عدالت نے آڈیٹر جنرل کو تھرکول منصوبے کا فارنزک آڈٹ کا حکم دیتے ہوئے 15 دن کے اندر رپورٹ طلب کرلی اور چیف سیکرٹری سندھ کو ہدایت کی کہ منصوبے سے متعلق اشیاء قبضے میں لیں۔
سماعت کے دوران چیف جسٹس نے کہا دیکھا جائے اس منصوبے میں کرپشن تو نہیں ہوئی۔
عدالتی معاون سلمان اکرم راجا نے عدالت کو بتایا کہ منصوبے کی فزیبیلٹی رپورٹ واضح نہیں ہے، 30 سال تک 10 ہزار میگاواٹ بجلی کا کہا گیا تھا، ماہرین کے مطابق منصوبے سے زیر زمین پانی کم ہوگا اور اس سے ماحولیات پر بھی برا اثر پڑے گا۔سلمان اکرم راجا نے بتایا ایک کمیٹی نے کہا ہے کہ یہ ناکام منصوبہ ہے مزید رقم نہیں دینی چاہیئے، ثمر مبارک کے منصوبے کی منظوری دینے والوں کو بھی دیکھنا چاہیے تھا۔اس موقع پر چیف جسٹس نے کہا ‘پہلی بار احساس ہوا کہ ارب کیا ہوتا ہے، اربوں روپے درخت کے پتوں کی طرح اڑا دیے گئے، 3.8 ملین تو اس منصوبے پر لگ چکے ہیں، اس کا کون ذمہ دار ہے اور کیا ڈاکٹر ثمر مبارک مند نے یہ پیسے دینے ہیں’۔چیف جسٹس نے عدالتی معاون سے استفسار کیا کہاں گئے ڈاکٹر ثمرمبارک مند کے وہ دعوے، کیا اس معاملے کو ایف آئی اے کو نہ بھیج دیں، یا اس کی نئے سرے سے تحقیقات کرائی جائے۔
چیف جسٹس نے کہا منصوبے پر بہت شور مچایا گیا کہ میں نے ایسا کام کردیا جو آج تک کسی سائنسدان نے نہیں کیا، 100 میگا واٹ منصوبے سے 3 میگا واٹ بجلی بھی نہیں آرہی۔چیف جسٹس نے کہا پاکستان غریب ملک ہے کیا اس کا پیسہ ایسے ضائع کرنا ہے، تھرکول گیسیفیکیشن سے بجلی بنانے کے دو طریقے ہیں، ایک کوئلہ نکال کر بجلی پیدا کی جاتی ہے، دوسرا وہ جو بندر گاہوں پر پلانٹ لگائے ہیں۔نیب پراسیکیوٹر اصغر حیدر نے عدالت میں منصوبے سے متعلق رپورٹ پیش کی اور کہا کہ انجینئیرز کے مطابق زیر زمین گیسیفیکیشن سے بجلی بنانا ممکن نہیں۔عدالتی معاونین سلمان اکرم راجا اور شہزاد الہی نے بھی اپنی تجاویز جمع کرائیں جس پر چیف جسٹس نے کہا کہ وفاقی اور سندھ حکومت کی کیا پوزیشن ہے۔ایڈووکیٹ جنرل سندھ نے عدالت کو بتایا اس منصوبے کا سارا پیسہ وفاقی حکومت نے دیا جب کہ زمین سندھ حکومت کی ہے۔عدالت کے موجود منصوبے کے چیئرمین ڈاکٹر ثمر مبارک مند نے کہا کہ اس منصوبے میں کوئی ماحولیاتی آلودگی نہیں ہوئی، آسٹریلیا کی ایک کمپنی بھی زیر زمین گیسی فکیشن کر رہی تھی، وکیل اس منصوبے کے بارے میں نہیں بتا سکتے۔ چیف جسٹس نے ڈاکٹر ثمر سے مکالمے کے دوران کہا مجھے پتا تھا آپ یہی کہیں گے، جب ثمر مبارک نے دعوے کیے تو رومانس ہوگیا، کہا گیا کہ مفت بجلی ملے گی لیکن خزانے کو 4 ارب کا نقصان کردیا گیا۔

لاہور(اپنے نمائندے سے)ڈی سی کیپٹن (ر) انوار الحق کے احکامات پر اسسٹنٹ کمشنرز ان ایکشن، تجاوزات و قبضہ مافیا کے خلا ف شہر میں 5آپریشنز، مجموعی طور پر ایک ارب 58کروڑ مالیت کی 6سو 73کنال سرکاری اراضی کو واگذار کروایا گیا۔ آپریشن کے دوران دکانوں، حویلیوں، ڈیروں، ٹیوب ویل اور پختہ سٹرکچرز کو مسمار کر دیا گیا۔ پہلا آپریشن اے سی سٹی صفدر ورک کی نگرانی میں موضع بیگم کورٹ، فرخ آباد میں کیا گیا جہاں سے سرکاری 104 کنال زمین واگذار کروایا گیا جس کی مالیت 10کروڑ روپے ہے۔ آپریشن کے دوران زمین پر ٹریکٹر چلا یا گیا اور ٹیوب ویل اکھاڑدیا گیا، اسی طرح اے سی سٹی صفدر ورک نے ہنجر وال ملتان روڈ پر سرکاری زمین کی واگزاری کے لئے آپریشن کیا اور 86 کروڑ مالیت کی 12کنال 5مرلے سرکاری کمرشل اراضی کو قبضہ مافیا سے واگذار کروایا۔ دوسری جانب ضلعی انتظامیہ نے تحصیل رائیونڈ کے موضع بھائی کوٹ میں دو مقامات سے18کنال 6مرلے سرکاری زمین کو واگزار کروا لیا گیا۔ آپریشن کی نگرانی اے سی رائیونڈ عاصم سلیم نے کی۔ دونوں مقامات سے واگزار کروائی گئی زمین کی مالیت 2کروڑ روپے ہے۔ ضلعی انتظامیہ نے موضع ایچوگل میں سرکار کی 400 کنال اراضی واگزار کروائی اس آپریشن کی نگرانی اے سی شالیمار ظہیر لیاقت نے کی۔ اراضی کی قیمت 40کروڑ روپے ہے۔ آخری آپریشن تھیلہ گلہ میں کیا گیا۔ آپریشن کی نگرانی اے سی کینٹ حیدر عباس وٹو نے کی۔ آپریشن میں140 کنال سرکاری اراضی کو واگزار کروایا گیا جس کی مالیت 20کروڑ روپے ہے۔ ہنجر وال میں کئے جانے والے آپریشن میں ضلعی انتظامیہ سمیت زون انتظامیہ، پولیس کی نفری اور محکمہ اوقاف کی افسران بھی شریک تھے۔ ای سی سٹی صفدر کی سربراہی میں تجاوزات کے خلاف آپریشن کیا گیا۔12کنال 5مرلے جگہ پر غیر قانونی طور پر دوکانیں بنائی گئی تھیں۔ یہ تمام جگہ محکمہ اوقاف کی ہے۔ اس کمرشل جگہ کی قیمت 35لاکھ روپے فی مرلہ ہے۔ ایل ڈی اے کی ناقص آپریشن پلاننگ کی وجہ سے تاجپورہ میں قبضہ مافیا کی مزاحمت پر آپریشن ملتوی کر دیا،پولیس کی بھاری نفری اور سرکاری مشینری کو تین گھنٹے روکنے کے بعد واپسی کی راہ دکھا دی، مظاہرین نے ٹائر جلا کر سڑک بلا ک کر دی۔ ریلوے پولیس کا تاج باغ ہربنس پورہ کے علاقے میں ریلوے اراضی پر تجاوزات کے خلاف آپریشن سے متاثرین کی جانب مزاحمت کا سامنا کرنا پڑا۔ ایس پی ریلوے لاہور ڈویژن ملک عتیق کا کہنا تھا کہ آئی جی ریلوے کی ہدایت پر ریلوے اراضی کو بلا امتیاز واگزار کروا رہے ہیں۔

لاہور(نیٹ نیوز) گرین پنجاب مہم کے تحت انتظامیہ کی جانب سے آپریشن جاری، چھانگا مانگا میں غیر قانونی طور پر قائم 338 باڑوں کو ختم کر دیا گیا۔ کمشنر ڈاکٹر مجتبی پراچہ کہتے ہیں 157 کنال سرکاری اراضی کو واگزار کرا لیا گیا۔ جبکہ غیر قانونی باڑوں میں دو ہزار ایک سو 55 بھینسیں رکھی گئی تھیں۔ جنہیں وہاں سے نکال دیا گیا ہے۔

لاہور(نیٹ نیوز) ماہیک فاؤنڈیشن کے زیر اہتمام الحمرا آرٹ گیلری میں پینٹنگز کی نمائش ۔ آرٹسٹ زیب النسا کے گلاس ورک کے فن پاروں کو خوب پسند کیا گیا ۔ماہیک فاؤنڈیشن نے الحمرا آرٹ گیلری میں سجائی خوبصورت پینٹنگز کی نمائش ۔آرٹسٹ زیب النسا اپنے فن پاروں میں معاشرے کے مختلف پہلوؤں کی عکاسی کی ۔آرٹسٹ نے خوبصورت پینٹنگز کے ذریعے پاکستانی ثقافت کے ساتھ ساتھ اپنی ذات کی اداسی اور خوشی کو خوبصورت انداز میں پیش کیا ہے ۔آرٹ کے دالدادہ افراد نے مختلف رنگوں سے سجی خوبصورت نمائش کو خوب سراہا۔آرٹسٹ نے پینٹنگز میں آئل پینٹ ، فائبر گلاس، سٹونز اور پرلز کا خوبصورتی کے ساتھ استعمال کیا ہے۔