All posts by EMRA

لاہور(وقت ٹی وی آن لائن ) لاہور ہائیکورٹ نے ویڈیو اسکینڈل میں ملوث جج ارشد ملک کو عہدے سے برطرف کر دیا۔

چیف جسٹس لاہور ہائیکورٹ قاسم خان کی سربراہی میں انتظامی کمیٹی نے فیصلہ سنایا، لاہور ہائیکورٹ نے بطور انکوائری آفیسر جج ارشد ملک کو قصور وار قرار دیا تھا۔

واضح رہے کہ جج ارشد ملک نے نوازشریف کو سزا سنائی تھی۔ جب کہ جج ارشد ملک کی ویڈیو مریم نواز نے پریس کانفرنس کرتے ہوئے سامنے لیکر آئی تھی اب اسی ویڈیو میں جج کو قصور وار سمجھتے ہوئے برطرف کردیا گیا ہے

قانونی ماہرین کا کہنا ہے کہ جج کو سزا کے بعد نوازشریف کی دی جانے والی سزا کی صحت بھی متنازعہ ہو چکی ہے اور اب اسکو کوئی تسلیم نہیں کرے گا

اسلام آباد (وقت ٹی وی آن لائن ) 7 جولائی کو بین الصوبائی وزرائے تعلیم کانفرنس میں ملک بھر کے تعلیمی ادارے کھولنے کا فیصلہ متوقع ہے۔

وفاقی وزیر تعلیم شفقت محمود کی سربراہی میں ہونے والی بین الصوبائی وزرائے کانفرنس 2 جولائی کو طلب کی گئی تھی ، جس میں یونیورسٹیز سمیت تعلیمی ادارے کھولنے سے متعلق فیصلہ کیا جانا تھا تاہم یہ کانفرنس وفاقی وزیر شفقت محمود کی والدہ کی وفات کے باعث موخر کردی گئی ہے۔
ذرائع کا کہنا ہے بین الصوبائی وزرائے تعلیم کانفرنس اب 7 جولائی کو ہو گی جس میں ملک بھر کے تعلیمی ادارے کھولنے کا فیصلہ متوقع ہے، وفاقی وزارت تعلیم نے چاروں صوبوں اور ہائیر ایجوکیشن کمیشن سے تجاویز طلب کر رکھی ہیں۔

واضح رہے کہ کورونا وبا کے بعث ملک بھر میں تعلیمی ادارے بند ہونے سے لاکھوں طلباء زیور تعلیم سے محروم ہیں۔

اسلام آباد (وقت ٹی وی آن لائن ) ملک بھر میں کورونا کے مصدقہ مریضوں کی تعداد 2 لاکھ 13 ہزار 470 تک جاپہنچی ہے تاہم ان میں سے ایک لاکھ 802 افراد نے اس وائرس کو شکست دے دی ہے۔

نیشنل کمانڈ اینڈ آپریشن سینٹر کے مطابق گزشتہ 24 گھنٹوں کے دوران ملک بھر میں 22 ہزار 418 ٹیسٹ کیے گئے، اس طرح ملک بھر میں مجموعی طور پر 13 لاکھ 5 ہزار 510 ٹیسٹ کیے جاچکے ہیں، ملک بھر میں مزید 4 ہزار 133 افراد میں کورونا کی تشخیص ہوئی ہے جس کے بعد ملک بھرمیں اس وائرس سے متاثرہ مریضوں کی تعداد 2 لاکھ 13 ہزار470 تک جا پہنچی ہے۔

سندھ میں کورونا سے متاثرہ مریضوں کی تعداد 84 ہزار 640 ، پنجاب میں 76 ہزار 262 ، خیبرپختونخوا میں 26 ہزار 598 ، بلوچستان میں 10 ہزار 476 ، اسلام آباد میں 12 ہزار 912، آزاد جموں وکشمیر میں ایک ہزار 93 اور گلگت بلتستان میں کورونا مریضوں کی تعداد ایک ہزار 489 ہوگئی ہے۔

ملک بھر میں کورونا کے ایک لاکھ 802 مریض صحت یاب ہوچکے ہیں جب کہ اس وقت ملک بھر میں کورونا کے فعال کیسز کی تعداد ایک لاکھ 8 ہزار 273 ہے، جن میں سے 5 ہزار 50 کورونا مریض اسپتالوں میں زیرعلاج ہیں جب کہ ملک بھر میں 491 کورونا مریض وینٹی لیٹر پر ہیں۔

گزشتہ 24 گھنٹوں کے دوران مزید 91 افراد کورونا کے ہاتھوں دار فانی سے کوچ کرگئے۔ جس کے بعد ملک میں اس وائرس سے ہونے والی اموات کی مجموعی تعداد 4 ہزار 395 ہوگئی ، پنجاب میں ایک ہزار 762 ، سندھ میں ایک ہزار377 ، خیبرپختونخوا میں 951 ، اسلام آباد میں 128 ، بلوچستان میں 121 ، گلگت بلتستان 26 اور آزاد کشمیر میں 30 افراد اس وائرس کے ہاتھوں لقمہ اجل بن چکے ہیں۔

کورونا وائرس اور احتیاطی تدابیر:

کورونا وائرس کے خلاف یہ احتیاطی تدابیر اختیار کرنے سے اس وبا کے خلاف جنگ جیتنا آسان ہوسکتا ہے۔ صبح کا کچھ وقت دھوپ میں گزارنا چاہیے، کمروں کو بند کرکے نہ بیٹھیں بلکہ دروازہ کھڑکیاں کھول دیں اور ہلکی دھوپ کو کمروں میں آنے دیں۔ بند کمروں میں اے سی چلاکر بیٹھنے کے بجائے پنکھے کی ہوا میں بیٹھیں۔

سورج کی شعاعوں میں موجود یو وی شعاعیں وائرس کی بیرونی ساخت پر ابھرے ہوئے ہوئے پروٹین کو متاثر کرتی ہیں اور وائرس کو کمزور کردیتی ہیں۔ درجہ حرارت یا گرمی کے زیادہ ہونے سے وائرس پر کوئی اثر نہیں ہوتا لیکن یو وی شعاعوں کے زیادہ پڑنے سے وائرس کمزور ہوجاتا ہے۔

پانی گرم کرکے تھرماس میں رکھ لیں اور ہر ایک گھنٹے بعد آدھا کپ نیم گرم پانی نوش کریں۔ وائرس سب سے پہلے گلے میں انفیکشن کرتا ہے اوروہاں سے پھیپھڑوں تک پہنچ جاتا ہے، گرم پانی کے استعمال سے وائرس گلے سے معدے میں چلا جاتا ہے، جہاں وائرس ناکارہ ہوجاتا ہے۔

واشنگٹن (وقت ٹی وی آن لائن ) غلط اطلاعات اور نفرت انگیز مواد کو کنٹرول کرنے میں ناکامی پر فیس بک کو اشتہارات نہ دینے کی مہم میں دنیا بھر کی 200 سے زائد کمپنیاں شامل ہوگئی ہیں۔

نسل پرستی، تشدد، جھوٹ اور نفرت کے خلاف کردار ادا نا کرنے پر فیس بک کے خلاف دنیا بھر کی 200 سے زائد کمپنیاں اور انسانی حقوق کی تنظیمیں ‘منافع کے لیے نفرت بند کرو ‘(Stop Hate For Profit) مہم میں شامل ہیں۔

ان کمپنیوں میں مائیکرو سافٹ،یونی لیور، ہونڈا، فورڈ، کوکاکولا، پیپسی، اسٹار بکس،چاکلیٹ جائنٹ ہرشیز سمیت دیگر معروف ادارے شامل ہیں۔
اب اس مہم میں کھیلوں کا سازو سامان اور ملبوسات بنانے والی معروف جرمن کمپنیاں ایڈیڈاس اور پوما بھی شامل ہوگئی ہیں اور دونوں کمپنیوں نے فیس بک اور انسٹاگرام کو اشتہارات نہ دینے کا فیصلہ کرلیا ہے۔

خیال رہے کہ اس بائیکاٹ مہم کی وجہ سے فیس بک کے مالک مارک زکربرگ کو 7 ارب ڈالر سے زائد (تقریباً سوا 11 کھرب پاکستانی روپے)کا نقصان ہو چکا ہے اور اب مزید کمپنیوں کے اعلان کے بعد اس نقصان میں مزید اضافہ ہو گا۔

گزشتہ ہفتے اشتہارات کے بائیکاٹ سے مارک زکر برگ کی دولت کم ہوکر 82.3 ارب ڈالر رہ گئی تھی اور اب فیس بک کے بانی دنیا کے تیسرے امیر ترین آدمی سے چوتھے نمبر پر آگئے ہیں۔

دنیا کی سب سے بڑی اور معروف سوشل میڈیا ویب سائٹ کے خلاف یہ مہم اس وقت شروع ہوئی جب گذشتہ ماہ کے آخر میں امریکا میں پولیس کی حراست میں جارج فلائیڈ نامی ایک سیاہ فام شخص ہلاک ہوگیا تھا۔

انسانی حقوق کی تنظمیوں کے مطابق فیس بک انتظامیہ نے پولیس کی طرف سے نسل پرستی پر مبنی نفرت انگیز مواد اور غلط معلومات کو آن لائن ہٹانے میں کوئی موثر قدم نہیں اٹھایا تھا جب کہ مارک زکر برگ نے امریکی صدر ٹرمپ کی متنازع پوسٹوں کے خلاف ایکشن لینے سے بھی انکار کردیا تھا۔

فیس بک کا نفرت پھیلانے والے اشتہارات پر پابندی کا فیصلہ
دوسری جانب اشتہارات کی بندش کے بعد فیس بک نے نفرت انگیز اشتہارات پر پابندی لگانے کا فیصلہ کرلیا ہے۔
کمپنی کے مطابق فیس بک ان تمام اشتہاروں پر پابندی عائد کرے گا جو کسی خاص نسل، قومیت، ذات پات، صنف، جنسی رجحان یا کسی کی جسمانی حفاظت یا صحت کے لیے خطرہ ہیں۔

فیس بک کمپنی نے یہ بھی کہا ہے کہ وہ اپنے پلیٹ فارم پر شائع ہونے والے ایسے خبری مواد کو واضح کرے گی جو فیس بک کی پالیسیوں کے خلاف ہو۔

نئی پالیسی میں کسی خاص رنگ و نسل، قومیت، مذہب، ذات، جنسی رجحان، صنف، شناخت اور تارکینِ وطنسے تعلق رکھنے والے افراد کو دوسروں کی صحت اور جان و مال کےلیے خطرہ بنا کر پیش کرنے والے اشتہارات پر پابندی عائد کردی گئی ہے۔

اسلام آباد (وقت ٹی وی آن لائن ) عالمی بینک نے پاکستان کے لیے 50 کروڑ ڈالر قرض کی منظوری دے دی ہے۔

عالمی بینک کے اعلامیے کے مطابق پاکستان کو قرض کی منظوری ایگزیکٹو ڈائریکٹرز کے بورڈ اجلاس میں دی گئی۔

قرض کی منظوری ‘پائیدار ترقی کے لیے مستحکم ادارے’ پروگرام کے تحت دی گئی ہے۔

اعلامیے کے مطابق 50 کروڑ ڈالر قرض کی یہ رقم معاشی اصلاحات اور کورونا وائرس پر قابو پانے کے لیے خرچ کی جائے گی۔

عالمی بینک کا کہنا ہے کہ منظور کیے گئے قرض میں سے 25 کروڑ ڈالر انٹرنیشنل ڈویلپمنٹ ایسوسی ایشن (آئی ڈی اے) اور 25 کروڑ ڈالر انٹرنیشنل بینک برائے بحالی و ترقی (آئی بی آر ڈی) نے فراہم کیے ہیں۔

عالمی بینک کے مطابق پاکستان کو یہ قرض آسان شرائط پر فراہم کیا گیا ہے۔

لاہور (وقت ٹی وی آن لائن ) پنجاب لینڈ ریکارڈز اتھارٹی کو فعال اور کرپشن سے پاک کرنے کیلئے ڈائریکٹر جنرل پنجاب لینڈ ریکارڈز اتھارٹی کے بڑے اقدامات کا اغاز کر دیا ہے ،عوام کو حقیقی معنوں میں سہولت فراہم کرنے کیلئے اراضی کے کمپیو ٹرائزڈ نظام میں اصلاحات نا گزیر ہیں۔ ڈی جی پی ایل آر اے معظم اقبال سپراکا کہنا ہے کہ حکومت پنجاب کے عوام کو سہل اور شفاف خدمات کی فراہمی کے عزم کو پی ایل آر اے میں یقینی بنایا جائے گا۔

تاہم اراضی سنٹرز پر لمبی قطاریں، ریکارڈ میں پیچیدگی اور انکی درستگی کا سست رفتار طریقہ کار، بلاک کھیوٹ ، انتقالات میں التوا، کام کرنے کے معیاری ہدایات ناموں کی غیر موجودگی جیسی خامیوں کے باعث عوام کمپیوٹرائزڈ نظام کے حقیقی ثمرات سے تاحال محروم ہے جن کو دور کرنے کیلئے بیشتر اقدامات و اصلاحات کی ضرورت ہے۔

ٹیکنالوجی کے محدود استعمال، قوانین سے ناواقفیت، عملہ کے افراد کی نااہلی، کوتاہی اور مفاد پرست عناصر کی کرپشن جیسے مسائل نے اتھارٹی کی کارکردگی کو متاثر کیا ہے۔ خدمات کے حصول میں عوام کو درپیش مسائل، کرپشن اور جعلسازی کے واقعات کا نوٹس لیتے ہوئے ڈی جی پی ایل آر اے نے موقف اختیار کیا ہے کہ اتھارٹی میں عملہ کی نا اہلی اور کرپشن کو کسی صورت برداشت نہیں کیا جائے گا اور تمام زیر کاروائی محکمانہ انکوائریوں کو جلد مکمل کرنے کی ہدایات جاری کی ہیں۔

اس سلسلے میں گزشتہ روز اراضی ریکارڈ سنٹر گوجر خان سے عمران خان نامی آفیشل کے خلاف محکمانہ انکوائری میں عوام کو بے جا خوار کرنے، سرکاری فیس کی رقوم میں خرد برد اور ٹائوٹ مافیا کے سہولت کار جیسے الزامات ثابت ہونے پر نوکری سے برخاست کرنے کے احکامات جاری کیے گئے ہیں۔

علاو ازیں اتھارٹی کی کارکردگی بہتر بنانے اور عوام کو باسہولت خدمات کی فراہمی یقینی بنانے کیلئے بیشتر اصلاحات پر کام شروع کر دیا گیا ہے۔ اراضی ریکارڈ سنٹرز پر تاحکم ثانی لوکل کمیشن مقر ر کرنے پر پابندی عائد کر دی گئی ہے۔ انتقالات پر ٹیکس چوری اور عوامی استحصال کی روک تھام کیلئے ایویلیوایشن ٹیبل کے کمپیوٹرائزڈ اندارج کو لازم قرار دیا گیا ہے۔

اس کے علاوہ عوام کی سہولت کے پیش نظر حکومتی فیس کی ای پیمنٹ، ڈیبٹ کارڈ، جاز کیش کے ذریعے ادائیگی، تمام سنٹروں کو مرکزی ڈیٹا کے ذریعے رسائی اور سروس آوٹ لیٹ بڑھانے جیسے اقدامات زیر غور ہیں۔

دیلی (وقت ٹی وی آن لائن ) بھارت میں کورونا لاک ڈاؤن کے دوران شادی کرنے والا دولہا وائرس میں مبتلا ہوکر ہلاک ہوگیا۔

بھارتی میڈیا کے مطابق ریاست بہار کے شہر پٹنا میں کورونا لاک ڈاؤن کے دوران شادی کی تقریب ہوئی جو وائرس کے پھیلنے کا سبب بن گئی جب کہ دولہا خود وائرس کا شکار ہوکر ہلاک ہوگیا۔

بھارتی میڈیا کا بتانا ہےکہ پٹنا کے رہائشی نوجوان کی حالت کچھ دنوں سے خراب تھی اور اس میں کورونا کی علامات تھیں لیکن گھر والوں نے شادی کی وجہ سے نوجوان کا کورونا ٹیسٹ نہیں کرایا تھا۔

شادی سے چند روز قبل نوجوان مقامی اسپتال میں زیر علاج تھا جہاں اس کے گھر والے زبردستی اسے گھر لے گئے اور شادی کرنے پر مجبور کیا تاہم نوجوان شادی کے اگلے روز ہی طبیعت بگڑنے پر چل بسا۔

بھارتی میڈیا کا بتانا ہےکہ واقعے کی اطلاع ملنے پر انتظامیہ حرکت میں آئی لیکن مرنے کے بعد نوجوان کا کورونا ٹیسٹ نہیں کیا جاسکتا تھا اور اس کے گھر والے اس کی آخری رسومات بھی ادا کرچکے تھے۔

میڈیا رپورٹ کے مطابق شادی میں تقریباً 350 افراد نے شرکت کی جن میں سے بیشتر افراد کو کورونا کی علامات محسوس ہوئیں اور ٹیسٹ کرانے پر دولہا کے رشتے داروں سمیت 100 افراد میں وائرس کی تشخیص ہوئی۔

ضلعی انتظامیہ نے شادی کی تقریب میں 50 افراد سے زائد کی شرکت پر تحقیقات کا حکم دیا ہے۔

بھارتی ریاست بہار میں کورونا کے کیسز کی تعداد 9700 سے زائد ہے جب کہ 62 افراد ہلاک ہوچکے ہیں۔

کراچی (وقت ٹی وی آن لائن ) قانون نافذ کرنے والے اداروں نے اسٹاک ایکسچینج حملے کے لیے استعمال کی جانے والی گاڑی فروخت کرنے والے شوروم پر چھاپہ مار کر ریکارڈ قبضے میں لے لیا۔

ذرائع کے مطابق قانون نافذ کرنے والے ادارے نے نیو ٹاؤن کے قریب ایک شو روم پر چھاپہ مارا، اس شوروم سے وہ گاڑی خریدی گئی تھی جو دہشتگردوں نے اسٹاک ایکسچینج پر حملے کے لیے استعمال کی۔

چھاپے کے دوران شوروم کی سی سی ٹی وی فوٹیج اور دیگر ریکارڈ قبضے میں لے لیا گیا جب کہ شوروم کے مالک اور عملے سے پوچھ گچھ بھی کی گئی۔

واضح رہے کہ گزشتہ روز کراچی میں پاکستان اسٹاک ایکسچینج پر چار دہشت گردوں نے حملہ کیا جس کے نتیجے میں ایک پولیس اہلکار اور اسٹاک ایکسچینج کے 3 سیکیورٹی گارڈ شہید ہوگئے جب کہ فورسز کی جوابی کارروائی میں چاروں دہشتگرد مارے گئے۔

راولپنڈی (وقت ٹی وی آن لائن ) انتظامیہ نے کورونا کے بڑھتے کیسز کے باعث 8 علاقوں کو سیل کرکے دفعہ 144 نافذ کردی۔

ڈپٹی کمشنر راولپنڈی انوارالحق کے مطابق چیف سیکرٹری پنجاب کو 8 ہاٹ اسپاٹس بند کرنے کی سفارش کی گئی تھی جس کی منظوری کے بعد محکمہ داخلہ نے نوٹفیکیشن جاری کردیا۔

بند ہونے والے علاقوں میں گلزارقائد، خیابان سرسید، ڈھوک علی اکبر، کوٹھ کلاں، مورگاہ، تخت پڑی، نرنکاری بازار اور باڑا مارکیٹ شامل ہیں۔

ڈی سی راولپنڈی نے بتایا کہ ہاٹ اسپاٹس علاقوں میں بڑی مارکیٹیں، شاپنگ مالز، ریسٹورینٹس، سرکاری و نجی دفاتربند رہیں گے جب کہ مکینوں کو روز مرہ اشیائے ضروریہ کے حصول کی سہولت ہوگی۔

ان علاقوں میں کریانہ دکانیں، جنرل اسٹورز، آٹا چکیاں، پھل و سبزی کی دکانیں، تندور اور میڈیکل سروسز پیٹرول پمپس صبح 9سے شام 7بجے تک کھلے رہیں گے۔

اس کے علاوہ دودھ، چکن، گوشت، مچھلی کی دکانیں اور بیکریاں صبح 7سے شام 7بجے تک کھلی رکھنے کی اجازت ہو گی۔

ہاٹ اسپاٹس قرار دے جانے والے علاقوں میں پبلک، پرائیوٹ ٹرانسپورٹ کےذریعے لوگوں کے آنے جانے پرپابندی ہوگی جب کہ محدود سفر کے لیے ایک گاڑی میں ایک فرد کو اجازت دی گئی ہے۔

سیل کیے گئے علاقوں میں تمام میڈیکل اسٹورز، لیبارٹریز، کلیکشن پوائنٹس، اسپتال اور کلینکس 24 گھنٹے کھلے رکھنے کی اجازت ہوگی۔

ڈی سی راولپنڈی کا کہنا تھا کہ یہ پابندیاں 3 جولائی کی رات 9 بجے تک برقرار رہیں گی۔