All posts by EMRA

اسلام آباد (وقت ٹی وی آن لائن ) دنیا بھر میں پھیلی عالمی وبا کورونا سے ہلاک افراد کی تعداد 3 لاکھ 8 ہزار سے زائد ہو گئی ہے۔

اٹلی کورونا وائرس کے باعث دنیا کے سب سے زیادہ متاثرہ ممالک میں شامل ہے لیکن حالیہ چند دنوں میں یورپی ملک میں نئے کیسز کی شرح کافی کم رہی ہے۔

اٹلی نے کورونا وائرس کے کیسز کی تعداد اور اموات میں مسلسل کمی آنے کے بعد پابندیاں نرم کرنے کا فیصلہ کیا ہے۔

اطالوی حکام نے دوماہ سے زائد عرصے سے لگے لاک ڈاؤن میں 3 جون سے نرمی کا اعلان کرتے ہوئے ملک کے مختلف ریجنز کے درمیان سفر کی اجازت دینے کا اعلان کیا ہے۔

اٹلی میں اب تک کورونا سے 31 ہزار 610 اموات اور 2 لاکھ 23 ہزار 885 افراد متاثر ہو چکے ہیں۔

یاد رہے کہ اٹلی یورپ کا پہلا ملک ہے جس نے شمالی علاقوں میں کورونا کے کیسز کی تعداد بڑھنے کے بعد فروری میں ملک بھر میں سخت لاک ڈاؤن کر دیا تھا اور پھر تقریبا 2 ماہ سے زائد عرصے کے بعد 4 مئی کو یورپی ملک میں لاک ڈاؤن میں نرمی پیدا ہونا شروع ہوئی۔

بھارت میں سخت لاک ڈاؤن کے باوجود کورونا وائرس کے کیسز چین سے زیادہ ہو گئے ہیں۔

بھارت میں کورونا وائرس سے متاثرہ افراد کی تعداد 85 ہزار 940 تک پہنچ گئی ہے جب کہ 2 ہزار 753 افراد ہلاک بھی ہو چکے ہیں۔

اس بات کا امکان ظاہر کیا جا رہا ہے کہ سفری پابندیوں میں کچھ نرمی کے ساتھ بھارت میں جاری لاک ڈاؤن کو 17 مئی سے مزید دو ہفتوں کے لیے بڑھا کر 31 مئی تک کر دیا جائے گا۔

امریکا میں وائرس سے اموات کی مجموعی تعداد 88 ہزار 507 ہو چکی ہے جب کہ 14 لاکھ 84 ہزار 285 افراد اب تک متاثر بھی ہو چکے ہیں۔

امریکی صدر ڈونلڈ ٹرمپ نے رواں برس کے آخر تک کورونا کی ویکسین تیار ہونے کی امید ظاہر کرتے ہوئے کہا ہے کہ کورونا کی ویکسین ہو یا نہ ہو ہم امریکا کو جلد کھول دیں گے۔

برطانیہ میں عالمی وبا سے اب تک 34 ہزار افراد لقمہ اجل بن چکے ہیں جب کہ فرانس میں 27 ہزار 529 اور اسپین میں 27 ہزار 459 افراد انتقال کر چکے ہیں۔

برازیل میں کورونا وائرس کے کیسز کی تعداد میں مزید ایک دن میں ریکارڈ اضافہ ہونے کے بعد وزیر صحت نیلسن ٹیچ نے چند ماہ کی ملازمت کے بعد استعفیٰ دیدیا۔

برازیلین حکام کے مطابق کورونا وائرس اب تک ملک کے 38 قبائل کو متاثر کر چکا ہے اور وائرس تاریخی قبائل میں خطرناک حد تک تیزی سے بڑھ رہا ہے۔

برازیل میں اب تک 2 لاکھ 20 ہزار سے زائد افراد متاثر اور 14 ہزار 962 ہلاک ہو چکے ہیں۔

دنیا بھر میں کورونا وائرس سے متاثرہ مریضوں کی تعداد 46 لاکھ 39 ہزار 157 تک پہنچ چکی ہے جس میں سے 3 لاکھ 8 ہزار 700 سے زائد افراد ہلاک اور 17 لاکھ 66 ہزار سے زائد صحت یاب ہو چکے ہیں۔

لاہور ( وقت ٹی وی آن لائن ) ملک میں آج کورونا وائرس سے اب تک مزید 14 افراد انتقال کرگئے جس کے بعد ہلاکتوں کی مجموعی تعداد 847 ہوگئی جب کہ نئے کیسز سامنے آنے سے مصدقہ مریضوں کی تعداد 39473 تک جاپہنچی ہے۔

اب تک سب سے زیادہ اموات خیبرپختونخوا میں سامنے آئی ہیں جہاں کورونا سے 291 افراد انتقال کرچکے ہیں جب کہ سندھ میں 268 اور پنجاب میں 245 افراد جاں بحق ہوچکے ہیں۔

اس کے علاوہ بلوچستان میں 31، اسلام آباد 7، گلگت بلتستان میں 4 اور آزاد کشمیر میں مہلک وائرس سے ایک شخص جاں بحق ہوا ہے۔

کُل ٹیسٹ: 359،264
صحتیاب مریض: 10،800 (کمانڈ اینڈ کنٹرول سینٹر کے مطابق)

آج کے کیسز کی صورتحال
آج بروز ہفتہ اب تک ملک بھر سے کورونا کے مزید 879 کیسز رپورٹ ہوئے ہیں اور 14 ہلاکتیں بھی سامنے آئی ہیں جن میں سندھ سے 674 کیسز 13 ہلاکتیں، بلوچستان 147 کیسز ایک ہلاکت، اسلام آباد 55 کیسز اور کشمیر سے مزید 3 کیسز سامنے آئے ہیں۔

سندھ
آج بروز ہفتہ سندھ سے کورونا وائرس کے مزید 674 کیسز اور 13 ہلاکتیں سامنے آئیں جس کی تصدیق وزیراعلیٰ سندھ نے کی۔

مراد علی شاہ نے بتایا کہ گزشتہ 24 گھنٹوں میں 4467 ٹیسٹ کیے گئے جن میں 674 نئے کیسز سامنے آئے اور 13 ہلاکتیں بھی ہوئی۔

صوبے میں نئے کیسز کے بعد کیسز کی مجموعی تعداد 15590 اور اموات 268 ہوگئی ہیں۔

بلوچستان
بلوچستان حکومت کی جانب سے جمعے کو کورونا کے اعداد و شمار جاری نہیں کیے گئے تاہم آج سرکاری پورٹل پر جاری اعداد و شمار میں صوبے میں مزید 147 کیسز اور ایک ہلاکت بتائی گئی ہے۔

پورٹل کے مطابق بلوچستان میں کورونا کے کیسز کی کل تعداد 2457 اور ہلاکتیں 31 ہوگئی ہیں۔

اس کے علاوہ صوبےمیں 383 افراد کورونا سے صحتیاب ہوچکے ہیں۔

اسلام آباد
وفاقی دارالحکومت سے آج کورونا وائرس کے مزید 55 کیسز سامنے آئے ہیں اور ایک ہلاکت بھی ہوئی ہے جو سرکاری پورٹل پر رپورٹ کی گئی ہے۔

سرکاری پورٹل کے مطابق نئے کیسز سامنے آنے کے بعد اسلام آباد میں کیسز کی مجموعی تعداد 921 ہو گئی ہے جب کہ ایک ہلاکت کے بعد دارالحکومت میں وائرس سے جاں بحق افراد کی تعداد 7 ہوگئی ہے۔

آزاد کشمیر
آزاد کشمیر سے آج کورونا کے مزید 3 کیسز سامنے آئے ہیں جو سرکاری پورٹل پر رپورٹ ہوئے ہیں۔

پورٹل کے مطابق علاقے میں کورونا کے مریضوں کی تعداد 108 ہوگئی ہے جب کہ علاقے میں اب تک وائرس سے ایک ہلاکت ہوئی ہے۔

سرکاری پورٹل کے مطابق آزاد کشمیر میں کورونا سے اب تک 76 افراد صحت یاب ہوچکے ہیں۔

پنجاب
پنجاب میں جمعے کو کورونا کے مزید 11 مریض جاں بحق ہوگئے جس کے بعد انتقال کرجانے والوں کی مجموعی تعداد 245 ہوگئی۔

صوبائی ڈیزاسٹر منیجمنٹ اتھارٹی (پی ڈی ایم اے) پنجاب کے مطابق مزید 287 افراد میں مہلک وائرس کی تشخیص ہوئی جس کے بعد صوبے میں متاثرہ مریضوں کی مجموعی تعداد 14201 تک جاپہنچی ہے۔ صوبے میں 4757 افراد صحت یاب بھی ہوچکے ہیں۔

خیبرپختونخوا
خیبر پختونخوا میں جمعے کو کورونا کے مزید 255 کیسز رپورٹ ہوئے اور 7 ہلاکتیں بھی سامنے آئی ہیں جس کی تصدیق صوبائی محکمہ صحت نے کی۔

محکمہ صحت کے مطابق صوبے میں کورونا کے کیسز کی مجموعی تعداد 5678 اور ہلاکتیں 291 ہوگئی ہیں۔محکمہ صحت نے بتایا کہ پشاور میں 4، مردان 2 اور صوابی میں ایک ہلاکت ہوئی۔

محکمہ صحت کے مطابق مزید 108 افراد کورونا سے صحتیاب ہوئے جس کے بعد صحتیاب ہونے والوں کی تعداد 1613 ہوگئی ہے۔

گلگت بلتستان
گلگت بلتستان میں جمعے کو مزید 17 افراد میں مہلک وائرس کی تشخیص ہوئی جس کے بعد متاثرہ مریضوں کی تعداد 518 ہوگئی ہے۔

محکمہ صحت گلگت بلتستان کے مطابق مہلک وائرس سے اب تک 4 ہلاکتیں ہوئی ہیں جب کہ کورونا سے متاثرہ 345افراد صحت یاب ہو چکے ہیں۔

کراچی ( وقت ٹی وی آن لائن ) بھارت کی بدنام زمانہ خفیہ ایجنسی را کے لیے کام کرنے والے کراچی پولیس کے ایک اور افسر کو گرفتار کر لیا گیا۔

ذرائع کے مطابق ایف آئی اے کاؤنٹر ٹیررازم ونگ نے کراچی میں غیر ملکی خفیہ نیٹ ورک کے خلاف بڑی کارروائی کرتے را کے نیٹ ورک کے لیے سرگرم اسپیشل برانچ پولیس کے افسر کو گرفتار کر لیا۔

ایف آئی اے ذرائع کا بتانا ہے کہ اے ایس آئی مصور نقوی بھارتی خفیہ ایجنسی را کے سلیپر سیل کا اہم رکن ہے، گرفتار ملزم کراچی ائیرپورٹ پر سرویلنس یونٹ میں ڈیوٹی کر رہا تھا۔

ایف آئی اے حکام کے مطابق گرفتار ملزم 1991 میں سندھ پولیس میں بھرتی ہوا تھا اور محمود صدیقی کی ہدایت پر ملزم کو رقم فراہم کی جاتی تھی۔

ایف آئی اے حکام کا بتانا ہے کہ ملزم سال 2008 میں را نیٹ ورک کی ٹریننگ کے لیے انڈیا بھی جا چکا ہے، ملزم ائرزپورٹ پر ساتھیوں کی آمدورفت میں سہولت کاری بھی کرتا تھا۔

وفاقی تحقیقاتی ادارے کے مطابق ملزم ٹارگٹ کلنگ اور دہشت گردی کی کارروائیوں میں ملوث رہا ہے، گرفتار ملزم کا تعلق ایم کیوایم لندن سے ہے۔

حکام کا کہنا ہے کہ کراچی پولیس کا ایک اے ایس آئی پہلے بھی اس نیٹ ورک کے لئے کام کرتے ہوئے گرفتار کیا جا چکا ہے ۔

بھارتی خفیہ ایجنسی را کے 6 مبینہ ملزمان پہلے ہی گرفتار کیے جا چکے ہیں، گرفتار ملزمان سے تفتیش کیلئے جے آئی ٹی تحقیقات کر رہی ہے۔

کراچی( وقت ٹی وی آن لائن ) سندھ میں گزشتہ 24 گھنٹوں کے دوران کورونا سے مزید 13 اموات ہوئیں جب کہ 674 نئے کیسز بھی سامنے آئے جن میں سے 490 کا تعلق کراچی سے ہے۔

مراد علی شاہ نے بتایا کہ گزشتہ 24 گھنٹوں میں 4467 ٹیسٹ کیے گئے جن میں 674 نئے کیسز سامنے آئے اور 13 ہلاکتیں بھی ہوئی۔

صوبے میں نئے کیسز کے بعد مریضوں کی مجموعی تعداد 15590 اور اموات 268 ہوگئی ہیں۔

وزیراعلیٰ کےمطابق صوبے کے 674 کیسز میں سے 490 کا تعلق کراچی سے ہے جن میں ضلع شرقی سے 123، جنوبی 113، وسطی 66 ،کورنگی 59، ملیر 72 اور ضلع غربی سے میں 57 کورونا کے کیسز ظاہر ہوئے۔

اس کے علاوہ سندھ کےدیگر اضلاع میں حیدرآباد 55، سکھر 11، خیرپور اور قمبر شہدادکوٹ میں 6،6 ، سانگھڑ 4، ٹنڈو محمد خان اور جیکب آباد میں 3-3، مٹیاری، سجاول اور گھوٹکی 2،2، جب کہ جامشورو اور ٹھٹھہ میں ایک ایک کیسز رپورٹ ہوئے۔

دہلی ( وقت ٹی وی آن لائن ) الہ آباد کی ہائیکورٹ نے لاک ڈاؤن کے دوران ریاست اترپردیش کی مساجد میں لاؤڈ اسپیکر کے بغیر اذان دینے کی اجازت دے دی۔

بھارتی میڈیا کے مطابق الہ آباد ہائیکورٹ نے کورونا لاک ڈاؤن کے دوران ریاست اترپردیش کی مساجد میں اذان دینے کی اجازت دے دی تاہم لاک ڈاؤن میں اذان کے لیے لاؤڈ اسپیکر کے استعمال کو ممنوع قرار دیاہے۔

دو رکنی عدالتی بینچ نے ریمارکس دیے کہ اذان اسلام کا لازمی حصہ ضرور ہوسکتی ہے لیکن اذان دینے کے لیے لاؤڈ اسپیکر یا کسی اور ڈیوائس کا استعمال مذہب کا لازمی حصہ نہیں۔

عدالت کا اپنے فیصلے میں کہنا تھا کہ ہمارا یہ خیال ہےکہ کہ مؤذن مسجد کے مینار سے بغیر کسی لاؤڈ اسپیکر کے اذان دے سکتا ہے اور اس معاملے میں انتظامیہ کو ہدایت دیتے ہیں کہ وہ کورونا وائرس کے روک تھام کے لیے گائیڈ لائنز کا بہانہ بناکر اس میں رکاوٹ نہ بنے۔

عدالت کا اپنے فیصلے میں کہنا تھا کہ درخواست گزار مسجد میں لاؤڈ اسپیکر کے ذریعے اذان دینے کی اجازت کے لیے اس سلسلے میں کوئی ریکارڈ لانے یا کسی اپیل کو پیش کرنے میں ناکام ہوئے ہیں لہٰذا عدالت کی اجازت کے بغیر لاؤڈ اسپیکر کا استعمال غیر قانونی ہوگا اور عدالت کی اجازت کے برخلاف ہوسکتا ہے۔

لاہور ( وقت ٹی وی آن لائن ) پاکستان شوگر ملز ایسوسی ایشن نے چینی کمیشن کی کارروائی کو جانبدار قرار دے کر مسترد کر دیا اور اور کہا ہے کہ چینی کمیشن سوچے سمجھے منصوبے کے تحت کردار کشی پر مصر ہے۔

پاکستان شوگر ملز ایسوسی ایشن کے سیکرٹری جنرل نے ایف آئی کے ڈائریکٹر جنرل واجد ضیاء کو ایک خط ارسال کیا ہے جس میں چینی کمیشن کی کارروائی کو جانبدار قرار دیتے ہوئے کہا ہے کہ وہ سوچے سمجھے منصوبے کے تحت کردار کشی پر کررہا ہے۔

خط میں کہا گیا ہے کہ شوگر ملز مالکان کمیشن کے سامنے پیش ہی نہیں ہوئے ، کمیشن نے چینی کی لاگت کا تخمینہ غلط لگایا ہے۔

شوگر ملز ایسوسی ایشن نے کمیشن کو عدالت میں بھی چیلنج کرنے کا اعلان کیا ہے۔

خیال رہے کہ وفاقی تحقیقاتی ایجنسی (ایف آئی اے) کی تحقیقاتی رپورٹ میں انکشاف کیا گیا تھا کہ ملک میں چینی بحران کاسب سے زیادہ فائدہ حکمران جماعت کے اہم رہنما جہانگیر ترین نے اٹھایا، دوسرے نمبر پر وفاقی وزیر خسرو بختیار کے بھائی اور تیسرے نمبر پر حکمران اتحاد میں شامل مونس الٰہی کی کمپنیوں نے فائدہ اٹھایا۔

اس حوالے سے وزیراعظم عمران خان کا کہنا تھا کہ وہ اعلیٰ سطح کے کمیشن کی جانب سے مفصل فرانزک آڈٹ کا انتظار کررہے ہیں جو 25 اپریل تک کرلیا جائے گا تاہم بعد ازاں کمیشن کو رپورٹ پیش کرنے کے لیے مزید 3 ہفتوں کی مہلت دی گئی تھی۔

اسلام آباد ( وقت ٹی وی آن لائن ) وفاقی حکومت نے صوبوں سے پبلک ٹرانسپورٹ کھولنے یا نہ کھولنے کے بارے میں سفارشات طلب کر لی ہیں۔

پبلک ٹرانسپورٹر اونرز کی جانب سے پبلک ٹرانسپورٹ کھولنے کا مطالبہ کیا جارہا ہے اس ضمن میں وفاقی حکومت نے صوبوں سے سفارشات مانگ لی ہیں اور صوبے آج این سی او سی کی میٹنگ میں اپنی سفارشات پیش کریں گے۔

پنجاب نے سخت ایس او پیز کے ساتھ ٹرانسپورٹ کھولنے کی سفارشات مرتب کرلی ہیں اور صوبے میں اس بات پر اتفاق ہے کہ سخت ایس اوپیز کے ساتھ پبلک ٹرانسپورٹ کھولنے کی اجاز ت دے دی جائے تاہم صوبوں کی سفارشات کی روشنی میں حتمی فیصلے ہوں گے۔

واضح رہے کہ ملک بھر کورونا کے باعث نافذ لاک ڈاؤن کی وجہ سے پبلک ٹرانسپورٹ بھی تقریباً ڈیڑھ ماہ سے بند ہے جب کہ ٹرین سروس بھی معطل ہے۔

کراچی (وقت ٹی وی آن لائن ) وزیراعلیٰ سندھ مراد علی شاہ نے قومی مالیاتی کمیشن میں مشیر خزانہ عبدالحفیظ شیخ کی شمولیت کی مخالفت کر دی۔

وزیر اعلیٰ سندھ مراد علی شاہ نے وزیر اعظم عمران خان کو خط لکھا جس میں انھوں نے این ایف سی میں مشیر خزانہ عبدالحفیظ شیخ کی شمولیت پر تحفظات کا اظہار کیا۔

مراد علی شاہ کا کہنا ہے تھا کہ مشیر خزانہ کو این ایف سی میں شامل کرنا آئین کی خلاف ورزی ہے، این ایف سی میں نامزدگی وزرائے اعلیٰ کی مشاورت سے ہونی چاہیے۔

انھوں نے ایف این سی میں وفاقی سیکرٹری خزانہ کی شمولیت کو بھی غلط قرار دیا اور کہا کہ مشیر خزانہ قومی مالیاتی کمیشن کی صدارت نہیں کر سکتے۔

مراد علی شاہ کا کہنا تھا کہ این ایف سی کے لیے ارکان کی نامزدگی آئین میں درج طریقہ کار کے خلاف ہے، آئین کے آرٹیکل 160کے تحت نیا این ایف سی تشکیل دیا جائے۔

خیال رہے کہ چند روز قبل وفاقی حکومت نے 10ویں قومی مالیاتی کمیشن کی تشکیل نو کی تھی جس پر صدر مملکت ڈاکٹر عارف علوی نے بھی دستخط کر دیے ہیں۔

این ایف سی کے چیئرمین وزیراعظم عمران خان ہوں گے جب کہ تمام صوبوں کے وزرائے اعلیٰ ، وفاقی سیکرٹری خزانہ اور مشیر خزانہ بھی کمیشن کے رکن ہوں گے۔

قومی مالیاتی کمیشن کی تشکیل نو میں کہا گیا تھا کہ وزیراعظم عمران خان کی عدم موجودگی میں مشیر خزانہ عبدالحفیظ شیخ کمیشن کی صدارت کریں گے۔

یاد رہے قومی اسمبلی میں حکومت کے اتحادی رکن اسمبلی اسلم بھوتانی این ایف سی میں ممبر بلوچستان کے لیے جاوید جبار کے نام پر پہلے ہی اعتراض کر کے عدالت جانے کا اعلان کر چکےہیں۔

لاہور ( وقت ٹی وی آن لائن ) ملک میں کورونا وائرس سے آج اب تک مزید 13 اموات ہوئی ہیں جس کے بعد ہلاکتوں کی مجموعی تعداد 815 ہوگئی جب کہ نئے کیسز سامنے آنے سے مصدقہ مریضوں کی تعداد 38088 تک جاپہنچی ہے۔

اب تک سب سے زیادہ اموات خیبرپختونخوا میں سامنے آئی ہیں جہاں کورونا سے 284 افراد انتقال کرچکے ہیں جب کہ سندھ میں 255 اور پنجاب میں 234 افراد جاں بحق ہوچکے ہیں۔

اس کے علاوہ بلوچستان میں 30، اسلام آباد 7، گلگت بلتستان میں 4 اور آزاد کشمیر ممیں مہلک وائرس سے ایک شخص جاں بحق ہوا ہے۔

کُل ٹیسٹ: 344،450
صحتیاب مریض: 10،155 (کمانڈ اینڈ کنٹرول سینٹر کے مطابق)

آج کے کیسز کی صورتحال
آج بروز جمعہ اب تک ملک بھر سے کورونا کے مزید 928 کیسز سامنے آئے ہیں اور 13 ہلاکتیں ہوئی ہیں جن میں سندھ سے 870 کیسز 12 ہلاکتیں، اسلام آباد44 کیسز ایک ہلاکت اور آزاد کشمیر سے مزید 14 کیسز رپورٹ ہوئے ہیں۔

سندھ
آج سندھ سے کورونا وائرس کے مزید 870 کیسز اور 12 ہلاکتیں سامنے آئیں جس کی تصدیق وزیراعلیٰ سندھ نے کی۔

مراد علی شاہ نے بتایا کہ گزشتہ 24 گھنٹوں میں 5566 ٹیسٹ کیے گئے جن میں سے مزید 870 نئے کیسز ظاہر ہوئے اور 12 ہلاکتیں بھی ہوئی ہیں جس کے بعد صوبے میں کیسز کی مجموعی تعداد 14696اور اموات 255 ہوگئی ہیں۔

وزیراعلیٰ کے مطابق 24 گھنٹوں میں مزید 533 مریض صحتیاب بھی ہوئے جس سے صحتیاب ہونے والوں کی تعداد 3066 ہوگئی ہے۔

اسلام آباد
وفاقی دارالحکومت سے آج کورونا وائرس کے مزید 58 کیسز سامنے آئے ہیں اور ایک ہلاکت بھی ہوئی ہے جو سرکاری پورٹل پر رپورٹ کی گئی ہے۔

سرکاری پورٹل کے مطابق نئے کیسز سامنے آنے کے بعد اسلام آباد میں کیسز کی مجموعی تعداد 866 ہو گئی ہے جب کہ ایک ہلاکت کے بعد دارالحکومت میں وائرس سے جاں بحق افراد کی تعداد 7 ہوگئی ہے۔

آزاد کشمیر
آزاد کشمیر سے آج کورونا کے مزید 14 کیسز سامنے آئے ہیں جو سرکاری پورٹل پر رپورٹ ہوئے ہیں۔

پورٹل کے مطابق علاقے میں کورونا کے مریضوں کی تعداد 105 ہوگئی ہے جب کہ علاقے میں اب تک وائرس سے ایک ہلاکت ہوئی ہے۔

سرکاری پورٹل کے مطابق آزاد کشمیر میں کورونا سے اب تک 76 افراد صحت یاب ہوچکے ہیں۔

خیبرپختونخوا
جمعرات کو خیبر پختونخوا سےکورونا کے مزید 171 کیسز رپورٹ ہوئے ہیں اور 9 ہلاکتیں بھی سامنے آئی ہیں جس کی تصدیق صوبائی محکمہ صحت نے کی۔

محکمہ صحت کے مطابق صوبے میں کورونا کے کیسز کی مجموعی تعداد 5423 اور ہلاکتیں 284 ہوگئی ہیں۔

محکمہ صحت نے بتایا کہ پشاور میں 4، چارسدہ، مردان، صوابی، مالاکنڈ اور سوات میں ایک ایک ہلاکت ہوئی۔

محکمہ صحت کے مطابق مزید 113 افراد کورونا سے صحتیاب ہوئے جس کے بعد صحتیاب ہونے والوں کی تعداد 1505 ہوگئی ہے۔

بلوچستان
بلوچستان سے جمعرات کو کورونا وائرس کے مزید 152 کیسز اور 3 اموات سامنے آئیں جس کی تصدیق صوبائی کورونا پورٹل پر کی گئی۔

صوبے میں کورونا کے مریضوں کی مجموعی تعداد 2310 ہوگئی ہے جب کہ صوبے میں ہلاکتوں کی تعداد 30 تک پہنچ گئی ہے۔

بلوچستان میں اب تک 342 مریض کورونا وائرس سے صحتیاب ہوچکے ہیں۔

پنجاب
پنجاب میں جمعرات کو کورونا کے مزید 11 مریض جاں بحق ہوگئے جس کے بعد انتقال کرجانے والوں کی مجموعی تعداد 234 ہوگئی۔

صوبائی ڈیزاسٹر منیجمنٹ اتھارٹی (پی ڈی ایم اے) پنجاب کے مطابق مزید 353 افراد میں مہلک وائرس کی تشخیص ہوئی جس کے بعد صوبے میں متاثرہ مریضوں کی مجموعی تعداد 13914 تک جاپہنچی ہے۔ صوبے میں 4530 افراد صحت یاب بھی ہوچکے ہیں۔

گلگت بلتستان
گلگت بلتستان میں جمعرات کو مزید 19 افراد میں مہلک وائرس کی تشخیص ہوئی جس کے بعد متاثرہ مریضوں کی تعداد 501 ہوگئی ہے۔

محکمہ صحت گلگت بلتستان کے مطابق مہلک وائرس سے اب تک 4 ہلاکتیں ہوئی ہیں جب کہ کورونا سے متاثرہ 339 افراد صحت یاب ہو چکے ہیں۔