All posts by fayaz

لاہور(نیٹ نیوز) نواز شریف، مریم نواز اور کیپٹن(ر) صفدر کا نام ای سی ایل سے نکالنے کا معاملہ، ای سی ایل سے نام نکالنے کے لیے متفرق درخواست دائر۔ درخواست ایڈووکیٹ عامر ظہیر نے دائر کی۔ درخواست میں موقف اختیار کیا گیا تھا کہ نواز شریف، مریم نواز اور کیپٹن(ر) صفدر کا نام ای سی ایل میں خلاف قانون میں ڈالا گیا تھا۔ یہ درخواست عدالت نے منظور کرتے ہوئے وزارت داخلہ سے اس کے حکم نامے کی کاپی عدالت میں جمع کروانی کی ہدایت کی۔

لاہور(نیٹ نیوز) جسٹس شاہد جمیل خان کہتے ہیں وکلا کے بغیر جوڈیشل سسٹم مکمل نہیں ہوتا۔ ان کے ہاتھ میں ہی اس پیشے کی عزت ہے۔ کوئی ایسا کام نہ کریں جس پر وکلاء گردی کا لفظ استعمال کرنا پڑے۔ لاہور ہائیکورٹ بار میں لیگل ایجوکیشن اور اے ڈی آر سے متعلق سیمینار۔ جسٹس شاہد جمیل خان کی بطور مہمان خصوصی شرکت۔ ان کا کہنا تھا کہ وکیل ٹھیکیدار نہیں ہوتے ،انہیں قانون سے مکمل آگاہی ہونی چاہیے۔ وکلاء کے ہاتھ میں ہی پیشے کی عزت ہے۔ ایسا کام نہ کریں جس پر وکلاء گردی کا لفظ استعمال کرنا پڑے۔ جسٹس شاہد جمیل کا مزید کہنا تھا کہ کوئی بھی جج وکیل کے بغیر فیصلے نہیں دے سکتا۔ وکیل کی اچھی معاونت سے اچھے فیصلے آئیں گے ۔ کراچی شہداء ہال میں ہونے والے سیمینار میں چیئرمین لیگل ایجوکیشن اینڈ اے ڈی آر کمیٹی حسیب اللہ خان، وکلاء عہدیداروں نے بھرپور شرکت کی۔

ممبئی(نیٹ نیوز/ایمرا نیوز) بھارتی شوبز انڈسٹری سے تعلق رکھنے والی ماڈل پوجا مشرا نے بالی ووڈ کے سلطان سلمان خان اوران کے بھائیوں پر زیادتی کا الزام لگادیا۔بالی ووڈ میں ان دنوں جہاں خواتین”می ٹو“مہم کے تحت اپنے ساتھ ہونے والے ہراسانی کے واقعات کے بارے میں بتارہی ہیں وہیں بگ باس کی سابق کنٹیسٹنٹ اور ماڈل گرل پوجا مشرا نے بھی اپنی”می ٹو“ کہانی بتاتے ہوئے کہا ہے کہ بالی ووڈ کے دبنگ اداکار سلمان خان اور ان کے دونوں بھائیوں ارباز اور سہیل خان نے کئی مواقعوں پر انہیں جنسی زیادتی کا نشانہ بنایا۔میڈیا رپورٹس کے مطابق پوجا مشرا کا کہنا ہے کہ سلمان اور

ان کے بھائیوں نے انہیں اس وقت زیادتی کانشانہ بنایا جب وہ سلطان کی شوٹنگ کے دوران بے ہوش ہوگئی تھیں۔ تاہم انہوں نے یہ نہیں بتایا کہ وہ اس وقت وہاں کیا کررہی تھیں۔پوجا مشرا کی جانب سے لگائے جانے والے الزامات پر فی الحال تو سلمان خان کا کوئی ردعمل سامنے نہیں ا?یا ہے تاہم سوشل میڈیا صارفین نے پوجا کے ان الزامات کو شہرت حاصل کرنے کا ہتھکنڈا قراردیتے ہوئے کہا ہے کہ پوجا مشرا ”می ٹو“ کا غلط استعمال کررہی ہیں۔

(شوبز ڈیسک/ایمرا نیوز) بالی وڈ کے دبنگ اداکار سلمان خان نے جہاں متعدد اداکاروں کو فلم نگری میں متعارف کروا کر مقبول کروایا، وہیں معروف ہدایت کار کرن جوہر کی پہلی فلم ’کچھ کچھ ہوتا ہے‘ کو کامیاب بنانے کے پیچھے بھی ان کا اہم کردار ہے۔

حال ہی میں کرن جوہر کی ہدایت کاری میں بننے والی پہلی سپر ہٹ فلم ’کچھ کچھ ہوتا ہے‘ کو بنے 20 برس مکمل ہوئے جس کے لیے کرن جوہر نے خصوصی تقریب کا بھی اہتمام کیا تھا۔اس موقع پر فلم میں اہم کردار نبھانے والے شاہ رخ خان، کاجول اور رانی مکھرجی سمیت متعدد بالی وڈ ستاروں نے شرکت کی جب کہ فلم میں معاون کردار نبھانے والے سلمان خان نے اپنے ویڈیو پیغام میں کرن جوہر اور فلم کی ٹیم کو مبارکباد پیش کی۔اس دوران سلمان خان نے انکشاف کیا کہ وہ اس فلم کے لیے تیار نہیں تھے تاہم اپنی بہن الویرا کی وجہ سے انہوں نے رضامندی ظاہر کی۔

انہوں نے بتایا کہ کرن جوہر نے ان کی بہن سے ملاقات کی اور کہا کہ میری پہلی فلم ہے جس میں فلم کی کاسٹ مکمل ہے لیکن کوئی بھی امن کے کردار کو کرنے کے لیے تیار نہیں ہورہا کیونکہ یہ مختصر کردار ہے۔
بعدازاں الویرا نے سلمان خان کو کہا کہ کرن جوہر فلم نگری میں نئے ہیں، کوئی امن کے کردار کے لیے راضی نہیں ہے، ان کی مدد کرنی چاہیے کیونکہ وہ ایک اچھے انسان ہیں۔جس پر سلمان خان نے اپنی بہن کی بات کو مانتے ہوئے کرن جوہر سے ملاقات کی اور امن کے کردار کے لیے راضی ہوگئے جو اگرچہ مختصر تھا لیکن فلم بینوں کی جانب سے سب سے زیادہ پسند کیا گیا۔ویڈیو پیغام میں دبنگ خان نے کرن جوہر کے ساتھ ایک بار پھر کام کرنے کی خواہش کا اظہار بھی کیا اور ان کے کام کو قابل ستائش قرار دیا۔

یوگینڈا:(نیٹ نیوز/ایمرا نیوز) افریقہ میں ایک خاتون کی عمر 40 برس ہے لیکن اب تک وہ 44 بچوں کو جنم دے چکی ہیں جن میں سے 38 بچے اب تک زندہ ہیں۔مریم نبٹانزی کا تعلق یوگنڈا کے ایک گاؤں کاممبری سے ہے۔ انہیں مقامی زبان میں نالونگو مزالا بانا بھی کہا جاتا ہے جس کا مطلب ہے چار بچوں کو جنم دینے والی جڑواں ماں۔ پہلی مرتبہ وہ 13 سال کی عمر میں ماں بنیں اور لگاتار 40 برس کی عمر تک ہر سال حاملہ رہی ہیں۔اس دوران انہوں نے چھ مرتبہ جڑواں بچوں کو جنم دیا، چار مرتبہ ان کے بطن سے ایک ساتھ تین تین بچوں نے دنیا میں آنکھ کھولی جبکہ تین مرتبہ انہوں نے بہ یک وقت چار بچوں کو جنم دیا۔ اس طرح بہت کم مرتبہ انہوں نے ایک وقت میں ایک بچے کو جنم دیا۔

مریم اب اکیلی ماں کی حیثیت سے ان کی پرورش کررہی ہیں اور ان کے لیے سارے بچوں کو کھلانا اور پرورش کرنا بہت مشکل کام ہے۔ تاہم ان کی زندگی کی کہانی بہت عجیب وغریب اورافسوسناک بھی ہے۔
مریم کی شادی اس وقت ایک 28 سالہ شخص سے ہوئی جب وہ خود 12 برس کی تھیں۔ پھر 13 برس کی عمر میں انہوں نے دو بچوں کو جنم دیا۔ دو سال بعد اس نے ایک ساتھ تین بچوں کو جنم دیا اور اس کے دو برس بعد چار بچے ایک ساتھ دنیا میں آئے۔ مریم کے والد کے بھی 45 بچے تھے جو کئی خواتین سے پیدا ہوئے تھے۔اسی بنیاد پر یوگنڈا کے جینیاتی ماہر کہتے ہیں کہ مریم کی زرخیزی کی وجہ جینیاتی ہے کیونکہ ان کا بیضہ ایک وقت میں کئی حصوں میں تقسیم ہوکر ایک سے زائد اولاد کی وجہ بنتا ہے۔ اگرچہ مریم چھ بچوں کی خواہش رکھتی تھیں لیکن عجیب بات یہ ہے کہ چھٹی بار حمل ٹھہرنے کے بعد تک وہ 18 بچوں کی ماں بن چکی تھیں۔ اس کےبعد جب انہوں نے مزید بچوں کی پیدائش روکنے کے لیے ڈاکٹروں سے رجوع کیا تو ڈاکٹروں نے یہ کہہ کر منع کردیا کہ اس مداخلت سے انہیں نقصان ہوسکتا ہے یہاں تک کہ وہ مربھی سکتی ہیں۔

اس کے بعد 23 سال کی عمر تک مریم 25 بچوں کی ماں بن چکی تھی۔ اس بار وہ دوبارہ ہسپتال گئیں تاکہ مزید بچوں کی پیدائش کو روکا جاسکے۔ اس بار بھی ڈاکٹروں نے کہا کہ ان کے پاس ایسا کوئی طریقہ نہیں جو خواتین کو حاملہ ہونے سے روک سکے۔ اس کے بعد آخری مرتبہ انہوں نے دسمبر 2016 میں اپنے 44 ویں بچے کو جنم دیا۔اب وہ تنہا 38 بچوں کی پرورش کررہی ہیں کیونکہ ان کے شوہر کبھی کبھار ہی گھر آتے ہیں اوربرسوں سے بچوں نے اپنے والد کو نہیں دیکھا ہے۔ اس کی وجہ یہ ہے کہ مریم کے شوہر کی کئی بیویاں ہیں اور وہ ان کے پاس خوش ہے۔ بسا اوقات وہ سال میں ایک مرتبہ اپنے شوہر کی صورت دیکھ پاتی ہیں۔شوہر مریم پر شدید تشدد بھی کرتا ہے اور اکثر شراب کے نشے میں ہوتا ہے۔ مریم کو اپنے بچوں کےلیے روزانہ 10 کلو آٹا، چار کلو شکراور صابن کی تین ٹکیاں درکار ہوتی ہیں۔ حال ہی میں مریم کےلیے انٹرنیٹ پر چندے کی مہم چلائی گئی تو اس میں 10 ہزار ڈالر کی رقم جمع ہوئی جس کے بعد مریم اب قدرے پرسکون انداز میں اپنے بچوں کی کفالت کررہی ہیں۔

لاہور:(شوبز ڈیسک/ایمرا نیوز) گلوکارہ میشا شفیع نے علی ظفر پر جنسی ہراسانی کے اپنے موقف پر قائم رہتے ہوئے کہا ہے کہ علی ظفر عدالت میں معصوم بننے کی کوشش کررہا ہے۔لاہور کی سیشن کورٹ میں گلوکار علی ظفر کی میشا شفیع کے خلاف ہتک عزت کے دعوی کی سماعت ہوئی، میشا شفیع نے محمد ثاقب جیلانی اور تصور ایڈووکیٹ کی وساطت سے جواب جمع کرایا، انہوں نے کہا مجبور ہو کر علی ظفر کے خلاف قدم اٹھایا، علی ظفر اپنی حرکتوں سے باز نہیں آرہا تھا۔ علی ظفر نے مجھے نجی اسٹوڈیو اور فیملی فنکشنز میں دو بار سے زائد ہراساں کیا۔

میشا شفیع نے علی ظفر پر ہراسانی کے اپنے موقف پر قائم رہتے ہوئے کہا کہ علی ظفر نے مجھ سمیت متعدد خاتون اداکاراؤں کو ہراساں کیا، عدالت کے مانگنے پر ثبوت بھی فراہم کروں گی، میشا شیفع نے علی ظفر کے تمام الزامات کو مسترد کرتے ہوئے کہا علی ظفر عدالت میں معصوم بننے کی کوشش کررہا ہے۔میشا شفیع نے عدالت سے اپنے خلاف ہونے والے دعوی کو مسترد کرنے کی بھی استدعا کی۔ بعد ازاں عدالت نے کارروائی کرتے ہوئے فریقین کے وکلاء کو بحث کے لیے آئندہ سماعت پر طلب کرلیا۔
واضح رہے کہ گلوکارہ میشا شفیع نے علی ظفر پر جنسی ہراسانی کا الزام عائد کرتے ہوئے کہا تھا کہ علی ظفر نے انہیں ایک بار نہیں کئی بار ہراساں کیا، جس کے جواب میں علی ظفر نے میشا شفیع کے الزامات کو بے بنیاد قراردیتے ہوئے انہیں ایک ارب ہرجانے کا نوٹس بھجوایاتھا۔

لندن:(نیٹ نیوز/ایمرا نیوز) پاکستانی نژاد امریکی ارب پتی تاجر شاہد خان نے انگلش فٹبال ایسوسی ایشن کے اندرونی اختلافات کے بعد تاریخی ویمبلے اسٹیڈیم کی خریداری سے معذرت کرلی۔لندن کے تاریخی ویمبلے اسٹیڈیم کی خریداری کے لیے شاہد خان نے 600 ملین پاؤنڈ کی آفر کی تھی جب کہ فٹبال ایسوسی ایشن اور شاہد خان کے درمیان 900 ملین پاؤنڈ پر معاملات طے پاگئے تھے۔بعض حلقوں نے اسٹیڈیم کی فروخت پر فٹبال ایسوسی ایشن کو شدید تنقید کا نشانہ بنایا جب کہ ایسوسی ایشن کے بعض افراد بھی اسٹیڈیم کی فروخت پر تقسیم کا شکار تھے۔فٹبال ایسوسی ایشن کی گورننگ کونسل کی گزشتہ ہفتے ہونے والی میٹنگ کے بعد شاہد خان نے اسٹیڈیم کی خریداری سے معذرت کی، میٹنگ کے دوران فیصلہ کیا گیا تھا کہ اسٹیڈیم کی فروخت کا کلی اختیار فٹبال ایسوسی ایشن کے پاس نہیں اور اسٹیڈیم کی جو قیمت لگائی گئی اس پر اسے فروخت نہیں کیا جاسکتا۔انگلش فٹبال ایسوسی ایشن کی گورننگ باڈی نے ویمبلے اسٹیڈیم کی خریداری کے معاملے میں ‘منظم کرپشن’ کی تحقیقات بھی شروع کر رکھی ہے۔

فٹبال ایسوسی ایشن کے سینئر حکام اسٹیڈیم کی خریداری کے بعد حاصل ہونے والی رقم کو نچلی سطح پر فٹبال پر لگانا چاہتے تھے۔دوسری جانب شاہد خان کا کہنا ہے کہ وہ انگلش فٹبال کے ذریعے لوگوں کو قریب لانا چاہتے ہیں نہ کہ ان میں دوریاں پیدا کریں اور فی الحال اسٹیڈیم کی خریداری سے معذرت چاہتا ہوں۔
شاہد خان نے عزم کا اظہار کیا کہ فٹبال ایسوسی ایشن جب اسٹیڈیم کی فروخت پر متفق ہوجائے گی تو اس کی نئی قیمت لگائی جائے گی، ویمبلے اسٹیڈیم قومی خزانہ ہے اور اس کا احترام کرتا ہوں۔
واضح رہے کہ ویمبلے اسٹیڈیم کو برطانیہ میں تاریخی حیثیت حاصل ہے جہاں 1920 سے میچز کھیلے جارہے ہیں اور اس کی فروخت کی خبریں آنے کے بعد برطانوی حکومت کی جانب سے بھی شدید تنقید کی گئی تھی۔
شاہد خان کون ہیں ؟
شاہد خان کا تعلق لاہور کے مڈل کلاس گھرانے سے ہے اور اُن کی والدہ ریاضی کی پروفیسر تھیں۔
شاہد خان 1967 میں 16 سال کی عمر میں امریکا گئے جہاں انہوں نے تعلیم حاصل کرنے کے ساتھ ہوٹل پر ملازمت بھی کی اور ساتھ ہی یو آئی یو سی کالج آف انجینئرنگ سے بی ایس انڈسٹریل انجینئرنگ کی ڈگری حاصل کی۔
شاہد خان نے 1991 میں امریکا کی شہریت حاصل کی اور انہیں 1999 میں میکینکل سائنس اینڈ انجینئرنگ کے اعزاز سے نوازا گیا۔شاہد خان گاڑیوں کے پرزے بنانے والی کمپنی فلیکس این گیٹ کے مالک ہیں اس کے علاوہ وہ نیشنل فٹبال لیگ (این ایف ایل) میں جیکسن ویلے جاگور اور برطانیہ کی فٹبال لیگ چیمپئن شپ میں فلہام ایف سی ٹیم کے مالک ہیں
اگست 2017 میں شاہد خان کے اثاثوں کی مالیت 8.7 بلین ڈالر تھی اور فاربز نے امریکا کے 400 امیر ترین افراد نے انہیں 70ویں درجے پر رکھا تھا جب کہ شاہد خان دنیا کے امیر ترین افراد میں 158واں نمبر رکھتے ہیں۔

اسلام آباد:(نیٹ نیوز/ایمرا نیوز) وزیراعظم عمران خان کی زیر صدارت وفاقی کابینہ کا اجلاس آج ہوگا۔
ذرائع کے مطابق اجلاس میں حکومتی کارکردگی کا جائزہ لیا جائے گا اور وزیر خزانہ اسد عمر ملک کی معاشی و اقتصادی صورت حال سمیت آئی ایم ایف سے مذاکرات کے بارے میں کابینہ کو اعتماد میں لیں گے۔
واضح رہے کہ رواں ماہ 11 اکتوبر کو وزیر خزانہ اسد عمر اور اسٹیٹ بینک آف پاکستان کے گورنر طارق باجوہ نے انڈونیشیا کے جزیرے بالی میں آئی ایم ایف کی سربراہ کرسٹین لاگارڈ سے ملاقات میں مالی مدد کی باضابطہ درخواست دی تھی۔
عمران خان کی حکومت کو اس سال اپنی ضروریات پوری کرنے کے لیے 8 سے 9 ارب ڈالر درکار ہیں تاہم حکومت اس پروگرام کو بیل آؤٹ پیکج کا نام نہیں دینا چاہتی۔تاہم گزشتہ روز وزیراعظم عمران خان نے دعویٰ کیا تھا کہ ہوسکتا ہے پاکستان کو قرض کے لیے آئی ایم ایف کے پاس نہ جانا پڑے، مسائل کے حل کے لیے دوست ممالک سے رابطہ کیا جارہا ہے۔
دوسری جانب برطانوی میڈیا کی ایک رپورٹ کے مطابق عمران خان کے آئی ایم ایف سے ممکنہ گریز کی ایک وجہ سعودی دولت پر انحصار ہوسکتا ہے، اس مقصد کے لیے پاکستان سعودی وفد سے ملاقات کر رہا ہے اور ان سے توانائی کے بڑے منصوبوں میں سرمایہ کاری کے لیے بھی بات چیت ہورہی ہے۔رپورٹ کے مطابق پاکستان نے سعودی عرب سے تیل کی تاخیر سے ادائیگی کے معاہدے کی بھی بات کی ہے جس پر غور جاری ہے۔

سری نگر:(نیٹ نیوز/ایمرا نیوز) مقبوضہ کشمیر میں قابض بھارتی فوج نے ضلع پلوامہ میں کارروائی کرتے ہوئے ایک اور کشمیری نوجوان کو شہید کردیا۔ کشمیر میڈیا سروس کے مطابق مقبوضہ کشمیر میں بھارتی فوج نے ایک بار پھر ریاستی دہشت گردی کا مظاہرہ کرتے ہوئے ایک اور کشمیری نوجوان کو شہید کردیا۔قابض فوج کی جانب سے مقبوضہ کشمیر کے ضلع پلوامہ کا محاصرہ کیا گیا اور سرچ آپریشن کے دوران فائرنگ میں کشمیری نوجوان کو شہید کردیا جس کی شناخت شوکت احمد بٹ کے نام سے ہوئی۔واضح رہے قابض فوج کی جانب سے گزشتہ دو دنوں میں اب تک 4 کشمیری نوجوانوں کو شہید کیا جاچکا ہے، گزشتہ روز بھی فتح کدل میں سرچ آپریشن کے دوران 3 کشمیریوں کو شہید کیا گیا تھا۔

لاہور(نیٹ نیوز) ٹاؤن شپ کے علاقے میں گھرمیں سلنڈردھماکہ۔ ایک ہی خاندان کے چار افراد شدید زخمی ہوگئے۔ ریسکیو اہلکاروں کے تاخیر سے پہنچنے پر اہل علاقہ نے اپنی مدد آپ کے تحت آگ پر قابو پایا۔ ٹاؤن شپ کے علاقے میں گھر میں سلنڈر دھماکے سے پھٹ گیا۔ ایک ہی خاندان کے 4 افراد زخمی۔ زخمیوں میں 80 سالہ طیبہ 50 سالہ افتخار، 40 سالہ شہناز اور امبرین شامل۔ محنت کش افتخار ریڑھی پر آلو چنے فروخت کرتا ہے۔ گھر میں سامان کی تیاری کے دوران سلنڈر لیک ہونے پر دھماکہ ہوگیا اور سامان جل گیا۔ لواحقین کا کہنا تھا کہ گیس نہ ہونے پر سلنڈر استعمال کرتے ہیں، جو اچانک پھٹ گیا۔ ریسکیو کے تاخیر سے پہنچنے پر اہل علاقہ نے اپنی مدد آپ کے تحت آگ پر قابو پایا۔اہل علاقہ کاکہنا تھا کہ افتخار کی زخمی بیٹی امبرین کی اگلے ماہ شادی ہے، جس کا جہیز کا سامان جل گیا۔