All posts by News Editor

سابق وزیر داخلہ و پاکستان مسلم لیگ (ن) کے جنرل سیکرٹری احسن اقبال نے مسلح افواج کے افسران اور جوانوں کی بنیادی تنخواہ میں 15 فیصد کے برابر خصوصی الاؤنس کی تجویز کی خبر پر ردعمل کا اظہار کیا ہے۔

اپنی ٹوئٹ میں احسن اقبال کا کہنا تھاکہ 15 فیصد اسپیشل پے الاؤنس یکساں طور پرتمام سول وملٹری ملازمین کو دیا جائے۔

ان کا کہنا تھاکہ ایسے امتیازی فیصلے ملک میں سول ملٹری تقسیم گہری کرنے کا باعث بنتے ہیں، مہنگائی سب ملازمین کیلئے ایک جیسی ہے۔

خیال رہے کہ وفاقی وزارت خزانہ نے مسلح افواج کے افسران اورجوانوں کی بنیادی تنخواہوں میں 15 فیصد کے برابر خصوصی الاؤنس دینے کی سمری وفاقی کابینہ کو بجھوا دی۔

مسلم لیگ ن کے رہنما و سابق وزیر اعظم شاہد خاقان عباسی کا کہنا ہے کہ میں نے عابد شیر علی کو مشورہ دیا ہے کہ یہاں انصاف نہیں، آپ کو گرفتار کیا گیا تو بچیوں کو کون سنبھالے گا؟۔

فیصل آباد میں میڈیا سے گفتگو کرتے ہوئے شاہد خاقان عباسی نے کہا کہ عابد شیر علی کی اہلیہ کی وفات خاندان کے لیے بہت بڑا صدمہ ہے، اس بات کا دکھ اور بھی زیادہ ہےکہ عابد شیر علی اس موقع پر موجود نہیں ہیں۔

شاہد خاقان عباسی نے کہا کہ عابد شیر علی نے پاکستان آنے کے لیے ٹکٹ کی بکنگ کروالی تھی، میں نے انہیں مشورہ دیا ہے کہ یہاں انصاف نہیں ملے گا ، آپ گرفتار ہوسکتے ہیں ۔

رہنما مسلم لیگ ن نے کہا کہ نیب اور حکومت نہیں بتا سکتےکہ جو انہوں نے کیس بنائے وہ کیا ہیں، نیب سیاسی انجنئیرنگ کا ادارہ ہے۔

شاہد خاقان عباسی نے کہا کہ جو فیصلےعدالتوں سے آئے ہیں، نیب پڑھ لےتو انھیں پتہ چلے یہ کیا ہیں، ہم عدالتوں سے نہیں گھبراتے۔

وفاقی وزیر داخلہ شیخ رشید اسحمد کا کہنا ہے کہ پاکستان میں صرف پی ٹی آئی اورپاک فوج قومی ہیں۔

راولپنڈی میں پریس کانفرنس کے دوران شیخ رشید نے کہا کہ ملک میں پی ٹی آئی وفاق، پنجاب، خیبر پختونخوا، بلوچستان اور گلگت بلتستان میں برسراقتدار ہے، اب جلد ہی آزاد کشمیر میں بھی تحریک انصاف کی حکومت ہوگی، ملک میں صرف دو ہی چیزیں قومی ہیں، ایک تحریک انصاف قومی جماعت ہے اور دوسری پاک فوج قومی ہے، ساری اپوزیشن جماعتیں اور قوم فوج کے ساتھ ہیں۔ قوم ملک کی سلامتی کے لیے فوج اور عمران خان کے پیچھے کھڑی ہے۔

وفاقی وزیر نے کہا کہ جب تک افغانستان میں امن نہیں ہوگا، خطےمیں تجارت ممکن نہیں، اگر چین ایران میں 400 ارب ڈالر کی سرمایہ کاری کی بات ہورہی ہے، یہ اس وقت تک ممکن نہیں جب تک افغانستان میں امن نہ ہو، اس خطے کی سیاست بدلنے جارہی ہے، افغان جوبھی فیصلہ کریں گےہمیں قبول ہوگا، افغانستان میں نئے طالبان جنم لے چکے ہیں یہ وہ طالبان وہ نہیں جو بندوق سے فیصلہ کرتے تھے۔

وزیر داخلہ کا کہنا تھا کہ بھارت نے 1979 سے لے کر آج تک افغانستان میں دہشتگردی کو منظم کیا، بھارت کی افغانستان میں جگ ہنسائی ہوئی ہے، بھارت نے ہر جگہ پاکستان کےخلاف صرف پروپیگنڈا کیا،ہم افغانستان میں امن کے لیے دنیا کے ساتھ ہیں، پاکستان اب افغانستان کے خلاف کوئی اڈا نہیں دے گا، پاکستان پر کوئی دباؤ نہیں، دنیا کی کوئی سپر پاور ہمیں نظر انداز نہیں کرسکتی، ہمارے بغیر کسی کی دال نہیں گل سکتی۔ اب افغانستان سے صرف 2 بارڈر چمن اور طور خم کھلے رہیں گے۔

کشمیر کی انتخابی مہم میں وزیر اعظم پر کی جانے والی تنقید کے سوال پر شیخ رشید احمد نے کہا کہ مریم اور بلاول کی جماعتیں آزادکشمیر میں الیکشن ہارنے جارہی ہیں، جس کی وجہ سے وہ دھاندلی کا شورکر رہے ہیں، مریم اوربلاول بھٹو زرداری بےہودہ زبان کا استعمال کررہے ہیں، مریم نواز غیرذمہ دارانہ زبان استعمال کررہی ہیں، انہیں اپنے لب و لہجے پر غور کرنا چاہیے۔

بلاول بھٹو زرداری کے حالیہ دورہ امریکا پر شیخ رشید نے کہا کہ بلاول بھٹو زرداری کی سی وی میں کچھ بھی نہیں، پاکستان میں بلاول بھٹو زرداری کی سی وی میرے پاس ہے، ان کی وجہ سے سیاست میں رونق ہے۔

پی آئی اے بیرون ملک پھنسے پاکستانیوں کی واپسی کے لئے 32 پروازیں چلائے گی۔

تفصیلات کے مطابق قومی ایئرلائن (پی آئی اے) نے بیرونِ ملک پھنسے ہوئے پاکستانیوں کو وطن پہنچانے کیلئے بڑے آپریشن کا اعلان کردیا، پی آئی اے عید الاضحیٰ سے قبل ہم وطنوں کو 32 خصوصی پروازوں کے ذریعے وطن واپس پہنچائے گی۔

پی آئی اے انتظامیہ کا کہنا ہے کہ کابل میں پھنسے ہوئے ہم وطنوں کو وطن پہنچانے کیلئے بوئنگ 777 طیارے استعمال کئے جائیں گے، کابل کیلئے 12 اور 16 جولائی کو خصوصی پروازیں آپریٹ کررہے ہیں، جب کہ خلیجی ممالک سے پاکستان آنے کیلئے 5 خصوصی پروازوں کا اضافہ کردیا گیا ہے۔

انتظامیہ کے مطابق دبئی اور ابوظہبی سے پاکستانیوں کو بوئنگ 777 طیاروں کے ذریعے وطن پہنچایا جائے گا، سعودی عرب کیلئے بھی 10 پروازوں کا اضافہ کردیا گیا ہے، اور وہاں پھنسے پاکستانیوں کو وطن واپس لانے کے لئے بوئنگ 777 طیارے استعمال کئے جائیں گے، تاشقند کیلئے 8 خصوصی پروازیں آپریٹ کی جائیں گی، اور تاشقند کیلئے ایئر بس 320 طیارے آپریٹ ہوں گے، جب کہ پی آئی اے بشکک میں پھنسے ہوئے طالبعلموں کو وطن لانے کیلئے خصوصی پرواز آپریٹ کرے گی۔

کورونا کے مریضوں میں یومیہ 3 گنا اضافے پر طبی ماہرین کا کہنا ہے کہ کیسز میں اضافے کی وجہ شعبہ سیاحت اور کاروبار کھولنا ہے اس لیے حکومت کو لاک ڈاؤن کا اعلان کرنا چاہیے تاکہ عید الاضحیٰ کورونا سے متعلق سخت پابندی میں منائی جا سکے۔

رپورٹ کے مطابق نیشنل کمانڈ اینڈ آپریشن سینٹر (این سی او سی) کے اعداد و شمار کے مطابق ایک دن میں کورونا سے مزید 35 افراد جاں بحق اور ایک ہزار 828 کیسز رپورٹ ہوئے، جبکہ 21 جون کو (20 روز قبل تک) یومیہ کیسز کی تعداد 663 تک پہنچ گئی تھی۔

علاوہ ازیں این سی او سی کے مطابق ملک میں 10 جولائی کو فعال کیسز کی تعداد 36 ہزار 454 رپورٹ کی گئی، جبکہ چند ہفتے قبل فعال کیسز کی تعداد 31 ہزار تھی۔

انہوں نے بتایا کہ اس وقت ہسپتالوں میں 2 ہزار 305 مریض زیر علاج ہیں اور ان میں سے 217 وینٹی لیٹرز پر ہیں۔

وزارت قومی صحت (این ایچ ایس) کے ایک عہدیدار نے بتایا کہ یہ بدقسمتی کی بات ہے کہ جب بھی عوام کو کورونا سے متعلق پابندیوں میں چھوٹ دی گئی انہوں نے ایس او پیز کو نظر انداز کیا۔

انہوں نے زور دیا کہ ’لوگوں کو ذمہ داری کے ساتھ برتاؤ اور ایس او پیز پر سختی سے عمل کرنا چاہیے، بصورت دیگر ہمارے پاس پابندیاں عائد کرنے کے سوا کوئی دوسرا راستہ نہیں رہے گا کیونکہ ہم کووڈ 19 کی چوتھی لہر کی طرف بڑھ رہے ہیں۔

کووڈ 19 سے متعلق سائنسی ٹاسک فورس کے رکن ڈاکٹر جاوید اکرم نے بتایا کہ وائرس مستقل طور پر تبدیل ہو رہا ہے اور مہلک ہوتا جارہا ہے۔

انہوں نے کہا کہ ’وائرس میں تغیر پذیر ہونے کی 39 ہزار ممکنہ اشکال ہیں، وقت گزرنے کے ساتھ یہ (وائرس) زیادہ ٹینٹیکلس تیار کرتا جا رہا ہے جس کی وجہ سے پھیپھڑوں پر حملے کی صلاحیت بڑھ رہی ہے، دوسرے الفاظ میں وائرس زیادہ سنگین نوعیت کا ہوتا جارہا ہے۔

ڈاکٹر جاوید اکرم نے کہا کہ حکومت نے لوگوں اور قومی معیشت کے مفادات کے لیے کاروبار اور سیاحت کے شعبوں سے پابندیاں ختم کرنے کا فیصلہ کیا ہے، لیکن عوام نے سمجھا کہ وبائی مرض ختم ہوگیا اور احتیاطی تدابیر کو سنجیدگی سے نہیں اپنایا۔

انہوں نے کہا کہ ہمیں اپنے رویے کو تبدیل اور وائرس کے خاتمے کے لیے اپنا کردار ادا کرنے کی کوشش کرنے کی ضرورت ہے، 15 جون سے پابندیاں ختم ہونے کے بعد سے لوگوں نے نرمی کا غلط استعمال کرنا شروع کردیا۔

ان کا کہنا تھا کہ لوگوں کی ایک بڑی تعداد گلگت بلتستان گئی جہاں کووڈ 19 کی مثبت شرح ایک فیصد تھی، سیاح وائرس کا کیریئر بن جاتے ہیں اور پھر وہیں اس میں کئی گنا اضافہ ہوجاتا ہے، کیونکہ ایک بڑی تعداد میں لوگوں نے ایک ٹرانسپورٹ میں سفر کیا اور مشترکہ کمروں میں رہے، اسکردو میں اس وقت مثبت کیسز کی شرح 30 فیصد ہے۔

ڈاکٹر جاوید اکرم نے کہا کہ جب لوگ شمالی علاقوں سے واپس آئے تو وہ دوبارہ وائرس کیریئر تھے اور اب ملک بھر میں اس کے کیسز بڑھتے جارہے ہیں۔

انہوں نے کہا کہ وائرس کی ڈیلٹا (بھارتی) قسم میں 12 میوٹیشنز دیکھی گئی ہیں اور ہر گزرتے دن کے ساتھ صورتحال خراب ہوتی جارہی ہے۔

ڈاکٹر جاوید نے این سی او سی کو دوبارہ لاک ڈاؤن نافذ کرنے کی تجویز دیتے ہوئے کہا کہ عید کے دوران سخت پابندیاں نافذ کی جانی چاہئیں۔

شوبز انڈسٹری کی مقبول جوڑی گلوکار و اداکار فلک شبیر اور اداکارہ سارہ خان نے اپنی شادی کی پہلی سالگرہ کے موقع پر مداحوں کو سرپرائز دینے کا اعلان کیا ہے۔

سارہ خان اور عمران اشرف کا مقبول ڈرامے ’رقصِ بسمل’ اختتام پذیر ہونے کے موقع پر سارہ خان نے ایک ویڈیو شیئر کی جس میں فلک شبیر ان سے سوال کرتے سنائی دیے۔

ویڈیو میں سارہ خان سے گفتگو کرتے ہوئے فلک شبیر نے کہا کہ ’رقصِ بسمل کی آخری قسط نشر ہوگئی اور زہرہ، موسیٰ کی ہوئی، میں بہت خوش ہوں آپ کچھ کہنا چاہیں گی؟‘۔

جس پر سارہ خان نے کہا کہ ‘جتنا خوش ہم دونوں ہیں اتنے ہی ہمارے مداح بھی خوش ہوئے گے زہرہ اور موسیٰ مل گئے، میں اسے کامیاب بنانے پر رقصِ بسمل، عمران اشرف اور اپنے تمام مداحوں، پروڈیوسرز، شازیہ وجاہت سمیت ڈرامے کی پوری ٹیم کا شکریہ ادا کرنا چاہوں گی‘۔

اسی ویڈیو میں سارہ خان نے مزید کہا کہ اب آپ کی ملاقات ہوگی ’لاپتہ‘ والی فلک سے۔

خیال رہے کہ اداکارہ سارہ خان اپنے اگلے ڈرامے ’لاپتہ‘ میں فلک نامی لڑکی کا کردار ادا کرتی نظر آئیں گی جبکہ اس ڈرامے میں عائزہ خان ایک ٹک ٹاکر کے کردار میں دکھائی دیں گی۔

انہوں نے مزید کہا کہ ’آپ (مداحوں) کے لیے 16 جولائی کو ہماری اینیورسری پر میرے اور فلک کے مداحوں کے لیے ایک سرپرائز ہے، جس کے لیے ہم بہت پُرجوش ہیں‘۔

بعدازاں اسی پوسٹ پر ایک کمنٹ میں فلک شبیر نے کہا کہ 16 جولائی کو ہماری شادی کی پہلی سالگرہ ہے، اس تاریخ کو لاک کرلیں، ہمارے پاس آپ سب کے لیے سرپرائز ہے۔

سارہ خان اور فلک شبیر کی یہ ویڈیو سوشل میڈیا پر بہت زیادہ وائرل ہورہی ہے اور مداحوں کی جانب سے 16 جولائی کے سرپرائز سے متعلق مختلف قیاس آرائیاں بھی کی جارہی ہیں۔

انیلہ نامی صارف نے لکھا کہ فلک شبیر پھولوں کا باغ خرید رہے ہیں جبکہ رچا نامی صارف نے کہا کہ عموماً ایسے موقع پر شادی شدہ جوڑے ایک دوسرے کو سرپرائز دیتے ہیں۔

کچھ صارفین کے مطابق وہ بے صبری سے سارہ خان اور فلک کے اس سرپرائز کے منتظر ہیں جبکہ کچھ کے مطابق سارہ اور فلک اس دن ایک نئے گانے کا اعلان کریں گے.

مومنہ نامی صارف کے مطابق سارہ خان اور فلک اپنے بچے کی جنس کا اعلان کریں گے اور ولیمہ بھی ہوسکتا ہے۔

خیال رہے کہ سارہ خان گزشتہ برس جولائی میں شادی کے بندھن میں بندھی تھیں، انہوں نے اور گلوکار فلک شبیر نے 14 جولائی کو منگنی کا اعلان کیا تھا اور اگلے ہی دن دونوں کی شادی کی تقریبات کا آغاز ہوا تھا اور وہ جولائی کے مہینے ہی میں شادی کے بندھن میں بندھ گئے تھے۔

رواں برس جون میں سارہ خان اور فلک شبیر نے تصدیق کردی ہے کہ وہ جلد والدین بننے والے ہیں۔

علاوہ ازیں نجی ٹی وی چینل پر نشر ہونے والے ڈرامے ‘ثبات’ میں ان کے منفی کردار کے طور پر ان کی اداکاری کو بھی خوب سراہا گیا تھا۔

حال ہی میں نجی ٹی وی چینل سے ان کا ایک اور ڈراما ‘رقصِ بسمل’ بھی نشر ہورہا ہے جس میں وہ عمران اشرف کے ساتھ مرکزی کردار ادا کررہی ہیں اور جلد ہی ان کا نیا ڈراما ‘لاپتا’ بھی شروع ہورہا ہے۔

وزیراعظم عمران خان کی ہدایت پر وفاقی وزراء سے اضافی سکیورٹی واپس لینے کا عمل شروع ہو گیا ہے۔

ذرائع کا بتانا ہے کہ وزیراعظم کی ہدایت پر کابینہ ڈویژن اور اسلام آباد پولیس نے کئی وفاقی وزراء سے اضافی سکیورٹی واپس لی ہے۔

ذرائع کا کہنا ہے کہ آئی جی اسلام آباد قاضی جمیل الرحمان کی وزیراعظم عمران خان سے ملاقات کے بعد اضافی سکیورٹی واپس لی گئی ہے۔

ذرائع کا بتانا ہے کہ جن وفاقی وزراء سے اضافی سکیورٹی واپس لی گئی ہے ان میں شیریں مزاری اور پرویز خٹک بھی شامل ہیں۔

ذرائع کے مطابق وفاقی وزراء کی سکیورٹی پر مامور 5 اہلکاروں میں سے 3 کو واپس بلا لیا گیا ہے، وفاقی وزراء کے ساتھ سکیورٹی کے لیے اب اسلام آباد پولیس کے صرف دو اہلکار موجود رہیں گے۔

ذرائع کا کہنا ہے کہ چیئرمین سینیٹ کو دی گئی نفری برقرار رہے گی جبکہ اسپیکر اور ڈپٹی اسپیکر کو دی گئی اضافی نفری میں بھی کمی کردی گئی ہے۔

یاد رہے کہ وزیراعظم عمران خان نے وفاقی کابینہ کے گزشتہ اجلاس میں پروٹوکول کم کرنے کا فیصلہ کیا تھا۔

اسلام آباد: سپریم کورٹ کے پنجاب میں بلدیاتی ادارے تحلیل کرنے کے خلاف حکم کے باوجود رواں سال نظام کی مدت پوری ہونے سے قبل اس کی بحالی کا امکان نظر نہیں آرہا۔

رپورٹ کے مطابق عدالت عظمیٰ نے 25 مارچ کو ایک مختصر حکم نامے کے ذریعے صوبے میں بلدیاتی اداروں کی عدم بحالی کو غیر آئینی قرار دیتے ہوئے ان کی بحالی کا حکم دیا تھا۔

حکومت پنجاب نے پنجاب لوکل گورنمنٹ ایکٹ (پی ایل جی اے) 2019 کے سیکشن 3 کے تحت بلدیاتی اداروں کو تحلیل کردیا تھا جبکہ الیکشن، پی ایل جی اے 2013 کے تحت 2015 اور 2016 میں مرحلہ وار ہوئے تھے، منتخب بلدیاتی اداروں کی مدت پانچ سال ہے۔

تاہم صوبائی حکومت نے ’پانچ سال‘ کی جگہ ’21 ماہ‘ کے الفاظ شامل کرکے پی ایل جی اے کے سیکشن 3 (2) میں ترمیم کے بعد گزشتہ برس 2 جولائی کو بلدیاتی اداروں کی مدت اچانک ختم کردی تھی۔

عدالت نے اپنے فیصلے میں واضح کیا تھا کہ بلدیاتی ادارے اپنی مدت پوری کیے بغیر تحلیل نہیں کیے جاسکتے اور اداروں کو تحلیل کرنا آئین کی شقوں کے خلاف ورزی ہے۔

حکومت پنجاب کی جانب سے بلدیاتی اداروں کو چلانے کی اجازت نہ دینے پر بلدیاتی اداروں کے منتخب نمائندوں نے تشویش کا اظہار کیا ہے۔

دوسری جانب صوبائی حکومت کا مؤقف ہے کہ چونکہ سپریم کورٹ نے پی ایل جی اے 2019 کو مسترد نہیں کیا، لہٰذا ایکٹ 2013 کے تحت منتخب نمائندے نئے ایکٹ کے تحت اختیارات استعمال نہیں کر سکتے۔

ایڈووکیٹ جنرل پنجاب احمد اویس نے دعویٰ کیا کہ صوبائی حکومت نے بلدیاتی اداروں کی بحالی سے متعلق عدالت عظمیٰ کے حکم پر عمل درآمد کیا ہے۔

انہوں نے بلدیاتی اداروں کے کام سے متعلق امور پر روشنی ڈالتے ہوئے کہا کہ چونکہ پی ایل جی اے 2019، جو سپریم کورٹ کے فیصلے کے بعد بھی برقرار ہے، نے بلدیاتی اداروں کے انتخاب اور اس کے کام میں غیر معمولی تبدیلیاں متعارف کروائی ہیں لہٰذا صوبائی حکومت 2013 کے ایکٹ کے تحت دوبارہ ان کو بااختیار نہیں بناسکتی۔

انہوں نے کہا کہ ایکٹ 2019 کے تحت انتخابی عمل کو اسی طرح تبدیل کردیا گیا تھا جیسے 2013 کے ایکٹ کے تحت، اب کسی میئر کا انتخاب منتخب نمائندوں (کونسلرز) کے ذریعے نہیں کیا جاسکتا بلکہ ان کا انتخاب عام ووٹوں کے ذریعے ہوگا۔

ایڈووکیٹ جنرل نے مزید کہا کہ انتخابی حلقوں اور ضلعی کونسلز میں تبدیلیاں کی گئی ہیں۔

انہوں نے کہا کہ موجودہ بلدیاتی اداروں کی میعاد ختم ہونے کے بعد ایکٹ 2019 کے تحت ہونے والے آئندہ بلدیاتی انتخابات سے یہ نظام مناسب طریقے سے کام کرنا شروع کردے گا۔

ایڈووکیٹ جنرل نے بتایا کہ ہم نے سپریم کورٹ کے سامنے نظرثانی کی درخواست دائر کی ہے جو تین رکنی بینچ کے سامنے زیر التوا ہے۔

دوسری طرف راولپنڈی کے میئر سردار نسیم نے افسردگی کا اظہار کیا کہ حکومت پنجاب نے ابھی تک بلدیاتی اداروں کی بحالی کے لیے کوئی نوٹی فکیشن جاری نہیں کیا۔

انہوں نے کہا کہ منتخب نمائندوں کے دفاتر کو ابھی بھی تالا لگا ہوا ہے لہٰذا انہوں نے سڑک پر راولپنڈی میونسپل کارپوریشن کا اجلاس کیا۔

سردار نسیم نے کہا کہ منتخب نمائندوں نے حکومت پنجاب کے خلاف سپریم کورٹ کے سامنے توہین عدالت کی درخواست دائر کی تھی اور عدالت عظمیٰ نے صوبائی حکومت کو نوٹس جاری کیا تھا۔

اسلام آباد: وفاقی حکومت نے عدالت عظمیٰ سے استدعا کی ہے کہ جسٹس قاضی فائز عیسیٰ نظرثانی کیس میں 26 اپریل کا اس کا اکثریتی فیصلہ صریحاً ناانصافی پر مبنی ہے اور عوام اور مفاد عامہ کے خلاف ہے جس سے عدالتی احتساب کا معیار متاثر ہوتا ہے۔

رپورٹ کے مطابق حکومت نے عدالت عظمیٰ سے اس خلا کو پرُ کرنے کی استدعا کی ہے۔

سپریم کورٹ کے رجسٹرار آفس کی جانب سے جسٹس قاضی فائز عیسیٰ کیس میں حکومتی نظرثانی اپیل مسترد کرنے کے فیصلے کے خلاف 8 جولائی کو دائر کی گئی اپیل میں کہا گیا کہ ’سپریم کورٹ کا اکثریتی فیصلہ غلط، انصاف کی خلاف ورزی اور تعصب پر مبنی اور دوسری صورت میں غیر قانونی، غیر آئینی اور بغیر کسی دائرہ اختیار کے ہے’۔

26 اپریل کو عدالت عظمیٰ نے 6، 4 کی اکثریت سے گزشتہ برس 19 جون کے اپنے اکثریتی فیصلے کو کالعدم قرار دیا تھا جس میں ٹیکس حکام کو جسٹس قاضی فائز عیسیٰ کی اہلیہ اور بچوں کے نام پر 3 غیر ملکی جائیدادوں کی تفتیش کا حکم دیا گیا تھا۔

حکومت نے عدالت عظمیٰ سے استدعا کی کہ وہ نظرثانی درخواست پر رجسٹرار آفس کے اعتراضات دور کرے۔

مذکورہ اپیل صدر سیکریٹری قانون کے توسط سے ڈاکٹر عارف علوی، وفاقی حکومت، وزیر اعظم عمران خان، وزیر قانون ڈاکٹر فروغ نسیم، وزیر اعظم کے مشیر برائے احتساب شہزاد اکبر اور اثاثوں کی ریکوری یونٹ کے قانونی ماہر ضیا المصطفیٰ کی جانب سے دائر کی گئی۔

اپیل میں کہا گیا ہے کہ 26 اپریل کے اکثریتی فیصلے نے عدالتی احتساب کے دروازے بند کردیے ہیں اور ریکارڈ میں آنے والے الزامات اور معلومات کے سلسلے میں جسٹس قاضی عیسیٰ فائز کا احتساب عدالتی آزادی کے اصولوں کے بھی خلاف ہے۔

اپیل میں کہا گیا کہ اکثریتی فیصلے نے عدالتی احتساب کے معیار کو بھی کمزور کردیا ہے بلکہ اعلی عدالتوں کے ججوں کو صرف عدالتی احتساب سے بچنے کے لیے عدالتی آزادی کے نظریے کے پیچھے چھپنے کے لیے ایک ڈھال فراہم کی گئی ہے۔

اس میں کہا گیا کہ عدالتی آزادی کا تصور بنیادی طور پر انفرادی ججوں کے مفاد کے لیے نہیں ہے بلکہ عدالتی آزادی کا نظریہ ججوں کے مفاد اور پورے معاشرے کے مفادات، حقوق اور فوائد کے حصول کے لیے ہے۔

اپیل میں کہا گیا کہ اکثریتی فیصلہ اسلامی اور جدید فقہ کے خلاف بھی ہے اور اعلی عدالتوں کے ججوں کے لیے ضابطہ اخلاق میں جو اعلی اخلاقی اصولوں کا تصور کیا گیا اس کے بھی خلاف ہے۔

اکثریتی فیصلے میں اس امر پر بھی زور نہیں ملتا کہ جدید فقہ کی مکمل حمایت حاصل ہونے کے علاوہ اپنے مالیات اور اثاثوں کی وضاحت کرنے کے ذمہ داران، ججوں، قاضیوں اور سرکاری ملازمین کی ذمہ داری ہمارے دین اور شاندار ورثے سے واجب ہے۔

اپیل میں زور دیا گیا کہ سرکاری ملازمین، عہدیداروں، ججوں، قاضیوں کے قریبی رشتہ داروں مثلاً ان کی شریک حیات اور زیر کفالت بچوں کی بھی وضاحت کی ضرورت ہے۔

اپیل میں کہا گیا کہ اکثریتی فیصلے میں جج کی اہلیہ اور بچے (زیر کفالت یا زیر کفالت نہ ہو) کے اثاثوں اور مالی معاملات کی جانچ پڑتال سے مستثنیٰ قرار دیا گیا ہے۔

حکومت نے اپیل میں دعوی کیا کہ ان کی اہلیہ اور بچوں کے نام پر غیر ملکی اثاثے، جو لندن کے 3 املاک حاصل کیے گئے ذرائع کے حوالے سے کوئی جواز پیش نہیں کرسکے ہیں۔

اپیل میں یہ الزام لگایا گیا کہ جسٹس قاضی فائز عیسیٰ اپنی اہلیہ کے غیر ملکی کرنسی بینک اکاؤنٹ سے کافی حد تک منسلک تھے جس کے ذریعے لندن کی جائیدادوں کو مالی اعانت فراہم کی جاتی تھی۔

اس اپیل میں سپریم کورٹ کے رجسٹرار آفس کے اس اعتراض پر بھی وضاحت کی گئی کہ املاک نظرثانی کی درخواست میں غیر مناسب زبان استعمال نہیں کی۔

نیشنل کمانڈ اینڈ آپریشن سینٹر (این سی او سی) کا کہنا ہے کہ کورونا وائرس کے پھیلاؤ کے خطرات کے باعث ایس او پیز پر عمل درآمد کرانے کے لیے خصوصی اقدامات کا آغاز کر دیا گیا ہے۔

این سی او سی سے جاری بیان میں کہا گیا کہ کورونا ایس او پیز کی خلاف ورزیوں، وائرس کی مختلف اقسام کی موجودگی اورعید الاضحیٰ کی آمد کے پیش نظر کورونا وائرس کے پھیلاؤ کے خطرات لاحق ہیں۔

ان خطرات سے نمٹنے کے لیے تمام ہائی رسک سیکٹرز میں ایس او پیز پر عمل درآمد کرانے کے لیے خصوصی اقدامات کا آغاز کر دیا ہے۔

بیان میں کہا گیا کہ اس سلسلے میں تمام صوبوں کو کورونا ایس او پیز پر سختی سے عمل درآمد کے لیے تفصیلی ہدایات جاری کی گئی ہیں۔

اس ضمن میں ماسک کے استعمال اور سماجی فاصلے اور حفاظتی اقدامات پر عمل درآمد کے لیے ٹیمیں تشکیل دے دی گئی ہیں۔

ان ہدایات کی روشنی میں مویشی منڈیوں اور عید سے متعلقہ ایس او پیز کے نفاذ کے لیے بھی احکامات جاری کیے گئے ہیں۔

این سی او سی نے کہا کہ گلگت بلتستان، آزاد کشمیر اور خیبر پختونخوا جانے والے سیاحوں کی ہوٹل بکنگ کے لیے ویکسی نیشن کو لازمی قرار دیا گیا ہے۔

ان مقامات کے داخلی راستوں اور ہوٹلوں میں داخلے پر ویکسین سرٹیفکیٹ کی تصدیق کے لیے طریقہ کار کا اجرا بھی کیا گیا ہے۔

اس کے علاوہ ریسٹورنٹس، جمنازیم، سینما گھروں اور شادی ہالز کی انتظامیہ اور آنے والے افراد کے لیے بھی ویکسی نیشن لازمی قرار دی گئی ہے اور اس کی تصدیق کے لیے بھی خصوصی احکامات جاری کیے گئے ہیں۔

این سی او سی نے بس اڈوں، ریلوے اسٹیشنز، اندرون اور بیرون شہر چلنے والی ٹرانسپورٹ، مساجد اور بازاروں کے لیے پہلے سے جاری ایس او پیز پر عمل درآمد کو یقینی بنانے کی ہدایت کی۔

بیان میں کہا گیا کہ ضلعی انتظامیہ کے لیے تفصیلی چیک لسٹس جاری کی گئی ہیں، خلاف ورزی کرنے والے افراد اور ادارے کے خلاف سخت تادیبی کارروائی عمل میں لائی جائے گی، جبکہ جاری کی گئی ہدایات میں معائنے کا مفصل طریقہ کار درج کیا گیا ہے۔

واضح رہے کہ پاکستان میں ہر گزرتے دن کے ساتھ کورونا کیسز میں اضافہ ہو رہا ہے۔

پاکستان میں رواں سال 30 مئی کے بعد پہلی بار کورونا وائرس کے مثبت کیسز کی شرح 4 فیصد پر پہنچ گئی ہے۔

گزشتہ چوبیس گھنٹے کے دوران سامنے آنے والے نئے ایک ہزار 980 کیسز میں سے 55 فیصد سندھ میں رپورٹ ہوئے۔

اس حوالے سے وزارت قومی صحت (این ایچ ایس) کے ایک عہدیدار نے ڈان کو بتایا تھا کہ یہ بدقسمتی کی بات ہے کہ جب بھی عوام کو کورونا سے متعلق پابندیوں میں چھوٹ دی گئی انہوں نے ایس او پیز کو نظر انداز کیا۔

انہوں نے زور دیا کہ ’لوگوں کو ذمہ داری کے ساتھ برتاؤ اور ایس او پیز پر سختی سے عمل کرنا چاہیے، بصورت دیگر ہمارے پاس پابندیاں عائد کرنے کے سوا کوئی دوسرا راستہ نہیں رہے گا کیونکہ ہم کووڈ 19 کی چوتھی لہر کی طرف بڑھ رہے ہیں’۔