All posts by News Editor

صدر مملکت ڈاکٹر عارف علوی نے آئی ایس آئی ہیڈ کوارٹر کا دورہ کیا، ڈائریکٹر جنرل آئی ایس آئی لیفٹنٹ جنرل فیض حمید نے صدر مملکت کا استقبال کیا۔

آئی ایس آئی ہیڈ کوارٹر میں صدر مملکت عارف علوی کو مجموعی قومی سلامتی بشمول افغانستان کی صورتحال پر بریفنگ دی گئی۔ عارف علوی کو ان کی خصوصی دلچسپی کے شعبے سائبر سیکورٹی پر بھی بریفنگ دی گئی۔ صدر پاکستان نے قومی سلامتی کیلئے آئی ایس آئی کی کاوشوں کی تعریف کی۔ عارف علوی نے پیشہ وارا نہ تیاری پر اطمینان کا اظہار کیا۔

ترجمان دفترخارجہ زاہد حفیظ چوہدری نے کہا ہے کہ پاکستان 17 سے 19 جولائی تک افغانستان پر امن کانفرنس کی میزبانی کرے گا اور افغان قیادت نے شرکت کی یقین دہائی کرا دی ہے۔

ترجمان دفتر خارجہ نے صحافیوں کو ہفتہ وار بریفنگ کے دوران بتایا کہ پاکستان 17 سے 19 جولائی تک افغانستان پر امن کانفرنس کی میزبانی کر رہا ہے، افغان قیادت اور دیگر رہنماؤں کو کانفرنس میں شرکت کی دعوت دی گئی ہے۔

انہوں نے کہا کہ افغان قیادت نے کانفرس میں شرکت کی یقین دہانی کروائی ہے۔

ان کا کہنا تھا کہ پاکستان ہمیشہ سے افغانستان میں دیرپا قیام امن و استحکام کا خواہاں رہا ہے، افغانستان میں سیکیورٹی کے معمولی خلا کو دہشت گرد عناصر اور دیگر قوتیں پاکستان کے خلاف استعمال کر سکتی ہیں۔

ترجمان دفترخارجہ نے خبردار کرتے ہوئے کہا کہ پاکستان مزید افغان مہاجرین کی میزبانی کا متحمل نہیں ہو سکتا، خطے کے ربط، ترقی اور خوش حالی کے لیے پرامن افغانستان کلیدی اہمیت کا حامل ہے۔

انہوں نے کہا کہ اسپن بولدک-چمن سرحدی گزرگاہ سے پاکستان اور افغانستان کے درمیان وسیع بنیادوں پر تجارت ہوتی ہے، اسی لیے پاکستان اسپن بولدک-چمن سرحدی گزرگاہ جلد کھولنا چاہتا ہے۔

انہوں نے کہا کہ افغانستان میں ترکی کی امن کاوشوں کو پاکستان قدر کی نگاہ سے دیکھتا ہے، ترکی نے افغانستان پر قلب ایشیا، استنبول پراسس میں کلیدی کردار ادا کیا۔

ترجمان دفترخارجہ کا کہنا تھا کہ افغانستان میں سیکیورٹی امور کا حتمی فیصلہ صرف افغان کریں گے، افغانستان کے مسئلے کا حل افغانوں نے ازخود تلاش کرنا ہے۔

وزیراعظم ازبکستان کا دورہ
ترجمان دفترخارجہ نے کہا کہ وزیر اعطم عمران خان ازبکستان کا دورہ کر رہے ہیں، ان کے ہمراہ ایک اعلیٰ سطح کا وفد بھی ازبکستان جائے گا جہاں مختلف علاقائی، باہمی اور عالمی امور پر تبادلہ خیال کیا جائے گا۔

انہوں نے کہا کہ وزیر اعظم کا ازبک بزنس فورم سے خطاب بھی ایجنڈے میں شامل ہے۔

ان کا کہنا تھا کہ وزیر خارجہ شاہ محمود قریشی نے شنگھائی تعاون تنظیم (ایس سی او) کے وزرائے خارجہ کے اجلاس میں پاکستان کی نمائندگی کی اور اس اجلاس میں خطے کے جیو اکنامک پوٹینشل اور علاقائی معاملات کا جائزہ لیا گیا۔

زاہد حفیظ چوہدری نے کہا کہ وزیرخارجہ نے ایس سی او کے اجلاس کے دوران تاجکستان، چین، روس، قازقستان، افغانستان اور ازبکستان کے ہم منصبوں سے بھی ملاقات کی۔

انہوں نے کہا کہ وزیر خارجہ نے کووڈ- 19 کے حوالے سے مشترکہ کاؤشوں پر بھی زور دیا۔

داسو میں ہونے والے بس حادثے کے حوالے سے بات کرتے ہوئے ترجمان دفترخارجہ نے کہا کہ بس حادثے کو دہشت گردی کے زاویے سے بھی دیکھا جا رہا ہے، ممکنات کو نظر انداز نہیں کیا جا سکتا۔

انہوں نے کہا کہ چینی اور پاکستانی ورکرز کو لے جانے والی بس کو پیش آنے والے کی تحقیقات ہو رہی ہے۔

ترجمان دفترخارجہ نے کہا کہ اپر کوہستان حادثہ کے فوری بعد چینی سفارت خانے اور بیجنگ میں چینی وزارت خارجہ سے رابطہ کیا گیا جبکہ شدید زخمیوں کو فوری طور پر سی ایم ایچ راولپنڈی منتقل کیا گیا تھا۔

انہوں نے کہا کہ ہم واضح طور پر کہہ رہے ہیں کہ اپر کوہستان بس دھماکے میں کسی بھی آپشن کو نظر انداز نہیں کر سکتے۔

ترجمان دفترخارجہ نے کہا کہ پاکستان نے بھارت کی دہشت گردوں کی مالی معاونت کا معاملہ اٹھایا ہے، پاکستان نے ماضی میں بھی اس حوالے سے ناقابل تردید شواہد پیش کیے تھے۔

انہوں نے کہا کہ بھارت دہشت گردی کو ریاستی ہتھیار کے طور پر استعمال کر رہا ہے۔

انہوں نے کہا کہ پاکستان نے اس سےقبل بھارت کی دہشت گردی کے ثبوت فراہم کر دیے ہیں، بھارت ہمیشہ سے شواہد کے بغیر الزامات لگاتا رہا ہے، پہلے بھارت نے کبوتروں کے ذریعے جاسوسی کے الزامات بھی لگائے۔

ان کا کہنا تھا کہ بھارت ایسے الزامات سے خود ہر جگہ اپنا مذاق بنا رہا ہے، اب وہ کبوتروں کے بعدڈرون کے حوالے سے الزامات عائد کر رہا ہے۔

ترجمان دفترخارجہ نے کہا کہ متحدہ عرب امارات کی جانب سے یہ مطالبہ سامنے آیا ہے کہ پہلے دفتر خارجہ اور پھر سفارت خانے سے ویکسینیشن سرٹیفیکیٹ کی تصدیق کرائی جائے۔

انہوں نے کہا کہ دفتر خارجہ اس حوالے سے ایسے پاکستانیوں کو ہر ممکن سہولیات فراہم کرے گا۔

ان کا کہنا تھا کہ ویکسینیشن پر سعودی عرب سے درخواست کی ہے کہ چینی ویکسین کو عالمی ادارہ صحت بھی تسلیم کرتا ہے، اس کو تسلیم کیا جائے کیونکہ پاکستان میں زیادہ تر افراد نے آسانی سے دستیاب ہونے کے باعث چینی ویکسین لگوائی ہے۔

انہوں نے کہا کہ کووڈ پر دنیا کے تمام ممالک اپنے ماہرین صحت کے مشورے سے اقدامات کر رہے ہیں۔

ان کا کہنا تھا کہ ترکی نے 14 روز کے بجائے قرنطینہ کو پاکستان کی درخواست پر 10 روز کر دیا ہے، اسی طرح ہم برطانیہ سے بھی قرنطینہ کے معاملے پر مکمل رابطے میں ہیں۔

تاشقند: وزیر اعظم عمران خان کا کہنا ہے کہ افغانستان میں امن ہمسایہ ممالک اور خطے کے لیے ضروری ہے۔

تاشقند میں ازبکستان بزنس فورم سے خطاب کے دوران وزیر اعظم نے کہا کہ پاکستان اور ازبکستان کے درمیان تاریخی و ثقافتی تعلقات ہیں، دونوں ممالک کے تجارتی تعلقات کو فروغ دینے کی ضرورت ہے، ازبکستان کے صدر اور میں نے گزشتہ ملاقات میں بھی تجارتی تعلقات پر بات کی تھی ، ہمسایہ ممالک کے ساتھ تجارت سے لوگوں کا معیار زندگی بلند ہوتا ہے، پاک افغان ازبکستان ریلوے منصوبے سے خطے میں انقلاب آئے گا۔

وزیر اعظم نے مزید کہا کہ افغانستان میں امن ہمسایہ ممالک اور خطے کےلیے ضروری ہے ، ازبکستان کے صدر اور میں نے گزشتہ ملاقات میں افغانستان میں امن اورخطے پر اثرات کی بات بھی کی تھی۔

واضح رہے کہ وزیر اعظم 2 روزہ سرکاری دورے پر آج ہی ازبکستان پہنچے ہیں۔

پاکستانیوں کے لیے خوشخبری ہے کہ قطر نے پاکستانی شہریوں کے لیے ویزہ آن ارائیول کی سہولت کو بحال کر دیا ہے۔

قطری حکومت کی طرف سے اس حوالے سے تحریری احکامات بھی جاری کیے گئے ہیں اور نئی پالیسی بھی متعارف کروا دی گئی ہے۔

نئی پالیسی کے مطابق قطر میں جاتے ہی اب پاکستانیوں کو ائیرپورٹ پر آن ارائیول ٹورسٹ ویزہ دیا جائے گا۔

پاکستانی شہریوں کے لیے 6 ماہ تک قابل استعمال پاسپورٹ اور ریٹرن ٹکٹ کی شرط ہو گی جبکہ آن ارائیول ٹورسٹ ویزے کے لیے 100 قطری ریال فیس ادا کرنا ہو گی۔

قطر جانے والوں کی کورونا ویکسی نیشن، بچوں کے لیے پولیو ویکسی نیشن ضروری ہو گی اور قطر جانے والوں کو کورونا منفی رپورٹ بھی ساتھ لانا ہو گی۔

خلیجی ملک جانے والے پاکستانی شہریوں کو آن لائن اپنی تفصیلات فراہم کرنا ہوں گی۔

وفاقی حکومت نے پیٹرول کی قیمت میں 5 روپے 40 پیسے فی لیٹر کا اضافہ کر دیا۔

وزیر اعظم عمران خان کے معاون خصوصی شہباز گل کی جانب سے جاری بیان میں پیٹرولیم مصنوعات کی قیمتوں میں اضافے سے آگاہ کیا گیا۔

شہباز گل نے بتایا کہ پیٹرول کی فی لیٹر قیمت میں 5 روپے 40 پیسے کا اضافہ کیا گیا ہے جبکہ ڈیزل کی قیمت میں 2 روپے 54 روپے فی لیٹر اضافے کی منظوری دی گئی ہے۔

انہوں نے بتایا کہ مٹی کےتیل کی قیمت میں ایک روپے 39 پیسے فی لیٹر اضافے کی منظوری دی گئی ہے جبکہ لائٹ ڈیزل کی قیمت ایک روپے 27 پیسے بڑھائی گئی ہے۔

معاون خصوصی کا کہنا تھا کہ اوگرا نے پٹرول کی قیمت میں 11.40 روپے فی لیٹر اضافے کی تجویز دی تھی، وزیراعظم نے اوگرا کی سفارشات کے برعکس عوام کو حد درجہ ریلیف فراہم کرنے کا فیصلہ کیا۔

بلوچستان کے ساحلی علاقے پسنی میں دہشتگردوں کے حملے میں پاک فوج کا کیپٹن اور سپاہی شہید ہو گئے۔

پاک فوج کے شعبہ تعلقات عامہ آئی ایس پی آر کے مطابق دہشتگردوں نے پسنی کے قریب سکیورٹی فورسز پر آئی ای ڈی سے حملہ کیا۔

آئی ایس پی آر کے مطابق دہشتگردوں کے حملے میں کیپٹن عفان مسعود اور سپاہی بابر زمان شہید ہو گئے۔

شعبہ تعلقات عامہ کے مطابق پسنی کے قریب خدا بخش بازار کے علاقے میں سکیورٹی فورسز کا سرچ آپریشن جاری ہے۔

آئی ایس پی آر کے مطابق دشمن عناصر کے بزدلانہ حملوں سے بلوچستان کا امن سبوتاژ نہیں ہونے دیں گے، سکیورٹی فورسز دہشتگردوں کے عزائم ناکام بنانے کے لیے پرعزم ہیں۔

سابق صدر مملکت ممنون حسین کو کراچی میں سپرد خاک کر دیا گیا۔

تفصیلات کے مطابق سابق صدر ممنون حسین علالت کے باعث گزشتہ روز کراچی کے نجی ہسپتال میں انتقال کرگئے تھے، وہ سرطان کے عارضے میں مبتلا تھے۔

سابق صدر ممنون حسین کی نماز جنازہ ڈیفنس میں واقع مسجد سلطان میں ادا کی گئی، ان کی نماز جنازہ مفتی تقی عثمانی نے پڑھائی، نماز جنازہ میں سابق وزیر اعظم شاہد خاقان عباسی، احسن اقبال سابق گورنر سندھ محمد زبیر ، پیپلز پارٹی کے وقار مہدی سمیت دیگر سیاسی جماعتوں کے رہنماؤں نےشرکت کی۔

یاد رہے کہ ممنون حسین کا شمار مسلم لیگ ن کے سینیئر رہنماوں میں ہوتا تھا، وہ 1999 میں سندھ کے گورنر رہے جب کہ 2013 سے 2018 تک صدر مملکت رہے۔

ممنون حسین 23 دسمبر 1940 کو بھارت کے شہر آگرہ میں پیدا ہوئے ،ان کا خاندان 1947 میں ہجرت کر کے پاکستان آیا، ممنون حسین نے جامعہ کراچی سے گریجویشن اور انسٹی ٹیوٹ آف بزنس ایڈمنسٹریشن سے ماسٹرز کیا، 60 کی دہائی میں کراچی میں کاروبار کا آغاز کیا اور بعد میں سیاست میں آگئے۔

ممنون حسین کی عمر 81 برس تھی اور انہوں نے سوگواروں میں بیوہ اور تین بیٹے چھوڑے ہیں۔

وفاقی وزیر منصوبہ بندی و نیشنل کمانڈ اینڈ آپریشن سینٹر (این سی او سی) کے سربراہ اسد عمر نے خبردار کیا ہے کہ اگر درست فیصلے نہ کیے گئے تو پاکستان کو کورونا کے حوالے سے بھارت جیسی صورتحال کا سامنا کرنا پڑ سکتا ہے۔

حکام کی جانب سے عالمی وبا کورونا وائرس کی چوتھی لہر کا خدشہ ظاہر کرنے کے ساتھ عوام پر وائرس سے بچاؤ کی احتیاطی تدابیر اپنانے اور ویکسین لگوانے کے لیے زور دیا گیا تھا۔

تاہم ملک میں وبا کے پھیلاؤ میں تیزی دیکھنے میں آئی ہے اور گزشتہ 24 گھنٹوں میں رپورٹ ہونے والے کیسز کی تعداد 2 ہزار 545 رہی۔

وائرس کی تشخیص کے لیے گزشتہ 24 گھنٹوں میں 48 ہزار 910 ٹیسٹ کیے گئے جس کے نتیجے میں 5.2 فیصد مثبت کیسز آئے اور مزید 47 افراد انتقال بھی کر گئے۔

ملک میں گزشتہ 24 گھنٹوں میں سب سے زیادہ کیس سندھ میں ریکارڈ کیے گئے جن کی تعداد ایک ہزار 420 رہی اور 26 مریض انتقال کر گئے، یومیہ کیسز کی یہ تعداد 23 مئی کے بعد سب سے زیادہ ہے۔

رپورٹ کے مطابق سندھ میں کورونا کے پھیلاؤ میں تیزی کے پیشِ نظر صوبائی حکومت نے اِن ڈور ڈائننگ، اول سے ششم جماعت تک کے طلبہ کے لیے اسکول، تفریحی مقامات بشمول سی ویو، ہاکس بے، کینجھر جھیل، سوئمنگ پولز اور اِن ڈور جمز پیر (19 جولائی) سے بند کرنے کا اعلان کیا ہے۔

تاہم جن اسکولوں میں امتحانات جاری ہیں وہ معمول کے مطابق اپنے افعال سرانجام دیں گے۔

ملک کے دیگر حصوں میں گزشتہ روز رپورٹ ہونے والے کیسز کی صورتحال درج ذیل ہے:

پنجاب: 286 کیسز، 13 اموات

خیبر پختونخوا: 250 کیسز، 6 اموات

بلوچستان: 154 کیسز

اسلام آباد: 127 کیسز، ایک موت

آزاد کشمیر: 89 کیسز، ایک موت

گلگت بلتستان: 119 کیسز

ویکسینیشن ریکارڈ سے متعلق مسائل کے حل کیلئے پورٹل کا اجرا
این سی او سی نے ایک پورٹل کا اجرا کیا ہے تاکہ ویکسین لگوانے والے وہ افراد جو رجسٹرڈ نہیں ہوسکے یا ویکسی نیشن سرٹیفکیٹس حاصل نہیں کر پارہے، ان کی شکایات کو حل کیا جاسکے۔

این سی او سی نے ایک ٹوئٹ میں بتایا کہ پورٹل، ویکسی نیشن ریکارڈ یا سرٹیفکیٹ سے متعلق مسائل کے حل کے لیے متعارف کروایا گیا ہے، اب شہری https://nims.nadra.gov.pk/nims/registerComplaint پر اپنی شکایات درج کروا سکتے ہیں۔

دوسری جانب اسد عمر نے ٹوئٹر پر ایک تصویر شیئر کر کے دعویٰ کیا کہ بھوک کے بحران نے بھارت کے متوسط طبقے کو بھی راشن لائنز میں کھڑا کردیا ہے اور لاکھوں افراد نے دیکھا کہ گزشتہ 12 ماہ میں ان کا معاشی استحکام ختم ہوگیا ہے۔

انہوں نے عوام پر زور دیا کہ سختی سے ایس او پیز پر عمل کیا جائے۔

اپنی ٹوئٹ میں اسد عمر کا کہنا تھا کہ ’اگر آپ صحیح وقت پر درست فیصلے نہیں کرتے ہیں تو یہ کووڈ تباہی کا سبب بن سکتا ہے، اس سے ظاہر ہوتا ہے کہ کروڑوں کمزور افراد پر بھارت کے شدید لاک ڈاؤن کے پڑنے والے اثرات اب بھی جاری ہیں‘۔

دوسری جانب این سی او سی نے بھی ٹوئٹ کے ذریعے عوام پر ایس او پیز پر عملدرآمد کے لیے زور دیا۔

این سی او سی کی ٹوئٹ میں کہا گیا کہ ’ایس او پیز پر عملدرآمد اور بروقت ویکسی نیشن ہی وہ واحد راستہ ہے جس سے اپنے آپ کو کورونا وائرس سے بچایا جاسکتا ہے، ماسک پہنیں، سماجی فاصلہ برقرار رکھیں اور اپنے آپ کو ویکسین لگوائیں۔

اسلام آباد: موٹروے پولیس نے ایمانداری کی روایت برقراررکھتے ہوئے ایک کروڑچالیس لاکھ روپے کی رقم مالک کے حوالے کردی۔

ترجمان موٹروے پولیس کے مطابق پرائیویٹ کار میں ابراہیم نامی شخص اسلام آباد سے براستہ موٹروے پشاور سفر کررہا تھا، کرنل شیر خان انٹرچینج کے قریب گاڑی کو حادثہ پیش آیا، حادثے کا شکار ہونے والی گاڑی کا ڈرائیور محفوظ رہا لیکن ذہنی طور پر شدید صدمے میں چلا گیا۔

امدادی کاروائیوں کے دوران ڈرائیور نے موٹروے پولیس کو بتایا کہ اس کے پاس ایک کروڑ 40 لاکھ روپے موجود ہیں، موٹروے پولیس نے رقم کو حفاظتی تحویل میں لیتے ہوئے ڈرائیور کو اسپتال منتقل کیا جہاں علاج معالجہ کے بعد ڈرائیور کو فارغ کردیا گیا، جس پر موٹروے پولیس نے گاڑی سے ملنے والی ایک کروڑ 40 لاکھ روپے کی رقم اس کے حوالے کردی، رقم کی واپسی پر شہری نے موٹروے پولیس کے کردار کی تعریف کی اور شکریہ ادا کیا۔

افغانستان کے لیے روس کے اعلیٰ عہدیدار نے افغان حکومت پر منافقت کا الزام عائد کرتے ہوئے کہا ہے کہ ملک کے مستقبل کے لیے طالبان کے ساتھ باقاعدہ مذاکرات شروع کرنے کی ضرورت ہے، اس پہلے کہ بہت دیر ہو جائے۔

غیرملکی خبر ایجنسیوں کی رپورٹ کے مطابق افغانستان کے لیے روسی صدر ولادیمیر پیوٹن کے نمائندہ خصوصی ضمیر کبولوف نے تاجکستان میں افغانستان کے حوالے سے بات کرتے ہوئے خبردار کیا کہ افغان مسئلے کا حل مذاکرات ہیں، جہاں شنگھائی تعاون تنظیم (ایس سی او) کے وزرائے خارجہ بھی موجود ہیں۔

کبولوف نے روسی نیوز ایجنسی کو انٹرویو میں کہا کہ افغان حکومت مذاکرات کے معاملے پر صرف لب کشائی سے کام لے رہی ہے جو کافی نہیں ہے۔

طالبان سے مذاکرات کے حوالے سے افغان حکومت کے مؤقف پر بات کرتے ہوئے کبولوف نے کہا کہ یہ منافقت ہے، یہ حقیقت سے آنکھیں موڑنے کی کوشش ہے، جو موجود ہے اور یہ خالی الفاظ ہیں۔

کبولوف نے کہا کہ امریکی اور نیٹو فورسز کے انخلا سے طالبان کو فائدہ ہوا ہے اور اس جاری تنازع کا واحد حل تمام فریقین کو کابل میں مذاکرات کی میز پر ایک ساتھ بیٹھنا ہے۔

انہوں نے کہا کہ روس اور دیگر علاقائی طاقتیں افغانستان میں عبوری حکومت کی حامی ہیں۔

گزشتہ ہفتے ماسکو میں طالبان کے وفد نے کہا تھا کہ طالبان نے افغانستان میں 85 فیصد علاقوں پر قبضہ کرلیا ہے، جس کو افغان حکومت نے مسترد کرتے ہوئے روس سے کہا تھا کہ وہ اپنے ملک کو دوسروں پر حملے کرنے کے لیے پلیٹ فارم کے طور پر استعمال کرنے کی اجازت نہیں دیں۔

امریکی انخلا پر چین کا خیرمقدم
ادھر چین نے افغانستان سے امریکی اور نیٹو افواج کے انخلا سے متعلق کہا کہ ملک کو یہ نیا موقع ملا ہے کہ اپنی تقدیر اپنے ہاتھ سے بنائیں جبکہ طالبان سے مطالبہ کیا کہ وہ دہشت گردوں سے تمام تعلقات منقطع کر دیں۔

تاجکستان کے دارالحکومت دوشنبے میں چینی وزیرخارجہ وانگ ای نے کہا کہ امریکا کو افغانستان میں اپنے کردار پر غور کرنا چاہیے، 2 دہائیوں تک فوجی شراکت کے بعد بھی وہ امن قائم کرنے میں ناکام رہے۔

وانگ ای نے وزارت خارجہ کی ویب سائٹ پر جاری بیان میں کہا کہ امریکا اور نیٹو کے افغانستان چھوڑنے کے بعد افغانستان کے شہریوں کو موقع ملا ہے کہ وہ اپنے ملک کی منزل خود بنائیں اور اپنے شہریوں کی تقدیر اپنے ہاتھوں سے بنائیں۔

اپنے بیان میں طالبان کے حوالے سے ہدایت کرتے ہوئے وانگ ای نے کہا کہ قدامت پسند گروپ کو دہشت گرد تنظیموں سے دوری اختیار کرنی چاہیے اور افغانستان کی سیاست میں اپنے ملک اور عوام کے لیے ذمہ دارانہ رویے کے ساتھ واپس آنا چاہیے۔

خیال رہے کہ افغانستان اور چین کے درمیان تنگ سرحد ملتی ہے اور چین کو مسلمانوں کی اکثریت والے شہر سنکیانگ میں انتہا پسندی کا خدشہ ہے، چین احتیاطی تدابیر کے طور پر وسطی ایشیا میں اپنے ہمسایہ ممالک جیسا کہ تاجکستان کے ساتھ تعلقات بڑھا رہا رہا ہے۔