All posts by Dua Tariq

نیا مالی سال 24-2023ء شروع ہوتے ہی ترقیاتی فنڈز کا اجراء شروع ہو گیا۔

وزارتِ خزانہ کے مطابق 959 ارب روپے کے ترقیاتی پروگرام سے 142 ارب 50 کروڑ روپے جاری کر دیے گئے ہیں۔

پارلیمنٹیرینز کی ترقیاتی اسکیموں کے لیے 61 ارب 26 کروڑ روپے، مقامی ترقیاتی پروگرام کے لیے 131 ارب روپے جاری کیے گئے ہیں۔

بیرونی ترقیاتی معاونت کی مد میں 11 ارب 50 کروڑ روپے جاری کیے گئے ہیں جبکہ ابتدائی 3 ماہ میں مزید 69 ارب 74 کروڑ روپے دستیاب ہوں گے۔

موجودہ مالی سال پبلک پرائیویٹ پارٹنر شپ کے تحت 200 ارب روپے اضافی خرچ ہوں گے، اس سال مجموعی طور پر 1150 ارب روپے کا وفاقی ترقیاتی پروگرام منظور کیا گیا ہے۔

وزارتِ خزانہ کے مطابق 20 ارب 26 کروڑ روپے پچھلے سال کے رہتے تھے وہ جاری ہوئے ہیں، نئے بجٹ میں سے بھی ارکانِ پارلیمنٹ کے لیے 41 ارب روپے جاری ہوئے ہیں، کُل61 ارب 26 کروڑ روپے جاری کیے گئے ہیں۔

وزارتِ خزانہ کا یہ بھی کہنا ہے کہ ایس ڈی جیز کے لیے اس سال 90 ارب روپے رکھے گئے ہیں۔

الیکشن کمیشن آف پاکستان (ای سی پی) نے ووٹرز کا ڈیٹا جاری کر دیا، ملک میں ووٹرز کی تعداد 12 کروڑ 60 لاکھ 66 ہزار 874 ہوگئی۔

الیکشن کمیشن کے اعداد و شمار کے مطابق مرد ووٹرز 6 کروڑ 80 لاکھ 99 ہزار 615 ہیں جبکہ خواتین ووٹرز کی تعداد 5 کروڑ 79 لاکھ 67 ہزار 259 ہے۔

ملک میں مرد ووٹرز کی شرح 54.02 فیصد اور خواتین ووٹرز کی شرح 45.98 فیصد ہے۔

اسلام آباد میں ووٹرز کی تعداد 10 لاکھ 35 ہزار 387 ہے جبکہ پنجاب میں 7 کروڑ 16 لاکھ 6 ہزار 378 ووٹرز ہیں۔

الیکشن کمیشن کے مطابق سندھ میں ووٹرز کی تعداد 2 کروڑ 65 لاکھ 29 ہزار 136 ہے، خیبر پختونخوا میں 2 کروڑ 16 لاکھ 21 ہزار 211 ووٹرز ہیں جبکہ بلوچستان میں ووٹرز کی تعداد 52 لاکھ 74 ہزار 761 ہے۔

اسلام آباد میں مرد ووٹرز کی شرح 52.51 فیصد اور خواتین کی 47.49 فیصد ہے، پنجاب میں مرد ووٹرز کی شرح 53.64 اور خواتین کی 46.35 فیصد ہے۔

سندھ میں مرد ووٹرز کی شرح 54.23 اور خواتین کی 45.77 فیصد ہے، خیبرپختونخوا میں مرد ووٹرز کی شرح 54.56 اور خواتین کی 45.44 فیصد ہے۔

بلوچستان میں مرد ووٹرز کی شرح 56.17 اور خواتین کی 43.83 فیصد ہے۔

ووٹرز کی عمروں کا ڈیٹا بھی جاری

الیکشن کمیشن نے ووٹرز کی عمروں کا ڈیٹا بھی جاری کر دیا، 18 سے 25 سال کے ووٹرز کی تعداد 2 کروڑ 35 لاکھ 26 ہزار 34 ہے۔

اعداد و شمار کے مطابق ملک میں 26 سے 35 سال کے ووٹرز کی تعداد 3 کروڑ 26 لاکھ 70 ہزار 445 ہے۔ جبکہ 2 کروڑ 77 لاکھ 66 ہزار 976 ووٹرز ایسے ہیں جن کی عمر 36 سے 45 سال کے درمیان ہے۔

46 سے 55 سال ووٹرز کے 1 کروڑ 81 لاکھ 19 ہزار 968 ووٹرز ہیں جبکہ 56 سے 65 سال کے ووٹرز کی تعداد 1 کروڑ 18 لاکھ 92 ہزار 635 ہے۔

الیکشن کمیشن نے مزید بتایا کہ 66 سال سے زائد عمر کے ووٹرز کی تعداد 1 کروڑ 20 لاکھ 90 ہزار 816 ہے۔

پشاور میں سابق وزیرِ اعلیٰ خیبر پختون خوا و سابق وزیرِ دفاع پرویز خٹک نے پی ٹی آئی کے سابق صوبائی وزیر ہشام انعام اللّٰہ سے ملاقات کی ہے۔

ذرائع کا کہنا ہے کہ پرویز خٹک نے پی ٹی آئی کے سابق صوبائی وزیر ہشام انعام اللّٰہ کو ملاقات کے دوران اپنی پارٹی میں شمولیت کی دعوت دی ہے۔

پرویز خٹک کا ہشام انعام اللّٰہ سے کہنا ہے کہ نئی پارٹی بنا رہا ہوں، اس میں شمولیت اختیار کریں۔

اس موقع پر ہشام انعام اللّٰہ نے پرویز خٹک سے شکوہ کیا کہ آپ مجھے پی ٹی آئی میں لائے، بعد میں آپ نے میری حمایت نہیں کی۔

پرویز خٹک نے انہیں جواب دیا کہ میرے ساتھ بھی برا ہوا ہے، مجھے خود سائیڈ لائن کیا گیا تھا۔

ہشام انعام اللّٰہ نے پرویز خٹک کو جواب دیا کہ سیف اللّٰہ برادران سے مشورہ کر کے آپ کو آگاہ کروں گا۔

امریکا کے کئی علاقوں میں گرمی خطرناک حد تک پہنچ جانے کی پیش گوئی کی گئی ہے۔

فلوریڈا سے لے کر کیلی فورنیا اور واشنگٹن تک، امریکا کی تقریباً ایک تہائی آبادی کو شدید گرمی کی وارننگ جاری ہو چکی ہے۔

دنیا کے گرم ترین علاقوں میں سے ایک کیلی فورنیا کی موت کی وادی میں درجہ حرارت  54  ڈگری سینٹی گریڈ تک پہنچنے کا امکان ہے۔

بھارتی ریاست اوڈیشا کے ایک نیوز چینل نے آرٹیفیشل انٹیلیجنس پر مبنی پہلی نیوز اینکر ’لیزا‘ کو متعارف کروایا ہے۔

بھارتی نیوز چینل کی جانب سے حال ہی میں ٹوئٹر پر شیئر کی گئی ایک ویڈیو میں اے آئی نیوز اینکر لیزا نے انتہائی جاندار اور اعتماد کے ساتھ اپنا تعارف کروایا۔

بھارتی میڈیا رپورٹس کے مطابق اے آئی نیوز اینکر لیزا کے پاس متعدد زبانیں بشمول اوڈیا، انگریزی اور دیگر بولنے کی صلاحیت موجود ہے۔

ریاست اوڈیشا سے تعلق رکھنے والے ٹی وی ’او ٹی وی‘  نے لیزا سے متعلق جاری کیے گئے اپنے بیان میں کہا ہے کہ لیزا کی اوڈیا زبان میں مہارت کو مزید بڑھانے کے لیے کوششیں جاری ہیں۔

واضح رہے کہ بھارتی صحافت کے شعبے میں اے آئی پر مبنی نیوز اینکر، لیزا مصنوعی ذہانت کی حامل پہلی نیوز اینکر نہیں ہے، دو سال قبل چین نے بھی اپنے اے آئی نیوز اینکر ’شنہوا‘ کو متعارف کرایا تھا۔

چینی اے آئی نیوز اینکر ’شنہوا تھری ڈی میں انسانی آوازوں، اشاروں اور طرز عمل کی نقل کر سکتا ہے۔

دوسری جانب رواں سال کے آغاز میں بھارتی میڈیا ہاؤس ’انڈیا ٹوڈے‘ گروپ نے بھی اپنی اے آئی نیوز اینکر ’ثنا‘ کو متعارف کروایا تھا۔

صحافت میں اب ’لیزا‘ نامی ایک اور اے آئی (Artificial Inteligence) کا قدم رکھنا اس بات کا ثبوت ہے کہ میڈیا انڈسٹری میں اے آئی کے استعمال کو آگے بڑھایا جا رہا ہے۔

جیمز ویب اسپیس ٹیلی اسکوپ نے سُپر سائز کا انتہائی قدیم بلیک ہول دریافت کر لیا۔

ماہرین کا خیال ہے کہ یہ بلیک ہول آج سے 13 ارب سال پہلے وجود میں آیا، یہ بلیک ہول ایک انتہائی عمر رسیدہ کہکشاں میں واقع ہے۔ 

ماہرین کا کہنا ہے کہ یہ کہکشاں بِگ بینگ کے 570 ملین سال بعد وجود میں آئی تھی۔ 

امریکی خلائی ادارے ناسا کے مطابق اس سُپر سائز بلیک ہول کا حجم ہمارے سورج سے 90 لاکھ گنا زیادہ بڑا ہے۔

سعودی عرب میں 2 شہریوں کو سزائے موت دے دی گئی ہے۔

2 سعودی شہریوں کو سزائے موت دیے جانے کی تصدیق سعودی وزارتِ داخلہ کی جانب سے کی گئی ہے۔

دونوں شہریوں نے سیکیورٹی اہلکار کو فائرنگ کر کے زخمی کیا اور فورس کی گاڑی پر حملہ کیا تھا۔سعودی وزارتِ داخلہ کے مطابق دونوں شہریوں نے ملک میں بد امنی پھیلانے کے لیے اسلحہ بھی جمع کیا تھا۔

روس کے زیر انتظام یوکرینی علاقے کریمیا کے پل پر ڈرون سے حملہ کیا گیا جس سے پل کو جزوی نقصان پہنچا ہے۔

روس کے مطابق یوکرین کی اسپیشل سروسز کے کریمیا کے پل پر ڈرونز حملے میں 2 افراد ہلاک ہوئے۔

روسی وزارت ٹرانسپورٹ نے کہا ہے کہ یوکرینی حملے سے کریمیا کے قریب پل کی سڑک کو نقصان پہنچا ہے، پل کے ستونوں کو کوئی نقصان نہیں پہنچا۔

غیر ملکی خبر رساں ادارے کے مطابق روس کو کریمیا سے ملانے والے پل پر حملے کے بعد ٹریفک  کو روک دیا گیا ہے۔

میڈیا رپورٹس کے مطابق  کریمیا کا پل روسی فوج کی سپلائی لائن کے لیے کلیدی حیثیت رکھتا ہے

کراچی : اداکار عماد عرفانی نے بیٹے زاویار عرفانی کے انتقال کے بعد سوشل میڈیا پر پہلی پوسٹ شئیر کردی۔عماد عرفانی نے سوشل میڈیا پوسٹ میں 2 ماہ قبل انتقال کرجانے والے بیٹے زاویار عرفانی کو مخاطب کرتے ہوئے کہا کہ تم میری بہترین امید تھے اور ہمیشہ رہو گے۔ میں ہمیشہ تم سے پیار اور تم کو یاد کرتا رہوں گا۔ عماد عرفانی نے مزید کہا کہ تم میری زندگی کی بہترین نعمتوں میں سے ایک ہو۔ مجھے یہ بتانے کے لیے کہ تم میں ایسا کچھ تھا جس پر میں یقین کرتا ہوں تمہارا شکریہ۔

لاہور : اداکارہ ریشم نے کہا ہے کہ پاکستان کے عوام اپنے اداکاروں سے زیادہ بھارتی اداکاروں کی عزت کرتے ہیں۔ریشم نے ایک ٹاک شو میں بات کرتے ہوئے کہا کہ ہمسایہ ملک بھارت نے جو چاہا وہ حاصل کرلیا۔ اپنی فلمیں دکھا دکھا کر ایسا کردیا کہ پاکستانی عوام شاید ہماری اتنی عزت نہیں کرتے جتنا بھارتی اداکاروں کی کرتے ہیں۔ اداکارہ نے کہا کہ جن لوگوں کے لیے ہم محبت سے کام کرتے ہیں اور آج تک اپنے عوام پر صدقے واری جاتے ہیں یہی عوام ہمیں خودکشی کرنے پر مجبور کردیتے ہیں۔ سوشل میڈیا نہیں تھا تو سکون تھا اب انسان اذیت میں مبتلا ہوجاتا ہے۔ اداکارہ نے 2022 میں خود پر ہونے والی ٹرولنگ کے بارے میں بات کرتے ہوئے کہا کہ چارسدہ میں دریا میں مچھلیوں کو خوراک دینے کے بعد پلاسٹک کی تھیلی دریا میں پھینکنے پر جو ٹرولنگ ہوئی لگتا تھا کہ پوری دنیا کا کچرا پھینک دیا ہے۔ اس غلطی پر معافی مانگ لی تھی لیکن اس کے باوجود لوگوں نے جینا حرام کردیا۔ غلطیاں سب سے ہوتی ہیں۔ ہم انسان ہیں فرشتہ نہیں۔ریشم نے کہا کہ ڈپریشن سے متعلق ذاتی رائے دی تھی۔ اگر کسی کو کوئی ذہنی بیماری ہے تو وہ دوا لے اور علاج کروائے۔ میرا تجربہ یہ ہے کہ ہر مشکل میں مجھے صرف اللہ تعالیٰ کی ذات تھامنے والی ہے۔ والدین کے بغیر پرورش پائی۔ زندگی میں بہت سی محرومیاں تھیں۔ ہر مشکل میں صرف اللہ کو پکارتی ہوں۔