All posts by EMRA

اسلام آباد (وقت ٹی وی آن لائن ) چیئرمین نیشنل ڈیزاسٹر مینجمنٹ اتھارٹی (این ڈی ایم اے) لیفٹیننٹ جنرل محمد افضل کا کہنا ہے کہ پاکستان میں کورونا کےحوالے سے صورت حال بہتری کی طرف جا رہی ہے۔

چیئرمین این ڈی ایم اے لیفٹیننٹ جنرل محمد افضل نے گورنر ہاؤس لاہور میں گورنرپنجاب چوہدری سرور سے ملاقات کی۔

اس موقع پر لیفٹیننٹ جنرل محمد افضل کا کہنا تھا کہ اسمارٹ لاک ڈاؤن کے اچھے نتائج آنا شروع ہوئےہیں۔

انہوں نے کہا کہ پاکستان میں کورونا کےحوالے سے صورت حال بہتری کی طرف جا رہی ہے تاہم ہمیں عید پر بھی کورونا سے بچاؤ کے لیے حفاظتی اقدامات کو یقینی بنانا ہو گا۔

گورنرپنجاب چوہدری سرور نےکورونا کے خلاف این ڈی ایم اے کے کردار کو سراہا۔

ان کا کہنا تھا کہ ڈاکٹرز سمیت 13 لاکھ افراد میں میڈیکل کٹس، ماسک اور سینی ٹائزر تقسیم کیےگئے ہیں جب کہ 13لاکھ سے زائد غریب خاندانوں کو راشن فراہم کیا گیا ہے۔

کراچی (وقت ٹی وی آن لائن ) وفاقی تحقیقاتی ادارے (ایف آئی اے) نے کراچی میں کارروائی کرتے ہوئے بھارتی خفیہ ایجنسی ’را‘ سے تعلق کے الزام میں فائربریگیڈ کے ملازم کو 2 ساتھیوں سمیت گرفتار کرلیا۔

ایف آئی اے حکام کے مطابق ملزمان کو انسداد دہشت گردی ونگ نے سوک سینٹر، لیاقت آباد اور خالد بن ولید روڈ سے گرفتار کیا، ملزمان میں ظفر خان، سفیان اور جاوید میمن شامل ہیں جب کہ ملزمان کے قبضے سے اسلحہ، لیپ ٹاپ اور موبائل فونز برآمد ہوئے ہیں۔

ایف آئی اے حکام کے مطابق گرفتار ملزم ظفر خان ’را‘ کے ایما پر بم دھماکوں اور ٹارگٹ کلنگ میں ملوث رہا، ملزم نے بھارت میں 14 ماہ تک دہشت گردی کی ٹریننگ لی اور ملزم کو دہلی میں محمود صدیقی گروپ نے عسکری تربیت دلوائی، ملزمان کی کارروائیوں کے شواہد بھی ملے ہیں۔

حکام کے مطابق ملزم ظفر کراچی میں شہری حکومت کے محکمہ فائر بریگیڈ کا ملازم ہے اور تعلق ایم کیوایم لندن سے رکھتا ہے، ملزم بم بنانے اور جدید ہتھیار چلانے کا ماہر ہے جب کہ ملزم سے جڑے حوالہ ہنڈی کے بین الاقوامی خفیہ نیٹ ورک کا بھی پردہ چاک کیا ہے۔

حکام نے بتایا کہ ’را‘ سلیپر سیل کو فنڈز فراہم کرنے والے منی ایکسچینج کمپنی کے 2 ملزمان بھی گرفتار کیے گئے ہیں جن میں ملزم سفیان منی ایکسچینج کمپنی کا ڈائریکٹر اور جاوید میمن مینیجر ہے۔

ایف آئی اے حکام کا کہنا ہے کہ حوالہ ہنڈی کے ذریعے ملک دشمن عناصر کو یہی ملزمان رقوم فراہم کرنے میں ملوث تھے، ملزمان کے ساتھیوں کی تفصیلات ملک کے تمام ائیرپورٹس پر فراہم کردی گئیں۔

ایف آئی اے کے مطابق ملزمان کے خلاف مقدمہ درج کرکے مزید تحقیقات شروع کردی گئی ہیں۔

اسلام آباد (وقت ٹی وی آن لائن ) سپریم کورٹ نے ججز کی توہین اورجسٹس قاضی فائز عیسیٰ کو قتل کی دھمکیاں دینے والے ملزم مرزا افتخار الدین آغا پر فرد جرم عائد کر دی۔

اعلیٰ عدلیہ کے ججز کی توہین اور جسٹس فائز عیسی کو قتل کی دھمکیوں سے متعلق کیس کی سماعت چیف جسٹس گلزار احمد کی سربراہی میں تین رکنی بینچ نے کی۔

ملزم آغا افتخارالدین کو جیل حکام اپنی تحویل میں سپریم کورٹ لےکرآئے جب کہ ایف آئی اے کے متعلقہ افسران بھی سپریم کورٹ میں پیش ہوئے۔

مرزا افتخار الدین آغا نے عدالت میں مؤقف اپنایا کہ میں اپنے ویڈیو بیان پر تہہ دل سے معذرت خواہ ہوں، میں انتہائی شرمندہ ہوں، قانون کے علاوہ بطور مسلمان بھی معافی چاہتا ہوں۔

چیف جسٹس نے ریمارکس دیے کہ یہ معافی والا کیس نہیں ہے، آپ عدالت سے مذاق نہیں کر سکتے، اس طرح تو پاکستان کا سارا نظام فیل ہو جائے گا۔

جسٹس اعجاز الاحسن نے کہا کہ آپ مسجد کے منبر پر بیٹھ کر وہ زبان استعمال کر رہے تھے جو کوئی جاہل آدمی بھی استعمال نہیں کر سکتا۔

دوران سماعت چیف جسٹس نے اٹارنی جنرل کو مخاطب کرتے ہوئے کہا کہ جسٹس قاضی فائز عیسیٰ کی اہلیہ کا بیان حلفی عدالت میں جمع کرایا گیا ہے،کیا آپ نے بیان حلفی پڑھا ہے۔

اٹارنی جنرل نے کہا کہ مجھے بیان حلفی نہیں ملا، جس پر چیف جسٹس نے ریمارکس دیے کہ اسے پڑھیں اور جواب دیں۔

عدالت نے ایف آئی اے اور سی ٹی ڈی کی رپورٹس پر بھی اظہار عدم اطمینان کیا اور کہا کہ اٹارنی جنرل صاحب یہ محکمےکیاکر رہے ہیں؟ معاملے کو سنجیدہ نہیں لے رہے۔

جسٹس گلزار احمد نے کہا کہ تحقیقاتی رپورٹس میں کوئی ٹھوس چیز موجود نہیں ہے، یہ ایک جج کا معاملہ نہیں بلکہ پوری عدلیہ کی کردار کشی کی گئی ہے۔

سپریم کورٹ نے مرزا افتخار الدین کی جانب سے داخل کرائے گئے گزشتہ تحریری جواب پر عدم اطمینان کا اظہار کرتے ہوئے ان پر فرد جرم عائد کر دی اور ملزم کو جواب جمع کرانے کے لیے ایک ہفتے کی مہلت دیدی۔

عدالت عظمیٰ کی جانب سے مرزا افتخارالدین آغا کو فرد جرم کی کاپی بھی فراہم کر دی گئی۔

خیال رہے کہ آغاافتخارالدین مرزا نے اعلیٰ عدلیہ اور ججز کے خلاف توہین آمیز کلمات پرمشتمل ویڈیو وائرل کی تھی جس پر عدالت عظمٰی نے گزشتہ سماعت پر ملزم کو پیش ہونےکا حکم دیا تھا۔

کراچی (وقت ٹی وی آن لائن ) سندھ میں ایس او پیز کےمویشی منڈیاں لگانے کی اجازت دے دی گئی ہے تاہم بچوں کے داخلے پر پابندی عائد ہو گی۔

وزیر اعلیٰ سندھ مراد علی شاہ کی زیر صدارت اجلاس ہوا جس میں صوبے بھر میں مویشی منڈیاں کھولنے کی اجازت دے دی گئی۔

ترجمان وزیر اعلیٰ سندھ کے مطابق تمام مویشی منڈیاں ایس او پی کے تحت کھولی جائیں گی، محکمہ داخلہ آج مویشی منڈیوں سے متعلق ایس او پی جاری کر دے گا۔

اجلاس میں فیصلہ کیا گیا کہ گلی محلوں میں مویشی منڈیاں لگانے کی اجازت نہیں ہو گی اور بچوں کے مویشی منڈیوں میں بچوں کے جانے پر پابندی ہو گی۔

وزیراعلیٰ سندھ نے ڈپٹی کمشنرز کو ہدایت کی کہ گلی محلوں میں لگنے والی مویشی منڈیوں کے خلاف کاروائی کریں۔

وزیر اعلیٰ ہاؤس میں ہونے والے اجلاس میں فیصلہ کیا گیا کہ محکمہ بلدیات مویشی منڈیوں سے ٹیکس نہیں وصول کرے گا، منڈی منتظمین کوپابند کیا جائے گا کہ ایس او پیز پر عمل کرائیں۔

وزیراعلیٰ سندھ نے عوام سے اپیل کی کہ بلا وجہ مویشی منڈیوں میں جانے سے گریز کریں جب کہ مویشی منڈیوں میں موجود موبائل ٹیم کو کورونا وائرس کے ٹیسٹ کی ہدایت کی گئی ہے۔

وزیراعلیٰ سندھ کا کہنا ہے کہ جانوروں کی قربانی کے لیے مخصوص جگہ بنائی جائیں، اگر گلی گلی میں جانور ذبح کیے جائیں گے تو بیماریاں پھیلیں گی۔

ترجمان وزیراعلیٰ سندھ کا کہنا ہے کہ قربانی کے لیے یونین کونسل سطح پر مخصوص جگہ بنانے کا فیصلہ کیا گیا ہے۔

اس کے علاوہ اجلاس میں کورونا کے ہاٹ اسپاٹ علاقوں میں ٹیسٹ زیادہ کرنے کا فیصلہ بھی کیا گیا ہے۔

وزیراعلیٰ سندھ کا کہنا ہے کہ صوبائی حکومت مفت ٹیسٹ کر رہی ہے، اور مزید ٹیسٹ بھی کریں گے، کسی کوبھی علامات محسوس ہوں تو کورونا کا ٹیسٹ ضرورکرائے۔

اسلام آباد (وقت ٹی وی آن لائن ) عمران خان عمران خان کا کہنا ہے کہ مشکل فیصلے کرنے والی قومیں ہی ترقی کرتی ہیں۔

چلاس میں عوامی اجتماع سے خطاب کرتے ہوئے وزیر اعظم عمران خان کا کہنا تھا کہ جب قومیں آگے کا سوچتی ہیں تو ترقی کرتی ہیں، جو قومیں مشکل فیصلے سے کرنے سے کتراتی ہیں، وہ ترقی نہیں کرسکتیں۔

ان کا کہنا تھا کہ مشکل فیصلے کرنے والی قومیں ہی ترقی کرتی ہیں، چین کی ترقی کی مثال ہمارے سامنے ہے۔

انہوں نے مزید کہا کہ بدقسمتی سے ہم نے ماضی میں قلیل مدتی فیصلے کیے، نوے کی دہائی میں تیل سے بجلی بنانے کے غلط فیصلے کیے گئے، دریاوں سے بجلی بنانے کے بجائے تیل پر بجلی بنانے کو ترجیح دی گئی۔

وزیراعظم نے کہا کہ ہماری حکومت آئی تو پاکستان کا خسارہ 20 ارب ڈالر تھا، غلط فیصلوں سے ملک کی صنعتی ترقی کو نقصان پہنچا۔

انہوں نے کہا کہ دیامر بھاشا ڈیم ملک کا تیسرا بڑا ڈیم ہو گا، ہم نے ملک میں 10 ارب درخت لگانے کا فیصلہ کیا ہے۔

ان کا کہنا تھا کہ کورونا کہ وجہ سے شٹ ڈاون کرنے سے بے روزگاری میں اضافہ ہوا، وزیر اعلیٰ کو کہتا ہوں کہ ایس او پیز کے تحت سیاحت کو کھولیں، سیاحت کےلیے ایس او پیز مرتب کیے جائیں۔

قبل ازیں وزیراعظم عمران خان کو دیامر بھاشا ڈیم کے تعمیراتی کام کے حوالے سے بریفنگ دی گئی، اس موقع پر آرمی چیف جنرل قمر جاوید باجوہ، ڈی جی آئی ایس آئی لیفٹیننٹ جنرل فیض حمید اور چیئرمین سی پیک اتھارٹی عاصم باجوہ بھی موجود تھے۔

اسلام آباد (وقت ٹی وی آن لائن ) چیئرمین سینیٹ صادق سنجرانی نے انٹرنیشنل پارلیمنٹری یونین (آئی پی یو) کے صدرکا الیکشن لڑنے کا اعلان کیا ہے۔

انٹرنیشنل پارلیمنٹری یونین کے صدر کاانتخاب رواں برس دسمبر میں ہوگا جس میں 179ممبر ممالک حصہ لیں گے۔

رپورٹ کے مطابق اسپیکر قومی اسمبلی اسد قیصر کی جانب سے چیئرمین سینیٹ صادق سنجرانی کو نامزد کیا گیا ہے۔

ذرائع کے مطابق چیئرمین سینیٹ نے آج اسلام آباد میں وزیراعظم عمران خان سے قانون سازی اور پارلیمانی امور سمیت انٹرنیشنل پارلیمانی یونین کے انتخاب سے متعلق تبادلہ خیال کیا ہے۔

کراچی (وقت ٹی وی آن لائن ) جمعیت علمائے اسلام کے رہنما مولانا فضل الرحمان نے چیئرمین پیپلز پارٹی بلاول بھٹو زرداری اور آصف علی زرداری سے ملاقات کی۔

ڈیڑھ گھنٹے تک جاری رہنے والی ملاقات میں اہم سیاسی امور پر گفتگو کی گئی۔

سابق صدر آصف زرداری، مولانا فضل الرحمن سے ملاقات کیلئے کئی ماہ بعد کیمرے کے مقابل آئے تو کورونا سے بچاو کیلئے ماسک اور گلوز کے علاوہ فیس شیلڈ بھی لگا رکھی تھی۔

بلاول ہاؤس کراچی میں ڈیڑھ گھنٹے سے زائد جاری رہنے والی ملاقات میں بلاول بھٹو بھی شریک ہوئے۔

اس موقع پر 18ویں آئینی ترمیم اور قومی مالیاتی کمیشن (این ایف سی) ایوارڈ پر غیر لچکدار مؤقف اپنانے پر اتفاق کیا گیا۔

آصف علی زرداری نے کہا کہ عوام دشمن بجٹ اور این ایف سی ایوارڈ پر کوئی سمجھوتا نہیں ہوگا۔ پہلے ہی کہہ دیا تھا کہ عمران خان حکومت چلانے کے اہل نہیں۔ عوام امید بھری نظروں سےاپوزیشن جماعتوں کی طرف دیکھ رہے ہیں کہ وہ انہیں سلیکٹڈ حکومت سے نجات دلائیں۔

سابق صدرنے کہا کہ کورونا وائرس سے پیدا ہونے والے بحران میں عمران خان کی نااہلی کھل کر سامنے آچکی ہے۔

اس موقع پر بلاول بھٹو نے کہا کہ پاکستان اور عمران خان ساتھ ساتھ نہیں چل سکتے، انہوں نے کوئی ایک ایسا کام نہیں کیا جو عوامی مفاد میں ہو۔ ملک کی تمام اپوزیشن جماعتیں سلیکٹڈ حکومت کے خلاف ایک پیج پر ہیں۔

مولانا فضل الرحمان نے کہا کہ پی ٹی آئی حکومت نے ملکی معیشت کو دیوار سے لگادیا ہے۔ اگر معیشت کو بچانا ہے تو سب نے ملک کر سلیکٹڈ حکمرانوں کا مقابلہ کرنا ہوگا۔

استنبول (وقت ٹی وی آن لائن ) ترک صدر رجب طیب اردوان نے تاریخی اہمیت کی حامل عمارت آیا صوفیا کو میوزیم سے مسجد میں تبدیل کرنے کے صدارتی حکم نامے پر دستخط کر دیے۔

غیر ملکی میڈیا کے مطابق ترکی کی اعلیٰ عدالت کونسل آف اسٹیٹ کی جانب سے آیا صوفیا کو میوزیم سے مسجد میں تبدیل کرنے کے حق میں فیصلہ آتے ہی ترک صدر نے صدارتی فرمان پر دستخط کردیے۔

صدارتی حکم کے بعد آیا صوفیا کی میوزیم کی حیثیت ختم ہوگئی ہے اور اس کا کنٹرول محکمہ مذہبی امور نے سنبھال لیا ہے۔

ترکی کی اعلیٰ عدلیہ کونسل آف اسٹیٹ نے اپنے فیصلے میں کہا ہے کہ 24 نومبر 1934ءکا حکومتی فیصلہ جس میں اس عمارت کی مسجد کی حیثیت ختم کرکے میوزیم میں تبدیل کیا گیا وہ قانون سے مطابقت نہیں رکھتا ہے۔

عدالتی فیصلے کے مطابق آیا صوفیا سلطان فاتح محمد ٹرسٹ کی ملکیت ہے جسے مسجد کے طور پر عوام کی خدمت کے لیے پیش کیا گیا تھا اور آیا صوفیا ٹرسٹ کی دستاویز میں واضح طور پر لکھا ہوا ہے کہ آیا صوفیا کو مسجد کے علاوہ کسی اور مقصدکے لیے استعمال نہیں کیا جاسکتا۔

واضح رہے کہ استنبول میں قائم یہ عمارت چھٹی صدی میں بازنطینی بادشاہ جسٹنیئن اول کے دور میں بنائی گئی تھی اور تقریباً 1000 سال تک یہ دنیا کا سب سے بڑا گرجا گھر تھی۔

1453ء میں استنبول(قسطنطنیہ) کی فتح کے بعد سلطنتِ عثمانیہ نے اسے مسجد میں تبدیل کردیا تھا اور پھر اس کے بعد یہ تقریباً پونے500 سال تک مسجد رہی تاہم 1934ء میں جدید ترکی کے بانی مصطفٰی کمال اتاترک کے دور حکومت میں اسے ایک میوزیم میں تبدیل کردیا گیا اور اِس وقت یہ عمارت اقوام متحدہ کے عالمی ورثے کی فہرست میں بھی شامل ہے۔

یاد رہے کہ ترک صدر رجب طیب اردوان انتخابی مہم کے دوران متعدد مرتبہ آیا صوفیا کو ایک مرتبہ پھر مسجد بنانے کا وعدہ کیا تھا۔

سانگھڑ (وقت ٹی وی آن لائن ) شہدادپور میں پولیس نے منشیات فروخت کرنے کے الزام میں خاتون کو گرفتار کرکے مقدمہ درج کرلیا۔

پولیس کے مطابق کارروائی شہدادپور کی راجپوت کالونی میں کی گئی جہاں مبینہ طور پر خاتون گھر سے منشیات کا اڈا چلارہی تھی۔

پولیس کا کہنا ہے کہ ملزمہ کو گرفتار کرکے گھر سے ایک کلو 90 گرام چرس برآمد کرلی گئی ہے جب کہ ملزمہ کے خلاف مقدمہ درج کرکے لاک اپ کردیا گیا ہے۔

لاہور (وقت ٹی وی آن لائن ) حکومت مہنگائی کنٹرول نہ کر سکی اور ایک ہفتے کے دوران چینی کی فی کلو قیمت میں 2 روپے 14 پیسے کا بڑا اضافہ دیکھنے میں آیا۔

ادارہ شماریات نے مہنگائی پر ہفتہ وار رپورٹ جاری کر دی جس کے مطابق 18 اشیائے ضروریہ کی قیمتوں میں اضافے کے ساتھ مہنگائی کی شرح میں 0.89 فیصد اضافہ ہوا۔

رپورٹ میں کہا گیا ہے کہ چینی کی اوسط قیمت میں 2 روپے 14 پیسے فی کلو اضافے کے بعد چینی کی قیمت 80.82 روپے سے بڑھ کر 82.96 روپے فی کلو ہو گئی جب کہ ٹماٹر فی کلو 29 روپے مہنگا ہونے کے بعد اس کی قیمت 96.50 پیسے فی کلو ہو گئی۔

پیاز 4 روپے فی کلو، 200 گرام سرخ مرچ 16 روپے، انڈے فی درجن ساڑھے 4 روپے مہنگے ہوئے۔

اس کے علاوہ چکن، بڑا گوشت، چھوٹا گوشت، تازہ دودھ ، چاول ، گڑ، دال چنا کی قیمتوں میں بھی اضافہ ریکارڈ کیا گیا۔

ادارہ شماریات کے مطابق ایک ہفتے کے دوران کیلے فی درجن 5 روپے، آٹے کا 20 کلو کا تھیلا 6 روپے، ایل پی جی کا سلنڈر بھی 6 روپے سستا ہوا جب کہ دال ماش، لہسن، گھی کی قیمتوں میں بھی کمی ریکارڈ کی گئی۔

رپورٹ کے مطابق ایک ہفتے میں 22 اشیا کی قیمتوں میں استحکام رہا۔