All posts by EMRA

لاہور ( وقت ٹی وی آن لائن ) پاکستانی روپے کے مقابلے میں امریکی ڈالر کی قدر میں اضافے کا سلسلہ جاری ہے۔

انٹر بینک میں ایک امریکی ڈالر 98 پیسے مہنگا ہوگیا ہے۔ کاروباری ہفتے اور ماہ جون کے پہلے روز کاروبارکے اختتام پر انٹربینک میں ڈالر 164 روپے 8 پیسے کا ہوگیا۔

دوسری جانب اوپن مارکیٹ میں بھی ڈالر کی قدر میں اضافے کا سلسلہ جاری ہے اور ایک امریکی ڈالر 50 پیسے مہنگا ہوکر 164 روپے کا ہوگیا ہے۔

اسلام آباد (وقت ٹی وی آن لائن ) انسداد دہشت گردی کی عدالت میں جاری پاکستان ٹیلی وژن (پی ٹی وی) اور پارلیمنٹ حملہ کیس میں وزیراعظم عمران خان نے اپنے وکیل بابر اعوان کو تبدیل کرنے کی درخواست جمع کرادی۔

اسلام آباد کی انسداد دہشت گردی کی عدالت میں پی ٹی وی اور پارلیمنٹ حملہ کیس کی سماعت ہوئی۔

عمران خان کے وکیل بابر اعوان کی جگہ ان کے معاون عدالت میں پیش ہوئے اور سماعت کے دوران وزیراعظم عمران خان کی جانب سے اپنے وکیل بابر اعوان کو تبدیل کرنے کی درخواست دی گئی۔

درخواست میں معاون وکیل نے استدعا کی کہ بابر اعوان وزیراعظم عمران خان کے مشیر تعینات ہوچکے ہیں لہٰذا نیا وکیل مقرر کرنے کیلئے وقت دیا جائے۔

عدالت نے ملزمان کی وکیل تبدیل کرنے کیلئے مہلت کی استدعا منظور کرلی اور کیس کی سماعت 29 جون تک ملتوی کر دی۔

خیال رہے کہ گزشتہ دنوں ہی بابر اعوان کو وزیراعظم عمران خان نے مشیر برائے پارلیمانی امور مقرر کیا ہے جن کا عہدہ وفاقی وزیر کے برابر ہے۔

یاد رہے کہ مسلم لیگ (ن) کی گزشتہ حکومت کے خلاف 2014 میں پاکستان تحریک انصاف اور پاکستان عوامی تحریک کی جانب سے اسلام آباد میں دیے گئے 126 روزہ دھرنے کے دوران ہنگامہ ہوا اور کارکنان نے پی ٹی وی اور پارلیمنٹ پر دھاوا بھی بولا تھا۔

اس موقع پر ریڈزون میں ہنگامہ آرائی پر مقدمہ درج کیا گیا جس میں موجودہ وزیراعظم عمران خان، صدر مملکت عارف علوی، وزیر منصوبہ بندی اسد عمر، وزیر خارجہ شاہ محمود قریشی اور دیگر نامزد ہیں۔

صدر مملکت کو ان کیسز میں صدارتی استثنیٰ حاصل ہے جبکہ وزیراعظم کی جانب سے بابر اعوان عدالت میں پیش ہوتے رہے ہیں۔

لاہور (وقت ٹی وی آن لائن ) مسلم لیگ (ن) کے صدر اور قومی اسمبلی میں قائد حزب اختلاف شہباز شریف نے آمدن سے زائد اثاثے اور منی لانڈرنگ کیس میں عبوری ضمانت کے لیے لاہور ہائی کورٹ میں درخواست دائرکردی۔

لاہورہائی کورٹ میں شہباز شریف نےدرخواست امجد پرویز ایڈووکیٹ کی وساطت سے دائرکی جس میں استدعا کی گئی ہے کہ زیر التواء انکوائری میں قومی احتساب بیورو(نیب) کی جانب سے گرفتار کیے جانے کا خدشہ ہے، اس لیے عبوری ضمانت منظور کی جائے۔

درخواست میں شہباز شریف کا کہنا ہے کہ نیب نے بد نیتی کی بنیاد پر آمدن سے زائد اثاثوں کا کیس بنایا ہے اور حکومت کے سیاسی اثر و رسوخ کی وجہ سے نیب نے انکوائری شروع کی جب کہ نیب کی جانب سے لگائے گئے الزامات عمومی نوعیت کے ہیں۔

درخواست میں مؤقف اختیارکیا گیا ہے کہ تمام دستاویزات پہلے سے ہی نیب کے پاس موجود ہیں، 2018میں اسی کیس میں گرفتار کیا گیا، اس وقت بھی نیب کے ساتھ بھر پور تعاون کیاتاہم نیب نے اختیارات کے ناجائز استعمال کا ایک بھی ثبوت نہیں دیا۔

شہباز شریف کا کہنا ہے کہ وہ اپنے اثاثے ڈکلیئر کراتے رہے ہیں اور ان پر منی لانڈرنگ کے الزامات بالکل بے بنیاد ہیں، نیب انکوائری کے دوران اینٹی منی لانڈرنگ ایکٹ کے اختیارات استعمال نہیں کر سکتا، لہٰذا عبوری ضمانت منظور کی جائے۔

کراچی ( وقت ٹی وی آن لائن ) کراچی کے علاقے ڈیفنس میں پولیس اہلکاروں کی فائرنگ سے جاں بحق ہونے والے نوجوان انتظار کے گھر ڈکیتی کی واردات ہوئی ہے۔

مقتول نوجوان کے والد اشتیاق احمد کے مطابق چار ملزمان نے گھر میں ڈکیتی کی واردات کی اور اسلحہ کے زور پر لاکھوں روپے مالیت کے زیورات لوٹ کر فرار ہوگئے۔

سینیئر سپرٹنڈنٹ آف پولیس (ایس ایس پی) جنوبی شیراز نذیر نے بتایا کہ انتظار کے گھر ڈکیتی کی اطلاع کچھ دیر پہلے ملی ہے جس کے بعد گھر میں موجود نوکروں سے بھی پوچھ گچھ کی جاری ہے۔

خیال رہے کہ 13 جنوری 2018 کو ڈیفنس کے علاقے خیابان اتحاد میں اینٹی کار لفٹنگ سیل کے اہلکاروں کی فائرنگ سے 19 سالہ نوجوان انتظار احمد ہلاک ہوگیا تھا جس کے بعد نوجوان کے والد نے چیف جسٹس آف پاکستان اور آرمی چیف سے انصاف کی اپیل کی تھی۔

مقتول انتظار کے والد کی پریس کانفرنس پر وزیراعلیٰ سندھ سید مراد علی شاہ نے واقعے کا نوٹس لیا تھا اور واقعے کا مقدمہ بھی درج کرلیا گیا تھا۔

کراچی (وقت ٹی وی آن لائن) متحدہ قومی موومنٹ (ایم کیو ایم) پاکستان کے رہنما خواجہ اظہار نے کہا ہے کہ جعلی ڈومیسائل کے معاملے پر اسمبلی سمیت ہر جگہ آواز اٹھائی، سندھ کو خطرہ سندھ کے حکمرانوں سے ہے۔

بہادرآباد میں قائم پارٹی کے عارضی مرکز میں پریس کانفرنس کرتے ہوئے ایم کیو ایم کے رہنما خواجہ اظہار الحسن کا کہنا تھا کہ جعلی ڈومیسائل کے معاملے پر اسمبلی سمیت ہر جگہ آواز اٹھائی لیکن کہیں سے کچھ نہ ہوا تو عدالت سے رجوع کیا۔

انہوں نے کہا کہ سندھ کو خطرہ سندھ کے حکمرانوں سے ہے، یہ نوٹیفکیشن نکال کر کس کو بیوقوف بنا رہے ہیں؟ سندھ حکومت کا نوٹیفکیشن غیرقانونی ہے، جعلی ڈومیسائل بنانے والے کون ہیں؟

ان کا کہنا ہے کہ کراچی میں ایک سے 15 گریڈ کی نوکریوں پرکراچی کے نوجوان کیوں نہیں؟ ان کی نوکریوں پر مقامی لوگوں کا حق ہے لہٰذا سندھ کے عوام کو بیوقوف بنانا بند کریں۔

خواجہ اظہار کا کہنا تھا کہ اگر خیبرپختونخوا کے لوگوں کا جعلی ڈومیسائل بنا ہے تو اس کی وجہ کرپٹ افسران ہیں، ایم کیوایم کا مؤقف ہے کہ 1973 کے آئین پر عمل کیا جائے۔

جعلی ڈومیسائل کے حوالے سے ایم کیو ایم رہنما نے مزید کہا کہ عدالت میں جعلی ڈومیسائل کا معاملہ چل رہا ہے اور امید ہے جلد فیصلہ ہوگا، سندھ حکومت نے عدالت میں جواب دیا کہ جعلی ڈومیسائل پر کوئی شکایت نہیں ملی حالانکہ جعلی ڈومیسائل پروزیراعلیٰ سندھ کو کئی خطوط لکھے ہیں۔

ان کا کہنا تھا کہ سندھ حکومت نے نوٹیفکیشن کے ذریعے عدالتی کارروائی پر اثر انداز ہونے کی کوشش ہے جس کے خلاف توہین عدالت کی درخواست دائر کروں گا۔

خواجہ اظہار کا کہنا ہے کہ جعلی ڈومیسائل کے خلاف سوشل میڈیا پر لوگوں نے بھی آواز بلند کی ہے، ایم کیو ایم کہہ رہی ہے جو قانون ذوالفقار علی بھٹو نے بنایا تھا، اس پر عمل کریں لیکن یہ نہیں ہوگا کہ قانون بھی بناؤ اور اس کی دھجیاں بھی اڑاؤ۔

انہوں نے مزید کہا کہ حکومت سندھ کی جانب سے بنائی گئی کمیٹی کچھ نہیں کر سکتی، اس کے پاس کیا اختیار ہے؟ سندھ پبلک سروس کمیشن بدنام ترین ادارہ ہے، کون سندھ پبلک سروس کمیشن کے کارناموں کو نہیں جانتا، یہ ایک مہاجر دشمن ادارہ ہے۔

خیال رہے کہ گزشتہ دنوں جعلی ڈومیسائل کے حوالے سے معاملہ سامنے آیا تھا کہ سندھ میں دیگرصوبوں کے شہریوں کو جعلی ڈومیسائل بناکر دیے گئے ہیں۔

اس معاملے پر حکومت سندھ نے کمیٹی قائم کی تھی جس نے چھان بین کے دوران کئی افراد کے جعلی ڈومیسائل بنانے کا انکشاف کیا ہے۔

سوشل میڈیا پر بھی جعلی ڈومیسائل کا معاملہ گرم ہے اور دعویٰ کیا جارہا ہے کہ سندھ کے جعلی ڈومیسائل پر دوسرے صوبوں کے کئی افراد سرکاری محکموں میں ملازمت اختیار کرچکے ہیں اور اعلیٰ عہدوں پر فائز ہیں۔

اسلام آباد (وقت ٹی وی آن لائن ) وفاقی وزیر قانون بیرسٹرو فروغ نسیم وزارت سے مستعفی ہو گئے۔

ذرائع کے مطابق وفاقی وزیر قانون فروغ نسیم نے وزارت سے استعفیٰ دے دیا ہے اور اب وہ سپریم کورٹ میں وفاق کی نمائندگی کریں گے۔

ذرائع کا کہنا ہے کہ فروغ نسیم سپریم کورٹ میں جسٹس قاضی فائز عیسیٰ سے متعلق کیس میں وفاق کی نمائندگی کریں گے۔

یاد رہے کہ اس سے قبل فروغ نسیم نے 26 نومبر کو اپنے عہدے سے استعفیٰ دیا تھا تاکہ وہ سپریم کورٹ میں آرمی چیف کی مدت ملازمت میں توسیع سے متعلق کیس میں جنرل قمر جاوید باجوہ کی پیروی کر سکیں۔

مستعفی ہونے کے بعد بیرسٹر فروغ نسیم آرمی چیف کی مدت ملازمت میں توسیع سے متعلق کیس میں جنرل قمر جاوید باجوہ کی طرف سے سپریم کورٹ میں پیش ہوئے اور مقدمے کی پیروی کی۔

بعدازاں حکومت نے سینیٹر فروغ نسیم کو دوبارہ وفاقی وزیر قانون کا عہدہ سونپ دیا تھا۔ تاہم اب فروغ نسیم ایک بار پھر جسٹس فائز عیسیٰ کیس کے لیے عہدے سے فارغ ہوگئے ہیں۔

لاہور ( وقت ٹی وی آن لائن ) حکومت کی جانب سے پیٹرولیم مصنوعات کی قیمتوں میں تو کمی کر دی گئی لیکن اس کے باوجود عوام روز مرہ کی اشیاء کی قیمتوں میں کمی سے محروم ہیں۔

یکم مارچ سے ملک میں پیٹرول و ڈیزل قیمت میں تقریباً 36 فیصد کمی ہو چکی ہے اور گزشتہ روز جاری کیے گئے اعلامیے کے بعد پیٹرول کی قیمت میں فی لیٹر 7 روپے 6 پیسے کمی ہو کر نئی قیمت 74 روپے 52 پیسے فی لیٹر ہوگئی ہے۔

اس کے باوجود ٹرانسپورٹ کرائے کم ہوئے، نہ آٹا دال چاول گوشت کی قیمتیں نیچے آئیں۔

اس سے متعلق سابق صدر کے سی سی آئی ہارون اگار نے کہا ہے کہ دالوں کی عالمی قیمت 30 فیصد تک کم ہوئی لیکن پاکستان میں کوئی کمی نہیں ہوئی، خشک دودھ کی قیمت میں 3400 سے 2300 ڈالر کمی کا بھی اثر نہیں آیا یہاں تک کہ ٹرانسپورٹرز نے کرائے بھی کم نہیں کیے۔

ان کا کہنا تھا کہ وزیراعظم عمران خان نے دو مئی 2020 کو ملک کے تمام چیف سیکرٹریز کو حکم دیا تھا کہ پیٹرولیم مصنوعات کی قیمتوں میں کمی کا فائدہ عوام تک پہنچایا جائے یا تو چیف سیکرٹریز نے وزیراعظم کا حکم سُنا نہیں، یا سمجھا نہیں۔

تاجر وں اور عوام کا کہناہے کہ پیٹرولیم مصنوعات پر اربوں روپے ٹیکسوں میں کمی کا اثر عوام کو منتقل نہیں ہو رہا۔

ادھر رہنما گڈز ٹرانسپورٹرز ملک شبر کہتے ہیں کم کاروبار اور مستقل لاگت کے سبب کرائے کم نہیں کیے گئے۔

ان کا کہنا ہے کہ پیٹرولیم مصنوعات کی قیمتوں میں کمی تو ہو گئی لیکن ہمیں ڈرائیورز کو تنخواہیں بھی دینی ہیں لہذا موجودہ صورت حال میں کرایوں میں کمی نہیں کی جا سکتی۔

اسلام آباد (وقت ٹی وی آن لائن ) پاکستان کی فضائی حدود کھولے جانے کے بعد آج یکم جون سے غیرملکی ائیر لائنز نے پاکستان کیلئے فلائٹ آپریشن کا آغاز کردیا ہے۔

متحدہ عرب امارات میں پھنسے 370 مسافروں کو لے کر امارات ائیر لائن کی پرواز ای کے 608 دبئی سے کراچی پہنچ گئی جبکہ دبئی واپسی پر اس پرواز ای کے 609 سے 41 مسافر سفر کریں گے جس کی روانگی ساڑھے 7 بجے شیڈول ہے۔

وفاقی حکومت نے بین الاقوامی پروازوں کو اڑان بھرنے کی اجازت دے دی

فلائٹ ای کے 608 مقامی وقت کے مطابق سہہ پہر 3 بجکر 20 منٹ پر کراچی کیلئے روانہ ہوئی تھی اور غیرملکی ائیرلائن کی یہ پہلی پرواز شام 6:10 پر کراچی ائیرپورٹ پر اتری۔

ایوی ایشن ذرائع کے مطابق کورونا وائرس لاک ڈاؤن کی وجہ سے پاکستان کی فضائی حدود بند تھی اس دوران پی آئی اے سمیت کسی بھی ائیرلائن کی پرواز (سوائے خصوصی پروازوں کے) پاکستان نہیں آسکی۔ سرکاری اعلان کے بعد معمول کی یہ پہلی غیرملکی پرواز ہے جو پاکستان آئی۔

سول ایوی ایشن اور محکمہ صحت سندھ کی ٹیموں نے کراچی پہچنے والے مسافروں کی جناح ٹرمینل پر کورونا وائرس کی اسکریننگ کی۔ سی اے اے ذرائع کے مطابق تھرمل اسکینر سے کلیئر مسافروں کا محکمہ صحت سندھ کی ٹیم نے طبی معائنہ بھی کیا۔ تمام مسافروں کے کورونا وائرس کے ٹیسٹ کیلئے نمونے حاصل کئے جارہے ہیں۔

ذرائع کا کہنا ہے کہ ٹیسٹ رپورٹس آنے تک مسافروں کو 48 گھنٹے تک کیلئے آئسولیشن میں رکھا جائے گا جس کیلئے زیادہ تر مسافروں کو ناردرن بائی پاس پر واقع لیبر فلیٹس کے سرکاری قرنطینہ سینٹر منتقل کردیا گیا ہے جبکہ قیام وطعام کے اخراجات خود برداشت کرنیوالے مسافروں کو کراچی ائیرپورٹ اور شارع فیصل پر واقع ہوٹلوں میں ٹھہرنے کی اجازت دی گئی ہے جہاں وہ پولیس کی نگرانی میں رہیں گے۔

کراچی سے دبئی جانے کیلئے جناح ٹرمینل پہنچنے والے مسافروں کی مکمل اسکریننگ کی گئی جبکہ سامان پر جراثیم کش اسپرے کیا گیا۔ اس کے علاہ قطر ائیر لائن کی پرواز بھی دو جون کی رات ڈیڑھ بجے کراچی پہنچ رہی ہے۔

لاہور ( وقت ٹی وی آن لائن ) وفاقی وزیر سائنس وٹیکنالوجی فواد چوہدری نے مسلم لیگ ن کے قائد نواز شریف کے پاکستان میں ہونے والے طبی ٹیسٹوں کی تحقیقات کا مطالبہ کردیا۔

فواد چوہدری کی جانب سے وزیراعظم عمران خان کو خط لکھا گیا ہے جس میں ان کا کہنا ہے کہ نوازشریف کی برطانیہ میں سامنے آنے والی حالیہ تصاویر میں ان کی حالت اچھی نظر آرہی ہے۔

اپنے خط میں فواد چوہدری کا کہنا ہے کہ نوازشریف اپنی برطانوی ٹیسٹ رپورٹس بھی حکومت کے ساتھ شیئر نہیں کررہے، اس سے تاثر پیدا ہوتا ہے کہ برطانوی لیبارٹریز نے نوازشریف کی بیماری کی تصدیق نہیں کی۔

وفاقی وزیر سائنس وٹیکنالوجی نے خدشہ ظاہر کیا ہے کہ پاکستان میں عدالتوں سے ریلیف لینے کے لیے جعلی ٹیسٹ رپورٹس بنائی گئیں اور ٹیسٹ رپورٹس میں حقائق مسخ کرکے بیرون ملک جانے کی راہ ہموارکی گئی۔

انہوں نے سابق وزیراعظم کے پاکستان میں ہونے والے ٹیسٹ رپورٹس پر انکوائری کمیٹی بنانے کا مطالبہ کرتے ہوئے کہا ہے کہ اس بات کا تعین ہونا چاہیے کہ پاکستان میں کس نے ٹیسٹ رپورٹس میں حقائق کو مسخ کیا اور تحقیقات میں یہ بھی سامنے لایاجائے کہ کس کس نے نوازشریف کو فرار میں مدد کی۔

خیال رہے کہ سابق وزیر اعظم نواز شریف عدالتوں سے طبی بنیاد پر ضمانت کے بعد حکومتی اجازت سے 19 نومبر 2019 سے علاج کے لیے لندن میں مقیم ہیں۔

یاد رہے کہ نواز شریف کی میڈیکل رپورٹس کے حوالے سے وزیراعظم عمران خان نے کہا تھا کہ انہوں نے شوکت خانم اسپتال کے ڈاکٹرز سے مشورہ کیا اور انہیں بتایا گیا کہ نواز شریف کی طبیعت واقعی بہت خراب ہے اس لیے انہیں انسانی ہمدردی کی بنیاد پر علاج کی غرض سے بیرون ملک جانے کی ایک بار اجازت دے رہے ہیں۔

ان کا یہ بھی کہنا تھا کہ ہماری کابینہ کے زیادہ تر اراکین نے نواز شریف کو بیرون ملک جانے کی اجازت دینے کے فیصلے کی مخالفت کی لیکن میں نے رحم کیا اور کہا کہ جانے دو۔

لاہور ( وقت ٹی وی آن لائن ) ملک میں آج اب تک کورونا سے مزید 23 افراد انتقال کرگئے جس کے بعد اموات کی مجموعی تعداد 1543 ہوگئی جب کہ نئے کیسز سامنے آنے کے بعد مریضوں کی تعداد 72460 تک پہنچ گئی ہے۔

اب تک سندھ میں 481 اور پنجاب میں کورونا سے 497 افراد انتقال کرچکے ہیں جب کہ خیبر پختونخوا میں 473 افراد جاں بحق ہو چکے ہیں۔

اس کے علاوہ بلوچستان میں 47، اسلام آباد 28 ، گلگت بلتستان میں 11 اور آزاد کشمیر میں مہلک وائرس سے 6 افراد جاں بحق ہو چکے ہیں۔

کُل ٹیسٹ: 561،136
صحتیاب مریض: 26،083 (کمانڈ اینڈ کنٹرول سینٹر کے مطابق)

آج کے کیسز کی صورت حال
آج اب تک ملک بھر سے کورونا کے مزید 1359 کیسز اور 23 ہلاکتیں سامنے آچکی ہیں جن میں پنجاب سے 1184 کیسز 22 ہلاکتیں، اسلام آباد 171 کیسز ایک ہلاکت اور آزاد کشمیر سے مزید 4 کیسز رپورٹ ہوئے ہیں۔

پنجاب
آج پنجاب سے کورونا کے مزید 1184 کیسز اور 22 ہلاکتیں سامنے آئی ہیں جس کی تصدیق پی ڈی ایم اے نے کی۔

صوبائی ڈیزاسٹر مینجمنٹ اتھارٹی کے مطابق صوبے میں کورونا کے مریضوں کی مجموعی تعداد 26240 اور ہلاکتیں 497 ہوگئی ہیں۔

صوبے میں اب تک کورونا سے صحتیاب ہونے والوں کی تعداد 7021 ہے۔

اسلام آباد
وفاقی دارالحکومت سے آج کورونا وائرس کے مزید 171 کیسز اور ایک ہلاکت سامنے آئی ہے جس کی تصدیق سرکاری پورٹل پر کی گئی ہے۔

پورٹل کے مطابق اسلام آباد میں کیسز کی مجموعی تعداد 2589ہوگئی ہے جب کہ اموات 28ہو چکی ہیں۔

اسلام آباد میں اب تک کورونا وائرس سے 169افراد صحتیاب ہوچکے ہیں۔

آزاد کشمیر
آزاد کشمیر میں بھی آج کورونا کے مزید 4کیسز سامنے آئے ہیں جس کی تصدیق سرکاری پورٹل پر کی گئی ہے۔

حکومتی اعدادو شمار کے مطابق علاقے میں کورونا کے مریضوں کی تعداد 255 ہوگئی ہے جب کہ علاقے میں اب تک وائرس سے 6 افراد جاں بحق ہو چکے ہیں۔

سرکاری پورٹل کے مطابق آزاد کشمیر میں کورونا سے اب تک 168 افراد صحت یاب ہوچکے ہیں۔

سندھ
سندھ سے اتوار کو کورونا کے مزید 885 کیسز اور 16 اموات سامنے آئیں جس کی تصدیق وزیراعلیٰ سندھ مراد علی شاہ نے کی۔

وزیراعلیٰ سندھ کی جانب سے سوشل میڈیا پر جاری بیان میں بتایا گیا گزشتہ 24 گھنٹوں کے دوراں صوبے میں 885 کیسز سامنے آئے جس میں سے 617 نئے کیسز کراچی سے سامنے آئے۔

انھوں نے مزید بتایا کہ گزشتہ روز 16 مزید افراد کورونا کے باعث جا ن کی بازی ہار گئے جس کے بعد صوبے میں وائرس سے مر نے والوں کی تعداد 481 ہو گئی ہے۔

مراد علی شاہ نے بتایا کہ نئے کیسز سامنے آنے کے بعد سندھ میں مریضوں کی مجموعی تعداد 28245 ہو چکی ہے جس میں سے 1073مریض مختلف اسپتالوں میں جب کہ 12773 مریض گھروں میں آئسولیشن میں ہیں۔

وزیراعلیٰ سندھ نے بتایا کہ گزشتہ 24 گھنٹوں میں 553 مریض صحت یاب ہو کر گھروں کو جا چکے ہیں، اس وقت تک صحت یاب ہونے والوں مریضوں کی تعداد 13810 ہو گئی ہے اور صوبے میں کورونا سے صحت یابی کی شرح 49 فیصد ہے۔

بلوچستان
بلوچستان میں اتوار کو مزید 200 افراد میں کورونا وائرس کی تصدیق ہوئی جس کے بعد صوبے میں تصدیق شدہ کورونا مریضوں کی تعداد 4393 ہو گئی۔

محکمہ صحت بلوچستان کے مطابق صوبے میں کورونا کے مزید ایک مریض کا انتقال بھی ہوا جس کے بعد صوبے میں مہلک وائرس کے ہلاکتیں 47 تک پہنچ گئیں۔

اتوار کو بلوچستان میں مزید 26 مریض صحتیاب بھی ہوئے۔

خیبرپختونخوا
خیبر پختونخوا میں اتوار کو مزید 20 افراد کورونا وائرس سے جاں بحق ہوگئے جس کے بعد صوبے میں ہلاکتوں کی تعداد 473 تک جا پہنچی ہے۔

صوبائی محکمہ صحت کے مطابق پشاور میں 8، سوات میں 4 اور ہری پور میں 2 جبکہ مردان، ڈیرہ اسماعیل خان، اپر دیر، لوئر دیر، باجوڑ اور بٹگرام میں ایک ایک شخص جاں بحق ہوا۔

صوبائی محکمہ صحت نے بتایا کہ گزشتہ 24 گھنٹوں کے دوران مزید 487 افراد میں مہلک وائرس کی تصدیق ہوئی ہے جس کے بعد صوبے میں متاثرہ مریضوں کی تعداد 10027ہوگئی۔

صوبے میں اب تک 2912 افراد کورونا وائرس سے صحت یاب بھی ہو چکے ہیں۔

گلگت بلتستان
گلگت بلتستان میں اتوار کو مزید 33 نئے کیسز سامنے آئے ہیں جس کے بعد متاثرہ مریضوں کی تعداد 711 ہوگئی ہے۔

محکمہ صحت گلگت بلتستان کے مطابق کورونا سے اب تک 11 ہلاکتیں ہوئی ہیں جبکہ صحت یاب مریضوں کی تعداد 496 ہے۔