All posts by News Editor

لاہور: ذیشان اشرف نے کشمیر پریمیئر لیگ کی پہلی سنچری بنا دی جب کہ اوپنر نے62 گیندوں پر ناقابل شکست107رنز کی اننگز کھیلی۔

مظفر آباد ٹائیگرز نے 196رنز کے ہدف کا تعاقب شروع کیا تو تیمور سلطان 4 رنز بناکر ذیشان اشرف کا ساتھ چھوڑ گئے، صہیب مقصود (17)کے بعد کپتان محمد حفیظ کسی گیند کا سامنا کیے بغیر ہی رن آؤٹ ہوگئے،ذیشان کا بیٹ رنز اگلتا رہا، ٹیم کے100رنز10ویں اوور میں مکمل ہوئے، سہیل اختر 17اور انور علی 15 رنز ہی بنا سکے۔

ایونٹ کی پہلی سنچری اسکور کرنے والے ذیشان اشرف نے ہدف کا حصول 18.3اوورز میں ممکن بنا دیا،اوپنر 62گیندوں پر 107اور وسیم جونیئر19رنز پر ناقابل شکست رہے، عاکف جاوید نے 2 وکٹیں لیں۔قبل ازیں کوٹلی لائنز نے ٹاس جیت کر بیٹنگ کا فیصلہ کیا۔
سید عبداللہ 16گیندوں پر 35رنز کی برق رفتار اننگز کھیل کر آؤٹ ہوئے، کامران اکمل(27) کے بعد احسان علی(11) میدان بدر ہوئے تو 10اوورز میں اسکور 85 تھا، آصف علی نے صرف 34گیندوں پر 67رنز کی طوفانی اننگز کھیلی،سیف بدر 28اور خالد عثمان 19 پر ناٹ آؤٹ رہے،کوٹلی لائنز نے 4 وکٹ پر 195کا مجموعہ حاصل کیا۔ سہیل تنویر، ارشد اقبال، عثمان یوسف اور محمد حفیظ نے ایک ایک کھلاڑی کو آؤٹ کیا۔

قبل ازیں پیر کی شب دوسرے میچ میں راولا کوٹ ہاکس نے مظفر آباد ٹائیگرز کو ایک رن سے مات دی،فاتح ٹیم نے حسین طلعت کے ناقابل شکست69اور احمد شہزاد کے50رنزکی مدد سے 7وکٹ پر 175رنز بنائے، وسیم جونیئر نے ہیٹ ٹرک کا کارنامہ انجام دیا، جواب میں مظفر آباد ٹائیگرز 7وکٹ پر 174رنز تک محدود رہے، محمد حفیظ نے44 اور ذیشان اشرف نے38رنز بنائے۔

سڈنی: سابق آسٹریلوی بیٹسمین اور چنئی سپر کنگز کے کوچ مائیک ہسی کو بھارت میں کورونا وائرس کے باعث باڈی بیگ میں چنئی منتقل کیا گیا۔

سابق آسٹریلوی بیٹسمین اور چنئی سپر کنگز کے کوچ مائیک ہسی بھارت میں کورونا وائرس کے خوفناک لمحات کو نہیں بھول پائے۔ ایونٹ کے دوران دہلی میں ان کا وائرس ٹیسٹ مثبت آگیا جس پر فرنچائز نے انھیں بہتر علاج کی غرض سے چنئی منتقل کردیا تھا۔

ہسی نے ایک انٹرویو میں کہا کہ مجھے منتقل کرنے سے قبل ایک حفاظتی لباس میں ملبوس ہونے کو کہا گیا جومکمل باڈی بیگ تھا،جب میں اس میں لیٹ رہا تھا تو خود کو چٹکی کاٹی کہ کوئی بْرا خواب دیکھ رہا ہوں یا یہ حقیقت ہے،شکر ہے یہ مشکل دن ختم ہو گئے۔

دبئی: اولمپکس کے دروازے پر کرکٹ نے دستک دے دی جب کہ آئی سی سی نے اپنے کھیل کو عالمی میلے میں شامل کرانے کی باضابطہ خواہش ظاہرکردی۔

انٹرنیشنل کرکٹ کونسل نے گذشتہ روز تصدیق کردی کہ وہ کرکٹ کو اولمپک گیمز کا حصہ بنوانے کی خواہش رکھتی ہے،اس مقصد کیلیے ورکنگ گروپ بھی قائم کردیا گیا جوکھیل کی لاس اینجلس 2028، برسبین 2032 اور اس کے بعد شیڈول عالمیگیمز میں شامل کرانے کیلیے کام کرے گا۔

آئی سی سی کے چیئرمین گریگ برکلے نے کہاکہ سب سے پہلے تو میں انٹرنیشنل اولمپک کمیٹی، ٹوکیو 2020 اور جاپان کے عوام کو اولمپکس کے کامیاب انعقاد پر مبارکباد پیش کرتا ہوں، ہم مستقبل میں کرکٹ کو بھی گیمز کا حصہ دیکھنا چاہتے ہیں۔

انہوں نے کہا کہ ہمارے کھیل کے دنیا بھر میں ایک بلین شائقین ہیں،ان میں سے 90 فیصد کرکٹ کو اولمپکس میں دیکھنا چاہتے ہیں، 92 فیصد کرکٹ شائقین کا تعلق جنوبی ایشیا سے ہے،30 ملین کرکٹ شائقین صرف امریکا سے تعلق رکھتے ہیں، یہ سب اپنے ہیروز کو ملک کیلیے اولمپک میڈل جیتتا ہوا دیکھنا چاہتے ہیں۔

واضح رہے کہ کرکٹ بڈ کیلیے قائم کردہ ورکنگ گروپ کے چیئرمین انگلینڈ اینڈ ویلزبورڈ کے سربراہ ای ین واٹمور ہوں گے،ممبران میں آئی سی سی کی غیرجانبدار ڈائریکٹر اندرا نوئی، زمبابوے کرکٹ کے توینگوا موکوہلانی، ایسوسی ایٹ ممبر ڈائریکٹر و ایشین کرکٹ کونسل کے نائب صدر مہندا والیپورم اور یو ایس اے کرکٹ کے پاراگ ماراٹھے شامل ہیں۔

اداکارہ نمرہ خان کو شدید تکلیف اور بیماری کے باعث ہسپتال منتقل کیا گیا، جہاں سے انہوں نے سوشل میڈیا پر شیئر کی گئی ایک پوسٹ میں مداحوں سے دعا کی اپیل کی ہے۔

اداکارہ نے 10 اگست کو رات گئے انسٹاگرام اسٹوریز میں بتایا کہ انہیں شدید تکلیف کے باعث ہسپتال منتقل کیا گیا ہے اور ساتھ ہی انہوں نے بستر سے ہاتھ میں کینولا کے لگے ہونے کی تصویر بھی شیئر کی۔

نمرہ خان نے انسٹاگرام اسٹوری میں مختص آڈیو بھی شیئر کی، جس میں انہوں نے مداحوں کو اپنی تکلیف سے متعلق تفصیلات سے آگاہ کیا۔

اداکارہ نے لوگوں سے جلد صحت یابی اور تکلیف دور ہونے سے متعلق دعا کی اپیل کی لیکن انہوں نے یہ واضح نہیں کیا کہ انہیں کس مسئلے کی وجہ سے ہسپتال منتقل کیا گیا۔

اداکارہ کی جانب سے شیئر کی گئی آڈیو میں انہیں یہ کہتے ہوئے سنا جاسکتا ہے کہ وہ شدید تکلیف میں ہونے کی وجہ سے پریشان بھی ہیں، اس لیے ان کی جلد صحت یابی کے لیے دعا کی جائے۔

نمرہ خان نے مداحوں کو کہا کہ وہ صرف ایک منٹ نکال کر ان کے لیے دعا مانگیں۔

اداکارہ نے یہ بھی واضح نہیں کیا کہ انہیں کہاں اور کس ہسپتال میں منتقل کیا گیا، بعد ازاں اداکارہ نے تصدیق کی کہ ان کی پیشاب کی نالی میں پتھری ہے، جس وجہ سے انہیں شدید درد کا سامنا ہے۔

اداکارہ کے مطابق ممکن ہے کہ ان کی پتھری نکالنے کے لیے آپریشن کیا جائے لیکن اس حوالے سے کچھ بھی کہنا قبل از وقت ہے۔

نمرہ خان کی بیماری کی خبر سامنے آنے کے بعد ان کے مداحوں نے تشویش کا اظہار کیا اور ان کی جلد صحت یابی کے لیے دعائیں کیں۔

اداکارہ مہوش حیات نے امریکی اداکار لیونارڈو ڈی کیپریو کو اپنے گھر بارات لانے کی دعوت دی ہے۔

اداکارہ نے اپنی شادی سے متعلق گزشتہ دنوں جیو نیوز کے پروگرام ایک دِن جیو کے ساتھ میں گفتگو کی تھی جس کا ایک ویڈیو کلپ آج کل سوشل میڈیا پر وائرل ہے۔

مہوش حیات نے خیالات کا اظہار کرتے ہوئے کہا کہ میں بہت زیادہ پریکٹیکل اور حقیقت پسند ہوں، چاہتی ہوں کہ جیون ساتھی رومانوی ہو تاکہ چیزوں کو متوازن طریقے سے لے کر چلا جائے۔

اداکارہ نے اپنی پسندیدگی سے متعلق کہا کہ مجھے سب سے بڑا کرش امریکی اداکار لیونارڈو ڈی کیپریو پر تھا اور اب بھی ہے۔

مہوش نے لیونارڈو ڈی کیپریو سے مخاطب ہوتے ہوئے کہا کہ اگر آپ جیو دیکھ رہے ہیں اور میری آواز آپ تک پہنچ رہی ہے تو آپ بارات لے کر آنا چاہتے ہیں تو میں تیار ہوں۔

اداکارہ کا کہنا تھا کہ اب تک پاکستان میں ایسا کوئی نہیں ملا جسے دیکھ کر گھنٹی بجی ہو۔

اداکارہ عائشہ عمر نے پہلی مرتبہ انکشاف کیا ہے کہ ان کے والد نے دو شادیاں کی تھیں اور ان کی ایک سوتیلی والدہ، بہن اور بھائی بھی ہیں۔

عائشہ عمر کو شوبز انڈسٹری میں کام کرتے ہوئے ڈیڑھ دہائی کا عرصہ گزر چکا ہے اور وہ متعدد مرتبہ اپنے والد، والدہ اور بھائی سے متعلق بات کر چکی ہیں۔

تاہم پہلی مرتبہ انہوں نے سوشل میڈیا پوسٹ کے ذریعے مداحوں کو آگاہ کیا کہ ان کے برطانوی نژاد سوتیلے بھائی اور بہن بھی ہیں۔

عائشہ عمر نے اپنے مرحوم والد کی برسی کے موقع پر 8 اگست کو والد سمیت اہل خانہ کی یادگار تصاویر شیئر کرتے ہوئے انکشاف کیا کہ ان کی ایک سوتیلی ماں بھی ہیں۔

عائشہ عمر نے والد اور والدہ کے ساتھ اپنی اور سگے بھائی کی تصویر بھی شیئر کی، جو اداکارہ کو کم عمری میں لی گئی تصویر ہے۔

علاوہ ازیں انہوں نے سگے بھائی عزیز عمر کے ہمراہ بھی یادگار تصویر شیئر کی، جب کہ انہوں نے سوتیلی والدہ، بہن و بھائی سمیت ان کے بچے کی تصویر بھی شیئر کی۔

اداکارہ نے والد کے ہمراہ، جو اپنی یادگار تصویر شیئر کی، اس میں وہ 2 سال سے زائد عمر کی دکھ رہی ہیں مگر انہوں نے پوسٹ میں بتایا کہ جب وہ 2 سال کی تھیں تو تب ان کے والد وفات کر گئے تھے۔

اداکارہ نے اپنی پوسٹ میں والد سے اظہار محبت کرتے ہوئے انہیں شفیق اور پیار کرنے والا انسان قرار دیا اور کہا کہ وہ گزرتے وقت کے ساتھ ان کی شخصیت کے نئے پہلوؤں سے آگاہ ہوتی جا رہی ہیں۔

اداکارہ نے اپنی پوسٹ میں والد کی وفات کے بعد والدہ کی جانب سے پرورش کیے جانے کے عمل کو بھی سراہا اور لکھا کہ انہوں نے دوسری شادی کرنے کے بجائے ان کی تن تنہا درست انداز میں پرورش کی۔

اداکارہ نے پوسٹ میں انکشاف کیا کہ ان کے والد نے دو شادیاں کر رکھی تھیں اور ان کی والدہ سے رشتہ ازدواج میں منسلک ہونے سے قبل ہی انہوں نے ایک برطانوی خاتون سے نکاح کر رکھا تھا۔

عائشہ عمر نے بتایا کہ ان کے والد کو برطانوی بیوی سے بھی دو بچے، ایک بیٹا اور ایک بیٹی ہیں اور وہ بھی دو سگے بہن و بھائی ہیں۔

اداکارہ نے اگرچہ اپنی سوتیلی والدہ، بھائی اور بہن سے متعلق انکشاف کیا اور ان کی تصاویر بھی شیئر کیں لیکن انہوں نے ان سے متعلق مزید کوئی تفصیلات نہیں بتائیں۔

اداکارہ نے یہ بھی واضح نہیں کیا کہ ان کے سوتیلے بہن و بھائی کے پاس پاکستانی شہریت بھی ہے یا نہیں اور وہ ان سے ملنے آتے ہیں یا نہیں؟

اداکارہ کی جانب سے کئی سال بعد سوتیلے بہن و بھائیوں کا انکشاف کیے جانے پر لوگوں نے خوشگوار تعجب کا اظہار کرتے ہوئے ان کے خاندان کے لیے نیک خواہشات کا اظہار کرتے ہوئے ان کے والد کی مغرت کی دعائیں بھی کیں۔

عائشہ عمر نے اگرچہ ماضی میں بھی سوتیلی بہن و بھائی کی تصاویر والد کی برسی پر شیئر کی تھیں مگر اس وقت انہوں نے ان سے متعلق کچھ نہیں بتایا تھا۔

بھارت کی عدالت نے فحش فلمیں بنانے کے کیس میں گرفتار بولی وڈ اداکارہ شلپا شیٹی کے شوہر راج کندرا کے عدالتی ریمانڈ میں مزید توسیع کردیا۔

راج کندرا کو ممبئی پولیس نے 19 جولائی کو فحش فلمیں بنانے، ماڈلز کو پورن فلموں میں کام کرنے کے لیے بلیک میل کرنے جیسے الزامات کے تحت گرفتار کیا تھا۔

ٹائمز آف انڈیا کے مطابق 10 اگست کو ممبئی کی سیشن کورٹ نے کرائم برانچ کی جانب سے مخالفت کی بنا پر راج کندرا کو مزید مدت کے لیے پولیس کے حوالے کردیا اور سماعت 20 اگست تک ملتوی کردی۔

راج کندرا کا 14 روزہ عدالتی ریمانڈ 10 اگست کو ختم ہوا تھا، جس پر انہیں عدالت میں پیش کیا گیا تھا۔

اس سے قبل ان کا 14 روزہ جسمانی ریمانڈ 27 جولائی کو مکمل ہوا تھا مگر اس وقت بھی عدالت نے ان کی ضمانت کی درخواست مسترد کرتے ہوئے انہیں عدالتی ریمانڈ پر جیل بھیج دیا تھا۔

یاد رہے کہ راج کندرا کو ممبئی کرائم برانچ نے 19 جولائی کو گرفتار کرکے عدالت سے ان کی تحویل حاصل کی تھی اور اب عدالت نے پولیس کی جانب سے ہی انہیں ضمانت دینے کی مخالفت کی وجہ سے مزید مدت کے لیے جیل بھیج دیا۔

ٹائمز آف انڈیا نے بتایا کہ کرائم برانچ پولیس نے عدالت کو بتایا کہ راج کندرا ان سے تفتیش میں تعاون نہیں کر رہے جب کہ انہوں نے متعدد شواہد بھی ضائع کردیے ہیں، جس کی وجہ سے تفتیش سست روی کا شکار ہے۔

پولیس نے عدالت کو بتایا کہ راج کندرا بااثر شخصیت ہیں، انہیں رہا کرنے سے کیس مزید سست روی کا شکار ہوگا اور کیس کے باقی ثبوتوں کو بھی مٹا دیا جائے گا۔

پولیس نے عدالت کو مزید آگاہ کیا کہ راج کندرا ’ہاٹ شاٹ‘ نامی پورن فلموں کی ایپلی کیشن کو لندن سے رجسٹریشن کروانے کے بعد چلا رہے ہیں اور ایپ کو انہوں نے اپنے بہنوئی کے نام سے رجسٹرڈ کروا رکھا ہے۔

ساتھ ہی پولیس نے مقامی عدالت کو بتایا کہ ممبئی ہائی کورٹ نے بھی گزشتہ ماہ جولائی کے اختتام پر راج کندرا کی ضمانت کی درخواست مسترد کردی تھی۔

اسی کیس میں تاحال پولیس نے راج کندرا کے خلاف باضابطہ چالان بھی پیش نہیں کیا جب کہ ان کی اہلیہ شلپا شیٹی کو بھی بیانات ریکارڈ کروانے کے لیے بلایا گیا تھا۔

شلپا شیٹی نے 23 جولائی کو اپنے بیان میں شوہر پر لگے الزامات کو مسترد کیا تھا جب کہ دیگر چند ماڈلز و افراد کے بھی اسی کیس میں بیانات ریکارڈ کیے جا چکے ہیں۔

شلپا شیٹی کے شوہر پر الزام ہے کہ وہ کئی سال سے متعدد ماڈلز کو بولی وڈ کی بڑی فلموں میں کام دلوانے کے بہانے سے ان کی فحش فلمیں بنواتے تھے اور انہیں ہاٹ شاٹ ایپ پر اپ لوڈ کرکے پیسے کمائے جاتے رہے۔

معروف بھارتی اداکارہ کریتی سینن نے ہر گھر میں موجود اشیاء سے اپنی جِلد کو خوبصورت بنانے کا طریقہ بتایا ہے۔

خوبصورت جلد ہر کوئی چاہتا ہے جس کیلئے خواتین گھریلو ٹوٹکوں سمیت مہنگے برانڈز کے بیوٹی پراڈکٹس اپنے چہرے پر استعمال کرکے تجربات کرتی ہیں تاہم کچھ کامیاب اور کچھ ناکام ہوجاتے ہیں۔

اس بات میں کوئی شک نہیں کہ کریتی سینن کا شکار خوبصورت اداکاراؤں میں ہوتا ہے اور انہوں نے بھارتی میڈیا کو اپنی جِلد کی خوبصورت کا راز بتایا ہے۔

اداکارہ نے بتایا کہ وہ چہرے پر گھر میں بنا فیس پیک استعمال کرتی ہیں۔

تو آئیے جانتے ہیں اداکارہ کریتی سینن اپنا فیس پیک کن چیزوں سے بناتی ہیں؟

اجزا

بیسن: 2 کھانے کے چمچ

گھر پر موجود کوئی بھی دال: ایک کھانے کا چمچ

ہلدی: ایک چٹکی

بادام: 4 عدد

کریم/ملائی: 2 کھانے کے چمچ

طریقہ

تمام اجزا کو مکسچر میں ڈالیں اور گرینڈ کرکے پیسٹ بنالیں، اس ماسک کو کسی ائیر ٹائٹ جار میں بند کرکے محفوظ کرلیں اور روز اپنے چہرے پر 20 منٹ کیلئے لگائیں۔ خشک ہونے پر اسے دھو لیں۔

بھارتی اداکارہ تاپسی پنو نے اعتراف کیا ہے کہ ان کے والدین ان کے مستقبل کے حوالے سے کافی پریشان ہیں۔

تاپسی اور ان کی بہن شگون پنو نے حال ہی میں بھارتی میڈیا کو انٹرویو دیا جس میں اداکارہ کی بہن نے بتایا کہ ہم نے شادی کی جگہ منتخب کرلی ہے بس اب شادی کا فیصلہ باقی ہے۔

اداکارہ نے کہا کہ ہمارے والدین بے صبری سے انتظار کررہے ہیں کہ دونوں بہنوں میں سے کوئی ایک شادی کیلئے ہاں کہہ دے، وہ شادی کیلئے کافی پریشان ہیں۔

تاپسی نے بتایا کہ میں جب بھی کسی شخص کے ساتھ ڈیٹ کرتی ہوں تو یہ بات ذہن میں رکھتی ہوں کہ اگر یہ شادی کے قابل ہے تب ہی میں اپنا وقت اسے دوں، میں اس کے ساتھ اپنا وقت اور توانائی ضائع نہیں کرسکتی جس کے ساتھ شادی ہی نہ کرنی ہو۔

خیال رہے کہ اداکارہ تاپسی پنو کی کافی عرصے سے ڈنمارک کے ایتھلیٹ بیڈمنٹن کے کھلاڑی میتھیاس کےساتھ دوستی ہے تاہم دونوں کی جانب سے کسی نے تاحال شادی سے متعلق کوئی بیان نہیں دیا۔

لائن بناؤ، بڈ جمع کراؤ ، اورینج لائن ٹرین کا اسٹیشن ٹھیکے پر لے جاؤ ، اورینج ٹرین کے تمام اسٹیشن آؤٹ سورس کیے جائیں گے، اسٹیشنز کو آؤٹ سورس کرکے حکومت زرائع آمدن حاصل کرے گی۔

اورینج ٹرین کے اسٹیشن ٹھیکے پر لینے ہو جائیں تیار، پنجاب حکومت نے اورینج ٹرین کے اسٹیشن ٹھیکے پر دینے کے لیے باقاعدہ بڈ مانگ لی، ماس ٹرانزٹ اتھارٹی نے کمپنیوں سے بڈ لینے کے لیے ٹینڈر جاری کردیا۔ اورینج ٹرین کے تمام اسٹیشن آؤٹ سورس کیے جائیں گے۔

اسٹیشنز کو آؤٹ سورس کرکے حکومت زرائع آمدن حاصل کرے گی ، اورینج ٹرین کے اسٹیشنوں پر ٹک شاپ،اے ٹی ایم مشینیں لگائی جائیں گی۔بڑے بڑے برینڈ اپنی تشہیر کیلئے اسٹیشز کا استعمال کرسکیں گے۔

یاد رہے کہ اورینج کے اسٹیشنز کو آؤٹ سورس کرنے کے لیے وزیر اعلی پنجاب منظوری بھی دے چکے ہیں، قانون پچیدگیاں دور کرنے کے بعد اب ماس ٹرانزٹ اتھارٹی نے کمپنیوں سے بڈ طلب کی ہے ۔